“Ndzi Pfune Eku Kanakaneni Ka Mina!”

“Tatana wa n’wana a hatla a tlakusa rito, a ku: ‘Ndza pfumela! Ndzi pfune eku kanakaneni ka mina!’”—MARKA 9:24.

1. I yini lexi vangeleke tatana un’wana a huwelela a ku, “Ndzi pfune eku kanakaneni ka mina”?

TATA wa mufana la ngheniweke hi demona a yima emahlweni ka Yesu Kriste. Vona ndlela leyi wanuna yoloye a a lava leswaku n’wana wa yena a horisiwa ha yona! Vadyondzisiwa va Yesu va pfumale ripfumelo leri ringaneleke leswaku va hlongola demona, kambe tata wa kona a huwelela a ku: “Ndza pfumela! Ndzi pfune eku kanakaneni ka mina!” Hi matimba lawa a ma nyikiweke hi Xikwembu, Yesu a hlongola demona, handle ko kanakana u tiyise ripfumelo ra tata wa mufana loyi.—Marka 9:14-29.

2. Malunghana ni ripfumelo, hi tihi tindlela timbirhi leti Vakriste va nga riki na tingana ha tona?

² Tanihi tata wa mufana yoloye la nga ni ntshembo, nandza la tshembekaka wa Yehova a nga nyumi ku vula a ku: “Ndza pfumela!” Vasandzi va nga ha ala matimba ya Xikwembu, ntiyiso wa Rito ra yena, naswona hambi ku ri vukona bya yena. Kambe Vakriste va ntiyiso va pfumela leswaku va na ripfumelo eka Yehova Xikwembu handle ko kanakana. Kambe, loko va vulavula exihundleni ni Tata wa vona wa le tilweni, vona vanhu lava va nga ha kombela va ku: “Ndzi pfune eku kanakaneni ka mina!” Leswi na swona va swi endla handle ko khomiwa hi tingana, va ri karhi va tiva leswaku hambi vaapostola va Yesu Kriste va komberile va ku: “Hi engetelele ku pfumela.”—Luka 17:5.

3. I yini lexi xiyekaka hi ndlela leyi Yohane a tirhiseke rito “ripfumelo” ha yona eka Epistola ya yena, naswona ha yini leswi a a swi fanela?

³ Ngopfu-ngopfu Matsalwa ya Vukriste ya Xigriki ya na swo tala swo swi vula hi ripfumelo. Entiyisweni, Evhangeli ya Yohane yi tirhisa marito yo hambana-hambana ya Xigriki lama yelanaka ni “ripfumelo” hi makhamba yo tlula 40 wa tiphesente ku tlula tievhangli letin’wana ha tinharhu ti hlanganisiwile. Yohane u kandziyise leswaku ku va na ripfumelo a swi anelangi; ku ri kombisa i swa nkoka. Loko a tsala kwalomu ka 98 C.E., u vone timhondzo ta chefu ta vugwinehi ti humelela ku phasa Vakriste lava tsaneke eripfumelweni. (Mintirho 20:28-30; 2 Petro 2:1-3; 1 Yohane 2:18, 19) Kutani ke, a a swi ri swa nkoka ku kombisa ripfumelo, ku nyikela vumbhoni bya rona hi swiendlo swa ku chava Xikwembu. Minkarhi yo nonon’hwa yi hi yimerile.

4. Ha yini ku ri hava lexi nga kotekiki eka lava va nga na ripfumelo?

⁴ Ripfumelo ri pfumelela Vakriste ku langutana ni ku nonon’hwa kwihi na kwihi. Yesu u byele vadyondzisiwa va yena leswaku loko a a va ri na “ku pfumela loku ringanaka ni ndzoho ya murhi wa sinapi,” ku hava lexi a xi nga ta koteka eka vona. (Matewu 17:20) Hi ndlela yoleyo, u kandziyise matimba ya ripfumelo, muhandzu wa moya lowo kwetsima. Xisweswo Yesu a a kandziyisa leswi moya wa Xikwembu, kumbe matimba lama tirhaka ma nga swi endlaka, hayi leswi vanhu va nga swi endlaka. Lava va kongomisiwaka hi wona a va endli swihinga na swiphiqo leswintsongo swi hundzuka leswikulu. Ku tirhisa vutlhari lebyi moya wa Xikwembu wu byi nyikelaka swi va pfuna ku teka swilo hi langutelo lerinene. Hambi swiphiqo leswikulu swa hela loko swi kongomane ni matimba lama tiyisaka ya ripfumelo.—Matewu 21:21, 22; Marka 11:22-24; Luka 17:5, 6.

