Tshemba Voko Ra Yehova Leri Ponisaka
“Oho Yehova, . . . Vana voko ra hina mixo wun’wana ni wun’wana, ina, ku hlayiseka ka hina hi nkarhi wa nhlomulo.”—ESAYA 33:2, NW.
1. Yehova u na voko ra matimba hi ndlela yihi?
YEHOVA u na voko ra matimba. Kavula, “Xikwembu i moya” leswi vulaka leswaku a hi voko ra nyama. (Yohane 4:24) EBibeleni, voko ro fanekisela ri yimela vuswikoti byo kombisa matimba. Xisweswo, Xikwembu xi kutsula vanhu va xona hi voko ra xona. Ina, ‘tanihi murisi, Xikwembu xi risa ntlhambi wa xona. Xi hlengeleta swinyimpfana hi voko ra xona, naswona xi swi rhwala hi xifuva xa xona.’ (Esaya 40:11; Psalma 23:1-4) Vona ndlela leyi vanhu va Yehova va titwaka va hlayiseke ha yona emavokweni ya yena ya rirhandzu!—Ringanisa Deuteronoma 3:24.
2. Hi swihi swivutiso leswi hi faneleke hi swi kambisisa laha?
2 Xana voko ra Yehova ri va ponise njhani vanhu va yena, va khale ni va sweswi? Hi wihi mpfuno lowu Xikwembu xi va nyikaka wona tanihi bandlha? Naswona ha yini vanhu va yena va nga tshembaka voko ra yena leri ponisaka eka mahlomulo ya vona hinkwawo?
Voko Ra Xikwembu Leri Ponisaka
3. Xana Matsalwa ma vula leswaku ku kutsuriwa ka Israyele aEgipta a ku huma eka mani?
3 Xi nga si kutsula Vaisrayele evukhumbini le Egipta malembe ya 3 500 lama hundzeke, Xikwembu xi byele muprofeta wa xona Muxe xi ku: “Hikwalaho u nge ka v̌ana v̌a Israel: Hi mina Yehova; nḍi ta mi rula e ku tika ka v̌a-Egipta; nḍi mi lwela; nḍi ta mi nṭhunša e v̌ukhumbini bya v̌ona, nḍi mi kuṭula hi v̌oko ra matimba, ni ku av̌anyisa lo’kukulu.” (Eksoda 6:6) Hi ku ya hi muapostola Pawulo, Xikwembu xi humese Vaisrayele aEgipta ‘hi voko leri tlakusiweke.’ (Mintirho 13:17) Vana va Kora va dzunise Xikwembu hi ku hlula ka vona eTikweni leri Tshembisiweke, va ku: “Hikuv̌a a v̌a tekangi tiko hi tlhari ra v̌ona, a hi v̌oko ra v̌ona le’ri nga v̌a ponisa; kambe i v̌oko ra wena ra šinene, i v̌oko ra wena ni ku v̌onakala ka wena, hikuv̌a u v̌a ranḍile.”—Psalma 44:3.
4. Xana ku tshemba voko ra Yehova leri ponisaka ku hakeriwe njhani emasikwini ya nhlaselo wa Asiriya?
4 Voko ra Yehova nakambe ri pfune vanhu va yena emasikwini ya nhlaselo wa Asiriya. Hi nkarhi wolowo muprofeta Esaya u khongerile a ku: “Oho Yehova, hi kombise tintswalo. Hi tshembe wena. Vana voko ra hina mixo wun’wana ni wun’wana, ina, ku hlayiseka ka hina hi nkarhi wa nhlomulo.” (Esaya 33:2, NW) Xikhongelo xexo xi hlamuriwe loko ntsumi ya Xikwembu yi dlaye vanhu va 185 000 egovelweni ra Asiriya, leswi endleke Hosi Sanekeribi a suka eYerusalema “a ri ni tingana.” (2 Tikronika 32:21; Esaya 37:33-37) Ku tshemba voko ra Yehova leri ponisaka minkarhi hinkwayo swi na vuyelo.
