Ku Hlengeletana Ni Varhandzi Va Ntshunxeko Lowu Humaka Eka Xikwembu

TIMBHONI TA YEHOVA ti hlawulekile hi tindlela to tala. Hi tona ntsena ti vulavulaka ‘ririmi leri tengeke.’ (Sofonia 3:9) Hi tona ntsena leti nga ni vun’we, leti nga ni xikombiso lexi kombisaka rirhandzu leri hlamuseriweke hi Yesu Kriste. (Yohane 13:35) Naswona hi tona ntsena ti tsakelaka ntshunxeko lowu Yesu Kriste a vuleke leswaku ntiyiso wu ta wu tisa, hi laha swi rhekhodiweke ha kona eka Yohane 8:32: “Naswona mi ta tiva ntiyiso, kutani ntiyiso wu ta mi ntshunxa.”

Marito wolawo lawa Yesu Kriste, N’wana wa Xikwembu, a ma byeleke vadyondzisiwa va yena, ma tikombise ma ri ntiyiso. Naswona sweswi ma twisisiwa swinene ku tlula rini na rini hi Timbhoni ta Yehova leti veke kona eka Mintsombano ya Muganga ya “Varhandzi Va Ntshunxeko.” Nongonoko wa ntsombano wu va anekele swiyenge swo hambana-hambana swa ntshunxeko wa vona erivaleni, leswi va nga wu tirhisisaka xiswona ni vutihlamuleri lebyi fambisanaka ni ntshunxeko wa vona ni ndlela leyi va katekisiweke ha yona hi ku va vanhu lava ntshunxekeke.

Mintsombano leyi yi nga enkarhini ni leyi tirhaka yi sungule eka Hafu ya Misava ya le N’walungwini hi June 7, 1991, eLos Angeles, California, U.S.A. Nongonoko wu sungule hi 10:20 a.m. hi vuyimbeleri, ku landzela risimu ni xikhongelo. Nkulumo yo pfula a ku ri rungula leri khumbaka mbilu leri sekeriweke eka Yakobo 1:25. Hi ku ya hi The Jerusalem Bible, ndzimana leyi yi hlayekisa xileswi: “Munhu loyi a langutaka nawu lowu hetisekeke wa ntshunxeko swinene ivi a wu endla mukhuva wa yena—a nga yingisi a tlhela a wu rivala, kambe a wu tirhisa hi ku hiseka—u ta tsaka eka hinkwaswo leswi a swi endlaka.” Tanihi leswi hi langutaka exivonini ku vona laha hi faneleke ku endla ku antswisa eka ku languteka ka hina, kutani hi fanele ku phikelela eku langutisiseni ka nawu wa Xikwembu lowu heleleke wa ntshunxeko leswaku hi dyondza laha hi faneleke ku endla ku cinca kona eka vumunhu bya hina. Nakambe hi fanele hi phikelela ku languta exivonini xexo.

Ku landzele nkulumo ya mutshama xitulu leyi nge, “Ma Amukeleka N’wina Hinkwenu Varhandzi Va Ntshunxeko.” Timbhoni ta Yehova ti rhandza ntshunxeko, naswona ti lava ku tshama ti ntshunxekile. Xivulavuri xi tshahe valawuri va le nawini lava kombiseke leswaku ku nga ka ku nga vi ni ntshunxeko handle ka nawu. Ina, Vakriste a va ntshunxekelanga ku endla lexi va xi rhandzaka kambe va ntshunxekele ku endla ku rhandza ka Yehova. Va lava ku tirhisa ntshunxeko wa vona hi laha ku heleleke ku nga ri ku wu tirhisa hi ndlela yo biha. Ngopfu-ngopfu ku sukela hi 1919, Timbhoni ta Yehova a ti ri karhi ti tsakela ntshunxeko lowu engetelekeke. Xivulavuri xi landzelerise ku kandziyisiwa ka ntshunxeko eka tinhloko-mhaka ta ntsombano ni tibuku ta Vukriste. Vatsombani hinkwavo a va ta dyondza swo tala hi ntshunxeko lowu humaka eka Xikwembu ni ndlela yo wu tirhisa ha yona.