Ku Khongelela Leswaku Ripfumelo Ri Nga Tsandzeki

5-7. (a) I marito wahi ya xitsundzuxo mayelana ni ripfumelo lawa Yesu a ma vuleke loko a sungula Xitsundzuxo? (b) Ripfumelo ra Petro ri n’wi pfumelele njhani ku tiyisa vamakwavo va yena?

⁵ Hi 33 C.E., Yesu u tlangele Paseka ni vadyondzisiwa va yena ro hetelela. Kutani, endzhaku ko hlongola Yudas Iskariyota, u sungule nkhuvo wa Xitsundzuxo, a ku: “Hilaha Tata wa mina a ndzi nyikeke Mfumo hakona, na mina, ndzi mi nyika wona; . . . ‘Simoni, Simoni, yingisa. Sathana ú pfumeleriwile ku mi hlela hinkwenu kukota mavele, kambe mina ndzi ku khongelerile, leswaku ku pfumela ka wena ku nga tshuki ku titivala. Kutani wena, loko u ta va u hundzukile u ta tiyisa vamakwenu.’”—Luka 22:28-32.

⁶ Yesu u khongelele leswaku ripfumelo ra Simoni Petro ri nga titivali. Hambileswi Petro a tidzuniseke hi ku titshemba ku tlula mpimo leswaku a nga ka a nga n’wi landzuli Yesu, hi ku hatlisa endzhakunyana ka sweswo u endle tano minkarhi yinharhu. (Luka 22:33, 34, 54-62) Entiyisweni, hi ku biwa ka Murisi a fa loku vhumbiweke, tinyimpfu ti hangalakile. (Zakaria 13:7; Marka 14:27) Hambi swi ri tano, loko Petro a hlakarherile eku weni ka yena entlhan’wini wa ku chava, u tiyise vamakwavo va yena va moya. U sungule mhaka ya ku siviwa ka Yudasi Iskariyota la nga tshembekangiki. Loko a tirha tanihi muvulavuleri wa vaapostola hi Pentekosta ya 33 C.E., Petro u tirhise “swilotlelo” swo sungula leswi Yesu a n’wi nyikeke swona, leswi pfulelaka Vayuda ndlela yo hundzuka swirho swa Mfumo. (Matewu 16:19; Mintirho 1:15–2:41) Sathana a a pfumeleriwile ku hlela vaapostola tanihi koroni, kambe Xikwembu xi endle leswaku ripfumelo ra vona ri nga titivali.

⁷ Anakanya ndlela leyi Petro a titweke ha yona loko a twa Yesu a ku: “Ndzi ku khongelerile, leswaku ku pfumela ka wena ku nga tshuki ku titivala.” Swi anakanye! Hosi tlhelo N’wini wa yena, yi khongelele leswaku ripfumelo ra Petro ri nga titivali. Naswona a ri titivalanga, kumbe ku hela. Entiyisweni, hi siku ra Pentekosta, Petro ni van’wana va ve vanhu vo sungula ku totiwa hi moya lowo kwetsima leswaku va va vana va Xikwembu va moya, vadyandzhaka lava languteriweke na Kriste eku kwetsimeni ka le tilweni. Hi ku tirha ka moya lowo kwetsima ehenhla ka vona hi nkarhi wolowo hi mpimo lowukulu ematin’wini, a va kota ku kombisa mihandzu ya wona, ku katsa na ripfumelo, ku tlula rini na rini. Mawaku nhlamulo leyinene swonghasi eka xikombelo xa vona lexi nge: “Hi engetele ku pfumela”!—Luka 17:5; Vagalatiya 3:2, 22-26; 5:22, 23.

