Swivutiso Swa Vahlayi

◼ Ha yini Yesu a sungule Xitsundzuxo a ri ni vaapostola ntsena, a nga ri na vona vadyondzisiwa van’wana lava nga ta nghenisiwa eka ntwanano lowuntshwa?

Xivutiso lexi xi vonaka xi sekeriwe eka mianakanyo leyi hoxeke ya leswaku Yesu u hlangane ni vaapostola va yena emadyambyini wolawo leswaku a simeka Xilalelo xa Hosi ni bandlha ra Vukriste ra vatotiwa leri ana se a ri ri eka ntwanano lowuntshwa. Ematshan’wini ya sweswo, hi Nisan 14, 33 C.E., bandlha ra Vukriste a ri nga si vumbiwa, naswona Yesu a a te ni vaapostola va yena eka swakudya swa Paseka ya Xiyuda ya lembe na lembe.

Kavula, Yesu a a ri ni vadyondzisiwa van’wana handle ka lava va 12 lava a va tiviwa tanihi vaapostola. Lembe emahlweni ka rifu ra yena, u rhumele vadyondzisiwa va 70 epfhumbeni ro chumayela. Endzhaku ka ku pfuxiwa ka yena, “ú thlele a humelela hi nkarhi wun’we eka vamakwavo lava tlulaka 500.” Naswona a ku ri ni vadyondzisiwa “lava nhlayo ya vona a yi lava ku va 120” lava a va hlengeletanile hi siku ra Pentekosta. (1 Vakorinto 15:6; Mintirho 1:15, 16, 23; Luka 10:1-24) Kambe a hi xiyeni ntlawa lowu a wu ri na Yesu loko a simeka nkhuvo wa lembe na lembe lowu tiviwaka tanihi Xilalelo xa Hosi.

Luka 22:7, 8 yi nyikela xivumbeko xa nkarhi, yi ku: “Kuteloko ku fikile siku ra Xinkwa lexo-ke-comela, ri nga leri va tlhavaka swinyimpfana swa Paseka ha rona, Yesu a rhuma Petro na Yohane, a ku ka vona: ‘Yanani, mi ya hi lunghisela nkhuvo wa Paseka, hi ta kota ku wu dya.’” Mhaka yi ya emahlweni yi ku: “Kutani mi ta ku ka n’wini wa yindlu: ‘Mudyondzisi ú hi rhumile eka wena, ú ri, yi kwihi yindlu leyi a nga ta dyela eka yona Paseka, a ri ni vadyondzisiwa va yena, ke?’” Kutani evusikwini byebyo, Yesu a a ri ni lava va 12 enkhubyeni wa Xiyuda. U va byerile a ku: “Ndzi naverile ngopfu ku dya Paseka leyi na n’wina, ndzi nga si twisiwa ku vaviseka.”—Luka 22:11, 15.

Ku sukela eku sunguleni ka yona aEgipta, Paseka a ku ri nkhuvo wa ndyangu. Eku simekeni ka Paseka, Xikwembu xi byele Muxe leswaku nyimpfu a yi ta dlayiwa endyangwini wun’wana ni wun’wana. Loko ndyangu wu ri wuntsongo ngopfu lerova wu nga heta nyimpfu hinkwayo, ndyangu wa muakelani a wu ta rhambiwa ku hlanganyela eswakudyeni. Xisweswo, swa twala leswaku hi Paseka ya 33 C.E., vo tala va vadyondzisiwa va Yesu hi ntolovelo a va ta hlangana ni mindyangu ya vona eswakudyeni leswi.

Kambe Yesu u “naverile ngopfu” ku avelana leswi a swi ta va Paseka yo hetelela leyi tiyeke, ni vusiku byo hetelela emahlweni ka rifu ra yena, a ri ni valandzeri va yena va le kusuhi swinene, lava va fambeke na yena hi nkarhi wa vutirheli bya yena lebyikulu. Emakumu ka swakudya sweswo swa Paseka, Yesu u va byele hi nkhuvo lowuntshwa lowu a wu ta endliwa hi valandzeri va yena hinkwavo enkarhini lowu taka. Vhinyo ya nkhuvo wolowo wa Vakriste enkarhini lowu a wu ta landzela a yi ta yimela ngati ya “ntwanano lowuntshwa” lowu a wu ta siva ntwanano wa Nawu.—Luka 22:20.

Hambi swi ri tano, hi madyambu ya Nisan 14, 33 C.E., ntwanano lowuntshwa a wu nga si tirha, hikuva gandzelo ra nkoka—Yesu—a ri nga si nyikeriwa. Ntwanano wa Nawu a wa ha tirha. A wu nga si beleriwa emhandzini. Ku tlula kwalaho, a swi nga ta va erivaleni leswaku ntwanano wa khale lowu endliweke na Israyele wa ntumbuluko wu siviwile hi ntwanano lowuntshwa lowu endliweke na Israyele wa moya ku fikela hi siku ra Pentekosta.—Vagalatiya 6:16; Vakolosa 2:14.

Kutani ke, a nga kona eka vaapostola vo tshembeka va 11 kumbe eka un’wana wa vadyondzisiwa loyi a a ri entwananweni lowuntshwa emadyambyini wolawo. Naswona Yesu a a nga kombisi ku nga va amukeri ko karhi vadyondzisiwa lavan’wana va Vayuda hi ku va pfumelela leswaku va hlangana ni mindyangu ya vona leswaku va tlangela Paseka.