Tsakisa Yehova Hi Ku Kombisa Tintswalo
“Leŝi Yehova a ŝi lav̌aka e ka wena; hi leŝaku u endla le’ŝi lulameke, u ranḍa tintŝalo, ni ku famba hi ku tiṭongahata e mahlweni ka Šikwembu ša wena.”—MIKEA 6:8.
1. Ha yini swi nga fanelanga ku hi hlamarisa leswi Yehova a langutelaka vanhu va yena ku kombisa tintswalo?
YEHOVA u langutela vanhu vakwe leswaku va kombisa tintswalo. Leswi a swi fanelanga swi hi hlamarisa. Xikwembu hi xoxe xi ni tintswalo eka hinkwavo, hambi ku ri eka vanhu vo biha lava nga nkhensiki. Malunghana ni leswi, Yesu Kriste u byele vadyondzisiwa vakwe a ku: “Rhandzani valala va n’wina, mi endlela vanhu leswinene; lombani mi nga languteli ku tlheriseriwa, kutani hakelo ya n’wina yi ta va leyikulu; mi ta va vana va Loyi-a-nge-henhla-henhla, hikuva yena ú ni tintswalo eka lava nga tiviki ku nkhensa ni ka lavo biha. Mi va ni nsovo kukota leswi Tata wa n’wina na yena a nga ni nsovo.”—Luka 6:35, 36.
2. I swivutiso swihi malunghana ni tintswalo leswi lulameriwaka hi ku xiyiwa hi hina?
2 Hi laha Mikea 6:8 yi vulaka ha kona, lava fambaka ni Xikwembu entiyisweni va fanele va “ranḍa tintŝalo.” Handle ko kanakana, Yehova wa tsaka loko malandza yakwe ma rhandza tintswalo ivi ma ti kombisa hi mbilu hinkwayo. Kambe tintswalo i yini? Hi yihi mimpfuno leyi tisiwaka hi ku ti kombisa? Naswona xana mfanelo leyi yi nga kombisiwa njhani?
Leswi Tintswalo Ti Nga Swona
3. Xana u nga ti hlamusela njhani tintswalo?
3 Tintswalo i mfanelo ya ku tsakela van’wana swinene. Ti kombisiwa hi mintirho leyi pfunaka ni marito ya ku anakanyela van’wana. Ku va ni tintswalo swi vula ku endla leswinene ematshan’wini yo endla nchumu wihi na wihi lowu vavisaka. Munhu wa tintswalo u ni vunghana, vunene, ntwela-vusiwana ni musa. Wa hanana ni ku anakanyela van’wana. Naswona tintswalo i xiphemu xa lapi ro endla swiambalo swo fanekisela swa Mukriste un’wana ni un’wana, hikuva Pawulo u khutazile: “Ambalani moya wa tintswalo, ni vunene, ni ku titsongahata, ni ku rhula, ni ku leha mbilu.”—Vakolosa 3:12.
4. Yehova u rhangerile eku kombiseni ka tintswalo eka vanhu hi ndlela yihi?
4 Yehova u le mahlweni eku kombiseni ka tintswalo. Hi laha muapostola Pawulo a vuleke ha kona, a ku ri ‘loko Xikwembu, Muponisi wa hina xi kombise munhu tintswalo ni rirhandzu,’ loko “xi hi ponisile hi tintswalo ta xona, hi ku hlantswiwa loku endlaka leswaku Moya lowo Kwetsima wu hi nyika ku tswariwa ra vumbirhi.” (Tito 3:4, 5) Xikwembu xi basisa, kumbe ku ‘hlantswa’ Vakriste lava totiweke engatini ya Yesu, xi tirhisa ntikelo wa gandzelo ra nkutsulo ra Kriste hikwalaho ka vona. Nakambe va endliwa lavantshwa hi moya lowo kwetsima, va va ‘xivumbiwa lexintshwa’ tanihi vana va Xikwembu lava tswariweke hi moya. (2 Vakorinto 5:17) Kavula, tintswalo ni rirhandzu ra Xikwembu eka munhu swi tlhela swi ndlandlamukela ni le ka “ntshungu lowukulu” wa matiko hinkwawo lowu wu ‘hlantsweke tinguvu ta wona, kutani wu ti basisa hi ngati ya Xinyimpfana.’ (Nhlavutelo 7:9, 14; 1 Yohane 2:1, 2) Ku tlula kwalaho, vatotiwa ni ntshungu lowukulu, lowu nga ni ntshembo wa laha misaveni, hinkwavo va le hansi ka joko ra Yesu ‘ra tintswalo.’—Matewu 11:30.
