I Mani La Nga Ta Pona ‘Nkarhi Wa Maxangu’?
“Uṅwana ni uṅwana l’a khongelaka v̌ito ra Yehova o ta pona.”—YOEL 2:32.
1. Hi ku ya hi Daniyele na Malakiya, i yini lexi hlawulaka lava nga ta pona ‘enkarhini wa maxangu’ lowu taka?
LOKO a languta emahlweni esikwini ra hina, muprofeta Daniyele u tsarile: “Kutani masiku ya [maxangu, NW] ma ta v̌a kona, layonghasi yongasi ma nga siki v̌aka kona mpfhuka matiko ma ri kona, ku fikela nkarini wolowo. Ntsena e mikarini yoleyo, tiko ra wena ri ta ponisiwa, v̌a nga hikwav̌o la’v̌a ṭariweke bukwini.” (Daniel 12:1) I marito lama khutazaka hakunene! Vanhu va Yehova lava amukeriweke va ta tsundzukiwa hi yena, hi laha Malakia 3:16 yi vulaka ha kona na yona yi ku: “Kwalaho la’v̌a tšhav̌aka Yehova v̌a v̌ulav̌ula kuṅwe, uṅwana ni makwav̌o, kutani Yehova a riya ndlev̌e, a yingisela; buku ya šiṭunḍušo yi ṭariwa e mahlweni ka yena, yi ṭaleriwa la’v̌a tšhav̌aka Yehova ni la’v̌a ṭunḍukaka v̌ito ra yena.”
2. I yini leswi tisiwaka hi ku anakanya hi vito ra Yehova?
2 Ku anakanya hi vito ra Yehova swi yisa eka vutivi lebyi kongomeke malunghana na yena, Kriste wa yena ni swikongomelo swa yena hinkwaswo leswikulu swa Mfumo. Xisweswo, vanhu va yena va dyondza ku tshama va ri karhi va n’wi xixima, va va ni vunghana lebyikulu byo tinyiketela eka yena ni ku n’wi rhandza hi ‘timbilu ta vona hinkwato, ni ku anakanya ka vona hinkwako, ni matimba ya vona hinkwawo.’ (Marka 12:33; Nhlavutelo 4:11) Yehova u endle nyiko leyi hlamarisaka hi gandzelo ra Yesu Kriste, leswaku vatitsongahati va laha misaveni va kuma vutomi lebyi nga heriki. Hikokwalaho, va nga ma phindha hi ku tiyiseka marito ya vuthu ra le tilweni leri dzuniseke Xikwembu enkarhini wa ku velekiwa ka Yesu, va ku: “Ku dzuneka a ku ve eka Xikwembu ematilweni ya le henhla-henhla, ku rhula a ku ve emisaveni eka vanhu lava xi va tsakelaka.”—Luka 2:14.
3. Hi xihi xiendlakalo xa Yehova lexi faneleke xi humelela, ku nga si ta ku rhula emisaveni leyi?
3 Ku rhula koloko ku le kusuhi swinene ku tlula hi laha vanhu vo tala va ehleketaka ha kona. Kambe ku fanele ku rhanga ku ta ku avanyisa ka Yehova emiaveni ya manyala. Muprofeta wa yena Sofoniya wa twarisa: “Siku ra Yehova le’rikulu ri ṭhinele, ri ṭhinerile, ri v̌uya ri hatlisisa hi ku tlurisa.” I siku ra njhani rero? Vuprofeta byi ya emahlweni: “Twanani, siku ra Yehova hi leri! kona, nhenha yi rila hi ku v̌av̌iseka. Siku rolero i siku ra v̌ukari, i siku ra khombo ni ra nhlomulo, i siku ra ku onha ni ra ku onhaka, i siku ra munyama lo’wa ntima, i siku ra mapapa ni ra munyama lo’wa ntima! I siku ra mhalamhala ni ra nkosi lo’wu tlhav̌elaka miti leya makhokholo ni ya marhangu la’yo tlakuka. Nḍi ta v̌eka v̌anhu e khombyeni, kutani v̌a ta famba ku fana ni v̌o-fe-mahlo, hikuv̌a v̌a dyohele Yehova.”—Sofonia 1:14-17; nakambe vona Habakuk 2:3; 3:1-6, 16-19.
