Va Katekile Lava Tshamaka Va Hitekile!
“Languta, ndza ta ku fana ni khamba. Ku katekile loyi a hitekaka, la hlayisaka tinguvu ta yena.”—NHLAVUTELO 16:15.
1. Tanihi leswi siku ra Yehovha ri tshineleke, i yini lexi hi nga xi langutelaka?
SIKU ra Yehovha lerikulu ri tshinele, naswona sweswo swi vula nyimpi! Exivonweni, muapostola Yohane u vone “mimoya ya mademona” leyi fanaka ni machela, yi ya eka “tihosi” hinkwato, kumbe valawuri va misava. Yi ya endla yini? Phela, “yi ti rhamb[ela] nyimpi, ku ya lwa ni Xikwembu xa matimba hinkwawo”! Yohane u engeterile a ku: “Yi hlengeleta tihosi endhawini leyi va nge i Armagedoni hi ririmi ra Xiheveru.”—Nhlavutelo 16:13-16.
2. I mani Gogo wa Magogo, naswona ku ta humelela yini loko a hlasela vanhu va Yehovha?
2 Ku nga ri khale, Yehovha u ta hlohlotela xitirho lexi xa mafambiselo lawa xa tipolitiki leswaku xi lovisa Babilona Lonkulu, mfumo wa misava wa vukhongeri bya mavunwa. (Nhlavutelo 17:1-5, 15-17) Kutani Gogo wa Magogo, ku nga Sathana Diyavulosi, loyi a lahleriweke emisaveni u ta hlengeleta mavuthu ya yena a hlasela vanhu va Yehovha lavo rhula, lava vonakaka va nga sirhelelekanga. (Ezekiyele 38:1-12) Kambe Xikwembu xi ta teka goza ro ponisa vanhu va xona. Sweswo ku ta va ku sungula ka “siku le’rikulu, le’ri tšhav̌isaka ra Hosi.”—Yuwele 2:31; Ezekiyele 38:18-20.
3. U nga swi hlamusela njhani swiendlakalo leswi vhumbhiweke eka Ezekiyele 38:21-23?
3 Ina, Yehovha u ta ponisa vanhu vakwe ni ku lovisa xiphemu xin’wana ni xin’wana xo hetelela xa mafambiselo ya Sathana, loko se hi fikelele xiyimo xa misava lexi vuriwaka Har-magedoni, kumbe Armagedoni. Hlaya marito ya vuprofeta eka Ezekiyele 38:21-23, kutani u vona xivono xa kona hi mahlo ya mianakanyo. Yehovha u tirhisa matimba ya yena leswaku a endla mapapa lama nga ta nisa mpfula ya matimba, xihangu lexi dlayaka, ndzilo lowu herisaka hi xihatla ni vuvabyi lebyi dlayaka. Misava hinkwayo yi khomiwa hi nchavo, loko mavuthu ya Gogo ma ri karhi ma pfilunganyiwa, ma pfukelana hi woxe. Valala hinkwavo va Xikwembu xa Matimba Hinkwawo, lava nga ta va va ha sele, va ta dlawa loko Yehovha a tirhisa tindlela leti nga tolovelekangiki, leswaku a ponisa malandza yakwe. Loko “nhlomulo . . . lowukulu” lowu vhumbhiweke wu hlaserile, a ku nge he sali nchumu xa mafambiselo ya Sathana yo pfumala ku chava Xikwembu. (Matewu 24:21) Hambiloko va ri enhlomulweni wa rifu, lavo homboloka va ta swi tiva leswaku i mani loyi a va vangelaka khombo leri. Xikwembu xa hina lexi hlulaka, hi xoxe xi ri: “[Va] ta tiv̌a leŝaku hi mina Yehova.” Swiendlakalo leswi leswi xiyekaka swi ta humelela esikwini ra hina, hi nkarhi wa vukona bya Yesu.
