Endla Voko Ra Yehova Leri Nga Heriki Ri Va Nseketelo Wa Wena
“Xikwembu lexi nga heriki i vuako bya wena, naswona ehansi ku na mavoko lama nga heriki.”—DEUTERONOMA 33:27, American Standard Version
1, 2. Ha yini vanhu va Yehova va nga tiyisekaka hi nseketelo wa yena?
YEHOVA wa khathala hi vanhu vakwe. Hi xikombiso, emahlomulweni hinkwawo ya Vaisrayele, “a a karateka na yena”! Hi rirhandzu ni ntwela-vusiwana, “o v̌a seketerile, o v̌a tlakurile.” (Esaya 63:7-9) Kutani loko hi tshembeka eka Xikwembu, hi nga tiyiseka hi nseketelo wa yena.
2 Muprofeta Muxe u te: “Šikwembu ša khale i v̌utšhav̌elo! Mav̌oko la’ma nga heriki ma ku tlakusile.” (Deuteronoma 33:27) Ku hundzuluxela kun’wana ku ri: “Xikwembu lexi nga heriki i vuako bya wena, naswona ehansi ku na mavoko lama nga heriki.” (American Standard Version) Kambe xana mavoko ya Xikwembu ma wa seketela njhani malandza ya xona?
Ha Yini Ku Ri Na Mahlomulo Yonghasi?
3. Vanhu lava yingisaka va ta wu kuma rini ‘ntshunxeko lowu vangamaka wa vana va Xikwembu’?
3 Ku tirhela Yehova a swi hi sirheleli eka mahlomulo lama tolovelekeke eka vanhu lava nga hetisekangiki. Nandza wa Xikwembu Yobo u te: “Munhu l’a v̌elekiweke hi wansati o ni masiku ma nga ri mangani, o šure makhombo.” (Yobo 14:1) Malunghana ni “masiku ya ku hanya ka hina,” mupisalema u te: “Ku tiḍunisa loku v̌a ku kumaka ha wona i ku v̌aviseka ni gome.” (Psalma 90:10) Vutomi byi ta va tano ku kondza ‘swivumbiwa swi ntshunxiwa evuhlongeni bya xidyoho ivi swi kuma ntshunxeko lowu vangamaka wa vana va Xikwembu.’ (Varhoma 8:19-22) Sweswo swi ta humelela hi nkarhi wa ku Fuma ka Kriste ka Malembe ya Gidi. Exisekelweni xa gandzelo ra nkutsulo ra Yesu vanhu lava fumiwaka hi Mfumo wolowo hi nkarhi wolowo va ta ntshunxiwa exidyohweni ni rifu. Eku heleni ka Malembe ya Gidi, Kriste ni tihosi leti nga vaprista-kulobye va ta va va pfune vanhu lava yingisaka leswaku va fikelela ku hetiseka, naswona lava nga ta tshembeka eka Xikwembu hi nkarhi wa ndzingo wo hetelela wa Sathana ni mademona yakwe, mavito ya vona ma ta tsariwa hi laha ku nga heriki “ebukwini ya vutomi.” (Nhlavutelo 20:12-15) Kutani va ta kuma ntshunxeko lowu heleleke lowu vangamaka wa vana va Xikwembu.
4. Ematshan’weni yo vilela hi swiphiqo swa hina swa vutomi, hi fanele hi endla yini?
4 Enkarhini wa sweswi, ematshan’wini yo vilela hi swiyimo swa hina evuton’wini, a hi tshembeni Yehova. (1 Samuel 12:22; Yuda 16) Na hina a hi tlangeleni swinene Muprista wa hina Lonkulu, Yesu, loyi ha yena hi nga tshinelelaka Xikwembu “leswaku hi ta tsetseleriwa ni ku kuma tintswalo leti nga ta hi pfuna eminkarhini ya ku pfumala.” (Vaheveru 4:14-16) A hi fanelanga hi fana na Adamu. Kahle-kahle u hehle Xikwembu a ku xi n’wi nyike nsati wo biha, a ku: “Hi yena wansati loyi u nga nḍi nyika yena a v̌a na mina, l’a nga nḍi ha muri, nḍi dya.” (Genesa 3:12) Xikwembu xi hi nyika swilo leswinene naswona a xi hi tiseli mahlomulo. (Matewu 5:45; Yakobo 1:17) Mahlomulo ya hina hakanyingi ma vangiwa hi ku pfumala ka hina vutlhari kumbe hi swihoxo swa munhu un’wana. Naswona ma nga ha ta eka hina hi leswi hi nga ni xidyoho naswona hi hanyaka emisaveni leyi nga ematimbeni ya Sathana. (Swivuriso 19:3; 1 Yohane 5:19) Kambe, mavoko ya Yehova lama nga heriki minkarhi hinkwayo ma seketela malandza yakwe lama tshembekaka lawa hi xikhongelo ma titshegaka hi yena naswona ma tirhisaka xitsundzuxo xa Rito rakwe hi xiviri.—Psalma 37:5; 119:105.
