Chava Yehova, U Dzunisa Vito Ra Yena Ro Kwetsima

“I mani loyi a nga ta ka a nga ku chavi wena, Yehova ni ku dzunisa vito ra wena, hikuva hi wena ntsena la tshembekeke?”—NHLAVUTELO 15:4, NW.

1, 2. (a) Yehova u ma pfurise ku yini mafasitere ya le tilweni hi 1991? (b) I ntokoto wihi wa vutomi lowu susumeteleke murhumiwa la tshembekaka ku nyikela xitsundzuxo lexi nge: “Chava Yehova”? (Nakambe vona 1991 Yearbook, matluka 187-9.)

YEHOVA ‘u pfule mafasitere ya le tilweni kutani a chululela mikateko kukondza ku nga ha vi na xilaveko.’ Marito wolawo ma nga tirhisiwa hi ku phindha-phindha eka Timbhoni ta Yehova eminkarhini ya sweswinyana. (Malakia 3:10) Hi xikombiso, hi nkarhi wa lembe ra ntirho ra 1991, ku chivirika ka Timbhoni leti endzeke ni vatsombani va kwalaho ku kombisiwile hi ku hlangana ka Vakriste emintsombanweni yo hlawuleka leyi khomiweke emisaveni hinkwayo—ku sukela eka Mintsombano ya “Ririmi Leri Tengeke” le Buenos Aires le Amerika Dzonga; na le Manila, Taipei ni le Bangkok eVuxeni; ku ya eka Mintsombano ya “Varhandzi Va Ntshunxeko” le Budapest, Prague ni le Zagreb (August 16-18, 1991) le Yuropa Vuxa.

² Mawaku ntsako lowu veke kona eka vatsombani lava humaka entsungeni loko va hlangana ni Timbhoni leti tshembekeke ta nkarhi wo leha etindhawini teto! Hi xikombiso, le Bangkok, Frank Dewar—loyi nkarhi wun’wana a ri yena ntsena muhuweleri wa Mfumo eThailand—u vulavule hi ntirho wa yena wa vurhumiwa wa malembe ya 58. Mintirho ya yena yi longoloke yi huma eswihlaleni swa Pacific ku ya eDzongeni wa Asia, hambi ku ri eChina. A a langutane ni makhombo ya ku tshovekeriwa hi xikepe, swivandzana emakhwatini, vuvabyi bya tindhawu leti hisaka ni vulawuri bya tihanyi bya masocha ya Majapani. Loko a vutisiwa leswaku i xitsundzuxo xihi lexi a nga ta xi nyika vatsombani, nhlamulo ya yena a yi ri leyo olova: “Chava Yehova!”

3. Ha yini hi fanele hi kombisa ku chava Xikwembu?

³ “Chava Yehova!” Vona ndlela leyi swi nga swa nkoka ha yona leswaku hina hinkwerhu hi hlakulela ku chava koloko lokunene swonghasi! “Ku tšhav̌a Yehova i ku sungula ka v̌utlhari.” (Psalma 111:10) Ku chava loku a hi kona ku chava Yehova hi ndlela yo biha. Ematshan’wini ya sweswo, i ku xixima vukulukumba bya yena lebyi chavekaka ni timfanelo ta vukwembu hi laha ku enteke, hikwalaho ka vutlhari lebyi hi byi kumaka hi ku dyondza Rito ra Xikwembu. Eka Nhlavuteko 15:3, 4, risimu ra Muxe ni ra Xinyimpfana ri ri: “[Yehova], Xikwembu xa matimba hinkwawo, a hi ku kula ni ku hlamarisa ka mintirho ya wena; we Mufumi wa matiko hinkwawo, a hi ku lulama ni ku tshembeka ka tindlela ta wena! I mani la nga ta ka a nga ku chavi, we [Yehova], i mani la nga ta ala ku twarisa vito ra wena ke? Hi wena ntsena loyi a kwetsimeke.” Hi ku tshembeka eka vagandzeri vakwe, Yehova u na “buku ya šiṭunḍušo . . . yi ṭaleriwa la’v̌a tšhav̌aka Yehova ni la’v̌a ṭunḍukaka vito ra yena.” Va hakeriwa hi vutomi lebyi nga heriki.—Malakia 3:16; Nhlavutelo 20:12, 15.

