Vuchavelo Bya Vona—I Vunwa!

“Hi endle v̌unwa e šitšhav̌elo ša hina, ni ku šisa šisirelo ša hina.”—ESAYA 28:15.

1, 2. (a) I nhlengeletano yihi namuntlha leyi faneleke ku xiya leswi humeleleke eka mfumo wa khale wa Yuda? (b) I ntshembo wihi lowu hoxeke lowu Yuda a ri ri na wona?

XANA marito wolawo namuntlha ma tirha eka Vujagana hi laha ma tirheke ha kona eka mfumo wa khale wa tinxaka timbirhi ta Yuda? Kunene, ma tirha! Naswona ku yelana koloko ku kombisa khombo ra Vujagana bya manguva lawa. Swi vula leswaku khombo rero ri ta wela nhlangano wolowo wa vugwinehi.

² Le n’walungwini wa Yuda a ku ri ni mfumo wa tinxaka ta khume ta Israyele. Loko Israyele a tikombise a ri hava ripfumelo, Yehova u n’wi pfumelele ku hluriwa hi Asiriya hi 740 B.C.E. Mfumo wa makwavo wakwe wa le dzongeni, Yuda, wu tokote xiendlakalo lexi xo vava, kambe handle ko kanakana u ehlekete leswaku nchumu wo tano a wu nga ta tshuka wu n’wi humelerile. Varhangeri vakwe va tikukumuxile va ku, ‘xana tempele ya Yehova a yi le Yerusalema ke? Xana a hi vanhu lava rhandziwaka hi Xikwembu? Xana vaprista ni vaprofeta va hina a va vulavuli hi vito ra Yehova?’ (Ringanisa Yeremia 7:4, 8-11.) Varhangeri volavo va vukhongeri a va tiyiseka leswaku va hlayisekile. Kambe a a va hoxisile! A va ri hava ripfumelo tanihi vamakwavo wa vona va le n’walungwini. Hikwalaho, leswi humeleleke eka Samariya a swi ta humelela eka Yerusalema.

3. Ha yini Vujagana byi tiyiseka malunghana ni vumundzuku, kambe xana ku ni xivangelo lexinene xa ntshembo wa byona ke?

³ Hi ndlela leyi fanaka, Vujagana byi tivula lebyi nga ni vuxaka byo hlawuleka ni Xikwembu. Bya tibumabumela byi ku, ‘phela, mfumo wa hina wu ni makume ya magidi ya tikereke ni vafundhisi lava byi thwaseleke kun’we ni madzana ya timiliyoni ta valandzeri. Nakambe hi ni Bibele, naswona loko hi gandzela hi tirhisa vito ra Yesu. Hakunene, ha rhandziwa hi Xikwembu!’ Kambe leswi endlekeke eka Yerusalema wa khale swi yima tanihi xitsundzuxo xo tiya. Ku nga khathariseki swiendlakalo swa sweswinyana swa politiki, leswi nga tolovelekangiki, ha swi tiva leswaku Yehova u ta herisa Vujagana ni vukhongeri lebyin’wana hinkwabyo bya mavunwa.

“Ntwanano Ni Rifu”

4. Xana i ntwanano wihi lowu Yuda a ri ehleketa leswaku ri wu endlile?

⁴ Eminkarhini ya khale, Yerusalema la nga tshembekangiki u amukele switsundzuxo swo tala eka vaprofeta va ntiyiso va Xikwembu, kambe a nga swi kholwanga. Ku ri na sweswo, u tibume hi leswaku rifu ri nge tshuki ri n’wi wisela eSheol, sirha, hi laha ri wiseleke mfumo wa Israyele wa le n’walungwini ha kona. Muprofeta Esaya u huhuteriwe ku byela Yuda a ku: “Hikwalaho, twanani rito ra Yehova, ṅwina v̌ahleki la’v̌a fumaka tiko leri ra Yerusalema! Mi ri: Hi endlile ntwanano ni rifu, hi hlangene ni šiv̌andla ša v̌afi; hambi khombo ri hunḍa tani hi ndambi, a ri nga hi fikeli; hikuv̌a hi endle vunwa e šitšhav̌elo ša hina, ni ku šisa e šisirelo ša hina.”—Esaya 28:14, 15.

