Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Kutani, vona loko u nga swi kota ku hlamula swivutiso leswi landzelaka:

◻ I xisekelo xihi lexi varisi va moya va nga na xona eku tekeni ka goza ku sungula ro hlangana ni vanhu van’wana lava tsemiweke ku vona loko va nga khutaziwa ku hundzuka?

Hambi ku ri loko Vaisrayele va ha ri evuhlongeni naswona va nga si hundzuka, Yehova, tanihi murisi, u teke magoza yo va lava, a rhumela vaprofeta va yena eka vona. Varisi va Vukriste va tsakela ku pfuna munhu un’wana ni un’wana la tisolaka loyi a fanaka ni nyimpfu leyi lahlekeke. (Ringanisa Luka 15:4-7.)—4/15, matluka 21-3.

◻ Xifaniso xa Yesu xa n’wana wa vusopfa xi kombisa leswaku hi fanele ku titwa ni ku endlisa ku yini loko un’wana a tlheriseriwa ebandlheni ra Vukriste? (Luka 15:22-32)

Xikongomelo xa hina xi fanele xi ri xa ku tekelela tatana, la kombiseke ntsako eku vuyeni ka n’wana wa yena wa vusopfa. Kutani ke, hi ku ntshunxeka hi fanele hi vulavula ni makwerhu la tlheriseriweke hi tlhela hi n’wi khutaza leswaku a endla nhluvuko entiyisweni.—4/15, tluka 25.

◻ I tindlela tihi leti tirhaka leti nga tirhisiwaka ku papalata ku hlaseriwa hi vugevenga?

Loko swi koteka, papalata ku va etindhawini leti nga ni khombo ni vusiku. Tumbeta swin’wetsin’wetsi swihi na swihi, naswona rhwala swilo swo tanihi khamera enkwameni wo xava ha wona. Papalata ku famba hi le makumu swinene ka xitarata, ngopfu-ngopfu loko u khome nkwama. (Vona Swivuriso 3:21-23.)—5/1, matluka 5-6.

◻ Ha yini vuprofeta lebyi nga eka Sofonia 2:3 byi ku: “Kumbe mi ta tifihla e sikwini ra v̌ukari bya Yehova”?

Ku pona ku titshege hi ku tshembeka ni ku tiyisela. (Matewu 24:13) Kutani ke, hi lava namarhelaka mimpimanyeto ya Xikwembu ya ku lulama ni ku ya emahlweni va vulavula ririmi leri tengeke ntsena lava nga ta fihliwa hi siku ra vukarhi bya Yehova. (Sofonia 2:1, 2)—5/1, tluka 14.

◻ I yini leswi katsekaka eku rhangiseni ka Xikwembu evuton’wini bya ndyangu?

Vatswari ni vana va fanele va gandzela Yehova ni ku tirhisa mimpimanyeto ya yena leyi kombisiweke eBibeleni.—5/15, tluka 5.

◻ Hikwalaho ka yini Yehova a nga xupulanga vadyohi xikan’we-kan’we?

Xivangelo xin’wana i xa leswaku vito ra Xikwembu ri ta tiviwa emisaveni hinkwayo. (Ringanisa Varhoma 9:17.) Xivangelo xin’wana a ku ri ku pfumelela nkarhi wo lulamisa mimphikamakaneta ya vuhosi bya Xikwembu ni ku tshembeka ka munhu, leswi humeleleke hi ku xandzuka ka le Edeni. Nakambe, ku tiyisela ka Xikwembu ku nyika lava dyohaka nkarhi wa leswaku va hundzuka ni ku lulamisa tindlela ta vona. (2 Petro 3:9)—5/15, matluka 11-12.

◻ I mintiyiso yihi leyi nyikaka vumbhoni bya leswaku Bibele yi huma eka munhu la tlakukeke ku tlula munhu wa nyama?

Bibele yi tsariwe hi vanhu va 40 vo hambana-hambana, lava a va huma eswiyin’weni hinkwaswo swa vutomi ni lava hanyeke malembe lama tlulaka 1 600; hambi swi ri tano, vatsari lava hinkwavo va landzele nhloko-mhaka yin’we ya xisekelo. Ku twanana ka le ndzeni ka Bibele a ku nga ta koteka loko a ku endliwe hi nkongomiso wa munhu ntsena.—6/1, tluka 5.

◻ I xiendlo ni ntirho wihi lowu nga tolovelekangiki, leswi vhumbiweke eka Esaya 28:21, leswi Yehova a nga ta swi endla esikwini ra hina?

Xitsundzuxo lexi nga eka Nhlavutelo 17:16 xi kombisa leswaku swigangu swa politiki swa Babilona Lonkulu swi ta n’wi hundzukela. Hikwalaho, Vujagana byi ta heriseriwa makumu swin’we ni vukhongeri byin’wana hinkwabyo byo hemba. Lexi xi ta va xiendlo xa Yehova lexi nga tolovelekangiki ni ntirho wa yena lowu nga tolovelekangiki wa siku ra hina.—6/1, tluka 22-3.

◻ Vavasati va Vakriste va fanele ku tsundzuka yini mayelana ni ku tirhisiwa ka swin’wetsin’wetsi ni switolwa?

