Yehovha A Nga Fanelanga Ku Voniwa Nandzu
“Hi laha tatana a nga ni tintŝalo e ka v̌ana v̌a yena, hi ŝeŝo Yehova o ni tintŝalo e ka la’v̌a ṅwi tšhav̌aka. Hikuv̌a wa tiv̌a leši hi endliweke ha šona, wa ṭunḍuka leŝaku hi nṭhuri ntsena.”—PISALEMA 103:13, 14.
1, 2. Abrahama a a ri mani, naswona swi tise ku yini leswaku Lota, n’wana wa makwavo wakwe a ya tshama emutini lowo homboloka wa Sodoma?
YEHOVHA a nga na vutihlamuleri eka swiphiqo leswi hi nga swi tokotaka hikwalaho ka swihoxo swa hina. Emhakeni leyi, xiya leswi humeleleke malembe ya kwalomu ka 3 900 lama hundzeke. Abrahama (Abrama) munghana wa Xikwembu na Lota n’wana wa makwavo wakwe va ve lava fuweke swinene. (Yakobo 2:23) Entiyisweni, rifuwo ni swifuwo swa vona a swi tele swinene lerova ‘swi nga koteki leswaku va tshama ndhawu yin’we.’ Ku tlula kwalaho, ku pfuke mholovo exikarhi ka varisi va vavanuna lava vambirhi. (Genesa 13:5-7) Xana a ku ta endliwa yini hi mhaka leyi ke?
2 Leswaku a herisa mholovo leyi, Abrahama u ringanyete leswaku va hambana, naswona a pfumelela Lota leswaku ku rhanga yena a hlawula ndhawu leyi a yi lavaka. Hambi leswi Abrahama a a ri mukhalabye, laha a swi ta va swi fanerile leswaku n’wana wa makwavo wakwe a n’wi pfumelela ku teka ndhawu leyinene, Lota u hlawule ndhawu leyi rhandzekaka—ndhawu leyi taleke mati ya le Nkoveni wa Yordani. Ku languteka ka yona ka le handle a ku kanganyisa, hikuva ekusuhi na kona a ku ri ni miti leyi nga ni mahanyelo lama boleke ya Sodoma na Gomora. Lota ni ndyangu wakwe va hetelele va rhurhele eSodoma, naswona leswi swi va nghenise ekhombyeni hi tlhelo ra moya. Ku tlula kwalaho, va yisiwe evuhlongeni loko Hosi Kedoro-Lawomere ni vanakulobye vakwe va hlule mufumi wa Sodoma. Abrahama ni vavanuna vakwe va va ponisile, kambe Lota ni ndyangu wa yena va tlhelele eSodoma.—Genesa 13:8-13; 14:4-16.
3, 4. Ku humelele yihi hi Lota na swirho swa ndyangu wa yena loko Xikwembu xi lovisa Sodoma na Gomora?
3 Hikwalaho ka rimbewu leri hombolokeke ni mahanyelo layo biha ya Sodoma na Gomora, Yehovha u fikelele makumu yo herisa miti yoleyo. Hi tintswalo u rhumele tintsumi timbirhi eka Lota, nsati wa yena ni vana va vona vambirhi va xisati leswaku ti va humesa eSodoma. A va nga fanelanga ku languta endzhaku, kambe nsati wa Lota u endle tano, kumbexana a tsundzuka swilo leswi vonakaka leswi a swi siyeke. Hi nkarhi wolowo, u hundzuke tshuka ra munyu.—Genesa 19:1-26.
4 Vona swiphiqo swa ku lahlekeriwa leswi Lota ni vana vakwe va xisati a va fanele ku swi tiyiselela! Vanhwanyana lava va boheke ku siya vavanuna lava a va ta tekana na vona. Lota se a a lahlekeriwe hi nsati wakwe ni rifuwo ra yena ra swilo leswi vonakaka. Entiyisweni, u hetelele a boheka ku ya tshama ebakwini ni vana va yena va xisati. (Genesa 19:30-38) Leswi a swi vonaka swi sasekile swinene eka yena swi kumeke swi bihile. Hambi leswi entiyisweni a endleke swihoxo swo karhi leswikulu, endzhaku u vuriwe “Lota munhu wo lulama.” (2 Petro 2:7, 8) Naswona entiyisweni Yehovha Xikwembu a a nga fanelanga ku voniwa nandzu hikwalaho ka swihoxo swa Lota.
“I Mani L’a Tiv̌aka Ku Hoša Ka Yena Šana?”