Ku Chava Xikwembu Ka Hlula

4. I ku kutsuriwa kwihi ka khale loku faneleke ku hi khutaza leswaku hi chava Yehova?

⁴ Loko Israyele a hume aEgipta ya Faro, Muxe u swi kombise kahle leswaku a a chava Yehova ntsena. Hi ku hatlisa, Vaisrayele a a va ri exikarhi ka Lwandle ro Tshwuka ni tigolonyi letikulu ta nyimpi ta Vaegipta. A va ta endla yini? “Kutani Moše a ku ka tiko: Mi nga tšhav̌i; yimani mi ta v̌ona hi laha Yehova a nga ta mi lamulela ha kona namuntlha; hikuv̌a va-Egipta lav̌a mi v̌a v̌onaka ŝeŝi, a mi nga ha tlheli mi v̌a v̌ona kambe. Yehova o ta mi lwela, kambe ṅwina mi ta timiyelela ntsena.” Hi hlori, Yehova u hambanise mati. Vaisrayele va tsemakanya hi le lwandle leri omeke. Kutani mati ma tlhelela endzhaku hi matimba. Vuthu ra Faro ri lovisiwa. Yehova u ponise tiko rero leri chavaka Xikwembu, loko hi nkarhi lowu fanaka a avanyisa Egipta leri nga chaviki Xikwembu. Hi laha ku fanaka namuntlha, u ta kombisa ku tshembeka ka yena hi ku kutsula Timbhoni ta yena leti chavaka Xikwembu emisaveni ya Sathana.—Eksoda 14:13, 14; Varhoma 15:4.

5, 6. I swiendlakalo swihi swa le nkarhini wa Yoxuwa leswi kombisaka leswaku hi fanele hi chava Yehova ku tlula vanhu?

⁵ Endzhaku ko Huma aEgipta, Muxe u rhume vakamberi va 12 eTikweni leri Tshembisiweke. Lava khume va chavisiwile hi ku vona vaaka-tiko lava fanaka ni swihontlovila ivi va ringeta ku sivela Israyele ku nghena etikweni rero. Kambe lavan’wana vambirhi, Yoxuwa na Kalebe, va vikile: “E tiko leri . . . ri sasekile ngopfu-ngopfu. Loko Yehova a tiṭakele ha hina, o ta hi nghenisa e tikweni leri, o ta hi nyika rona, ri nga tiko le’ri pfelelaka hi nṭwamba ni v̌ulombe. Ntsena mi nga ṭhuki mi pfukela Yehova; loko mi ri ṅwina mi nga ṭšhaveni v̌anhu v̌a tiko leri, hikuv̌a ŝi ta v̌a ŝakudya ŝa hina; e nḍuti wa v̌ona wu sukile henhla ka v̌ona, kasi Yehova o na hina; mi nga ṭhuki mi v̌a tšhav̌a.”—Tinhlayo 14:7-9.

⁶ Hambi swi ri tano, Vaisrayele volavo va voyamele eku chaveni ka vanhu. Hikwalaho, a va ri kumanga tiko ra xitshembiso. Kambe Yoxuwa na Kalebe, swin’we ni rixaka lerintshwa ra Vaisrayele, va nyikiwe lunghelo ro nghena etikweni rero leri hlawuriweke ni ku hlakulela mirhi ya rona ya vhinyo ni ya mitlhwari. Emaritweni ya yena yo lela eka vanhu lava hlengeletaneke va Israyele, Yoxuwa u nyikele xitsundzuxo lexi: “Tšhav̌ani Yehova, mi ṅwi tirela hi ku hetiseka ni ntiyiso.” Naswona Yoxuwa u engetile: “Mina ni yindlu ya mina, hi ta tirela Yehova.” (Yoxuwa 24:14, 15) Mawaku marito lama khutazaka swonghasi eka tinhloko ta mindyangu ni van’wana hinkwavo ku chava Yehova tanihi leswi hi lunghiselelaka ku nghena emisaveni leyintshwa ya Xikwembu yo lulama!

