Ntsako Lowu Nga Heriki Wu Rindzele Vanyiki Lava Chavaka Xikwembu

“Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.”—YOHANE 3:16.

1, 2. (a) I mani Munyiki lonkulu, naswona hi yihi nyiko ya yena leyikulu evanhwini? (b) Hi ku nyika nyiko ya xona leyikulu, hi yihi mfanelo leyi Xikwembu xi yi kombiseke?

YEHOVA XIKWEMBU i Munyiki lonkulu eka hinkwavo. Malunghana na yena, Mutumbuluxi wa matilo ni misava, Yakobo mudyondzisi wa Mukriste u tsarile a ku: “Nyiko yin’wana ni yin’wana leyo saseka ni minkateko hinkwayo leyi hetisekeke, swi ta hi le henhla, swi xika hi le ka Muvumbi wa leswi voningaka, loyi ku nga hava ku hundzuka-hundzuka eka yena, kumbe ku fularhela munhu a sala exinyamini.” (Yakobo 1:17) Nakambe Yehova i Munyiki wa nyiko leyikulu eka hinkwato leti nga nyikiwaka. Mayelana ni nyiko ya yena leyikulu eka vanhu ni hikwalaho ka yona, ku vuriwile leswaku: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena a nga lovi, kambe a va ni vutomi lebyi nga heriki.”—Yohane 3:16.

² Muvuri wa marito wolawo a ku nga ri un’wana handle ka N’wana la nga un’we wa Xikwembu hi xoxe. N’wana la nga un’we wa tatana hi ntolovelo u ta tlangela naswona a rhandza tatana wo tano tanihi xihlovo xa yena xa vutomi ni xa swilo hinkwaswo leswi a nyikiweke swona leswaku a tiphina hi vutomi. Kambe rirhandzu ra Xikwembu a ri nyikiwanga N’wana loyi a ri yexe. Ku hundzisela nyiko yo tano eka swivumbiwa swin’wana swa xona a swi ta kombisa rirhandzu ra Xikwembu hi ndlela leyi hlamarisaka. (Ringanisa Varhoma 5:8-10.) Leswi swi va erivaleni swinene loko hi kambisisa leswi rito “nyika” ri vulaka swona eka ndzimana leyi.

Nyiko Ya Xikwembu Ya “N’wana Wa [Xona] Loyi A Rhandzekaka”

3. Handle ka “n’wana wa yena la rhandzekaka,” i vamani van’wana lava tiphineke hi rirhandzu ra Tatana wa le tilweni?

³ Hi nkarhi lowu nga boxiwangiki, Xikwembu xi tiphinile hi vunghana lebyikulu ni N’wana loyi, la nga un’we—“N’wana wa [xona] loyi a rhandzekaka”—exivandleni xa le matilweni. (Vakolosa 1:13) Enkarhini wolowo hinkwawo, Tatana ni N’wana va kurise ku rhandzana ni ku twelana swinene lerova a ku vanga na rirhandzu lerikulu ro fana ni ra vona. Swivumbiwa swin’wana leswi Xikwembu xi swi vumbeke hi ku tirhisa N’wana wa xona la nga un’we na swona a a swi rhandziwa tanihi swirho swa ndyangu wa Yehova Xikwembu. Xisweswo, rirhandzu ri fume ndyangu hinkwawo wa Xikwembu. Swi vuriwe kahle eka Matsalwa yo kwetsima leswaku “Xikwembu i rirhandzu.” (1 Yohane 4:8) Hikwalaho, ndyangu wa Xikwembu a wu ta vumbiwa hi lava rhandziwaka hi Tatana, Yehova Xikwembu.

4. Xana ku nyikela ka Xikwembu N’wana wa xona ku katse swo tlula ku lahleriwa hi xinghana xa munhu hi xiyexe hi ndlela yihi, naswona hikwalaho ka vamani?

