Vula eRivaleni Leswaku U Ponisiwa
“Un’wana ni un’wana loyi a vitanaka vito ra Yehovha u ta ponisiwa.”—VARHOMA 10:13, NW.
1. Ematin’wini hinkwawo, hi swihi switsundzuxo leswi twarisiweke?
MATIMU ma hlamusela ‘masiku ya Yehovha’ yo hlayanyana. Ndhambi ya siku ra Nowa, ku lovisiwa ka Sodoma na Gomora ni ku lovisiwa ka Yerusalema hi 607 B.C.E. na hi 70 C.E. a ma ri masiku ya Yehovha lamakulu ni lama chavisaka. A ma ri masiku ya ku avanyisa lava xandzukeleke Yehovha. (Malakiya 4:5; Luka 21:22) Emasikwini wolawo, vo tala va lovisiwile hikwalaho ka vuhomboloki bya vona. Kambe van’wana va ponile. Yehovha u endle leswaku ku twarisiwa switsundzuxo, a lemukisa vanhu lavo homboloka hi ta khombo leri taka, a nyika vanhu va timbilu letinene nkarhi wo kota ku ponisiwa.
2, 3. (a) Hi xihi xitsundzuxo xa vuprofeta lexi tshahiweke hi Pentekosta? (b) Ku sukela hi Pentekosta ya 33 C.E., i yini leswi a swi laveka eku vitaneni ka vito ra Yehovha?
2 Ku lovisiwa ka Yerusalema hi 70 C.E. i xikombiso xo hlawuleka xa mhaka leyi. Loko a vhumbha xiendlakalo xexo ka ha sele malembe ya kwalomu ka 900, muprofeta Yuwele u tsarile a ku: “Nḍi ta endla masingita e tilweni ni le misav̌eni, ngati ni nḍilo, ni hunguv̌a ya musi. Dyambu ri ta hunḍuka munyama, ni ṅhweti yi hunḍuka ngati, ku nga si ta siku le’rikulu, le’ri tšhav̌isaka ra Hosi.” Xana munhu a nga wu ponisa ku yini nkarhi wo chavisa swonghasi? Yuwele u tsarile hi ku huhuteriwa a ku: “Uṅwana ni uṅwana l’a khongelaka v̌ito ra Yehova o ta pona; hikuv̌a e nṭhav̌eni ya Sion, ni le Yerusalem, ku pona ku ta v̌a kona, hi laha Yehova a v̌uleke ha kona, šikari ka la’v̌a nga ta sala, v̌aṅwana hi la’v̌a nga ta v̌itiwa i Yehova.”—Yuwele 2:30-32.
3 Hi Pentekosta ya 33 C.E., muapostola Petro u vulavule ni ntshungu wa Vayuda ni vaproselita le Yerusalema, a tshaha vuprofeta bya Yuwele, a kombisa leswaku vayingiseri va yena va nga langutela ku hetiseka ka byona esikwini ra vona, a ku: “Ndzi ta endla swihlamariso ehenhla tilweni, ni mahlori ehansi misaveni: Ngati, ni ndzilo, ni papa ra musi. Dyambu ri ta hundzuka munyama, ni n’weti wu ta tshwuka kukota ngati, siku lerikulu ro vangama ra Hosi ri nga si fika. Kutani un’wana ni un’wana loyi a nga ta huwelela eka Hosi, ú ta ponisiwa.” (Mintirho 2:16-21) Mintshungu leyi a yi yingisele Petro hinkwayo ka yona a yi ri ehansi ka Nawu wa Muxe, kutani a yi ri tiva vito ra Yehovha. Petro u hlamusele leswaku, ku sukela enkarhini wolowo ku ya emahlweni, ku vitana vito ra Yehovha a swi ta katsa leswi engetelekeke. Ngopfu-ngopfu leswi a swi katsa ku khuvuriwa hi vito ra Yesu, loyi a dlayiweke ivi endzhaku a pfuxeriwa evuton’wini bya ku pfumala ku fa etilweni.—Mintirho 2:37, 38.
