Tshama U Xalamukile “eNkarhini Wa Makumu”

“Tlharihani mi [tshama mi xalamukile], hikuva a mi tivi leswaku nkarhi wu ta va rini.”—MARKA 13:33.

1. Xana hi fanele hi endlisa ku yini tanihi leswi swiendlakalo leswi nyanyulaka swi humelelaka “e nkarini [lowu] wa makumu”?

TANIHI leswi swiendlakalo leswi nyanyulaka swi humelelaka ‘enkarhini lowu wa makumu,’ xana Vakriste va fanele va endlisa ku yini? (Daniel 12:4) A va siyiwanga emunyameni. Yesu Kriste u vule vuprofeta lebyi nga ni xikombiso lexi hlanganeke lexi hetisekaka eka lembe xidzana leri ra vu-20. U vhumbe swiendlakalo swo tala leswi nga fungha nkarhi lowu wu ri wo hlawuleka ku sukela hi 1914. Tanihi leswi a a tolovelane ni vuprofeta bya Daniyele malunghana ni ‘nkarhi wa makumu,’ Yesu u landzelele vuprofeta bya yena n’wini lebyikulu hi ku khutaza vadyondzisiwa va yena leswaku va ‘tshama va xalamukile.’—Luka 21:36.

2. Ha yini ku ri ni xilaveko lexikulu xo xalamuka hi tlhelo ra moya?

² Ha yini hi fanele hi xalamuka? Hikuva lowu i nkarhi wa khombo swinene ematin’wini ya munhu. Loko Vakriste vo khudzehela hi tlhelo ra moya enkarhini lowu swi nga va khombo. Loko hi lwela ku tienerisa kumbe hi pfumelela timbilu ta hina ti tikeriwa hi ku vilela hi swa vutomi, hi ta va ekhombyeni. Eka Luka 21:34, 35, Yesu Kriste u hi tsundzuxile: “Tivoneleni leswaku timbilu ta n’wina ti nga tikeriwi hi makolo ni ku pyopyiwa, ni ku vilela hi swa vutomi lebyi, na swona tivoneleni leswaku siku rero ri nga mi tshuketi; hikuva, kukotisa xirimbani, ri ta wela hinkwavo lava akeke emisaveni hinkwayo.”

3, 4. (a) Xana Yesu a a vula yini loko a ku siku ra vukari bya Yehova ri ta wela vanhu tanihi “xirimbani”? (b) Tanihi leswi Yehova a nga rhiyiki vanhu hi xirimbana, hikwalaho ka yini siku rero ri ta kuma vanhu vo tala va nga ri langutelanga?

³ Yesu a a ri ni xivangelo lexinene xo vula leswaku siku ra Yehova ri ta hi ‘wela ku kotisa xirimbana.’ Xirimbana xi tala ku endliwa xi va ni nomu naswona xi tirhisiwa ku phasa swinyanyana ni swiharhi. Xirimbana xi ni xikhwexuri, naswona un’wana ni un’wana la fambaka eka xona u khwexula xikhwexuri xexo. Kutani xirimbana xi pfaleka ivi xi phasa muhlaseriwa. Hinkwaswo leswi swi humelela hi xihatla swinene. Yesu u te, hi ndlela leyi fanaka, lava tsaneke emoyeni va ta hlamarisiwa naswona va ta tshuketiwa “e sikwini ra v̌ukari” ra Xikwembu.—Swivuriso 11:4.

⁴ Xana i Yehova Xikwembu loyi a rhiyaka vanhu hi xirimbana? E-e, a nga rindzelanga ku phasa vanhu va nga swi langutelanga leswaku a va herisa. Kambe siku rero ri ta kuma vanhu vo tala hikuva a va na mhaka ngopfu ni Mfumo wa Xikwembu. Va teka tindlela ta vona to hlongorisa swilo swa vutomi, va honisa leswi swiendlakalo leswi va rhendzeleke swi vulaka swona. Hambi swi ri tano, leswi a swi xi hundzuli xiyimiso xa Xikwembu. Xi ni nkarhi wa xona lowu vekiweke wo lulamisa timhaka. Naswona, hi tintswalo a xi tshiki vanhu va nga tivi hi ta ku ta ka ku avanyisa ka xona.—Marka 13:10.

5, 6. (a) Hikwalaho ka ku avanyisa loku taka, hi yihi nyiko ya rirhandzu leyi Mutumbuluxi a yi endleleke swivumbiwa swa vanhu, kambe ku va ni vuyelo byihi lebyi tolovelekeke? (b) Hi swihi leswi swi nga ta kambisisiwa leswaku swi hi pfuna ku tshama hi xalamukile?

