Fambani Tanihi Lava Leteriwaka Hi Yehova

“Oho Yehova, nḍi dyonḍise ndlela ya wena! Nḍi ta famba e ku ṭhembekeni ka wena. Byisa mbilu ya nga e ku tšhav̌a v̌ito ra wena.”—PSALMA 86:11.

1, 2. I yini lexi susumetelaka Timbhoni ta Yehova leswaku ti ala ku amukela mimpompelo ya ngati?

“KUMBEXANA Timbhoni ta Yehova ti endla kahle hi ku ala ku tirhisa ngati, hikuva i ntiyiso leswaku nhlayo leyi xiyekaka ya mavabyi lama tlulelaka ma nga tluletiwa hi ngati leyi pomperiweke.” Le Quotidien du Médecin ya siku na siku ya December 15, 1987, ya le Furwa ya swa vutshunguri.

² Van’wana lava hlayeke nhlamuselo yoleyo va nga ha va va teke ku ri mhaka ya xiwelo ntsena leswaku Timbhoni ta Yehova ti ale mimpompelo ya ngati khale, swi nga si tiviwa leswaku yi ni khombo ni ku dlaya hi laha yi nga ha kona. Kambe xiyimo lexi tekiweke hi Timbhoni ta Yehova hi ngati a hi xa xiwelo, kumbe nawu lowu lowu sunguriweke hi mpambukwa wo karhi lowu nga tiviwiki, xiyimo lexi vangiwaka hi ku chava leswaku ngati a yi hlayisekanga. Ematshan’wini ya sweswo, Timbhoni ti ala ngati hikwalaho ka ku tiyimisela ka tona leswaku ti famba hi xichavo emahlweni ka Muleteri wa tona Lonkulu—Xikwembu.

3. (a) Xana Davhida u titwe njhani hi ku va ehansi ka Yehova? (b) I vuyelo byihi lebyi Davhida a a byi languterile hikwalaho ko tshemba Xikwembu?

³ Hosi Davhida, loyi a titweke a ri ehansi ka Xikwembu, a a tiyimisele ku leteriwa hi xona ni ku ‘famba entiyisweni wa xona.’ (Psalma 86:11) Nkarhi wun’wana Davhida u tsundzuxiwile leswaku loko o papalata ku va ni nandzu wa ngati emahlweni ya Xikwembu, ‘moya-xiviri wa yena wu ta phutseriwa enkwameni wa vutomi hi Yehova.’ (1 Samuel 25:21, 22, 25, 29) Hi laha vanhu va phutselaka swin’wetsin’wetsi ha kona leswaku va swi sirhelela ni ku swi hlayisa, kutani vutomi bya Davhida a a byi ta sirheletiwa ni ku hlayisiwa hi Xikwembu. Hi ku amukela xitsundzuxo xa vutlhari, Davhida a nga lavanga ku tiponisa hi matshalatshala ya munhu hi xiyexe kambe u tshembele eka Loyi a n’wi nyikeke vutomi bya yena: “U ta nḍi tiv̌isa ndlela ya v̌utomi; ku šura ka ku ṭaka ku kona e mahlweni ka wena; ni ku ṭaka lo’ku nga heriki e v̌okweni ra wena ra šinene.”—Psalma 16:11.

4. Ha yini Davhida a lave ku leteriwa hi Yehova?

⁴ Hi ku va ni langutelo rero, Davhida a nga ehleketanga leswaku yena hi yexe a nga hlawula leswaku hi yihi milawu ya Xikwembu leyi a yi ri ya nkoka kumbe leyi faneleke ku yingisiwa. Langutelo ra yena a a ku ri leri: “Yehova, nḍi kombise ndlela ya wena, u nḍi fambisa e ndleleni le’yi lulameke.” “Oho Yehova, nḍi dyonḍise ndlela ya wena! Nḍi ta famba e ku ṭhembekeni ka wena. Byisa mbilu ya nga e ku tšhav̌a v̌ito ra wena. Nḍi ta ku ḍunisa hi mbilu hikwayo ya mina, wee [Yehova], Šikwembu ša nga!” (Psalma 27:11; 86:11, 12) Minkarhi yin’wana ku famba entiyisweni emahlweni ka Xikwembu ku nga ha tikomba ku ri ndzhwalo kumbe ku nga ha lava ku tinyiketela lokukulu, kambe Davhida a a lava ku leteriwa endleleni leyinene ni leswaku a famba ha yona.