4. I vamani namuntlha lava amukelaka xirhambo xa leswaku va tiva Xikwembu ni ku xi tirhela?
4 Lexi tsakisaka, timiliyoni namuntlha ti amukela xirhambo xa leswaku ti tiva ni ku tirhela Xikwembu. Malunghana ni Vakriste lava totiweke, lava nghenisiwaka eka ntwanano lowuntshwa, ku profetiwile: “V̌a ta nḍi tiv̌a hikwav̌o, ku sungula hi lo’nṭongo ka v̌ona, e ku yisa ka lo’nkulu, ku v̌ula Yehova.” (Yeremia 31:34) Lava va yise ntirho wa manguva lawa wo nyikela vumbhoni emahlweni. Kutani sweswi tanihi leswi vunyingi bya masalela lama totiweke byi hetaka pfhumba ra byona ra laha misaveni, “ntshungu lowukulu” wa “tinyimpfu tin’wana” wu ‘endla ntirho wo kwetsima wa Xikwembu vusiku ni nhlikanhi’ elunghiselelweni ra xona leri fanaka ni tempele. (Nhlavutelo 7:9, 15; Yohane 10:16) Xana u wun’wana wa lava tiphinaka hi lunghelo leri leri nga pimanisekiki?
Ndlela Leyi “Le’ŝi Ranḍekaka” Swi Nghenaka Ha Yona
5, 6. Hi wihi ntirho wo ponisa lowu humelelaka loko matiko hinkwawo ma nga si herisiwa?
5 Sweswi a hi pfuleni eka Hagai 2:7, laha Yehova a profetaka malunghana ni yindlu ya yena ya moya ya vugandzeri. U ri: “Nḍi ta ṭekaṭekisa ni matiko hikwawo, kutani le’ŝi ranḍekaka ŝa matiko hikwawo ŝi ta ta kwala, nḍi v̌a nḍi tata yindlu leyi hi ku kwetsima.” Vuprofeta bya Bibele byi kombisa leswaku ‘ku tsekatsekisiwa ka matiko’ swi vula ku avanyisa ka Yehova ehenhla ka matiko. (Nahum 1:5, 6; Nhlavutelo 6:12-17) Hikwalaho xiendlo xa Yehova lexi profetiweke eka Hagai 2:7 xi ta hetelela loko matiko ma tsekatsekisiwa ma nga ha vi kona—ma herisiwa. Kambe ku vuriwa yini hi “le’ŝi ranḍekaka ŝa matiko hikwawo”? Xana swi fanele ku rindzela ku tsekatseka loku lovisaka ka makumu ku swi nghenisa? A swi tano.
6 Yoel 2:32 yi vula leswaku “uṅwana ni uṅwana l’a khongelaka v̌ito ra Yehova o ta pona; hikuv̌a e nṭhav̌eni ya Sion, ni le Yerusalem, ku pona ku ta v̌a kona, hi laha Yehova a v̌uleke ha kona, šikari ka la’v̌a nga ta sala, v̌aṅwana hi la’v̌a nga ta v̌itiwa i Yehova.” Yehova wa va humesa naswona va vitana vito ra yena hi ripfumelo egandzelweni ra Yesu, nhlomulo lowukulu wa makumu wu nga si ta. (Ringanisa Yohane 6:44; Mintirho 2:38, 39.) Lexi tsakisaka, vunyingi bya ntshungu lowukulu, lebyi sweswi byi tlulaka timiliyoni ta mune, ‘byi nghena eka’ yindlu ya vugandzeri bya Yehova byi rindzele yena leswaku a ‘tsekatsekisa matiko hinkwawo’ eArmagedoni.—Nhlavutelo 7:9, 10, 14.
