Vulavula Ririmi Leri Tengeke Kutani U Hanya Hi Masiku!
“Lav̌ani Yehova . . . lav̌ani ku lulama, mi lav̌a ku tiṭongahata; kumbe mi ta tifihla e sikwini ra v̌ukari bya Yehova.”—SOFONIA 2:3.
1. (a) Xana i tirhelo rihi leri swichudeni swi ri tirhisaka ku dyondza ririmi rimbe? (b) Hikwalaho ka yini u vulavula ririmi leri tengeke?
VADYONDZI va nga ha dyondza ririmi lerintshwa hi ku tirhisa tirhelo ra ntivo-ririmi kumbe tirhelo ra ririmi leri vulavuriwaka. Ehansi ka tirhelo ra ririmi, hi ntolovelo va tirhisa tibuku-mpfuno ivi va dyondza milawu ya ririmi. Eka tirhelo ra ririmi leri vulavuriwaka, va tekelela mimpfumawulo ni mavulavulelo ya marito lama vulavuriwaka hi mudyondzisi wa vona. Matirhelo lawa ha mambirhi ma tirhisiwa eku dyondzeni ka ‘ririmi leri tengeke.’ Naswona i swa nkoka leswaku hi vulavula ririmi leri loko hi ri na ntshembo wo “tifihla e sikwini ra v̌ukari bya Yehova.”—Sofonia 2:1-3; 3:8, 9.
2. Xana hi nga swi dyondzisa ku yini leswi swi nga ha vuriwaka milawu ya ntivo-ririmi ya ririmi leri tengeke?
2 Buku-mpfuno leyikulu leyi tirhisiwaka ku dyondza ririmi leri tengeke i Bibele. Ku yi dyondza hi ku chivirika swinene ni tibuku leti sekeriweke eBibeleni swi ku dyondzisa leswi swi nga ha vuriwaka milawu ya ntivo-ririmi ya ririmi leri tengeke. Dyondzo ya le kaya ya Bibele leyi fambisiwaka hi un’wana wa Timbhoni ta Yehova i masungulo lamanene. Eka lava ana se va tinyiketeleke eka Xikwembu, dyondzo ya Matsalwa ya nkarhi na nkarhi ni ya ku tiyimisela i ya nkoka. Kambe xana ku ni tindlela to hlawuleka leti tirhaka to dyondza ririmi leri tengeke? Naswona hi yihi mimpfuno leyi vaka kona hi ku ri vulavula?
Ndlela Yo Dyondza Ririmi Leri Tengeke
3. Hi yihi ndlela yin’wana yo dyondza ririmi leri tengeke?
3 Ndlela yin’wana yo dyondza ririmi leri tengeke i ku hlanganisa ntiyiso lowu u wu dyondzaka ni tinhla leti ana se u ti tivaka, hi laha mudyondzi wa ririmi a nga ha tirhisaka ha kona milawu leyintshwa yo hambana-hambana ya ntivo-ririmi ivi a yi yelanisa. Hi xikombiso, nkarhi wun’wana u nga ha va u swi tivile leswaku Yesu Kriste i N’wana wa Xikwembu, kambe u tiva switsanana mayelana ni mintirho ya yena. Ku sukela hi nkarhi wolowo, ku dyondza Bibele ku nga ha va ku ku dyondzisile leswaku sweswi Kriste wa fuma tanihi Hosi ya le tilweni ni leswaku hi nkarhi wa ku Fuma ka yena ka Gidi ra Malembe, vanhu lava yingisaka va ta yisiwa eku hetisekeni. (Nhlavutelo 20:5, 6) Ina, ku hlanganisa vutivi lebyintshwa lebyi ana se u byi tivaka, swi antswisa ku twisisa ka wena ririmi leri tengeke.
4. (a) Hi yihi ndlela yin’wana yo dyondza ‘milawu ya ntivo-ririmi’ ya ririmi leri tengeke, naswona i mhaka yihi ya Bibele leyi tirhisiwaka ku kombisa leswi? (b) Ku humelele yini loko Gidiyoni kun’we ni vanuna va yena va madzana-nharhu va teke goza? (c) Mhaka ya Gidiyoni yi hi dyondzisa dyondzo yihi?