⁵ Xitsundzuxo lexi lexi nyikiwaka ka ha ri emahlweni i nyiko ya rirhandzu ya Mutumbuluxi lonkulu, loyi a tsakelaka vuhlayiseki bya swivumbiwa swa yena swa vanhu eka vunavelo bya minkondzo ya yena byo fanekisela. (Esaya 66:1) U tsakela vaaki va ndhawu leyi milenge ya yena ku vuriwaka leswaku yi wisa kona. Hi ku tirhisa vayimeri ni varhumiwa va yena va laha misaveni, u va tsundzuxa hi swiendlakalo leswi taka. (2 Vakorinto 5:20) Hambi swi ri tano, ku nga khathariseki switsundzuxo hinkwaswo leswi nyikeriweke, swiendlakalo sweswo swi ta humelela endyangwini wa vanhu swi nga languteriwanga onge hi loko va phasiwe hi xirimbana. Hikwalaho ka yini? Hikuva vunyingi bya vanhu va etlela hi tlhelo ra moya. (1 Vatesalonika 5:6) I nhlayo yitsongo ntsena leyi yingiselaka xitsundzuxo naswona yi ta ponela emisaveni leyintshwa ya Xikwembu.—Matewu 7:13, 14.

⁶ Kutani ke, hi nga tshamisa ku yini hi xalamukile enkarhini lowu wa makumu leswaku hi hlayeriwa exikarhi ka lava nga ta ponisiwa? Yehova u hi nyika mpfuno lowu lavekaka. A hi dyondzeni swilo swa nkombo leswi hi nga swi endlaka.

Lwisana Ni Ku Hambuka

7. Hi xihi xitsundzuxo lexi Yesu a xi nyikeke malunghana ni ku hambuka?

⁷ Xo sungula, hi fanele hi lwisana ni ku hambuka. Eka Matewu 24:42, 44, Yesu u te: “Hitekani ke, hikuva a mi tivi siku leri Hosi ya n’wina yi nga ta ta ha rona. Hikokwalaho na n’wina, tshamani mi tilunghisile, hikuva N’wana-wa-Munhu ú ta ta enkarhini lowu mi nga wu ehleketiki.” Ririmi leri Yesu a ri tirhiseke laha ri komba leswaku enkarhini lowu wo nonon’hwa, ku ta va ni ku hambuka lokukulu naswona ku hambuka ku nga yisa endzovisweni. Enkarhini wa Nowa swilo swo tala swi endle leswaku vanhu va khomeka. Hikwalaho ka sweswo, vanhu lava hambukisiweke a va ‘anakanyanga’ hi leswi a swi ri ku humeleleni, kutani Ndhambi yi va kukula hinkwavo. Hi laha ku faneleke, Yesu u tsundzuxile: “Swi ta va tano ni le ku vuyeni ka N’wana-wa-Munhu.”—Matewu 24:37-39.

8, 9. (a) Xana ku hlongorisa loku tolovelekeke ka swilo swa vutomi swi nga hi hambukisa njhani hi ndlela leyi nga ni khombo? (b) Hi swihi switsundzuxo leswi Pawulo na Yesu va hi nyikeke swona?

⁸ Nakambe tsundzuka leswaku, eka xitsundzuxo xa yena lexi nga eka Luka 21:34, 35, Yesu a a vulavula hi swilo leswi tolovelekeke swa vutomi, swo tanihi ku dya, ku nwa ni ku vilela hi swa vutomi. I swilo leswi tolovelekeke eka vanhu hinkwavo, ku katsa ni vadyondzisiwa va Hosi Yesu. (Ringanisa Marka 6:31.) Swilo leswi swi nga ha pfumala khombo hi swoxe, kambe loko swi pfumeleriwa, swi nga hi hambukisa, swi hi endla leswaku hi khomeka, xisweswo swi hi khudzeherisa hi tlhelo ra moya leswi nga ni khombo.

