Siku Ra Xikwembu Ra Ku Tirihisela
HI LAHA hi swi voneke ha kona eka xihloko lexi hundzeke, ku na swivangelo swo tala swa leswaku ha yini swi nga fanelanga ku rihisela. Swi hoxile hikuva eku heteleleni a swi lulamisi nchumu. A swi lulamanga hikuva swi tiyisa vulala ematshan’weni yo aka xinghana. Naswona a swi kahle hikuva swi onha vumunhu bya loyi a hlayisaka miehleketo yo rihisela.
Hambi swi ri tano, xivangelo xa nkoka swinene xa leswaku ha yini ku rihisela ka vanhu swi hoxile swi voniwa eka marito ya Muxe lama yaka eka Israyele: “Hikuva Yehova Šikwembu ša wena i Šikwembu ša tintšalo.” (Deuteronoma 4:31) Tanihi leswi Xikwembu xi nga ni tintswalo, hi fanele hi va ni tintswalo tanihi xona. Yesu u byele valandzeri va yena: “Mi va ni nsovo kukota leswi Tata wa n’wina na yena a nga ni nsovo.”—Luka 6:36.
Hambi swi ri tano, Bibele yi hlamusela Yehova tanihi “Šikwembu ša ku rihisela.” (Psalma 94:1) Muprofeta Esaya u vulavule hi ta “Lembe le’rinene ra Yehova, ni siku ra ku tirihisela ka Šikwembu ša hina.” (Esaya 61:2) Xana Xikwembu xi nga va ni tintswalo ni ku rihisela hi ndlela yihi? Loko hi fanele hi tekelela tintswalo ta Xikwembu, hikwalaho ka yini hi nga n’wi tekeleli eku rihiseleni?
Ku hlamula xivutiso xo sungula, Xikwembu xi ni tintswalo hikuva xi rhandza vanhu, naswona xa rivalela hi laha xi nga kotaka ha kona, ni hi laha xi nga tiyiselaka ha kona, leswaku vanhu va kuma nkarhi wo tshika mahanyelo ya vona yo biha. Vo tala, tanihi muapostola Pawulo, va ti tirhisa kahle tintswalo leti. Nakambe Xikwembu xa rihisela—leswaku xi hlayisa vululami—hikuva tintswalo to tano ti na mpimo wo karhi. Loko van’wana va kombise leswaku a va nge ti lulamisi tindlela ta vona, Xikwembu xi ta tisa ku avanyisa ka xona hi siku ra ku tirihisela.
Ku hlamula xivutiso xa vumbirhi, e-e, a hi fanelanga ku va lava rihiselaka hi mhaka ya leswi Xikwembu xi rihiselaka. Yehova u na vululami lebyi hetisekeke. Kambe vanhu va hava. Xikwembu xi vona matlhelo hinkwawo ya mhaka naswona minkarhi hinkwayo xi endla swiboho leswinene. A hi swi koti ku endla hi laha ku fanaka. Hi yona mhaka leyi Pawulo a tsundzuxeke: “Varhandziwa, mi nga tshuki mi tirihisela mi ri n’wina; kambe kendlukelani vukari bya Xikwembu; hikuva ku tsariwile va ku: ‘Ku rihisa i ka mina; hi mina loyi ndzi nga ta rihisela; ku vula [Yehova, NW].’” (Varhoma 12:19) Hikwalaho ka vuhlayiseki bya hina vini, ku rihisela hi ku tshikela emavokweni ya Yehova.
Ha Yini Ku Ri Na Siku Ra Ku Tirihisela?
Hambi swi ri tano, Bibele etindhawini to tala yi seketela xilaveko xa ku xupuriwa ka vadyohi lava nga hundzukiki. Hi xikombiso, muapostola Pawulo u vhumbe leswaku Xikwembu, ha Yesu, xi ta “ba lava va nga xi tiviki, va nga lava nga yingisiki Evhangeli ya Hosi ya hina Yesu.” (2 Vatesalonika 1:8) Hi ni xivangelo lexinene xo xiya swinene marito wolawo. Ha yini?
Xo sungula, hikuva vunyingi namuntlha byi phikelela ku lwisana ni vuhosi bya Muvumbi, byi ala milawu ya yena leyi lulameke. Hambi va vula leswaku va pfumela eka Xikwembu kumbe e-e, mahanyelo ya vona ma swi veke erivaleni leswaku a va na mhaka ni Xikwembu. Marito ya mupisalema ya kongome eka hinkwavo lavo tano: “Šana lo’wo homboloka a tsaṅwela yini Šikwembu? Leŝi a nge e mbilwini ya yena: U nga ka u nga lav̌isisi.” (Psalma 10:13) Entiyisweni Yehova a nge pfumeli ku tlhontlhiwa hi ndlela leyi hi laha ku nga heriki. Hambi leswi xi nga Xikwembu xa rirhandzu, nakambe i Xikwembu xa vululami. Xi ta swi yingisa swirilo swa lava hakunene va khumbekaka hi vululami: “Pfuka, Yehova! Oho Šikwembu, tlakusa v̌oko ra wena! U nga riv̌ali la’v̌a nge khombyeni.”—Psalma 10:12.