Ku Tiyisiwa Hi Nkarhi Wa Mavabyi
5. Hi xihi xikhutazo lexi vanhu lava vabyaka va nga xi kumaka eka Psalma 41:1-3?
5 Mavabyi ma tisela vo tala va hina nhlomulo minkarhi yin’wana. Kambe, Davhida u te: “Ku katekile loyi a anakanyaka šisiwana, hi siku ra khombo, Yehova o ta ṅwi lwela. Yehova o ta ṅwi hlayisa, a v̌a a ṅwi hanyisa; o ta katekisiwa e misav̌eni, kutani u nga ka u nga ṅwi nyiketi ku nav̌eleni ka v̌alala v̌a yena. Yehova o ta ṅwi tiyisa e masangweni loko a v̌abya; wa hunḍuluša ŝinene byetlelo bya yena loko a v̌abya.”—Psalma 41:1-3.
6, 7. Xana Xikwembu xi n’wi pfunise ku yini Davhida loko a ri esangweni a vabya, naswona xana leswi swi ma khutaza njhani malandza ya Yehova namuntlha?
6 Munhu la anakanyelaka van’wana u pfuna swisiwana. “Siku ra khombo” ri nga va nkarhi wihi na wihi wa khombo kumbe nkarhi wo leha wa ku xaniseka loku tsanisaka munhu. U tshembela eka Xikwembu leswaku xi n’wi sirhelela hi nkarhi wa ku vabya, naswona van’wana ‘va n’wi vula la tsakeke emisaveni’ hi ku hangalasa mahungu lamanene ya swiendlo swa musa leswi Yehova a n’wi endleleke swona. Xikwembu xi tiyise Davhida “loko a v̌abya,” kumbexana hi nkarhi wa ntshikelelo wa mianakanyo loko Abixalomu n’wana Davhida a lava ku wutla xiluvelo xa Israyele.—2 Samuel 15:1-6.
7 Tanihi leswi Davhida a anakanyeleke swisiwana, u anakanyile leswaku Xikwembu xi ta n’wi tiyisa loko a vabya a nga koti nchumu. (Psalma 18:24-26) Hambi leswi a vabyela ku fa, a a tiyiseka leswaku Xikwembu xi ‘ta hundzula sangu ra yena,’ hayi hi ku susa vuvabyi hi singita, kambe hi ku n’wi tiyisa hi marito lama khongotelaka. A swi ta va onge hi loko Yehova a cinca sangu ra yena ra vuvabyi ri va ra ku hlakarhela. Hi ku fanana, loko hi vabya tanihi malandza ya Xikwembu, mavoko ya Yehova lama nga heriki ma ta hi seketela.
Ku Khongotela Lava Nga Ni Gome
8. Xana Mukriste un’wana la vabyaka u ku kombise njhani ku titshega ka yena hi Xikwembu?
8 Vuvabyi byi nga vanga ntshikilelo wa mianakanyo. Mukriste loyi a vabyaka swinene, loyi minkarhi yin’wana a pfumalaka matimba yo enela hambi yo hlaya u ri: “Leswi swi ndzi endla ndzi va ni gome swinene, ndzi titwa ndzi nga pfuni nchumu, ndzi huma ni mihloti.” Hi ku tiva leswaku Sathana u lava ku n’wi wisa hi ku n’wi heta matimba, wa lwa, wa swi tiva leswaku a nge hluleki hi ku pfuniwa hi Yehova. (Yakobo 4:7) Munhu loyi i xikhutazo eka van’wana lava tivaka leswaku u tshemba Xikwembu. (Psalma 29:11) Hambi loko a ri exibendlhele, u bela vavabyi riqingho ni van’wana leswaku a va aka emoyeni. Yena hi yexe u akiwa hi ku yingisa tikhasete ta tinsimu ta Mfumo ni swihloko swa magazini lowu ni munghana wa wona, Awake!, ni ku hlanganyela ni Vakriste-kulobye. Makwerhu loyi u ri: “Nkarhi na nkarhi ndzi vulavula na Yehova hi xikhongelo, ndzi n’wi kombela leswaku a ndzi nyika matimba, nkongomiso, nkhongotelo ni mpfuno wo tiyisela.” Loko u ri Mukriste u karhatiwa hi vuvabyi lebyikulu, minkarhi hinkwayo tshemba Yehova naswona u tiseketela hi mavoko yakwe lama nga heriki.
