Lunghiselela Ku Kutsuleriwa eMisaveni Leyintshwa

“Tsundzukani ta nsati wa Lota.”—LUKA 17:32.

1. Hi xihi xikombiso lexi xiyekaka xa ku kutsula ka Xikwembu lexi dyondzo ya hina ya namuntlha yi xi kandziyisaka, naswona xana xi nga hi pfunisa ku yini?

ENDZHAKU ko vulavula hi ku kutsuriwa loku hlamarisaka loku Yehova a ku endleleke Nowa ni ndyangu wa yena, muapostola Petro u tshahe xikombiso xin’wana lexi xiyekaka. U kokele nyingiso eku ponisiweni ka Lota wo lulama loko Sodoma na Gomora ma hundzuriwa nkuma, hi laha hi hlayaka ha kona eka 2 Petro 2:6-8. Vuxokoxoko lebyi byi hlayiseriwe ku pfuna hina. (Varhoma 15:4) Ku yingisa ka hina leswi humeleleke eku kutsuriweni koloko ku nga hi pfuna leswaku hi va enxaxamelweni wa ku poniseriwa emisaveni leyintshwa ya Xikwembu.

Ndlela Leyi Hi Hlamulaka Ha Yona Eka Ndlela Ya Misava Ya Vutomi

2. Hi wahi mahanyelo ya le Sodoma na Gomora lama yiseke eku lovisiweni ka wona hi Xikwembu?

² Hikwalaho ka yini miti yoleyo ni vaaki va yona va herisiwile? Muapostola Petro u boxa ku tipeta eka “swilo swa manyala.” (2 Petro 2:7) Hi laha swi kombisiwaka ha kona hi ku tirhisiwa ka rito ra Xigriki leri xiga lexi xi hundzuluxeriweke xi huma eka rona, vanhu va Sodoma na Gomora a va tipete eku endleni ka vubihi hi ndlela leyi kombiseke ku delela lokukulu, ni ku xandzukela nawu ni vulawuri. Yuda 7 yi vula leswaku ‘a va hanya evuoswini naswona a va hlongorisa nyama ku yi tirhisa hi ndlela leyi nga riki ya ntumbuluko.’ Ku biha ka mahanyelo ya vona ku kombisiwe loko vavanuna va Sodoma, “ku suka ka la’v̌antŝa ku fika ka ŝikoša, e muti hikwawo wa matlhelo hikwawo,” va rhendzela yindlu ya Lota ivi va sindzisa leswaku a humesela vavanuna va Sodoma vaendzi va yena leswaku va anerisa ku navela ka vona loko biha. Kutani va huwelele hi matimba eka Lota hikuva a a ala ku sindzisa ka vona loku thyakeke.—Genesa 13:13; 19:4, 5, 9.

3. (a) Xana swi tise ku yini leswaku Lota ni ndyangu wa yena va kumeka va hanya endhawini yo onhaka ku fana na Sodoma? (b) Lota u titwise ku yini hi ku tikhoma loko biha ka vanhu va le Sodoma?

³ Kahle-kahle Lota u ye endhawini leyi nga ekusuhi na Sodoma hi mhaka ya ku fuwa ka yona hi swilo leswi vonekaka. Hi ku famba ka nkarhi, u kume ndhawu emutini hi woxe. (Genesa 13:8-12; 14:12; 19:1) Kambe a a nga twanani na kona ku tikhoma loko biha ka vanhu va le mutini wolowo naswona vanhu volavo a va n’wi langutanga tanihi xiphemu xa vona, handle ko kanakana hikwalaho ka leswi Lota ni ndyangu wa yena a va nga hlanganyeli evuton’wini bya vona. Hi laha 2 Petro 2:7, 8 yi vulaka ha kona: “Lota . . . [u] twile ku vava hi mhaka ya swilo swa manyala leswi a swi endliwa hi vanhu lavo biha; hikuva swilo leswi munhu loyi wo lulama a swi voneke ni ku swi twa loko a ri karhi a hanya exikarhi ka vona, swi n’wi karhatile ngopfu emoyeni wa yena lowo lulama masiku hinkwawo, a karhateka hi mhaka ya mahanyelo ya vona layo homboloka.” Swiyimo sweswo swi tise ndzingo lowukulu eka Lota hikuva tanihi munhu wo lulama a a venga mahanyelo yo tano.