7. Ku katseka yini eku ‘vitaneni ka vito ra Yehova’?
7 Xana vaponi lava va ri vitana njhani vito ra Yehova? Yakobo 4:8 yi hi nyika xitsundzuxo, yi ku: “Tshinelani kusuhi ni Xikwembu kutani xi ta tshinela kusuhi na n’wina. Hlambani mandla ya n’wina, n’wina vadyohi, mi basisa timbilu ta n’wina, n’wina vanhu va miehleketo mimbirhi.” Ku fana ni masalela ya vatotiwa lama rhangelaka, lava nga ni ntshembo wa ku va va ntshungu lowukulu wa vaponi va Armagedoni va fanele va tiyimisela. Loko u ri ni ntshembo wo pona, u fanele u nwa swinene eRitweni ra Yehova leri basisaka naswona u tirhisa mimpimanyeto yakwe leyo lulama evuton’wini bya wena. U fanele u tiyimisela loko u nyikela vutomi bya wena eka Yehova, u kombisa leswi hi ku khuvuriwa ematini. Ku vitana ka wena Yehova hi ripfumelo nakambe swi katsa ku nyikela vumbhoni hi yena. Xisweswo, eka Varhoma ndzima 10, ndzimana 9 na 10, Pawulo wa tsala: “Loko u vula hi nomo wa wena leswaku Yesu i Hosi, ni loko u pfumela embilwini ya wena leswaku Xikwembu xi n’wi pfuxile exikarhi ka vafi, u ta ponisiwa. Hikuva munhu ú pfumela hi mbilu, kutani sweswo swi n’wi endla a va la lulameke; ú vula hi nomo, kutani sweswo swi n’wi endla a va la ponisiwaka.” Kutani, eka ndzimana 13, muapostola u tshaha vuprofeta bya Yuwele, a kandziyisa leswaku “un’wana ni un’wana la khongelaka vito ra [Yehova, NW], ú ta ponisiwa.”
‘Lavani, Lavani, Lavani’
8. (a) Hi ku ya hi muprofeta Sofoniya, i yini lexi Yehova a xi lavaka leswaku hi ta kota ku pona? (b) Rito leri nge “kumbe” eka Sofonia 2:3, ri hi tsundzuxa yini?
8 Loko hi pfula ebukwini ya Bibele ya Sofonia ndzima 2, ndzimana 2 na 3, hi hlaya hi leswi Yehova a swi lavaka, leswaku hi ta pona: “Ku nga si ta siku lero kukotisa mungu lo’wu hahisiwaka v̌ukari bya ku pfura ka Yehova byi nga si ta e ka ṅwina hi siku ra v̌ukari bya Yehova. Lav̌ani Yehova, ṅwina v̌atiṭongahati hikwav̌o v̌a tiko, la’v̌a endlaka hi ku lerisa ka yena, lav̌ani ku lulama, mi lav̌a ku tiṭongahata; kumbe mi ta tifihla e sikwini ra v̌ukari bya Yehova.” Xiya rito “kumbe.” A hi mhaka ya leswaku loko u kala u ponisiwa, u poniseriwe makumu. Ku tifihla ka hina esikwini rero ku titshega hi ku ya emahlweni hi endla swilo sweswo swinharhu. Hi fanele hi lava Yehova, hi lava ku lulama naswona hi lava ni vutitsongahati.
9. Xana lava lavaka vutitsongahati va hakeriwa njhani?
9 I yinene hakunene, hakelo ya ku lava vutitsongahati! Eka Psalma 37, tindzimana 9 ku ya eka 11, ha hlaya: “La’v̌a ṭhembaka Yehova v̌a ta fuma misav̌a. Ku sele nkarinyana, kutani lo’wo biha a nga ka a nga ha v̌i kona . . . V̌a musa v̌a ta fuma misav̌a, v̌a tiṭakela eku ruleni lo’kukulu ka v̌ona.” Kutani ku vuriwa yini hi ku lava ku lulama? Ndzimana 29 yi ri: “La’v̌o lulama v̌a ta fuma misav̌a, v̌a ta ṭhama ka yona hi masiku.” Mayelana ni ku lava Yehova, tindzimana 39 na 40 ta hi byela: “Ku hlayiseka ka la’v̌o lulama ku huma ka Yehova; i khokholo ra v̌ona e nkarini wa mahlomulo. Yehova o v̌a pfuna, o v̌a kuṭula; o v̌a kuṭula e ka la’v̌o biha, o v̌a hlayisa, hikuv̌a v̌a tšhav̌erile ka yena.”
10. I vamani lava xiyekaka hi ku ala ka vona ku lava Yehova ni ku lava vutitsongahati?
10 Mimpambukwa ya Vujagana yi tsandzekile ku lava Yehova. Vafundhisi va yona va ale vito ra yena ro hlawuleka, va ri susile eku hundzuluxeleni ka vona ka Tibibele swi nga ri enawini. Va rhandza ku gandzela Hosi kumbe Xikwembu lexi nga hava vito ni ku xixima Vunharhu-un’we bya vuhedeni. Tlhandla-kambirhi, Vujagana a byi lavi ku lulama. Vunyingi bya vaseketeri va byona va hlawula kumbe ku seketela mahanyelo ya ku tilawula. Ematshan’wini yo lava vutitsongahati hi laha Yesu a endleke ha kona, hi xikombiso va tivonakarisa eka thelevhixini, hi mahanyelo ya manyunyu, hakanyingi layo biha. Vafundhisi va tikhorisa hi mali ya mintlhambi ya vona. Ku ya hi marito ya Yakobo 5:5, va “hanyile emafurheni [va] ri karhi [va] tiphina.” Tanihi leswi siku ra Yehova ri tshinelaka, va ta kuma leswaku marito lama huhuteriweke ma tirha eka vona hakunene: “Rifuwo a ri pfuni ntšhumu e sikwini ra v̌ukari.”—Swivuriso 11:4.