Ku Leteriwa eHenhleni Ka Ngati

5. Davhida a a tiva yini ehenhleni ka xiyimo xa Xikwembu hi ngati?

⁵ Hi fanele ku swi xiya leswaku ku sukela evutsongwanini ku ya emahlweni, Davhida u dyondzisiwe langutelo ra Xikwembu hi ngati, langutelo leri a ri nga ri xihundla xa vukhongeri. Loko Nawu wu hlayeriwa vanhu, Davhida u fanele a swi twile leswi: “Moya[-xiviri] wa nyama wu le ngatini. Nḍi mi nyikile yona altarini ku phahlela mimoya[-xiviri] ya n’wina e mhamba; hikuv̌a hi yona ngati le’yi phahlelaka moya[-xiviri] e mhamba. Hikwalaho nḍi byerile v̌ana v̌a Israel, nḍi ku: Ku nga ṭhuki ku v̌a ni munhu l’a dyaka ngati; na yena muluv̌eri l’a ṭhamaka e šikari ka ṅwina, a nga ṭhuki a dya ngati.”—Levitika 17:11, 12; Deuteronoma 4:10; 31:11.

6. Xana xilaveko lexi yaka emahlweni xa leswaku malandza ya Xikwembu ma leteriwa ehenhleni ka ngati xi ve kona hi ndlela yihi?

⁶ Tanihi leswi Xikwembu a xi tirhisa Israyele tanihi vanhu va xona lava hlanganeke, lava lavaka ku xi tsakisa a a va fanele ku leteriwa ehenhleni ka ngati. Xisweswo, tinxaka hi ku landzelelana ka tona ta majaha ni vanhwana va Vaisrayele a a va leteriwa. Kambe xana ndzetelo wo tano a wu ta ya emahlweni loko Xikwembu xi amukele bandlha ra Vakriste, xi va endla “Israel wa Šikwembu”? (Vagalatiya 6:16, BX) Ina, hakunene. Langutelo ra Xikwembu hi ngati a ri cincanga. (Malakia 3:6) Xiyimo xa xona lexi vekiweke mayelana ni ku nga tirhisi ngati hi ndlela yo biha, xi ve kona loko ntwanano wa Nawu wu nga si simekiwa, naswona xi ye emahlweni endzhaku ka loko Nawu wu herisiwile.—Genesa 9:3, 4; Mintirho 15:28, 29.

7. Ha yini ku leteriwa hi Xikwembu ehenhleni ka ngati ku ri ka nkoka swinene eka hina?

⁷ Ku xixima ngati i ka nkoka eka Vukriste. Van’wana va nga ha vutisa, ‘Xana sweswo a hi ku swi hundzeleta?’ Hambi swi ri tano, kambe i yini lexi nga xa nkoka eka Vukriste loko ku nga ri gandzelo ra Yesu? Naswona muapostola Pawulo u tsarile: “Ha yena [Yesu] hi ni ku kuṭuriwa hi ngati ya yena, ku nga ku riv̌aleriwa ka ku dyoha ka hina hi rifuwo ra tintŝalo ta šona.” (Vaefesa 1:7, BX) The Inspired Letters, leyi hundzuluxeriweke hi Frank C. Laubach, yi hundzuluxela ndzimana leyi yi ku: “Ngati ya Kriste yi hi hakelerile kutani sweswi hi va Yena.”

8. Xana “ntshungu lowukulu” wu titshege njhani hi ngati leswaku wu kuma vutomi?

⁸ Hinkwavo lava nga ni ntshembo wo pona “nhlomulo lowukulu” lowu tshinelaka ni ku tiphina hi mikateko ya Xikwembu emisaveni ya paradeyisi va titshege hi ngati ya Yesu leyi halatiweke. Nhlavutelo 7:9-14 ya va hlamusela naswona hi ku ya hi leswi va swi endleke yi ri: “Lava, hi lava humaka [eka nhlomulo lowukulu]; va hlantswile tinguvu ta vona, va ti basisile hi ngati ya Xinyimpfana.” Xiya ririmi leri nga laha. A ri vuli swona leswaku lava ponisiweke enhlomulweni va ‘amukele Yesu’ kumbe ‘ku pfumela eka yena,’ hambi leswi sweswo ku nga swivumbeko swa nkoka. Yi ya emahlweni yi vula leswaku va “hlantswile tinguvu ta vona, va ti basisile hi ngati ya [Yesu].” Swi vangiwa hi leswi ngati ya yena yi nga ni nkoka wo kutsula.