4. (a) Xana swiyimo namuntlha swi fana ni leswiya swa Sodoma wa khale hi ndlela yihi? (b) Loko hi fana na Lota wo lulama, xana hi titwisa ku yini hi swiyimo leswi thyakeke swa sweswi?

⁴ Ni le sikwini ra hina, mpimo wa mahanyelo wa vandla ra vanhu wu ye ehansi. Ematikweni yo tala, vo tala swinene va nghenela rimbewu ra le mahlweni ka vukati kumbe ni vanhu vo tala. Hambi ku ri vana vo tala exikolweni va katseka swinene endleleni leyi ya vutomi naswona va hlekula lava va nga va joyiniki. Vasodoma va titivisa erivaleni ni ku macha eswitarateni swa madoroba lamakulu leswaku va voniwa. Vafundhisi va hlanganyerile eka ku tipaluxa loku. Hi nawu, a hi tikereke tingani leti hlawulaka vasodoma ni vaoswi lava tivekaka. Hambi swi ri tano, kahle-kahle, hi laha swiviko swa mahungu swi kombiseke ha kona hi ku phindha-phindha, a swi nonon’hwi ku kuma vasodoma, vaoswi ni timbhisa enxaxamelweni wa vafundhisi. Entiyisweni, varhangeri van’wana va vukhongeri va yisiwe eka madoroba man’wana kumbe ku sindzisiwa ku tshika ntirho hikwalaho ka swihehlo swa rimbewu. Lava rhandzaka ku lulama a va pfumelelani ni vuhomboloki byo tano; va ‘venga leswo biha.’ (Varhoma 12:9) Ngopfu-ngopfu va twa ku vava loko mahanyelo ya vanhu lava tivulaka lava tirhelaka Xikwembu ma tisa ndzhukano evitweni ra xona ivi ma vangela vanhu lava nga tiviki nchumu va fularhela vukhongeri hinkwabyo hi ku nyenya.—Varhoma 2:24.

5. Xana ku lovisa ka Yehova ka Sodoma na Gomora swi hi hlamulela xivutiso xihi?

⁵ Lembe na lembe xiyimo xi ya xi nyanya. Xana xi ta va ni makumu? Ina, ma ta va kona! Leswi Yehova a swi endleke eka Sodoma na Gomora ya khale swi swi veka erivaleni leswaku u ta tisa ku avanyisa hi nkarhi wa yena lowu vekiweke. U ta herisa vabihi hi ku helela, kambe u ta ponisa malandza ya yena yo tshembeka.

I Mani Kumbe I Yini Lexi Rhangaka eVuton’wini?

6. (a) Hi yihi dyondzo ya le nkarhini leyi nga kona emhakeni ya majaha lawa a ma lava ku tekana ni vana va vanhwanyana va Lota? (b) Xana langutelo ra vanghana va vona va nkarhi lowu taka ri va ringise ku yini vana va vanhwanyana va Lota?

⁶ Hi lava va kombisaka ku chava Xikwembu xa ntiyiso ntsena lava nga ta hlayisiwa. Malunghana ni leswi, xiya leswi tintsumi ta Yehova ti swi vuleke eka Lota, Sodoma na Gomora ma nga si lovisiwa. “U na mani kwalaho? Humesa v̌akoṅwana v̌a wena e mutini lowu, ni v̌ana v̌a šinuna ni v̌a šisati, ni hikwav̌o lav̌a u nga na v̌ona e mutini, hikuv̌a hi ta herisa muti lowu.” Hi loko Lota a vulavula ni majaha lawa a ma ta tekana ni vanhwanyana va yena. U va kombele hi ku phindha-phindha: “Pfukani mi huma e šiv̌andleni leši, hikuv̌a Yehova o ta lov̌isa muti.” Vuxaka bya vona ni ndyangu wa Lota byi va nyike lunghelo ro hlawuleka ra ku kutsuriwa, kambe vona hi voxe a va fanele va teka goza. A va fanele va nyikela vumbhoni lebyi nga erivaleni bya ku yingisa Yehova. Kambe, emahlweni ya vona, Lota ‘a a fana ni munhu la vungunyaka.’ (Genesa 19:12-14) U nga anakanya ndlela leyi vana va Lota va vanhwanyana va titweke ha yona loko va twe leswi humeleleke. Swi ringe ku tshembeka ka vona eka Xikwembu.

