Landzelela Tintswalo Ta Rirhandzu Minkarhi Hinkwayo
“Loyi a landzelelaka ku lulama ni tintswalo ta rirhandzu u ta kuma vutomi, ku lulama ni ku dzuneka.”—SWIVURISO 21:21, NW.
1. Ha yini hi fanele ku langutela lava va kongomisiwaka hi moya wa Xikwembu leswaku va kombisa tintswalo?
YEHOVA u ni tintswalo ni ntwela-vusiwana. I “Šikwembu ša tintŝalo ni v̌unene, le’ši hlwelaka ku kariha, le’ši teleke tintŝalo [ta rirhandzu, NW] ni ku ṭhembeka.” (Eksoda 34:6, 7) Kutani ke, hi laha ku twisisekaka, mihandzu ya moya wa xona lowo kwetsima yi katsa rirhandzu ni tintswalo.—Vagalatiya 5:22, 23.
2. I swikombiso swihi leswi hi nga ta swi xiya sweswi?
2 Lava va kongomisiwaka hi moya wa Yehova lowo kwetsima, kumbe matimba lama tirhaka, va kombisa muhandzu wa wona wa tintswalo. Va kombisa tintswalo ta rirhandzu evuxakeni bya vona ni van’wana. Hakunene, va landzela xikombiso xa muapostola Pawulo, va tibumabumela tanihi vatirheli va Xikwembu ‘hi tintswalo’ na hi tindlela tin’wana. (2 Vakorinto 6:3-10) Moya wa vona wa tintswalo, ntwela-vusiwana ni wa ku rivalela wu twanana ni vumunhu bya Yehova, loyi a “teleke tintŝalo [ta rirhandzu, NW]” ni loyi Rito ra yena ri nga ni swikombiso swo tala swa tintswalo. (Psalma 86:15; Vaefesa 4:32) Xana hi nga dyondza yini eka swin’wana swa swona?
Tintswalo Ti Hi Endla Lava Pfumalaka Vutianakanyi Ni Lava Nga Ni Malwandla
3. Abrahama a a ri xikombiso eku kombiseni ka tintswalo hi ndlela yihi, naswona i xikhutazo xihi lexi Pawulo a xi nyikaka malunghana na leswi?
3 Mupatriarka Abrahama (Abrama)—‘Nakulobye wa Yehova’ ni “tatana . . . eka hinkwavo lava pfumelaka”—u veke xikombiso lexinene eku kombiseni ka tintswalo. (Yakobo 2:23; Varhoma 4:11) Yena ni ndyangu wa yena, ku katsa na Lota, n’wana wa xinuna wa makwavo wa yena, va suke emutini wa Kalediya wa Uru kutani va nghena eKanana hi ku lerisiwa hi Xikwembu. Hambi leswi Abrahama a a ri mukhalabye ni nhloko ya ndyangu, a a ri ni tintswalo ni ku pfumala vutianakanyi loko a pfumelela Lota ku hlawula madyelo lamanene, loko yena a teke lama a ma siyiwile. (Genesa 13:5-18) Tintswalo leti fanaka ti nga hi susumetela ku pfumelela van’wana ku pfuneka, loko hina hi lahlekeriwa. Tintswalo to tano to pfumala vutianakanyi ti twanana ni xitsundzuxo xa muapostola Pawulo lexi nge: “Munhu a nga tshuki a tilavela leswi nga swa yena ntsena, kambe a a ehlekete ni swa van’wana.” Pawulo hi byakwe ‘u tsakisile vanhu hinkwavo eka swilo hinkwaswo, hayi ku lava ku pfuneka ka yena n’wini kambe lokuya ka lavo tala, leswaku va ta ponisiwa.’—1 Vakorinto 10:24, 33.