⁴ Vuxaka bya le xikarhi ka Yehova ni N’wana wa yena wa mativula a a byi ri byikulu swinene lerova ku lahlekeriwa hi vunghana byo tano lebyikulu a ku ta va ku lahlekeriwa lokukulu. (Vakolosa 1:15) Kambe ku ‘nyikela’ N’wana loyi a nga un’we swi vule swo tala ku tlula ku lahlekeriwa ka Xikwembu hi xinghana xa munhu hi xiyexe ni “N’wana wa yena la rhandzekaka.” Swi fike eka xiyimo lexi Yehova a nga pfumelela N’wana wa yena leswaku a fa xisweswo a nga vi kona nkarhinyana tanihi xirho xa ndyangu wa Xikwembu wa vuako hinkwabyo. Rifu leri a a ri ri malunghana ni lava a va nga si tshama va va swirho swa ndyangu wa Xikwembu. Yehova a a nga ta endla nyiko yin’wana leyikulu hikwalaho ka vanhu lava pfumalaka handle ka N’wana wa yena la nga un’we, loyi Matsalwa ma n’wi vulaka “masungulo ya leswi tumbuluxiweke hi Xikwembu.”—Nhlavutelo 3:14.

5. (a) Xiyimo xa vatukulu va Adamu a xi ri xihi, naswona vululami bya Xikwembu byi lave yini eka un’wana wa vana va xona vo tshembeka? (b) Xana nyiko leyikulu ya Xikwembu a yi ta lava yini eka xona?

⁵ Mpatswa wo sungula wa vanhu, Adamu na Evha, wu tsandzekile ku hlayisa xiphemu xa wona tanihi swirho swa ndyangu wa Xikwembu. Xexo i xiyimo lexi va tikumeke va ri eka xona endzhaku ka loko va hlongoriwile entangeni wa Edeni hikwalaho ko dyohela Xikwembu. A va nga ha ri swirho swa ndyangu wa Xikwembu ntsena, nakambe a va ri ehansi ka xigwevo xa rifu. Hikokwalaho, xiphiqo a ku nga ri ku kondletela vana va vona leswaku va tsakeriwa hi Xikwembu tanihi swirho swa ndyangu wa xona kambe a a ku ri xo herisa xigwevo xa Xikwembu xa rifu eka vona. Hi ku ya hi ku tirhisa vululami bya Xikwembu, leswi a swi ta lava leswaku un’wana wa vana va Yehova Xikwembu lava tshembekaka a tokota rifu tanihi musivi kumbe mukutsuri. Hambi swi ri tano, xivutiso lexikulu a a ku ri lexi: Xana loyi a nga ta hlawuriwa u ta swi tsakela ku va a dlayiwa tanihi musivi hikwalaho ka vanhu va vadyohi? Ku tlula kwalaho, ku endla leswi a swi ta lava hlori eka Xikwembu xa Matimba Hinkwawo. Nakambe a swi ta lava xikombiso xa rirhandzu ra Xikwembu hi mpimo lowu nga pimekiki.—Varhoma 8:32.

6. N’wana wa Xikwembu u swi kotise ku yini ku fikelela swilaveko swa xiyimo lexi katsaka vanhu va vudyoho, naswona u te yini emhakeni leyi?

⁶ I N’wana wa Yehova wa mativula ntsena loyi a a ta fikelela swilaveko leswi hlawulekeke swa xiyimo lexi katsaka vanhu lava dyoheke. I xifaniso lexinene xa Tata wa yena wa le matilweni hi ku kombisa rirhandzu eka swirho swa ndyangu wa Xikwembu lerova a nga ringani ni vana va Xikwembu. Tanihi leswi swivumbiwa leswin’wana hinkwaswo leswi tlhariheke swi vumbiweke hi yena, hakunene rirhandzu ra yena eka swona a ri ta va lerikulu. Ku ya emahlweni, rirhandzu i mfanelo leyikulu swinene ya N’wana la nga un’we wa Yehova, Yesu Kriste, hikuva “hi yena loyi ku kwetsima ka Xikwembu ku tikombaka eka yena, kutani ú tekelele leswi Xikwembu xi nga swona hi xiviri xa xona.” (Vaheveru 1:3) Loko a kombisa ku tiyimisela ka yena ko kombisa rirhandzu leri hi mpimo lowukulu hi ku nyikela vutomi bya yena hikwalaho ka vanhu lava dyoheke, Yesu u byele vaapostola va yena va 12, a ku: “N’wana-wa-Munhu, a nga telanga ku ta tirheriwa, kambe ku tirhela van’wana ni ku nyiketa vutomi bya yena ku kutsula lavo tala.”—Marka 10:45; nakambe vona Yohane 15:13.

7, 8. (a) A a xi ri xihi xikongomelo xa Yehova hi ku rhumela Yesu Kriste emisaveni ya vona? (b) Xana Xikwembu xi rhumele N’wana wa xona la nga un’we eka ntirho wihi?