Switsundzuxo sweswo swa le nkarhini swi landzeriwe hi mimbulavurisano ya varhandzi va ntshunxeko lava tsakeleke ku va kwalaho entsombanweni. Mintsombano yo tano i minkarhi yo tsaka, hi laha minkhuvo yinharhu ya le Israyele ya lembe na lembe a yi funghiwa ha kona hi ntsako lowukulu. Mimbulavurisano yo hlayanyana yi kombise leswaku mintsombano i minkarhi leyi akaka emoyeni, yo tsaka.

Kutani ku landzele nkulumo-nkulu leyi nge, “Xikongomelo Na Ku Tirhisa Ntshunxeko Wa Hina Lowu Hi Nyikiweke Hi Xikwembu.” Eka nkulumo leyi vatsombani va dyondze leswaku Yehova a ri yexe u na ntshunxeko lowu heleleke hikuva i Mufumi Lonkulu naswona u na matimba hinkwawo. Hambi swi ri tano, hikwalaho ka vito ra yena ni leswaku ku pfuneka swivumbiwa swa yena, minkarhi yin’wana u hika ntshunxeko wa yena hi ku hlwela ku hlundzuka ni ku tirhisa ku tikhoma. Swivumbiwa swa yena hinkwaswo swa vutlhari swi na ntshunxeko lowu hikiweke, hikuva swi fumiwa hi Yehova naswona swi hikiwa hi milawu ya nyama ni ya mahanyelo. Yehova u swi nyike ntshunxeko leswaku swi tsaka kambe ngopfu-ngopfu leswaku swi ta yisa xichavo ni ntsako eka yena hi ku n’wi gandzela. Hikwalaho ko tirhisa ntshuxeko wa tona hi ndlela leyinene, Timbhoni ta Yehova ti kume ndhuma ya mahanyelo lamanene ni ku hiseka evutirhelini bya tona emisaveni hinkwayo.

Ravuntlhanu Ni Ndzhenga

“Xana U Bizi—Hi Mintirho Leyi Feke Kumbe Hi Ntirho Wa Yehova?” a ku ri nhloko-mhaka ya nkulumo leyi landzeleke leyi nyanyulaka leyi pfuleke nongonoko wa Ravuntlhanu ni ndzhenga. Mintirho leyi feke a yi katsi ya nyama ntsena, kambe ni yin’wana yo fa emoyeni, leyi nga pfuniki nchumu ni leyi nga riki ni mihandzu—yo tanihi swikimi swo endla mali. Emhakeni leyi, ku tikambela ko tshembeka i ka nkoka ku vona loko hi veka Mfumo ku sungula evuton’wini.

Nkulumo leyi landzeleke leyi a yi ri ni mongo lowu fanaka a yi ku, “Ku Hetisisa Ntirho Wa Hina Tanihi Vatirheli Va Xikwembu.” Xivulavuri xi kombise leswaku Vakriste a va fanelanga va tianerisa hi ntirho wo hetisa nawu ntsena kumbe hi ku va kona ntsena hi minkarhi ya minhlangano. Va fanele va va lava hisekaka eka swivumbeko hinkwaswo swa vutirheli bya vona bya Vukriste. Tinhla leti ti vekiwe erivaleni hi swikombiso ni mimbulavurisano. Hinkwavo va khutaziwe ku hetisisa ntirho wa vona hi xitalo hi laha va nga kotaka ha kona.

Eka nkulumo leyi a yi ku “Vanhu Lava Ntshunxekeke Kambe Va Ri Ni Vutihlamuleri,” xivulavuri xi kandziyise leswaku hambi leswi vanhu va Yehova va tsakelaka ntshunxeko lowu ntiyiso wu va tiseleke wona, va fanele ku tsundzuka leswaku wu fambisana ni vutihlamuleri. Va fanele va tirhisa ntshunxeko wa vona, ku nga ri tanihi ndlela yo tiyimelela ya mahanyelo layo biha, kambe tanihi ku dzunisa Yehova. Tanihi Vakriste, va ni vutihlamuleri eka ‘vafumi lava tlakukeke’ naswona va fanele ku tirhisana ni vakulu va bandlha. (Varhoma 13:1) Ku tlula kwalaho va ni vutihlamuleri eka swiambalo, ku tilunghisa ni mahanyelo ya vona. A va fanelanga va rivala leswaku “un’wana ni un’wana wa hina ú ta tihlamulela hi yexe emahlweni ka Xikwembu.”—Varhoma 14:12; 1 Petro 2:16.