5. (a) A ku ri yini ntwanano wa Yuda ni rifu lowu ku vulavuriwaka ha wona? (b) I xitsundzuxo xihi lexi nyikiweke Hosi Asa lexi Yuda ri xi rivaleke?

⁵ Ee, varhangeri va Yerusalema a a va ehleketa leswaku, hi ndlela yo fanekisela, a a va ri ni ntwanano ni rifu ni Sheol, leswaku muti wa vona wu ta sirheleriwa. Kambe xana ntwanano lowu vuriwaka wa Yerusalema na rifu a wu vula leswaku u hundzukile eswidyohweni swakwe ni leswaku se a a tshemba Yehova leswaku a ponisiwa? (Yeremia 8:6, 7) Nikatsongo! Ku ri na sweswo, u hundzukele eka vafumi va vanhu va tipolitiki leswaku a pfuniwa. Kambe ku tshembela ka yena vanakulobye va misava a ku ri vunwa. Vanhu va tiko lava a a va tshembile a a va nga ta n’wi ponisa. Naswona leswi a fularheleke Yehova, Yehova u fularhele Yerusalema. Swi endleke hi laha muprofeta Azariya a tsundzuxeke hosi Asa ha kona: “Yehova o na ṅwina loko mi ri na yena; ku nga ku loko mi ṅwi lav̌a, o ta pfumela ku kumiwa hi ṅwina; kambe loko mi ṅwi ṭhika, o ta mi ṭhika.”—2 Tikronika 15:2.

6, 7. Xana i magoza wahi lawa Yuda ri ma tekeke ku tiyisa nsirhelelo wa rona, kambe ku ve ni vuyelo byihi?

⁶ Hi ku tshembela eka vanakulobye va vona va tipolitiki, varhangeri va Yerusalema a va tiyiseka leswaku a ku na ‘nhlaselo lowukulu wa xitshuketa’ wa mavuthu lama hlaselaka lowu a wu ta ta ekusuhi na vona leswaku wu kavanyeta ku rhula ni ku hlayiseka ka vona. Loko a xungetiwe hi mavuthu lama hlanganeke ya Israyele na Siriya, Yuda u hundzulukele eka Asiriya leswaku a pfuniwa. (2 Tihosi 16:5-9) Endzhaku, loko a chavisiwe hi mavuthu ya nyimpi ya Babilona, u kombele nseketelo eka Egipta ivi Faro a pfumela, a rhumela vuthu leswaku ri ya pfuneta.—Yeremia 37:5-8; Ezekiel 17:11-15.

⁷ Kambe mavuthu ya Babilona a ma ri ni matimba swinene, naswona mavuthu ya Egipta ma boheke ku tlhentlha. Ku veka ka Yerusalema ntshembo eka Egipta ku tikombe ku ri xihoxo, naswona hi 607 B.C.E., Yehova u n’wi fularherile endzovisweni lowu a wu vhumbeke. Hikwalaho varhangeri ni vaprista va Yerusalema a va hoxile! Ku tshembela ka vona eka vanakulobye va misava leswaku va kuma ku rhula ni nsirhelelo a ku ri “v̌unwa” lebyi herisiweke hi nhlaselo wa xitshuketa wa mavuthu ya Babilona.

Ku Ala ‘Ribye Leri Ringiweke’

8. Vujagana byi teke xiyimo lexi fanaka ngopfu ni lexiya xa Yuda wa khale hi ndlela yihi?

⁸ Xana ku ni xiyimo lexi fanaka na xona namuntlha? Ina, xi kona. Vafundhisi va Vujagana na vona va tshemba leswaku a ku na khombo leri nga ta va wela. Hi ku fanana, va vula hi laha Esaya a vhumbeke ha kona: “Hi endlile ntwanano ni rifu, hi hlangene ni šiv̌andla ša v̌afi; hambi khombo ri hunḍa tani hi ndambi, a ri nga hi fikeli; hikuv̌a hi endle vunwa e šitšhav̌elo ša hina, ni ku šisa e šisire[le]lo ša hina.” (Esaya 28:15) Ku fana na Yerusalema wa khale, Vujagana byi tshemba mintwanano ya misava leswaku yi ta tisa ku rhula ni nsirhelelo naswona vafundhisi va byona va ala ku chavela eka Yehova. Phela, a va ri tirhisi ni vito ra yena, naswona va sola va tlhela va xanisa lava xiximaka vito rolero. Vujagana ni vafundhisi va byona, byi endle leswi swi endliweke hi vaprista lavakulu va Vayuda hi lembe xidzana ro sungula loko va ale Kriste. Hi ku fanana, va te “a hi na hosi loko a nga ri Khezari ntsena.”—Yohane 19:15.