5. Xana voko ra Xikwembu ra matimba ri va endlele yini Vakriste lava xanisiwaka eku heleni ka Nyimpi yo Sungula ya Misava?
5 Voko ra Xikwembu ra matimba ri ponise Vakriste lava totiweke lava a a va xanisiwa eku heleni ka Nyimpi yo Sungula ya Misava. Hi 1918 yindlu-nkulu ya Huvo leyi Fumaka yi hlaseriwe hi valala va yona, naswona vamakwerhu lava tivekaka va khotsiwile. Hi ku chava mimfumo ya misava, vatotiwa va tshike ntirho wa vona wo nyikela vumbhoni hi ku helela. Kambe va khongelele leswaku wu pfuxetiwa ni leswaku va hlantswiwa exidyohweni xa ku tshika ntirho ni le thyakeni ra ku chava. Xikwembu xi angule hi ku endla leswaku vamakwerhu lava khotsiweke va ntshunxiwa, kutani endzhakunyana va vuriwa lava nga hava nandzu. Hikwalaho ka mintiyiso leyi phofuriweke eka ntsombano wa vona wa 1919 ni ku chuluriwa ka moya wa Xikwembu lowu tirhaka, vatotiwa va pfuxetiwile leswaku va tirhela Yehova handle ko chava ku hetisisa Yoel 2:28-32 ro hetelela.—Nhlavutelo 11:7-12.
Mpfuno eBandlheni
6. Hi swi tivisa ku yini leswaku swa koteka ku tiyisela xiyimo lexi nonon’hwaka ebandlheni?
6 Tanihi leswi Xikwembu xi seketelaka nhlengeletano ya xona hinkwayo, voko ra xona ri lwela vanhu lava nga eka yona. Kavula, swiyimo a swi hetisekanga eka bandlha rihi na rihi hi mhaka ya leswi vanhu hinkwavo va nga hetisekangiki. (Varhoma 5:12) Kutani malandza man’wana ya Yehova minkarhi yin’wana ma nga ha langutana ni swiyimo swo nonon’hwa ebandlheni. Hi xikombiso, hambi leswi Gayo a endleke ‘ntirho wa ku tshembeka’ hi ku amukela vamakwerhu lava endzeke hi malwandla, Diyotrefo a nga va amukelanga naswona u ringete ni ku hlongola lava nga ni malwandla ebandlheni. (3 Yohane 5, 9, 10) Hambi swi ri tano, Yehova u pfune Gayo ni van’wana leswaku va hambeta va kombisa malwandla leswaku va seketela ntirho wa ku chumayeriwa ka Mfumo. Ku titshega hi Xikwembu hi xikhongelo ku fanele ku hi pfuna leswaku hi hambeta hi endla mintirho ya ku tshembeka loko hi ri karhi hi xi rindzerile leswaku xi lulamisa xiyimo lexi nga ha vaka xi ringa ripfumelo ra hina.
7. Xana Vakriste lava tshembekaka ebandlheni ra le Korinto va hanye hi ku ya hi ku tinyiketela ka vona eka Xikwembu ku nga khathariseki swiyimo swihi?
7 A hi nge a wu hlanganyela ni bandlha ra le Korinto ra lembe xidzana ro sungula. Kutani mimpambukwa yi xungeta vun’we bya rona, ni ku pfumeleriwa ka ku tikhoma loko biha ku xungeta vumoya bya rona. (1 Vakorinto 1:10, 11; 5:1-5) Vapfumeri va yisana etihubyeni ta tiko, naswona van’wana va phikisana hi timhaka tin’wana. (1 Vakorinto 6:1-8; 8:1-13) Nkwetlembetano, mavondzo, vukarhi ni mpfilumpfilu swi endla vutomi byi tika. Van’wana va kanakana vulawuri bya Pawulo naswona va sola vuswikoti bya yena byo vulavula. (2 Vakorinto 10:10) Kambe, lavo tshembeka lava nga ebandlheni rero va hanye hi ku ya hi ku tinyiketela ka vona eka Xikwembu hi nkarhi wolowo wo nonon’hwa.