Kutani ku landzele nkulumo ya xilaveko xa Vakriste hinkwavo xa “Ku Va Ni Xivindzi Tanihi Leswi Makumu Ya Misava Leyi Ma Tshinelaka.” Loko vanhu va chuha hi leswi vumundzuku byi nga ta swi tisa, Vakriste va fanele ku nga chavi ku ya emahlweni ni ntirho wa vona. Ku nga chavi i xikombiso xo tshemba Yehova, hikuva loko Mukriste a chava ku hlundzukisa Xikwembu, a nge va chavi vanhu. Ku nhlokohata matsalwa lama chavelelaka swi nga ha pfuna munhu leswaku a nga chavi. Leswaku ma tiya emoyeni ni ku nga chavi, malandza ya Xikwembu nakambe ma lava ku tirhisa minkarhi yo hlanganyela ni vapfumeri-kulobye hi ndlela leyinene. Un’wana ni un’wana nakambe u fanele ku tsundzuka xiphemu lexi endliwaka hi xikhongelo leswaku a nga chavi. Hi ku tshama va nga chavi, Vakriste va ta hlayisa vuxaka lebyinene na Yehova Xikwembu.

Nongonoko wa siku ro sungula wu pfale hi drama leyi dyondzisaka leyi nge Ku Ntshunxekela Ku Kondletela Vugandzeri Bya Ntiyiso. Yi kombise ndlela leyi mindyangu ya namuntlha yi dyondzeke dyondzo leyi humaka eka Ezra ni ntlawa wa yena wa vanhu va 7 000, lowu tinyiketeleke ku tlhelela eYerusalema. Swi pfumelele mutsombani un’wana ni un’wana ku kambisisa leswi a swi rhangisaka emahlweni ni ku vona ndlela leyi a nga engetelaka malunghelo ya yena ya ntirho ha yona. Drama leyi a yi khomele lavakulu ni lavatsongo swo karhi hi ku fanana.

Mugqivela Ni Mixo

Endzhaku ka nongonoko wa vuyimbeleri, risimu, xikhongelo ni ku kambisisiwa ka ndzimana ya siku na siku ya Bibele, nongonoko wa Mugqivela ni mixo wu nyikele nxaxamelo lowu a wu ku “Ntshunxeko Na Vutihlamuleri eVuton’wini Bya Ndyangu.” Eka xiphemu xo sungula lexi nge “Ndlela Leyi Vatswari Va Nga Tekelelaka Yehova Ha Yona,” vatatana va tsundzuxiwe hi tindlela to hambana-hambana leti va nga tekelelaka Tata wa hina wa le tilweni ha tona. Timotiya wo Sungula 5:8 yi lava leswaku va nga va nyiki swilo swa nyama ntsena kambe ni swa moya. Va tekelela Yehova hi ku va vadyondzisi lavanene va mindyangu ya vona ni ku nyikela ndzayo leyinene hi laha swi lavekaka ha kona. Tinhla leti ti kombisiwe hi mimbulavurisano yo hlaya.

“Xiphemu Xa Wansati Xa Nseketelo,” a ku ri xiphemu lexi landzelaka xa nxaxamelo lowu. Xi sungule hi ku kandziyisa leswaku wansati a teka xiyimo lexi xiximekaka endyangwini wa Vukriste, ku nga xa ku va la seketelaka. Xana leswi swi lava yini eka yena? Leswaku a titsongahata, a nga tshikileli nuna wa yena ku endla swo karhi leswi laviwaka hi yena ntsena. U fanele ku yi khathalela kahle mindzhwalo ya yena eka nuna ni vana va yena, naswona u fanele ku kuma ku eneriseka ka xiviri hi ku basisa ni ku hlayisa kaya ra yena ri basile. Naswona tanihi mutirheli wa Mukriste, u fanele ku va ni minkarhi yo tala yo nghenela vutirheli bya nsimu. Mbulavurisano ni ndyangu wu kandziyise vutlhari byo tirhisa xitsundzuxo xo tano xa Matsalwa.

