Namarhela Swinene Eka Yehova
“Mi chivirika eku khongeleni.”—VARHOMA 12:12.
1. Hi kwihi ku rhandza ka Yehova malunghana ni xikhongelo, naswona i xikhutazo xihi lexi muapostola Pawulo a xi nyikeleke mayelana ni ku khongela?
YEHOVA i “Xikwembu lexi [nyikaka] ku langutela” eka vanhu va xona hinkwavo lavo tshembeka. Tanihi “l’a yingisaka mikhongelo,” u yingisela swikombelo swa vona swa mpfuno wo kota ku fikelela ntshembo lowu tsakisaka lowu a wu vekeke emahlweni ka vona. (Varhoma 15:13; Psalma 65:2) Naswona hi Rito ra yena, Bibele, u khutaza malandza ya yena hinkwawo ku ta eka yena nkarhi wihi na wihi lowu ma wu tsakelaka. Wa kumeka minkarhi hinkwayo, u tsakela ku amukela timhaka ta vona ta le ndzeni-ndzeni. Entiyisweni, u va khutaza leswaku va “chivirika eku khongeleni” ni leswaku va “nga tshiki ku khongela.”a (Varhoma 12:12; 1 Vatesalonika 5:17) Yehova u rhandza leswaku Vakriste hinkwavo va hambeta va ta eka yena hi xikhongelo, va n’wi byela leswi nga etimbilwini ta vona naswona va endla sweswo hi vito ra N’wana wa yena la rhandzekaka, Yesu Kriste.—Yohane 14:6, 13, 14.
2, 3. (a) Ha yini Xikwembu xi hi khutaze ku “chivirika eku khongeleni”? (b) I xitiyisekiso xihi lexi hi nga na xona xa leswaku Xikwembu xi lava leswaku hi khongela?
2 Ha yini Xikwembu xi hi nyika xikhutazo lexi? Hikuva mintshikilelo ni mindzhwalo ya vutomi yi nga ha hi tikela swinene lerova hi rivala ku khongela. Kumbe swiphiqo swi nga ha hi talela ivi swi hi tekela ntsako eku languteleni, ivi hi tshika ku khongela. Malunghana ni leswi, hi lava switsundzuxo leswi hi khutazaka ku khongela ni ku namarhela swinene eka xihlovo xa mpfuno ni nchavelelo, Yehova Xikwembu xa hina.
3 Mudyondzisiwa Yakobo u tsarile a ku: “Tshinelani kusuhi ni Xikwembu kutani xi ta tshinela kusuhi na n’wina.” (Yakobo 4:8) Ina, Xikwembu a xi le henhla ngopfu kumbe ekule ngopfu, lerova xi nga yingisa ku tiphofula ka hina eka xona, ku nga khathariseki xiyimo xa hina xa vumunhu lebyi nga hetisekangiki. (Mintirho 17:27) Ku engetela kwalaho, xa hi tsakela ni ku hi khathalela. Mupisalema u ri: “Mahlo ya Yehova ma languta la’v̌a lulameke, ni tindlev̌e ta yena ti pfulekela ku huwelela ka v̌ona.”—Psalma 34:15; 1 Petro 3:12.