8, 9. Xana hi fanele hi endla yini loko hi langutana ni xiyimo lexi nonon’hwaka ebandlheni?
8 Loko ku va ni nkarhi wo nonon’hwa hi fanele hi namarhela vanhu va Xikwembu. (Ringanisa Yohane 6:66-69.) A hi lehiselaneni mbilu, hi xiya leswaku vanhu van’wana va hlwela ku tlula van’wana ku ambala “munhu wa hanyelo lerintshwa” ni ku tiambexa ntwela vusiwana, musa, ku titsongahata, ku rhula ni ku leha mbilu. Tanihi leswi malandza ya Xikwembu na wona ma hambanaka hi swisekelo, hinkwerhu hi fanele hi kombisa rirhandzu ni ku rivalelana.—Vakolosa 3:10-14.
9 Endzhaku ka malembe yo tala yo tirhela Yehova, makwerhu un’wana u te: “Nchumu wa nkoka eka mina, a ku ri ku namarhela swinene nhlengeletano ya Yehova leyi vonakaka. Ntokoto wa mina evuntshweni wu ndzi dyondzise vuhava bya ku titshega hi mianakanyo ya vanhu. Endzhaku ko xiya sweswo, ndzi bohe ku tshama enhlengeletanweni yo tshembeka. Xana munhu a nga ti kumisa ku yini tintswalo ni mikateko ya Yehova handle ko endla tano?” Xana na wena u tlangela lunghelo ra wena ro tirhela Yehova ni vanhu va yena lava tsakeke hi ndlela leyi fanaka? (Psalma 100:2) Loko swi ri tano, a wu nge pfumeleli nchumu leswaku wu ku humesa enhlengeletanweni ya Xikwembu kumbe wu herisa vuxaka bya wena ni Loyi voko ra yena ri ponisaka hinkwavo lava n’wi rhandzaka.
Mpfuno Loko Ndzingo Wu Hi Heta Matimba
10. (a) Xana xikhongelo xi va pfuna njhani vanhu va Xikwembu leswaku va langutana ni ndzingo? (b) Hi xihi xitiyisekiso lexi Pawulo a xi nyikeke eka 1 Vakorinto 10:13?
10 Tanihi vanhu lava tshembekaka lava hlanganyelaka ni nhlengeletano ya Xikwembu, hi kuma mpfuno wa xona hi nkarhi wa ndzingo. Hi xikombiso, xi hi pfuna ku hlayisa vutshembeki bya hina loko ndzingo wu hi heta matimba. Kavula, hi fanele hi khongela hi ku pfumelelana ni marito ya Yesu: “U nga hi yisi emiringweni, kambe u hi ponisa eka Lowo biha,” Sathana Diyavulosi. (Matewu 6:9-13) Kahle-kahle, hi khongelela leswaku Xikwembu xi nga hi pfumeleli hi hluriwa loko hi ringiwa. Nakambe xi hlamula swikhongelo swa hina swa vutlhari byo hlula miringo. (Yakobo 1:5-8) Naswona malandza ya Yehova ma nga tiyiseka leswaku ma ta wu kuma mpfuno wa yena, hikuva Pawulo u te: “A mi si humeleriwa hi miringo leyi tlulaka matimba ya munhu. Xikwembu xa tshembeka, xi nga ka xi nga pfumeri leswaku mi hlangana ni ndzingo lowu wu mi hlulaka; loko wu tshuka wu mi tela, xi ta mi nyika matimba ya ku tiyisela, mi ko mi huma eka wona.” (1 Vakorinto 10:13) Hi xihi xihlovo xa ndzingo wolowo, naswona xana Xikwembu xi yi pfurisa ku yini ndlela yo huma eka wona?