11. I mani munhu wo homboloka, naswona u byarhe nandzu lowukulu wa ngati hi ndlela yihi?
11 Eka lembe xidzana ro sungula C.E., hi laha muapostola Pawulo a vulaka ha kona eka papila ra yena ra vumbirhi leri yaka eka Vatesalonika, Vakriste van’wana va sungule ku nyanyuka, va ehleketa leswaku siku ra Yehova a ri ri ehenhla ka vona hi nkarhi wolowo. Kambe Pawulo u va tsundzuxe leswaku vugwinehi lebyikulu a byi fanele byi rhanga byi humelela, naswona “munhu lowo homboloka” a a fanele a paluxiwa. (2 Vatesalonika 2:1-3) Sweswi, eka lembe xidzana leri ra vu-20 hi nga twisisa xiphemu lexikulu xa vugwinehi byebyo ni ndlela leyi vafundhisi va Vujagana va hombolokeke ha yona emahlweni ka Xikwembu. Emasikwini lawa ya makumu ku sukela hi 1914, vafundhisi va byarile nandzu lowukulu wa ngati hi ku seketela ku ‘fula swikomu swi va matlhari.’ (Yoel 3:10) Nakambe va ye emahlweni va dyondzisa tidyondzo ta mavunwa, to tanihi ku pona ka moya-xiviri wa munhu endzhaku ka rifu, pagatori, ku xanisiwa endzilweni wa tihele, ku khuvuriwa ka tincece, Vunharhu-un’we ni tin’wana. Va ta yima kwihi loko Yehova a tisa ku avanyisa kakwe? Swivuriso 19:5 yi ri: “Ni l’a vulaka mav̌unwa a nga ka a nga poni.”
12. (a) I yini vanhu lava nga “matilo” ni “misava” lava nga ta herisiwa ku nga ri khale? (b) Hi dyondza yini eka ndzoviso lowu taka wa misava leyi yo biha?
12 Eka 2 Petro 3:10, ha hlaya: “Siku ra [Yehova, NW] ri ta ta tanihi khamba, kutani matilo ma ta hundza hi huwa leyikulu; hinkwaswo swa ntumbuluko swi ta tshwa hi ndzilo swi hela, kutani misava ni mintirho leyi nga ka yona swi ta hisiwa.” Vulawuri bya manyala lebyi nga funengeta vanhu tanihi matilo ehenhla ka vanhu, xikan’we ni swilo hinkwaswo leswi vumbaka vanhu va namuntlha lava hombolokeke byi ta kukuriwa emisaveni ya Xikwembu. Vamaki ni vaxavisi va matlhari yo dlaya, vadyeleri, vakanganyisi va vukhongeri ni vafundhisi va byona, vahlohloteri va vubihi, madzolonga ni vugevenga—hinkwavo lava va ta nyamalala. Va ta n’okisiwa hi vukari bya Yehova. Kambe eka tindzimana 11 na 12, Petro u engetela xitsundzuxo lexi eka Vakriste: “Leswi ku nga ta tshwa swilo leswi hinkwaswo swi hela hi ndlela leyi, mi fanele ku va ni vutomi lebyo hlawuleka bya [ku tinyiketela eka Xikwembu, NW], mi ri karhi mi langutela siku ra [Yehova, NW].”
Mikayele U Teka Goza!
13, 14. I mani Mulweri lonkulu wa vuhosi bya Yehova, naswona u tirhise ku yini ku sukela hi 1914?
13 Xana munhu a nga pona njhani “enkarhini wa maxangu” wa Yehova? Muyimeri wa Xikwembu la nga ta ponisa i ntsumi leyikulu Mikayele, loyi vito ra yena ri vulaka leswaku “I Mani La Fanaka Ni Xikwembu?” Kutani, hi laha ku fanelaka hi yena Loyi a lwelaka vuhosi bya Yehova, a seketela Yehova tanihi Xikwembu xi ri xoxe xa ntiyiso ni Hosi Leyikulu, leyi lulameke ya vuako hinkwabyo.
