Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w92 6/15 matl. 4-7
  • Nkutsulo Lowu Kutsulaka Lavo Tala

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Nkutsulo Lowu Kutsulaka Lavo Tala
  • Xihondzo xo Rindza Xi Huwelela Mfumo Wa Yehovha—1992
  • Swihloko
  • Tinhlokomhaka Tin'wana Leti Yelana Na Yona
  • Ku Sirhelela Ni Ku Ntshunxa
  • Nkutsulo Lowu Faneleke
  • Munhu Un’we eMatshan’wini Ya Lavo Tala
  • Lunghiselelo Ra Nkutsulo Na Wena
  • Nkutsulo Lowu Faneleke Eka Hinkwavo
    Xihondzo xo Rindza Xi Huwelela Mfumo Wa Yehovha—1991
  • Yehovha U Lunghiselele “Nkutsulo Wa Lavo Tala”
    Tshinela Eka Yehovha
  • Nkutsulo I Nyiko Ya Nkoka Leyi Humaka Eka Xikwembu
    Xana Bibele Yi Dyondzisa Yini Hakunene?
  • Nkutsulo I Nyiko Leyinene Ngopfu Leyi Humaka Eka Xikwembu
    I Yini Leswi Hi Nga Swi Dyondzaka eBibeleni?
Vona Swo Tala
Xihondzo xo Rindza Xi Huwelela Mfumo Wa Yehovha—1992
w92 6/15 matl. 4-7

Nkutsulo Lowu Kutsulaka Lavo Tala

HI MARCH 31, 1970, xihaha-mpfhuka xi tlhakisiwile ekusuhi ni Ntshava ya Fuji eJapani. Swirho swa kaye swa ntlawa lowu tiviwaka tanihi Japanese Red Army Faction swi teke vakhandziyi lava tlulaka 120 ni swirho swa vatirhi tanihi vakhomiwa naswona va sindzisa ku ya eN’walungwini wa Korea va hlayisekile.

Loko xihaha-mpfhuka xi phatsama eSeoul, eRiphabliki ra Korea, xandla xa holobye wa vutleketli wa le Japani Shinjiro Yamamura u tihlawulele ku nghenisa vutomi bya yena ekhombyeni hikwalaho ka vabohiwa. Loko va pfumele ku famba na yena leswaku va ta hlayiseka, vatlhakisi va ntshunxe vabohiwa hinkwavo handle ka vafambisi wa xihaha-mpfhuka. Kutani va ye ePyongyang, laha va nga tinyikela eka valawuri va le N’walungwini wa Korea. Nkulukumba Yamamura ni mufambisi wa xihaha-mpfhuka endzhakunyana va tlhelele eJapani va nga vavisiwanga.

Emhakeni leyi, munhu un’we u tirhe ku ponisa vutomi bya vabohiwa lava tlulaka 120. Leswi swi nga hi pfuna ku vona ndlela leyi munhu a nga nyikelaka vutomi bya yena ha yona tanihi nkutsulo lowu kutsulaka lavo tala. Leswaku hi ta twisisa dyondzo ya Bibele ya nkutsulo hi fanele hi kambisisa mhaka leyi hi rixaladza.

Xo sungula, hi fanele hi lavisisa hi vuenti masungulo ya xidyoho. “Kukotisa leswi ku dyoha ku ngheneke emisaveni hi munhu a ri un’we, kutani ni rifu ri ngheneke hikwalaho ka ku dyoha, hi mukhuva wolowo rifu ri tlulele vanhu hinkwavo, hikuva hinkwavo va dyohile,” ku hlamusela Bibele. (Varhoma 5:12) Swi endleke njhani sweswo? Wanuna la boxiweke kwalaho a a ri Adamu, munhu wo sungula ku vumbiwa. U nga ha hlaya timhaka ta matimu ya ntumbuluko wa yena ni leswi nga n’wi endla leswaku a hambukela swiringanyeto swa Xikwembu. Leswi swi hlamuseriwe eka tindzima tinharhu to sungula ta Bibele ta buku ya Genesa.