Ku Langutana Ni Miringo Leyi Taka Hi Ripfumelo

8. I xitsundzuxo xihi lexi faneleke lexi nhlengeletano yi hi nyikeke xona mayelana ni ku hetiseka ka 1 Vatesalonika 5:3?

⁸ Eku hetisekeni ka vuprofeta bya Bibele, hi ku hatlisa hi ta twa ku huwelela loku nge “ku rhulile ku hava xo karhata.” (1 Vatesalonika 5:3) Xana leswi swi nga ringa ripfumelo ra hina? Ina, hikuva hi le khombyeni ra ku kumiwa hi nga xalamukanga hi ku humelela loku nga erivaleni loku matiko ma nga ha ku kumaka eku tiseni ka ku rhula. Kambe a hi nge hlanganyeli eka moya wa vahuweleri va ku rhula ko tano loko hi tsundzuka leswaku Yehova Xikwembu a nga tirhisi swona switirho swo tano swa misava leyi ku fikelela pakani yoleyo. U na ndlela ya yena n’wini yo tisa ku rhula ka ntiyiso, naswona yoleyo i ndlela Mfumo wa yena ehansi ka Yesu Kriste. Hambi swi ri tano, ku humelela kwihi na kwihi loku matiko ma nga ha vaka na kona eku simekeni ka ku rhula, ku ta va ka xinkarhana kumbe ka vukanganyisi ntsena. Leswaku a hi pfuna hi tshama hi xalamukile emhakeni leyi, “nandza la tshembekaka, wo tlhariha” u ta hambeta a humesa switsundzuxo hi nkarhi wa kona leswaku malandza ya Yehova ma nga kumiwi ma nga xalamukangi hi ku twarisa loku nyanyulaka loku taka loku nge “ku rhulile, ku hava xo karhata” ka matiko ya mafambiselo lawa ya khale ya swilo.—Matewu 24:45-47.

9. Ha yini ku herisiwa ka Babilona Lonkulu ku ta lava vurhena ni ripfumelo eka hina?

⁹ Ku huwelela loku nge “Ku rhulile, ku hava xo karhata” ku ta va xikombiso xa ‘ndzoviso wa xitshuketa’ lowu nga ta wela ehenhla ka Babilona Lonkulu, mfumo wa misava wa vukhongeri bya mavunwa. (Nhlavutelo 17:1-6; 18:4, 5) Leswi na swona swi ta ringa ripfumelo ra Vukriste. Loko vukhongeri bya mavunwa byi wa tanihi marhumbi, xana Timbhoni ta Yehova ti ta tshama ti tiyile eripfumelweni? Ina. Xiendlakalo lexi lexi nga languteriwangiki ni lexi nga twisisekiki eka vanhu vo tala—xi ta va xi nga sunguriwanga hi vanhu. Vanhu va fanele ku swi tiva leswaku entiyisweni i ku avanyisa ka Yehova, ku hlawulekisa vito leri vukhongeri bya mavunwa ku nga khale byi ri tsongahata. Kambe vanhu va nga swi tivisa ku yini handle ka loko munhu un’wana a va byerile? Naswona i mani handle ka Timbhoni ta Yehova loyi a nga languteriwaka ku va byela sweswo?—Ringanisa Ezekiel 35:14, 15; Varhoma 10:13-15.