4. Abrahama na Sara va hakerisiwe ku yini hikwalaho ka ku kombisa tintswalo hi ndlela ya malwandla?
4 Minkarhi yin’wana tintswalo ti teka xivumbeko xa malwandla lama humaka embilwini. Abrahama ni nsati wa yena, Sara, va ve ni tintswalo ni malwandla eka vaendzi vanharhu lava hundzeke siku rin’wana. Abrahama u va sindzisile leswaku va tshama nkarhinyana, loko yena na Sara va lunghisa swakudya leswinene swa vaendzi hi ku hatlisa. Vaendzi volavo va kumeke va ri tintsumi ta Yehova, laha yin’wana ya tona yi hundziseleke xitshembiso xa leswaku Sara la dyuhaleke ni la nga riki na n’wana a a ta va ni n’wana wa xinuna. (Genesa 18:1-15) Mawaku hakelo leyonghasi hikwalaho ka malwandla ya tintswalo!
5. Gayo u kombise tintswalo hi ndlela yihi, naswona hi nga endla nchumu lowu fanaka hi ndlela yihi?
5 Ndlela yin’wana leyi Vakriste hinkwavo va nga kombisaka tintswalo ha yona i ku va ni malwandla. (Varhoma 12:13; 1 Timotiya 3:1, 2) Hi laha ku faneleke, malandza ya Yehova ma kombisa malwandla hi tintswalo eka valanguteri lava famba-fambaka. Leswi swi hi tsundzuxa hi tintswalo leti kombisiweke hi Gayo, Mukriste wa lembe xidzana ro sungula. U endle ‘ntirho wo tshembeka’ hi ku amukela vamakwavo lava endzaka hi malwandla—naswona a ku ri “vaendzi” lava eku sunguleni a a nga va tivi. (3 Yohane 5-8) Hakanyingi ha va tiva lava hi nga va kombisaka malwandla hi tintswalo. Kumbexana hi xiya leswaku makwerhu wa xisati u ni gome. Munghana wa yena wa vukati a nga ha va loyi a nga riki mupfumeri kumbe hambi ku ri munhu loyi a tsemiweke. Wolowo i nkarhi lowunene swonghasi wo kombisa tintswalo hi ku n’wi rhamba ku ta tsakela xinakulobye xa moya ni swakudya ni ndyangu wa hina nkarhi na nkarhi! Hambi loko hi nga endli nkhuvo, hakunene ndyangu wa hina wu ta kuma ntsako eku kombiseni ka tintswalo eka makwerhu wo tano wa xisati. (Ringanisa Swivuriso 15:17.) Naswona handle ko kanakana u ta phofula ku tlangela ka yena ka leswi hi nomu, kumbe hi ku tsala xiphephana xa tintswalo xa ku tlangela.
6. Lidiya u kombise tintswalo hi ndlela yihi, naswona ha yini swi ri swa nkoka ku kombisa ku tlangela swiendlo swa tintswalo?
6 Endzhaku ka loko Lidiya, wansati loyi a tinyiketeleke a khuvuriwile, “a hi khongela, a ku: ‘Loko [Pawulo ni vanakulobye] mi vona leswaku ndzi munhu la pfumeleke ka [Yehova, NW] hakunene, mi nga nghena ekaya ka mina, mi tshama kona.’ Kutani a hi sindzisa ku ya kona,” ku engetela Luka. Handle ko kanakana, tintswalo ta Lidiya ti tlangeriwile. (Mintirho 16:14, 15, 40) Kambe ku hluleka ku kombisa ku tlangela ku nga va loku vavisaka. Eka khamba rin’wana, makwerhu wa xisati wa malembe ya 80 hi vukhale loyi a nga ni matimba lama tsaneke ni tindlela leti hikiweke to kuma swilo u tikarhatile hi tintswalo leswaku a lunghiselela swakudya swa vaendzi va nga ri vangani. Ngopfu-ngopfu a a siringekile loko jaha rin’wana ri nga n’wi tivisanga leswaku a ri nga ti. Eka khamba rin’wana, vamakwerhu vambirhi va xisati va kayele swakudya leswi wansati lontsongo a a swi lunghiselele vona hi ku hlawuleka. “A ndzi hele matimba,” ku vula yena, “tanihi leswi hinkwavo a va nga rivalanga. . . . A ndzi ta tsaka ku twa leswaku va rivele hi ta swakudya, kambe ematshan’wini ya sweswo ku hava na un’we wa vamakwerhu lava va xisati loyi a veke ni tintswalo swinene kumbe rirhandzu leswaku a ndzi tivisa.” Xana muhandzu wa moya lowo kwetsima wa tintswalo a wu ta ku susumetela ku va la tlangelaka ni loyi a anakanyelaka loko u ri ehansi ka swiyimo leswi fanaka?