Ku Ta Tanihi Khamba
4. Xana Yesu u ta ta a ta lovisa mafambiselo lawa ya swilo yo homboloka hi mukhuva wihi?
4 Yesu Kreste Hosi leyi kwetsimisiweke u ri: “Languta, ndza ta ku fana ni khamba.” Ku ta ku fana ni khamba ku ta va ka xitshuketa, hi nkarhi lowu nga languteriwangiki, loko vunyingi bya vanhu se byi etlele. Loko Yesu a ta ku fana ni khamba leswaku a lovisa mafambiselo lawa yo homboloka, u ta hlayisa lava hakunene va xalamukeke. U byele Yohane a ku: “Ku katekile loyi a hitekaka, la hlayisaka tinguvu ta yena, leswaku a ta ka a nga fambisi miri ntsena erivaleni, vanhu va n’wi vona!” (Nhlavutelo 16:15) Marito wolawo ma vula yini? Naswona hi nga tshama njhani hi xalamukile hi tlhelo ra moya?
5. Hi rihi lunghiselelo ra ntirho wa le tempeleni leri a ri ri kona loko Yesu a ha ri emisaveni?
5 Hi ntolovelo, murindzi a nge hluvuli a sala a nga ambalanga nchumu, loko o tshuka a etlele hi nkarhi wa ntirho. Kambe sweswo swi humelerile etempeleni eYerusalema loko Yesu a ha ri emisaveni, ni loko mintlawa ya vaprista ni Valevhi yi tirha etempeleni eYerusalema. A ku ri hi lembe-xidzana ra vu-11 B.C.E. loko Hosi Davhida a hlengeleta madzana ya vaprista va Israyele ni vapfuneti va vona va magidi va Valevhi, leswaku va va nhlengeletano leyi nga ni mintlawa ya 24. (1 Tikronika 24:1-18) Ntlawa wun’wana ni wun’wana wo tlula gidi ra vatirhi lava leteriweke, a wu tirha ntirho wa wona wo hlayisa swilo leswi tirhisiwaka etempeleni, nkarhi lowu lavaka ku va kambirhi hi lembe, vhiki hinkwaro. ENkhubyeni wa Mintsonga, mintlawa hinkwayo ya 24 a yi va kona leswaku yi tirha. Nakambe a ku laveka mpfuno lowu engetelekeke eminkhubyeni ya Paseka.
6. Xana Yesu a nga va a vulavula hi yini loko a te, “Ku katekile loyi a hitekaka, la hlayisaka tinguvu ta yena”?
6 Loko Yesu a ku: “Ku katekile loyi a hitekaka, la hlayisaka tinguvu ta yena,” kumbexana a a vulavula hi maendlelo lawa a ma landzeleriwa enkarhini wolowo, lawa a ma katsa ntirho wo langutela tempele. Mishnah ya Vayuda yi ri: “Vaprista a va rindza tindhawu tinharhu ta le Tempeleni: eKamareni ra Abtinas, eKamareni ra Langavi, ni le Kamareni ra Xitiko; naswona valevhi a va tirha etindhawini ta makume-mbirhi-n’we: ntlhanu wa vona etihekeni ta ntlhanu ta Ntshava ya Tempele, mune wa vona endzeni etikhonweni ta yona ta mune, ntlhanu etihekeni ta ntlhanu ta le Hubyeni ya Tempele, mune wa vona etikhonweni ta yona ta mune ta le handle, naswona un’we eKamareni ra Magandzelo, kutani un’wana eKamareni leri nga ni Nguvu, naswona un’wana endzhaku ka xivandla xa Xitshamo xa Musa [ehandle ka khumbi ra le ndzhaku ra Vukwetsimisiso]. Mulanguteri wa Ntshava ya Tempele a a hamba a rhendzeleka a ya laha a ku ri ni murindzi un’wana ni un’wana, a ri karhi a voninga emahlweni ka yena hi mavoningo lama lumekiweke, naswona loko mulanguteri un’wana ni un’wana o ka a nga suki a yima kutani a ku ka yena, ‘Oho mulanguteri wa Ntshava ya Tempele, ku rhula a ku ve na wena!’ naswona swi vonaka leswaku u etlele, a fanele a a n’wi ba hi nhonga ya yena, naswona a a ri ni mfanelo yo hisa swiambalo swa yena.”—The Mishnah, Middoth (“Measurements”), 1, tindzimana 1-2, yi hundzuluxeriwe hi Herbert Danby.