14 Mawaku swiendlakalo leswi xiyekaka swonghasi leswi Nhlavutelo ndzima 12, tindzimana 7 ku ya eka 17 yi swi hlamuselaka malunghana ni “siku ra Hosi” ku sukela hi 1914! (Nhlavutelo 1:10) Ntsumi leyikulu Mikayele yi cukumeta Sathana muxengi, a huma etilweni a ta ehansi emisaveni. Endzhakunyana, hi laha swi hlamuseriweke ha kona eka Nhlavutelo ndzima 19, tindzimana 11 ku ya eka 16, loyi a vuriwaka “Mutshembeki ni Ntiyiso” ‘u . . . kandziyela xikamelo xa vhinya ya vukari lebyo chavisa bya Xikwembu lexi nga ni matimba hinkwawo.’ Nhenha leyi ya matimba ya le tilweni yi vuriwa “Mufumi wa vafumi, ni Hosi ya tihosi.” Eku heteleleni, Nhlavutelo ndzima 20, tindzimana 1 na 2, yi vulavula hi ta ntsumi leyikulu leyi hoxaka Sathana ekheleni ivi yi n’wi pfalela kwalaho malembe ya gidi. Swi le rivaleni leswaku matsalwa lawa hinkwawo ma vulavula hi Mulweri un’we ntsena wa vuhosi bya Yehova, Hosi Yesu Kriste, loyi Yehova a n’wi vekeke exiluvelweni xa le tilweni lexi vangamaka hi 1914.
15. Xana Mikayele u ta “yima” hi ndlela yihi yo hlawuleka?
15 Hi laha swi vuriweke ha kona eka Daniel 12:1, Mikayele a a ‘yimele,’ vanhu va Yehova ku sukela loko a vekiwe tanihi Hosi hi 1914. Kambe hi ku hatlisa Mikayele u ta “yima” hi ndlela leyi hlawulekeke ngopfu—tanihi Muyimeri wa Yehova eku suseni ka vubihi hinkwabyo emisaveni, naswona tanihi Mukutsuri wa vandla ra misava hinkwayo ra vanhu va Xikwembu. Ndlela leyi “nkarhi wa maxangu” wu nga ta va wukulu ha yona yi kombisiwa hi marito ya Yesu eka Matewu 24:21, 22: “Nhlomulo wu ta va lowukulu enkarhini wolowo; nhlomulo lowo tano a wu si va kona hi mpfhuka misava yi tumbulukile ku fikela namuntlha, naswona a wu nga ha vi kona ni siku ni rin’we. Loko masiku walawo a ma nga hungutiwanga, a ku nga ta pona munhu, kambe hikwalaho ka vahlawuriwa va Xikwembu, masiku ya kona ma ta hungutiwa.”
16. I nyama yihi leyi nga ta ponisiwa enkarhini wa nhlomulo lowukulu?
16 Vona ndlela leyi hi faneleke hi tsaka ha yona hikwalaho ka leswi nyama yin’wana yi nga ta pona enkarhini wolowo! E-e, ku nga ri lava fanaka ni Vayuda lava xandzukeke lava khomiweke eYerusalema hi 70 C.E., lava van’wana va vona va tekiweke va va mahlonga eRhoma. Ematshan’wini ya sweswo, lava nga ta pona “enkarini wa makumu” tanihi bandlha ra Vukriste leri se a ri balekile eYerusalema loko ku rhendzela ka makumu ku sungula. Va ta va vanhu va Xikwembu, timiliyoni ta ntshungu lowukulu kun’we ni vatotiwa van’wana lava nga ha vaka va sele emisaveni. (Daniel 12:4) Ntshungu lowukulu ‘wu huma enhlomulweni lowukulu.’ Ha yini? Hikuva “va hlantswile tinguvu ta vona, va ti basisile hi ngati ya Xinyimpfana.” Va kombisa ripfumelo ematimbeni lama kutsulaka ya ngati ya Yesu leyi halatiweke, naswona va kombisa ripfumelo rero hi ku tirhela Xikwembu hi ku tshembeka. Ni sweswi, Yehova, “loyi a tshameke exiluvelweni,” u va sirhelela hi tende rakwe, loko Xinyimpfana, Kriste Yesu, xi va risa ni ku va yisa eswihlobyeni swa mati ya vutomi.—Nhlavutelo 7:14, 15.