9. Hi swihi swikombiso leswi kombisaka leswaku ntshikilelo wa mianakanyo minkarhi yin’wana wu karhata vanhu va Xikwembu?
9 Gome i xiphiqo xa khale swinene. Loko a ri endzingweni, Yobo u vulavule tanihi munhu la lan’wiweke hi Xikwembu. (Yobo 29:2-5) Ku karhateka hi ku onhaka ka Yerusalema ni makhumbi ya wona swi endle Nehemiya a visungana, naswona Petro u khome hi gome swinene hi ku landzula Kriste lerova a rila swinene. (Nehemia 2:1-8; Luka 22:62) Epafrodito a a ri ni gome hi mhaka ya leswi Vakriste le Filipiya va tweke leswaku wa vabya. (Vafilipiya 2:25, 26) Gome ri hlasele Vakriste van’wana le Tesalonika, hikuva Pawulo u khongotele vamakwerhu kwalaho leswaku va “tiyisa lava helaka ntamu.” (1 Vatesalonika 5:14) Kutani xana Xikwembu xi va pfuna njhani vanhu vo tano?
10. I yini lexi nga pfunaka loko u ringeta ku lwisana ni ntshikilelo wa mianakanyo?
10 Munhu u fanele a tibohela hi yexe leswaku ntshikilelo lowukulu a nga wu tshungula njhani.a (Vagalatiya 6:5) Ku wisa loku aneleke ni ntirho lowu ringaniseriweke swi nga pfuna. Ematshan’weni yo langutana ni swiphiqo swo hambana-hambana tanihi xiphiqo xin’we lexikulu, munhu la nga ni gome a nga swi kuma swi pfuna loko o ringeta ku swi tlhantlha ha xin’we-xin’we. Mpfuno lowu chavelelaka lowu humaka eka vakulu va bandlha wu nga pfuna swinene, ngopfu-ngopfu loko xiphiqo lexi xa mintlhaveko xi khumba vumoya. (Yakobo 5:13-15) Ku tlula hinkwaswo, i swa nkoka ku titshega hi Yehova, ‘hi n’wi rhwexa mivilelo ya hina hinkwayo, hikuva wa hi khathalela.’ Xikhongelo xa nkarhi na nkarhi ni lexi humaka embilwini xi nga tisela munhu ‘ku rhula ka Xikwembu loku nga ta rindza mbilu ni matimba ya mianakanyo ha Yesu Kriste.’—1 Petro 5:6-11; Vafilipiya 4:6, 7.
Yehova Wa Hi Pfuna Leswaku Hi Tiyisela Gome Ra Ku Feriwa
11-13. I yini lexi nga pfunaka ku hunguta gome leri tisiwaka hi ku fa ka murhandziwa?
11 Ntokoto wun’wana lowu khomisaka gome swinene i rifu ra murhandziwa. Abrahama u rile rifu ra nsati wakwe, Sara. (Genesa 23:2) Loko n’wana wakwe Abixalomu a fa, Davhida u hlaseriwe hi gome. (2 Samuel 18:33) Phela, hambi Yesu munhu la hetisekeke ‘u ririle’ hikwalaho ka rifu ra munghana wakwe Lazaro! (Yohane 11:35) Kutani ku ni gome loko murhandziwa a fa. Kambe i yini lexi nga pfunaka ku hunguta gome rero?
12 Xikwembu xi pfuna vanhu va xona leswaku va tiyisela gome lerikulu ra ku feriwa. Rito ra xona ri ri ku ta va ni ku pfuxiwa ka vafi. Hikwalaho, a hi “vaviseki kukota van’wana lava nga riki na ku langutela.” (1 Vatesalonika 4:13; Mintirho 24:15) Moya wa Yehova wu hi pfuna leswaku hi va ni ku rhula ni ripfumelo ni ku anakanyisisa hi switshembiso leswi hlamarisaka swa nkarhi lowu taka leswi nga eRitweni ra yena, leswaku hi nga karhatiwi hi ku anakanya swinene hi murhandziwa la feke. Nkhongotelo nakambe wu kumiwa hi ku hlaya Matsalwa ni ku khongela eka “Xikwembu lexi ku chavelela hinkwako ku humaka eka xona.”—2 Vakorinto 1:3, 4; Psalma 68:4-6.