7. Davhida u wu kandziyise njhani nkoka wa ku chava Xikwembu?

⁷ Davhida, jaha ra murisi na yena u kombise xikombiso xa ku chava Yehova loko a tlhontlhe Goliyadi hi vito ra Xikwembu. (1 Samuel 17:45, 47) Eku feni ka yena, Davhida u swi kotile ku vula a ku: “Moya wa Yehova wu v̌ulav̌ula ha mina, rito ra wona ri le ririmini ra mina. Šikwembu ša Israel ši v̌urisile, ribye ra šitšhav̌elo ša Israel ri te ka mina: Uṅwana l’a lulameke o ta fuma vanhu, mufumi l’a tšhav̌aka Šikwembu, l’a fanaka ni v̌uronga loko dyambu ri huma, ni nhlekanhi, loko mapapa ma nga ri kona.” (2 Samuel 23:2-4) Ku chava loku ka Xikwembu a ku kona exikarhi ka valawuri va misava leyi, naswona vona ndlela leyi vuyelo byi chavisaka ha yona! Swi ta va swi hambanile swinene loko Yesu, ‘N’wana wa Davhida,’ a fuma misava hi ku chava Yehova!—Matewu 21:9.

Ku Endla Hi Ku Chava Yehova

8. Ha yini Yuda a humelerile ehansi ka Yoxafati, swi kombisa yini namuntlha?

⁸ Kwalomu ka malembe ya dzana endzhaku ka ku fa ka Davhida, Yoxafati u ve hosi eYuda. Leyi na yona a yi ri hosi leyi tirheke hi ku chava Yehova. U kondletele nhleleko wa le tilweni eYuda, a veka vaavanyisi etikweni hinkwaro ni ku va nyika swiletelo leswi: “A mi av̌anyisi mi rumiwa hi v̌anhu, kambe mi rumiwa i Yehova; kutani o na ṅwina loko mi ri kari mi av̌anyisa. Seŝi, šitšhav̌o ša Yehova a ši v̌e henhla ka ṅwina; tiv̌oneleni hi laha mi nga ta endla ha kona, hikuv̌a e ka Yehova, Šikwembu ša hina, a ku na v̌umbabva, hambi ku ri ku ya hi nghohe ya v̌anhu, ni ku amukela tinyiko. . . . Mi ta endlisa ŝeŝo hi ku tšhava Yehova, mi va ni ku ṭhembeka, ni timbilu le’to basa.” (2 Tikronika 19:6-9) Xisweswo, Yuda ri ye emahlweni ni ku chava Yehova, tanihi leswi vanhu va Xikwembu va pfunekaka hi ntirho wa valanguteri lava nga ni ntwela-vusiwana namuntlha.

9, 10. Yoxafati u hlurise ku yini hi ku chava Yehova?

⁹ Hambi swi ri tano, Yuda a ri ri ni valala. Lava a a va kunguhate ku herisa tiko ra Xikwembu. Mavuthu ya nyimpi lama hlanganeke ya Vaamoni, Vamowabu, ni ya Ntshava ya Sehiri ma khitikanele emutini wa Yuda ivi ma xungeta Yerusalema. A ku ri vuthu ra matimba. Yoxafati u hundzukele eka Yehova hi xikhongelo “v̌a-Yuda [va ri karhi] v̌a yimile mahlweni ka Yehova, hambi v̌a ri v̌ana v̌a v̌ona la’v̌aṭongo, ni v̌asati v̌a v̌ona, ni v̌ana v̌a v̌ona v̌a šinuna.” Kutani, loko a hlamula xikhongelo xexo, moya wa Yehova wu te ehenhla ka Yakaziyele wa Mulevhi, loyi a nga te: “Yehova o mi byela ŝeŝo, a ku: Mi nga ṭhuki mi tšhav̌a, mi nga heli timbilu e mahlweni ka v̌unyingi le’byikulu lebyi, hikuv̌a nyimpi a hi ya ṅwina, kambe i ya Šikwembu. Munḍuku, ngirimelani ka v̌ona; . . . A hi ṅwina lav̌a mi nga ta lwa e mhakeni leyi; humani, mi v̌a kona, kutani mi ta v̌ona ku pona ka Yehova, l’a nga na ṅwina. Ṅwina, v̌a-Yuda ni va-Yerusalem, mi nga tšhav̌eni, mi nga heli timbilu! Munḍuku, humani, mi ya hlangana na v̌ona, Yehova o ta v̌a na ṅwina.”—2 Tikronika 20:5-17.