5. Davhida u titwise ku yini hi swihoxo ni ku tikukumuxa?
5 Tanihi leswi hi nga hetisekangiki ni leswi hi nga ni xidyoho, hinkwerhu ka hina ha swi endla swihoxo. (Varhoma 5:12; Yakobo 3:2) Ku fana na Lota, hi nga kanganyisiwa hi swivumbeko swa le handle naswona hi nga fikelela makumu lama hoxeke. Xisweswo, mupisalema Davhida u te: “I mani l’a tiv̌aka ku hoša ka yena šana? U nḍi khomela milanḍu leyi nḍi yi riv̌aleke. Kambe u hlayisa nanḍa wa wena e ka la’v̌a tikurisaka; v̌a nga ṭhuki v̌a nḍi fuma! Hi laha nḍi nga ta tenga, nḍi v̌a nḍi pfumala milanḍu le’mikulu.” (Pisalema 19:12, 13) Davhida a a swi tiva leswaku a nga swi endla swidyoho a nga swi xiyanga. Hikwalaho, u kombele ku rivaleriwa milandzu leyi na yena a nga yi xiyiki. Loko a endle xihoxo lexikulu hikwalaho ka leswi nyama ya yena leyi nga hetisekangiki yi n’wi hlohloteleke ku teka ndlela leyi hoxeke, u lave mpfuno wa Yehovha hi mbilu hinkwayo. U lave leswaku Xikwembu xi n’wi sivela ku endla mintirho ya ku tikukumuxa. Davhida a a nga swi lavi ku fumiwa hi ku tikukumuxa. Ku ri na sweswo, a a navela ku tinyiketela eka Yehovha Xikwembu hi ku helela.
6. Hi nga kuma nchavelelo wihi eka Pisalema 103:10-14?
6 Tanihi malandza ya manguva lawa ya Yehovha lama tinyiketeleke, na hina a hi hetisekanga, kutani ha swi endla swihoxo. Ku fana na Lota, hi nga kuma leswaku ndhawu leyi hi hlawuleke ku tshama eka yona a hi yinene. Kumbexana hi ala ku tirhisa nkarhi lowu hi pfulekeleke wo kurisa ntirho wa hina lowo kwetsima lowu hi wu endlelaka Xikwembu. Hambi leswi Yehovha a swi vonaka swihoxo swo tano, wa va tiva lava nga ni timbilu leti tiyimiseleke ku endla leswi lulameke. Hambi loko hi endla xidyoho lexikulu kambe hi hundzuka, Yehovha wa hi rivalela ni ku hi pfuna, a hambeta a hi languta tanihi vanhu lava n’wi chavaka. “A nga hi endlelanga hi mpimo wa ku dyoha ka hina, a nga hi rihisanga hi mpimo wa milanḍu ya hina,” ku vula Davhida. “Hikuv̌a hi laha matilo ma tlakukeke henhla ka misav̌a, hi ŝeŝo nsov̌o wa yena wu kurile henhla ka la’v̌a ṅwi tšhav̌aka; hi laha vuša byi hambaneke ni v̌upeladyambu, o hambanyisile ŝeŝo e ku dyoha ka hina kule na hina. Hi laha tatana a nga ni tintŝalo e ka v̌ana v̌a yena, hi ŝeŝo Yehova o ni tintŝalo e ka la’v̌a ṅwi tšhav̌aka. Hikuv̌a wa tiv̌a leši hi endliweke ha šona, wa ṭunḍuka leŝaku hi nṭhuri ntsena.” (Pisalema 103:10-14) Tata wa hina wa le tilweni loyi a nga ni tintswalo nakambe a nga hi pfuna leswaku hi lulamisa xihoxo xa hina kumbe a hi nyika nkarhi lowu engetelekeke wo engetela ntirho wa hina lowo kwetsima, leswaku ku dzunisiwa yena.
Xihoxo Xa Ku Vona Xikwembu Nandzu
7. Ha yini hi tokota maxangu?
7 Loko swilo swi nga fambi kahle, hi ntolovelo munhu u vona un’wana kumbe nchumu wo karhi nandzu hikwalaho ka leswi humeleleke. Van’wana va vona ni Xikwembu nandzu. Kambe Yehovha a nga tisi swiphiqo swo tano eka vanhu. U endla swilo leswinene, hayi leswo biha. Phela “ú tsuvukisa dyambu ra yena ehenhla ka lavo biha ni lavanene, ú nisa mpfula ehenhla ka lavo lulama ni lavo homboloka”! (Matewu 5:45) Xivangelo lexikulu xa mhaka leyi ha yona hi tokotaka maxangu hi leswi hi hanyaka emisaveni leyi hanyaka hi misinya ya milawu ya vutianakanyi ni leyi fumiwaka hi Sathana Diyavulosi.—1 Yohane 5:19.