5. Ha yini hi fanele ku langutela leswaku lava va kongomisiwaka hi moya wa Xikwembu va kombisa tintswalo eka van’wana?
5 Tintswalo nakambe i xiphemu xa mihandzu ya moya wo kwetsima wa Xikwembu, kumbe matimba lama tirhaka. Pawulo u te: “Mihandzu ya Moya i rirhandzu, ni ku tsaka, ni ku rhula, ni ku leha mbilu, ni [tintswalo], ni ku hanana, ni ku tshembeka, ni musa, ni ku tikhoma. Ku hava nawu lowu lwaka ni leswo tano.” (Vagalatiya 5:22, 23) Kutani ke, i yini leswi hi faneleke hi swi langutela eka lava kongomisiwaka hi moya wa Xikwembu? Entiyisweni, va ta kombisa tintswalo eka van’wana.
6. Tintswalo ti fanele ku vangela vakulu ni Vakriste van’wana leswaku va endlisa ku yini?
6 Tintswalo ti nga kombisiwa hi tindlela to tala. Hi kombisa tintswalo loko hi ri ni nsovo. Hi xikombiso, vakulu va Vukriste va ni tintswalo loko va kombisa nsovo eka mudyohi la hundzukaka naswona va ringeta ku n’wi pfuna hi tlhelo ra moya. Mfanelo ya tintswalo leyi humaka eka Xikwembu yi endla leswaku valanguteri va leha mbilu, va anakanyela, va va ni ntwela-vusiwana ni musa. Yi va susumetela ku ‘langutela ntlhambi hi musa.’ (Mintirho 20:28, 29) Entiyisweni, muhandzu wa moya wa tintswalo wu fanele wu endla Vakriste hinkwavo va va ni nsovo, va leha mbilu, va anakanyela, va va ni ntwela-vusiwana vusiwana, va va ni vunghana ni malwandla.
Papalata Tintswalo Leti Hoxeke
7. Ha yini u nga vulaka leswaku tintswalo leti hoxeke i ku tsana?
7 Vanhu van’wana va teka tintswalo tanihi ku tsana. Va vona onge munhu u fanele a nonon’hwa, a tlhela a kariha minkarhi yin’wana, leswaku van’wana va ta xiya matimba yakwe. Kambe hi laha ku fanelaka ku vuriwe leswaku “vukari i ndlela ya munhu wo tsana yo kombisa matimba.” Entiyisweni, swi lava matimba ya xiviri leswaku u va ni tintswalo ta ntiyiso ni ku papalata tintswalo leti hoxeke. Tintswalo leti nga muhandzu wa moya wa Xikwembu a hi langutelo leri tsaneke, leri pfumelelaka vudyoho. Ku ri na sweswo, tintswalo leti hoxeke i ku tsana loku endlaka munhu a seketela xidyoho.
8. (a) Malunghana ni vana va yena, Heli u tikombise a ri loyi a honisaka hi ndlela yihi? (b) Ha yini vakulu va fanele ku tivonela eku pfumeleleni ka tintswalo leti hoxeke?
8 Heli, muprista lonkulu wa Israyele a a tsanile eku layeni ka vana vakwe, Hofini na Finiyasi, lava a va tirha tanihi vaprista etabernakeleni. Hi ku nga aneriseki hi mpimo wa gandzelo leri va averiweke rona hi Nawu wa Xikwembu, va endle leswaku mulanguteri a sindzisa nyama leyi nga wupfangiki eka munyikeri wa gandzelo mafurha ya gandzelo ma nga si hisiwa ealtarini. Vana va Heli nakambe va endle vuoswi ni vavasati lava tirhaka enyangweni ya tabernakele. Hambi swi ri tano, ematshan’weni yo susa Hofini na Finiyasi exikhundleni lexi, Heli u lo va holovelanyana ntsena, a xixima vana va yena ku tlula Xikwembu. (1 Samuel 2:12-29) A swi hlamarisi leswi “rito ra Yehova a ri kala e masikwini lawa”! (1 Samuel 3:1) Kutani vakulu va Vukriste a va fanelanga va pfumelela mianakanyo yo biha kumbe va kombisa tintswalo leti hoxeke leti nga nghenisaka vumoya bya bandlha ekhombyeni. Tintswalo ta ntiyiso a ti honisi marito ni swiendlo swo biha leswi lwisanaka ni mimpimanyeto ya Xikwembu.