Mhaka ya Genesa yi paluxa leswaku a ku ri ni muhlohloteri loyi a a nga vonaki loko Adamu a sungula ku endla xidyoho. Leswaku a anerisa ku navela ka yena ko fuma, mukuceteri yoloye u kunguhate ku fuma Adamu ni vana van’wana ni van’wana lava a a ta va veleka. Mukuceteri yoloye a a ri Sathana Diyavulosi. Naswona u vuriwa “nyoka ya khale” hikuva u tirhise nyoka loko a dyohisa Adamu. (Nhlavutelo 12:9) Hambi leswi Mutumbuluxi la rhandzaka vanhu a byeleke Adamu ku xixima mfanelo ya Yena eka ku endla leswinene ni leswo biha, nyoka yi xise nsati wa Adamu, Evha, leswaku a nga yingisi Xikwembu. Kutani yena u hlohlotele nuna wa yena ku nga yingisi. Hi ku teka goza rolero, Adamu u lave ku ntshunxeka eka Xikwembu, a dyoha hi vomu, naswona a a ta hundzisela vutomi bya muxaka wolowo eka vana va yena.

Ha ha tokota vuyelo bya kona. Njhani? Phela, Mutumbuluxi u lerisile leswaku loko Adamu na Evha vo hlawula ku nga yingisi hi vomu, vuyelo byi ta va rifu. Hikokwalaho, hi ku dyoha Adamu u xavise vanhu hinkwavo leswaku va va mahlonga ya xidyoho ni rifu. Genesa 2:17; 3:1-7.

Xana vanhu a va ta kutsuriwa njhani eka xiyimo xexo xa vudyoho? Yesu Kriste u te emisaveni “ku tirhela van’wana ni ku nyiketa vutomi bya yena ku kutsula lavo tala,” naswona leswi swi pfule ndlela yo kutsula vanhu.—Matewu 20:28.

Ku Sirhelela Ni Ku Ntshunxa

Bibele yi komba leswaku endlelo ro kutsula vanhu ri katse magoza mambirhi: (1) Ku xava nakambe ni ku (2) ntshunxa. Malunghana ni rito ra Xigriki (lyʹtron) leri hundzuluxeriweke va ku “nkutsulo,” mudyondzi wa Bibele Albert Barnes u tsarile: “Rito nkutsulo hi ku kongoma ri vula ntsengo lowu hakeleriwaka ku kutsula mahlonga. Enyimpini, loko vabohiwa va tekiwa hi nala, mali leyi lavekaka eku va ntshunxeni yi vuriwa nkutsulo; swi vula leswaku, i nchumu lowu va ntshunxaka. Kutani xin’wana ni xin’wana lexi ntshunxaka un’wana ni un’wana eku xupuriweni, kumbe eku xanisekeni, kumbe exidyohweni, xi vuriwa nkutsulo.”

Ina, “xin’wana ni xin’wana lexi ntshunxaka un’wana ni un’wana” xi nga vuriwa lyʹtron. Kutani rito leri ra Xigriki ri kandziyisa xiendlo kumbe endlelo ro ntshunxa.a

Muapostola Pawulo u tirhise rito leri fambelanaka ni leri nga boxiwa an·tiʹly·tron ku kandziyisa nkoka wa ntsengo lowu hakeriweke tanihi nkutsulo. Eka 1 Timotiya 2:6, u tsale leswaku ‘[Yesu] u tinyiketele ku va mukutsuri wa vanhu hinkwavo.’ Loko yi hlamusela leswi Greek and English Lexicon to the New Testament ya Parkhurst yi ri: “Ri fanekisela kahle ntsengo lowu kutsulaka vabohiwa eka nala; ni muxaka lowuya wo ponisa laha vutomi bya munhu un’wana byi ponisiwaka hi vutomi bya un’wana.” Laha ku kandziyisiwa xivumbeko lexi faneleke kumbe matimba ya ntsengo wa nkutsulo lowu hakeriweke eku ringaniseleni ka vululami bya Yehova lebyi hetisekeke. Hikwalaho ka yini gandzelo ra Yesu ri vuriwa ‘nkutsulo lowu faneleke’?