⁷ Yehova Xikwembu a a ri ni xivangelo xo hlawuleka swinene xo rhumela Yesu emisaveni leyi ya vanhu leyi nga ni vusweti. Rirhandzu ra Xikwembu a a ri ri nsusumeto wa leswi, hikuva Yesu hi yexe u te: “Hikuva Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki. Xikwembu a xi rhumanga N’wana wa xona emisaveni ku ta avanyisa misava, kambe a ku ri ku endlela leswaku misava yi ta ponisiwa ha yena.”—Yohane 3:16, 17.

⁸ A a ku ri hikwalaho ka ntirho wo ponisa leswi Yehova hi ku rhandza ka yena a rhumeleke N’wana wa yena la nga un’we. Xikwembu a xi rhumelanga N’wana wa xona laha leswaku a ta avanyisa misava. Loko N’wana wa Xikwembu a a rhumiwe eka ntirho wo tano wo avanyisa, langutelo ra vanhu hinkwavo a ri ta va ri nga tshembisi. Ku avanyisa ko nonon’hwa loku a ku ta va ku endliwa hi Yesu Kriste ehenhla ka ndyangu wa vanhu a ku ta va ku ri ku avanyiseriwa rifu. (Varhoma 5:12) Xisweswo, hi xikombiso lexi xo hlawuleka xa rirhandzu ra Xikwembu, Xikwembu xi hlangavetane ni xigwevo xa rifu lexi vululami lebyinene a byi ta xi lava.

9. Mupisalema Davhida u titwe njhani hi ku nyika ka Yehova?

⁹ Eka swilo hinkwaswo, Yehova Xikwembu u vula ni ku kombisa rirhandzu tanihi xivumbeko xa nkoka xa vumunhu bya yena. Kutani swi nga vuriwa kahle leswaku Xikwembu xi nyika vagandzeri va xona vo tshembeka emisaveni swilo leswinene swo tala ku tlula mpimo. Mupisalema Davhida u titwe hi ndlela yoleyo hi mhaka leyi loko a te eka Xikwembu: “Ku kurile ŝonghasi e ku kateka ka wena, lo’ku u v̌ekelaka la’v̌a ku tšhav̌aka, loku u tiraka ha kona e mahlweni ka v̌ana v̌a v̌anhu, ni ku pfuna la’v̌a tšhav̌elaka ka wena.” (Psalma 31:19) Enkarhini wa ku fuma ka Davhida ehenhla ka tiko ra Israyele—ina, evuton’wini bya yena hinkwabyo tanihi xirho xa tiko rero leri Xikwembu xi tihlawuleleke rona—hakanyingi u tokote vunene bya Yehova. Naswona Davhida u byi kume byi tele.

Ku Lahlekeriwa Ka Israyele Hi Nyiko Leyikulu Leyi Humaka Eka Xikwembu

10. Ha yini Israyele wa khale a a nga fani ni tiko rin’wana ra laha misaveni?

¹⁰ Hikwalaho ko va na Yehova tanihi Xikwembu xa rona, Israyele ra khale a a ri nga fani ni tiko rin’wana emisaveni. Hi ku tirhisa muprofeta Muxe tanihi muyimeri, Yehova u tise vatukulu va Abrahama, Isaka na Yakobo eka ntwanano wa xinghana na yena n’wini. A a nga si tirhisana ni rixaka rin’wana hi ndlela leyi. Hikokwalaho, mupisalema loyi a huhuteriweke u vurile a ku: “O hlav̌utele Yakobo e rito ra yena, na Israele, e milawu ya yena ni ŝileriso ŝa yena; a nga endlanga ŝeŝo e ka matiko maṅwana, kambe a ma tiv̌i ŝileriso ŝa yena. [Dzunisani Yehova, n’wina vanhu!, NW]”—Psalma 147:19, 20.

11. Xana Israyele u tiphine hi xiyimo xa yena lexinene ni Xikwembu ku fikela rini, naswona Yesu u ku phofule njhani ku hundzuka ka vunghana bya vona?