4. Xana ku yingisa ka Yehova xikhongelo ku nga kombisiwa hi ndlela yihi?
4 Yehova wa xi amukela xikhongelo. Hi nga ha fananisa leswi na nhlengeletano ya vanhu laha vanhu vo hlayanyana va vulavurisanaka. Wena u kwalaho, u yingisela van’wana loko va vulavula. Xiphemu xa wena hi lexiya xa muhlaleri. Kambe un’wana u hundzulukela eka wena, a vula vito ra wena ivi a kongomisa marito ya yena eka wena. Leswi swi koka nyingiso wa wena hi ndlela leyi hlawulekeke. Hi ku fanana, minkarhi hinkwayo Xikwembu xi yingisa vanhu va xona, kwihi na kwihi laha va nga vaka kona. (2 Tikronika 16:9; Swivuriso 15:3) Kutani ke, xi twa marito ya hina, xa hi sirhelela naswona xa hi tsakela. Hikwalaho, loko hi vitana vito ra Xikwembu exikhongelweni, hi koka nyingiso wa xona, kutani xi languta eka hina hi ndlela leyi kongomeke enkarhini wolowo. Hi matimba ya yena, Yehova u kota ku vona ni ku twisisa swikombelo swa munhu leswi nga vuriwangiki swi twakala leswi endliwaka eswihundleni swa mbilu ni mianakanyo ya yena. Xikwembu xa hi tiyisekisa leswaku xi ta tshinelela hinkwavo lava va xi tshinelelaka hi ku tshembeka, lava vitanaka vito ra xona ni lava lavaka ku xi namarhela swinene.—Psalma 145:18.
N’wangulo Hi Ku Ya Hi Xikongomelo Xa Xikwembu
5. (a) Xana xitsundzuxo xa ku “chivirika eku khongeleni” xi kombisa yini malunghana ni swikhongelo swa hina? (b) Xana Xikwembu xi swi hlamula njhani swikhongelo?
5 Xitsundzuxo xa ku phikelela eku khongeleni xi kombisa leswaku Yehova minkarhi yin’wana a nga ha hi tshika hi hambeta hi khongela nkarhinyana, n’wangulo wa yena wu nga si vonaka. Hi nga ha tala ku karhala ku kombela mpfuno kumbe tintswalo ta rirhandzu eka Xikwembu, leti ti nga ha vonakaka ti laveka swinene, kambe ti hlwela ku fika. Hikwalaho, Yehova Xikwembu u hi khutaza leswaku hi nga voyameli eka mboyamelo wihi na wihi wo tano kambe hi hambeta hi khongela. Hi fanele hi hambeta hi n’wi kombela, hi tiyiseka leswaku wa swi xixima swikhongelo swa hina naswona u ta anerisa swilaveko swa hina swa xiviri, hayi leswi hi nga lo swi anakanya ntsena. Handle ko kanakana Yehova Xikwembu u pima swikombelo swa hina hi ku ya hi xikongomelo xa yena. Hi xikombiso, swi nga endleka leswaku swikombelo swa hina swi khumba ni van’wana. Hi nga ha fanisa mhaka leyi ni ya tatana loyi jaha ra yena ri kombelaka xikanyakanya eka yena. Tatana loyi wa swi tiva leswaku loko a xavela mufana loyi xikanyakanya, jaha lerin’wana na rona ri ta xi lava. Tanihi leswi n’wana loyi un’wana wa mufana a ha riki ntsongo leswaku a nga va na xikanyakanya, tatana a nga ha kunguhata ku nga xaveli munhu enkarhini wolowo. Hi ku fanana, hi ku ya hi xikongomelo xa yena ni ku hlela timhaka, Tatana wa hina wa le matilweni u kunguhata leswi entiyisweni swi nga swinene eka hina ni le ka van’wana.—Psalma 84:8, 11; ringanisa Habakuk 2:3.
6. I xifaniso xihi lexi Yesu a xi nyikeleke malunghana ni xikhongelo, naswona ku phikelela eku khongeleni ku komba yini?
6 Nchumu wa nkoka i xifaniso lexi Yesu a xi nyikeleke mayelana ni mhaka ya leswaku vadyondzisiwa vakwe “va fanele ku khongela minkarhi hinkwayo, va nga heli timbilu.” Noni yin’wana, a yi tsandzeka ku kuma vululami, yi tiyiserile eka xikombelo xa yona eka muavanyisi la nga munhu ku kondza loko eku heteleleni yi kuma vululami. Yesu u engeterile: “Kutani, xana Xikwembu a xi nga avanyiseri vahlawuriwa va xona?” (Luka 18:1-7) Ku phikelela eku khongeleni swi kombisa ripfumelo ra hina, ku titshega ka hina hi Yehova, ni ku rhandza ka hina ku n’wi namarhela ni ku endla swikombelo swa hina, hi veka swiboho emavokweni ya yena.—Vaheveru 11:6.
