Swivutiso Swa Vahlayi

Loko Yesu a sungula Xilalelo xa Hosi, xana a va ri kwihi vadyondzisiwa va 70 lava eku sunguleni a a va rhume ku ya chumayela? Xana a va n’wi balekerile?

A xi kona xivangelo xo ehleketa leswaku leswi vadyondzisiwa va 70 a va nga ri kona loko Yesu a sungula Xilalelo xa Hosi, a a nga va amukeli kumbe a va n’wi balekerile. Yesu a a lava ku va ni vaapostola vakwe ntsena eka xiendlakalo lexi.

A a va amukela hinkwavo lava 12 ni lava 70. Eka vadyondzisiwa vakwe vo tala, Yesu u rhange a hlawula vadyondzisiwa va 12 lava a va vitaneke vaapostola. (Luka 6:​12-16) A a ri eGaleliya loko “a vitana lava 12” kutani “a va rhuma leswaku va ya chumayela hi Mfumo wa Xikwembu ni ku hanyisa lava vabyaka.” (Luka 9:​1-6) Endzhakunyana loko Yesu a ri eYudiya u “hlawul[e] vanhu van’wana va 70, [a] va rhuma va famba hi vambirhimbirhi.” (Luka 9:51; 10:1) Hikwalaho ka sweswo, Yesu a a ri ni vadyondzisiwa eka tindhawu to hambanahambana leti a a chumayela eka tona.

Vayuda lava veke vadyondzisiwa va Yesu a va ha endla Paseka lembe ni lembe naswona swi nga endleka a va yi endla ni mindyangu ya vona. (Eks. 12:​6-11, 17-20) Loko a ri ekusuhi ni ku dlayiwa, Yesu ni vaapostola vakwe va ye eYerusalema. Kambe a nga vitananga vadyondzisiwa vakwe hinkwavo lava humaka eYudiya, Galeliya ni le Periya leswaku va ta tlangela Paseka leyikulu swin’we. Swi le rivaleni leswaku Yesu a a lava ku va ni vaapostola ntsena eka xiendlakalo lexi. U va byele leswi: “Ndza tsaka swinene ku dya Paseka leyi na n’wina ndzi nga si xanisiwa.”—Luka 22:15.

A a ri ni xivangelo lexi twalaka xo endla tano. Ku nga ri khale Yesu a a ta fa tanihi “Xinyimpfana xa Xikwembu lexi susaka xidyoho emisaveni.” (Yoh. 1:29) A a ta fela eYerusalema, laha Xikwembu a xi endleriwa kona magandzelo. Nyimpfu ya Paseka a yi tsundzuxa Vaisrayele leswaku Yehovha u va kutsule eEgipta kambe hikwalaho ka gandzelo ra Yesu a a ta endla swo tala ku tlula sweswo. Yesu a a ta tshunxa vanhu hinkwavo eka xidyoho ni rifu. (1 Kor. 5:​7, 8) Leswi Yesu a swi endleke a swi ta endla leswaku lava 12 va va xiphemu xa masungulo ya vandlha ra Vukreste. (Efe. 2:​20-22) Lexi tsakisaka, muti wo kwetsima ku nga Yerusalema wu ni “maribye ya 12” lawa eka wona ku tsariweke “mavito ya 12 ya vaapostola va 12 va Xinyimpfana.” (Nhlav. 21:​10-14) Hakunene, vaapostola vo tshembeka a va ta endla ntirho wa nkoka leswaku xikongomelo xa Xikwembu xi hetiseka. Xisweswo swa twisiseka leswi Yesu a a lava ku va na vona eka Paseka yoleyo yo hetelela ni le ka leswi a swi ta endleka hi ku hatlisa endzhaku ka sweswo, ku nga Xilalelo xa Hosi.

Lava 70 ni vadyondzisiwa van’wana a va nga ri kona eka xilalelo xexo. Nilokoswiritano, vadyondzisiwa hinkwavo lava tshameke va tshembekile a va ta vuyeriwa eka Xilalelo xa Hosi lexi Yesu a xi sunguleke. Hinkwavo lava hi ku famba ka nkarhi va veke Vakreste lava hlawuriweke, a va ta va xiphemu xa ntwanano wa mfumo, lowu Yesu a wu endleke ni vaapostola hi vusiku byebyo.—Luka 22:​29, 30.