Swivono Swa Tiko Leri Tshembisiweke

Ku Ya eShilo—Vana Lavanene Ni Lavo Biha

LOKO u anakanya hi madoroba-nkulu, madoroba, kumbe tindhawu ta le Tikweni leri Tshembisiweke, xana wa va tsundzuka vavanuna ni vavasati lava xiyekaka? Kumbexana wa va tsundzuka, hikuva timhaka to tala ta Bibele ngopfu-ngopfu ti katsa vanhu lavakulu. Kambe ku vuriwa yini hi vana va nkarhi wolowo? Xana wa va vona swivonweni hi mahlo ya mianakanyo?

Xivono lexi nga laha henhla xi nga hi pfuna ku tsundzuka timhaka leti katsaka vantshwa, lava van’wana va vona a va ri xikombiso lexinene eka Vakreste ni van’wana lava a va ri xikombiso lexi tsundzuxaka. Xintshabyana lexi nga xikarhi xi vonaka xi ri ndhawu ya Shilo.a

Kumbexana wa swi tsundzuka leswaku loko tiko ra Israyele ri nghena eTikweni leri Tshembisiweke, ri sungule ri veka tabernakele ya Xikwembu eGiligala ekusuhi ni le Yeriko. (Yoxuwa 4:19) Kambe loko tiko leri ri aviwa, tende leri ro kwetsima—xivandla xa vugandzeri bya Israyele—ri tisiwe laha eShilo. (Yoxuwa 18:1) Laha a a ku ri kwalomu ka tikhilomitara ta 30 en’walungwini wa Yerusalema endhawini ya tintshava ya Efrayimi. Vavanuna ni vavasati lava humaka etindhawini hinkwato ta Israyele a va endzela eShilo; vunyingi lebyikulu a byi hlengeletana enkoveni edzongeni laha kumbexana tabernakele a yi vekiwa kona. (Yoxuwa 22:12) Xana wa va vona vana hi mahlo ya mianakanyo va ri karhi va ta laha?

Van’wana va va vona. Xikombiso lexi xiyekaka swinene lexi hi faneleke hi xi tiva i xa Samuwele lontsongo. Vatswari va yena, Elkana na Hana, a va tshama emutini lowu nga endzhaku ka xintshabyana evupela-dyambu. Lembe na lembe a va endza va ta laha, kumbexana nsati un’wana wa Elkana a ta ni vana van’wana. Eku heteleleni Yehovha u katekise Hana hi n’wana, loyi a thyiweke Samuwele. Hi ku famba ka nkarhi vatswari va yena va n’wi tise eShilo leswaku a ta tirha etabernakeleni ni muprista lonkulu Heli.—1 Samuwele 1:1–2:11.

Mufana loyi a a ri na ntirho lowu a fanele ku wu endla endlwini ya Xikwembu, kutani a nga ha va a ve ni malunghelo yo tala yo khandziya swintshabyana swa le kusuhi. (1 Samuwele 3:1, 15) Swin’wana swa swona a swi tlhumile, swi tele hi mirhi ya mitlhwari, hi laha swi voniwaka ha kona exifanisweni lexi nga eka tluka 9. Vona xihondzo lexitsongo xa ribye. Varimi lava nga voxe kumbe varisi va rindza va ri henhla ka xihondzo xo fana ni xexo, kambe u nga vona Samuwele lontsongo hi mahlo ya mianakanyo a ri ku khandziyeni leswaku na yena a languta. (Ringanisa 2 Tikronika 20:24.) Leyi yi nga va ndhawu leyinene yo languta eka yona swiharhi swa nhova.

Enkarhini wolowo, a a ku ri ni mirhi yo tala ku tlula leyi nga kona sweswi, ku katsa ni swihlahla laha swihari swa nhova a swi famba-famba kona. (Yoxuwa 17:15, 18) Leswi hi swi tiva hikwalaho ka khombo leri humeleleke loko Elixa a va muprofeta lonkulu wa Xikwembu. Elixa a huma hi le Yeriko a ya etlhelo ra le Bethele, kutani a a ri endhawini leyi ku nga tikhilomitara ta 16 ku suka edzongeni wa Shilo. Xana a a ta amukerisiwa ku yini hi vanhu va le Bethele, laha a a ku ri ndhawu-nkulu ya vugandzeri bya rhole ra nsuku? (1 Tihosi 12:27-33; 2 Tihosi 10:29) Handle ko kanakana vanhu lavakulu a va kaneta vaprofeta va Yehovha naswona swi vonaka onge langutelo ra vona a ri nghene ni le ka vana va vona.

Tihosi ta Vumbirhi 2:23, 24 yi hi byela leswaku ntlawa wa vantshwa wu hlekule muprofeta wa Xikwembu: “Tlhandluka, wee mpandla! tlhandluka wee mpandla!” Loko a angula, Elixa “a v̌a rukana hi v̌ito ra Yehova. Kutani mabere mambiri ma huma e šihlahleni, ma hanḍula v̌arisanyana v̌a mune wa makume na v̌ambiri e šikari ka v̌ona.” Tibere ta buraweni ta le Siriya ta hlundzuka loko ti jumiwa kumbe loko vana va tona va hlaseriwa. (2 Samuwele 17:8; Swivuriso 17:12; 28:15) Xikwembu xi ti tirhise ku hetisisa ku avanyisa ka xona ehenhla ka lava sandzaka hi vomu vayimeri va xona, hi ku endla sweswo va sandza Yehovha hi yexe.

Ku tiva leswaku n’wana a nga ha hlangana ni swiharhi swo tano swa nhova eswintshabyanini eShilo, swi fanele swi hi pfuna ku tlangela swinene ripfumelo leri vatswari va Samuwele va ri kombiseke hi ku n’wi tisa leswaku a tirha etabernakeleni.

Mugandzeri un’wana wa ntiyiso eku sunguleni u kombise ripfumelo leri fanaka ni rero ni ku tinyikela—Muavanyisi Yefta. A tshama etikweni ra swintshabyana ra Giliyadi hi tlhelo ra vuxa bya Yordani. Hikwalaho ka leswi a hisekela Yehovha ni hikwalaho ka Vaamoni lava nga valala, Yefta u hlambanye leswaku loyi a nga ta rhanga ku huma endlwini ya yena a n’wi hlanganisa u ta n’wi nyika Yehovha. Nhwana wa yena u ve wo rhanga ku huma. Kutani u yise n’wana wa yena la nga un’we exikwetsimiselweni le Shilo, laha a nga tshama a tlhela a tirha kona malembe yo tala.—Vaavanyisi 11:30-40.

Ku tinyikela ko tshembeka loku Samuwele na n’wana wa Yefta va ku kombiseke endhawini ya Shilo ku hambane swinene ni xikombiso xo biha xa vana lava nga yingisiki va 42 lava hlekuleke muprofeta wa Yehovha endhawini leyi.—Ringanisa 1 Vakorinto 10:6, 11.

[Nhlamuselo ya le hansi]

[Laha Xifaniso Xi Humaka Kona eka tluka 8]

Pictorial Archive (Near Eastern History) Est.

[Laha Xifaniso Xi Humaka Kona eka tluka 9]

Pictorial Archive (Near Eastern History) Est.

[Laha Xifaniso Xi Humaka Kona eka tluka 9]

Safari Zoo, Ramat-Gan, Tel Aviv