13 Hi nga kuma nkhongotelo eka ntshembo wa ku pfuxiwa ka vafi hi laha Yobo la chavaka Xikwembu a endleke ha kona, la nga te: “Yo! loko ngi [wena Yehova] u nḍi fihlile šiv̌andleni ša v̌afi, u nḍi pfalela hi nkari, v̌ukari bya wena byi ko byi hunḍa, u nḍi v̌ekela siku leri u nga ta nḍi anakanya ha rona. Loko ngi munhu l’a feke a nga tlhela a hanya. A nḍi ta yingisela hi masiku hikwawo ya tinyimpi ta mina, ku fikela nkarini lowu timhaka ta mina ti nga hunḍuka. A u ta nḍi v̌itana, a nḍi ta pfumela; a u ta nav̌ela ntirho wa mav̌oko ya wena.” (Yobo 14:13-15) Gome lerikulu a ri vi kona hi ntolovelo loko munghana la rhandzekaka a teke riendzo, hikuva hi langutela ku tlhela hi n’wi vona nakambe. Gome lerikulu leri nga ha vangiwaka hi ku fa ka murhandziwa ri nga ha hungutiwa loko ho languta rifu ra Mukriste la tshembekeke hi ndlela leyi fanaka. Loko a ri na ntshembo wa laha misaveni, u ta pfuxiwa evurhongweni bya rifu laha emisaveni hi nkarhi wa ku Fuma ka Kriste ka Gidi ra Malembe. (Yohane 5:28, 29; Nhlavutelo 20:11-13) Naswona loko hi ri na tshembo wa ku hanya hi laha ku nga heriki emisaveni, hi ta swi kota ku xeweta varhandziwa va hina lava pfuxiweke.
14. Xana tinoni timbirhi ta Vakriste ti langutane njhani ni rifu ra vanuna va tona?
14 Endzhaku ka rifu ra nuna wakwe, makwerhu un’wana wa xisati a a swi tiva leswaku u fanele a ya emahlweni ni ntirho wa yena eka Xikwembu. Ku nga khathariseki ku khomeka ‘hi ku endla swo tala entirhweni wa Hosi,’ a endla nguvu hi ku rhungelela swiphemu swa 800. (1 Vakorinto 15:58) U ri: “Lowu a ku ri ntirho lowukulu, hikuva nkarhi hinkwawo” lowu a ndzi tirha ha wona a ndzi swi kota ku yingisa tinsimu ta Mfumo ni tikhasete ta Bibele, leswi hlayiseke mianakanyo ya mina yi tirha.” Hi ku tsaka u tsundzuka loko a endzeriwe hi nkulu la nga ni ntokoto ni nsati wakwe. Nkulu hi ku tirhisa Bibele u kombise leswaku Xikwembu xa khathala swinene hi tinoni. (Yakobo 1:27) Wansati un’wana wa Mukriste a nga titshandzanga vusiwana loko nuna wa yena a fa. U tlangele nseketelo wa vanghana ni ku tsakela swinene vanhu van’wana. U ri: “A a ndzi hamba ndzi khongela ni ku aka vuxaka bya le kusuhi na Yehova.” Mawaku mikateko yonghasi yo va ni nseketelo wa mavoko ya Xikwembu lama nga heriki!
Mpfuno Loko Hi Endla Xihoxo
15. Hi wihi mongo wa marito ya Davhida eka Psalma 19:7-13?
15 Hambi loko hi wu rhandza nawu wa Yehova, ha hoxa minkarhi yin’wana. Leswi handle ko kanakana swi hi khomisa gome, hi laha swi veke ha kona eka Davhida, loyi eka yena milawu, switsundzuxo, swileriso ni ku avanyisa ka Xikwembu a swi rhandzeka ku tlula nsuku. U te: “Nanḍa wa wena o dyonḍisiwa ha ŝona; l’a hlayisaka ŝona o ni hakelo le’yikulu. I mani l’a tiv̌aka ku hoša ka yena šana? U nḍi khomela milanḍu leyi nḍi yi riv̌aleke. Kambe u hlayisa nanḍa wa wena e ka la’v̌a tikurisaka; va nga ṭhuki v̌a nḍi fuma! Hi laha nḍi nga ta tenga, nḍi v̌a nḍi pfumala milanḍu le’mikulu.” (Psalma 19:7-13) A hi kambisiseni marito lawa.