4. Hi rihi rungula leri Vakreste va ri twariseke hinkwako-nkwako?
4 Ku sukela hi Pentekosta ku ya emahlweni, Vakreste va hangalase rito malunghana na Yesu la pfuxiweke. (1 Vakorinto 1:23) Va twarise leswaku vanhu va nga amukeriwa va va vana va moya va Yehovha Xikwembu kutani va va xiphemu xa “Israel wa Šikwembu” lontshwa, ku nga tiko ra moya leri a ri ta ‘twarisa vukulukumba bya Yehovha hinkwako-nkwako.’ (Vagalatiya 6:16, BX; 1 Petro 2:9) Lava va tshameke va tshembekile ku fikela eku feni a va ta kuma ndzhaka ya ku hanya va nga fi etilweni va va vadyandzhaka swin’we na Yesu eMfun’weni wa yena wa le tilweni. (Matewu 24:13; Varhoma 8:15, 16; 1 Vakorinto 15:50-54) Ku tlula kwalaho, Vakreste lava a va fanele va twarisa ku ta ka siku lerikulu ni leri chavisaka ra Yehovha. A va fanele va lemukisa Vayuda leswaku a va ta weriwa hi nhlomulo lowu tlulaka hinkwayo leyi tshameke yi wela Yerusalema ni lava va tivulaka vanhu va Xikwembu ku fikela enkarhini wolowo. Hambiswiritano, a ku ta va ni lava nga ta pona. I vamani ke? Hi lava va nga ta va va vitane vito ra Yehovha.
“Emasikwini Ya Makumu”
5. I vuprofeta byihi lebyi hetisekeke namuntlha?
5 Hi tindlela to tala, swiyimo swa nkarhi wolowo a swi fanekisela leswi hi swi vonaka namuntlha. Ku sukela hi 1914, vanhu a va hanya enkarhini wo hlawuleka lowu Bibele yi wu vulaka ‘nkarhi wa makumu,’ “ku hela ka [minkarhi]” ni ‘masiku ya makumu.’ (Daniyele 12:1, 4; Matewu 24:3-8; 2 Timotiya 3:1-5, 13) Eka lembe-xidzana ra hina, tinyimpi ta nsele, madzolonga lama nga lawulekiki ni ku hlaseriwa ka vanhu ni mbango swi hetisise vuprofeta bya Bibele hi ndlela leyi xiyekaka. Leswi hinkwaswo i xiphemu xa xikombiso lexi profetiweke hi Yesu, a kombisa leswaku vanhu va le kusuhi ni ku vona siku ra Yehovha ro hetelela, leri chavisaka. Rona ri ta chaputiwa hi nyimpi ya Armagedoni, ku nga makumu ya ‘nhlomulo lowukulu lowu nga si vaka kona hi mpfhuka misava yi tumbulukile ku fikela namuntlha, lowu nga ta ka wu nga ha vi kona ni siku ni rin’we.’—Matewu 24:21; Nhlavutelo 16:16.
6. (a) Yehovha a a endlisa ku yini leswaku a ponisa vanhu lava titsongahataka? (b) Hi xi kuma kwihi xitsundzuxo xa Pawulo xa ndlela yo pona?
6 Leswi siku ra ndzoviso ri tshinelaka, Yehovha u endla malunghiselelo yo ponisa vanhu lava titsongahataka. ‘Enkarhini lowu wa makumu,’ u hlengelete masalela ya Israyele wa Xikwembu wa moya, ivi ku sukela hi va-1930 ku ya emahlweni a hundzuluxa mianakanyo ya malandza yakwe ya laha misaveni yi va eku hlengeleteni ka “ntshungu lowukulu wa vanhu; [lava ku nga riki] na un’we la kotaka ku va hlaya. [Va] huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Tanihi ntlawa, lava va ‘pona nhlomulo lowukulu.’ (Nhlavutelo 7:9, 14) Kambe xana munhu un’wana ni un’wana a nga tiyiseka njhani leswaku u ta ponisiwa? Muapostola Pawulo u hlamula xivutiso xexo. Eka Varhoma ndzima 10, u nyika ndzayo leyinene ya ku pona—ndzayo leyi tirheke esikwini ra yena ni leyi tirhaka nakambe esikwini ra hina.