Vantshwa va kume xitsundzuxo eka xiphemu lexi a xi ku “Vana Lava Yingisaka Ni Lava Dyondzaka.” Hi ku letela vana va vona ku yingisa ni ku dyondza, vatswari va tisa ku dzuneka eka Yehova ni ku kombisa rirhandzu eka vamakwerhu va vona va moya ni le ka vana va vona vini. Xiboho lexi tiyeke xi ta va kona exikarhi ka vatswari ni vana loko va heta nkarhi wo leha va ri swin’we. Vatswari va fanele ku tihlomisela ku hlamula swivutiso swa vana va vona ni ku pfuxa torha ra vona ra vutivi. Nakambe, mimbulavurisano yi kombise ndlela leyi leswi swi nga endliwaka ha yona.

Ku landzele xitsundzuxo lexinene lexi nge “Tshama U Ri La Ntshunxekeke Leswaku U Tirhela Yehova.” Xana leswi swi endlisiwa ku yini? Hi ku tintshuxa eku landzeleleni ka mintirho ya misava, mintlangu leyi dyaka nkarhi, ni tipakani ta swilo leswi vonakaka. Yesu na muapostola Pawulo va veke swikombiso leswinene hi ku tinyiketela. Vanhu va Yehova va fanele va hlayisa tihlo leri oloveke, ri langute eka swilaveko swa Mfumo. Loko swi ta eku kumeni ka swilo leswi vonakaka, i vutlhari ku hlayisa sweswi kutani u xava endzhaku ematshan’wini ya ku xava sweswi kutani u hakela endzhaku. Vantshwa va fanele ku tivonela eku titsakiseni hi rimbewu ni mintirho-vutomi ya misava. Mbulavurisano ni phayona leri nga nghenelangiki vukati wu kombise mikateko leyi taka loko munhu a tintshuxa leswaku a tirhela Yehova.

Nongonoko wa Mugqivela ni mixo wu pfale hi nkulumo leyi a yi ku “Nghena eNtshunxekweni Hi Ku Tinyiketela Ni Nkhuvulo.” Lava yaka eku khuvuriweni va tsundzuxiwile leswaku hambi leswi swivumbiwa swi nghenisiweke evuhlongeni hi ku xandzuka ka Adamu, Muntshunxi wa matimba, Yesu Kriste, u pfule ndlela ya ntshunxeko hi gandzelo ra yena. Xivulavuri xi kombise leswi a swi katseka eku ntshunxekeni leswaku u endla ku rhandza ka Xikwembu ni ku kandziyisa vutihlamuleri ni mikateko leyi nga ta va ya lava va khuvuriwaka.

Mugqivela Ni Ndzhenga

Nongonoko wa Mugqivela ni ndzhenga wu sungule hi xivutiso lexi kambelaka moya-xiviri lexi nge “U Lava Ku Pfuneka Mani?” Misava yi kombisa moya wa ku tilavela swa wena wa Diyavulosi. Hambi swi ri tano, Vakriste va fanele ku tekelela moya wa Yesu Kriste wo tinyiketela. Mawaku xikombiso xonghasi lexi a xi kombiseke! U sukele ku kwetsima ka le tilweni kutani a nyikela vutomi bya yena bya vumunhu leswaku a pfuna hina. Mphikamakaneta hi leswaku hi lava ku pfuneka mani loko ku ri ni ku nga twisisani exikarhi ka Vakriste ebindzwini kumbe emhakeni ya timali, loko ku ri ni ku hambana ka vumunhu ni swin’wana. Swilo swo tano swi ringa rirhandzu ra Vukriste. Kambe hi ku lava leswaku ku pfuneka van’wana, hakunene munhu u ta vona nkateko lowukulu wa ku nyika naswona u ta amukeriwa hi Yehova.

Leswi swi landzele nhloko-mhaka leyi yelanaka swinene leyi nge “Ku Xiya Ni Ku Hlula Ku Tsana Ka Moya.” Nkulumo leyi yi kandziyise xilaveko xo vona swikombiso swa ku tsana ka moya naswona u endla hi ku tiyimisela eka nyimpi yo hlula Sathana ni mintlhamu ya yena. Malandza ya Yehova ma fanele ku hlakulela rirhandzu leri enteke ra yena ni ku venga leswo biha. Leswi swi lava leswaku va tiva Yehova nkarhi na nkarhi, hi dyondzo ya Bibele ya munhu hi xiyexe ni ya ndyangu leyi nga ni xikongomelo. Va fanele ku papalata swivumbeko hinkwaswo swa ku titsakisa leswi dzunisaka vukari ni vunghwavava. (Vaefesa 5:3-5) Xikhongelo xa nkarhi na nkarhi ni ku va kona eminhlanganweni na swona i swa nkoka leswaku hi humelela eku hluleni ka ku tsana emoyeni.