8. Adamu u endle yini loko swilo swi nga n’wi fambeli kahle?
8 Ku vona Yehovha Xikwembu nandzu hikwalaho ka swiphiqo leswi swihoxo swa hina swi hi tiselaka swona i vuphukuphuku naswona swi na khombo. Ku endla tano swi nga koxa ni vutomi bya hina. Munhu wo sungula, Adamu, a a fanele a dzunise Xikwembu hikwalaho ka swilo hinkwaswo leswinene leswi a swi kumeke. Ina, Adamu a a fanele a tlangerile Yehovha swinene hikwalaho ka vutomi hi byoxe ni mikateko leyi a yi kumeke ekaya leri fanaka ni phaka, ku nga ntanga wa Edeni. (Genesa 2:7-9) Xana Adamu u endle yini loko swilo swi nga fambanga kahle hikwalaho ka leswi a nga yingisangiki Yehovha kutani a dya mihandzu leyi yirisiweke? Adamu u yise xivilelo eka Xikwembu a ku: “Hi yena wansati loyi u nga nḍi nyika yena a v̌a na mina, l’a nga nḍi ha muri, nḍi dya.” (Genesa 2:15-17; 3:1-12) Kunene, a hi fanelanga hi vona Yehovha nandzu, hi laha Adamu a endleke ha kona.
9. (a) Loko hi kuma swiphiqo hikwalaho ka swiendlo swa hina swa vuphukuphuku, hi nga kuma nchavelelo eka yini? (b) Ku ya hi Swivuriso 19:3, van’wana va endla yini loko va titisela swiphiqo?
9 Loko hi kuma swiphiqo hikwalaho ka swiendlo swa hina swa vuphukuphuku, hi nga chaveleriwa hi ku tiva leswaku Yehovha u twisisa ku tsana ka hina ku antswa ku tlula ndlela leyi hina hi ku twisisaka ha yona, naswona u ta hi kutsula emaxangwini ya hina loko hi tinyiketela eka yena hi laha ku heleleke. Hi fanele hi tlangela mpfuno lowu humaka eka Xikwembu lowu hi wu kumaka, hi nga voni Xikwembu nandzu ni siku na rin’we hikwalaho ka swiphiqo ni swirhalanganya leswi hi titiselaka swona. Emhakeni leyi xivuriso xa vutlharhi xi ri: “V̌uhunguki bya munhu byi ṅwi hambukisa ndlela, mbilu ya yena yi hlunamela Yehovha.” (Swivuriso 19:3) Ku hundzuluxela kun’wana ku ri: “Vanhu van’wana va tinghenisa ekhombyeni hi swiendlo swa vona vini swa vuhunguki ivi va vona HOSI nandzu.” (Today’s English Version) Kasi ku hundzuluxela kun’wana ku ri: “Vuhunguki bya munhu byi onha timhaka ta yena, kutani a hlunamela Yehovha.”—Byington.
10. Vuphukuphuku bya Adamu byi yi ‘gombonyokise njhani ndlela ya yena’?
10 Hi ku fambisana ni nsinya wa nawu wa xivuriso lexi, Adamu u endle xiendlo xa vutianakanyi naswona mianakanyo ya yena ya vuhunguki ‘yi n’wi hambukisile endleleni ya yena.’ Mbilu ya yena yi fularhele Yehovha Xikwembu, kutani a tisungulela ndlela ya yena n’wini ya vutianakanyi, ya ku tilawula. Phela Adamu u ve munhu loyi a nga tlangeriki lerova a vona Muvumbi wa yena nandzu ivi xisweswo a tiendla nala wa La Tlakukeke! Xidyoho xa Adamu xi onhe ndlela ya yena n’wini ni ya ndyangu wa yena. Vona xitsundzuxo lexi xi nga kona emhakeni leyi! Lava va toloveleke ku vona Yehovha nandzu hikwalaho ka swiyimo leswi nga tsakisiki va fanele ku tivutisa swivutiso leswi landzelaka: Xana ndza xi dzunisa Xikwembu hikwalaho ka swilo leswinene leswi ndzi swi kumaka? Xana ndza xi tlangela hikwalaho ka leswi ndzi nga ni vutomi tanihi xin’wana xa swivumbiwa swa xona? Xana ku nga va ku ri swihoxo swa mina leswi ndzi tiseleke xiphiqo? Xana swi fanerile leswaku ndzi tsakeriwa ni ku pfuniwa hi Yehovha hikwalaho ka ku landzela vukongomisi bya yena, hi laha byi andlariweke ha kona eRitweni ra yena leri huhuteriweke, ku nga Bibele?