¹¹ Tiko ra Israyele wa xiviri ri ye emahlweni ni xinghana lexi lexinene na Xikwembu ku fikela loko ri ala Yesu Kriste tanihi Mesiya hi lembe ra 33 ra Nguva ya hina leyi Tolovelekeke. Hakunene a a ku ri siku leri hlomulaka mbilu eka Israyele loko Yesu a huwelerile a ku: “Yerusalema, Yerusalema, wena la dlayaka vaprofeta, la khandlaka hi maribye lava rhumiweke ka wena, kangani ndzi naverile ku hlengeleta vana va wena, kukotisa huku loko yi hlengeleta swiciwana swa yona ehansi ka timpapa ta yona, kambe a wu swi lavanga. Vonani, muti wa n’wina wu ta sala wu nga ri na munhu.” (Matewu 23:37, 38) Marito ya Yesu ma kombise leswaku tiko ra Israyele, hambi leswi khale a ri tsakeriwa hi Yehova, ri lahlekeriwe hi nyiko yo hlawuleka leyi humaka eka Xikwembu. Njhani?

12. A ku ri vamani ‘vana va Yerusalema,’ naswona a swi ta va swi vule yini leswaku Yesu a va hlengeleta swin’we?

¹² Hi ku tirhisa rito “vana,” Yesu a a kombetela eka Vayuda va ntumbuluko ntsena lava yimbeke lava a va tshama eYerusalema naswona a va yimela tiko hinkwaro ra Vayuda. Leswaku Yesu a hlengeleta ‘vana va Yerusalema’ a a swi ta va swi lave leswaku a tisa “vana” lava eka ntwanano lowuntshwa ni Xikwembu, laha yena a tirhaka tanihi Muyimeri exikarhi ka Yehova ni Vayuda lava va xiviri. (Yeremia 31:31-34) Vuyelo bya leswi a ku ta va ku rivaleriwa ka swidyoho, hikuva sweswo a a ku ri mpimo wa rirhandzu ra Xikwembu. (Ringanisa Malakia 1:2.) Leswi hakunene a ku ta va nyiko leyikulu.

13. Hakelo ya Israyele ya ku ala N’wana wa Xikwembu yi ve yihi, kambe ha yini ntsako wa Yehova wu nga helanga?

¹³ Ku pfumelelana ni Rito ra vuprofeta bya yena, Yehova u rindze hi laha a swi ta twisiseka a nga si nyikela nyiko eka lava nga riki Vayuda ya ku va vahlanganyeri va ntwanano lowuntshwa. Kambe hi ku ala N’wana wa Xikwembu, Mesiya, tiko ra Israyele wa xiviri ri lahlekeriwe hi nyiko leyi leyikulu. Hikokwalaho Yehova u hlangavetane ni ku ariwa ka N’wana wa yena hi ku hundzisela nyiko leyi eka vanhu lava nga riki va tiko ra Vayuda. Hi ndlela yoleyo, ntsako wa Yehova tanihi Munyiki Lonkulu wu ye emahlweni hi laha ku nga heriki.

Ntsako Wo Nyika

14. Ha yini Yesu Kriste a ri xivumbiwa lexi tsakeke swinene emisaveni hinkwayo?

¹⁴ Yehova i “Xikwembu lexi tsakeke.” (1 Timotiya 1:11, NW) Ku nyika van’wana i xin’wana lexi n’wi tsakisaka. Eka lembe xidzana ro sungula C.E., N’wana wa yena la nga un’we u te: “Ku nyika i nkateko lowu tlulaka ku nyikiwa.” (Mintirho 20:35) Hi ku pfumelelana ni nsinya lowu wa nawu, Yesu u ve xivumbiwa lexi tsakeke swinene xa Mutumbuluxi wa misava hinkwayo. Njhani? Kahle-kahle, a ri kusuhi na Yehova Xikwembu hi yexe, Yesu Kriste u nyikele nyiko leyikulu eka hinkwato hi ku nyikela vutomi bya yena leswaku a pfuna vanhu. Entiyisweni, i ‘Mufumi loyi a tsakeke.’ (1 Timotiya 6:15) Xisweswo Yesu u kombisa leswi a swi vuleke hi ntsako lowukulu wo nyika.

15. Hi le ka yini laha Yehova a nga ta ka a nga tshiki ku va xikombiso, naswona swivumbiwa swa yena leswi tlhariheke swi nga wu kuma njhani mpimo wa ntsako wa yena?