10. Xana ku hlasela ka Gogo ehenhla ka vanhu va Yehova na kona ku ta va ndzingo wa ripfumelo hi ndlela yihi?

¹⁰ Timbhoni ta Yehova leti totiweke ni vanghana va tona lava nga ni ntshembo wa laha misaveni va ve na xivindzi lexi lavekaka ku byela van’wana hi ndzoviso lowu tshineleke wa ku avanyisa ka Yehova ehenhla ka Babilona Lonkulu ni mafambiselo hinkwaswo ya swilo ya Sathana. (2 Vakorinto 4:4) Eka xiphemu xa yena tanihi Gogo wa Magogo, leswi yimelaka xiyimo xa yena xa sweswi lexi onhakeke, Sathana u ta veka mavuthu ya yena ya la misaveni endhawini leyi faneleke leswaku ma hlasela vanhu va Xikwembu hi laha ma nga kotaka ha kona. Ripfumelo eka matimba lama sirhelelaka ya Xikwembu eka Timbhoni ta Yehova ri ta vekiwa endzingweni. Kambe hi nga va na ripfumelo leswaku hi laha Rito ra Xikwembu ri vhumbeke ha kona, Yehova u ta kutsula vanhu va yena.—Ezekiel 38:16; 39:18-23.

11, 12. (a) I yini lexi tiyiseke ku ponisiwa ka Nowa ni ndyangu wa yena hi nkarhi wa Ndhambi? (b) I yini leswi hi nga faneliki ku vilela ha swona hi nkarhi wa nhlomulo lowukulu?

¹¹ Namuntlha, a hi yi tivi kahle-kahle ndlela leyi Yehova a nga ta sirheleta vanhu va yena ha yona hi nkarhi wa ‘nhlomulo lowukulu,’ kambe lexi a hi xivangelo xo kanakana leswaku u ta swi endla sweswo. (Matewu 24:21, 22) Xiyimo xa siku ra sweswi xa malandza ya Xikwembu xi ta fana ni lexiya Nowa ni ndyangu wa yena va tikumeke va ri eka xona hi nkarhi wa Ndhambi. Va pfaleriwile endzeni ka areka va rhendzeriwe hi mati ya vukarhi ya ndzoviso, kumbexana a va chavisiwile swinene hi xikombiso lexi xa matimba ya Xikwembu naswona va fanele va khongele hi ku hiseka. Ku hava xikombiso xa Matsalwa xa leswaku a a va vilela kutani va tivutisa leswaku: ‘Xana kahle-kahle areka yi tiye hi laha ku ringaneleke leswaku yi nga pona matimba lama onhaka? Xana hi na swakudya leswi ringaneleke ku hi khomelela ku fikela loko Ndhambi yi hundzile? Xana hi ta swi kota ku langutana ni swiyimo leswi hundzukeke emisaveni endzhaku?’ Swiendlaklo leswi landzeleke swi kombisa leswaku mivilelo yo tano a yi ta pfumala swisekelo.

¹² Ku tiyisa ku ponisiwa ka vona, Nowa ni ndyangu wa yena a a va fanele ku kombisa ripfumelo. Leswi a swi vula ku landzelela swileriso ni minkongomiso ya moya lowo kwetsima wa Xikwembu. Hi nkarhi wa nhlomulo lowukulu, swi ta va swa nkoka leswaku hi landzelela minkongomiso ya moya lowo kwetsima kutani hi yingisela swileriso swa Yehova hi nhlengeletano ya yena. Kutani a hi nge vi na xivangelo xo vilela ivi hi tivutisa leswaku: ‘Xana swilaveko swa hina swa nyama ni swa moya swi ta aneriseka hi ndlela yihi? I malunghiselelo wahi lama nga ta endleriwa vanhu lava kuleke kumbe lava va lavaka vutshunguri bya swa mirhi lebyi hlawulekeke? Yehova u ta swi endla swi koteka njhani eka hina leswaku hi ponela emisaveni leyintshwa?’ Hi ripfumelo leri tiyeke, malandza hinkwawo ya Yehova lama tshembekaka ma ta veka xin’wana ni xin’wana emavokweni ya yena lama nga ni vuswikoti.—Ringanisa Matewu 6:25-33.