Tintswalo Ti Hi Endla Leswaku Hi Anakanyela Van’wana
7. I yinhla yihi malunghana ni tintswalo leyi kombisiwaka hi matshalatshala lama endliweke leswaku ku pfumelelaniwa ni ku navela ka Yakobo ka xilahlo?
7 Tintswalo ti fanele ku hi endla leswaku hi anakanyela van’wana ni ku anakanyela ku navela ka vona loku faneleke. Hi xikombiso: Yakobo (Israyele) u kombele n’wana wa yena Yosefa leswaku a kombisa tintswalo ta rirhandzu eka yena hi ku ka a nga n’wi lahli aEgipta. Hambi leswi mhaka leyi a yi lava leswaku ntsumbu wa Yakobo wu rhwariwa mpfhuka wo leha, Yosefa ni vana lavan’wana va xinuna va Yakobo “v̌a ṅwi yisa e tikweni ra Kanana, v̌a ya ṅwi lahla e bakweni ra nsimu ya Makpela, leyo Abraham ingi a yi šav̌ile ka Efron, wa mu-Het e tlhelo ra v̌uša ra Mamre.” (Genesa 47:29; 49:29-31; 50:12, 13) Ku pfumelelana ni xikombiso xexo, xana tintswalo ta rirhandzu a ti nga faneli ku hi susumetela ku pfumelelana ni malunghiselelo ya xilahlo lama amukelekaka hi tlhelo ra Matsalwa lama naveriwaka hi xirho xa ndyangu wa Vukriste?
8. Mhaka ya Rahava yi hi dyondzisa yini malunghana ni ku tlherisela tintswalo hi tintswalo?
8 Loko van’wana va hi kombisa tintswalo ta rirhandzu, xana a hi fanelanga ku phofula ku tlangela kumbe ku tlherisela tintswalo hi ndlela yo karhi? Hakunene hi fanele ku endla tano. Rahava lowa nghwavava u kombise tintswalo hi ku tumbeta tinhlori ta Vaisrayele. Hikwalaho, Vaisrayele va kombise tintswalo ta rirhandzu hi ku ponisa yena ni ndyangu wa yena loko va lovisa muti wa Yeriko. (Yoxuwa 2:1-21; 6:20-23) Vona xikombiso lexinene swonghasi lexi kombisaka leswaku hi fanele ku tlherisela tintswalo hi ku va hi anakanyela van’wana ni ku va ni tintswalo na hina!
9. Ha yini u nga vulaka leswaku swi fanerile ku kombela un’wana leswaku a hi kombisa tintswalo ta rirhandzu?
9 Malunghana ni mhaka yoleyo, swi fanerile ku kombela un’wana ku kombisa tintswalo ta rirhandzu eka hina. Leswi swi endliwile hi Yonatani, n’wana wa Sawulo, hosi yo sungula ya Israyele. Yonatani u kombele munghana wa yena lontsongo la rhandzekaka Davhida ku kombisa tintswalo ta rirhandzu eka yena ni ndyangu wa yena. (1 Samuel 20:14, 15; 2 Samuel 9:3-7) Davhida u swi tsundzukile leswi loko a rihela Vagibiyoni lava dyoheriweke hi Sawulo. Loko a tsundzuka “ku hlambanya ka Yehova” exikarhi ka yena na Yonatani, Davhida u kombise tintswalo ta rirhandzu hi ku tsetselela vutomi bya Mefiboxete, n’wana wa xinuna wa Yonatani. (2 Samuel 21:7, 8) Xana na hina hi ku fanana hi ‘pfumelela leswaku Ina wa hina a va Ina’? (Yakobo 5:12) Naswona loko hi ri vakulu va bandlha, xana hi ni ntwela-vusiwana hi laha ku fanaka loko vapfumeri-kulorhi va lava ku kombisiwa tintswalo ta rirhandzu?