9. (a) I langutelo rihi leri nga hi pfunaka ku papalata ku pfumelela tintswalo leti hoxeke? (b) Yesu u kombise matimba eku hanyisaneni ni vakhongeri va vagwinehi hi ndlela yihi?
9 Loko hi ta papalata ku kombisa tintswalo leti hoxeke, hi fanele hi khongelela mpfuno wa Xikwembu leswaku hi va ni matimba yo fana ni lawa a ma xiyeka emaritweni ya mupisalema: “Ṭhinelani kule na mina, ṅwina la’v̌o biha, leŝaku nḍi hlayisa ku lerisa ka Šikwembu ša nga!” (Psalma 119:115) Nakambe hi fanele hi landzelela xikombiso xa Yesu Kriste, loyi a a nga ri na nandzu wa ku kombisa tintswalo leti hoxeke. Kahle-kahle, Yesu a a ri ni tintswalo ta ntiyiso hakunene. Hi xikombiso, ‘u twele vanhu vusiwana hi mhaka ya leswi a va dyeleriwile ni ku hangalasiwa ku fana ni tinyimpfu to pfumala murisi.’ Hikwalaho, vanhu va timbilu letinene va titwe va ntshunxekile ku tshinelela Yesu, hambi ku ri ku tisa vana va vona lavantsongo eka yena. Naswona anakanya tintswalo ni ntwela-vusiwana lowu a wu kombiseke loko “a vukarh[a] vana, [kutani] a va katekisa”! (Matewu 9:36; Marka 10:13-16) Hambi leswi Yesu a a ri ni tintswalo, a a tiyile eka leswi lulameke emahlweni ka Tata wakwe wa le tilweni. Yesu a nga byi seketelanga vubihi; a a ri ni matimba lama humaka eka Xikwembu yo avanyisa varhangeri va vukhongeri va vukanganyisi. Eka Matewu 23:13-26, hi makhamba yo hlayanyana u phindha-phindhe marito lama nge: “Mi ni khombo n’wina vatsari ni Vafarisi, hikuva mi vakanganyisi.” Eka khamba rin’wana ni rin’wana, Yesu u nyikele xivangelo xa ku avanyisa ka Xikwembu.
Tintswalo Ti Hlangane Ni Rirhandzu
10. Xana vadyondzisiwa va Yesu va kombisa tintswalo ni rirhandzu eka vapfumeri-kulobye hi ndlela yihi?
10 Malunghana ni valandzeri vakwe, Yesu u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Naswona hi xihi xivumbeko xin’wana xa rirhandzu lexi hlawulaka vadyondzisiwa va Yesu va ntiyiso? Pawulo u te: “Rirhandzu ra tiyisela, naswona ri ni tintswalo.” (1 Vakorinto 13:4) Ku leha mbilu ni ku va ni tintswalo swi vula leswaku hi tiyiselela ku nga hetiseki ni swihoxo swa van’wana, hi laha hi tintswalo Yehova a endlaka tano ha kona. (Psalma 103:10-14; Varhoma 2:4; 2 Petro 3:9, 15) Rirhandzu ni tintswalo ta Vukriste nakambe swa tikombisa loko ku nonon’hwa ku wela vapfumeri-kulorhi etindhawini tin’wana ta misava. Loko va angula hi “tintswalo leto hlamarisa” swinene, eka tindhawu tin’wana Vakriste va kombisa rirhandzu ra vumakwerhu hi ku nyikela swilo leswi vonakaka ku pfuna vagandzeri vo tano va Yehova.—Mintirho 28:2.
11. Hi ku vulavula hi tlhelo ra Matsalwa, tintswalo ta rirhandzu i yini?
11 Tintswalo ti hlangane ni rirhandzu eka xiga lexi nge ‘tintswalo ta rirhandzu,’ lexi tirhisiwaka swinene eMatsalweni. Leti i tintswalo leti humaka eka rirhandzu ra xiviri. Riviti ra Xiheveru leri hundzuluxeriweke va ku ‘tintswalo ta rirhandzu’ (cheʹsedh) ri tlula malwandla. I tintswalo leti hi rirhandzu ti namarhelaka nchumu ku kondza xikongomelo xa tona malunghana na wona xi fikeleriwa. Tintswalo ta rirhandzu ta Yehova, kumbe rirhandzu ra xiviri, ti kombisiwa hi tindlela to tala. Hi xikombiso, ti kombisiwa emintirhweni ya yena ya ku kutsula ni ya ku sirhelela.—Psalma 6:4; 40:11; 143:12.