9. Ha yini ku yingisa Yehova malunghana ni ngati ku ri ka nkoka swonghasi?

⁹ Ku tlangela nkoka lowu swi pfuna Timbhoni ta Yehova leswaku ti tiyimisela ku nga tirhisi ngati hi ndlela yo biha, hambi loko dokodela a vula leswaku mpompelo wa laveka hakunene. A nga ha va a vona onge mimpfuno ya mpompelo yi tlula makhombo ya rihanyo lama nga vangiwaka hi ngati hi yoxe. Kambe Mukriste a nge ri honisi khombo lerikulu, khombo ra ku lahlekeriwa hi ku amukeriwa hi Xikwembu hi ku pfumela ku tirhisa ngati hi ndlela yo biha. Nkarhi wun’wana Pawulo u vulavule hi lava ‘dyohaka ha vomu endzhaku ka loko va kume vutivi lebyi kongomeke bya ntiyiso.’ Ha yini xidyoho xihi na xihi xa muxaka wolowo a a xi ri xikulu? Hikuva munhu wo tano ‘u sole N’wana wa Xikwembu naswona u teke ngati ya ntwanano leyi a hlawulekisiweke ha yona tanihi leyi nga vuriki nchumu.’—Vaheveru 9:16-24; 10:26-29.

Pfuna Van’wana Leswaku Va Leteriwa

10. I yini lexi hi endlaka hi tiyimisela ku tshika ngati?

¹⁰ Hina lava tlangelaka gandzelo ra Yesu ra nkutsulo hi khathalela leswaku hi nga dyohi, hi nga ali nkoka wa ngati ya yena lowu ponisaka vutomi. Hi ku va hi ehleketisise mhaka hi vukheta, hi xiya leswaku ku nkhensa loku tengeke eka Xikwembu hi vutomi ku fanele ku hi susumetela ku ala ku thyakisiwa kwihi na kwihi ka milawu ya xona yo lulama, leyi hi kholwaka leswaku yi endleriwe ku pfuna hina—mimpfuno ya hina ya hi laha ku nga heriki. (Deuteronoma 6:24; Swivuriso 14:27; Eklesiasta 8:12) Hambi swi ri tano, ku vuriwa yini hi vana va hina?

11-13. Hi rihi langutelo leri hoxeke ehenhleni ka vana va vona ni ngati leri vatswari van’wana va Vukriste va nga na rona, naswona ha yini?

¹¹ Loko vana va hina va ri tincece kumbe va ri vatsongo ngopfu leswaku va nga twisisa, Yehova Xikwembu a nga va languta tanihi lava baseke ni lava amukelekaka exisekelweni xa ku tinyiketela ka hina. (1 Vakorinto 7:14) Kutani i ntiyiso leswaku swihlangi endyangwini wa Vukriste swi nga ha va swi nga si twisisa ni ku hlawula ehenhleni ka ku yingisa nawu wa Xikwembu hi ngati. Hambi swi ri tano, xana hi endla hinkwaswo leswi hi nga swi kotaka ku va letela hi mhaka leyi ya nkoka? Vatswari va Vakriste va fanele va anakanyisisa swinene hi sweswo, hikuva vatswari van’wana va tikomba va ri ni langutelo leri hoxeke ehenhleni ka vana va vona ni ngati. Van’wana va vonaka va ehleketa leswaku a va na matimba ngopfu ehenhleni ka loko vana va vona lavatsongo va nyikiwa mpompelo kumbe e-e. Ha yini ku ri ni langutelo leri hoxeke?