7. Hikwalaho ka yini vaprista ni Valevhi lava a va ri ni ntirho wo rindza etempeleni, a va fanele va tshama va xalamukile?
7 Vunyingi bya Valevhi ni vaprista lava a va tirha hi mintlawa-ntlawa, a va tshama va xalamukile vusiku hinkwabyo, leswaku va rindza ni ku sivela wihi na wihi la nga tengangiki, leswaku a nga ngheni eswivaveni swa tempele. Tanihi leswi “mulanguteri wa Ntshava ya Tempele,” kumbe “ndhuna ya tempele,” a a rhendzeleka ni swivandla swa 24 hi nkarhi wa vulanguteri bya nivusiku, murindzi un’wana ni un’wana a a boheka ku tshama a xalamukile entirhweni wa yena loko a nga lavi ku kumiwa a nga ri eku rindzeni.—Mintirho 4:1.
8. Xana i yini tinguvu ta Vakreste ta le handle to fanekisela?
8 Vakreste lava totiweke ni malandza-kulobye va fanele va tshama va xalamukile hi tlhelo ra moya, naswona va hlayisa tinguvu ta vona ta le handle, to fanekisela. Lebyi i vumbhoni bya le rivaleni, lebyi kombaka leswaku hi hlawuleriwe ku tirha etempeleni ya Yehovha ya moya. Xikombiso xa leswi, hi leswi hi nga ni moya wa Xikwembu lowo kwetsima, kumbe matimba lama tirhaka, lowu hi pfunaka ku endla ni ku hetisisa mintirho ya hina ni vutihlamuleri bya hina tanihi vahuweleri va Mfumo. Ku honisa swiavelo swa hina tanihi vatirheli va Xikwembu, swi nga hi veka ekhombyeni ra leswaku Yesu Kreste, Murhangeri wa tempele leyikulu ya moya, a hi kuma hi nga ri eku rindzeni. Loko ho va hi etlele hi tlhelo ra moya enkarhini wolowo, hi ndlela yo fanekisela hi ta hluvuriwa hi sala hi nga ambalanga nchumu, naswona tinguvu ta hina to fanekisela ti ta hisiwa. Kutani, hi nga tshama njhani hi xalamukile hi tlhelo ra moya?
Ndlela Yo Tshama Hi Xalamukile
9. Hikwalaho ka yini ku dyondza Bibele hi ku pfuniwa hi tibuku ta Vukreste swi ri swa nkoka swonghasi?
9 Ku hisekela ku dyondza Matsalwa hi ku pfuniwa hi tibuku ta Vukreste swi nga hi endla leswaku hi tshama hi xalamukile hi tlhelo ra moya. Dyondzo yo tano yi ta hi hlomisela vutirheli, yi hi pfuna leswaku hi langutana ni swirhalanganya, naswona yi ta hi komba ndlela leyi yisaka entsakweni lowu nga heriki. (Swivuriso 8:34, 35; Yakobo 1:5-8) Dyondzo ya hina yi fanele yi va leyi enteke ni leyi hambetaka. (Vaheveru 5:14–6:3) Swakudya leswinene loko hi swi dya nkarhi na nkarhi swi nga hi pfuna leswaku hi tshama hi xalamukile, hi tlharihile. Swi nga sivela ku tsana loku nga vaka xikombiso xa ku sika hi ndlala. Ku hava xivangelo xo sika ni ku etlela hi tlhelo ra moya, hikuva Xikwembu xi endla lunghiselelo lerikulu ra swakudya swa moya hi ku tirhisa “nandza la tshembekaka, wo tlhariha,” la totiweke. (Matewu 24:45-47) Ku dya swakudya swa moya nkarhi na nkarhi hi ku tirhisa dyondzo ya munhu hi xiyexe ni ya ndyangu, i ndlela yin’wana yo endla leswaku u tshama u xalamukile ni ku va ni “ku pfumela loku hanyaka.”—Tito 1:13.