4 Ndlela yin’wana yo dyondza ‘milawu ya ntivo-ririmi’ leri tengeke i ku anakanya hi swiendlakalo swa Bibele. Ku kombisa leswi: Ringeta ku ‘vona ni ku twa’ mhaka leyi rhekhodiweke eka Vaavanyisi 7:15-23. Vonani! Gidiyoni muavanyisi wa Israyele u ave mavuthu yakwe ma va mintlawa yinharhu, wun’wana ni wun’wana wu ri na dzana ra vavanuna. Emunyameni, va rhelela Ntshava ya Gilbowa handle ko ba huwa ivi va rhendzela nxaxa wa Vamidiyani lava etleleke. Xana va hlomile swinene, lava va madzana-nharhu? Hayi hi matlhari. Phela, a va ta tivangela ku hlekiwa hi tinhenha leti tikukumuxaka! Wanuna un’wana ni un’wana a a ri ni nanga ntsena, ndzheko lowukulu wa mati ni xisa endzeni ka ndzheko. Yingisa! Endzhaku ka xileriso vavanuna va dzana swin’we na Gidiyoni va ba tinanga ta vona ivi va faya mindzheko ya vona ya mati. Lavan’wana va madzana-mbirhi va endla leswi fanaka. Hinkwavo loko va tlakusa swisa leswi lumekiweke, u va twa va huwelela va ku: “Banga ra Yehova ni ra Gidion!” Vona ndlela leyi leswi swi chavisaka Vamidiyani ha yona! Va huma ematendeni ya vona va ha ri ni vurhongo hi ku pfuxiwa hi ku chavisa ka timboni leti humesaka swivumbeko leswi nga ni mindzhuti ivi swi vanga nchavo wa vukholwa-hava. Loko Vamidiyani va sungula ku baleka, vavanuna va Gidiyoni va hambeta va ba tinanga ta vona, ivi Xikwembu xi endla leswaku va dlayana hi mabanga ya vona. Mawaku dyondzo ya matimba ya ririmi leri tengeke! Xikwembu xi nga swi kota ku kutsula malandza ya xona ku ri hava mavuthu ya nyimpi ya vanhu. Ku tlula kwalaho, “Yehova a nga ka a nga ṭhiki tiko ra yena hikwalaho ka v̌ito ra yena leri’kulu.”—1 Samuel 12:22.
5. Xana minhlangano ya Vukriste yi nga hi pfunisa ku yini ku lulamisa ku vulavula ka hina?
5 Loko vadyondzi va dyondzisiwa ririmi rimbe hi ku tirhisa tirhelo ra ririmi leri vulavuriwaka, va ringeta ku phindha kahle mpfumawulo ni xivumbeko xa marito ya mudyondzisi. Vona minkarhi leyinene swonghasi leyi nga kona yo vulavula ririmi leri tengeke eminhlanganweni ya Vukriste! Kwalaho hi twa ndlela leyi va tiphofulaka ha yona hi ririmi rero ra ntiyiso wa Matsalwa, naswona hi nga ha va ni lunghelo ro hlamula hi hexe. Xana ha chava leswaku hi nga tshuka hi vule leswi hoxeke? Hi nga swi pfumeleli sweswo swi hi karhata, hi mhaka ya leswi xihoxo lexi ololoxiweke kahle hi nkulu la ungamelaka nhlangano wo tanihi Dyondzo ya vhiki na vhiki ya Xihondzo xo Rindza xi nga antswisaka ririmi ra hina. Hikwalaho, vana kona ni ku hlanganyela nkarhi na nkarhi eminhlanganweni ya Vukriste.—Vaheveru 10:24, 25.
Ku Nghenelela Ka Leswi Nga Tengangiki
6. Hikwalaho ka yini ku ri ni ku hambana lokukulu exikarhi ka Timbhoni ta Yehova ni minhlangano ya vukhongeri bya Vujagana?