9. (a) I vamani lava namuntlha va tsundzuxaka Vujagana hi ndlela leyi fanaka ni leyi Esaya a tsundzuxeke Yuda ha yona? (b) Vujagana byi fanele ku hundzukela eka mani?

⁹ Namuntlha, Timbhoni ta Yehova ti tsundzuxa leswaku ku nga ri khale nhlaselo wa mavuthu lama lovisaka wu ta herisa Vujagana hi ku helela. Ku tlula kwalaho, ti kombetela endhawini ya ntiyiso yo chavela eka yona eka ndzoviso wolowo. Ti tshaha Esaya 28:16, leyi nge: “Hikwalaho, Hosi Yehova o v̌urisile, a ku: V̌onani, nḍi v̌eke Sion e ribye ra masungulo, le’ri ringiweke, ra le yinhleni, ra risima, le’ri tiyisiweke. L’a tiseketelaka ka rona a nga ka a nga hatlisi ku tšhav̌a.” I mani ‘ribye leri ra risima’? Muapostola Petro u tshahe marito lawa ivi a ma tirhisa eka Yesu Kriste. (1 Petro 2:6) Loko Vujagana a byi lavile ku rhula ni Hosi ya Yehova, Yesu Kriste, a byi ta va byi papalate ndzoviso wa xihatla lowu taka.—Ringanisa Luka 19:42-44.

10. Xana i ku tikatsa kwihi loku Vujagana byi ku hlakuleleke?

¹⁰ Hambi swi ri tano, a byi endlanga tano. Ku ri na sweswo, eku lavisiseni ka byona ku rhula ni nsirhelelo, byi endla leswaku byi tsakeriwa hi varhangeri va tipolitiki va matiko hi ku tirhisa vusukumbele—byi endla leswi ku nga khathariseki xitsundzuxo xa Bibele xa leswaku xinakulobye ni misava i vulala ni Xikwembu. (Yakobo 4:4) Ku tlula kwalaho, hi 1919 byi seketele Ntwanano wa Matiko hi matimba tanihi ntshembo wo antswa lowu nga tisaka ku rhula. Ku sukela hi 1945 byi veke ntshembo wa byona eka Nhlangano wa Matiko. (Ringanisa Nhlavutelo 17:3, 11.) Xana ku tikatsa ka byona ni nhlangano lowu ku kule ku fikela kwihi?

11. Xana i ku yimeriwa kwihi loku vukhongeri byi nga na kona eka UN?

¹¹ Buku ya sweswinyana yi nyika mianakanyo loko yi ku: “Tinhlengeletano ta Makhatoliki leti yimeriweke eka UN a ti le hansi ka makume-mbirhi-mune. Vo talanyana va varhangeri va vukhongeri bya misava va wu endzerile nhlangano wa matiko hinkwawo. Leswi swi tsundzukekaka ngopfu i maendzo ya Mukwetsimi Phophu Paul VI hi nkarhi wa Nhlengeletano ya Misava hi 1965 na Phophu John Paul II hi 1979. Vukhongeri byo tala byi ni swikombelo, swikhongelo, tinsimu ni vutirheli lebyi hlawulekeke bya Nhlangano wa Matiko. Swikombiso swa nkoka ngopfu hi leswi swa vupfumeri bya Makhatoliki, Unitarian-Universalist, Baptist ni bya Bahai.”

Mintshembo Ya Hava Ya Ku Rhula

12, 13. Ku nga khathariseki mintshembo leyi hangalasiweke ya leswaku ku rhula ku le vugimamusi, ha yini Timbhoni ta Yehova ti tiyiseka leswaku switsundzuxo swa tona i swa ntiyiso?