Xikhongelo Xa Ku Ponisiwa
7. (a) I ntshembo wihi lowu hlamuseriwaka eka Varhoma 10:1, 2? (b) Ha yini Yehovha sweswi a endla leswaku ku twarisiwa “Evhangeli” hilaha ku engetelekeke?
7 Loko Pawulo a tsala buku ya Varhoma, Yehovha ana se a fularhele tiko ra Israyele. Kambe muapostola u tiyisekisile a ku: “Ku navela ka mbilu ya mina ni xikhongelo lexi ndzi va khongelelaka ha xona eka Xikwembu, hileswaku va ponisiwa.” A a navela leswaku Muyuda un’wana ni un’wana a kuma vutivi lebyi kongomeke hi ku rhandza ka Xikwembu, leswi a swi ta endla leswaku va ponisiwa. (Varhoma 10:1, 2) Ku tlula kwalaho, Yehovha a a navela leswaku ku ponisiwa vanhu va misava hinkwayo lava kombisaka ripfumelo, hilaha swi kombisiwaka hakona eka Yohane 3:16 leyi nge: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” Gandzelo ra nkutsulo ra Yesu ri pfule ndlela ya ku ponisiwa koloko lokukulu. Ku fana ni le sikwini ra Nowa ni le masikwini man’wana ya vuavanyisi lama landzeleke, Yehovha u endla leswaku ku twarisiwa “Evhangeli” leyi kombisaka ndlela ya ku pona.—Marka 13:10, 19, 20.
8. Hi ku tekelela xikombiso xa Pawulo, xana Vakreste va ntiyiso va navelela vamani leswinene namuntlha, naswona hi ndlela yihi?
8 Leswaku a kombisa ku navelela Muyuda ni wa Matiko leswinene, Pawulo u chumayele nkarhi wihi ni wihi lowu a wu kumeke. A a “khorwisa Vayuda ni Vagriki.” U byele vakulu va le Efesa a ku: “A ndzi mi fihlelanga nchumu xa leswi swi fanelaka ku mi pfuna, ndzi ri karhi ndzi mi tivisa Rito ni ku mi dyondzisa erivaleni ni le mindyangwini ya n’wina. Ndzi tsundzuxile swinene Vayuda ni Vagriki ku hundzukela eka Xikwembu ni ku pfumela eka Hosi ya hina Yesu.” (Mintirho 18:4; 20:20, 21) Hi ndlela leyi fanaka, Timbhoni ta Yehovha namuntlha ta tikarhata eku chumayeleni, ku nga ri eka lava tivulaka Vakreste ntsena, kambe eka vanhu hinkwavo, hambi ku ri “ku ya fika emakun’wini ya misava.”—Mintirho 1:8; 18:5.
Ku Vula “Rito Ra Ku Pfumela”
9. (a) Varhoma 10:8, 9 yi khutaza ku va ni ripfumelo ra muxaka muni? (b) Ripfumelo ra hina hi fanele hi ri phofula rini, naswona hi ndlela yihi?