6 Lava va twarisaka xikongomelo xa Yehova ni ku twarisa Mfumo wa yena wa le tilweni va vulavula ririmi leri tengeke tanihi Timbhoni ta yena. Va tivisa vito rakwe naswona va n’wi tirhela “ŝiṅwe,” kumbe hi ku twanana. (Sofonia 3:9) Hambi loko vukhongeri bya Vujagana byi ri ni Bibele, a byi ri vulavuli ririmi leri tengeke kumbe ku vitana vito ra Xikwembu hi ripfumelo. (Yoel 2:32) Va hava rungula leri twananaka leri sekeriweke eMatsalweni. Ha yini? Hi mhaka ya leswi va rhangisaka mikhuva ya vukhongeri, tifilosofi ta misava ni ku titsongahatela tipolitiki ku ri na Rito ra Xikwembu. Swikongomelo, mintshembo ni maendlelo ya vona i swa misava leyi yo homboloka.
7. I ku hambana kwihi exikarhi ka Timbhoni ta Yehova ni vukhongeri bya mavunwa loku kombisiwaka eka 1 Yohane 4:4-6?
7 Vujagana—kahle-kahle, mfumo wa misava hinkwayo wa vukhongeri bya mavunwa—a byi vulavuli rona ririmi leri Timbhoni ta Yehova ti vulavulaka rona. Lexi tsakisaka, eka lava va vulavulaka ririmi leri tengeke, muapostola Yohane u tsarile a ku: “Loko mi ri ṅwina . . . mi v̌a Šikwembu, kutani mi v̌a hlurile hikuv̌a l’a nga na ṅwina, u tlula hi v̌ukulu l’a nge misav̌eni. V̌ona i v̌a misav̌a; hikwalaho v̌a v̌ulav̌ula hi ŝa misav̌a; kutani misav̌a ya v̌a yingisa. Hina hi v̌a Šikwembu; l’a tiv̌aka Šikwembu wa hi yingisa; l’a nga riki wa Šikwembu a nga hi yingisi.” (1 Yohane 4:4-6, BX) Malandza ya Yehova ma hlule vadyondzisi va mavunwa hikuva Xikwembu, lexi nga ni vun’we ni vanhu va xona, ‘i xikulu eka Diyavulosi, loyi a nga ni vun’we ni misava,’ vandla ra vanhu vo homboloka. Tanihi leswi vagwinehi va nga “v̌a misav̌a” naswona va nga ni moya wa vona wo homboloka, “v̌a v̌ulav̌ula hi ŝa misav̌a; kutani misav̌a ya v̌a yingisa.” Kambe vanhu lava fanaka ni tinyimpfu va yingisela lava nga va Xikwembu, hi ku xiya leswaku vanhu va Yehova va vulavula ririmi leri tengeke ra ntiyiso wa Bibele lowu nyikeriwaka hi nhlengeletano ya yena.
8. Hi wihi mfungho wa munhu lowo homboloka?
8 Vugwinehi lebyikulu a byi vhumbiwile, naswona ‘xihundla xa vuhomboloki’ se a xi ri karhi xi tirha eka lembe xidzana ro sungula C.E. Hi ku famba ka nkarhi, vanhu lava amukeleke—kumbe ku tirhisa—swikhundlha swa ku dyondzisa ebandlheni va dyondzise tidyondzo to tala ta mavunwa. Ririmi ra vona a ri ri ekule swinene ni ku tenga. Hikwalaho, ku humelele “munhu wa ku homboloka” la hlanganeke, vafundhisi va Vujagana, lava namarheleke mikhuva ya vukhongeri bya mavunwa, tifilosofi ta misava ni tidyondzo leti nga riki ta matsalwa.—2 Vatesalonika 2:3, 7.
Ririmi Leri Tengeke Ri Twiwa eMisaveni Hinkwayo
9. I swiendlakalo swihi swa vukhongeri leswi a swi ri kona hi nkarhi wa lembe xidzana ra vu-19?
9 I ntlawa wuntsongo ntsena wa vanhu lava chavaka Xikwembu lowu “[lweleke] ku pfumela loku vakwetsimi va ku nyikiweke kan’we.” (Yuda 3) Kambe xana vapfumeri volavo a va ta kumeka kwihi? Hi malembe xidzana, vukhongeri bya mavunwa byi hlayise mintshungu emunyameni wa moya, kambe Xikwembu a xi va tiva volavo vantsongo lava a va amukeriwe hi xona. (2 Timotiya 2:19) Kutani exikarhi ka ku hundzuka ka mabindzu, vumaki ni ntshaminsano swa lembe xidzana ra vu-19, ku humelele marito lama hambaneke ni mpfilumpfilu lowu tolovelekeke wa mpfilungano wa vukhongeri. Ntlawa lowuntsongo a wu ringeta ku hlaya swikombiso swa minkarhi ivi wu vhumba ku ta ka Yesu ra vumbirhi, kambe a hi hinkwavo lava a va vulavula ririmi leri tengeke.