12. Loko malandza ya Yehova ma khongelela mpfuno kumbe ku kutsuriwa, ma nga tiyiseka hi yini?
12 A swi hlamarisi leswi tintswalo ta rirhandzu ta Yehova ti kokelaka vanhu eka yena! (Yeremia 31:3) Loko malandza ya Xikwembu yo tshembeka ma lava nkutsulo kumbe mpfuno, ma swi tiva leswaku tintswalo ta yena ta rirhandzu i rirhandzu ra xiviri hakunene, leri nga ta ka ri nga va khomisi tingana. Hikwalaho, va nga khongela hi ripfumelo, hi laha mupisalema a endleke ha kona loko a te: “Loko nḍi ri mina, nḍi ṭhembile tintŝalo ta wena [ta rirhandzu, NW]. Mbilu ya nga yi ṭaka hi ku hlayiseka ka wena.” (Psalma 13:5, 6) Tanihi leswi rirhandzu ra Xikwembu ri nga ra xiviri, malandza ya yena a ma tshembeli tintswalo ta yena ta rirhandzu kambe ma nga ti kumi. Loko ma khongelela mpfuno kumbe nkutsulo, ma ni xitiyisekiso lexi: “Yehova a nga ka a nga tšukumeti tiko ra yena, a nga ṭhiki nḍaka ya yena.”—Psalma 94:14.
Tihakelo Ta Tintswalo
13, 14. Ha yini munhu wa tintswalo a ri ni vanghana lava tshembekaka?
13 Hi ku tekelela Yehova, malandza yakwe ma “endla hi tintŝalo [ta rirhandzu, NW] ni nsov̌o, uṅwana ni uṅwana e ka makwav̌o.” (Zakaria 7:9; Vaefesa 5:1) ‘Xilo lexi navelekaka eka munhu wa misava i tintswalo ta yena ta rirhandzu,’ naswona munhu loyi a kombisaka mfanelo leyi u tshovela tihakelo leti fuweke. (Swivuriso 19:22) Xana hi tihi tin’wana ta tona ke?
14 Tintswalo ti hi endla lava nga ni vuxiyaxiya kutani xisweswo ti hi pfuna ku hlayisa vuxaka lebyinene ni van’wana. Munhu wa vuxiyaxiya u vula ni ku endla swilo kumbe a tamela swiyimo leswi nonon’hwaka hi tindlela ta ku anakanyela van’wana ni leti nga nyenyetsiki. Loko ‘munhu wa tihanyi’ a tokota ku nga amukeriwi, “munhu wa tintŝalo [ta rirhandzu, NW] o endlela moya wa yena e v̌unene.” (Swivuriso 11:17) Vanhu va papalata munhu wa tihanyi kambe va tshinela eka loyi a va kombisaka tintswalo ta rirhandzu. Hikwalaho, munhu wa tintswalo u ni vanghana vo tshembeka.—Swivuriso 18:24.
15. I vuyelo byihi lebyi tintswalo ti nga vaka na byona endyangwini lowu avaneke hi tlhelo ra vukhongeri?
15 Wansati wa Mukriste loyi a nga na nuna loyi a nga riki mupfumeri a nga n’wi kokela entiyisweni wa Xikwembu hi mfanelo yo tanihi tintswalo. A nga si dyondza ntiyiso ni ku ambala “munhu lontshwa la vumbiweke hi xifaniso xa Xikwembu, la . . . tikombaka hi ku lulama ka yena ni ku hlawuleka loku nga ni ntiyiso,” a nga ha va a pfumala tintswalo, hambi ku ri ku pfuxa timholovo. (Vaefesa 4:24) Loko nuna wa yena a a tiva swivuriso swin’wana, kumbexana a a ta va a pfumerile leswaku “nsati wa ku lev̌a i yindlu le’yi pfutaka hi masiku” ni leswaku “ku tiakela e mananga, ŝi tlula e ku ṭhama ni nsati wa timholov̌o ni wa ku kariha.” (Swivuriso 19:13; 21:19) Kambe mahanyelo lama tengeke ni xichavo lexikulu xa wansati wa Mukriste, kun’we ni timfanelo to tanihi tintswalo, se swi nga ha pfuna ku wina nuna wa yena a nghena evupfumerini bya ntiyiso. (1 Petro 3:1, 2) Ina, leyi ku nga ha va hakelo yin’wana ya tintswalo ta yena.