¹⁵ Ha Yesu Kriste, Yehova Xikwembu a nge tsandzeki ku va Munyiki loyi a hananaka eka swivumbiwa swa yena hinkwaswo leswi tlhariheke naswona minkarhi hinkwayo u ta va xikombiso lexikulu xa ku nyika. Tanihi leswi Xikwembu xi kumaka ntsako hi ku nyika van’wana tinyiko letinene, kutani xi nghenise moya wo hanana etimbilwini ta swivumbiwa swa xona leswi tlhariheke emisaveni. Hi ndlela yoleyo va kombisa va tlhela va tekelela vumunhu bya yena ni ku kuma ntsako wa yena lowu xiyekaka. (Genesa 1:26; Vaefesa 5:1) Hi laha ku faneleke, Yesu u byele vadyondzisiwa va yena: “Nyikani, mi ta nyikiwa; endzeni ka nkhancu lowu mi wu hakarhaka exifuveni, ku ta cheriwa mpimo lowu tivikanaka, lowu gandliweke, lowu hlunguhliweke, lowu khapaka; hikuva mpimo lowu mi pimelaka van’wana ha wona, mi ta pimeriwa ha wona na n’wina.”—Luka 6:38.

16. I ku nyika kwihi loku Yesu a a vulavula ha kona eka Luka 6:38?

¹⁶ Yesu u vekele vadyondzisiwa va yena xikombiso lexinene ngopfu xo titoloveta ku nyika vadyondzisiwa va yena ndlela leyi a va fanele ku yi landzela. U vule leswaku a ku ta va ni n’wangulo lowunene hi ku nyika ko tano, eka lava amukelaka. Eka Luka 6:38, Yesu a a nga vuli ku nyika ka tinyiko ta swilo leswi vonakaka ntsena. A a nga byeli vadyondzisiwa vakwe leswaku va tirhisa ndlela yo nyika. Ematshan’wini ya sweswo, a a va kongomisa endleleni leyi a yi ta va endla va titwa va enerisekile hi tlhelo ra moya.

Ku Tiyisekisiwa Ka Ntsako Lowu Nga Heriki

17. Hi yihi nyiko leyi hlamarisaka leyi Xikwembu xi yi nyikeke Timbhoni ta xona emasikwini lawa ya makumu?

¹⁷ Mawaku nyiko leyi hlamarisaka leyi Yehova, Nhloko ya hinkwaswo leswi tumbuluxiweke, a yi nyikeke Timbhoni ta yena emasikwini lawa ya makumu! U hi nyike mahungu lamanene ya Mfumo wa yena. Hi ni lunghelo lerikulu ro va vahuweleri va Mfumo wa Xikwembu lowu simekiweke lowu nga emavokweni ya N’wana wa yena la fumaka, Yesu Kriste. (Matewu 24:14; Marka 13:10) Ku endliwa Timbhoni leti huwelelaka ta Xikwembu xa le Henhla-henhla i nyiko leyi nga ringanisiwiki na nchumu, naswona ndlela leyinene leyi hi nga titolovetaka ku nyika hi ku tekelela Xikwembu ha yona i ku avelana rungula ra Mfumo ni van’wana ku nga si fika makumu ya mafambiselo lawa yo biha ya swilo.

18. Tanihi Timbhoni ta Yehova, hi fanele hi va nyika yini van’wana?

¹⁸ Muapostola Pawulo u vulavule hi ta maxangu lawa a a fanele ku langutana na wona loko a ri karhi a chumayela rungula ra Mfumo eka van’wana. (2 Vakorinto 11:23-27) Timbhoni ta Yehova ta manguva lawa na tona ti fanele ti langutana ni maxangu ni ku vekela etlhelo swilaveko swa tona hi matshalatshala yo nyika van’wana ntshembo wa Mfumo. Hi nga ka hi nga tali ku ya emakaya ya vanhu, ngopfu-ngopfu loko hi ri ni tingana. Kambe tanihi valandzeri va Kriste, hi nge swi koti ku papalata kumbe ku tshika lunghelo ro nyika van’wana swilo swa moya hi ku chumayela “Evhangeli leyi ya Mfumo.” (Matewu 24:14) Hi fanele ku va ni langutelo leri Yesu a a ri na rona. Loko a langutane ni rifu, u khongerile: “Tatana, . . . ku nga endliwi ku rhandza ka mina, kambe a ku endliwe ku rhandza ka wena.” (Matewu 26:39) Emhakeni yo nyika van’wana mahungu lamanene ya Mfumo, malandza ya Yehova ma fanele ma endla ku rhandza ka Xikwembu, ku nga ri ka wona—leswi a swi lavaka, hayi leswi ma swi lavaka.