Ku tlula kwalaho, vanhu lava tlulaka nawu va onha misava leyi hi hanyaka eka yona. Va thyakise moya, tiko, ni mati; va tate misava hi vuhomboloki ni tihanyi. Naswona va hlayise tikhemikhali, nyutliya, ni matlhari man’wana lama nga ni khombo lama aneleke ku xungeta vukona bya vanhu. Ku nghenelela ka Xikwembu ka laveka leswaku ku tiyisa ku hlayiseka ka vumundzuku bya vanhu lava yingisaka. (Nhlavutelo 11:18) Ku nghenelela loku hi loku Esaya a ku vulaka siku ra ku tirihisela.
Xana Siku Ra Xikwembu Ro Tirihisela Ri Ta Hetisisa Yini?
Hi ku ya hi Vine’s Expository Dictionary of Old and New Testament Words eka Matsalwa ya Xigriki, rito ku tirihisela, loko ri tirhisiwa mayelana ni Xikwembu, hi ku kongoma ri vula “‘Lexi endliwaka hi vululami,’ ku nga ri, hi laha ku tirihisela ka vanhu hakanyingi ku nga ha kona, ku vangiwa hi ku vavisiwa kumbe hi ku hlundzuka ntsena.” Xisweswo, ku tirihisela ka Xikwembu eka valala va xona a ku nge vi nkarhi wa ku halatiwa ka ngati loku nga lawulekiki, tanihi nkwetlembetano wa vanhu wa vuharhi. Bibele ya hi byela: “[Yehova wa] swi tiva ku ponisa vanhu va vukhongeri eku karhatekeni ka vona, ni ku tshika vanhu lavo homboloka va ri eku biweni ku fikela siku ra ku avanyisa.”—2 Petro 2:9.
Malandza ya Xikwembu ya langutela siku ra Xikwembu ro tirihisela tanihi nkarhi lowu mahanyelo lamanene ma nga ta kombisiwa, ni ku ntshunxiwa ka lavo lulama eka ntshikilelo wa lavo biha. A swi vuli swona leswaku va ni rivengo kumbe va rhandza ku rihisela. “Ni l’a ṭakelaka makhombo ya v̌aṅwana a nga ka a nga poni ku biweni,” Bibele ya tsundzuxa. (Swivuriso 17:5) Hi laha ku hambaneke, va hlakulela musa ni ntwela-vusiwana, va veka swiboho swihi na swihi swa ku tirihisela eka Xikwembu.
I ntiyiso, a swi olovi leswaku munhu loyi a kariheke a endla tano kambe swa koteka, vo tala va swi endlile. Hi xikombiso, Pedro u ve ni vuhlangi lebyi nga tsakisiki naswona hakanyingi a a biwa hi vamakwavo. U ve munhu loyi a nga ni vukarhi, minkarhi hinkwayo a a tshama a ri ni swiphiqo ni maphorisa naswona a karihela nsati ni vana vakwe hikwalaho ka rivengo leri a a ri na rona eka vamakwavo. Kambe emakumu, u yingise un’wana wa Timbhoni ta Yehova, kutani endzhakunyana a sungula ku dyondza Bibele. “Hi mpfuno wa Yehova,” wa hi byela, “ndzi hundzukile, kutani sweswi, ematshan’wini yo lwa ni vanhu, ndzi va pfuna tanihi nkulu wa Mukriste.” Hi mpfuno wa Bibele ni moya wo kwetsima, Van’wana va ntsandza-vahlayi hi laha ku fanaka va hundzukile va tshika vuntswaka kumbe ku rihisela ivi va kombisa rirhandzu ni ku lehisela van’wana mbilu.
Xana U Ta Endla Yini?
Ku tsundzuka ku ta ka siku ra Xikwembu ro tirihisela swi ta hi pfuna leswaku hi ku tirhisa kahle ku leha ka Yehova mbilu. Kambe nkarhi wo endla tano wu hikiwile. Ku nga ri khale siku rero ri ta fika. Muapostola Petro u kombisile leswaku hikwalaho ka yini siku ri nga fikanga: “Hosi a yi hlweli ku endla leswi yi nga tshembisa swona, hilaha van’wana va twisisaka ku hlwela ha kona, kambe yi lehisa mbilu hikwalaho ka n’wina a yi lavi leswaku ni un’we wa n’wina a lova, kambe yi lava leswaku hinkwavo va ta eku hundzukeni.”—2 Petro 3:9.
Kutani ke, i swa xihatla ku tilunghiselela siku ra Xikwembu ro avanyisa sweswi hi ku dyondza Matsalwa ni ku tirhisa switsundzuxo swa wona. Leswi swi ta hi pfuna ku landzelela marito ya mupisalema: “Ṭhika ku kariha, u furalela ku lev̌a; u nga hlundzuki; ŝi nga ku dyohisa ntsena, hikuv̌a la’v̌o biha v̌a ta susiwa, kambe la’v̌a ṭshembaka Yehova v̌a ta fuma misav̌a.”—Psalma 37:8, 9.
[Xifaniso lexi nga eka tluka 7]
Endzhaku ka siku ra Xikwembu ro tirihisela ‘lava tshembaka Yehova va ta fuma misava’