Tintswalo Ti Tiyisa Vun’we
10. Tintswalo ta rirhandzu ta Rhuti ti katekisiwe hi ndlela yihi?
10 Tintswalo ta rirhandzu ti tiyisa vun’we bya mindyangu naswona ti kondletela ntsako. Leswi swi kombisiwe emhakeni ya Rhuti wa Mumowabu. U tirhe hi matimba tanihi mukhwaji ensin’wini ya Bowazi loyi a khalabyeke ekusuhi na Betlehema, a lunghiselela swakudya swa yena n’wini na Nahumi, n’wingi wa yena loyi a nga noni ni loyi a pfumalaka. (Ruti 2:14-18) Endzhakunyana Bowazi u byele Rhuti a ku: “[Tintswalo ta rirhandzu leti u ti] kombisaka ŝeŝi ka mina, [ti] tlula [to] sungula leŝi u nga lanḍangiki madžaha, hambi v̌a ri la’v̌a fuweke, hambi ŝi ri ŝisiwana.” (Ruti 3:10) Xo sungula, Rhuti u kombise tintswalo ta rirhandzu eka Nahumi. ‘Eku heteleleni,’ Mumowabu loyi u kombise tintswalo ta rirhandzu hi ku tiyimisela ku tekana na Bowazi la khalabyeke leswaku a ta kurisa vito ra nuna wa yena loyi a feke ni ra Nahumi la dyuhaleke. Hikwalaho ka Bowazi, Rhuti u ve mana wa Obede, kokwa wa xinuna wa Davhida. Naswona Xikwembu xi n’wi nyike “hakelo le’yi hetisekeke” ya ku va kokwana wa xisati wa Yesu Kriste. (Ruti 2:12; 4:13-17; Matewu 1:3-6, 16; Luka 3:23, 31-33) Mawaku mikateko leyi tintswalo ta rirhandzu ta Rhuti ti veke na yona eka yena ni ndyangu wa yena! Namuntlha, mikateko, ntsako ni ku tiyisiwa ka vun’we bya ndyangu nakambe swa humelela loko tintswalo ta rirhandzu ti andza emakaya lama chavaka Xikwembu.
11. Tintswalo ta Filemoni ti ve ni vuyelo byihi?
11 Tintswalo ti tiyisa swiboho exikarhi ka mabandlha ya vanhu va Yehova. Filemoni wanuna wa Mukriste a a tiveriwa ku kombisa tintswalo ta rirhandzu eka vapfumeri-kulobye. Pawulo u n’wi byerile a ku: “Ndzi nkhensa Xikwembu xa mina masiku hinkwawo, loko ndzi ku anakanya emikhongelweni ya mina, hikuva ndzi twa ta rirhandzu ra wena eka vahlawuriwa hinkwavo ni ta ku pfumela loku u nga na kona eka Hosi Yesu. . . . Ndzi kumile ku tsaka lokukulu ni ku chaveleriwa swinene hi rirhandzu ra wena makwerhu, naswona timbilu ta vahlawuriwa ti kumile matimba lamantshwa hikwalaho ka wena.” (Filemon 4-7) Matsalwa a ma vuli leswaku i ndlela yihi leyi timbilu ta vakwetsimi ti kumeke ha yona matimba lamantshwa hikwalaho ka Filemoni. Hambi swi ri tano, u fanele a kombise tintswalo ta rirhandzu eka vatotiwa-kulobye hi tindlela to hambana-hambana leti a ti tikombisa ti ri leti nyikaka matimba lamantshwa eka vona, naswona leswi handle ko kanakana swi tiyise vun’we exikarhi ka vona. Swilo leswi fanaka swa humelela loko Vakriste va kombisa tintswalo ta rirhandzu namuntlha.