7, 8. (a) Loko tintsumi ti kombela Lota ku teka ndyangu wa yena va baleka, xana u endlise ku yini, naswona ha yini leswi a ku nga ri vutlhari? (b) Leswaku va ponisiwa, a ku laveka yini eka Lota ni ndyangu wa yena?

⁷ Hi vurhonga bya mixo lowu landzeleke, tintsumi ti hatlisise Lota. Ti te: “Pfuka u teka nsati wa wena, ni v̌ana v̌a wena lav̌a u nga na v̌ona la, u nga ti ṭhuka u lov̌a hikwalaho ka ku homboloka ka muti.” Kambe “a hlwela.” (Genesa 19:15, 16) Hikwalaho ka yini? I yini lexi a xi n’wi sivela? Xana a ku ri rifuwo ra swilo leswi vonekaka leswi a a ri na swona eSodoma—nchumu lowu kahle-kahle wu n’wi kokeleke endhawini yoleyo? Loko a a lo namarhela leswi, a a ta herisiwa na Sodoma.

⁸ Hikwalaho ka ntwela-vusiwana, tintsumi ti khome lava nga endyangwini wa yena hi mavoko ivi ti va kokela ehandle ka muti. Loko va ri ehandle, ntsumi ya Yehova yi lerisile: “Baleka, hikwalaho ka v̌utomi bya wena, u nga languti nḍaku, u nga yimi kwihi na kwihi e riv̌aleni; balekela e nṭhav̌eni u nga ti ṭhuka u lov̌a.” Lota a a ha kanakana na sweswi. Eku heteleleni, endzhaku ka loko a pfumeleriwile ku ya emutini lowu a wu nga ri ekule ngopfu, yena ni ndyangu wa yena va balekile. (Genesa 19:17-22) A swi nga lavi ku hlwela; ku yingisa a swi ri swa nkoka.

9, 10. (a) Ha yini ku va ni nuna wa yena a swi nga anelanga eka nsati wa Lota ku tiyisekisa ku hlayiseka? (b) Loko nsati wa Lota a file, hi wihi ndzingo wun’wana lowu teke eka Lota ni vana vakwe va vanhwanyana?

⁹ Hambi swi ri tano, ku kutsuriwa a ku nga helelanga loko va humile eSodoma. Genesa 19:23-25 ya hi byela: “Kutani dyambu a ri ri kari ri huma e misav̌eni loko Lot a nghena Tsoar. Kav̌a loko Yehova a nisela Sodoma na Gomora e šiv̌av̌ula ni nḍilo ŝi hume tilweni, e ka Yehova. A herisa miti yeleyo ni riv̌ala hikwaro, ni v̌aaki hikwav̌o v̌a miti, ni timbewu ta misav̌a.” Kambe a a ri kwihi nsati wa Lota?

¹⁰ A a baleke ni nuna wakwe. Hambi swi ri tano, xana a a pfumelelana hi xitalo ni leswi nuna wa yena a a swi endla? Ku hava lexi kombisaka leswaku hi ndlela yo karhi a a tsakela vubihi bya le Sodoma. Kambe xana rirhandzu ra yena hi Xikwembu a ri tiyile ku tlula rirhandzu ra kaya ra yena ni swilo leswi vonekaka leswi a a ri na swona kwalaho? (Ringanisa Luka 17:31, 32.) Loko a ri ehansi ka ntshikilelo, leswi a swi ri embilwini ya yena swi paluxekile. Handle ko kanakana a va ri ekusuhi na Tsoar, kumbexana ekusuhi ni ku nghena emutini, loko hi ku nga yingisi a hundzulukile a languta endzhaku. Naswona hi laha rhekhodo ya Bibele yi vulaka ha kona, “a hunḍuka e ṭhuka ra munyu.” (Genesa 19:26) Kutani ndzingo wun’wana wa ku tshembeka ka Lota ni vana va yena va vanhwanyana a wu va kongomile. Xana rirhandzu ra yena hi munghana wa yena la feke kumbe mintlhaveko ya vanhwanyana lava ehenhleni ka mana wa vona la feke a ri ri rikulu ku tlula rirhandzu ra vona eka Yehova, loyi a tiseke khombo leri? Xana a va ta hambeta va yingisa Xikwembu hambi loko un’wana la nga ekusuhi na vona a tivonakarise a nga tshembeki eka xona? Hi ntshembo lowu heleleke eka Yehova a va langutanga endzhaku.