¹² Matiko yo tala ma ni milawu kumbe matirhele ya hulumendhe leswaku ma sirhelela vana lava lan’wiweke ni lava khomiwaka hi ndlela yo biha. Vana va Timbhoni ta Yehova a vo lan’wiwa kumbe ku khomiwa hi ndlela yo biha loko vatswari va ala ku pfumelela jaha kumbe nhwana wa vona la rhandzekaka leswaku a nyikiwa ngati, hi nkarhi lowu fanaka va kombela ku tirhisiwa ka swikhomela-ndhawu swa vutshunguri leswi vutshunguri bya manguva lawa byi nga swi nyikelaka. Hambi ku ri hi langutelo ra swa vutshunguri, leswi a hi ku lan’wa kumbe ku khoma hi ndlela yo biha, hi ku xiya makhombo lama nga kona ya vutshunguri bya mpompelo. I ku tirhisiwa ka mfanelo yo pima makhombo lama katsekaka ivi u hlawula vutshunguri.a Hambi swi ri tano, malunghiselelo ya le nawini ma endliwile hi vanhu van’wana va swa vutshunguri leswaku va kuma matimba yo sindzisa mpompelo lowu nga laviwiki.

¹³ Vatswari van’wana, hi ku vona leswaku swi nga ha olova leswaku mutirhi wa swa vutshunguri a seketeriwa hi khoto ku mpompela n’wana, va nga ha ehleketa leswaku mhaka a yi langutananga na vona, leswaku a ku na nchumu lexi vatswari va nga xi endlaka kumbe lexi va faneleke va xi endla. Vona ndlela leyi langutelo rero ri hoxeke ha yona!—Swivuriso 22:3.

14. Xana Davhida na Timotiya a a va leteriwa njhani evuntshweni bya vona?

¹⁴ Hi swi xiyile leswaku Davhida a a leteriwa endleleni ya Xikwembu ku sukela evuntshweni bya yena ni loko a kula. Sweswo swi n’wi hlomisele leswaku a xixima vutomi tanihi nyiko leyi humaka eka Xikwembu ni ku tiva leswaku ngati yi yimela vutomi. (Ringanisa 2 Samuel 23:14-17.) Timotiya a a leteriwa hi mianakanyo ya Xikwembu “ku sukela evuhlangini.” (2 Timotiya 3:14, 15) Xana a wu pfumeli leswaku hambi loko Davhida na Timotiya va ri ehansi ka leswi namuntlha ku nga malembe ya le nawini ya vukulu, va fanele va swi kotile ku tiphofula kahle etimhakeni leti katsaka ku rhandza ka Xikwembu? Hi ku fanana, Vakriste lavantshwa namuntlha va fanele ku leteriwa hi ndlela ya Xikwembu, va ha ri swihlangi.

15, 16. (a) I langutelo rihi leri kuleke etindhawini tin’wana ehenhleni ka timfanelo ta vana? (b) I yini lexi vangeleke leswaku n’wana un’wana a nyikiwa ngati?

¹⁵ Etindhawini tin’wana loyi a vuriwaka n’wana la vupfeke u nyikiwa timfanelo leti fanaka ni letiya ta lavakulu. Swi titshege hi malembe kumbe ku ehleketa loku vupfeke kumbe ha swimbirhi, muntshwa a nga langutiwa tanihi loyi a vupfeke ku ringana leswaku a nga endla swiboho swa yena n’wini eka swa vutshunguri. Hambi laha leswi ku nga riki nawu, vaavanyisi kumbe vatirhela-mfumo va nga ha tshikilela ngopfu ku tsakela ka muntshwa loyi a swi kotaka ku xi hlamusela kahle xiboho xa yena lexi tiyeke hi ngati. Hi ku vulavula, loko muntshwa a nga swi koti ku hlamusela ripfumelo ra yena kahle ni hi laha ku tiyeke, khoto yi nga ha ehleketa leswaku yi fanele yi kunguhata leswi vonakaka swi antswa, hi laha yi nga ha endlaka ha kona eka ricece.