12. I yini lexi vangiweke hi tintswalo leti kombisiweke hi Onesiforo?
12 Tintswalo ta Onesiforo na tona ti ve ni vuyelo lebyinene. “Ingi Hosi yi nga tsetselela ndyangu wa ka Onesiforo,” ku vula Pawulo, “hikuva ú ndzi rhulisile mbilu ko tala; naswona, ku bohiwa ka mina hi tinketani a ku n’wi khomisanga tingana. Kambe loko a fikile eRhoma ú ndzi lavisisile hinkwako hi matimba a ko a ndzi kuma. Ingi Hosi yi nga endla leswaku a kuma ku tsetseleriwa emahlweni ka [Yehova, NW] hi siku lerikulu. Na wena u tiva swinene mintirho leyi a yi endleke le Efesa.” (2 Timotiya 1:16-18) Loko hi tikarhata leswaku hi kombisa tintswalo ta rirhandzu eka vagandzeri-kulorhi, hi ta va lava tsakeke naswona hi ta va hi tiyisa vun’we bya rirhandzu ra vumakwerhu exikarhi ka bandlha ra Vukriste.
13, 14. Bandlha ra Filipiya a ri ri xikombiso hi ndlela yihi, naswona Pawulo u hlamurise ku yini eka tintswalo ta rona?
13 Loko bandlha hinkwaro ri kombisa tintswalo eka vagandzeri-kulobye, leswi swi tiyisa vun’we lebyi nga exikarhi ka vona. Vun’we byo tano lebyikulu a byi ri kona exikarhi ka Pawulo ni bandlha leri nga emutini wa Filipiya. Entiyisweni, xivangelo xin’wana lexi a tsaleke papila ra yena eka Vafilipiya ha xona a ku ri ku phofula ku tlangela tintswalo ta vona ni mpfuno wa swilo swa nyama. U tsarile a ku: “Emasungulweni ya ntirho wa Evhangeli, loko ndzi sukile eMakedoniya, a ku vanga na [bandlha ni rin’we leri] nga pfunana na mina, handle ka n’wina ntsena; hi vile xilo xin’we endzalweni ni le ku lahlekeriweni. Hikuva, hambi ku ri le Tesalonika, mi ndzi rhumerile swo ndzi pfuna eka leswi a ndzi swi pfumala, naswona ku nga ri kan’we ntsena. . . . Ndzi kumile hakelo hinkwayo, ni ku tlula. Ndzi ni leswo tala, hikuva Epafrodito ú ndzi tisele tinyiko leti humaka eka n’wina. Tinyiko leti ti fana ni gandzelo ra risuna, leri amukelekaka eka Xikwembu.”—Vafilipiya 4:15-18.
14 A swi hlamarisi leswi Vafilipiya va tintswalo a va ri eswikhongelweni swa Pawulo! U te: “Ndzi nkhensa Xikwembu xa mina minkarhi hinkwayo, loko ndzi mi anakanya. Nkarhi wun’wana ni wun’wana loko ndzi mi khongelela n’wina hinkwenu, ndzi khongela hi ku tsaka, hikwalaho ka ndlela leyi mi ndzi pfuneke ha yona entirhweni wa Evhangeli, ku sukela siku ro sungula ku fikela namuntlha.” (Vafilipiya 1:3-5) Nseketelo wo tano wa mbilu ya tintswalo ni wa ku hanana wa ntirho wa ku chumayela hi ta Mfumo a wu kali wu endla leswaku bandlha ri va evusiwaneni. Endzhaku ka loko Vafilipiya hi tintswalo va endle leswi va nga swi kotaka emhakeni leyi, Pawulo u va tiyisekisile a ku: “Kutani Xikwembu xa mina xi ta mi nyika hi ntalo hinkwaswo leswi mi swi pfumalaka, hi ku ya hi rifuwo ra xona ni ku dzuneka ka xona eka Kriste Yesu.” (Vafilipiya 4:19) Ina, Xikwembu xi hakela tintswalo ni ku hanana. Rito ra xona ri ri: “Hosi yi ta nyika un’wana ni un’wana, . . . hi ku ya hi leswinene leswi a swi endleke.”—Vaefesa 6:8.