¹⁰ Mundzuku wa kona, vavanuna va Yuda va pfuka ka ha ri mixo. Loko hi ku titsongahata va huma ku ya hlangana ni valala, Yoxafati u yimile a ku: “Nḍi yingiseni, ṅwina v̌a-Yuda, na ṅwina v̌aaki v̌a Yerusalem! Thembani Yehova, Šikwembu ša ṅwina, mi ta tiyisiwa; ṭhembani v̌aprofeta v̌a yena, mi ta humeleriwa hi ku kateka.” Loko va macha emahlweni ka vavanuna lava hlomeke, vayimbeleri va Yehova va yimbelele risimu va ku: “Ḍunisani Yehova, hikuv̌a tintŝalo ta yena hi le’ti nga heriki!” Yehova u kombise tintswalo teto ra rirhandzu hi ku pfilunganya mavuthu ya valala volavo lerova va dlayana hi voxe. Loko va Yuda va fika exihondzweni emananga, a ku lo sala mintsumbu ya valala lava feke ntsena.—2 Tikronika 20:20-24.

11. Malunghana ni ku chava, matiko ma hambana njhani ni vanhu va Xikwembu?

¹¹ Loko matiko ya le kusuhi ma twa hi ku kutsuriwa loku loku hlamarisaka, “ku tšhav̌a ka Šikwembu” ku va ehenhla ka wona. Hi tlhelo rin’wana, tiko leri yingiseleke hi ku chava Yehova, sweswi a a ri ri na ku “wisa e matlhelweni hikwawo.” (2 Tikronika 20:29, 30) Hi ku fanana, loko Yehova a avanyisa eArmagedoni, matiko ma ta xi chava Xikwembu ni N’wana wa xona wa Muavanyisi, Yesu Kriste, naswona a va nge swi koti ku yima hi siku lerikulu ra vukarhi bya Xikwembu.—Nhlavutelo 6:15-17.

12. Xana ku chava Yehova ku ve ni hakelo yihi eminkarhini ya khale?

¹² Ku chava Yehova loku tengeke ku tisa mimbuyelo leyi fuweke. Nowa u “[kombise ku chava Xikwembu], kutani a aka ngalava ku ta ponisa va ndyangu wa yena.” (Vaheveru 11:7) Naswona malunghana ni Vakriste va lembe xidzana ro sungula, ku tsariwe leswaku endzhaku ka nxaniso, bandlha “a [ri] ri ni ku rhula . . . [ri] ri karhi ri akisiwa ni ku hanya exichabyeni xa [Yehova]; kutani a [ri] andza [ri] tiyisiwa hi Moya lowo Kwetsima”—hi laha swi nga ha kona eYuropa Vuxa namuntlha.—Mintirho 9:31.

Rhandza Leswinene, U Venga Leswo Biha

13. I ndlela yihi ntsena leyi hi nga kumaka mikateko ya Yehova ha yona?

¹³ Yehova u ni vunene hi ku helela. Hikwalaho, “ku tšhava Šikwembu i ku v̌enga ŝo biha.” (Swivuriso 8:13) Mayelana na Yesu ku tsariwile: “U rhandzile ku lulama, u vengile ku homboloka. Hikokwalaho Xikwembu, Xikwembu xa wena, xi ku cherile mafurha ya ntsako lowukulu.” (Vaheveru 1:9) Tanihi Yesu, loko hi navela mikateko ya Yehova, hi fanele hi venga vubihi, ku tikhoma loko biha, vukari ni makwanga ya misava ya Sathana leyi tinyungubyisaka. (Ringanisa Swivuriso 6:16-19.) Hi fanele hi rhandza leswi Yehova a swi rhandzaka ni ku venga leswi a swi vengaka. Hi fanele hi chava ku endla hambi ku ri yini lexi nga ta ka xi nga n’wi tsakisi Yehova. “Hi ku tšhav̌a Yehova, v̌anhu v̌a fularela ŝo biha.”—Swivuriso 16:6.

14. Yesu u hi nyika xikombiso hi ndlela yihi?

¹⁴ Yesu u hi siyele xikombiso leswaku hi fanele hi landzela minkondzo ya yena swinene. “Loko a rhuketeriwa, a nga tlheriselanga hi ku rhuketela; loko va n’wi twisa ku vava, a nga vulanga leswaku ú ta tirihisela, kambe ú swi tshikile emavokweni ya loyi a avanyisaka hi ku lulama.” (1 Petro 2:21-23) Hi ku chava Yehova, na hina hi nga tiyisela ku sandziwa, ku hlekuriwa, ku xanisiwa leswi misava ya Sathana yi hi endlaka swona.