11. I yini lexi hi xi dyondzeke laha mayelana ni nkutsulo lowu Yehova a wu nyikaka?

¹¹ Ina, Yehova wa swi tiva ku kutsula vanhu va ku chava Xikwembu endzingweni. Wa yi tiva ndlela yo kutsula mindyangu hinkwayo leyi hlanganeke evugandzerini bya ntiyiso; naswona wa swi tiva ku kutsula vanhu hi voxe. Loko va n’wi rhandza hakunene, wa va anakanyela swinene eku tirhisaneni na vona. “Hikuv̌a wa tiv̌a leši hi endliweke ha šona, wa ṭunḍuka leŝaku hi nṭhuri ntsena.” (Psalma 103:13, 14) Kambe nkutsulo wa yena i wa vanhu lava chavaka Xikwembu ntsena, lava ku tinyiketela ka vona ku nga ka xiviri, lava ku yingisa ka vona ku nga xikombiso xa ku tshembeka.

Malunghiselelo Ya Rirhandzu Ya Nkutsulo Lowukulu

12. Hi wahi malunghiselelo ya rirhandzu lawa Yehova a a ta ma endla a nga si tisa nkutsulo lowu hi wu rindzeleke hi mahlo-ngati?

¹² Hi leswi Yehova a swi endleke emasikwini ya Nowa na Lota, a nga susanga vabihi hinkwavo hi laha ku nga heriki. Hi laha matsalwa ma vulaka ha kona, a swi veka xikombiso xa leswi nga ta ta. Loko swilo sweswo swi nga si fika, Yehova a a ri na swo tala emianakanyweni leswi a tiyimiseleke ku swi endla ku pfuna vanhu lava n’wi rhandzaka. A a ta rhumela N’wana wa yena la tswariweke a ri swakwe, Yesu Kriste, emisaveni. Laha, Yesu a a ta susa ndzhukano evitweni ra Xikwembu hi ku kombisa muxaka wa ku tinyiketela loku Adamu tanihi munhu la hetisekeke a a fanele a swi nyikela na leswi a a ta swi kota ku swi nyikela eka Xikwembu; kambe Yesu a a ta swi endla ehansi ka swiyimo leswi nonon’hwaka swinene. Yesu a a ta nyikela hi vutomi bya yena bya vumunhu lebyi hetisekeke tanihi gandzelo leswaku vatukulu va Adamu lava kombisaka ripfumelo va ta kuma leswi Adamu a swi lahleke. Kutani ke, “ntlhambinyana” wa vanhu lava tshembekeke a wu ta hlawuriwa hi Xikwembu leswaku wu hlanganyela na Kriste eMfun’weni wa yena wa matilo naswona “ntshungu lowukulu” a wu ta hlengeletiwa eka matiko hinkwawo ku vumba xisekelo xa vandla lerintshwa ra vanhu. (Luka 12:32; Nhlavutelo 7:9) Hi ku hetisisa sweswo, Xikwembu xi ta endla nkutsulo lowu vhumbiweke hi swiendlakalo leswi yelanaka ni Ndhambi ni ku herisiwa ka Sodoma na Gomora.

Mhaka Leyi Ha Yona Goza Leri Tiyeke Ri Nga Ra Xihatla Sweswi

13, 14. Hi nga dyondza yini eka yinhla ya leswaku Petro u tirhise ku lovisiwa ka vanhu vo pfumala xichavo eka Xikwembu va le masikwini ya Lota ni ya Nowa tanihi swikombiso?