9 Ripfumelo leri khomelelaka ra laveka leswaku u ponisiwa. Loko a tshaha Deteronoma 30:14, Pawulo u te: “‘Rito ri le kusuhi na wena, ri le non’wini wa wena ni le mbilwini ya wena.’ Hi rona rito ra ku pfumela leri hi ri twarisaka.” (Varhoma 10:8) Loko hi chumayela “rito [rero] ra ku pfumela,” ri ya ri dzika swinene etimbilwini ta hina. A swi ri tano hi Pawulo, naswona marito yakwe lama landzelaka ma nga tiyisa ku tiyimisela ka hina ku fana na yena eku aveleni van’wana ku pfumela koloko: “Loko u vula hi nomo wa wena leswaku Yesu i Hosi, ni loko u pfumela embilwini ya wena leswaku Xikwembu xi n’wi pfuxile exikarhi ka vafi, u ta ponisiwa.” (Varhoma 10:9) Ku tiphofula koloko a ku endliwi emahlweni ka van’wana hi nkarhi wa ku khuvuriwa ntsena, kambe ku fanele ku va ku tiphofula loku hambetaka, vumbhoni bya le rivaleni lebyi nyikeriwaka hi ku gingiriteka malunghana ni swilo hinkwaswo swo hlawuleka leswi fambelanaka ni ntiyiso. Ntiyiso wo tano wu kandziyisa vito leri nga ni ntikelo ra Yehovha, Hosi ya Hinkwako-nkwako; wu kandziyisa Hosi ya Vumesiya ni Mukutsuri wa hina, Hosi Yesu Kreste; naswona yi kandziyisa ni switshembiso swa Mfumo leswi hlamarisaka.
10. Ku pfumelelana na Varhoma 10:10, 11, hi fanele hi ri tamela njhani “rito [leri] ra ku pfumela”?
10 Hinkwavo lava nga amukeliki ni ku tirhisa “rito [leri] ra ku pfumela” a va nge ponisiwi, hilaha muapostola a yaka emahlweni hakona a ku: “Munhu ú pfumela hi mbilu, kutani sweswo swi n’wi endla a va la lulameke; ú vula hi nomo, kutani sweswo swi n’wi endla a va la ponisiwaka. Tsalwa ri te: ‘Un’wana ni un’wana la pfumelaka ka yena, a nga ka a nga khomiwi hi tingana.’” (Varhoma 10:10, 11) Hi fanele hi kuma vutivi lebyi kongomeke bya “rito [leri] ra ku pfumela,” kutani hi hambeta hi ri nghenisa etimbilwini ta hina leswaku hi ta susumeteriwa ku ri byela van’wana. Yesu hi byakwe wa hi tsundzuxa: “Loyi a nga ni tingana hikwalaho ka mina ni marito ya mina erixakeni leri ra lava sandzaka Xikwembu ni ra vadyohi, N’wana-wa-Munhu na yena ú ta khomiwa hi tingana hikwalaho ka munhu loyi siku a nga ta vuya eku kwetsimeni ka Tata wa yena, a ri ni tintsumi leto hlawuleka.”—Marka 8:38.
11. Mahungu lamanene ma fanele ma twarisiwa ku ya fika kwihi, naswona ha yini?
11 Hilaha swi vhumbiweke hakona hi muprofeta Daniyele, enkarhini lowu wa makumu, “la’v̌o tlhariha” va voniwa va vangama “kukotisa ku v̌angama ka le matilweni,” loko ku nyikeriwa ka vumbhoni hi Mfumo ku andza ku ya fika emakun’wini ya misava. Va “[tisa] la’v̌o tala e ku lulameni,” naswona vutivi bya ntiyiso byi andzile hakunene, hikuva Yehovha u tlhava ku vonakala lokukulu swinene eka vuprofeta lebyi khumbaka nkarhi lowu wa makumu. (Daniyele 12:3, 4) Leri hi rona rungula ra ku ponisiwa leri lavekaka leswaku hinkwavo lava rhandzaka ntiyiso ni vululami va ta ponisiwa.