16. Hi nga pfunekisa ku yini eka tintswalo leti hi kombisiwaka tona?
16 Tintswalo leti kombisiweke eka hina ti nga ha va mpfuno hi ku endla leswaku hi va ni ntwela-vusiwana swinene ni ku rivalela. Hi xikombiso, loko a hi lava mpfuno wa moya naswona hi khomiwa hi mukhuva wa tintswalo ni wa ku rhula, xana sweswo a swi nga ta hi endla hi va lava voyameleke ngopfu eku hanyisaneni ni van’wana hi ndlela leyi fanaka? I ntiyiso, mahanyelo ya tintswalo ni ya ku rhula ma nga languteriwa eka vavanuna lava nga ni timfanelo ta moya, hikuva Pawulo u tsarile a ku: “Vamakwerhu, naloko un’wana a kumiwa a ri karhi a endla xihoxo, n’wina lava mi nga va Moya, n’wi vuyiseni hi moya wa musa. Eka un’wana ni un’wana wa n’wina, ndzi ri, tivonele leswaku na wena u nga ringiwi.” (Vagalatiya 6:1) Vakulu lava vekiweke va vulavula hi ku rhula na hi tintswalo loko va lava ku pfuna vapfumeri-kulobye lava endlaka xihoxo. Hambi swi ri tano, hambi loko hina hi hexe hi kume mpfuno wo tano wa tintswalo kumbe e-e, xana i yini lexi Xikwembu xi xi langutelaka eka hinkwavo lava va xi tirhelaka? Vakriste hinkwavo va fanele ku kombisa tintswalo eka van’wana naswona va fanele ku hlayisa xitsundzuxo xa Pawulo lexi nge: “Twelanani vusiwana, mi tsetselelana, mi rivalelana, tanihi leswi Xikwembu na xona xi mi rivaleleke eka Kriste.” (Vaefesa 4:32) Kavula, loko hi rivaleriwile hi un’wana kumbe loko hi pfuniwile ku hlula xiphiqo xa moya hi ndlela ya tintswalo, leswi a swi fanele ku engetela vuswikoti bya hina vini byo rivalela, ku twela vusiwana ni tintswalo.
Tlangela Tintswalo Ta Xikwembu Leti Nga Fanelangiki
17. Tanihi leswi hi nga vadyohi ku sukela eku tswariweni, ngopfu-ngopfu a hi fanele ku tlangela tintswalo tihi?
17 Tanihi leswi hinkwerhu ka hina hi velekiweke tanihi vadyohi lava avanyiseriweke rifu, ku ni tintswalo leti ngopfu-ngopfu hi faneleke ku ti tlangela. I tintswalo ta Yehova Xikwembu leti nga fanelangiki. Leswaku vadyohi va ntshunxiwa eku avanyiseriweni ka rifu ni ku vuriwa lava lulameke i tintswalo leti nga fanelangiki hi laha ku heleleke. Pawulo, loyi a boxeke tintswalo ta Xikwembu leti nga fanelangiki hi makhamba ya 90 eka mapapila ya yena ya 14 lama huhuteriweke hi Xikwembu, u byele Vakriste va le Rhoma wa khale a ku: “Hinkwavo va dyohile, hikokwalaho ku kwetsima loku a va nyikiwile hi Xikwembu, va ku pfumala. Kambe va hlayiwa lava lulameke hi tintswalo ta Xikwembu, hi ku nyikiwa, ha Kriste Yesu loyi a va kutsulaka.” (Varhoma 3:23, 24) Hi fanele ku ti tlangela swonghasi tintswalo leti nga fanelangiki leti kombisiweke hi Yehova Xikwembu!
18, 19. Hi nga swi papalatisa ku yini ku kayela xikongomelo xa tintswalo ta Xikwembu leti nga fanelangiki?