19. I vamani Vini va ‘mintsonga leyi nga heriki,’ naswona hi nga xi endla njhani xinghana na vona?

¹⁹ Ku nyika ko tano ku ta katsa nkarhi ni mali ya hina, kambe hi ku va vanyiki lava chavaka Xikwembu, ha tshemba leswaku ntsako wa hina wu ta va lowu nga heriki. Ha yini? Hikuva Yesu u te: “Tiendleleni maxaka hi xuma xa misava leyi, [“rifuwo ra misava,” New International Version] leswaku loko mi tshuka mi pfumarile, va mi amukela emintsongeni leyi nga heriki.” (Luka 16:9) Xi fanele ku va xikongomelo xa hina ku tirhisa “xuma xa misava” ku endla xinghana ni Vini va ‘mintsonga leyi nga heriki.’ Tanihi Muvumbi, Yehova u na hinkwaswo naswona N’wana wa yena wa mativula u hlanganyela eka vun’wini byebyo tanihi Mudyandzhaka wa swilo hinkwaswo. (Psalma 50:1-12; Vaheveru 1:1, 2) Leswaku hi endla xinghana na vona, hi fanele hi tirhisa rifuwo hi ndlela leyi va tsakisaka. Leswi swi katsa ku va ni langutelo lerinene ro tirhisa swilo leswi vonakaka leswaku hi pfuna van’wana. (Ringanisa Matewu 6:3, 4; 2 Vakorinto 9:7.) Hi nga tirhisa mali hi ndlela leyinene ku tiyisa vuxaka bya hina na Yehova Xikwembu na Yesu Kriste. Hi xikombiso, hi endla leswi hi ku swi tirhisa kahle leswi hi nga na swona leswaku hi pfuna vanhu lava lava pfumalaka na hi ku tirhisa mali ya hina leswaku hi yisa swilaveko swa Mfumo wa Xikwembu emahlweni.—Swivuriso 19:17; Matewu 6:33.

20. (a) Ha yini Yehova na Yesu va ta swi kota ku hi nghenisa “emintsongeni leyi nga heriki,” naswona mintsonga leyi yi nga va kwihi? (b) Xana hi ta va ni lunghelo rihi evuton’wini bya hina hinkwabyo?

²⁰ Hikwalaho ka ku nga fi ka vona, Yehova Xikwembu na Yesu Kriste va nga va Vanghana va hina hi laha ku nga heriki naswona va nga hi nghenisa “emintsongeni leyi nga heriki.” Leswi swi tano ku nga khathariseki leswaku yona yi ta va etilweni laha ku nga ni tintsumi hinkwato leto kwetsima kumbe emisaveni leyi eParadeyisini leyi pfuxetiweke. (Luka 23:43, NW) Nyiko ya rirhandzu ya Xikwembu ya Yesu Kriste yi endle leswaku hinkwaswo leswi swi koteka (Yohane 3:16) Yehova Xikwembu u ta tirhisa Yesu ku tshama a ri karhi a nyika swivumbiwa hinkwaswo, leswaku Yena a tsaka hi laha ku hlawulekeke. Entiyisweni, evuton’wini bya hina hinkwabyo hi ta va ni lunghelo ro nyika ehansi ka vuhosi bya hinkwako-nkwako bya Yehova Xikwembu ni vuhosi bya N’wana wa yena la nga un’we, Hosi ya hina ni Muponisi, Yesu Kriste. Leswi swi ta tisa ntsako lowu nga heriki eka vanyiki hinkwavo lava chavaka Xikwembu.

Wa Tsundzuka Xana?

◻ Xana nyiko ya Xikwembu leyikulu a yi ta lava yini eka xona?

◻ Xikwembu xi rhumele N’wana wa xona eka ntirho wihi?

◻ Hi xihi xivumbiwa lexi tsakeke swinene emisaveni hinkwayo, naswona ha yini?

◻ Xana vanyiki lava chavaka Xikwembu va ta wu kuma njhani ntsako lowu nga heriki?

[Xifaniso lexi nga eka tluka 10]

Xana wa yi tlangela nyiko ya Xikwembu ya N’wana wa xona tanihi gandzelo ra nkutsulo?

[Swifaniso leswi nga eka tluka 12]

Xana u lava Mfumo wa Xikwembu ku sungula hi ku chumayela mahungu lamanene na hi ku seketela ntirho wolowo hi mali ya wena?