¹³ Swichudeni swa Rito ra Xikwembu swa swi tiva leswaku Yehova hi minkarhi yo tala u hetisise swiendlo swa nkutsulo eka malandza ya yena. Hambi swi ri tano, hi minkarhi yo tala Bibele a yi vuli yi ku, ‘Hi laha a swi ri ha kona hi nkarhi wolowo, vukona bya N’wana wa munhu byi ta va tano.’ Hikwalaho ka yini muapostola Petro, la huhuteriweke hi moya lowo kwetsima, a hlawule swikombiso leswi swimbirhi ntsena? I yini leswi a swi hambanile mayelana ni leswi humeleleke emasikwini ya Lota ni ya Nowa?

¹⁴ Xikombiso lexinene xi kumeka eka Yuda 7, laha hi hlayaka leswaku “Sodoma na Gomora, ni miti leyi a yi ri kusuhi na kona . . . yi endliwile xitsundzuxo hi ku biwa yi hisiwa hi ndzilo lowu nga heriki.” Ina, ku lovisiwa ka vadyohi vo tala emitini yoleyo a ku ri loku nga heriki, hi laha ku herisiwa ka vabihi emakumu ya mafambiselo ya sweswi ya swilo ku nga ta va ha kona. (Matewu 25:46) Ndhambi ya siku ra Nowa hi ku fanana ku vulavuriwa ha yona eka mongo lowu hlamuselaka ku avanyisa loku nga heriki. (2 Petro 2:4, 5, 9-12; 3:5-7) Kutani hi ku herisiwa ka vanhu lava nga chaviki Xikwembu emasikwini ya Lota na Nowa, Yehova u kombise leswaku u ta kutsula malandza ya yena hi ku va herisela makumu lava endlaka leswo homboloka.—2 Vatesalonika 1:6-10.

15. (a) Hi xihi xitsundzuxo xa xihatla lexi tivisiwaka lava endlaka leswo biha? (b) Ha yini vululami byi fanele byi tirhisiwa eka hinkwavo lava phikelelaka eka leswo biha?

¹⁵ Ku lovisiwa ka lova biha a ku n’wi tsakisi Yehova, hambi ku ri ku tisa ntsako eka malandza ya yena. Hi ku tirhisa Timbhoni ta yena, Yehova u kombela vanhu a ku: “Hunḍukani, mi hunḍuka e tindleleni ta ṅwina le’to biha, hikuv̌a mi ranḍa e ku fa hikwalaho ka yini?” (Ezekiel 33:11) Hambi swi ri tano, loko vanhu va nga kombisi ku navela ku yingisa xikombelo lexi xa rirhandzu, kambe va phikelela eka ndlela ya vona ya vutomi ya vutianakanyi, ku xixima ka Yehova vito rakwe ro kwetsima ni rirhandzu ra yena hi malandza yakwe yo tshembeka lama tokotaka ku khomiwa hi ndlela leyo biha hi vanhu lava nga chaviki Xikwembu ku lava leswaku a tisa vululami.

16. (a) Ha yini hi nga tiyisekaka leswaku nkutsulo lowu vhumbiweke wu le kusuhi swinene? (b) Xana nkutsulo wu ta huma kwihi, naswona wu ta yisa kwihi?

¹⁶ Nkarhi wa Xikwembu wo tisa nkutsulo wu le kusuhi swinene! Malangutelo ni swiendlakalo leswi Yesu a swi vhumbeke tanihi xikombiso xa vukona bya yena ni xa ku hela ka mafambiselo ya swilo swi le rivaleni. Swivumbeko swa xikombiso xexo swi sungule ku vonaka ro sungula malembe lama tlulaka 75 lama hundzeke, naswona Yesu u vule leswaku “rixaka leri” a ri nge hundzi Xikwembu xi nga si tisa ku avanyisa ehenhla ka misava yo pfumala xichavo eka Xikwembu. Loko Yehova a xiya leswaku rungula ra Mfumo se ri twarisiwile hi mpimo lowu ringaneke emisaveni hinkwayo leswaku byi va vumbhoni eka vanhu hinkwavo, kutani makumu ya misava leyi yo biha ma ta ta naswona sweswo swi ta ta ni ku kutsuriwa ka vanhu lava chavaka Xikwembu. (Matewu 24:3-34; Luka 21:28-33) Ku kutsuriwa eka yini? Eka miringo leyi va bohekeke ku yi tokota emavokweni ya lowo biha ni le ka swiyimo leswi siku na siku a swi ri xihlovo xa mahlomulo eka vona tanihi varhandzi va ku lulama. Nakambe ku ta va ku kutsuleriwa emisaveni leyintshwa laha vuvabyi ni rifu swi nga ta va swilo swa nkarhi lowu hundzeke.