16. Hikwalaho ka yini hi fanele hi papalata ku tikurisa?
16 Swiendlo swa vutikukumuxi i swidyoho leswikulu ku tlula swihoxo. Sawulo hikwalaho ka vutikukumuxi u aleriwe ku va hosi hi ku endla magandzelo ni ku sivela leswaku hosi Agaga ya Muameleki yi dlayiwa swin’we ni swilo swa nkoka leswi phangiweke, hambi leswi Xikwembu a a xi lerise leswaku Vaameleki va herisiwa. (1 Samuel 13:8-14; 15:8-19) Hosi Uziya u biwe hi nhlokonho hi ku endla mintirho ya vuprista hi vutikukumuxi. (2 Tikronika 26:16-21) Loko areka ya ntwanano yi yisiwa eYerusalema naswona golonyi leyi kokiwaka hi tihomu yi lave kuwa, Xikwembu xi be Uziya a fa hi ku khoma Areka handle ka xichavo loko a ringeta ku yi sivela ku wa. (2 Samuel 6:6, 7) Kutani, loko hi nga swi tivi leswi hi faneleke hi swi endla kumbe hi nga tivi loko hi pfumeleriwile ku endla nchumu wo karhi, hi fanele hi titsongahata ivi hi ya eka lava nga ni ku twisisa. (Swivuriso 11:2; 13:10) Kavula, loko hi tshame hi tikurisa, hi nga ha khongelela ku rivaleriwa ni ku kombela Xikwembu xi hi pfuna leswaku hi nga ha tlheli hi tikurisa.
17. Xana swidyoho leswi tumbetiweke swi nga n’wi khumbisa ku yini munhu, kambe ndzivalelo ni ntshunxeko hi nga swi kuma njhani?
17 Swidyoho leswi tumbetiweke swi vanga gome. Hi ku ya hi Psalma 32:1-5, Davhida u ringete ku tumbeta xidyoho xakwe, kambe u te: “Loko nḍi miyerile, marambu ya mina a ma gudlagudla, hi ku konya ka mina hi siku hikwaro. Hikuv̌a nhlekanhi ni v̌usiku v̌oko ra wena ri ṭhama ri nḍi tikela, matimba ya mina ma hunḍukile ku oma ka šimumu.” Ku ringeta ku miyeta ripfalo leri nga ni nandzu swi hlakate Davhida, naswona mahlomulo ma hete matimba ya yena ku fana ni murhi loko wu lahlekeriwa hi mati ya wona ya vutomi hi nkarhi wa dyandza kumbe hi nkarhi wa ku hisa lokukulu ka ximumu. Kumbexana u vabyile emianakanyweni ni le mirini ivi a lahlekeriwa hi ntsako hi ku tsandzeka ku vula xidyoho xakwe. I ku vula xidyoho eka Xikwembu loku ku nga tisaka ku rivaleriwa ni ntshunxeko. Davhida u te: “Ku katekile munhu loyi ku riv̌aleriweke ku dyoha ka yena, loyi ŝidyoho ŝa yena ŝi funengetiweke! . . . Nḍi ku tiv̌isile šidyoho ša nga, a nḍi fihlanga ku homboloka ka nga; nḍi te: Nḍi ta tiv̌ula ka Yehova e ku dyoha ka mina; kutani u hlangurile nanḍu wa šidyoho ša nga.” Mpfuno wa rirhandzu wo huma eka vakulu va Vakriste wu nga pfuna ku kondletela ku hlakarhela ka moya.—Swivuriso 28:13; Yakobo 5:13-20.
18. Hi byihi vumbhoni lebyi nga kona lebyi kombisaka leswaku xidyoho xi nga va ni mimbuyelo ya nkarhi wo leha, kambe i yini lexi nga tisaka nkhongotelo eka swiyimo swo tano?