13. Kan’we-kan’we loko nhlomulo lowukulu wu sungula, ha yini hi ta lava ripfumelo ro fana ni ra Abrahama?

¹³ Kan’we-kan’we loko nhlomulo lowukulu wu sungurile, handle ko kanakana ripfumelo ra hina eka Xikwembu ri ta tiyisiwa swinene. Phela, hi ta swi vona leswaku Yehova u endla leswi a vuleke leswaku u ta swi endla. Hi ta va hi vona ku avanyisa ka yena hi mahlo ya hina! Kambe xana hi hexe hi ta va na ripfumelo leri ringaneleke ku tshemba leswaku loko xi ri karhi xi herisa lavo biha, Xikwembu xi ta hlayisa vanhu va xona? Xana hi ta kotisa Abrahama, loyi a a ri na ripfumelo ra leswaku ‘Loyi a avanyisaka misava hinkwayo u ta endla leswinene,’ hayi ku lovisa lavanene xikan’we ni lavo biha?—Genesa 18:23, 25.

14. I swivutiso swihi leswi nga ta hi vangela ku kambisisa ripfumelo ra hina ivi hi tirha hi matimba ku ri tiyisa?

¹⁴ I swa nkoka swinene swonghasi leswaku hi aka ripfumelo ra hina sweswi! Leswi makumu ya mafambiselo lawa yo biha ya swilo makumu ma tshineleke swinene, a hi pfumeleleni moya wa Xikwembu wu hi susumetela eka “vutomi lebyo hlawuleka bya vukhongeri.” (2 Petro 3:11-14) Kutani a hi nge hlaseriwi hi mianakanyo yo tano yo pfumala ku rhula hi nkarhi wa nhlomulo lowukulu yo tanihi leyi nge: ‘Xana ndzi lulameriwe hi ku amukela nsirhelelo wa Yehova? Xana a ndzi ta va ndzi endle leswi engetelekeke evutirhelini bya yena? Xana entiyisweni ndzi tirhe hi matimba lama ringaneleke ku ambala “hanyelo lerintshwa”? Xana ndzi muxaka wa munhu loyi Yehova a n’wi lavaka emisaveni leyintshwa?’ Swivutiso swo tano swa ntikelo swi fanele ku hi vangela ku kambisisa ripfumelo ra hina ivi hi tirha hi matimba ku ri tiyisa sweswi!—Vakolosa 3:8-10.

Ripfumelo Ro Hi Tiyisa

15. Xana Yesu minkarhi yin’wana a a va byela yini lava a va hanyiseke, kambe ha yini leswi swi nga seketeli ku hanyisa ka namuntlha ka ripfumelo?

¹⁵ Yesu a nga hikelanga mintirho ya yena ya ku hanyisa eka vanhu lava nga ni ripfumelo ntsena. (Yohane 5:5-9, 13) Kutani ntirho wa yena a wu yi seketeli dyondzo leyi nga riki ya matsalwa ya ku hanyisa hi ripfumelo. I ntiyiso, minkarhi yin’wana Yesu u byele lava a va hanyiseke a ku: “Ku pfumela ka wena ku ku hanyisile.” (Matewu 9:22; Marka 5:34; 10:52; Luka 8:48; 17:19; 18:42) Kambe hi ku vula leswi, a a kombetela ntsena eka ntiyiso lowu nga erivaleni lowu nge: Loko lavaya va vabyaka a a va ri hava ripfumelo eka vuswikoti bya Yesu byo hanyisa, a va ta va va nga tanga eka yena leswaku va ta hanyisiwa.

16. I nongonoko wihi wa vutshunguri lowu Yesu a wu fambisaka namuntlha?

¹⁶ Namuntlha, Yesu Kriste u fambisa nongonoko wa ku hanyisa ka moya, naswona vanhu vo tlula 4 000 000 va tinghenise enxaxamelweni wo kuma mpfuno. Tanihi Timbhoni ta Yehova, va tsakela rihanyo ra moya ku nga khathariseki vulema byihi na byihi bya nyama lebyi va nga ha vaka na byona. Vakriste lava totiweke exikarhi ka vona va na ntshembo wa le tilweni, naswona va ‘kongomisa mahlo ya vona eka leswi nga voniwiki swa hi laha ku nga heriki.’ (2 Vakorinto 4:16-18; 5:6, 7) Naswona Vakriste lava nga ni ntshembo wa laha misaveni va langutela swiendlo leswi hlamarisaka swa ku hanyisiwa emirini leswi nga ta humelela emisaveni leyintshwa ya Xikwembu.