Khombo Leri Fikelaka Ni Malandza Ya Xikwembu
11. Malunghana na Xikwembu, varhangeri va vukhongeri bya Vayuda va lembe xidzana ro sungula a va ri ni nandzu wa yini?
11 Varhangeri va vukhongeri bya Vayuda va lembe xidzana ro sungula C.E. va tivule lava tirhelaka Xikwembu, kambe va honise rito ra xona ra ntiyiso, va titshega hi ku twisisa ka vona vini. (Matewu 15:8, 9) Hikwalaho ka leswi Yesu Kreste a paluxeke mianakanyo ya vona leyi hoxeke, va n’wi dlayile. Endzhaku, va kombise rivengo lerikulu eka vadyondzisiwa va yena. (Mintirho 7:54-60) Ndlela ya vanhu volavo a yi hombolokile swinene lerova va karihela Yehovha hi byakwe.—Ringanisa Mintirho 5:34, 38, 39.
12. I xikombiso xihi lexi kombisaka leswaku ni vanhu van’wana lava hlanganyelaka ni vandlha ra Vukreste va ringeta ku vona Yehovha nandzu eka swiphiqo swa vona?
12 Hambi ku ri evandlheni ra Vukreste, vanhu van’wana va ngheniwe hi mianakanyo leyi nga ni khombo, va ringeta ku vona Xikwembu nandzu eka swiphiqo leswi va veke na swona. Hi xikombiso, vakulu lava vekiweke evandlheni rin’wana va swi kume swi fanerile ku nyikela ndzayo ya Matsalwa ya musa kambe leyi tiyeke eka wansati lontshwa loyi a tekiweke, ehenhleni ka ku tolovelana ni wanuna un’wana wa misava. Siku rin’wana loko va vulavula ha swona, u vone Xikwembu nandzu hi leswi xi nga n’wi pfunangiki ku lwisana ni ndzingo lowu tisiweke hi ku hambeta ka yena a tolovelana ni wanuna loyi. Entiyisweni u vule leswaku u hlundzukele Xikwembu! Ku anakanyisisa na yena hi Matsalwa ni matshalatshala lama phindha-phindhiweke ya ku n’wi pfuna a swi pfunanga nchumu, naswona mahanyelo layo biha endzhaku ma endle leswaku a hlongoriwa evandlheni ra Vukreste.
13. Ha yini hi fanele hi papalata langutelo ra ku tshamela ku vilela?
13 Moya wa ku tshamela ku vilela wu nga vangela munhu ku vona Yehovha nandzu. ‘Vanhu lava nga chaviki Xikwembu’ lava ngheneke evandlheni ra lembe xidzana ro sungula a va ri ni moya wo biha wa muxaka wo tano, naswona ku tlhandlekela eka moya lowu, a va ri ni mianakanyo yin’wana leyi hombolokeke hi tlhelo ra moya. Hi laha mudyondzisiwa Yuda a vuleke ha kona, vavanuna lava a va “gombonyokisa tintswalo ta Xikwembu xa hina, va endla swa manyala ha tona, naswona va landzula Yesu Kriste, yena N’wini wa hinkwaswo ni Hosi ya hina.” Nakambe Yuda u te: “Lava i vanhu vo tshamela ku ngurangureka ni ku vilela, lava susumetiwaka hi ku navela ka vona loko biha.” (Yuda 3, 4, 16) Malandza ya Yehovha lama tshembekaka hi vutlharhi ma ta khongelela leswaku ma va ni moya wa ku tlangela, hayi langutelo ra ku tshamela ku vilela leri ri nga hetelelaka hi ku va khunguvanyisa lerova va lahlekeriwa hi ripfumelo ra vona eka Xikwembu ni ku endla leswaku vuxaka lebyi va nga na byona na Xikwembu byi nghena ekhombyeni.