18 Xidyoho xi nga ha va ni mimbuyelo leyi tekaka nkarhi wo leha. Swi ve tano ha Davhida, loyi a osweke na Batixeba, a endla leswaku nuna wakwe a dlayiwa kutani a tekana ni noni leyi tikeke. (2 Samuel 11:1-27) Hambi leswi Xikwembu xi kombiseke tintswalo hikwalaho ka ntwanano wa Mfumo, ku hundzuka ka Davhida, ni ku khoma ka yena vanhu van’wana kahle, Davhida u tokote ‘khombo endlwini yakwe.’ (2 Samuel 12:1-12) N’wana wa vuoswi u file. Aminoni n’wana Davhida u pfinye makwavo Tamari kutani a dlayiwa hi ku lerisa ka Abixalomu makwavo wa yena. (2 Samuel 12:15-23; 13:1-33) Abixalomu u khomise Davhida tingana hi ku etlela ni swigangu swa Davhida. U ringete ku wutla mfumo kambe a dlayiwa. (2 Samuel 15:1–18:33) Xidyoho nakambe xa ha ri na mimbuyelo. Hi xikombiso munhu la susiweke a nga ha hundzuka kutani a tlheriseriwa ebandlheni, kambe swi nga ha teka malembe ku hlangula xisandzu lexi tisiweke evitweni ra yena ni ntshikilelo wa mianakanyo lowu vangiwaka hi xidyoho. Kambe, swa khutaza swonghasi ku kuma ndzivalelo ni nseketelo wa Yehova wa mavoko ya yena lama nga heriki!
Ku Ponisiwa Eka Mahlomulo Ya Hina
19. Xana moya wa Xikwembu wu nga hi pfuna njhani loko hi ringiwa swinene?
19 Loko hi kongomane ni ndzingo lowukulu, hi nga ha pfumala vutlhari lebyi ringaneke ni matimba yo endla xiboho ni ku xi hetisisa. Emhakeni yo tano, moya wa Xikwembu “wa hi pfuna eku tsaneni ka hina; hikuva a hi tivi ndlela leyi hi fanelaka ku khongela ha yona, kambe Moya, wona ha woxe, wu khongela Xikwembu ematshan’wini ya hina, loko hina hi konya kunene hi nga humesi marito.” (Varhoma 8:26) Loko Yehova a endla leswaku swiyimo swi cinca, hi fanele hi tlangela swinene. Kambe, voko ra yena ri nga hi ponisa hi ndlela yin’wana. Loko hi khongelela vutlhari, Yehova hi moya wa yena a nga hi komba leswi hi faneleke ku swi endla ni ku hi nyika matimba lama lavekaka ku swi endla. (Yakobo 1:5-8) Hi mpfuno wa yena, hi nga tiyisela loko hi “twa ku vava nkarhinyana, hikwalaho ka miringo ya tinxaka-xaka” ni ku huma eka yona hi ri na ripfumelo leri ringiweke ni leri tiyisiweke.—1 Petro 1:6-8.
20. I yini lexi hi nga ta xi kuma loko hakunene hi endla mavoko ya Yehova lama nga heriki ma va nseketelo wa hina?
20 Hi nga karhaleni ku ya eka Xikwembu hi xikhongelo. Davhida u te: “Mahlo ya mina ma languta Yehova hi masiku, hikuv̌a o nṭhunšile milenge ya mina e ntlhaṅwini. Renḍelekela ka mina, u nḍi ṭeṭelela, hikuv̌a nḍi ri ŝanga, nḍi le khombyeni. Mahlomulo ya mbilu ya mina ma engetekile; u nḍi humesa e makhombyeni ya mina! Languta nhlomulo hi ku v̌av̌iseka ka mina, u v̌a u nḍi khomela ku dyoha hikwaku ka mina.” (Psalma 25:15-18) Ku fana na Davhida, hi ta kuma nkutsulo wa Xikwembu, tintswalo ni ndzivalelo loko hakunene hi endla mavoko ya Yehova lama nga heriki ma va nseketelo wa hina.
[Nhlamuselo ya le hansi]
a Vona swihloko leswi vulavulaka hi ntshikilelo wa mianakanyo eka Awake! ya October 22, 1987, matluka 2-16, na November 8, 1987, matluka 12-16.
Xana A Wu Ta Hlamurisa Ku Yini?
◻ Xana Yehova u ma pfunisa ku yini malandza yakwe lama vabyaka?
◻ I yini lexi nga hi pfunaka loko hi ringeta ku langutana ni ntshikilelo wa mianakanyo?
◻ I yini lexi nga pfunaka ku hunguta gome leri tisiwaka hi ku fa ka murhandziwa?
◻ Xana lava tumbetaka swidyoho swa vona va nga wu kuma njhani ntshunxeko?
◻ Hi wihi mpfuno lowu nga kona loko vanhu va Yehova va ringiwa swinene?
[Xifaniso lexi nga eka tluka 16, 17]
Hi nga kuma nkhongotelo eka ntshembo wa ku pfuxiwa ka vafi, hi laha Yobo la chavaka Xikwembu a endleke ha kona