⁹ Hikokwalaho, hi nga honisi nchumu wa nkoka wa le henhla—ku amukeriwa hi Xikwembu. Ematshan’wini yo tinyiketela eka swilo leswi tolovelekeke swa vutomi, a hi swi tirhiseni ku fikela eka mpimo wo karhi lowu lavekaka leswaku swi hi pfuna. (Vafilipiya 3:8) A swi fanelanga swi teka xiyimo xa swilaveko swa Mfumo. Hi laha Varhoma 14:17 yi vulaka ha kona, “Mfumo wa Xikwembu a hi ku dya, a hi ku nwa; kambe i ku lulama, ni ku rhula, ni ku tsaka, hi matimba ya Moya lowo Kwetsima.” Tsundzuka marito ya Yesu loko a te: “Rhangani mi tilavela Mfumo wa yena ni ku lulama ka yena, kutani sweswo hinkwaswo mi ta engeteleriwa swona.” (Matewu 6:33) Ku ya emahlweni, eka Luka 9:62, Yesu u tivisile: “Munhu loyi a vekaka voko ra yena exikon’wini, kutani a hundzuluka a languta ndzhaku, a nga lulameriwanga hi Mfumo wa Xikwembu.”

10. Hi rihi khombo leri nga ha humelelaka loko hi nga hlayisi mahlo ya hina ma langute emahlweni epakanini?

¹⁰ Loko ho sungula ku puluha, hi ndlela yo fanekisela, hi fanele hi ya emahlweni hi ndlela leyi kongomeke. Murimi loyi a langutaka endzhaku a nga ka a nga rimi foro lerinene. Wa hambukisiwa naswona a nga huma endleleni kumbe a yimisiwa hi ku olova hi swisiveri swin’wana. Hi nga fani ni nsati wa Lota, loyi a nga languta endzhaku kutani a nga ha swi koti ku pona. Hi fanele hi hlayisa mahlo ya hina ma langute emahlweni epakanini. Leswaku hi endla sweswo hi fanele hi lwela ku nga hambuki.—Genesa 19:17, 26; Luka 17:32.

Khongela Hi Mbilu Hinkwayo

11. Yesu u kandziyise yini endzhaku ko hi nyika xitsundzuxo hi khombo ra ku hambuka?

¹¹ Hambi swi ri tano, ku na swo tala leswi hi nga swi endlaka leswaku hi tshama hi xalamukile. Xilo xa vumbirhi xa nkoka i: Ku khongela hi mbilu hinkwayo. Endzhaku ko hi tsundzuxa hi ku lwisana ni ku hambukisiwa hi ku hlongorisa loku tolovelekeke ka swilo swa vutomi, Yesu u nyikele ndzayo leyi: “Hitekani ke, mi khongela minkarhi hinkwayo, leswaku mi kuma matimba ya ku pona eka swilo hinkwaswo leswi swi nga ta humelela, ni ku yima mi tiyile emahlweni ka N’wana-wa-Munhu.”—Luka 21:36.

12. I muxaka muni wa xikhongelo lowu lavekaka, naswona wu ni vuyelo byihi?

¹² Xisweswo, hi fanele hi endla xikombelo xa nkarhi na nkarhi malunghana ni xilaveko xa hina xo tshama hi xalamukile. Kutani a hi yeni eka Xikwembu hi xikhongelo hi kombela hi mbilu hinkwayo. Pawulo u vula leswi eka Varhoma 12:12: “Mi chivirika eku khongeleni.” Naswona eka Vaefesa 6:18, ha hlaya: “Endlani hinkwaswo leswi hi ku khongela, mi kombela . . . ; khongelani minkarhi hinkwayo hilaha Moya wu mi letelaka hakona. Hikokwalaho, tshamani mi hitekile.” Leyi a hi mhaka ya ku nyikela xikhongelo ntsena onge hi loko yi ri mhaka ya xitshuketa leyi nga riki ya nkoka lowukulu. Vukona bya hina hi byoxe byi le khombyeni. Xisweswo hi fanele hi kombela mpfuno wa Xikwembu hi mbilu hinkwayo. (Ringanisa Vaheveru 5:7.) Hi ndlela yoleyo hi ta tihlayisa hi ri etlhelweni ra Yehova. Ku hava leswi nga hi pfunaka leswaku hi hetisisa leswi handle ka leswaku hina vini ‘hi endla xikombelo minkarhi hinkwayo.’ Kutani Yehova u ta endla leswaku hi tshama hi ri exiyin’weni xa ku xalamuka hi ku chivirika. Kutani ke, vona ndlela leyi swi nga swa nkoka ha yona ku phikelela exikhongelweni!