11, 12. Xana Vaisrayele va hluriwe hi ndzingo wihi, naswona hi vuyeriwa njhani eka mintokoto ya vona?
11 Ndzingo wu huma eka swiyimo leswi nga ta hi endla hi nga tshembeki eka Xikwembu. Pawulo u te: “Swilo leswi swi hundzukile xitsundzuxo eka hina, ku hi chavisa leswaku hi nga naveli leswo biha, ku fana ni leswi [Vaisrayele] va nga endlisa swona. Mi nga vi vanhu lava phahlaka swikwembu swa hava, kukotisa van’wana va vona. Hi laha Tsalwa ri vulaka hakona ri ku: ‘Vanhu va tshamile ehansi va dya ni ku nwa, kutani va sungula ku cina.’ Hi nga tshuki hi nghena evuoswini, ku fana ni leswi van’wana va vona va endliseke swona, kutani hi siku rin’we ku lovile vanhu va 23 000. Hi nga tshuki hi ringa [Yehova], ku fana ni leswi van’wana va vona va endliseke swona; kutani va herisiwile hi tinyoka. Mi nga ngurangureni ku fana ni leswi van’wana va vona va endliseke swona; kutani va herisiwile hi Ntsumi leyi dlayaka.”—1 Vakorinto 10:6-10.
12 Vaisrayele a va navela swilo leswi nga ni khombo hi ku pfumelela ku hluriwa hi ndzingo wa makwanga loko va hlengeleta ni ku dya switsatsatsa leswi Xikwembu xi swi tiseke hi singita. (Tinhlayo 11:19, 20, 31-35) Va rhange va gandzela swifaniso loko ku famba ka Muxe ku tise ndzingo wo gandzela rhole. (Eksoda 32:1-6) Magidi ma lovile hi ku hluriwa hi ndzingo kutani ma endla vuoswi ni vavasati va Vamowabu. (Tinhlayo 25:1-9) Loko Vaisrayele va hluriwe hi ndzingo, va gungula loko Kora, Datani, Abiramu vaxandzuki ni vanghana va vona va herisiwa, vanhu va 14 700 va herisiwile hi ndzoviso lowu humaka eka Xikwembu. (Tinhlayo 16:41-49) Hi nga vuyeriwa eka mintokoto yoleyo loko hi xiya leswaku a wu nga ri kona eka miringo leyi lowu Vaisrayele a va nga ta swi kota ku wu hlula. A a va tava va yi hlurile loko a va ri na ripfumelo, loko a a va wu tlangela nkhathalelo wa rirhandzu wa Xikwembu, ni loko a a va ku xiya ku lulama ka Nawu wa xona. Kutani voko ra Yehova a a ri ta va ri va ponisile, tanihi leswi ri nga hi ponisaka.
13, 14. Xana Yehova u yi pfurisa ku yini ndlela loko malandza ya yena ma langutane ni ndzingo?
13 Tanihi Vakriste, hi langutana ni miringo leyi tolovelekeke eka vanhu. Kambe, hi nga tshama hi tshembekile eka Xikwembu hi ku khongelela mpfuno wa xona ni ku lwela ku hlula ndzingo. Xikwembu xa tshembeka, naswona a xi nge hi pfumeleli hi ringiwa ku tlula matimba ya hina. Loko hi tshembeka eka Yehova, hi ta swi kuma swi koteka ku endla ku rhandza ka yena. U hi endla hi hlula hi ku hi tiyisa leswaku hi hlula ndzingo. Hi xikombiso, loko hi xanisiwa, hi nga ringiwa leswaku hi landzula, hi ku anakanya leswaku hi ta balekela ku xanisiwa kumbe rifu. Kambe loko hi tshemba voko ra matimba ra Yehova, ndzingo a wu fikeleli laha a nga taka a nga ri tiyisi ripfumelo ra hina ni ku hi nyika matimba lama aneleke leswaku hi hlayisa vutshembeki. Hi laha muapostola Pawulo a vuleke ha kona: “Hi kamanyetiwa hi matlhelo hinkwawo, kambe a hi manyiwanga; hi le ku kanakaneni, kambe a hi heli mbilu; ha hlotiwa, kambe a hi tshikiwanga ekhombyeni; ha tlumbiwa, kambe a hi herisiwi.”—2 Vakorinto 4:8, 9.