17. Xana ntshungu lowukulu wu khutaziwa njhani leswaku wu hanya hi ndlela leyi nga ta endla leswaku wu fihliwa esikwini leri taka ra maxangu?
17 Loko ti lava Yehova, ku lulama ni vutitsongahati, timiliyoni ta ntshungu lowukulu a ti fanelanga ti pfumelela rirhandzu ra tona lero sungula ra ntiyiso ri titimela! Loko u ri wun’wana wa lava fanaka ni tinyimpfu, u fanele u endla yini? Hi laha swi vuriweke ha kona eka Vakolosa ndzima 3, tindzimana 5 ku ya ka 14, u fanele u ‘hluvula vumunhu bya khale ni mitirho ya byona.’ Loko u lava mpfuno wa Xikwembu, lwela ku ‘ambala vumunhu lebyintshwa, lebyi seketeriweke eka vutivi lebyi kongomeke.’ Eka vutitsongahati, aka u tlhela u hlayisa ku hiseka eku dzuniseni Yehova ni le ku tiviseni ka swikongomelo swa yena leswinene eka van’wana. Xisweswo, u ta ponisiwa ‘enkarhini wa maxangu,’ hi siku ra “ku pfurha ka vukari bya Yehova.”
18, 19. Xana ku tiyisela i ko hlawuleka hi ndlela yihi leswaku munhu a pona?
18 Siku rero ri le kusuhi! Ri ta eka hina hi xihatla. Ku hlengeletiwa ka vanhu va ntshungu lowukulu a ku ri karhi ku ya emahlweni sweswi ku ringana malembe ya 57. Vunyingi bya vanhu lava va file naswona va rindzele ku pfuxiwa. Kambe ha tiyisekisiwa hi vuprofeta bya Nhlavutelo leswaku tanihi ntlawa, ntshungu lowukulu wu ta pona nhlomulo lowukulu tanihi vanhu va vandla ra “misava leyintshwa.” (Nhlavutelo 21:1) Xana u ta va kona kwalaho? Swa koteka sweswo, hikuva Yesu eka Matewu 24:13 u ri: “Loyi a tiyiselaka ku fika makumu, hi yena loyi a nga ta ponisiwa.”
19 Ntshikilelo lowu vanhu va Yehova va wu tokotaka eka mafambiselo lawa ya khale wu nga ha engeteleka. Naswona loko nhlomulo lowukulu wa maxangu wu sungula, u nga ha nonon’hweriwa. Kambe namarhela Yehova ni nhlengeletano ya yena. Tshama u xalamukile! “Nḍi languteleni, ku v̌ula Yehova, e sikwini rero nḍi nga ta yima ha rona e ku phanga, hikuv̌a nḍi kanerile ku hlengeleta matiko ni ku hlanganisa ku fuma, nḍi ta tšhela henhla ka wona e v̌ukari bya mina, ni ku pfura hikwaku ka v̌ukari bya mina; hikuv̌a misav̌a hikwayo yi ta hisiwa hi nḍilo wa rilonḍo ra mina.”—Sofonia 3:8.
20. Tanihi leswi ‘nkarhi wa maxangu’ wo hetelela wu tshinelaka hi ku hatlisa, hi fanele hi endla yini?
20 Leswaku a hi sirhelela ni ku hi khutaza, Yehova hi ku swi rhandza u nyike vanhu va yena “ririmi leri tengeke,” leri katsaka rungula lerinene ra Mfumo wa yena lowu taka, “leswaku hinkwavo va ta vitana vito ra Yehova, va n’wi tirhela hi vun’we.” (Sofonia 3:9, NW) Tanihi leswi ‘nkarhi wa maxangu’ wo hetelela wu tshinelaka hi ku hatlisa, onge hi nga tirha hi ku chivirika, hi pfuna vatitsongahati van’wana leswaku va ‘vitana vito ra Yehova’ leswaku va ta pona.
Wa Tsundzuka Xana?
◻ Hi xihi xiendlakalo xa Yehova lexi nga ta humelela loko ku rhula ku nga si ta emisaveni?
◻ Hi ku ya hi Yuwele, munhu u fanele a endla yini leswaku a ta ponisiwa?
◻ Hi ku ya hi Sofoniya, xana vatitsongahati va nga wu kuma njhani nsirhelelo evukarhini bya Yehova lebyi pfurhaka?
◻ I mani “munhu wo homboloka,” naswona u wu byarhe njhani nandzu wa ngati?
◻ Ku tiyisela i ka nkoka hi ndlela yihi emhakeni ya ku pona?