¹² Un’wana wa varhangeri va tipolitiki va matimba ngopfu va misava u phofule mintshembo ya vanhu vo tala loko a te: “Rixaka leri ra vanhu emisaveni ri nga ha vona ku fika ka nkarhi lowu nga ha tlheriselekiki endzhaku wa ku rhula ematin’wini ya nhluvuko.” Xana a a tiyisile? Xana swiendlakalo swa sweswinyana swi vula leswaku switsundzuxo swa Timbhoni ta Yehova leswi ti swi twariseke malunghana ni ku avanyisa ka Yehova ka matiko swi nga ka swi nga vi ntiyiso? Xana Timbhoni ta Yehova ti hoxile?

¹³ E-e, a ti hoxanga. Ta swi tiva leswaku leswi ti swi vulaka i ntiyiso hikuva ti veka ntshembo wa tona eka Yehova ni le Bibeleni, leyi nga Rito ra Xikwembu ntsena leri nga ntiyiso. Tito 1:2 yi ri: ‘Xikwembu a xi hembi.’ Hikwalaho ti ni ntshembo lowu tiyeke wa leswaku loko vuprofeta bya Bibele byi ku nchumu wo karhi wu ta endleka, wu ta endleka handle ko tsandzeka. Yehova hi yexe u ri: “Ŝi tano ni rito ra mina, leri humaka e noṅwini wa mina: Ri nga ka ri nga tlheleri ka mina ri nga si tira ntšhumu, ri nga si endla ku ranḍa ka mina, ri nga si hetisa makungu ya mina.”—Esaya 55:11.

14, 15. (a) Varhangeri va Yuda a va twarisa yini loko Yerusalema ri ri kusuhi ni ku lovisiwa hi 607 B.C.E.? (b) I yini leswi Pawulo a vhumbeke leswaku swi ta twarisiwa loko ndzoviso wa xihatla wu nga si wela misava leyi? (c) Xana hi nga langutela yini eku chaputeni ka xitiviso lexi profetiweke eka 1 Vatesalonika 5:3?

¹⁴ Emalembeni ya le mahlweni ka ku lovisiwa ka Yerusamela hi 607 B.C.E., Yeremiya u vike leswaku varhangeri a va huwelela, “Ku rurile, ku rurile!” (Yeremia 8:11) Hambi swi ri tano, leswi a ku ri vunwa. Yerusalema u lovisiwile eku hetisiseni ka switsundzuxo leswi huhuteriweke swa vaprofeta va ntiyiso va Yehova. Muapostola Pawulo u tsundzuxe leswaku swin’wana leswi fanaka swi ta endleka esikwini ra hina. U vule leswaku vanhu va ta huwelela va ku “Ku rhulile, ku hava xo karata.” Kambe u te, hi nkarhi wolowo, “ku onhaka” ku “ta va wela henhla hi xitshuketa.”—1 Vatesalonika 5:3.