Leyi a ku vulavuriwa hi yona ngopfu ku tlula tinkulumo hinkwato leti nyikeriweke entsombanweni a ku ri leyi nge “Xana Ku Nghenela Vukati I Xilotlelo Xo Kuma Ntsako?” Vantshwa vo tala va anakanya tano! Kambe xivulavuri xi swi veke erivaleni leswaku ku ni nhlayo leyikulu ya swivumbiwa swo tshembeka swa moya leswi tsakeke hambi swi nga nghenelanga vukati, tanihi leswi Vakriste vo tala lava tinyiketeleke va tsakeke swinene hambi leswi va nga nghenelangiki vukati. Ku tlula kwalaho, mimpatswa yo tala leyi tekaneke a yi tsakanga, hi laha swi kombisiwaka ha kona hi nhlayo leyi tlakukaka ya ku dlaya vukati. Munhu u fanele ku anakanyisisa hi mikateko yo tala leyi Vakriste hinkwavo lava tinyiketeleke va nga na yona ku xiya leswaku vukati, hambi leswi ku nga ha vaka nkateko, a hi xilotlelo xa ntsako.

Ku landzele nxaxamelo lowu a wu ku “Ntshunxeko Wa Vukriste eSikwini Ra Hina.” Xivulavuri xo sungula xi hlamusele hi “Swivumbeko Swa Ntshunxeko Wa Hina Wa Vukriste.” Leswi swi katsa ntshunxeko eka tidyondzo ta mavunwa to tanihi Vunharhu-un’we, ku nga fi ka moya wa munhu ni ku xanisiwa loku nga heriki. Kutani ku ni ntshunxeko eka vuhlonga bya xidyoho. Hambi leswi Vakriste va nga hetisekangiki, va humile eka mahanyelo layo biha yo tanihi ku dzaha, ku gembula, vudakwa ni ku tikhoma loko biha ka rimbewu. Nakambe ku ni ntshunxeko eka ku pfumala ntshembo, hikuva va ni ntshembo wa Paradeyisi leyi va susumetelaka ku byela van’wana ha yona.

Xivulavuri lexi landzeleke xi vutise xivutiso lexi nge “Xana Wa Wu Tlangela Ntshunxeko Wo Tano Hi Wexe?” Ku tlangela swi vula ku khoma hi vukheta. Ku endla sweswo, nandza wa Xikwembu u fanele ku tivonela leswaku a nga ringiwi leswaku a hundzeleta ntshunxeko wa Vukriste. Ntshunxeko wa misava i vunwa lebyi hambukisaka, hikuva wu yisa eka vuhlonga bya xidyoho ni vuhomboloki.

Xivulavuri xo hetelela eka nxaxamelo lowu xi vulavule hi nhloko-mhaka leyi nge “Varhandzi Va Ntshunxeko Yimani Mi Tiyile.” Ku endla sweswo, Vakriste va fanele ku namarhela swinene vatswari va vona va le tilweni, Yehova ni nhlengeletano ya yena leyi fanaka ni wansati. Vanhu va Yehova a va nge tipfumeleli ku xisiwa hi mianakanyo ya vagwinehi; va fanele ku papalata lava taka ni swiringanyeto swo biha. Leswaku va tshama va tiyile entshunxekweni wa Xikwembu, Vakriste va fanele ku va ‘lava hanyaka emoyeni.’—Vagalatiya 5:25.

