Xiviko Xa Vahuweleri Va Mfumo
Va Tshembele Eka Yehova
TIMBHONI TA YEHOVA ti lerisiwe hi Yehova ku chumayela mahungu lamanene ya Mfumo emisaveni hinkwayo leswaku vanhu va tinxaka hinkwato va ta va ni nkarhi wo tiva hi ta misava leyintshwa ya Xikwembu. Ematikweni man’wana, hakanyingi hi nsusumeto wa vafundhisi va Vujagana, ntirho wa hina wa yirisiwa. Sweswo swi tano etikweni rin’wana le Afrika. Kambe Timbhoni ta Yehova kwalaho ti endla hi laha Hosi Davhida a endleke ha kona. U te: “Nḍi ṭhemba Šikwembu, a nḍi tšhav̌i ntšhumu.” (Psalma 56:11) Mintokoto ya vamakwerhu etikweni rero yi kombisa leswaku va tshembela eka Yehova naswona va hambeta ni ntirho wa yena wa nkoka.
Mbhoni leyi tirhaka tanihi nhloko ya xikolo yi sindzise ku yingisa “Xikwembu ku tlula vanhu,” yi twarisa vukala-tlhelo bya yona eka timhaka ta Tiko. (Mintirho 5:29) Yi biwe ku vava kutani a yi ta avanyisiwa tanihi muxengi. Un’wana ni un’wana a a anakanya leswaku yi ta dlayiwa. Hambi swi ri tano, Mbhoni yi tshembele eka Yehova. Yi tshame yi tshembekile naswona yi hlamusele swivangelo swa ripfalo swa xiyimo xa yona. Vuyelo byi ve byihi? U ntshunxiwile naswona u tlheriseriwe edorobeni ra ka vona, laha vatirhela-Mfumo lava nga n’wi ba va tisoleke. Mbhoni leyi yo tshembeka yi tlheriseriwe endzhaku entirhweni wa yona wa vudyondzisi naswona yi tlakuseriwe exikhundlheni xa mukamberi wa swikolo!
Mufambisi wa xikolo xin’wana u hlongole mudyondzisi loyi a nga Mbhoni. Endzhaku ka n’hweti yin’we mufambisi loyi u amukele buku leyi nge U Nga Hanya Hi Masiku aParadeyisini eMisaveni eka phayona ro hlawuleka kutani a amukela dyondzo ya Bibele. Endzhaku ko heta ndzima 6, u tshike ntirho tanihi mufambisi wa xikolo, naswona yena kun’we ni nsati wa yena va sungule ku va kona eminhlanganweni hinkwayo ya Timbhoni ta Yehova. Mixo wun’wana wa Sonto mudyondzisi la hlongoriweke u hlamarisiwile ni ku tsakisiwa hi ku hlangana ni wanuna luya a nga n’wi hlongorisa ni ku tiva leswaku a a ri egondzweni ra ku va makwerhu wa moya.
Ntokoto wun’wana wo huma etikweni rolero wu kombisa ndlela leyi Timbhoni ta Yehova hakantsongo-ntsongo ti nghenisaka xichavo eka malunghiselelo ya Yehova ni ku tirhela ku hlayisa nhlengeletano yi basile. Phayona ro hlawuleka leri tirhaka ensin’wini leyi nga yoxe ri tokote nkaneto lowukulu. Tanihi leswi a ri huma erixakeni rimbe ni le ndhawini yin’wana, valala va ntiyiso a va lava ku ri hlongola emutini. Hambi swi ri tano, hosi ya muti yi kombetele eka mahanyelo ya rona lamanene ni vuyelo lebyinene bya ntirho wa rona naswona a yi ku pfumelelanga ku hlongoriwa ka rona. Hosi a a yi xiye leswaku hi mpfhuka ku fika phayona leri ro hlawuleka, vanhu a va xixima vulawuri lebyi fumaka hi ku hakela mindzuvo ni ku endla ntirho wa le gondzweni wa vanhu hinkwavo kan’we hi vhiki.—Varhoma 13:1, 7.
Kutani, vusiku byin’wana Mbhoni yin’wana yi khomiwile hi xiendlo xa vuoswi ni wansati la nga riki Mbhoni. A a ku ri ni xisandzu, kutani phayona ro hlawuleka ri vitaneriwe emahlweni ka hosi, leyi nga ri holovela yi ku: “Hi loyi makwenu la khomiweke hi vuoswi. N’wina Timbhoni ta Yehova a mi hambananga ni vukhongeri byin’wana.” Hambi swi ri tano, phayona ro hlawuleka ri hlamuserile ri ku: “Hambi leswi hi nga hetisekangiki, hi hambanile ni vukhongeri byin’wana hikuva a hi tumbeti swiendlo swa lava va endlaka swidyoho leswikulu.”
Mbhoni leyi yi osweke yi hete nkarhi ekhotsweni naswona yi hakele nandzu. Ku tlula kwalaho, u tsemiwile ebandlheni tanihi mudyohi la nga hundzukiki. Xiendlo lexi xi tsakise hosi kutani yi siva milomu ya lava a va rhuketela Timbhoni ta Yehova. Hosi yi te: “Mi nga vulavuli swo biha hi Timbhoni ta Yehova. Ti ni ntiyiso. Xiendlo xo tano a xi endliwi hi vukhongeri byin’wana.”
Timbhoni to tshembeka etikweni rolero ti landzelela xikhutazo xa Psalma 37:3: “Ṭhemba Yehova, u endla le’ŝo lulama, u aka e tikweni, u šura v̌unene.” Xana hi ta tshembela eka Yehova hi laha Vakriste lava va endlaka ha kona?