18 Hi ku va lava nga tlangeliki, hi nga kayela xikongomelo xa tintswalo ta Xikwembu leti nga fanelangiki. Emhakeni leyi, Pawulo u te: “Hikokwalaho, hi vayimeri va Kriste; Xikwembu hi xoxe xa mi khongotela ha hina; ha mi khongotela hi matimba hikwalaho ka Kriste, hi ri: ‘Vuyelelanani na Xikwembu!’ Kriste a a nga ri na xidyoho; hambiswiritano, Xikwembu xi n’wi endlile leswaku a va xo xidyoho hikwalaho ka hina, leswaku hikwalaho ka yena, hi endliwa lava lulameke emahlweni ka Xikwembu. Hina hi tirhisanaka ni Xikwembu, ha mi khongotela nakambe, hi ri: Leswi mi amukeleke tintswalo ta Xikwembu, mi nga ti tshiki ti wela hansi! Hikuva Xikwembu [eka Esaya 49:8, Septuagint] xi te: ‘Ndzi ku yingisile enkarhini wa mina wa ku tsetselela, esikwini ra mina ra ku ponisa, ndzi ku lamulerile.’ Vonani, nkarhi lowunene wa ku tsetseleriwa wu fikile, namuntlha hi rona siku ra ku ponisiwa. A hi veki xikhunguvanyiso ni xin’we endleleni ya munhu na un’we, leswaku ntirho wa hina wu ta ka wu nga sandziwi. Etimhakeni hinkwato hi tikombile hi ri malandza ya Xikwembu.” (2 Vakorinto 5:20–6:4) Xana Pawulo a a vula yini?
19 Vakriste lava totiweke i vayimeri lava yimelaka Kriste, naswona ntshungu lowukulu i varhumiwa va yena. Hinkwavo va khutaza vanhu ku vuyelelana ni Xikwembu leswaku va kuma ku ponisiwa. Pawulo a a nga swi lavi leswaku munhu wihi na wihi a kuma tintswalo ta Yehova Xikwembu leti nga fanelangiki hi ku tirhisa Yesu Kriste kutani a kayela xikongomelo xa tona. Sweswo a swi ta humelela eka hina loko hi hluleke ku endla ntirho lowu tintswalo teto leti nga fanelangiki ti hi endleke hi faneleka eka wona. Loko hi ri ni vuxaka lebyinene na Xikwembu tanihi lava va vuyelelaneke na xona, hi ta va hi nga amukeli tintswalo ta xona leti nga fanelangiki hi ndlela ya hava loko hi hetisisa “ntirho wo endla leswaku vanhu va vuyelelana na xona. Ntirho lowu wu komba hilaha Xikwembu xi endlaka leswaku misava yi vuyelelana na xona ha Kriste.” (2 Vakorinto 5:18, 19) Nakambe hi ta va hi endlela van’wana tintswalo letikulu hi ku va pfuna ku vuyelelana ni Xikwembu.
20. Loko hi ya emahlweni hi ta kambisisa yini?
20 Malandza ya Yehova ma tirhisa nkarhi ni rifuwo ra wona hi swiendlo swa tintswalo loko ma lava ku pfuna vanhu hi tlhelo ra moya evutirhelini bya Vukriste. Kambe xana hi nga dyondza yini eka swikombiso swa Matsalwa swa tintswalo leti kombisiwaka hi mintirho? A hi yeni emahlweni hi kambisisa swin’wana swa swona kutani hi xiya tindlela tin’wana to tsakisa Yehova hi ku kombisa tintswalo.
A Wu Ta Hlamurisa Ku Yini Ke?
◻ Tintswalo i yini?
◻ Hi nga swi papalatisa ku yini ku pfumelela tintswalo leti hoxeke?
◻ Ha yini vanhu va Yehova va nga tshembaka tintswalo ta yena ta rirhandzu?
◻ Hi tihi tihakelo tin’wana ta tintswalo?
◻ Hi nge kayeli xikongomelo xa tintswalo ta Xikwembu leti nga fanelangiki hi ku endla yini?
[Xifaniso lexi nga eka tluka 13]
Tintswalo ti endla leswaku vakulu va Vukriste va lehisa mbilu, va anakanyela van’wana ni ku va ni ntwela-vusiwana
[Xifaniso lexi nga eka tluka 15]
Tintswalo ta wansati wa Mukriste ti nga ha pfuna ku wina nuna wa yena a nghena evupfumerini bya ntiyiso
[Xifaniso lexi nga eka tluka 17]
Hi nga endlela van’wana tintswalo letikulu hi ku va pfuna ku vuyelelana ni Xikwembu