Swikombiso Swa Ku Namarhela Yehova
7. Xana hi nga ri tekelela njhani ripfumelo ra Avele ra ku namarhela Yehova?
7 Bibele yi tele hi timhaka ta swikhongelo leswi endliweke hi malandza ya Xikwembu. Leswi “swi tsariwile leswaku hi dyondza ha swona, ni leswaku hi va ni ku langutela, hikwalaho ka ku tiyisela ni ku chaveleriwa loku hi ku kumaka eMatsalweni.” (Varhoma 15:4) Ku langutela ka hina ka tiyisiwa hi ku xiya swikombiso swin’wana swa lava namarheleke swinene eka Yehova. Avele u endle gandzelo leri amukelekaka eka Xikwembu, naswona hambi leswi ku nga vikiwiki xikhongelo, handle ko kanakana u komberile hi xikhongelo eka Yehova leswaku onge gandzelo ra yena ri nga amukeriwa. Vaheveru 11:4 yi ri: “Hi ku pfumela, Avele ú humesele Xikwembu magandzelo lama amukelekeke ku tlula ya Kayini, kutani hikwalaho ka swona ú nkhensiwile a vuriwa loyi a lulameke.” Avele a a xi tiva xitshembiso xa Xikwembu lexi nga eka Genesa 3:15, kambe loko ku ringanisiwa ni leswi hina hi swi tivaka sweswi, a a tiva switsongo swinene. Kambe, Avele u endle hi vutivinyana lebyi a ri na byona. Kutani namuntlha, van’wana lava ha ku tsakelaka ntiyiso wa Xikwembu a va si va na byona vutivi lebyi engetelekeke, kambe va khongela ni ku tirhisa vutivi lebyi va nga na byona swinene, hi laha Avele a endleke ha kona. Ina, va hanya hi ripfumelo.
8. Ha yini hi nga tiyisekaka leswaku Abrahama u namarhele swinene eka Yehova, naswona i xivutiso xihi lexi hi faneleke ku tivutisa xona?
8 Nandza un’wana la tshembekaka wa Xikwembu a a ri Abrahama, “tatana [wa] hinkwavo lava pfumelaka.” (Varhoma 4:11) Namuntlha, ku tlula rini na rini, hi fanele ku va ni ripfumelo leri tiyeke, naswona hi fanele ku khongela hi ripfumelo, hi laha Abrahama a endleke ha kona. Genesa 12:8 yi vula leswaku u ake altari a akela “Yehova, a khongela v̌ito ra Yehova.” Abrahama a a ri tiva vito ra Xikwembu naswona a a ri tirhisa eku khongeleni. Nkarhi na nkarhi hi ku tshembeka a a phikelela eku khongeleni, a vitana “v̌ito ra Yehova, Šikwembu ša mikari le’yi nga heriki.” (Genesa 13:4; 21:33) Abrahama a a vitana Xikwembu hi ripfumelo, naswona u nkhensiwile hikwalaho ka rona. (Vaheveru 11:17-19) Xikhongelo xi pfune Abrahama ku tshama a titsakela swinene eku languteleni ka Mfumo. Xana ha xi landzela xikombiso xa Abrahama xa ku phikelela eku khongeleni?
9. (a) Ha yini swikhongelo swa Davhida swi pfuna swinene eka vanhu va Xikwembu namuntlha? (b) I yini lexi nga ha humelelaka loko tanihi Davhida ho khongelela ku namarhela swinene eka Yehova?