17, 18. I lunghiselelo rihi ra Yehova leri hlamuseriwaka eka Nhlavutelo 22:1, 2, naswona ripfumelo ri laveka hi ndlela yihi leswaku hina hi pfuneka eka rona?

¹⁷ Muapostola Yohane u kombetela eka malunghiselelo ya Xikwembu ya vutomi lebyi nga heriki hi marito lama nga eka Nhlavutelo 22:1, 2 lama nge: “Kutani ntsumi yi ndzi komba nambu wa mati ya vutomi lowu vangamaka ku fana ni ‘kristala,’ wu khuluka wu huma exiluvelweni xa Xikwembu ni xa Xinyimpfana. Exikarhi ka xivava xa muti ni le matlhelweni ya nambu hala ni hala, ku ni murhi wa vutomi lowu nyikaka mihlovo ya 12 ya mihandzu, wu tswala mihandzu ya kona n’hweti yin’wana ni yin’wana; kutani matluka ya murhi i yo tshungula vanhu va matiko hinkwawo.” “Mati ya vutomi” ma katsa Rito ra Xikwembu ra ntiyiso ni malunghiselelo laman’wana hinkwawo ya Yehova yo hlakarhelisa vanhu lava yingisaka ku suka exidyohweni ni rifu ivi a va nyika vutomi lebyi nga heriki exisekelweni xa gandzelo ra Yesu ra nkutsulo. (Vaefesa 5:26; 1 Yohane 2:1, 2) Loko va ha ri emisaveni, valandzeri va Yesu va 144 000 lava totiweke va nwa eka lunghiselelo ra vutomi ra Xikwembu ha Kriste naswona va vitaniwa “mikuhlu ya ku lulama.” (Esaya 61:1-3; Nhlavutelo 14:1-5) Va humese mihandzu yo tala ya moya emisaveni. Tanihi lava pfuxiweke, hi ku fuma ka Kriste ka Gidi ra Malembe, va ta hlanganyela etilweni eku hleleni ka malunghiselelo ya nkutsulo lama nga ta tirha ku “tshungula vanhu va matiko hinkwawo” eka xidyoho ni rifu.

¹⁸ Loko ripfumelo ra hina eka malunghiselelo lawa ya Xikwembu ri tiyile, ku rhandza ka hina ko landzelela minkongomiso ya moya wa xona wa ku hlanganyela eka wona ku ta kula. Ku hetiseka ka le mirini eku heteleleni ku ta ta loko munhu a kombisa ripfumelo eka Kriste ivi a endla nhluvuko wa moya. Hambi leswi munhu a nga ha vaka a hanyisiwile hi singita eka vulema lebyikulu, u ta tshinetiwa eku hetisekeni loko a ri karhi a endla leswinene. Nkarhi na nkarhi u ta va a nwa eka lunghiselelo ra Xikwembu ro hanyisa hi gandzelo ra Kriste. Kutani ripfumelo ri ta endla leswaku hi hanyisiwa ni ku hetisekisiwa hi tlhelo ra nyama.

‘Ku Ponisiwa Hi Ripfumelo’

19. Ha yini swi ri swa nkoka ku tshama u tiyile eripfumelweni?

¹⁹ Ku kondza vurhonga bya misava leyintshwa ya Xikwembu ya hi laha ku nga heriki byi herisa munyama wa misava ya sweswi leyi hombolokeke, i swa nkoka swinene leswaku malandza ya Yehova ma tshama ma tiyile eripfumelweni! Vanhu “lava alaka ku pfumela” va ta hoxiwa “etiveni leri pfurhaka hi ndzilo ni xivavula,” rifu ra vumbirhi. Leswi swi ta humelela endzhaku ka ndzingo wo hetelela eku heleni ka Mfumo wa Kriste wa Gidi ra Malembe. (Nhlavutelo 20:6-10; 21:8) Mawaku ndlela leyi lava hambetaka va kombisa ripfumelo, kutani va pona ni ku tsakela vumundzuku lebyi nga heriki, va katekisiweke ha yona!