12. Varhoma 10:12 yi hlangana njhani ni xileriso xa ntsumi lexi hlamuseriweke eka Nhlavutelo 14:6?
12 Muapostola Pawulo u ya emahlweni a ku: “A ku na ku hambana exikarhi ka Vayuda ni vamatiko, hikuva hinkwavo va na Hosi yin’we, leyi minkateko ya yona yi talelaka hinkwavo lava khongelaka yona.” (Varhoma 10:12) “Evhangeli” yi fanele yi chumayeriwa hi mpimo lowukulu swinene emisaveni namuntlha—eka vanhu hinkwavo, ku ya fika emakun’wini ya misava. Ntsumi ya Nhlavutelo 14:6 yi hambeta yi haha exikarhi ka tilo, yi hi nyika “Evhangeli leyi nga heriki, leswaku [hi] ta yi twarisa eka lava akeke emisaveni, eka vanhu va matiko hinkwawo, ni va tinxaka hinkwato, ni va tindzimi hinkwato, ni va swivongo hinkwaswo.” Xana leswi swi ta va pfuna njhani lava yi amukelaka?
Ku Vitana Vito Ra Yehovha
13. (a) Hi yihi ndzimana ya hina ya lembe ra 1998? (b) Ha yini ndzimana leyi ya lembe yi ri leyi faneleke swinene namuntlha?
13 Loko a tshaha Yuwele 2:32, Pawulo u ri: “Un’wana ni un’wana loyi a vitanaka vito ra Yehovha u ta ponisiwa.” (Varhoma 10:13) Swa fanela swonghasi leswi ku hlawuriweke marito wolawo leswaku ma va ndzimana ya lembe ra 1998 ya Timbhoni ta Yehovha! Ku ya emahlweni hi titshega hi Yehovha, hi twarisa vito ra yena ni swikongomelo leswi hlamarisaka leswi vito rero ri yimelaka swona, i swa nkoka swinene ku tlula rini na rini! Ku fana ni le ka lembe-xidzana ro sungula, ni le masikwini ya makumu ya mafambiselo ya namuntlha ya swilo lama onhakeke, ku twala mpfumawulo lowukulu wa xirhambo lexi nge: “Hambanani ni rixaka leri ro homboloka leswaku mi ta pona.” (Mintirho 2:40) I xirhambo lexi fanaka ni xa ku chayiwa ka nanga xa leswaku vanhu hinkwavo lava chavaka Xikwembu emisaveni hinkwayo va kombela Yehovha leswaku a va ponisa, a ponisa ni lava va yingisaka mahungu lamanene lawa va ma twarisaka.—1 Timotiya 4:16.
14. Hi fanele hi kombela ku ponisiwa eka Ribye rihi?
14 Ku ta humelela yini loko siku lerikulu ra Yehovha ri fikela misava leyi? Vo tala a va nge languti eka Yehovha leswaku a va ponisa. Vanhu hi ntolovelo va ta “vitana tintshava ni maribye va ku: ‘Hi weleni ehenhla, mi hi funengeta leswaku loyi a tshameke exiluvelweni a ta kala a nga hi voni, ni vukari bya Xinyimpfana byi ta kala byi nga hi fikeli.’” (Nhlavutelo 6:15, 16) Va ta va va tshembe tinhlengeletano ni mintlawa ya mafambiselo lawa ya swilo leyi fanaka ni tintshava. Kambe a swi ta antswa swinene loko a va tshemba Ribye lerikulu eka hinkwawo, ku nga Yehovha Xikwembu! (Deteronoma 32:3, 4) Malunghana na yena, Hosi Davhida u te: “Yehova! ribye ra mina, ni khokholo ra mina, ni mulweri wa mina!” Yehovha i “ribye ra ku hlayiseka ka hina.” (Pisalema 18:2; 95:1) Vito ra yena i “khokholo ro tiya,” leri ri nga rona ntsena “khokholo” leri tiyeke swinene leri nga ta hi sirhelela eka nkitsinkitsi lowu taka. (Swivuriso 18:10) Hikwalaho, i swa nkoka leswaku vo tala hilaha swi nga kotekaka hakona eka vanhu va kwalomu ka tsevu wa magidi ya timiliyoni lava hanyaka namuntlha va dyondzisiwa ku vitana vito ra Yehovha hi ku tshembeka.