Nkutsulo Lowu Faneleke

Adamu u xavise vanhu hinkwavo eka xidyoho ni rifu, ku katsa na hina. Ntsengo kumbe xigwevo lexi a xi hakeleke a a ku ri vutomi bya yena lebyi hetisekeke, lebyi nga ni vuswikoti byo hanya hi laha ku nga heriki. Leswaku ku siviwa leswi, vutomi bya munhu un’wana la hetisekeke—nkutsulo lowu faneleke—a byi fanele byi nyikeriwa. Hambi swi ri tano, ku hava la velekiwaka hi munhu la nga hetisekangiki la nga nyikelaka vutomi bya munhu lebyi hetisekeke hi laha ku fanelaka. (Yobo 14:4; Psalma 51:5) Hambi swi ri tano, hi vutlhari bya xona, Xikwembu xi pfule ndlela yo huma ha yona eka ntshikilelo lowu. Xi hundzisele vutomi lebyi hetisekeke bya N’wana wa xona la nga un’we byi huma etilweni xi byi yisa ekhwirini ra wanhwana, a n’wi pfumelela ku velekiwa tanihi munhu la hetisekeke. (Luka 1:30-38; Yohane 3:16-18) Dyondzo leyi ya Yesu yo velekiwa hi wanhwana a hi ntsheketo lowu sunguleriweke ku tlakusa musunguri wa vukhongeri. Ku ri na sweswo, yi hlamusela goza leri twalaka ra lunghiselelo ra Xikwembu ra nkutsulo.

Leswaku a hetisisa ku kutsula loku, Yesu a a fanele ku hlayisa rhekhodo leyi baseke minkarhi hinkwayo loko a ri emisaveni. U swi endlile leswi. Kutani a fa rifu ra gandzelo. Hi ndlela leyi, Yesu u hakele ntsengo wa vutomi bya yena lebyi hetisekeke tanihi nkutsulo wa vanhu. (1 Petro 1:19) Hi nga vula hi laha ku kongomeke leswaku “munhu un’we u fele hinkwavo.” (2 Vakorinto 5:14) Ina, “leswi hinkwavo va faka hikwalaho ka Adamu, hi mukhuva wolowo, hinkwavo va ta tlhela va pfuxiwa hikwalaho ka Kriste.”—1 Vakorinto 15:22.

Munhu Un’we eMatshan’wini Ya Lavo Tala

Emhakeni ya ku tlhakisa leyi boxiweke eku sunguleni, mahlonga a ma nga ri na ndlela yo tintshunxa, hambi loko ma fumile. A ku laveka mpfuno lowu humaka ehandle, naswona munhu la tirhaka tanihi muponisi a a fanele ku fikelela swiyimo swo karhi. Leswi swi ve tano hi ndlela leyi hlamarisaka malunghana ni nkutsulo lowu a wu laveka eku kutsuleni ka vanhu. Mupisalema u tsarile: “V̌a tiḍunisa hi v̌ukulu bya ku fuwa ka v̌ona. Munhu a nga ŝi koti ku kuṭula makwav̌o, hambi ku ri ku humesela Šikwembu e nṭengo wa yena. Nṭengo wa moya wa v̌ona wu dura ngopfu; munhu u ta ṭanḍeka ku wu humesa, ni siku riṅwe.” (Psalma 49:6-8) Hakunene, a a ku laveka mpfuno lowu humaka ehandle lowu a wu ta pfuna vanhu. Vutomi bya munhu un’we a byi ringene ku kutsula vanhu hinkwavo ntsena loko munhu yoloye a fikelela swiyimo leswi lavekaka eku ringaniseleni ka vululami bya Xikwembu lebyi hetisekeke. Yesu Kriste a a ri yena munhu ntsena la hetisekeke ku va a fikelela timfanelo teto.