Namarhela Nhlengeletano Ya Xikwembu Ni Ntirho Wa Yona

13. I ku tihlanganisa ka njhani loku lavekaka leswaku hi tshama hi xalamukile?

¹³ Hi lava ku pona swilo leswi hinkwaswo leswi nga ta ta emisaveni. Hi lava ku yima emahlweni ka N’wana wa munhu, hi amukeriwa hi yena. Emhakeni leyi ku ni xilo xa vunharhu lexi hi nga xi endlaka: Namarherisisa nhlengeletano ya Yehova ya le tilweni. Hi fanele hi tihlanganisa hi ku helela ni nhlengeletano yoleyo ni ku hlanganyela emintirhweni ya yona. Hi ndlela leyi handle ko kanakana hi ta tivula Vakriste lava nga eku languteleni.

14, 15. (a) Hi fanele hi hlanganyela eka ntirho wihi leswaku hi tshama hi xalamukile? (b) I mani loyi a vonaka loko ntirho wo chumayela wu herile, naswona hi fanele hi titwa njhani ha wona? (c) Endzhaku ka nhlomulo lowukulu, hi ta xiya yini loko hi languta endzhaku entirhweni wo chumayela hi ta Mfumo lowu endliweke?

¹⁴ Ku na xilo xa vumune lexi fambelanaka swinene ni leswi nga laha henhla lexi nga hi pfunaka ku tshama hi xalamukile. Hi fanele hi va exikarhi ka lava tsundzuxaka vanhu hi makumu lama taka ya mafambiselo lawa ya swilo. Makumu lama heleleke ya mafambiselo lawa ya khale ya swilo ma nge humeleli loko “Evhangeli leyi ya Mfumo” yi nga si chumayeriwa ku fikela empin’weni lowu Xikwembu xa Matimba Hinkwawo xi wu kunguhateke. (Matewu 24:14) Timbhoni ta Yehova a hi tona leti faneleke ti boha nkarhi lowu ntirho wo chumayela wu nga ta va wu hetisisiwile ha wona. Yehova hi yena a nga ta endla sweswo. (Marka 13:32, 33) Kambe, hina hi tiyimisele ku tirha hi matimba hi laha hi nga kotaka ha kona ni loko swa ha ri swa nkoka ku chumayela hi ta hulumendhe leyinene yo tlula leyi vanhu va nga vaka na yona, Mfumo wa Xikwembu. Ku sungula ka ‘nhlomulo lowukulu’ ku ta fika ha ha khomekile entirhweni lowu. (Matewu 24:21) Enkarhini hinkwawo lowu taka, lava ponisiweke va ta languta endzhaku ivi va pfumela hi mbilu hinkwayo leswaku Yesu Kriste a a nga ri muprofeta wa mavunwa. (Nhlavutelo 19:11) Ntirho wo chumayela wu ta va wu hetisisiwe hi mpimo lowu tlulaka lowu a wu languteriwe hi lava hlanganyelaka eka wona.

¹⁵ Hikokwalaho, enkarhini wa nkoka laha ntirho lowu wu nga ta va wu hetisisiwile ku enerisa Xikwembu, swi vonaka onge vo tala va ta hlanganyela eka wona ku tlula enkarhini wihi ni wihi wo sungula. Vona ndlela leyi hi nga ta tlangela ha yona hikwalaho ka leswi hi veke ni xiphemu entirhweni lowu lowukulu! Muapostola Petro u hi tshembisa leswaku Yehova “a [nga] lavi leswaku ni un’we wa n’wina a lova, kambe [u] lava leswaku hinkwavo va ta eku hundzukeni.” (2 Petro 3:9) Hikwalaho, matimba lama tirhaka ya Xikwembu xa Matimba Hinkwawo ma tirha swinene namuntlha ku tlula rini na rini, naswona Timbhoni ta Yehova ti rhandza ku ya emahlweni entirhweni lowu wu susumetiwaka hi moya. Kutani namarhela swinene nhlengeletano ya Yehova naswona u gingiriteka evutirhelini bya yona bya le rivaleni. Leswi swi ta ku pfuna leswaku u tshama u xalamukile.