15. Varhoma 10:14 yi kombisa yini malunghana ni ripfumelo?
15 Hilaha ku faneleke, muapostola Pawulo u ya emahlweni a vutisa a ku: “Kambe va ta khongerisa ku yini eka loyi va nga pfumelangiki ka yena xana?” (Varhoma 10:14) Ku ni mintshungu leyi nga ha pfuniwaka leswaku yi endla “rito ra ku pfumela” ri va ra yona, leswaku yi kombela Yehovha leswaku a yi ponisa. Ripfumelo ra laveka. Epapileni rin’wana Pawulo u ri: “Ehandle ka ku pfumela a swi endleki ku tsakisa Xikwembu. Un’wana ni un’wana loyi a lavaka ku tshinelela Xikwembu ú fanele ku pfumela leswaku xi kona, ni leswaku xi hakela lava va xi lavaka.” (Vaheveru 11:6) Kutani ke, xana timiliyoni leti engetelekeke ti ta swi kotisa ku yini ku va ni ripfumelo eka Xikwembu? Epapileni leri yaka eka Varhoma, Pawulo wa vutisa: “Va ta pfumerisa ku yini eka loyi va nga twangiki ta yena ke?” (Varhoma 10:14) Xana Yehovha u va pfulela ndlela ya ku twa? Wa va pfulela hakunene! Yingisa marito ya Pawulo lama landzelaka lama nge: “Va ta ti twisa ku yini, loko va nga ri na mudyondzisi xana?”
16. Elunghiselelweni ra Xikwembu, ha yini ku laveka vachumayeri?
16 Hi ku ya hi nhlamuselo ya Pawulo, swi le rivaleni swinene leswaku ku laveka vachumayeri. Yesu u kombise leswaku leswi a swi ta va tano, “ku ko ku hela misava.” (Matewu 24:14; 28:18-20) Ku chumayela i xiphemu xa nkoka xa lunghiselelo ra Xikwembu ro pfuna vanhu leswaku va vitana vito ra Yehovha leswaku va ta ponisiwa. Hambi ku ri eVujaganini vo tala a va tikarhati hi ku dzunisa vito ra Xikwembu leri nga ni ntikelo. Vo tala va endle leswaku Yehovha a hlanganisiwa ni swihlawulekisi swin’wana swimbirhi edyondzweni leyi nga hlamuselekiki ya Vunharhu-un’we. Nakambe, vo tala va wela eka ntlawa lowu ku vulavuriwaka ha wona eka Pisalema 14:1 na 53:1: “Šihunguki ši te e mbilwini ya šona: a ku na Šikwembu!” Va fanele va swi tiva leswaku Yehovha i Xikwembu lexi hanyaka, naswona va fanele va twisisa hinkwaswo leswi vito ra yena ri yimelaka swona, leswaku va ponisiwa enhlomulweni lowukulu lowu tshinelaka.
‘Milenge Yo Saseka’ Ya Vachumayeri
17. (a) Ha yini swi fanerile ku va Pawulo a tshaha vuprofeta byo kondletela? (b) Ku katseka yini emhakeni ya ku va ni ‘milenge yo saseka’?