10. Xana i ntlawa wihi wa ‘ku ta ka vumbirhi’ lowu Xikwembu xi wu hlawuleleke ku vulavula ririmi leri tengeke, naswona ha yini swi tiyisekisa leswaku voko ra Yehova a ri ri na wona?
10 Hambi swi ri tano, hi 1879 swi ve erivaleni leswaku hi rihi rito ra ‘ku ta ka vumbirhi’ leri a ri ri karhi ri hlawuriwa hi Yehova ku vulavula ririmi leri tengeke tanihi Timbhoni ta yena. Hi nkarhi wolowo, ntlawa lowuntsongo lowu dyondzaka Bibele lowu rhangeriwaka hi Charles Taze Russell a wu hlangana ePittsburgh, Pennsylvania, eU.S.A. A va tiyiseka leswaku ku ta ka vumbirhi ka Yesu a ku ta sungula vukona bya yena lebyi nga vonakiki, leswaku nkarhi wa mahlomulo ya misava a wu ta, ni leswaku leswi a swi ta landzeriwa hi ku Fuma ka Gidi ra Malembe ka Kriste loku nga ta tisa ku kondleteriwa ka Paradeyisi emisaveni, ni vutomi lebyi nga heriki eka vanhu lava yingisaka. Hi July 1879 Swichudeni leswi swa Bibele swi sungule ku humesa magazini lowu sweswi emisaveni hinkwayo wu tiviwaka tanihi Xihondzo xo Rindza. Tikopi ta 6 000 ntsena ta nkandziyiso wa wona wo sungula ti hangalasiwile. Kambe ‘voko ra Yehova’ a ri ri na tona Timbhoni teto, hikuva magazini lowu sweswi wu kandziyisiwa hi tindzimi ta 111 hi avhareji ya vukandziyisi lebyi tlulaka 15 000 000 eka nkandziyiso wun’wana ni wun’wana.—Ringanisa Mintirho 11:19-21.
11, 12. Hi yihi mintiyiso yin’wana ya Matsalwa leyi twisisiwaka hi lava vulavulaka ririmi leri tengeke?
11 Hi ku tirhisa Bibele ni tibuku ta Timbhoni ta Yehova, ngopfu-ngopfu hi ku chumayela ka Vakriste lava va chivirikaka ka mahungu lamanene, ririmi leri tengeke ri ve leri tiviwaka emisaveni hinkwayo. Mawaku mimpfuno leyinene swonghasi leyi tsakeriwaka hi lava va ri vulavulaka! Ematshan’wini yo vula leswaku ‘Xikwembu i Xikwembu, Kriste i Xikwembu, ni leswaku Moya lowo Kwetsima i Xikwembu’ eka xihundla lexi rharhanganeke xa Vunharhu-un’we, va pfumelelana ni xiyimo xa Bibele xa leswaku Yehova u Tlakuke Swinene, Yesu Kriste la nga ntsongo i N’wana wa xona naswona moya lowo kwetsima i matimba ya Xikwembu lama tirhaka ni lama hlamarisaka. (Genesa 1:2; Psalma 83:18; Matewu 3:16, 17) Lava va vulavulaka ririmi leri tengeke va swi tiva leswaku munhu a nga hundzukanga ku suka eka xivumbeko xa le hansi xa vutomi kambe u tumbuluxiwe hi Xikwembu xa rirhandzu. (Genesa 1:27; 2:7) Va xiya leswaku moya-xiviri wu tshika ku va kona eku feni—yinhla leyi herisaka ku chava vafi. (Eklesiasta 9:5, 10; Ezekiel 18:4) Tihele ti twisisiwa ti ri sirha leri tolovelekeke ra munhu, ku nga ri ndhawu ya ndzilo wa nxaniso lowu lunghiseleriweke hi xikwembu xa tihanyi. (Yobo 14:13) Nakambe va swi tiva leswaku ku pfuxiwa ka vafi i ntshembo wa vafi lowu nyikiweke hi Xikwembu.—Yohane 5:28, 29; 11:25; Mintirho 24:15.