Mpfuno Wa Xikwembu Ni Ku Langutela Nkutsulo

17. (a) Hi xihi xivutiso lexi twalaka lexi hi faneleke hi tivutisa xona? (b) Xana hi nga byi nyikerisa ku yini vumbhoni bya leswaku, ku fana na Nowa, hi susumetiwa hi ‘ku chava Xikwembu’?

¹⁷ Xivutiso lexi ha un’we-un’we hi faneleke ku xi kambisisa hi lexi, ‘Xana ndzi tilulamisele goza rero ra Xikwembu?’ Loko hi titshemba hina vini kumbe mianakanyo ya hina ya ku lulama, a hi tilulamiselanga. Kambe loko, ku fana na Nowa, hi susumetiwa hi ‘ku chava Xikwembu,’ kutani hi amukela nkongomiso lowu Yehova a hi nyikaka wona hi ripfumelo, kutani leswi swi ta yisa eku kutsuriweni ka hina.—Vaheveru 11:7.

18. Hikwalaho ka yini ku dyondza ku xixima ka xiviri ka vulawuri bya le tilweni ku ri xiyenge xa nkoka xa ku tilulamisela ka hina ku kutsuleriwa emisaveni leyintshwa?

¹⁸ Loko hi ndlela leyinene yi hlamusela lava hambi ku ri sweswi va tsakelaka nsirhelelo lowu Yehova a wu nyikaka, Psalma 91:1, 2 yi ri: “L’a ṭhamaka e šihundleni ša Loyi a nga henhla-henhla, o wisa e nḍutini wa L’a-nga-ni-matimba-hikwawo. Nḍi ku ka Yehova: U šitšhav̌elo ni khokholo ra mina, u Šikwembu ša mina, leši nḍi ši ṭhembaka!” Lowu i ntlawa wa vanhu lava sirheleriwaka hi Xikwembu ku fana ni mavondlo lama nga ehansi ka timpapa ta nyenyana ya mutswari. Va tshemba Yehova hi laha ku taleke. Va khorwiseka leswaku hi la nge Henhla-henhla, wa Matimba Hinkwawo. Hikwalaho, va xixima vulawuri bya le tilweni ivi va titsongahata eka byona, hambi byi tirhisiwa hi vatswari kumbe hi “nandza la tshembekaka, wo tlhariha.” (Matewu 24:45-47) Xana sweswo swi tano eka hina ha un’we-un’we? Ku fana na Nowa, xana hi dyondza ku endla ‘hinkwaswo leswi Yehova a hi lerisaka swona,’ ni ku endla swilo hi ndlela ya yena? (Genesa 6:22) Loko swi ri tano, hi yingisa lunghiselelo leri Yehova a hi nyikaka rona leswaku hi kutsuleriwa emisaveni leyintshwa yo lulama.

19. (a) Xana mbilu ya hina yo fanekisela i yini, naswona ha yini swi ri swa nkoka leswaku hi yi langutela? (Swivuriso 4:23) (b) Xana hi nga pfunekisa ku yini eka xikombiso xa Lota malunghana ni endlelo ra hina ehenhleni ka swikoka-mahlo swa misava?