14 Yehova nakambe u tiyisa vanhu va yena hi ku tirhisa moya wa yena tanihi mutsundzuxi ni mudyondzisi. Wu hi tsundzuxa tinhla ta Matsalwa naswona wu pfuna leswaku hi twisisa ndlela yo ma tirhisa leswaku hi hlula ndzingo. (Yohane 14:26) Malandza yo tshembeka ya Yehova ma yi twisisa mimphikamakaneta leyi katsekaka endzingweni naswona a ma xisiwi leswaku ma landzela ndlela leyi hoxeke. Xikwembu xi pfule ndlela yo hlula hi ku ma endla ma tiyisela kukondza ma fa ma nga hluriwi hi ndzingo. (Nhlavutelo 2:10) Handle ko pfuna malandza ya yena hi moya wa yena, Yehova u tirhisa tintsumi ta yena ematshan’weni ya nhlengeletano yakwe.—Vaheveru 1:14.
Mpfuno eTimhakeni Ta Munhu Hi Xiyexe
15. Hi wihi mpfuno wa munhu hi xiyexe lowu hi nga wu kumaka eka Risimu ra tinsimu?
15 Lava nga enhlengeletanweni ya Yehova va kuma mpfuno etimhakeni ta munhu hi xiyexe. Hi xikombiso, van’wana va nga ha va va lava munghana wa vukati wa Mukriste. (1 Vakorinto 7:39) Loko swilo swi nga fambi kahle, swi nga va swinene ku xiya Solomoni, hosi ya Israyele. U tsandzekile ku amukeriwa hi nhwana wa Muxulamiti hi leswi a a rhandza murisi wa xiyimo xa le hansi. Rhekhodo ya mhaka leyi yi nga ha vuriwa Risimu ra Rirhandzu leri Ariweke ra Solomoni. Hi nga ha rila loko matshalatshala ya hina ya rirhandzu ma tsandzeka, kambe Solomoni u tiyisele ku tsandzeka kakwe kutani na hina hi nga tiyisela. Moya wa Xikwembu wu nga hi pfuna leswaku hi tikhoma ni ku kombisa timfanelo tin’wana ta ku chava Xikwembu. Rito ra xona ra hi pfuna leswaku hi amukela ntiyiso lowu hakanyingi wu vavisaka wa leswaku munhu a nge rhandzi un’wana ni un’wana. (Risimu ra tinsimu 2:7; 3:5) Kambe, Risimu ra Solomoni ri kombisa leswaku hi nga swi kota ku kuma mugandzeri-kulobye la hi rhandzaka swinene. Ngopfu-ngopfu, ‘risimu leri ra xiyimo xa le henhla’ ra hetiseka eka rirhandzu ra Murisi Lonene, Yesu Kriste, eka “mutekiwa” wa yena wa valandzeri lava totiweke va 144 000.—Risimu ra tinsimu 1:1; Nhlavutelo 14:1-4; 21:2, 9; Yohane 10:14.
16. “Ku karateka e nyameni” loku tokotiwaka hi Vakriste lava ngheneleke vukati ku nga katsa yini?
