Xana Xikwembu Xa Swi Hlamula Swikhongelo Swa Wena?

“ANDZI si tshama ndzi tokota ntsako wa ku hlamuriwa ka swikhongelo swa mina,” ku vule wansati la tshamaka eHokkaido, Japani. A nga yexe emhakeni leyi. Vanhu vo tala va ri swikhongelo swa vona a swi hlamuriwi. Kahle-kahle, u nga ha kanakana loko Xikwembu xi swi hlamula swikhongelo swa wena.

Timiliyoni ti yisa swikhongelo swo tala eka swikwembu swa ntsandza-vahlayi. Ha yini swi vonaka onge swikhongelo swo tala swinene a swi hlamuriwi? Leswaku hi kuma nhlamulo, a hi rhangeni hi kambisisa tinxaka ta swikhongelo leswi endliwaka.

I Yini Leswi Van’wana Va Swi Khongelelaka?

Hi nguva ya Lembe Lerintshwa, mbirhi xa nharhu xa vaaki va le Japani, kumbe kwalomu ka vanhu va 80 wa timiliyoni, va khongela etindhumbheni ta Vushinto kumbe etitempeleni ta Vubudha. Va endla magandzelo hi tikhoyini ivi va khongelela mikateko ni vuhlayiseki bya ndyangu.

Hi January na February—emahlweninyana ka swikambelo swa xikolo—swichudeni swi khitikanela etindhumbheni to tanihi leyi nga eTokyo leyi tivekaka hi xikwembu xa yona xa dyondzo. Va tsala ku navela ka vona eswiphambatini swa ntsandze swa xikhongelo ivi va swi hayeka etiphuphini ta timhandzi endhawini leyi rhendzeleke ndhumbha. Swiphambati leswi swa kwalomu ka 100 000 a a swi khavise xivandla xa ndhumbha leyi dumeke ya le Tokyo hi nguva ya xikambelo hi 1990.

Swikhongelo swo tala swi katsa rihanyo. Eka ndhumbha ya le Kawasaki, Japani, vanhu va khongelela ku sirheleriwa eka AIDS. “Xivangelo xa ku khongelela ku sirheleriwa eka AIDS,” ku hlamusele muprista wa ndhumbha, “hi leswaku xi ta endla vanhu va tikhoma hi ndlela ya vutlharhi.” Kambe xana ku khongeleriwa sweswo ntsena?

Eka tempele yin’wana, wansati la kuleke u khongelele “leswaku a fa hi ku tsopeta ka tihlo.” Ha yini? Hi mhaka ya leswi a a lava ku papalata ku tokota vuvabyi bya nkarhi wo leha naswona a nga lavi ku va ndzhwalo endyangwini wa ka vona.

Eka tiko rin’wana leri vuriwaka ra Vukriste, kaputeni wa bolo ya milenge u khongelele leswaku xipano xakwe xi hlula ni ku sirheleriwa eku vavisekeni. Makhatoliki ya le Poland ma khongelela vuhlayiseki bya wona vini, ma khavisa Madonna wa vona hi swin’wetsin’wetsi loko ma vona onge swikhongelo swa wona swa yingisiwa. Vanhu vo tala va khitikanela etikerekeni to tanihi Guadalupe leyi tivekaka swinene le Mutini wa Mexico, na Lourdes, eFurwa, va kombela ku hanyisiwa hi singita.

Hi le Vuxeni kumbe hi le Vupela-dyambu, vanhu va khongela hi swivangelo swo tala swo hambana-hambana swa munhu hi xiyexe. Kavula, va lava leswaku swikhongelo swa vona swi yingisiwa ni ku hlamuriwa. Kambe, xana swa twala ku langutela leswaku swikhongelo hinkwaswo swi hlamuriwa? Ku vuriwa yini hi swikhongelo swa wena n’wini? Xana swa hlamuriwa? Kahle-kahle, xana Xikwembu xa swi hlamula swikhongelo?