¹⁹ Ku lunghiselela nakambe ku katsa ku nyikela nyingiso eka mbilu ya hina yo fanekisela. “Kambe l’a ringetaka timbilu, i Yehova.” (Swivuriso 17:3) U hi pfuna ku xiya leswaku a hi leswi hi langutekisaka xiswona ehandle leswi lavekaka, kambe ematshan’weni ya sweswo, i munhu wa le ndzeni, mbilu. Hambi loko hi nga ngheneli vukari kumbe ku tikhoma loko biha ku fana ni misava leyi hi rhendzeleke, hi fanele hi tivonela leswaku hi nga phasiwi kumbe ku hambukisiwa hi swilo leswi. Ku fana na Lota, hi fanele hi karhateka swinene hi vukona bya swiendlo sweswo swo biha. Lava va vengaka leswo biha a va nge ti lavi tindlela to byi nghenela; kambe, vanhu lava nga swi vengiki va nga swi papalata hi tlhelo ra nyama kambe emianakanyweni va navela onge va nga hlanganyela. “Ṅwina la’mi ranḍaka Yehova, v̌engani le’ŝo biha!”—Psalma 97:10.

20. (a) Xana Bibele yi tsundzuxa ehenhleni ka ndlela ya vutomi ya ku hlongorisa swilo leswi vonekaka hi ndlela yihi? (b) Xana hi nga swi vonisa ku yini leswaku tidyondzo ta nkoka ta Bibele mayelana ni ku rhandza swilo leswi vonekaka ti dzikile embilwini ya hina?

²⁰ Yehova hi rirhandzu a nga hi dyondzisi ku venga leswo biha ntsena kambe ni ndlela ya vutomi ya ku hlongorisa swilo leswi vonekaka. ‘Anerisekani hi swakudya ni tinguvu,’ Rito ra yena ra tsundzuxa. (1 Timotiya 6:8) Nowa ni majaha ya yena a va fanele va siya kaya ra vona loko va nghena engalaveni. Lota ni ndyangu wa yena, na vona a va fanele ku sukela kaya ra vona ni nhundzu ya vona leswaku va ponisa vutomi bya vona. Xana hi ti veke kwihi timbilu ta hina ke? “Tsundzukani ta nsati wa Lota.” (Luka 17:32) Yesu wa khongotela: “Rhangani mi tilavela Mfumo wa yena ni ku lulama ka yena.” (Matewu 6:33) Xana ha swi endla sweswo? Loko mimpimanyeto ya Yehova yo lulama yi hi kongomisa ni loko ku twarisiwa ka mahungu lamanene ya Mfumo wa yena ku ri nchumu wo sungula evuton’wini bya hina, kutani, hakunene hi amukela lunghiselelo ra yena ra vanhu lava a nga ta va kutsulela emisaveni leyintshwa.

21. Hikwalaho ka yini hi mfanelo hi nga rindzelaka leswaku xitshembiso xa Yehova xa nkutsulo xi ta hetisisiwa hi ku hatlisa?

²¹ Eka vanhu va ku chava Xikwembu lava nga ta vona xikombiso xa vukona bya yena ematimbeni ya Mfumo xi hetiseka, Yesu u te: “Ololokani, mi languta henhla, hikuva ku kutsuriwa ka n’wina ku kusuhi.” (Luka 21:28) Xana se u xi vonile xikombiso xexo tanihi leswi se xi vonakeke hi vuxokoxoko hinkwabyo? Kutani tiyiseka leswaku ku hetiseka ka xitshembiso xa Yehova xa nkutsulo ku tshinele swinene! Tiyiseka swinene leswaku “[Yehova u] tiva ku ponisa vanhu [lava n’wi chavaka] eku karhatekeni ka vona.”—2 Petro 2:9.

U Dyondze Yini Xana?

◻ Ku fana na Lota, xana hi fanele hi titwisa ku yini hi ndlela ya misava ya vutomi?

◻ Hi yihi miringo leyi Lota ni ndyangu wa yena va langutaneke na yona hambi loko va baleka eSodoma?

◻ Xana swikombiso leswi tirhisiwaka hi Petro swi kandziyisa xihatla xa ku teka xiyimo lexi tiyeke etlhelweni ra Yehova sweswi hi ndlela yihi?

◻ Eku lunghiseleleni ka vanhu va yena ku kutsuriwa, hi tihi tidyondzo ta nkoka leti Yehova a ti dyondzisaka?

[Xifaniso lexi nga eka tluka 18]

Vanhu va Xikwembu va sirheleriwa hi xona ku fana ni mavondlo lama nga etimpapeni ta matimba ta mutswari