¹⁵ Loko hi nghena enguveni ya va-1990, kun’wana ni kun’wana maphepha-hungu ni timagazini a swi vula leswaku Nyimpi ya Vusukumbele yi herile ni leswaku ku rhula ka misava se ku le kusuhi swinene. Kambe hi nkarhi wolowo nyimpi ya xitshuketa yi tlhekekile eMiddle East. Hambi swi ri tano, ku nga ri khale xiyimo xa misava xi ta yisa eyinhleni leyi ku huwelela ka leswaku “ku rhulile, ku hava xo karhata,” loku profetiweke eka 1 Vatesalonika 5:2, 3 ku nga ta nyanya ku fikela emaninginingini. Leswi mintshembo ya hina yi tiyisiweke swinene eRitweni ra Xikwembu, ha swi tiva leswaku, loko maninginingi wolawo ma fikeleriwa, ku avanyisa ka Xikwembu ku ta tisiwa hi xihatla naswona handle ko tsandzeka. Ku hava switiviso leswi lulamisiweke swa ku rhula ni nsirhelelo leswi faneleke ku hi endla hi ehleketa leswaku ndzoviso lowu vhumbiweke hi Xikwembu wu nge ti. Ku avanyisa ka Yehova ku rhekhodiwe hi laha ku nga cincekiki eRitweni ra xona ku nga Bibele. Vujagana, kun’we ni vukhongeri hinkwabyo bya mavunwa, byi ta herisiwa. Kutani ku avanyisa ka Yehova loku lovisaka ku ta phofuriwa ehenhla ka misava hinkwayo ya Sathana. (2 Vatesalonika 1:6-8; 2:8; Nhlavutelo 18:21; 19:19-21) Leswi Timbhoni ta Yehova ti tiyisekaka leswaku Yehova u ta hetisisa rito ra yena, ti ya emahlweni ti hiteka ehansi ka nkongomiso wa ntlawa wa nandza wo tshembeka ni wa vutlhari naswona ti yi xiyisisa hi vukheta ndlela leyi swiendlakalo swa misava swi paluxiwaka ha yona. (Matewu 24:45-47) Entiyisweni, ku hava matshalatshala ya munhu yo tisa ku rhula lama faneleke ku hi endla hi ehleketa leswaku Yehova u tshike kungu rakwe ro tisa khombo ra ndzoviso wa xihatla eka Vujagana lebyi byarheke swidyoho.

“Xikwembu I Vuchavelo Bya Hina”

16, 17. Xana Timbhoni ta Yehova, ti hlamurisa ku yini loko van’wana va siringeka hi ku kongoma ka rungula ra tona?

¹⁶ Van’wana va nga ha siringeka hi ku tiyimisela ka Timbhoni ta Yehova eku twariseni ka leswi. Hambi swi ri tano, loko ti vula leswaku vafumi va vukhongeri bya Vujagana va chavele elunghiselelweni ra mavunwa, ti hlamusela ntsena leswi Bibele yi swi vulaka. Loko ti vula leswaku Vujagana byi lulameriwe hi nxupulo hikuva i xiphemu xa misava, ti vula ntsena leswi Xikwembu hi xoxe xi swi vulaka eBibeleni. (Vafilipiya 3:18, 19) Ku tlula kwalaho, hikwalaho ka leswi Vujagana byi vekaka ntshembo wa byona emakungwini ya vanhu lama lunghiseleriweke hi misava leyi, hakunene byi seketela xikwembu xa misava leyi, Sathana Diyavulosi, loyi Yesu a nga te i tata wa mavunwa.—Yohane 8:44; 2 Vakorinto 4:4.

¹⁷ Hikwalaho, Timbhoni ta Yehova ti ri: Loko hi ri hina, a hi khutazi mintshembo ya mavunwa ya ku rhula ka misava hikwalaho ka ku cinca ka xiyimo xa politiki. Ematshan’wini ya sweswo, hi phindha marito ya mupisalema lama nge: “Šikwembu i v̌utšhav̌elo bya hina. V̌ana v̌a v̌anhu i ŝa hav̌a nṭena, v̌ana v̌a v̌akulukumba i mav̌unwa nṭena; loko ngi v̌a v̌ekiwa šikalweni, a v̌a ta v̌ev̌uka nṭena; hikwav̌o i ŝa hav̌a nṭena.” (Psalma 62:8, 9) Makungu ya vanhu ya ku kondletela ni ku hlayisa Vujagana ni mafambiselo lawa ya swilo hinkwawo i vuxisi, mavunwa! Hinkwawo ka wona loko ma hlanganisiwile a ma na ntamu wo siva swikongomelo swa Yehova, ma fana ni ku tlula ku vula marito yo tala lama nga twaliki!

18. I xitsundzuxo xihi xa mupisalema lexi xi faneleke namuntlha?

¹⁸ Nakambe Timbhoni ta Yehova ti tshaha Psalma 33, tindzimana 17 ku ya ka 19, leti nge: “Hantši [ya Egipta, leyi fanekiselaka nyimpi ya] hluleka ku ponisa, munhu a nga hlayisiwi hi matimba hikwawo ya [y]ona. V̌onani, mahlo ya Yehova ma le henhla ka la’va ṅwi tšhav̌aka, e henhla ka la’v̌a ṭhembaka v̌unene bya yena, e ku nṭhunša mimoya ya v̌ona e ku feni, ni ku v̌a hanyisa e nkarini wa ndlala.” Namuntlha Vakriste va ntiyiso va tshembela eka Yehova ni Mfumo wakwe wa le tilweni, lunghiselelo leri nga rona ntsena ra ku tisa ku rhula loku nga heriki.