12 Lava va vulavulaka ririmi leri tengeke va xixima ngati ni vutomi. (Genesa 9:3, 4; Mintirho 15:28, 29) Va swi xiya leswaku vutomi bya Kriste bya laha misaveni i nxavo wa nkutsulo wa vanhu lava yingisaka. (Matewu 20:28; 1 Yohane 2:1, 2) A va va khongeli ‘vakwetsimi’ nikantsongo, hi ku tiva leswaku swikhongelo swa vona swi fanele ku kongomisiwa eka Yehova Xikwembu ha Yesu Kriste. (Yohane 14:6, 13, 14) Tanihi leswi Rito ra Xikwembu ri avanyisaka ku gandzela swikwembu swa hava, swifaniso a swi tirhisiwi eku gandzeleni ka vona. (Eksoda 20:4-6; 1 Vakorinto 10:14) Naswona hi ku venga vukholwa-hava va papalata khombo ra vudemona, leri nakambe ri avanyisiwaka eBibeleni.—Deuteronoma 18:10-12; Vagalatiya 5:19-21.
13. Ha yini lava vulavulaka ririmi leri tengeke va nga pfilunganyekangi?
13 Malandza ya Yehova, lama vulavulaka ririmi leri tengeke, a ma pfilunganyekangi malunghana ni laha ma nga kona enxaxamelweni wa nkarhi. Yehova u ma dyondzisile leswaku ma le “nkarini wa makumu,” Yesu a ri kona tanihi moya wo vangama lowu nga vonakiki. (Daniel 12:4; Matewu 24:3-14; 2 Timotiya 3:1-5; 1 Petro 3:18) A ri ni mavuthu ya matimba ya le tilweni, Kriste u le kusuhi ni ku ya enyimpini a hetisisa ku avanyisa ka Xikwembu ehenhla ka mafambiselo lawa yo biha ya swilo. (Daniel 2:44; Nhlavutelo 16:14, 16; 18:1-8; 19:11-21) Ina, ni lava va vulavulaka ririmi leri tengeke va karhi va twarisa mahungu lamanene ya leswaku Mfumo wa Xikwembu ehansi ka Kriste ku nga ri khale wu ta tisa mikateko eka vanhu hinkwavo lava yingisaka emisaveni ya paradeyisi. (Esaya 9:6, 7; Daniel 7:13, 14; Matewu 6:9, 10; 24:14; Luka 23:43) A hi swona ntsena, naswona hi lo wungula ehenhla ntsena! Hakunene, ririmi leri tengeke hi rona leri fuweke swinene leri nga ra risima ku tlula hinkwato emisaveni!
14. I mimpfuno yihi yin’wana leyi tsakeriwaka hi lava va vulavulaka ririmi leri tengeke?
14 Mimpfuno leyi tsakeriweke hi lava va vulavulaka ririmi leri tengeke yi katsa ku “rhula ka Xikwembu” loku hlayisaka timbilu ni matimba ya mianakanyo. (Vafilipiya 4:6, 7) Va yingisa milawu ya Bibele, leyi antswisaka rihanyo, ntsako ni ku aneriseka loku tisiwaka hi ku tsakisa Yehova. (1 Vakorinto 6:9, 10) Ina, lava vulavulaka ririmi leri tengeke va ni ntshembo wa vutomi lebyi nga heriki emisaveni leyintshwa leyi tshembisiweke hi Xikwembu.—2 Petro 3:13.