15. Ha yini hi fanele hi chava Yehova ku tlula lava va nga dlayaka miri?

¹⁵ Eka Matewu 10:28, Yesu wa hi khutaza: “Mi nga tshuki mi chava lava dlayaka miri, va ri hava matimba yo dlaya moya; kambe chavani loyi a nga ni matimba yo lovisa moya ni miri wa munhu [eGehena, NW].” Hambi loko munhu loyi a chavaka Yehova a dlayiwa hi nala, switlhavi swa rifu i swa nkarhinyana. (Hosea 13:14) Loko a pfuxiwa, munhu yoloye u ta swi kota ku vula a ku: “Wena rifu, ku hlula ka wena ku kwihi ke? Wena rifu, ndzhombo wa wena wu kwihi ke?”—1 Vakorinto 15:55.

16. Yesu u ku kombise njhani ku chava Yehova ni ku n’wi dzunisa?

¹⁶ Yesu hi yexe u nyikela xikombiso lexinene eka hinkwavo lava rhandzaka vululami bya Yehova ni ku venga leswo biha. Ku chava ka yena Yehova ku kombisiwa hi marito ya yena yo hetelela eka vadyondzisiwa vakwe, hi laha ma kumekaka ha kona eka Yohane 16:33: “Ndzi mi byerile swilo leswi leswaku mi va ni ku rhula eka mina. La misaveni, mi ta va ni mahlomulo, kambe tiyani timbilu, ndzi hlurile misava.” Mhaka ya Yohane yi ya emahlweni: “Yesu ú vurile timhaka leti. Kutani a tlakusa mahlo, a languta etilweni, a ku: ‘Tatana, nkarhi wu fikile; dzunisa N’wana wa wena, leswaku N’wana a ku dzunisa. . . . Ndzi ku tivisile eka vanhu lava u ndzi nyikeke vona va ri lava hlawuriweke emisaveni.’”—Yohane 17:1-6.

Chava Yehova Naswona U N’wi Dzunisa

17. Xikombiso xa Yesu hi nga xi tekelela hi tindlela tihi?

¹⁷ Xana hina namuntlha hi nga xi tekelela xikombiso xa Yesu xa xivindzi? Hakunene hi nga swi kota hi ku chava Yehova! Yesu u hi tivise vito ni timfanelo leti xiyekaka ta Yehova. Ku chava Yehova tanihi Hosi ya hina Leyikulu, hi n’wi dzunisa swinene ku tlula swikwembu swin’wana hinkwaswo, ku katsa ni Vunharhu-un’we bya Vujagana lebyi nga hava vito, bya xihundla. Yesu u tirhele Yehova hi xichavo lexi heleleke, a ala ku phasiwa hi ntlhamu wa ku chava munhu la faka. “Emasikwini ya yena ya ku hanya la misaveni, Yesu ú khongerile ni ku kombela hi ku titsongahata, a huwelela hi matimba ni ku rila hi mihloti, eka Xikwembu lexi a xi ri ni matimba ya ku n’wi ponisa eku feni, kutani ú yingisiwile hikwalaho ka xichavo xa yena.” Tanihi Yesu, onge na hina hi nga chava Yehova loko hi ri karhi hi hambeta hi dyondza ku yingisa hi swilo leswi hi swi tokotaka—nkarhi hinkwawo hi endla ku ponisiwa loku nga heriki ku va pakani ya hina.—Vaheveru 5:7-9.

18. Hi nga wu endlisa ku yini ntirho wo kwetsima wa Xikwembu hi xichavo?

¹⁸ Eku heleni ka papila rero leri yaka eka Vakriste va Vaheveru, Pawulo u khutaza Vakriste lava totiweke: “Hikokwalaho, a hi nkhenseni, leswi hi kumeke mfumo lowu nga tsekatsekiki, kutani hi mukhuva lowu, a hi gandzeleni Xikwembu hi ndlela leyi amukelekaka, hi ku titsongahata ni xichavo.” Namuntlha, “ntshungu lowukulu” wa hlanganyela entirhweni wolowo wo kwetsima. Naswona xana wona wu malunghana na yini? Endzhaku ko hlamusela musa lowu nga fanelangiki wa Yehova hi ku nyikela gandzelo ra N’wana wakwe, Yesu Kriste, Pawulo u ri: “A hi humeseni magandzelo masiku hinkwawo ha yena Yesu, hi dzunisa Xikwembu ha wona, hi ri karhi hi vonga vito ra xona hi marito lama humaka emilon’weni ya hina.” (Vaheveru 12:28; 13:12, 15) Hi ku tlangela musa lowu nga fanelangiki wa Yehova, hi fanele hi lava ku nyikela nkarhi wihi na wihi lowu kotekaka entirhweni wa yena wo kwetsima. Tanihi vanghana vo tshembeka va Vakriste lava totiweke, lava ha saleke, ntshungu lowukulu namuntlha wu hetisisa xiphemu lexikulu swinene xa ntirho wolowo. Vona va langute eka Xikwembu na Kriste leswaku va kuma ku pona, tanihi leswi va yimaka emahlweni ka xiluvelo xa Xikwembu hi ndlela yo fanekisela, “va xi tirhela [ntirho wo kwetsima, NW] vusiku ni nhlekanhi.”—Nhlavutelo 7:9, 10, 15.