¹⁶ Jaha rin’wana a a ri dyondza Bibele ripfa ri tshika hi malembe yo tala kambe ri nga si khuvuriwa. Ku nga khathariseki ku kayivela ka yena hi mavhiki ya nkombo leswaku a fikelela malembe lawa a a ta kuma “mfanelo yo ala vutshunguri hi yexe,” xibedlele lexi n’wi tshungulaka khexe xi lave nseketelo wa khoto ku n’wi pompela hi ku hambana ni ku navela ka yena ni ka vatswari va yena. Muavanyisi la anakanyelaka u n’wi vutisisile ehenhleni ka ripfumelo ra yena hi ngati ivi a vutisa swivutiso swa xisekelo, tanihi mavito ya tibuku ta ntlhanu leto sungula ta Bibele. Jaha leri a ri swi kotanga ku ti vula, hambi ku ri ku nyikela vumbhoni lebyi khorwisaka bya leswaku wa swi twisisa leswaku ha yini a ala ngati. Lexi vavisaka, muavanyisi u pfumelele mimpompelo, a ku: “Ku ala ka [y]ena ku amukela mimpompelo ya ngati a ku sekeriwanga kona eku twisiseni loku vupfeke ka ripfumelo ra yena ra vukhongeri.”

17. I xiyimo xihi lexi nhwana wa malembe ya 14 hi vukhale a xi tekeke ehenhleni ka ku nyikiwa ngati, vuyelo byi va byihi?

¹⁷ Timhaka ti nga ha humelela hi laha ku hambaneke eka n’wana loyi a leteriweke kahle hi tindlela ta Xikwembu ni ku famba entiyisweni wa xona hi ku hiseka. Mukriste lontshwa u ve ni muxaka lowu fanaka wa khexe leyi nga tolovelekangiki. Nhwana ni vatswari va yena va twisisile ivi va amukela vutshunguri lebyi antswisiweke lebyi humaka eka dokodela exibedlhele lexi tivekaka. Hambi swi ri tano, mhaka yi yisiwe ehubyeni. Muavanyisi u tsarile: “D.P. u tiyisekise leswaku a a ta ala ku pomperiwa ngati hi ndlela yihi na yihi leyi a nga yi kotaka. U languta mpompelo ku ri ku onhiwa ka miri wa yena naswona u ku fanisa ni ku pfinya. U kombele Huvo leswaku yi xixima ku hlawula ka yena naswona yi n’wi pfumelela ku tshama [exibedlele] handle ka nsindziso wa Huvo wa mimpompelo ya ngati.” Ndzetelo wa Vukriste wu n’wi pfunile enkarhini lowu wo nonon’hwa.—Vona bokisi.

18. (a) Nhwana la karhatekaka u teke xiyimo xihi lexi tiyeke ehenhleni ka ku amukela ngati? (b) I yini leswi muavanyisi a swi kunguhateke hi ku tshunguriwa ka yena?

¹⁸ Nhwana wa malembe ya 12 hi vukhale a a tshunguriwa leukemia. Mutirhela-mfumo wa vuhlayiseki bya vana u yise mhaka ehubyeni leswaku ngati yi ta sindzisiwa eka yena. Muavanyisi u hetelele hi ku: “L. u byele huvo leyi kahle naswona hi ndlela ya ntiyiso leswaku, loko ko ringetiwa ku n’wi pompela ngati, u ta lwisana ni mpompelo wolowo hi matimba hinkwawo lawa a nga vaka na wona. U vurile, naswona ndza n’wi tshemba, leswaku u ta huwelela ni ku lwa ni leswaku u ta humesa neleta ya ntlhavelo evokweni ra yena naswona u ta ringeta ku halata ngati leyi nga enkwameni ehenhla ka mubedo wa yena. Ndza ala ku endla xileriso xihi na xihi lexi nga nghenisaka n’wana loyi eka khombo rero . . . Eka muvabyi loyi, vutshunguri lebyi kunguhatiweke hi xibedlhele byi khumba vuvabyi bya miri ntsena. Byi tsandzeka ku enerisa swilaveko swa mintlhaveko ni ripfumelo ra yena ra vukhongeri.”