Ri Tirhise Kumbe U Lahlekeriwa Hi Rona
15. Xana u nga pfuneka njhani hi ku ri dyondza khwatsi ririmi leri tengeke?
15 Leswaku u ta kota ku vulavula ririmi leri tengeke emisaveni leyintshwa, u fanele sweswi u ri tiva khwatsi lerova ri va ririmi leri u anakanyaka ha rona. Loko munhu a dyondza ririmi, eku sunguleni u anakanya hi ririmi ra ka vona ivi a hundzuluxela mianakanyo ya yena yi ya eka lerintshwa. Kambe loko a ya a tolovela ririmi leri, u sungula ku anakanya ha rona a nga boheki ku hundzuluxela. Hi ku fanana, hi ku chivirikela ku dyondza, u nga ku kuma ku twisisa ko tano lokunene ka ririmi leri tengeke loku u nga ta tiva ha kona ku tirhisa milawu ni misinya ya milawu ya Bibele eku tlhantlheni ka swiphiqo ivi u tshama u ri “[endleleni] ya v̌utomi.”—Psalma 16:11.
16. Xana ku nga humelela yini loko ririmi leri tengeke u nga ri tirhisi nkarhi hinkwavo?
16 U fanele nkarhi na nkarhi u tirhisa ririmi leri tengeke, hikuva u ta lahlekeriwa hi vuswikoti byo ri vulavula kahle. Hi xikombiso: Malembe lama hundzeke, van’wana va hina va dyondze ririmi rimbe. Hi nga ha tsundzuka marito yo karhi eka ririmi rero kambe kumbexana hi lahlekeriwa hi ku twisisa ka hina ririmi hi mhaka ya leswi hi nga ri tirhisangiki nkarhi na nkarhi. Ku nga humelela leswi fanaka eka ririmi leri tengeke. Loko hi nga ri tirhisi nkarhi na nkarhi, hi nga lahlekeriwa hi ku ri twisisa naswona leswi swi ta va ni mimbuyelo leyi nga ni khombo emoyeni. Kutani ke, a hi ri vulavuleni nkarhi na nkarhi eminhlanganweni ni le vutirhelini bya Vukriste. Mintirho leyi, ku katsa ni dyondzo ya munhu hi xiyexe, swi ta hi endla hi kota ku vula swilo kahle hi ririmi leri tengeke. Naswona xiya nkoka wonghasi lowu swi nga wona!
17. Hi swihi leswi kombisaka leswaku ku vulavula ku nga va mhaka yo ponisa vutomi kumbe yo byi dlaya?
17 Ku vulavula ririmi leri tengeke swi nga va mhaka ya vutomi kumbe rifu. Leswi swi kombisiwe exikarhi ka nyimpi ya rixaka ra Efrayimi ra Vaisrayele na Muavanyisi Yefta wa Giliyadi. Leswaku va tiva Vaefrayimi lava ringetaka ku balekela entsungeni wa Nambu wa Yordani, Vagiliyadi va tirhise rito ra mpfumelelo wo hundza leri nge “Xibolete,” leri a ri ri ni mpfumawulo wa xirhangi “xi.” Vavanuna va Efrayimi va tixenge hi voxe eka varindzi va mixaxa ya Vagiliyadi emahlalukweni ya Yordani hi ku “Sibolete” ematshan’wini ya “Xibolete,” hi ku nga humesi kahle mpfumawulo wa rito rero. Hikwalaho ka sweswo, 42 000 wa Vaefrayimi va dlayiwile! (Vaavanyisi 12:5, 6, Mahungu Lamanene) Hi laha ku fanaka, leswi vafundhisi va Vujagana va swi dyondzisaka swi nga ha twala swi yelana ni ririmi leri tengeke eka lava va nga wu tolovelangiki kahle ntiyiso wa Bibele. Kambe ku vulavula hi ndlela ya vukhongeri bya mavunwa swi ta vangela ku lovisiwa hi siku ra vukari bya Yehova.
Ku Yima Hi Ri Un’we
18, 19. Xana Sofonia 3:1-5 yi kombisa yini?