Tikambisise

16. Hikwalaho ka yini hi fanele hi kambisisa xiyimo xa hina xa sweswi xa moya?

¹⁶ Ku na xilo xa vuntlhanu lexi hi nga xi endlaka leswaku hi tshama hi xalamukile. Ha un’we-un’we, hi fanele hi kambisisa xiyimo xa hina. Leswi swi fanerile sweswi ku tlula rini na rini. Hi fanele hi kombisa leswaku hi yime etlhelweni ra mani. Eka Vagalatiya 6:4, Pawulo u te: “Un’wana ni un’wana a a kambisise ntirho wa yena.” Tikambisise hi ku pfumelelana ni marito ya Pawulo eka 1 Vatesalonika 5:6-8: “Hi nga tshuki hi etlela kukota leswi van’wana va endlisaka swona, kambe a hi hitekeni, hi tikhoma. Hikuva lava etlelaka, va etlela nivusiku, lava pyopyiwaka, va pyopyiwa ni vusiku. Kambe leswi hina hi nga va nhlekanhi, a hi tikhomeni, hi ambala ku pfumela ni rirhandzu xi va xisirhelelo xa hina exifuveni, kutani enhlokweni hi ambala ku langutela ka ku ponisiwa, xi va xihuku xa hina.”

17. Loko hi ri karhi hi tikambisisa, hi swihi swivutiso leswi hi faneleke hi tivutisa swona?

¹⁷ Ku vuriwa yini hi hina? Xana loko hi tikambisisa hi ku ya hi Matsalwa, xana ha swi vona leswaku hi tshama hi xalamukile, hi ri ni ntshembo wa ku ponisiwa tanihi xihuku? Xana hi vanhu lava tihambaniseke hi laha ku heleleke ni mafambiselo ya khale ya swilo naswona hi nga ha yi tsakeli mianakanyo ya wona? Xana hi ni moya wa misava leyintshwa ya Xikwembu hakunene? Xana hi swi tiva kahle leswaku mafambiselo lawa ma kongome kwihi? Loko swi ri tano, siku ra Yehova ri nge hi kumi onge hi makhamba.—1 Vatesalonika 5:4.

18. Hi swihi swivutiso swin’wana leswi hi faneleke hi tivutisa swona, naswona vuyelo byi ta va byihi?

¹⁸ Kambe, ku vuriwa yini loko ku tikambisisa ka hina ku komba leswaku hi lwela ku kuma ndlela ya vutomi, yo titsakisa, yo tienerisa, yo olova ni yo ntshunxeka? Ku vuriwa yini loko hi kuma leswaku mahlo ya hina ya moya ma karhele naswona ma ni vurhongo? Xana hi le xiyin’weni xo lorha, hi ri karhi hi hlongorisa mintsako yin’wana ya misava? Loko swi ri tano, a hi xalamukeni!—1 Vakorinto 15:34.

Anakanya Hi Vuprofeta Lebyi Hetisekeke

19. Hi byihi vuprofeta byin’wana lebyi hi byi voneke byi hetiseka?

¹⁹ Sweswi hi ta eka xilo xa vutsevu lexi nga ta hi pfuna hi tshama hi xalamukile: Anakanya hi vuprofeta byo tala lebyi hetisekeke enkarhini lowu wa makumu. Ana se hi hundze lembe ra vu-77 ku sukela loko minkarhi ya vamatiko leyi vekiweke yi herile hi 1914. Loko hi languta endzhaku eka tikotara tinharhu ta lembe xidzana, hi nga vona ndlela leyi vuprofeta byi hetisekeke ha yona hi ku landzelelana—ku kondletela vugandzeri bya ntiyiso; ku ponisiwa ka masalela lama totiweke, kun’we ni vanakulobye va vona, va yisiwa eparadeyisini ya moya; ku chumayeriwa ka mahungu lamanene ya Mfumo emisaveni hinkwayo; ku humelela ka ntshungu lowukulu. (Esaya 2:2, 3; ndzima 35; Zakaria 8:23; Matewu 24:14; Nhlavutelo 7:9) Ku ve ni ku tlakusiwa ka vito lerikulu ra Yehova ni vuhosi bya hinkwako-nkwako, kun’we ni ku kula ka lontsongo a va gidi naswona lontsongo ngopfu a va tiko ra matimba, Yehova a swi hatlisisa hi nkarhi wa kona. (Esaya 60:22; Ezekiel 38:23) Naswona swivono swa muapostola Yohane emhakeni ya Nhlavutelo sweswi swi le kusuhi ni ku chaputa ka swona.