Vatswari—Letelani Kahle

19. I ndzhwalo wihi lowu hlawulekeke lowu vatswari va faneleke va wu hetisisa eka vana va vona?

¹⁹ Mintokoto yo tano yi ni rungula ra matimba eka vatswari lava tsakelaka leswaku hinkwavo endyangwini wa vona va hanya hi ku ya hi nawu wa Xikwembu hi ngati. Xivangelo xin’wana lexi ha xona Abrahama a a ri munghana wa Xikwembu a a ku ri leswi a xi swi tiva leswaku mupatriarka a a ta “lerisa v̌ana v̌a yena ni yindlu ya yena e nḍaku ka yena, e ku hlayisa ndlela ya Yehova, ni ku [endla leswo lulama].” (Genesa 18:19) Xana leswi a swi fanelanga swi va tano hi vatswari va Vakriste namuntlha? Loko u ri mutswari, xana u letela vana va wena lava rhandzekaka leswaku va famba endleleni ya Yehova leswaku nkarhi hinkwawo va ‘tilunghisela ku tihlamulela eka un’wana ni un’wana loyi a vutisaka xivangelo xa ntshembo eka vona, kambe va endla tano hi ku titsongahata ni hi xichavo lexikulu’?—1 Petro 3:15.

20. I yini lexi ngopfu-ngopfu hi faneleke hi lava leswaku vana va hina va xi tiva ni ku xi pfumela ehenhleni ka ngati? (Daniel 1:3-14)

²⁰ Hambi leswi swi nga swinene leswaku vana va hina va tivisiwa hi makhombo ya mavabyi ni makhombo man’wana ya mimpompelo ya ngati, ku letela vana va hina hi nawu lowu hetisekeke wa Xikwembu hi ngati, ngopfu-ngopfu a swi vuli ku ringeta ku nghenisa ku chava ngati. Hi xikombiso, loko muavanyisi a vutisa nhwana leswaku ha yini a nga lavi ku nyikiwa ngati naswona nhlamulo ya yena yi vula leswaku ngopfu-ngopfu u ehlekete leswaku ngati yi ni khombo kumbe ya chavisa, vuyelo ku nga va byihi? Muavanyisi a nga ha hetelela hi leswaku a nga si vupfa naswona u chavisiwe ngopfu, tanihi leswi a nga ha chavaka vuhandzuri lerova a rila ni ku ala vuhandzuri lebyi hambi ku ri vatswari va yena va ehleketeke leswaku a a byi n’wi lulamerile. Ku tlula kwalaho, eku sunguleni hi xiyile leswaku xivangelo xa xisekelo lexi Vakriste va alaka mimpompelo ha xona a hi swona leswaku ngati yi thyakisiwile kambe hi leswaku i ya risima eka Xikwembu xa hina ni Munyiki wa Vutomi. Vana va hina va fanele va swi tiva sweswo ni leswaku makhombo ya ngati ya swa vutshunguri ma endla xiyimo xa hina xa vukhongeri xi va ni ntikelo swinene.

21. (a) Vatswari va fanele va tiva yini hi vana va vona ni langutelo ra Bibele hi ngati? (b) Xana vatswari va nga va pfuna njhani vana va vona mayelana ni ngati?

²¹ Loko u ri ni vana, xana wa tiyiseka leswaku va pfumelelana na swona ni leswaku va nga xi hlamusela xiyimo lexi sekeriweke eBibeleni hi mimpompelo? Xana va pfumela hakunene leswaku xiyimo lexi i ku rhandza ka Xikwembu? Xana va kholwa leswaku ku tlula nawu wa Xikwembu ku nga va lokukulu lerova ku nga nghenisa ntshembo wa Mukriste wa vutomi lebyi nga heriki ekhombyeni? Vatswari lava tlhariheke va ta pfuxeta timhaka leti ni vana va vona, hambi i vatsongo ngopfu kumbe va kurile. Vatswari va nga va ni minkarhi yo titoloveta leyi eka yona muntshwa un’wana ni un’wana a langutanaka ni swivutiso leswi swi nga ha vutisiwaka hi muavanyisi kumbe mutirhela-mfumo wa le xibedlele. Pakani a hi swona leswaku n’wana a nhlokohata tinhla kumbe tinhlamulo leti hlawuriweke hi ku landzelelana. I swa nkoka ngopfu leswaku va tiva leswi va swi pfumelaka ni xivangelo xa kona. Kavula, ehubyeni vatswari va nga ha nyikela rungula ehenhleni ka makhombo ya ngati ni vukona bya swikhomela-ndhawu swa vutshunguri. Kambe leswi muavanyisi kumbe mutirhela-mfumo kumbexana a nga lavaka ku swi tiva hi ku vulavula ni vana va hina, hi leswaku va xi twisisa kahle xiyimo ni nhlawulo wa vona ni loko va ri ni mimpimanyeto ni mintshembo ya vona vini leyi tiyeke.—Ringanisa 2 Tihosi 5:1-4.