Dzunisa Yehova Hi Laha Ku Nga Heriki

19, 20. I tinxaka tihi timbirhi ta ku chava leti nga ta vonaka hi “siku ra Yehova”?

¹⁹ Siku leri vangamaka ra ku lwa ka Yehova ri tshinela hi ku hatlisa! “V̌onani, siku ra ta, le’ri hisaka eku fana ni nḍilo wa šitiko, kutani v̌atikukumuši hikwav̌o ni hikwav̌o la’v̌a endlaka ŝo biha v̌a ta kotisa byanyi bya ku oma; siku le’ri taka ri ta v̌a hisa, ku v̌ula Yehova wa mav̌andla.” Nkarhi wolowo wa khombo i “siku ra Yehova . . . le’rikulu, le’ri tšhav̌isaka.” (Malakia 4:1, 5) Ri ta nghenisa ‘ku chava’ etimbilwini ta lavo biha, naswona lava “va nga ka va nga poni.”—Yeremia 8:15; 1 Vatesalonika 5:3.

²⁰ Hambi swi ri tano, vanhu va Yehova va ngheniwa hi ku chava kun’wana. Ntsumi leyi byarhisiweke “Evhangeli leyi nga heriki” yi va byerile hi rito lerikulu, yi ku: “Chavani Xikwembu, mi xi dzunisa, hikuva nkarhi wa xona wa ku avanyisa wu fikile.” (Nhlavutelo 14:6, 7) Hi ta hlamarisiwa hi ku avanyisa koloko, loko ku hisa loku vavulaka ka Har–Magedon ku hisa misava ya Sathana. Xichavo lexi tengeke ha Yehova xi ta nghena xi dzika etimbilwini ta hina. Kutani onge hi nga pfuneka leswaku hi tikuma hi ri exikarhi ka ‘lava ponisiweke lava vitaneke vito ra Yehova’!—Yoel 2:31, 32; Varhoma 10:13.

21. Ku chava Yehova ku ta yisa eka mikateko yihi?

²¹ Ku ta landzela mikateko, ku katsa ni “malembe ya ku hanya” lama nga heriki! (Swivuriso 9:11; Psalma 37:9-11, 29) Hikwalaho, hambi loko ntshembo wa hina wu ri ku dya ndzhaka ya Mfumo kumbe ku tirha exivandleni xa wona emisaveni, a hi hambeteni hi endlela Xikwembu ntirho wo kwetsima hi xichavo ni ku xixima. A hi hambeteni hi dzunisa vito ra xona ro kwetsima. Naswona hi wihi nkateko lowu nga ta va kona? I ku nkhensiwa hi laha ku nga heriki hi leswi hi amukeleke xitsundzuxo xa vutlhari xo chava Yehova nkarhi hinkwawo!

A Wu Ta Hlamula Njhani?

◻ “Ku chava Yehova” swi vula yini?

◻ Ku chava Xikwembu ku va pfunise ku yini vanhu va xona va khale?

◻ I xikombiso xihi xa ku chava Xikwembu lexi Yesu a hi siyeleke xona?

◻ Hi nga byi hlayisa njhani vutshembeki hi ku chava Yehova?

[Xifaniso lexi nga eka tluka 18]

Ebukwini ya Nhlavutelo, vamakwavo wa Yesu va voniwa va yimbelela “risimu ra Muxe,” risimu leri dzunisaka Yehova

[Xifaniso lexi nga eka tluka 20]

Vuthu ra Yoxafati ra hlula hi ku chava Yehova

[Xifaniso lexi nga eka tluka 23]

Malembe ya ku hanya lama nga heriki ma ta va hakelo ya lava chavaka Yehova