20. Hi kwihi ku khorwiseka loku Timbhoni ta Yehova ti nga na kona, naswona ti tikombise ti ri yini?

²⁰ Hikwalaho, ku tlula rini na rini, Timbhoni ta Yehova ti khorwiseka hi laha ku tiyeke hi ku lulama ka matwisiselo ya tona ya leswi vuriwaka hi timhaka ta misava ku sukela hi 1914. Leswi ti nga ni ku khorwiseka koloko ti tikombise ti ri switirho emavokweni ya Xikwembu lexi nge Henhla-henhla. Hi tona leti hehliweke hikwalaho ko chumayela rungula ra Xikwembu enkarhini lowu wo hlawuleka. (Varhoma 10:15, 18) Ina, marito ya Yehova ya minkarhi ya makumu ya hetisekile. (Esaya 55:11) Leswi swi fanele swi hi nyika matimba leswaku hi ya emahlweni ku fikela loko hi vona ku hetiseka ko hetelela ka switshembiso hinkwaswo swa Xikwembu ha Yesu Kriste.

Ku Ponisiwa Ku Kusuhi Swinene Ku Tlula eNkarhini Lowu Hi Veke Vapfumeri Ha Wona

21. I mpfuno wihi wa vunkombo lowu hi nga na wona wo hi pfuna leswaku hi tshama hi xalamukile emoyeni?

²¹ Xo hetelela, mpfuno wa vunkombo wa leswaku hi tshama hi xalamukile: Tshama u ri karhi u anakanya leswaku ku ponisiwa ka hina ku kusuhi swinene ku tlula enkarhini lowu hi veke vapfumeri ha wona. Xa nkoka ngopfu, ku lweriwa ka vuhosi bya Yehova bya hinkwako-nkwako ni ku kwetsimisiwa ka vito ra yena swi le kusuhi swinene. Kutani xilaveko xo tshama hi xalamukile i xa xihatla sweswi ku tlula rini na rini. Muapostola Pawulo wa tsala: “Hikuva mi tiva leswaku i nkarhi wihi sweswi: Hi wona nkarhi wa n’wina wa ku pfuka evurhongweni; hikuva namuntlha, ku ponisiwa ku kusuhi ku tlula siku hi pfumeleke. Vusiku byi hundzile, dyambu ri lava ku huma.”—Varhoma 13:11, 12.

22. Xana leswi ku ponisiwa ka hina ku nga kusuhi swi fanele ku hi khumbisa ku yini?

²² Tanihi leswi ku ponisiwa ka hina ku nga kusuhi swinene, hi fanele ku xalamuka! Hi nga pfumeleli swilaveko swihi na swihi swa hina kumbe swa misava swi sivela ku tlangela ka hina swilo leswi Yehova a swi endlelaka vanhu va yena enkarhini lowu wa makumu. (Daniel 12:3) Hi fanele hi kombisa ku phikelela lokukulu ku tlula rini na rini leswaku hi nga hambukisiwi endleleni leyi Rito ra Xikwembu ri hi vekelaka yona erivaleni. (Matewu 13:22) Vumbhoni byi swi kombisa kahle leswaku misava leyi yi le minkarhini ya yona yo hetelela. Ku nga ri khale yi ta kukuleriwa makumu leswaku yi pfulela misava leyintshwa ya ku lulama.—2 Petro 3:13.

23. Yehova u ta hi pfuna hi ndlela yihi, naswona ku ta va ni vuyelo byihi lebyi katekisiweke?

²³ Kutani ke, a hi tshameni hi xalamukile hi tindlela hinkwato. Ku tlula eku sunguleni, a hi tiveni nkarhi lowu hi nga eka wona. Tsundzuka, Yehova a nga ka a nga yi tshiki mhaka leyi. Ematshan’wini ya sweswo, u ta hamba a hi pfuna leswaku hi tshama hi xalamukile enkarhini lowu wa makumu. Vusiku byi hundzile. Siku ra tshinela. Kutani tshama u xalamukile! Ku nga ri khale hi ta vona siku ro saseka eka masiku hinkwawo, loko Mfumo wa Vumesiya wu hetisisa xikongomelo xa Yehova ehenhla ka misava!—Nhlavutelo 21:4, 5.

Hi Tihi Tinhlamulo Ta Wena?

◻ Xana Yesu a a vula yini loko a ku siku ra vukari bya Xikwembu ri ta wela vanhu tanihi “xirimbani”?

◻ Hikwalaho ka yini hi fanele hi lwisana ni ku hambuka naswona hi nga swi endlisa ku yini?

◻ I muxaka muni wa xikhongelo lowu lavekaka leswaku hi tshama hi xalamukile?

◻ I ku tihlanganisa ka muxaka muni loku ku nga nkoka?

◻ Hikwalaho ka yini hi kambisisa xiyimo xa hina xa moya?

◻ Xana vuprofeta byi hi pfunisa ku yini leswaku hi tshama hi xalamukile?