17 Muapostola Pawulo u ni xivutiso xin’wana xa nkoka lexi nge: “Kutani va ta chumayerisa ku yini loko va nga rhumiwanga. Hilaha ku tsariweke hakona: ‘Yi sasekile swonghasi milenge ya lava va twarisaka mahungu lamanene ya swilo leswinene!’” (Varhoma 10:15, NW) Laha Pawulo u tshaha Esaya 52:7, leyi yi nga xiphemu xa vuprofeta bya ku kondletela lebyi a byi tirha ku sukela hi 1919. Namuntlha, Yehovha nakambe u rhumela munhu “loyi a tisaka timhaka to nanḍiha, l’a v̌ulav̌ulaka ŝo rula, . . . loyi a tisaka timhaka le’ti ṭakisaka, loyi a v̌ulaka ŝa v̌utomi.” Hi ku yingisa, “tinhlori” ta Xikwembu leti totiweke kun’we ni vanakulobye ti hambeta ti huwelela hi ku tsaka. (Esaya 52:7, 8) Milenge ya lava va twarisaka ta ku ponisiwa namuntlha yi nga karhala, hambi ku ri ku va ni ritshuri, loko va ri karhi va famba hi yindlu ni yindlu, kambe tinghohe ta vona ta vangama swonghasi hi ntsako! Va swi tiva leswaku va rhumiwe hi Yehovha leswaku va twarisa mahungu lamanene ya ku rhula ni ku chavelela lava rilaka, va va pfuna ku vitana vito ra Yehovha leswaku va ponisiwa.
18. Varhoma 10:16-18 yi ri yini malunghana ni vuyelo byo hetelela byo twarisa mahungu lamanene?
18 Hambi vanhu va ‘swi pfumela leswi va swi tweke’ kumbe va hlawula ku ka va nga swi yingisi, marito ya Pawulo lama landzelaka i ntiyiso: “Xana va nga va va nga ri twanga ke? Hakunene va ri twile, hikuva: ‘Ku dyondzisa ka vona ku twakele emisaveni hinkwayo, ni marito ya vona ma fikile emakun’wini ya misava.’” (Varhoma 10:16-18) Tanihi leswi “matilo ma [vulaka] ku kwetsima ka Šikwembu,” hilaha swi kombisiweke hakona emintirhweni ya xona ya ku vumba, kutani Timbhoni ta xona emisaveni ti fanele ti twarisa “lembe le’rinene ra Yehova, ni siku ra ku tirihisela ka Šikwembu ša hina . . . e ku tšhav̌elela hikwav̌o la’va v̌av̌isekaka.”—Pisalema 19:1-4; Esaya 61:2.
19. Ku ta humelela yini hi lava “vitanaka vito ra Yehovha” namuntlha?
19 Siku lerikulu ni leri chavisaka ra Yehovha ri tshinela swinene. “Siku ra Yehova ri ṭhinele, ra ta kukota šira ša Lo-wa-matimba-hikwawo.” (Yuwele 1:15; 2:31) Hi khongelela leswaku mintshungu leyi engetelekeke yi amukela mahungu lamanene hi xihatla, yi khitikanela enhlengeletanweni ya Yehovha. (Esaya 60:8; Habakuku 2:3) Tsundzuka leswaku masiku laman’wana ya Yehovha ma lovise lavo homboloka—esikwini ra Nowa, esikwini ra Lota ni le masikwini ya Israyele na Yuda la gwineheke. Sweswi hi le kusuhi swinene ni nhlomulo lowukulu eka hinkwayo, laha xidzedze xa Yehovha xi nga ta herisa vuhomboloki emisaveni leyi, xi lunghiselela paradeyisi leyi nga ta va ni ku rhula hi masiku. Xana u ta va munhu loyi a “vitanaka vito ra Yehovha” hi ku tshembeka? Lokoswiritano, tsaka! Xikwembu xi tshembisa leswaku u ta ponisiwa.—Varhoma 10:13.
A Wu Ta Hlamurisa Ku Yini?
◻ Hi swihi swilo leswintshwa leswi twarisiweke endzhaku ka Pentekosta ya 33 C.E.?
◻ Vakreste va fanele va ri yingisa njhani “rito ra ku pfumela”?
◻ Swi vula yini ku ‘vitana vito ra Yehovha’?
◻ Varhumiwa va Mfumo va ni ‘milenge yo saseka’ hi ndlela yihi?
[Swifaniso leswi nga eka tluka 18]
Vanhu va Xikwembu va twarisa vukulukumba bya xona le Puerto Rico, Senegal, Peru, Papua New Guinea—ina, emisaveni hinkwayo