22. Xana vuyelo lebyi nga heriki ku nga va byihi hi ku leteriwa ka hina hi Xikwembu ehenhleni ka ngati?

²² Hinkwerhu ka hina hi fanele hi twisisa ni ku khomelela swinene eka langutelo ra Xikwembu hi ngati. Nhlavutelo 1:5 yi hlamusela Kriste tanihi loyi a ‘hi rhandzaka ni loyi a hi ntshunxeke eswidyohweni swa hina hi ngati ya yena n’wini.’ Hi nga kuma ku rivaleriwa swidyoho swa hina hi vutalo ni hi laha ku nga heriki, loko hi amukela nkoka wa ngati ya Yesu ntsena. Hi laha ku twisisekaka Varhoma 5:9 yi ri: “Loko swi ri tano, leswi hi nga endliwa lava lulameke sweswi, hi mhaka ya [ngati ya] yena, ngopfu-ngopfu hi ta ponisiwa ha yena evukarini.” Kutani, i vutlhari swonghasi eka hina ni vana va hina leswaku hi leteriwa hi Yehova emhakeni leyi ni ku tiyimisela ku famba endleleni ya yena hi laha ku nga heriki!

[Nhlamuselo ya le hansi]

Tinhla-nkulu Ta Ndzetelo

◻ Hi fanele ku va ni langutelo rihi ehenhleni ka ku leteriwa hi Yehova?

◻ Ha yini ku yingisa nawu wa Xikwembu hi ngati ku ri ka nkoka swinene?

◻ Ha yini swi ri swa nkoka leswaku vantshwa va kota ku hlamusela kahle xiyimo xa vona hi ngati na hi laha ku tiyeke?

◻ Xana vatswari va Vakriste va nga va pfuna njhani vana va vona leswaku va leteriwa kahle hi nawu wa Yehova hi ngati?

[Bokisi leri nga eka tluka 17]

HUVO A A YI NYANYURIWILE

Xana xiboho xa huvo xi te yini malunghana na D.P., loyi a boxiweke eka ndzimana 17?

“Huvo a yi nyanyukile swinene hi vutlhari, ku tiyimisela, ntikelo ni ku vupfa ka n’wana loyi wa malembe ya 14-1/2 hi vukhale. A nga ha va a tsanisiwe swinene hi ntshubulo wa leswaku a a ri ni muxaka wa khexe leyi dlayaka . . . Hambi swi ri tano, a a ku ri muntshwa la vupfeke loyi a teke eHubyeni ku ta nyikela vumbhoni. U tikombe a ku twisisa kahle ku nonon’hweriwa loku a langutaneke na kona. U ve kona eka minongonoko hinkwayo ya dyondzo, a amukela kungu ra vutshunguri, a vumba filosofi leyi twisisekaka leswaku yena tanihi munhu a nga langutana njhani ni ntlhontlho lowu wa vutshunguri, naswona u te eHubyeni a ri ni xikombelo lexi khumbaka: xiximani xiboho xa mina . . .

“Ku engetela eka ku vupfa ka yena, D.P. u phofule swisekelo leswi twalaka swa leswaku Huvo yi xi xixima xiboho xakwe. Hi tlhelo ra moya, ra miehleketo, ra mahanyelo ni ra minsusumeto a a ta vavisiwa hi kungu ra vutshunguri leri katsaka mimpompelo ya ngati. Huvo yi ta xixima nhlawulo wa yena wa kungu ra vutshunguri.”

[Xifaniso lexi nga eka tluka 16]

Muavanyisi kumbe mufambisi wa xibedlele a nga ha lava ku tiva leswi entiyisweni muntshwa wa Mukriste a swi pfumelaka ni xivangelo xa kona