Yehova Xikwembu u ntshunxe vanhu hi nkutsulo lowu nga nyikeriwa hi Yesu Kriste. Kambe Xikwembu xi endle swo tlula leswi. Xi gweve Sathana Diyavulosi, loyi a yiseke vanhu exidyohweni, hi rifu. (Nhlavutelo 12:7-9) Ku nga ri khale Yehova u ta pfalela mudyohi yoloye naswona eku heteleleni a n’wi avanyisa hi ku n’wi ‘hoxa etiveni ra ndzilo ni xivavula,’ leswi fanekiselaka ku heriseriwa makumu. (Nhlavutelo 20:1-3, 7-10, 14) Loko ku herisiwe xivumbiwa lexo biha xa moya ni ku tirhisiwa ka nkutsulo, vanhu va nge tsakeli ku ponisiwa eka matimba ya xidyoho ni rifu ntsena, kambe ni ku ponisiwa eka nkucetelo wa Sathana. Vanhu lava yingisaka va ta ya emahlweni eka vumunhu lebyi hetisekeke loko va ntshunxiwile naswona mfanelo ya gandzelo ra nkutsulo wa Kriste yi tirhisiwa hi laha ku heleleke.

Lunghiselelo Ra Nkutsulo Na Wena

Loko va dyondzile hi gandzelo ra nkutsulo wa Yesu Kriste, vo tala eVuxeni va swi tlangele swinene leswi Xikwembu xi va endleke swona. Kazuo i un’wana wa vona. Vutomi bya yena a byi titshege hi ku dzaha ni ku pyopyiwa hi xiolovisi xa pende. Loko a chayela a pyopyiwile a a tshamela ku chayisisa mimovha ya yena. Vanghana va yena vanharhu va tisungile endzhaku ka loko va onhe rihanyo ra vona. Kazuo na yena u ringete ku tisunga. Endzhakunyana, u sungule ku dyondza Bibele. Hi ku susumetiwa hi ntiyiso lowu a wu dyondzeke, u bohe ku basisa vutomi bya yena. U lwisane ni mukhuva wa yena wo onha miri hi xiolovisi xa pende naswona a ku ri ni swihinga swo tala. A a ri ni xiphiqo hikwalaho ka ku navela ka yena ka nyama ni ku rhandza ku endla leswinene. Mawaku ndlela leyi a tsakeke ha yona hi ku kota ku khongela eka Xikwembu a kombela ku rivaleriwa hi ku tirhisa matimba ya gandzelo ra nkutsulo wa Yesu Kriste! Hi xikhongelo ni mpfuno lowu humaka eka vanghana va Vakriste, Kazuo u hlule mahanyelo yakwe yo biha, naswona sweswi u le ku tirheleni ka Yehova tanihi nandza la tsakeke hi ripfalo leri baseke.

Wa n’wi tsundzuka Chisako, la boxiweke exihlokweni lexi hundzeke? Hi dyondzo ya Bibele, na yena u ri twisisile lunghiselelo ra rirhandzu ra nkutsulo. U khumbeke swinene loko a dyondza leswaku Xikwembu xi nyikele n’wana wa xona ku ntshunxa vanhu eka xidyoho. Chisako u nyikele vutomi bya yena eka Yehova. Na sweswi, a ri ni malembe ya 77, u heta kwalomu ka tiawara ta 90 n’hweti yin’wana ni yin’wana a ri ku byeleni ka van’wana hi rirhandzu lerikulu ra Yehova ni tintswalo leti nga hi fanelangiki leti a ti kombiseke.

Nkutsulo wu fanele wu va wa nkoka ni le ka wena. Ha wona, Xikwembu xi ta pfula ndlela yo yisa vanhu entshunxekweni wa ntiyiso—ntshunxeko eka xidyoho ni rifu. Vumundzuku lebyinene lebyi nga vutomi lebyi nga heriki eparadeyisini emisaveni byi rindzele lava amukelaka gandzelo ra nkutsulo ra Yesu Kriste. Tihlanganise ni Timbhoni ta Yehova kutani u tikambisisela ndlela leyi u nga wu kumaka ha yona ntshunxeko eka xidyoho ni rifu hi lunghiselelo ra nkutsulo ra rirhandzu.

[Nhlamuselo ya le hansi]

a Ematsalweni ya Xiheveru, pa·dhahʹ ni marito lama fanaka na rona ma hundzuluxeriwe va ku “ku kutsula” kumbe “ntsengo wo kutsula,” ma kandziyisa ku ntshunxa loku katsekeke.—Deuteronoma 9:26.

[Laha Xifaniso Xi Humaka Kona eka tluka 5]

Courtesy of the Mainichi Shimbun

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela