“Tshamani Mi Hitekile”
1 Endzhaku ko hlamusela swiendlakalo leswikulu leswi nga ta fungha masiku yo hetelela ya mafambiselo lawa ya swilo, Yesu u khutaze vadyondzisiwa va yena ku ‘tshama va hitekile.’ (Mar. 13:33) Ha yini Vakreste va fanele va tshama va hitekile? Hikuva hi hanya enkarhini lowu nga ni khombo swinene ematin’wini ya vanhu. A hi nge tihoxi ekhombyeni ro khudzehela hi tlhelo ra moya. Sweswo swi ta endla leswaku hi tsandzeka ku tlangela ntirho lowu Yehovha a hi nyikeke wona leswaku hi wu endla enkarhini lowu wa makumu. Hi wihi ntirho wa kona?
2 Yehovha u endla leswaku vanhu va yena va twarisa mahungu lamanene ya Mfumo wa yena emisaveni hinkwayo—ku nga wona ntsena ntshembo wa vanhu. Ku tirhisana swinene ni nhlengeletano ya Xikwembu, swi hi hlawula tanihi Vakreste va ntiyiso lava xalamukeleke minkarhi, lava vonaka xilaveko xo pfuna van’wana leswaku va twa “marito ya vutomi lebyi nga heriki.” (Yoh. 6:68) Hi ku hlanganyela hi ku hiseka entirhweni lowu wa nkoka swinene, hi nyikela vumbhoni bya leswaku ha hiteka hi tlhelo ra moya.
3 Ku Susumeteleka Ku Chumayela: Leswi hi nga Timbhoni ta Yehovha, hi fanele hi va ni langutelo lerinene hi vutirheli bya hina. Ku rhandza Xikwembu ni vaakelani va hina swi hi susumetela ku hlanganyela entirhweni wo chumayela. (1 Kor. 9:16, 17) Loko hi endla tano hi ta tiponisa hi tlhela hi ponisa ni lava va hi yingisaka. (1 Tim. 4:16) A hi tiyimiseleni ku hlanganyela nkarhi na nkarhi hilaha hi nga kotaka hakona naswona hi hlanganyela nkarhi wo leha eku chumayeleni hi hulumendhe leyinene leyi vanhu va nga siki tshama va va na yona—ku nga Mfumo wa Xikwembu!
4 Leswi ntirho wa hina wu nga wa xihatla, wu kandziyisa mhaka yin’wana leyi nga ya nkoka eka hina—ku nga ku tlhekeka ka nhlomulo lowukulu lowu nga ta fika ha ha endla ntirho lowu. Leswi hi nga ri tiviki siku ni nkarhi, swi lava leswaku hi tshama hi hitekile naswona hi lunghekile nkarhi hinkwawo, hi titshega hi Yehovha hi mbilu hinkwayo. (Efe. 6:18) Ntirho wo chumayela wu hambeta wu kula. Kambe ku nga ri khale, ntirho wo chumayela lowukulu ematin’wini ya vanhu wu ta fika eku chaputeni ka wona.
5 Yingisa xileriso xa Yesu hi ku tshembeka, lexi nge “tshamani mi hitekile.” Leswi i swa nkoka swinene sweswi ku tlula rini na rini. Onge hi nga va ni langutelo ra xihatla ha swona. Masiku hinkwawo, a hi tshameni hi hitekile hi tlhelo ra moya, a hi xalamukeni hi tlhela hi chivirika entirhweni wa Yehovha. Ina, onge hi nga “hitek[a] hi hlayisa mianakanyo ya hina leyi hlutekeke.”—1 Tes. 5:6.