Bibele a yi ma aleli matshalatshala hinkwawo yo antswisa kumbe ku sasekisa xivumbeko xa munhu. (Eksoda 32:2, 3; Ester 2:7, 12, 15) Kambe ku ringanisela ku fanele ku va emahlweni. Wansati a nga ha tekelela switayele swa misava hi ku olova, a tirhisa swipenda nomo, marhama kumbe tinxiyi hi ku hundzeleta hi laha Yezabele a endleke ha kona. (2 Tihosi 9:30) Nkhathalelo wu fanele ku tekiwa leswaku switolwa a swi tirhisiwi hi ndlela leyi hundzeletiweke naswona swin’wetsin’wetsi swi nga tirhisiwi hi ndlela yo biha.—6/1, matluka 30-1.

◻ Vaisrayele va ponise ku yini eka “ŝivabyi [hinkwaswo, NW] le’ŝo biha ŝa Egipta” leswi a swi tele eminkarhini ya khale? (Deuteronoma 7:15)

Va pone mavabyi yo tano ngopfu-ngopfu hikuva a va tirhisa swiletelo swa rihanyo leswi hluvukeke leswi va swi nyikiweke hi ntwanano wa Nawu.—6/15, tluka 4.

◻ Hikwalaho ka yini Xikwembu xi lerise leswaku vanhu va fanele va nga dyi ngati? (Genesa 9:3, 4; Levitika 17:10, 11; Mintirho 15:22-29)

Vutomi i nyiko leyi humaka eka Xikwembu naswona vutomi bya munhu byi titshege hi xihalaki lexi tiyisaka vutomi, lexi vuriwaka ngati. (Psalma 36:9) Hi ku khoma ngati tanihi leyi hlawulekeke, vanhu va kombisa leswaku va titshege hi Xikwembu leswaku va kuma vutomi. Hikwalaho, xivangelo lexikulu lexi a va fanele ku papalata ku dya ngati ha xona a a ku ri leswi ngati a yi ri ni nhlamuselo leyi hlawulekeke eka Xikwembu, kambe hayi hi leswi ku dya ngati a swi nga ri na rihanyo.—6/15, matluka 8-9.

◻ Xana vatswari va Vakriste ni vantshwa va nga tiyisa ku koteka ka leswaku ku ala ka n’wana ka mpompelo wa ngati ku ta xiximiwa hi ndlela yihi?

Hambi loko a nga si kula, muntshwa wa Mukriste u fanele a kota ku swi hlamusela kahle ni hi xivindzi leswi ku ala lokukulu ka vukhongeri bya yena hi ku ala ngati swi vulaka swona. Vatswari va fanele va pfuxeta timhaka leti ni vana va vona leswaku va kuma ntokoto eku hlamuseleni ka ku ala ka vona.—6/15, tluka 18.

◻ Vavasati va katekisiwe njhani hi nkarhi wa vutirheli bya Yesu bya laha misaveni?

Yesu u sungule ntirho lowu tiseke nchavelelo, ntshembo ni ntikelo lowuntshwa eka vavasati va tinxaka hinkwato. U dyondzise vavasati mintiyiso leyi enteke ya moya. (Yohane 4:7, 24-26) Hi nkarhi wa vutirheli bya yena, u amukele ku tirheriwa hi vavasati loko a famba-famba etikweni hinkwaro. (Marka 15:40, 41)—7/1, matluka 14-15.

◻ I tidyondzo tihi ta Yesu leti vatswari a va ti kuma ti pfuna eka vana va vona?

Vatswari va endla kahle ku tirhisa swifaniso ku endla leswaku mintiyiso ya Vukriste yi tshama etimbilwini ta vana va vona lavatsongo, naswona va nga ha tirhisa swivutiso leswi akaka ku vona loko vana va vona lava kuleke va ehleketisisa hi swona. (Ringanisa Matewu 17:24-27.)—7/1, tluka 26.

◻ Ha yini hi fanele ku landzela tintswalo ta rirhandzu?

Mfanelo ya tintswalo ta rirhandzu yi endla leswaku hi va ni rirhandzu eka Xikwembu ni le ka van’wana. Yi kondletela malwandla ni ku hi endla hi anakanyela van’wana. Yi tiyisa swiboho exikarhi ka ndyangu ni bandlha ra Vukriste. Ku tlula kwalaho, tintswalo ta rirhandzu ti tisa ku twala eka Yehova.—7/15, tluka 22.

◻ Ha yini swi koteka eka Mukriste ku hambukisiwa hi mhaka ya vanghana? (1 Vakorinto 15:33)

Munhu a nga ha vonaka a ri ni xinghana naswona a tsakisa, kambe loko a nga hlanganyeli eka nkhathalelo wa Mukriste wa ntirho wa Yehova kumbe hambi loko a tshemba Bibele, i munghana lowo biha. Ha yini? Hikuva vutomi bya yena byi sekeriwe eka mimpimanyeto leyi hambaneke, naswona swilo leswi swi nga swa nkoka eka Mukriste swi nga ha va swa nkoka lowutsongo eka yena.—7/15, tluka 23.

◻ Ha yini Siku ra ku Avanyisa wu ri nkarhi wa ntshembo?

Siku ra ku Avanyisa i nkarhi wa gidi ra malembe. Ri ta languteriwa hi Xikwembu hi xoxe hi ku tirhisa N’wana wa xona, Kriste Yesu, la hlawuriweke hi Xikwembu ku tirha tanihi Muavanyisi. Lowu wu ta va nkarhi wo vuyetela vutomi lebyi heleleke eka vanhu lebyi Adamu a byi lahleleke vana va yena. (1 Vakorinto 15:21, 22)—8/1, matluka 5-7.