Nkulumo yo hetelela ya siku a ku ri xihlovo xa ntsako hakunene. A yi ku “Nghwazi Leyi Tshameke Yi Hanya.” Yesu Kriste a a ri nghwazi, hikuva u kucetele vutomi bya vanhu hi matimba swinene ku tlula mavuthu hinkwawo, swikepe swa nyimpi, tipalamendhe ni tihosi hinkwato swi hlanganile. A a ri N’wana wa Xikwembu, loyi a veke kona etilweni emahlweni ko ta emisaveni. Kutani Yesu u tekelele Tata wa yena wa le tilweni hi vukheta hi leswi a swi vulavuleke ni ku swi dyondzisa ni ndlela leyi a hanyeke ha yona lerova a ku: “Loyi a ndzi voneke, u vonile Tatana.” (Yohane 14:9) Vona ndlela leyi Yesu a swi kombiseke ha yona leswaku “Xikwembu i rirhandzu”! (1 Yohane 4:8) Endzhaku ko vulavula nkarhi wo leha hi timfanelo ta Yesu, xivulavuri xi kombise leswaku nongonoko wa swihloko leswi nge “Vutomi Ni Vutirheli Bya Yesu” a wu humesiwa eka Xihondzo xo Rindza ku sukela hi April 1985. Ku hlamula swikombelo swo tala, Sosayiti se a yi humesa buku leyintshwa leyi nge Nghwazi Leyi Tshameke Yi Hanya. Yi na tindzima ta 133 naswona yi gandlisiwe hi muvala lowu taleke. Mhaka enxaxamelweni yi hleriwile naswona hinkwayo ka yona yi hlanganisiwe eka buku ya matluka ya 448. Hakunene, siku leri ra nhlengeletano ri hele hi ntsako lowukulu!

Sonto Ni Mixo

Eka nongonoko wa Sonto ni mixo ku te nxaxamelo lowu nge “Ku Tirha Tanihi Vaphasi Va Vanhu.” Nkulumo leyi nge “Ku Phasa Tinhlampfi—Hi Xiviri Na Hi Ku Fanekisela” yi veke masungulo ya tinkulumo leti landzeleke. Xivulavuri xi kombise leswaku endzhaku ka loko Yesu a endle ku phasiwa ka tinhlampfi hi hlori, u rhambe vaphasi va tinhlampfi lava a va katseka leswaku va va vaphasi va vanhu. Hi nkarhi wun’wana, Yesu u letele vadyondzisiwa va yena leswaku va va vaphasi va vanhu, naswona ku sukela hi Pentekosta ya 33 C.E., va humelerile eku pfuneni ka mintshungu ya vavanuna ni vavasati leswaku va va vadyondzisiwa.

Xivulavuri lexi landzeleke xi vulavule hi xifaniso xa nkukuto lexi rhekhodiweke eka Matewu 13:47-50. Xi swi veke erivaleni leswaku nkukuto wo fanekisela wu katsa Vakriste hinkwavo lava totiweke ni Vujagana, ntlawa lowu wo hetelela hikwalaho ka ntirho wa wona lowu endliweke wo hundzuluxela, ku gandlisa ni ku hangalasa Tibibele, hambi leswi matshalatshala lawa ya hlengeleteke mintshungu leyikulu ya tinhlampfi leti nga fanelangiki. Ngopfu-ngopfu ku sukela hi 1919 ku ve ni ntirho wo hlawula, laha tinhlampfi leti nga fanelangiki ti cukumetiwaka kasi leti fanelekaka ti hlengeletiwa eka mabandlha lama fanaka ni xibya lama pfuneke ku hlayisa ni ku sirhelela Vakriste va ntiyiso leswaku va endla ntirho wa Xikwembu.

Nkulumo ya vunharhu leyi a yi ku “Ku Phasa Vanhu eMatini Ya Misava Hinkwayo,” yi kandziyise vutihlamuleri bya Vakriste hinkwavo lava tinyiketeleke ku hlanganyela eku phaseni ka misava hinkwayo. Sweswi, ku tlula 4 000 000 va hlanganyela entirhweni lowu ematikweni lama tlulaka 200, naswona amalembeni ya sweswinyana vo tlula 230 000 va khuvuriwa lembe rin’wana ni rin’wana. Vanhu va Yehova hinkwavo va khutaziwa ku antswisa vutshila bya vona byo phasa, naswona van’wana hakanyingi lava nga “vaphasi va vanhu” lava humelelaka ku vulavuriwe na vona.