10. Xana minhlangano ya Vukreste, tinhlengeletano ni mintsombano, swi hi pfuna njhani leswaku hi tshama hi xalamukile hi tlhelo ra moya?
10 Minhlangano ya Vukreste, tinhlengeletano ni mintsombano ya hi pfuna leswaku hi tshama hi xalamukile hi tlhelo ra moya. Yi nyika xikhutazo ni minkarhi leyi pfulekeke yo ‘khutazana erirhandzwini ni le mintirhweni leyinene.’ Ngopfu-ngopfu hi fanele hi hlengeletana nkarhi na nkarhi tanihi leswi hi “vonaka leswaku siku ra Hosi ri ya ri tshinela.” Siku rero sweswi ri tshinele hakunene. I “siku ra Yehova,” leri a nga ta lwela vuhosi bya yena ha rona. Loko hakunene siku rero ri ri ra nkoka eka hina—naswona ri fanele ri va tona—a hi nge ‘tshiki ku hlengeletana ka hina ndhawu yin’we.’—Vaheveru 10:24, 25; 2 Petro 3:10.
11. Ha yini ku nga vuriwaka leswaku vutirheli bya Vukreste i bya nkoka, leswaku u xalamuka hi tlhelo ra moya?
11 Ku hlanganyela hi mbilu hinkwayo evutirhelini bya Vukreste i swa nkoka leswaku u tshama u xalamukile hi tlhelo ra moya. Ku hlanganyela nkarhi na nkarhi eku chumayeleni ka mahungu lamanene hi ku hiseka, swi endla leswaku hi tshama hi xalamukile. Vutirheli bya hina byi hi nyika minkarhi yo tala leyi pfulekeke yo vulavula ni vanhu hi Rito ra Xikwembu, Mfumo wa xona ni swikongomelo swa xona. Swa tsakisa ku nyikela vumbhoni hi yindlu na yindlu, ku endla maendzo yo vuyela, ni ku fambisa tidyondzo ta le kaya ta Bibele hi tibuku to tanihi leyi nge Vutivi Lebyi Yisaka eVuton’wini Lebyi Nga Heriki. Vakulu va le Efesa wa khale va swi kotile ku vula leswaku Pawulo u va dyondzisile “erivaleni ni le mindyangwini.” (Mintirho 20:20, 21) Kavula, van’wana va Timbhoni ta Yehovha leti tshembekeke va karhatiwa hi swiphiqo leswikulu swa rihanyo leswi kavanyetaka vutirheli bya vona hi ndlela yo karhi, kambe va kuma tindlela to byela van’wana hi Yehovha ni hi vuhosi bya yena, naswona va kuma ntsako lowukulu hi ku endla sweswo.—Pisalema 145:10-14.
12, 13. Hikwalaho ka yini hi fanele hi papalata ku dya ni ku nwa ku tlula mpimo?
12 Ku papalata ku hlongorisa mintsako swi ta hi pfuna leswaku hi tshama hi xalamukile hi tlhelo ra moya. Loko a vulavula hi vukona byakwe, Yesu u khutaze vaapostola va yena a ku: “Tivoneleni leswaku timbilu ta n’wina ti nga tikeriwi hi makolo ni ku pyopyiwa, ni ku vilela hi swa vutomi lebyi, na swona tivoneleni leswaku siku rero ri nga mi tshuketi; hikuva, kukotisa xirimbani, ri ta wela hinkwavo lava akeke emisaveni hinkwayo.” (Luka 21:7, 34, 35) Makolo ni vudakwa swi lwisana ni misinya ya milawu ya Bibele. (Deteronoma 21:18-21) Swivuriso 23:20, 21 yi ri: “U nga tolov̌eli munwi wa byalwa, ni v̌adyi v̌a tinyama; hikuv̌a šidakwa ni wa makolo v̌a tiv̌angela v̌usiwana; ku ranḍa v̌urongo i ku tifunengeta hi ŝitlakati.”—Swivuriso 28:7.