Vujagana I ‘Ndhawu Yo Kandziyeriwa’

19. Ha yini ku titshega hi minhlangano ya tipolitiki leswaku yi tisa ku rhula ka misava ku ri mavunwa?

¹⁹ Ku tshemba xisivi xihi na xihi lexi endliweke hi munhu ku yimela Mfumo wa Xikwembu, swi endla xisivi xexo xi va xifaniso, nchumu wo wu gandzela. (Nhlavutelo 13:14, 15) Xisweswo, ku titshega hi mavandla ya tipolitiki, yo tanihi Nhlangano wa Matiko, ku kuma ku rhula ni nsirhelelo i vuxisi, i vunwa. Malunghana ni swilo swo tano swa mintshembo ya mavunwa, Yeremiya u ri: “Šifaniso ša yena i v̌unwa ntsena, a ku na ku hefemula ka šona. Ŝilo ŝeŝo i v̌uhav̌a, i mitiro ya ku kanganyisa; e siku ŝi tshinyiwaka ŝi ta hela.” (Yeremia 10:14, 15) Hikwalaho, tihanci ta nyimpi ta Egipta wo fanekisela, ku nga matimba ya vuthu ra tipolitiki ra matiko namuntlha, ti nge xi sirheleli xivandla xa vukhongeri bya Vujagana esikwini ra byona ra maxangu. Xinakulobye xa vukhongeri bya Vujagana ni misava leyi kunene xi ta tsandzeka ku byi sirhelela.

20, 21. (a) Xana ku humelele yini eka Ntwanano wa Matiko, naswona ha yini Nhlangano wa Matiko wu nga ta ka wu nga humeleli? (b) Esaya u swi kombise njhani leswaku swinakulobye swa Vujagana ni misava swi nga ka swi nga byi ponisi?

²⁰ Vujagana a byi veke mintshembo ya byona eka Ntwanano wa Matiko, kambe wu herisiwe ku nga si fika ni Armagedoni. Sweswi byi hundzisele xinakulobye xa byona eka Nhlangano wa Matiko. Kambe ku nga ri khale wu ta fanela ku langutana ni “ku lwa ka siku lerikulu ra Xikwembu xa matimba hinkwawo,” naswona a wu nge poni. (Nhlavutelo 16:14) Hambi ku ri UN lowu pfuxetiweke wu nge pfuki wu tise ku rhula ni nsirhelelo. Rito leri profetiweke hi Xikwembu ri komba leswaku nhlengeletano ya Nhlangano wa Matiko ni swirho swa yona swa matiko yi “ta lwa ni Xinyimpfana [Kriste ematimbeni ya Mfumo], kambe Xinyimpfana xi ta yi hlula, hikuva i Hosi ya tihosi.”—Nhlavutelo 17:14.

²¹ Timbhoni ta Yehova ti vula hi ku tiyisela leswaku Vujagana a byi nge poni eka swinakulobye swa byona ni misava ya Sathana. Naswona loko ti vula leswi, ti kombisa ntsena leswi Bibele hi yoxe yi swi vulaka. Esaya 28:17, 18 yi tshaha Yehova tanihi loyi a nge: “Nḍi ta teka [ku avanyisa] nḍi [ku] endla šipimo, ni ku lulama nḍi ku endla širinganiso, kutani šihangu ši ta kukula šitšhav̌elo ša v̌unwa, ni mati ma ta kukuleta šisirelo ša ṅwina. Ntwanano wa ṅwina ni rifu wu ta endliwa ŝa hav̌a, ni ku hlangana ka ṅwina ni sira ku nga ka ku nga yimi, khombo leri taka tani hi ndambi, loko ri fika ri ta mi wutla.”