Loko Vavasati Va Kombisa Tintswalo
15, 16. (a) Tintswalo ta Dorkasi ti tsundzukiwe hi ndlela yihi, naswona ku humelele yini loko a file? (b) Vavasati va Vakriste lava nga ni timbilu ta tintswalo va tala mintirho leyinene hi ndlela yihi namuntlha?
15 Tintswalo ta rirhandzu ta mudyondzisiwa Dorkasi (Tabita) wa Yopa ti hakeriwile. “A a tala ku tirha mintirho leyinene, a tala ni ku hanana,” naswona loko “a khomiwa hi vuvabyi, kutani a fa,” vadyondzisiwa va rhumele rito eka Petro loyi a a ri eLida. Loko a fika, “va n’wi yisa endlwini ya le henhla; tinoni hinkwato ti n’wi rhendzela, ti ri karhi ti rila, ti n’wi komba tinguvu ni swiambalo leswi Dorkasi a a swi rhunga loko a ha hanya.” Vona xivono lexi hi mahlo ya mianakanyo: Tinoni leti nga ni gome, leti rilaka, ti byele muapostola ndlela leyi Dorkasi a a ri ni tintswalo ha yona kutani ti n’wi kombisa tinguvu teto tanihi vumbhoni bya rirhandzu ni tintswalo ta yena. Loko a kombele leswaku va huma hinkwavo, Petro u nkhinsamile a khongela kutani a hundzulukela eka ntsumbu. Yingisa! U te: “Tabita, pfuka!” Kutani vona! “A pfula mahlo, kutani loko a vona Petro, a pfuka a tshama. Hiloko yena a n’wi khoma hi voko, a n’wi yimisa; kutani loko a vitanile vahlawuriwa va Hosi ni tinoni, a yisa Dorkasi eka vona a ri la hanyaka.” (Mintirho 9:36-41) Mawaku nkateko lowu humaka eka Xikwembu!
16 Loku a ku ri ku pfuxiwa ko sungula loku rhekhodiweke loku endliweke hi muapostola wa Yesu Kriste. Naswona swiyimo leswi yiseke eka singita leri ri hlamarisaka a swi titshege hi tintswalo. I mani loyi a nga vulaka leswaku Dorkasi a a ta va a pfuxeriwe evuton’wini loko a a nga talanga mintirho leyinene ni tinyiko ta musa—loko a a nga talanga tintswalo ta rirhandzu? Dorkasi ni tinoni teto a va katekisiwanga ntsena, kambe singita ra ku pfuxiwa ka yena ri nyikele vumbhoni eku twaleni ka Xikwembu. Ina, “mhaka leyi yi tiviw[e] hi muti hinkwawo wa Yopa; kutani vanhu lavo tala va pfumela eka Hosi.” (Mintirho 9:42) Namuntlha, vavasati va Vakriste lava nga ni timbilu ta tintswalo na vona va tele mintirho leyinene—kumbexana va rhungela vapfumeri-kulobye tinguvu, va lunghiselela lava dyuhaleke exikarhi ka hina swakudya, va kombisa van’wana malwandla. (1 Timotiya 5:9, 10) Lebyi i vumbhoni lebyikulu swonghasi eka lava swi xiyaka! Ku tlula hinkwaswo, hi tsaka swonghasi leswi ku tinyiketela eka Xikwembu ni tintswalo ta rirhandzu swi susumetelaka ‘vandla leri rikulu ra vavasati ku chumayela mahungu lamanene’ leswaku ku twarisiwa Yehova, Xikwembu xa hina!—Psalma 68:11.