9 Davhida a ri la xiyekaka malunghana ni ku phikelela eku khongeleni, naswona tipisalema ta yena ti kombisa leswi swikhongelo swi faneleke ku swi katsa. Hi xikombiso, malandza ya Xikwembu ma nga khongelela swilo hi ndlela leyi faneleke, swo tanihi ku ponisiwa kumbe ku kutsuriwa (3:7, 8; 60:5), nkongomiso (25:4, 5), nsirhelelo (17:8), ndzivalelo wa swidyoho (25:7, 11, 18), ni mbilu leyi tengeke (51:10). Loko Davhida a titwa a hlunamile, u khongerile: “U ṭakisa moya wa nanḍa wa wena.” (86:4) Hi ku fanana hi nga ha khongelela ku tsaka ka mbilu, hi tiva leswaku Yehova u tsakela leswaku hi titsakela eku languteleni ka hina. Davhida u namarhele Yehova ivi a khongela: “Moya wa mina wu namarela wena e ku ku lanḍa, v̌oko ra šinene ra wena ri nḍi seketela.” (63:8) Xana hi ta namarhela Yehova, hi laha Davhida a endleke ha kona? Loko hi endla tano, na hina u ta hi seketela.
10. I mianakanyo yihi leyi hoxeke leyi mupisalema Asafa a veke na yona enkarhini wun’wana, kambe i yini leswi a swi xiyeke endzhaku?
10 Leswaku hi namarhela Yehova, hi fanele hi papalata ku navela lavo biha hikwalaho ka vutomi bya vona bya ku nga khathali ni bya ku hlongorisa swilo leswi vonakaka. Eka nkarhi wun’wana mupisalema Asafa u anakanye leswaku a a swi nga ri swa nkoka ku tirhela Yehova, hikuva lavo biha “v̌a ṭakile hi masiku.” Kambe u swi xiyile leswaku ku anakanya ka yena a ku hoxile ni leswaku lavo biha va le “tindleleni to retemuka.” Kambe u swi xiyile leswaku ku hava xo antswa ku tlula ku namarhela Yehova, naswona u tiphofule eka Xikwembu hi ndlela leyi: “Nḍi na wena hi masiku, u nḍi khomile hi v̌oko ra šinene; hikuv̌a, waŝiv̌o la’v̌a ṭhinelaka kule na wena v̌a ta fa. . . . Loko nḍi ri mina, ku ṭhinelela Šikwembu, i rifuwo ra mina. Nḍi v̌ekile v̌utšhav̌elo bya mina e ka Hosi Yehova, leŝaku nḍi ta amba mitiro ya wena hikwayo.” (Psalma 73:12, 13, 18, 23, 27, 28) Ematshan’wini yo navela vutomi bya ku nga khathali bya lavo biha, vanhu lava pfumalaka ntshembo, a hi tekeleleni Asafa, hi namarhela Yehova.
11. Ha yini Daniyele a ri xikombiso lexinene xa ku namarhela Yehova, naswona hi nga n’wi tekelela njhani?
11 Daniyele u phikelele hi ku tiyimisela eku khongeleni, hambi loko a langutane ni khombo ro va ekheleni ra tinghala hikwalaho ko honisa minsivelo ya mfumo ehenhleni ka xikhongelo. Kambe Yehova ‘u rhumile ntsumi ya yena yi pfala milomu ya tinghala,’ a ponisa Daniyele. (Daniel 6:7-10, 22, 27) Daniyele u katekisiwile swinene hi ku phikelela ka yena eku khongeleni. Xana na hina ha phikelela eku khongeleni, ngopfu-ngopfu loko hi langutane ni nkaneto wa ku chumayela ka hina hi Mfumo?
Yesu, Xikombiso Xa Hina
12. (a) Eku sunguleni ka vutirheli bya yena, i xikombiso xihi lexi Yesu a xi vekeke malunghana ni xikhongelo, naswona xi nga va pfuna njhani Vakriste? (b) Xana xikhongelo xa Yesu xa xikombiso xi paluxa yini hi xikhongelo?