13 Hambiloko ku dya ku tlula mpimo ni ku nwa ngopfu swi nga kali swi fika eyinhleni yoleyo, kambe swi nga endla leswaku munhu a khudzehela, hambi ku ri ku loloha ku endla ku rhandza ka Xikwembu. Hi ntolovelo, ku ta va ni swivilelo leswi katsaka vutomi bya ndyangu, rihanyo ni swin’wana. Kambe, hi ta tsaka loko ho rhangisa swilaveko swa Mfumo ku sungula evuton’wini, kutani hi tiyiseka leswaku Tata wa hina wa le tilweni u ta hi wundla. (Matewu 6:25-34) Handle ka swona, “siku ra kona” ri ta hi tela kukotisa “xirimbana,” kumbexana kukotisa ntlhamu lowu fihliweke lowu nga hi phasaka handle ko swi xiya, kumbe ntlhamu lowu rhiyetiweke, kukotisa lowu kokaka swiharhi, kutani swi phasiwa swi nga ehleketanga nchumu. Leswi a swi nge humeleli loko hi tshama hi xalamukile, hi ri karhi hi swi xiya kahle leswaku hi hanya “[e]nkarini wa makumu.”—Daniyele 12:4.
14. Hikwalaho ka yini hi fanele hi khongela hi mbilu hinkwayo?
14 Xikhongelo lexi humaka embilwini i xipfuneti xin’wana lexi xalamukisaka hi tlhelo ra moya. Eka vuprofeta byakwe lebyikulu, Yesu u ye emahlweni a khutaza a ku: “Hitekani ke, mi khongela minkarhi hinkwayo, leswaku mi kuma matimba ya ku pona eka swilo hinkwaswo leswi swi nga ta humelela, ni ku yima mi tiyile emahlweni ka N’wana-wa-Munhu.” (Luka 21:36) Ina, a hi khongeleni leswaku nkarhi hinkwawo hi ta kumeka hi ri etlhelweni ra Yehovha, ni ku amukeriwa loko Yesu N’wana-wa-Munhu, a tela ku ta lovisa mafambiselo lawa yo homboloka ya swilo. Leswaku ku pfuneka hina vini swin’we ni vapfumeri-kulorhi lava hi va khongelelaka, hi fanele hi ‘tiyisela exikhongelweni.’—Vakolosa 4:2; Vaefesa 6:18-20.
Nkarhi Wa Hela
15. I yini leswi hetisisiwaka hi ntirho wa hina tanihi vachumayeri va leswo lulama?
15 Loko ha ha yimele siku ra Yehovha lerikulu, handle ko kanakana, hi navela ku endla hinkwaswo leswi hi nga swi kotaka entirhweni wa yena. Loko hi khongela hi mbilu hinkwayo eka yena malunghana ni leswi, ‘nyangwa leyikulu leyi yisaka entirhweni’ yi nga hi pfulekela. (1 Vakorinto 16:8, 9, ringanisa NW.) Hi nkarhi lowu Xikwembu xi wu vekeke, Yesu u ta avanyisa ni ku hambanisa “tinyimpfu” leto lulama leti faneriwaka hi vutomi lebyi nga heriki, eka “timbuti” leti nga chaviki Xikwembu, leti faneriwaka hi ku loviseriwa makumu. (Yohane 5:22) A hi hina hi hambanisaka tinyimpfu eka timbuti. Kambe ntirho wa hina tanihi vachumayeri va leswo lulama, sweswi wu nyika vanhu nkarhi wo hlawula vutomi bya ku tirhela Xikwembu, xisweswo va va ni ntshembo wo avanyiseriwa ku ya evuton’wini loko Yesu a “ta . . . hi ku kwetsima ka yena.” Ku koma ka nkarhi lowu saleke wa mafambiselo lawa ya swilo ku kandziyisa xilaveko xo tirha hi mbilu hinkwayo, loko hi ri karhi hi lava “lava hlawuleriweke vutomi lebyi nga heriki.”—Matewu 25:31-46; Mintirho 13:48.