22. Loko ku avanyisa loku hetisekeke ku endliwa eka Vujagana, xana ku ta humelela yini?

²² Loko xiboho xa ku avanyisa xa Yehova xi hetisisiwa, xi ta hetisisiwa hi vululami lebyi hetisekeke. Naswona xisekelo xa ntshembo wa Vujagana, “ntwanano . . . ni rifu,” xi ta kukuriwa hi ku helela onge hi ndhambi ya xitshuketa. Esaya u ya emahlweni a ku: “Munḍuku ni munḍuku wu ta hunḍa, nhlekanhi ni v̌usiku; mi ta dyonḍa hi ku ṭhukisiwa nṭsena.” (Esaya 28:19) Vona ku chava loku nga ta va kona eka vahlaleri ku vona matimba lama heleleke ya ku avanyisa ka Yehova! Vona ku chava loku nga ta va kona eka vafundhisi va Vujagana ni valandzeri va vona, loko va swi tiva nkarhi se wu hundzile, leswaku a a va veke ntshembo wa vona eka vunwa!

Vito Ra Yehova I “Xihondzo Lexi Tiyeke”

23, 24. Ematshan’wini yo lava nsirhelelo emisaveni leyi, xana Timbhoni ta Yehova ti ta endla yini?

²³ Kambe ku vuriwa yini hi Timbhoni ta Yehova? Hambi ti langutane ni rivengo ni nxaniso wa matiko hinkwawo, ti phikelela ku tshama ti hambanile ni misava. A ti rivali ni siku ni rin’we leswi Yesu a swi vuleke hi valandzeri vakwe a ku: “A hi va misava, kukotisa mina ndzi nga riki wa misava.” (Yohane 17:16) Ku ta fikela emasikwini lawa ya makumu, ti veka ntshembo wa tona eMfun’weni wa Yehova, ku nga ri emakungwini ya munhu. Hikwalaho, khombo ra Vujagana a ri nge ti tshukisi Timbhoni ta Yehova. Hi laha Esaya a vhumbeke ha kona: ‘La kombisaka ripfumelo a nga ka a nga khomiwi hi ku chava.’—Esaya 28:16.

²⁴ Swivuriso 18:10 yi ri: “V̌ito ra Yehova i khokholo ro tiya, l’a lulameke o chavela ka rona, o ṭhama e ku tlakukeni.” Hikwalaho hi rhamba hinkwavo vanhu lava fanaka ni tinyimpfu ku chavela eka Yehova ni le Mfun’weni wakwe ha Kriste. Tanihi ndhawu ya vutumbelo, Yehova a hi vuxisi! Mfumo wakwe ha Kriste a hi vunwa! Vuchavelo bya Vujagana i vunwa, kambe vuchavelo bya Vakriste va ntiyiso i ntiyiso.

Xana U Nga Hlamusela?

◻ Yuda wa khale u kume vuchavelo eka vunwa hi ndlela yihi?

◻ I ndlela yihi leyi Vujagana byi ringeteke ku titumbeta evunweni ha yona?

◻ Xana Esaya u n’wi tsundzuxise ku yini Yuda, naswona Timbhoni ta Yehova ti xi phofula njhani xitsundzuxo lexi fanaka namuntlha?

◻ Vujagana byi ta swi kumisa ku yini leswaku ntshembo wa byona wu hoxile?

◻ Ku hambana ni Vujagana, xana i xiyimo xihi lexi Timbhoni ta Yehova ti xi hlayisaka?

[Bokisi leri nga eka tluka 17]

MINTSHEMBO LEYIKULU LEYI VURIWAKA EHENHLENI KA UN

“I ro sungula leswaku vaaki va matiko hinkwawo va hlangana hi mpfhuka ka Nyimpi ya Vumbirhi ya Misava. Vurhangeri bya Nhlangano wa Matiko, lowu a ko ehleketiwa ha wona ntsena, sweswi wu tiyisa xivono xa vasimeki va wona . . . Hikwalaho misava yi nga tirhisa nkarhi lowu ku hetisisa xitshembiso xa fambiselo ra misava leyintshwa lexi ku nga khale xi ri kona.”—Muungameri Bush wa United States loko a vulavula ni tiko rero hi rungula leri nge “State of the Union” January 29, 1991