12 Ku sukela eku sunguleni ka vutirheli bya yena bya le misaveni, Yesu a a khongela. Langutelo ra yena ra xikhongelo loko a ri karhi a khuvuriwa ri veka xikombiso lexinene eka lava khuvuriwaka eminkarhini ya namuntlha. (Luka 3:21, 22) Munhu a nga ha khongelela mpfuno wa Xikwembu leswaku a hetisisa leswi kombisiwaka hi nkhuvulo wa mati. Yesu nakambe u pfune van’wana ku tshinelela Yehova hi xikhongelo. Eka khamba rin’wana loko Yesu a ri endhawini yin’wana a ri karhi a khongela, un’wana wa vadyondzisiwa va yena endzhaku ka sweswo u te: “Hosi, hi dyondzise ku khongela.” Kutani Yesu a vula lexi hi ntolovelo xi tiviwaka tanihi xikhongelo xa xikombiso, laha eka xona nongonoko wa timhaka wu kombisaka leswaku vito ra Xikwembu ni xikongomelo xa xona swi fanele swi rhangisiwa. (Luka 11:1-4) Xisweswo, eswikhongelweni swa hina hi fanele hi hlayisa langutelo leri enteke ni ku ringanisela, hi nga rivali “[swilo] leswi nga swinene ku tlula swin’wana.” (Vafilipiya 1:9, 10) Kavula, ku na minkarhi yo hlawuleka kumbe lowu xiphiqo xo karhi xi lavaka ku vuriwa ha wona. Tanihi Yesu, Vakriste va nga ha ya eka Xikwembu hi xikhongelo va kombela matimba ya ku hetisisa swiavelo swo karhi kumbe ku langutana ni miringo kumbe makhombo yo karhi. (Matewu 26:36-44) Entiyisweni, swikhongelo swa munhu hi xiyexe swi nga ha katsa swiphemu swihi na swihi swa vutomi.
13. Xana Yesu u wu kombise njhani nkoka wa ku khongelela van’wana?
13 Hi xikombiso xa yena lexinene, Yesu u kombise nkoka wa ku khongelela van’wana. A a swi tiva leswaku vadyondzisiwa va yena a va ta vengiwa ni ku xanisiwa, ku fana na yena. (Yohane 15:18-20; 1 Petro 5:9) Hikwalaho, u kombele Xikwembu leswaku xi “va lwela eka lowo biha.” (Yohane 17:9, 11, 15, 20) Naswona hi ku tiva ndzingo lowukulu lowu a wu kongomane na Petro, u n’wi byerile a ku: “Ndzi ku khongelerile, leswaku ku pfumela ka wena ku nga tshuki ku titivala.” (Luka 22:32) Mawaku ndlela leyi swi pfunaka ha yona loko na hina hi hambeta hi khongelela vamakwerhu, hi nga anakanyi hi swiphiqo ni swilaveko swa hina ntsena kambe hi anakanya ni van’wana!—Vafilipiya 2:4; Vakolosa 1:9, 10.
14. Hi swi tivisa ku yini leswaku Yesu u namarhele swinene eka Yehova evutirhelini byakwe hinkwabyo bya le misaveni, naswona hi nga n’wi tekelela njhani?
14 Evutirhelini bya yena hinkwabyo, Yesu u phikelerile eku khongeleni, a namarhela swinene eka Yehova. (Vaheveru 5:7-10) Muapostola Petro, eka Mintirho 2:25-28, u tshahe Psalma 16:8 ivi a yi tirhisa eka Hosi Yesu Kriste: “Loko Davhida a vulavula hi yena, ú te: ‘Minkarhi hinkwayo, ndzi rhangisa [Yehova] emahlweni ka mina; ndzi nga ka ndzi nga tsekatseki, hikuva [u] le vokweni ra mina ra xinene.’” Hi nga endla hi laha ku fanaka. Hi nga khongela Xikwembu leswaku xi va kusuhi na hina, naswona hi nga kombisa ku tshembela ka hina eka Yehova hi ku hambeta hi anakanya ha yena. (Ringanisa Psalma 110:5; Esaya 41:10, 13.) Kutani hi ta papalata swiphiqo swa tinxaka hinkwato, hikuva Yehova u ta hi seketela, naswona a hi nge tsekatseki.
15. (a) I yini leswi hi nga fanelangiki hi tsandzeka ku hambeta hi swi khongelela? (b) I xitsundzuxo xihi lexi nyikeriwaka malunghana ni ku nkhensa ka hina?