14. Munhu a nga endlisa ku yini loko a siringiwe hi Mukreste-kulobye, kambe ha yini leyi ku nga ri ndlela leyi faneleke?
14 U nga ha anakanya leswaku sweswo swi nge humeleli eka wena. Kambe swilo leswi nga fambiki kahle hikwalaho ka swihoxo swa hina vini kumbe swa van’wana eku heteleleni swi nga hi vangela ku vona Xikwembu nandzu. Hi xikombiso, munhu a nga siringiwa hi leswi mupfumeri-kulobye a swi vulaka kumbe ku swi endla. Munhu loyi a siringekeke—kumbexana loyi a tirheleke Yehovha hi ku tshembeka hi malembe layo tala—a nga ha ku: ‘Loko munhu luya a ha ri kona evandlheni, a ndzi nge yi eminhlanganweni.’ Munhu loyi a nga ha khunguvanyeka swinene lerova a vulavula hi mbilu a ku: ‘Loko ku endleka swilo swo fana ni leswi, a ndzi swi lavi ku va xirho xa vandlha leri.’ Kambe xana swi fanerile leswaku Mukreste a va ni langutelo rero? Loko u siringiwe hi munhu un’wana loyi a nga hetisekangiki, ha yini u hlundzukela vandlha hinkwaro ra vanhu lava amukelekaka eka Xikwembu ni lava va xi tirhelaka hi ku tshembeka? Ha yini munhu loyi a tinyiketeleke eka Yehovha a fanele ku tshika ku rhandza ka yena ivi a hlundzukela Xikwembu? Xana i vutlharhi ku pfumelela munhu kumbe swiyimo swo karhi swi herisa vuxaka bya wena lebyinene lebyi u nga na byona na Yehovha? Hakunene, a ku ta va vuphukuphuku ni xidyoho loko u tshika ku gandzela Yehovha Xikwembu hikwalaho ka xivangelo xo karhi.—Yakobo 4:17.
15, 16. Diyotrefo a a ri na nandzu wa yini, kambe xana Gayo a a tikhoma njhani?
15 Tianakanye u ri evandlheni rin’we na Gayo, Mukreste la rhandzekaka. A a ‘endla ntirho hi ku tshembeka’ loko a kombisa malwandla eka vagandzeri-kulobye lava endzaka—ku nga khathariseki leswi a ku ri vanhu lava a nga va tiviki! Kambe entiyisweni, evandlheni leri fanaka a ku ri na Diyotrefo, wanuna la tinyungubyisaka. Xin’wana ni xin’wana lexi a xi huma eka Yohane, un’wana wa vaapostola va Yesu Kreste, a a nga xi amukeli hi xichavo. Entiyisweni, Diyotrefo u tlhele a hleva Yohane hi marito yo biha. Muapostola u te: “Ehandle ka swona sweswo, [Diyotrefo] ú ala ni ku amukela vamakwerhu, a engeta a sivela lava navelaka ku va amukela, a va hlongola ni le [vandlheni, NW].”—3 Yohane 1, 5-10.
16 Loko Yohane a ya evandlheni, a a tiyimisele ku paluxa leswi Diyotrefo a a swi endla. Hi nkarhi lowu fanaka, xana Gayo ni Vakreste van’wana lava nga ni malwandla evandlheni rero va endlise ku yini ke? Ku hava laha Matsalwa ma kombisaka leswaku un’wana wa vona u te: ‘Loko Diyotrefo a ha ri kona evandlheni, a ndzi swi lavi ku va xirho xa rona. Mi nge ndzi voni eminhlanganweni.’ Handle ko tipfinyinga, Gayo ni van’wana lava fanaka na yena va tshame va tiyile. A va pfumelelanga nchumu leswaku xi va tshikisa ku endla ku rhandza ka Xikwembu, naswona entiyisweni a va n’wi hlundzukelanga Yehovha. Sweswo a va swi endlanga nikatsongo, naswona a va pfumelanga ku hluriwa hi mano ya vukanganyisi ya Sathana Diyavulosi, loyi ingi a tsakile loko a va hundzuke lava nga tshembekiki eka Yehovha ni lava vonaka Xikwembu nandzu.—Vaefesa 6:10-18.
U Nga Tshuki U Hlundzukela Yehovha!