Eka nkulumo leyi landzeleke, leyi a yi ku “Ku Tshama U Xalamukile ‘Enkarhini Wa Makumu,’” xivulavuri xi xaxamete swipfuno swa nkombo swo pfuna vanhu va Xikwembu leswaku va tshama va xalamukile: ku lwisana ni ku hela matimba, ku khongela, ku twarisa xitsundzuxo xa ku hela ka mafambiselo lawa ku tinamarheta ni nhlengeletano ya Yehova, ku tikambela hi wexe, ku anakanyisisa hi ku hetiseka ka vuprofeta ni ku tsundzuka leswaku ku ponisiwa ka vona ku kusuhi ku tlula nkarhi lowu va nga hundzuka vapfumeri ha wona.

Nongonoko wa ni mixo wu hele hi ku hlamuseriwa ka “I Vamani Lava Nga Ta Pona ‘Nkarhi Wa Nhlomulo’?” Xivulavuri xi kombise ndlela leyi vuprofeta bya Yuwele byi hetisekeke ha yona enkarhini wa vaapostola, ndlela leyi byi hetisekaka ha yona sweswi ni leswaku byi ta va ni ku hetiseka loku heleleke ku nga ri khale.

Sonto Ni Ndzhenga

Nongonoko wa ni ndzhenga wu sungule hi nkulumo ya le rivaleni leyi nge, “Ku Twarisa Misava Leyintshwa Ya Xikwembu Ya Ntshunxeko!” Nkulumo leyi yi yise nhloko-mhaka ya ntsombano ya ntshunxeko emahlweni. Swi vekiwe erivaleni leswaku Rito ra Xikwembu ri vhumbe misava leyintshwa laha ku nga ta va ni ntshunxeko eku tshikileriweni hi vukhongeri bya mavuwa, politiki, ikhonomi ni xihlawu-hlawu. Nakambe ku ta va ni ntshunxeko eka xidyoho ni rifu. Rihanyo leri hetisekeke ri ta vuyeteriwa leswaku vanhu va ta kota ku hanya hi laha ku nga heriki hi ntsako eparadeyisini emisaveni. Xisweswo, varhandzi va ku lulama va ni swivangelo hinkwaswo swo dzunisa Muendli wa misava leyintshwa hi ku vula va ku “Ha ku nkhensa, Yehova, hi ntshunxeko wa ntiyiso!”

Nkulumo ya le rivaleni yi landzeriwe hi nchumu wun’wana lowuntshwa eka mintsombano ya miganga—bulo ra dyondzo ya vhiki ya Xihondzo xo Rindza. Kutani ntsombano wu pfale hi nkulumo leyi nyanyulaka ni xitsundzuxo lexi nge “Varhandzi Va Ntshunxeko, Hambetani Mi Endla Nhluvuko.” Hi ku komisa xivulavuri xi vulavule hi tinhla-nkulu ta nhloko-mhaka ya ntsombano ya ntshunxeko. U kandziyise ndlela leyi vanhu va Yehova va tsakeke ha yona hikwalaho ka ntshunxeko wa vona, a andlala tindlela leti Vakriste va endleke nhluvuko ha tona ni ku va khutaza ku ya emahlweni hi vun’we leswaku va kuma mikateko leyi engetelekeke. U hetelele hi marito lama nge: “Loko hi endla leswi, onge Yehova a nga hambeta a katekisa hinkwerhu leswaku hi hambeta hi ya emahlweni tanihi varhandzi va ntshunxeko.”

“Leswi vumbiweke swi nyiketiwile eka swa hava, ku nga ri hi ku rhandza ka swona, kambe hi ku rhandza ka Loyi a swi nyiketeke. Kambe ku langutela ku kona ka leswaku swivumbiwa leswi swi ta ntshunxiwa na swona evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu.”—Varhoma 8:20, 21.

[Swifaniso leswi nga eka tluka 25]

Mupfhumba lontsongo entsombanweni wa le Prague, Czechoslovakia

[Swifaniso leswi nga eka tluka 26]

1. Lava yaka eku khuvuriweni va ya endhawini ya nkhuvulo ePrague, Czechoslovakia

2. Ku khuvuriwa tanihi un’wana wa Timbhoni ta Yehova eTallinn, Estonia

3. Tibuku letintshwa ti tisa ntsako eka vatsombani eUsolye-Sibirskoye, Siberia

4. Ku humesiwa ka “New World Translation of the Holy Scriptures” hi Xiczech na Xislovak entsombanweni wa le Prague