15 Onge hi nga ka hi nga tsandzeki ku nkhensa Yehova hikwalaho ka vunene bya yena hinkwabyo eka hina, ina, “tintswalo leti tlurisaka leti nga hi fanelangiki ta Xikwembu,” leti katsaka nyiko ya N’wana wa yena tanihi gandzelo ra nkutsulo ra swidyoho swa hina. (2 Vakorinto 9:14, 15, NW; Marka 10:45; Yohane 3:16; Varhoma 8:32; 1 Yohane 4:9, 10) Hakunene, masiku hinkwawo, “nkhensani Xikwembu tatana” hikwalaho ka swilo hinkwaswo hi vito ra Yesu. (Vaefesa 5:19, 20; Vakolosa 4:2; 1 Vatesalonika 5:18) Hi fanele hi tivonela leswaku hi nga pfumeleli ku nkhensa ka hina leswi hi nga na swona, ku onhiwa, hi ku khomeka ngopfu hi swilo leswi hi nga riki na swona kumbe hi swiphiqo swa hina vini.
Ku Yisa Swiphiqo Swa Hina Eka Yehova
16. I yini lexi hi faneleke ku xi endla, loko swiphiqo swo karhi swi hi karhata?
16 Ku phikelela eku khongeleni ku kombisa vuenti bya ku tinyiketela ka hina. Loko hi ya eka Xikwembu, swi va ni vuyelo lebyinene eka hina hambi loko xi nga si hi hlamula. Loko ndzhwalo wo karhi wu hi karhata emianakanyweni, hi nga namarhela Yehova hi ku landzela xitsundzuxo lexi nge: “Nyiketa Yehova e timhaka ta wena, o ta ku seketela.” (Psalma 55:22) Hi ku yisa swiphiqo swa hina hinkwaswo eka Xikwembu—mivilelo, ku karhateka, ku hela matimba, ku chava, ni swin’wana—hi ku pfumela hi laha ku heleleke eka xona, hi kuma ku rhula ka mbilu, “ku rhula ka Xikwembu loku tlulaka ku twisisa hinkwako.”—Vafilipiya 4:4, 7; Psalma 68:19; Marka 11:24; 1 Petro 5:7.
17. Xana hi nga ku kumisa ku yini ku rhula ka Xikwembu?
17 Xana ku rhula loku ka Xikwembu ku ta hi ku hatlisa? Hambi loko ho ntshunxiwa xikan’we-kan’we, leswi Yesu a swi vuleke mayelana ni ku khongelela moya wo kwetsima swa tirha ni laha: “Kombelani, mi ta nyikiwa; lavani, mi ta swi kuma; gongondzani, mi ta pfuleriwa.” (Luka 11:9-13) Tanihi leswi moya lowo kwetsima wu nga ndlela leyi hi susaka mivilelo ha yona, hi fanele ku phikelela hi kombela ku rhula ni mpfuno wa Xikwembu malunghana ni swiphiqo swa hina. Hi nga tiyiseka leswaku hi ku phikelela eku khongeleni, hi ta kuma ntshunxeko ni ku rhula ka mbilu loku hi ku lavaka.