18 Loko yi kombetela eka Yerusalema wa khale la nga tshembekiki ni mufanekiseri wakwe wa manguva lawa, Vujagana, Sofonia 3:1-5 yi ri: “Wu ni khombo muti lo’wu tiarisaka, wu ni tšhyaka, muti lo’wu šanisaka. A wu yingiselanga rito, a wu amukeli ku tshinyiwa, a wu ṭhembanga Yehova; a wu ṭhinelanga e ka Šikwembu ša wona. Tihosi ta wona, i tinghala le’ti ḍumaḍumaka e šikari ka wona; v̌aav̌anyisi v̌a wona, i timhisi ta madyambu le’ti nga hlayiseriki nṭšhumu ŝa munḍuku. V̌aprofeta v̌a wona i v̌atikurisi, e v̌av̌anuna v̌a mav̌unwa; v̌aprista v̌a wona v̌a nyamise šiv̌andla le’ši kwetsimaka, v̌a hombolokisa nawu. Yehova o lulamile šikari ka wona; a nga ka a nga endli ŝo biha, hi siku riṅwana ni riṅwana o humesa ku av̌anyisa ka yena e ku v̌onakaleni, a nga ṭhiki ku endlisa ŝeŝo; kambe lowo biha a nga tiv̌i tingana.” Xana marito lawa ma vula yini?
19 Yerusalema wa khale ni Vujagana bya manguva lawa byi xandzukele Yehova naswona byi tithyakise hi vugandzeri bya mavunwa. Xidyoho xa varhangeri va vona xi vange ntshikilelo. Ku nga khathariseki xitsundzuxo xa Xikwembu lexi phindha-phindhiweke, a va yingisanga, ni ku tshinela eka xona. Tihosana ta vona a ti fana ni tinghala ta vukari lebyikulu, lava hi ku tikukumuxa va honisaka vululami. Vaavanyisi va vona va hombolokise vululami ku fana ni timhisi leti nga ni ndlala. Vaprista va vona va ‘thyakise leswi kwetsimaka ni ku tlula nawu’ wa Xikwembu. Hikwalaho Yehova u kusuhi ni ‘ku hlanganisa matiko ni ku hlengeleta mimfumo, leswaku a ta veka ku avanyisa ka yena henhla ka vona, vukari bya yena hinkwabyo lebyi pfurhaka.’—Sofonia 3:8.
20. (a) Xana ku fanele ku endliwa yihi leswaku ku poniwa siku ra vukari bya Yehova? (b) Xana u nga ntshembela njhani ku tsakela mikateko leyi nga heriki ya Xikwembu?
20 Siku ra vukari bya Yehova ri tshinela hi ku hatlisa. Hikwalaho, leswaku u ponela emisaveni leyintshwa ya Xikwembu, dyondza ni ku vulavula ririmi leri tengeke handle ko tipfinyinga. Hi ku endla tano ntsena, u nga kuma nsirhelelo eka khombo ra moya sweswi ni le ka khombo leri tshinelaka hi ku hatlisa ra misava hinkwayo. Timbhoni ta Yehova ti twarisa siku ra vukari bya Xikwembu kun’we ni rungula leri tiyisaka mbilu ra Mfumo wa xona. Va tsaka swonghasi ku vulavula hi ku kwetsima ka vuhosi bya xona! (Psalma 145:10-13) Hlanganyela na vona, kutani u nga va ni ntshembo wa ku tsakela mikateko leyi nga heriki yo huma eka Musunguri wa ririmi leri tengeke, Yehova Hosi Leyikulu.
A Wu Ta Hlamula Njhani?
◻ Xana hi tihi tindlela tin’wana to dyondza ririmi leri tengeke?
◻ Ha yini swi ri leswi pfunaka ku vulavula ririmi leri tengeke?
◻ Xana ku nga humelela yini loko nkarhi na nkarhi u nga tirhisi ririmi leri tengeke?
◻ Xana munhu a nga ri ponisa ku yini siku ra vukari bya Yehova ivi a tsakela mikateko leyi nga heriki?
[Xifaniso lexi nga eka tluka 16]
Gidiyoni ni vavanuna vakwe va ba tinanga ta vona ivi va tlakusa timboni ta vona
[Xifaniso lexi nga eka tluka 18]
Ku sukela hi 1879 ku ya emahlweni swi vekiwe erivaleni leswaku Charles Taze Russell kun’we ni vanakulobye va yena a va ri karhi va tirhisiwa hi Xikwembu ku kondletela ririmi leri tengeke
[Swifaniso leswi nga eka tluka 20]
Xana u un’we ni Timbhoni ta Yehova eku vulavuleni ka ririmi leri tengeke?