16. Hikwalaho ka yini hi fanele hi va vahuweleri va Mfumo lava chivirikaka?
16 Nkarhi wu herile eka misava ya siku ra Nowa, naswona ku nga ri kungani wu ta hela eka mafambiselo lawa ya swilo. Kutani, a hi veni vahuweleri va Mfumo lava chivirikaka. Ntirho wa hina wo chumayela wu tswala mihandzu, hikuva lembe na lembe madzana ya magidi ma khuvuriwa ma kombisa ku tinyiketela ka wona eka Xikwembu. Ma va xiphemu xa nhlengeletano ya Yehovha leyi katekisiweke—“tiko ra yena, ni ntlhambi lowu a wu risaka.” (Pisalema 100:3) Mayana ntsako wonghasi wo hlanganyela entirhweni wo chumayela hi Mfumo, lowu nyikaka ntshembo eka vo tala ku nga si fika “siku le’rikulu, le’ri tšhav̌isaka ra Yehova”!
17, 18. (a) Loko hi ri karhi hi chumayela, i n’wangulo wihi lowu hi faneleke hi wu langutela eka van’wana? (b) I yini lexi handle ko kanakana xi nga ta wela vahlekuri?
17 Ku fana na Nowa, hi ni nsirhelelo ni mpfuno wa Xikwembu. Ina, vanhu, tintsumi leti tihundzuleke vanhu va nyama swin’we ni Tinefelimi, ti fanele ti ri hlekurile rungula ra Nowa, kambe sweswo a swi n’wi lan’wisanga. Namuntlha, van’wana va hi hlekula loko hi kombetela eka vumbhoni lebyikulu bya leswaku hi hanya “emasikwini ya makumu.” (2 Timotiya 3:1-5) Ku hlekula ko tano ku hetisisa vuprofeta bya Bibele mayelana ni vukona bya Kreste, hikuva Petro u tsarile a ku: “Emasikwini yo hetelela, ku ta humelela vasandzi lava fambisiwaka hi ku navela ka vona loko biha; va ta mi sandza, va ku: ‘Swi helele kwihi, swa loyi ku nga tshembisiwa leswaku ú ta ta, xana? Hi mpfhuka vatatana va nga tietlelela, swilo hinkwaswo swa ha ya emahlweni hilaha a swi famba hakona, ku sukela loko misava yi tumbuluka.’” (Xiitaliki i xerhu.)—2 Petro 1:16; 3:3, 4.
18 Vahlekuri va le minkarhini ya sweswi va nga anakanya va ku: ‘Ku hava lexi hundzukeke hi mpfhuka ku tumbuluxiwa swilo. Vutomi byi ya emahlweni, vanhu va karhi va dya, va nwa, va hlomisana ni ku hlayisa mindyangu. Ni loko ku ri leswaku Yesu u kona, a nge ti a ta avanyisa esikwini ra mina.’ Wa nga vona ndlela leyi va hoxiseke ha yona! Loko vo ka va nga fi hikwalaho ka swivangelo swin’wana enkarhini lowu, siku ra Yehovha leri chavisaka ri ta va lovisela makumu hilaha ndzoviso wa Ndhambi lowu nga ni khombo wu xi heriseke hakona xitukulwana lexo homboloka xa le sikwini ra Nowa.—Matewu 24:34.
A Hi Tshameni Hi Xalamukile Hilaha Swi Nga Kotekaka Hakona!
19. Hi fanele hi yi languta njhani mintirho ya hina yo endla vadyondzisiwa?
19 Loko se hi tinyiketerile eka Yehovha, hi nga tshuki hi pfumelela mianakanyo leyi hoxeke yi hi etlerisa. Lowu i nkarhi wo tshama hi xalamukile, hi kombisa ripfumelo eka vuprofeta bya Xikwembu, ni ku hetisisa ntirho wa hina wo “endla vanhu va matiko hinkwawo va va vadyondzisiwa.” (Matewu 28:19, 20, NW) Tanihi leswi mafambiselo lawa ma yaka ma tshinelela makumu ya wona, a hi nge ri kumi lunghelo rin’wana lerikulu, ku tlula ku tirhela Yehovha Xikwembu ehansi ka vurhangeri bya Yesu Kreste, ni ku hlanganyela entirhweni wa misava hinkwayo wo chumayela “Evhangeli leyi ya Mfumo” makumu ma nga si fika.—Matewu 24:14; Marka 13:10.