18. Xana Yehova u hi endlela yini loko hi nga swi tivi leswi kahle-kahle hi nga swi khongelelaka eka xiyimo xo karhi?
18 Kambe ku vuriwa yini hi loko hi nga swi tivi leswi kahle-kahle hi nga swi khongelelaka? Ku konya ka hina ka le ndzeni hakanyingi ku sala ku nga boxiwanga hikwalaho ka leswi hi nga xi twisisiki hi ku helela xiyimo xa hina, kumbe hi nga swi tivi leswi hi nga swi vulaka eka Yehova. Moya lowo kwetsima wu nga hi vulavulela eminkarhini yo tano. Pawulo u tsarile a ku: “Hikuva a hi tivi ndlela leyi hi fanelaka ku khongela ha yona, kambe Moya, wona ha woxe, wu khongela Xikwembu ematshan’wini ya hina, loko hina hi konya kunene hi nga humesi marito.” (Varhoma 8:26) Njhani? Eka Rito ra Xikwembu ku na vuprofeta ni swikhongelo leswi huhuteriweke leswi hlamuselaka xiyimo xa hina. Xi swi pfumelela swi hi vulavulela, hi ndlela yo fanekisela. Xi swi amukela tanihi leswi a a hi ta swi khongelela, loko ntsena a a hi tiva ku hlawuleka ka swona emhakeni ya hina, naswona xi swi hetisisa hi laha ku kongomeke.
Xikhongelo Ni Ku Langutela Swi Ta Hambeta
19. Ha yini xikhongelo ni ku langutela swi ta hambeta hi laha ku nga heriki?
19 Ku khongela eka Tata wa hina wa le matilweni ku ta hambeta hi laha ku nga heriki, ngopfu-ngopfu malunghana na ku nkhensa misava leyintshwa ni mikateko ya yona hinkwayo. (Esaya 65:24; Nhlavutelo 21:5) Naswona hi ta hambeta hi titsakela eku languteleni, hikuva hi ndlela yo karhi, ku langutela ku ta tshama hi laha ku nga heriki. (Ringanisa 1 Vakorinto 13:13.) Leswaku hi swihi swilo leswintshwa leswi Yehova a nga ta swi tisa loko a nga ha ri kona ehansi ka siku ra ku wisa ra Savata leri a a tivekeleke rona ehenhla ka misava, a ha ha anakanyi ha swona. (Genesa 2:2, 3) Hi laha ku nga heriki, u ta va a khomele vanhu vakwe swilo swo hlamarisa swa rirhandzu, naswona vumundzuku byi va khomele swilo leswinene mayelana ni ku endla ku rhandza ka yena.
20. Xana ku tiyimisela ka hina ku fanele ku va kwihi, naswona ha yini?
20 Leswi hi nga na ku langutela ko tano loku tsakisaka emahlweni ka hina, onge hinkwerhu hi nga namarhela Yehova hi ku phikelela eku khongeleni. Onge hi nga ka hi nga tshiki ku nkhensa Tata wa hina wa le tilweni hikwalaho ka mikateko ya hina hinkwayo. Eku heteleleni ku langutela ka hina ku ta hetisisiwa hi ndlela leyi tsakisaka, ku tlula hi laha hi nga ha vaka hi anakanye ha kona kumbe ku langutela ha kona, hikuva Yehova a nga endla “ku tlula ngopfu swinene hinkwaswo leswi hi nga swi kombelaka.” (Vaefesa 3:20) Hikwalaho ke, malunghana ni leswi, a hi nyikeleni ku dzunisa ni ku kwetsima ni ku nkhensa hinkwako eka Yehova Xikwembu xa hina, “L’a yingisaka mikhongelo”!
[Nhlamuselo ya le hansi]
a Hi ku ya hi Webster’s New Dictionary of Synonyms, “Ku Tiyisela hakanyingi ku kombisa mfanelo leyi xiyekaka; ku ringanyeta ku ala ku hetiwa matimba hi ku tsandzeka, ku kanakana kumbe swiphiqo, naswona i ku namarhela xikongomelo kumbe xiendlo xo karhi handle ko tsekatseka.”
A Wu Ta Hlamula Njhani?
◻ Ha yini hi fanele hi phikelela eku khongeleni?
◻ Hi dyondza yini eka swikombiso swa swikhongelo swa Vakriste vo sungula?
◻ Xana xikombiso xa Yesu xi hi dyondzisa yini malunghana ni xikhongelo?
◻ Xana hi nga swi yisa njhani swiphiqo swa hina eka Yehova naswona vuyelo byi ta va byihi?
[Xifaniso lexi nga eka tluka 17]
Daniyele u phikelerile eku khongeleni ku nga khathariseki nxungeto wa ku hoxiwa ekheleni ra tinghala