17. Hi fanele hi endlisa ku yini loko munhu kumbe xiyimo xo karhi xi hi siringa kumbe ku hi hlundzukisa?
17 Hambi loko munhu wo karhi kumbe xiyimo xo karhi evandlheni xi hlundzukisa kumbe ku siringa nandza wa Xikwembu, loyi a siringekaka entiyisweni u ta va a onha ndlela ya yena n’wini loko a tshika ku hlanganyela ni vanhu va Yehovha. Munhu wo tano u ta va a nga tirhisi mianakanyo ya yena hi ndlela leyi faneleke. (Vaheveru 5:14) Kutani tiyimisele ku langutana ni swiphiqo hinkwaswo tanihi muhlayisi wa vutshembeki. Tshama u tshembekile eka Yehovha Xikwembu, Yesu Kreste ni vandlha ra Vukreste. (Vaheveru 10:24, 25) Ku hava kun’wana laha u nga kumaka ntiyiso lowu yisaka evuton’wini lebyi nga heriki.
18. Hambi leswi hi nga ti twisisiki minkarhi hinkwayo tindlela ta Xikwembu, hi nga tiyiseka ha yini malunghana na Yehovha Xikwembu?
18 Nakambe tsundzuka leswaku Yehovha a nga ringi munhu hi swilo leswo biha. (Yakobo 1:13) Xikwembu, lexi xi nga rirhandzu, xi endla leswi lulameke, ngopfu-ngopfu eka lava xi rhandzaka. (1 Yohane 4:8) Hambi leswi hi nga twisisiki tindlela ta Xikwembu hi minkarhi hinkwayo, hi nga tiyiseka leswaku Yehovha Xikwembu a nge hluleki ni siku na rin’we ku endlela malandza ya yena leswinene. Hi laha Petro a vuleke ha kona: “Hikokwalaho, titsongahateni ehansi ka voko ra matimba ra Xikwembu, leswaku hi nkarhi wa kona xi ta mi tlakusa. Rhulani ku karhateka hinkwako ka n’wina eka xona, hikuva xi tikarhatela n’wina.” (1 Petro 5:6, 7) Ina, Yehovha hakunene wa va khathalela vanhu vakwe.—Pisalema 94:14.
19, 20. Hi fanele hi endlisa ku yini, hambi loko miringo ya hina minkarhi yin’wana yi hi tshikilela?
19 Hikwalaho, u nga pfumeleli nchumu na wun’we kumbe munhu a ku khunguvanyisa. Hi laha mupisalema a swi vuleke kahle ha kona, “la’v̌a ranḍaka nawu wa [Yehovha Xikwembu] v̌a ni ku rula lo’kukulu, a ku na ku khunguv̌anyisa e ka v̌ona.” (Pisalema 119:165) Hinkwerhu ka hina hi hlangana na yona miringo, naswona minkarhi yin’wana yi nga hi vangela ku tshikileleka ni ku hela matimba. Kambe u nga pfumeleli mbilu ya wena yi karhateka, ngopfu-ngopfu hikwalaho ka Yehovha. (Swivuriso 4:23) Hi mpfuno wa yena na hi ku tirhisa Matsalwa, tlhantlha swiphiqo leswi kotekaka, u tiyiselela leswi hambetaka.—Matewu 18:15-17; Vaefesa 4:26, 27.
20 U nga tshuki u pfumelela minsusumeto ya wena yi ku vangela ku teka goza ra vuhunguki, xisweswo yi onha ndlela ya wena. Vulavula ni ku endla xo karhi hi mukhuva lowu nga ta tsakisa mbilu ya Xikwembu. (Swivuriso 27:11) Kombela Yehovha hi xikhongelo lexi humaka embilwini, u ri karhi u tiva leswaku wa ku khathalela hakunene tanihi un’wana wa malandza ya yena naswona u ta ku nyika ku twisisa loku lavekaka leswaku u tshama u ri endleleni ya vutomi ni vanhu va yena. (Swivuriso 3:5, 6) Ehenhla ka hinkwaswo, u nga xi hlundzukeli Xikwembu. Loko swilo swi nga fambi kahle, tsundzuka minkarhi hinkwayo leswaku Yehovha a nga fanelanga ku voniwa nandzu.
A Wu Ta Hlamurisa Ku Yini Ke?
◻ Lota u endle xihoxo xihi, kambe xana Xikwembu xi n’wi langute njhani?
◻ Davhida u titwe njhani hi swihoxo ni ku tikukumuxa?
◻ Ha yini hi nga fanelanga ku vona Xikwembu nandzu loko swilo swi nga fambi kahle?
◻ I yini lexi nga ta hi pfuna ku papalata ku hlundzukela Yehovha?
[Xifaniso lexi nga eka tluka 15]
Loko a hambana na Abrahama, Lota u endle xiboho lexi hoxeke malunghana ni ndhawu yakwe yo tshama eka yona