20. 1 Vakorinto 13:13 yi ta va ni nhlamuselo leyi hlawulekeke eku heleni ka ku Fuma ka Kriste ka Gidi ra Malembe hi ndlela yihi?

²⁰ Kutani marito lawa ya Pawulo eka 1 Vakorinto 13:13 ma ta va ni nhlamuselo leyi hlawulekeke: “Sweswi, ku tiyile swilo swinharhu leswi: ku pfumela, ni ku langutela, ni rirhandzu; kambe lexikulu ngopfu eka swona i rirhandzu.” Ku nga ri khale a hi nge he boheki ku kombisa ripfumelo leswaku xitshembiso xa vuprofeta eka Genesa 3:15 xi va xa xiviri kumbe ku langutela leswaku xi hetiseka. Sweswo swi ta va swi humelerile. Tanihi vahlayisi va vutshembeki, hi ta hambeta hi tshembela eka Yehova, hi va ni ripfumelo eka yena ni le ka N’wana wa yena kutani hi va rhandza tanihi lava va tiseke ku hetiseka ka vuprofeta lebyi. Ku tlula kwalaho, rirhandzu leri enteke ni ku tlangela loku humaka embilwini ka ku ponisiwa ka hina ku ta hi bohelela eka Xikwembu hi ku tinyiketela loku nga tsemekiki hi laha ku nga heriki.—1 Petro 1:8, 9.

21. I yini leswi hina namuntlha hi faneleke ku swi endla leswaku hi ‘ponisiwa hi ripfumelo’?

²¹ Hi nhlengeletano ya yena leyi vonakaka, Yehova u endle malunghiselelo lama hlamarisaka yo tiyisa ripfumelo. Ma tirhise hinkwawo ka wona. Minkarhi hinkwayo vana kona ni ku hlanganyela eminhlanganweni ya vanhu va Xikwembu. (Vaheveru 10:24, 25) Dyondza Rito ra yena ni tibuku ta Vukriste hi ku hiseka. Kombela moya lowo kwetsima eka Yehova. (Luka 11:13) Tekelela ripfumelo ra lava hi ku titsongahata va rhangelaka ebandlheni. (Vaheveru 13:7) Lwisana ni miringo ya misava. (Matewu 6:9, 13) Kurisa vuxaka bya le kusuhi na Yehova hi ndlela yin’wana ni yin’wana leyi kotekaka. Ku tlula hinkwaswo, hambeta u kombisa ripfumelo. U nga va exikarhi ka lava va tsakisaka Yehova kutani u fikelela ku ponisiwa, hikuva Pawulo u te: “Hi tintswalo ta Xikwembu leti ti mi poniseke, hikwalaho ka ku pfumela; kutani leswi, a swi humi eka n’wina, kambe i nyiko ya Xikwembu.”—Vaefesa 2:8.

Hi Tihi Tinhlamulo Ta Wena?

◻ I miringo yihi ya ripfumelo leyi yi hi kongomeke?

◻ Ripfumelo ra hina ri nga hi hanyisa hi tindlela tihi timbirhi?

◻ Hi ku ya hi 1 Petro 1:9, hi fanele hi hlayisa ripfumelo ku fikela kwihi?

◻ I malunghiselelo wahi lawa hi faneleke ku tiyisa ripfumelo ra hina ha wona?

[Xifaniso lexi nga eka tluka 15]

Tanihi tata wa n’wana loyi Yesu a n’wi hanyiseke, xana wa xi vona xilaveko xa wena n’wini xa ripfumelo leri engetelekeke?

[Xifaniso lexi nga eka tluka 17]

Ripfumelo ro tanihi leriya ra Nowa ni ndyangu wakwe ri ta laveka leswaku hi pona ‘nhlomulo lowukulu’