Hambetani Mi Landzelela Tintswalo Ta Rirhandzu
17. Ku vuriwa yini eka Swivuriso 21:21, naswona marito wolawo ma tirhisa ku yini eka vanhu lava chavaka Xikwembu?
17 Hinkwavo lava va navelaka musa wa Xikwembu va fanele ku landzelela tintswalo ta rirhandzu. “L’a ṭuṭumelaka ku lulama ni tintŝalo [ta rirhandzu, NW], o ta kuma v̌utomi, ni ku lulama, ni ku twala,” ku vula xivuriso xa vutlhari. (Swivuriso 21:21) Munhu loyi a chavaka Xikwembu u landzelela vululami bya xona hi ku gingiriteka, minkarhi hinkwayo a kongomisiwa hi swiringanyeto swa Xikwembu. (Matewu 6:33) Nkarhi na nkarhi u kombisa rirhandzu ra xiviri kumbe tintswalo ta rirhandzu eka van’wana hi tindlela ta swilo swa nyama naswona ngopfu-ngopfu hi tindlela ta moya. Xisweswo, u kuma vululami, hikuva moya wa Yehova wu n’wi pfuna ku hanya hi ndlela leyi lulameke. Entiyisweni, u ‘ambale vululami’ ku fana na Yobo, wanuna loyi a a chava Xikwembu. (Yobo 29:14) Munhu wo tano a nga lavi ku twala ka yena n’wini. (Swivuriso 25:27) Ku ri na sweswo, u kuma ku twala kwihi na kwihi loku Yehova a n’wi pfumelelaka ku ku kuma, kumbexana hi xivumbeko xa ku xiximiwa hi vanhu-kulobye lava susumetiweke hi Xikwembu leswaku va hanyisana na yena hi tintswalo hikwalaho ka tintswalo ta rirhandzu ta yena n’wini leti a va kombisaka tona. Ku tlula kwalaho, lava va endlaka ku rhandza ka Xikwembu hi ku tshembeka va ta kuma vutomi—hayi hi malembe lama nga riki mangani ntsena lama hundzaka hi ku hatlisa, kambe hi laha ku nga heriki.
18. Ha yini hi fanele ku landzelela tintswalo ta rirhandzu?
18 Hikwalaho, hinkwavo lava rhandzaka Yehova Xikwembu a va hambete va landzelela tintswalo ta rirhandzu. Mfanelo leyi yi endla leswaku hi va ni rirhandzu eka Xikwembu ni le ka van’wana. Yi kondletela malwandla ni ku hi endla hi anakanyela van’wana. Tintswalo ti tiyisa swiboho exikarhi ka ndyangu ni bandlha ra Vukriste. Vavasati lava kombisaka tintswalo ta rirhandzu va tlangeriwa ni ku xiximiwa swinene. Naswona hinkwavo lava va landzelelaka mfanelo leyi yi vangamaka va yisa ku twala eka Yehova, Xikwembu xa tintswalo ta rirhandzu.
A Wu Ta Hlamurisa Ku Yini Ke?
◻ Abrahama a a ri xikombiso eku kombiseni ka tintswalo hi ndlela yihi?
◻ Mhaka ya Rahava yi hi dyondzisa yini malunghana ni ku tlherisela tintswalo hi tintswalo?
◻ Bandlha ra le Filipiya ri kombise tintswalo hi ndlela yihi?
◻ Vavasati va Vakriste lava nga ni timbilu ta tintswalo va tale mintirho leyinene hi ndlela yihi namuntlha?
◻ Ha yini hi fanele ku landzelela tintswalo ta rirhandzu?