16 Hambi lava tekanaka ni mupfumeri “v̌a ni ku šaniseka e nyameni.” (1 Vakorinto 7:28) Ku ta va ni ku karhateka eka wanuna ni wansati ni vana va vona. (1 Vakorinto 7:32-35) Vuvabyi byi nga tisa ndzhwalo ni ntshikilelo wa mianakanyo. Nxaniso kumbe swiphiqo swa timali swi nga ha endla tatana la nga Mukriste a tikeriwa ku wundla dyangu wa yena. Vatswari ni vana va nga hambanisiwa hi ku khotsiwa, naswona van’wana va nga xanisiwa hambi ku dlayiwa. Kambe eka swiyimo sweswo hinkwaswo, hi nga lwisana ni ndzingo wo lan’wa ripfumelo ra hina loko hakunene hi tshemba voko ra Yehova leri ponisaka.—Psalma 145:14.
17. Hi xihi xiphiqo xa ndyangu lexi Xikwembu xi endleke Isaka na Raveka va xi tiyiselela?
17 Hi nga ha boheka ku tiyiselela miringo yo karhi hi nkarhi wo leha. Hi xikombiso, n’wana wa mufana a nga ha khomisa vatswari va yena lava chavaka Xikwembu gome hi ku tekana ni la nga riki mupfumeri. Sweswo swi humelerile endyangwini wa mupatriarka Isaka ni nsati wakwe Raveka. N’wana wa vona Esawu, wa malembe ya 40 u teke vavasati vambirhi va Vaheti lava a “v̌a ṭhama, v̌a dyisa Isak na Rabeka e mbiṭi.” Kahle-kahle, “[Raveka a tshamela ku byela Isaka a ku]: Nḍi nyenya v̌utomi hikwalaho ka v̌ana v̌a v̌a-Het; kungaku loko Yakob a teka e šikari ka v̌anhwana v̌olav̌o, e šikari ka v̌anhwana v̌a tiko leri, e v̌utomi byi nga nḍi pfuna yini šana?” (Genesa 26:34, 35; 27:46) Entiyisweni, moya-xiviri wo lulama wa Raveka a wu xanisiwa hi xiphiqo lexi lexi hambetaka. (Ringanisa 2 Petro 2:7, 8.) Kambe, voko ra Yehova ri seketele Isaka na Raveka, ri va pfuna leswaku va tiyisela ndzingo lowu loko va ri karhi va hlayisa vuxaka lebyi tiyeke na Yena.
18. Hi wihi ndzingo wa munhu hi xiyexe lowu C. T. Russell a wu tiyiseleleke hi mpfuno wa Xikwembu?
18 Swi khomisa gome loko xirho lexi khuvuriweke endyangwini xi tsana entirhweni wa Xikwembu. (Ringanisa 2 Timotiya 2:15.) Kambe, van’wana va tiyiselele ku lahlekeriwa hi munghana hi tlhelo ra moya, hi laha Charles T. Russell a a ri ha kona, muungameri wo sungula wa Sosayiti ya Watch Tower. Nsati wakwe u dlaye vuxaka bya yena ni Sosayiti ivi a n’wi lan’wa hi 1897, endzhaku ka kwalomu ka malembe ya 18 va tekanile. [Wansati] u mangarile leswaku a kuma pfumelelo wa le nawini wo hambana na yena hi 1903, naswona u nyikiwe wona hi 1908. Xirilo xa yena a xi ri erivaleni loko a n’wi tsalele papila endzhakunyana ka ku hambana ka vona: “Ndzi ku khongelerile swinene eHosini. . . . A ndzi nge ku karhati malunghana ni gome ra mina, kumbe ku ku kucetela hi ku ku hlamusela mintlhaveko ya mina, tanihi leswi nkarhi na nkarhi loko ndzi vona swiambalo swa wena ni swilo swin’wana swi tisaka xifaniso xin’wana emianakanyweni ya mina, xa khale ka wena—a a wu tele hi rirhandzu ni ntwela-vusiwana ni mpfuno—ku nga moya lowu Kriste a a ri na wona. . . . Oho, ndzi kombela u xiya leswi ndzi nga ta swi vula sweswi hi xikhongelo. Naswona tiyiseka leswaku lexi ndzi karhataka swinene, lexi ndzi vavisaka swinene a hi xivundza xa mina xa riendzo leri ra ha ndzi saleleke ra vutomi, kambe i ku wela ka wena exidyohweni, murhandziwa, ku lahleka ka wena hi laha ku nga heriki, hi laha ndzi vonaka ha kona.” Ku nga khathariseki mahlomulo lawa, Russell u kume nseketelo wa Xikwembu ku kondza a heta vutomi bya yena bya laha misaveni. (Psalma 116:12-15) Yehova minkarhi hinkwayo u seketela malandza yakwe lama tshembekaka.