20. Hi xihi xikombiso lexi vekiweke hi Kalebe na Yoxuwa, naswona ndlela leyi va yi tekeke yi hi kombisa yini?
20 Malandza man’wana ya Yehovha a ma ri karhi ma n’wi tirhela hi malembe-xikhume layo tala, kumbexana vutomi bya wona hinkwabyo. Hambiloko ha ha ku amukela vugandzeri bya ntiyiso, a hi endleni kukotisa Kalebe wa Muisrayele, loyi a a “[chivirikela] ku lanḍa Yehova.” (Deteronoma 1:34-36) Yena na Yoxuwa a va tilulamisele swinene ku nghena eTikweni leri Tshembisiweke endzhakunyana ka ku ntshunxiwa ka Israyele evuhlongeni aEgipta. Hambiswiritano, hi ku angarhela, vanhu va Israyele lava kuleke a va kayivela ripfumelo, kutani va boheke ku heta malembe ya 40 emananga, laha va feleke kona. Kalebe na Yoxuwa va tiyiselele ku nonon’hweriwa va ri swin’we na vona, kambe eku heteleleni vavanuna lavambirhi va nghenile etikweni ra xitshembiso. (Tinhlayo 14:30-34; Yoxuwa 14:6-15) Loko hi ‘landzela Yehovha hi ku helela’ naswona hi tshama hi xalamukile hi tlhelo ra moya, hi ta va ni ntsako wo nghena emisaveni leyintshwa ya Xikwembu leyi tshembisiweke.
21. I yini leswi hi nga ta swi kuma loko hi tshama hi xalamukile hi tlhelo ra moya?
21 Vumbhoni byi swi veka erivaleni leswaku hi hanya enkarhini wa makumu, ni leswaku siku ra Yehovha lerikulu ri tshinele. Lowu a hi wona nkarhi wo etlela ni ku honisa ku endla ku rhandza ka Xikwembu. Hi ta katekisiwa ntsena loko hi tshama hi xalamukile hi tlhelo ra moya naswona hi hlayisa tinguvu ta hina leti hi kombisaka tanihi vatirheli va Vukreste ni malandza ya Yehovha. Onge hi nga tiyimisela ku “tiya swinene eku pfumeleni, [h]i va vavanuna, [h]i tinyika matimba.” (1 Vakorinto 16:13) Leswi hi nga malandza ya Yehovha, un’wana ni un’wana wa hina a a yime a tiyile ni ku va ni xivindzi. Kutani, hi ta va exikarhi ka lava nga ta va va lunghekile loko siku ra Yehovha lerikulu ri fika hi ri karhi hi tirha swin’we ni lava tsakeke, lava tshamaka va xalamukile.
A Wu Ta Hlamurisa Ku Yini?
◻ U nga ti hlamusela njhani tinguvu ta hina ta le handle to fanekisela, naswona hina vini hi nga ti hlayisa njhani?
◻ Hi tihi tindlela tin’wana to tshama u xalamukile hi tlhelo ra moya?
◻ Ha yini hi fanele hi langutela leswaku ku va ni vahlekuri, naswona hi fanele hi va languta njhani?
◻ Hi fanele hi wu languta njhani ntirho wa hina wo endla vadyondzisiwa emasikwini lawa ya makumu?
[Marito lama tshahiweke exihlokweni lama nga eka tluka 16]
Vakreste va ni moya wa Xikwembu lowo kwetsima lowu va pfunaka leswaku va tshama va xalamukile ni ku tirha mintirho ya vona
[Xifaniso lexi nga eka tluka 15]
Xana u tiyimiserile ku tshama u xalamukile hi tlhelo ra moya ni ku hlayisa tinguvu ta wena ta le handle to fanekisela?