Ku Ntshunxeka Eka Mahlomulo Hinkwawo
19. Xana hi fanele hi tsundzuka yini loko hi hambeta hi hlaseriwa hi swiphiqo leswi khomisaka gome?
19 Vanhu va Yehova va n’wi tiva a ri “Šikwembu le’ši hi hlayisaka,” Loyi a “rwalaka mirwalo ya hina hi masiku.” (Psalma 68:19, 20) Hikwalaho, tanihi vanhu va yena lava tinyiketeleke lava nga enhlengeletanweni ya yena ya laha misaveni, hi nga tshuki hi hela matimba loko hi hambeta hi hlaseriwa hi swiphiqo swo tika. Tsundzuka leswaku “Šikwembu i v̌utšhav̌elo bya hina ni matimba ya hina, i ku pfuna lo’ku kumiwaka kusuhi [hi nkarhi wa mahlomulo, NW].” (Psalma 46:1) Minkarhi hinkwayo ku n’wi tshemba ka hina ka hakeriwa. Davhida u te: “Nḍi lav̌ile Yehova, kutani o nḍi hlamurile; a nḍi kuṭula e ku tšhav̌eni hikwaku ka mina. . . . Munhu loyi wa nhlomulo o khongerile, kutani Yehova o ṅwi yingisile, a v̌a a ṅwi ponisa e nhlomulweni wa yena hikwawo.”—Psalma 34:4-6.
20. Hi swihi swivutiso leswi hi nga ta swi kambisisa?
20 Ina, Tata wa hina wa le tilweni u ponisa vanhu va yena emahlomulweni hinkwawo. U seketela nhlengeletano yakwe ya laha misaveni, u nyikela mpfuno etimhakeni ta bandlha ni timhaka ta munhu hi xiyexe. Kavula, “Yehova a nga ka a nga tšukumeti tiko ra yena.” (Psalma 94:14) Kambe a hi kambisiseni tindlela tin’wana leti Yehova a pfunaka vanhu va yena ha un’we-un’we ha tona. Xana Tata wa hina la nga le tilweni u ma tiyisa njhani malandza yakwe lama vabyaka, lava tshikileriweke emianakanyweni, lama nga ni gome hikwalaho ka ku feriwa, kumbe ku karhatiwa hi swihoxo swa wona? Hi laha hi nga ta vona ha kona, ni le timhakeni leti, hi na xivangelo xo tshemba voko ra Yehova ra matimba.
A Wu Ta Hlamurisa Ku Yini?
◻ Xana voko ra Yehova ri ponise njhani eminkarhini ya khale?
◻ Xana Yehova u va pfuna njhani vanhu va yena ebandlheni namuntlha?
◻ Xana Xikwembu xi nyikela mpfuno wihi etimhakeni ta munhu hi xiyexe?
◻ Xana hi fanele hi endla yini loko hi hambeta hi hlaseriwa hi swiphiqo leswi khomisaka gome?
[Xifaniso lexi nga eka tluka 8, 9]
Xikwembu xi humese Vaisrayele aEgipta hi ‘voko leri tlakusiweke’