Ku Famba Hi Mbilu Leyi eNdliweke Yi Va Yin’we

“Oho Yehovha, ndzi dyondzise . . . Endla mbilu ya mina yi va yin’we leswaku yi chava vito ra wena.”—PISALEMA 86:11, NW.

1. Yehovha u va hakela njhani vanhu vakwe lava tshembekaka?

‘OHO Yehovha, hi wena Xikwembu u ri swaku.’ (Pisalema 86:8, 10) Davhida u dzunise Xikwembu hi mbilu leyi taleke ku tlangela. Hambi loko Davhida a nga si va hosi ya Israyele hinkwaro, Yehovha u n’wi ponisile eka Sawulo ni le ka Vafilista. Hikwalaho, u yimbelele a ku: ‘Yehovha i ribye ra mina ni khokholo ra mina, ni Muponisi wa mina. U tshembekile eka loyi a tshembekeke.’ (2 Samuwele 22:2, 26) Yehovha u hlayise nandza wakwe la tshembekaka loko a ri emakhombyeni layo tala. Davhida u tshembile ni ku titshega hi Xikwembu xakwe lexi tshembekaka, kambe a a lava vukongomisi lebyi hambetaka. Kutani Davhida u kombele Xikwembu a ku: “Oho Yehova, nḍi dyonḍise ndlela ya wena.”—Pisalema 86:11.

2. Yehovha u ri endle njhani lunghiselelo ra leswaku hi dyondzisiwa hi yena?

² Davhida a a lava ku papalata mianakanyo kumbe tifilosofi ta misava hi ku helela. A a lava ku ‘dyondzisiwa hi Yehovha,’ hi laha muprofeta wa Xikwembu a vuleke ha kona endzhaku. (Esaya 54:13) Davhida, kumbexana a a anakanyisisa ntsena hi tibuku ta kaye ta Bibele leti a ti ri kona hi siku rakwe. Hambi swi ri tano, dyondzo yoleyo leyi humaka eka Yehovha a yi ri ya risima eka yena! Eku dyondzisiweni ka hina namuntlha, hi nga tirhisa tibuku ta Bibele hinkwato ta 66, kun’we ni tibuku leto tala ta Mfumo leti lunghiseleriwaka hi “nandza la tshembekaka, wo tlhariha.” (Matewu 24:45) Tanihi Davhida, a hi huweleleni Yehovha, leswaku moya wa yena wu ta hi pfuna ku lavisisa “leswi Xikwembu xi swi lunghiseleke lava va xi rhandzaka, . . . hambi swi ri swihundla leswi enteke swa Xikwembu.”—1 Vakorinto 2:9, 10.

3. Vuleteri bya Bibele byi nga hi pfuna hi tindlela tihi?

³ Bibele yi na nhlamulo ya xivutiso ni xiphiqo xin’wana ni xin’wana lexi nga tlhekekaka evuton’wini bya hina. “Hinkwaswo leswi tsariweke hi lava khale, swi tsariwile leswaku hi dyondza ha swona, ni leswaku hi va ni ku langutela, hikwalaho ka ku tiyisela ni ku chaveleriwa loku hi ku kumaka eMatsalweni.” (Varhoma 15:4) Ku amukela swiletelo leswi humaka eka Yehovha swi ta hi tiyisa leswaku hi tiyisela swiphiqo, swi hi chavelela hi nkarhi wa nhlomulo ni ku endla leswaku ntshembo wa Mfumo wu tshama wu tiyile etimbilwini ta hina. Onge hi nga kuma ntsako hi ku hlaya Rito ra Xikwembu ni ku anakanyisisa ha rona “nhlekanhi ni v̌usiku,” hikuva vutlharhi lebyi sekeriweke eBibeleni byi va “muri w[a] v̌utomi e ka la’v̌a byi fuweke, la’v̌a byi hlayisaka v̌a katekile.”—Pisalema 1:1-3; Swivuriso 3:13-18; nakambe vona Yohane 17:3.

4. Malunghana ni swiendlo swa hina, i xikombiso xihi lexi Yesu a hi vekeleke xona?

⁴ Yesu N’wana wa Xikwembu, loyi nakambe a vuriwaka “N’wana Davhida,” minkarhi hinkwayo a a ya eka Yehovha leswaku a kuma vuleteri. (Matewu 9:27)a U te: “N’wana a nga ka a nga tisunguleli a endla xilo hi yexe; ú endla ntsena lexi a xi voneke xi endliwa hi Tata wa yena; hinkwaswo leswi Tatana a swi endlaka, na yena N’wana wa swi endla.” “A ndzi endli nchumu hi ku tirhandzela ka mina, kambe ndzi vula swilo leswi hilaha Tatana a ndzi dyondziseke hakona.” (Yohane 5:19; 8:28) Yesu u hi siyele ntila ‘leswaku hi ta n’wi landzela swinene.’ (1 Petro 2:21) Anakanya! Loko hi dyondza hi laha Yesu a endleke ha kona, hi ta kota ku endla hi laha Yehovha a lavaka hi endla ha kona eka xiyimo xihi na xihi. Ndlela ya Yehovha yi lulamile minkarhi hinkwayo.

5. “Ntiyiso” i yini?

⁵ Davhida u ya emahlweni a ku: “Nḍi ta famba e [ntiyisweni wa, NW] wena.” (Pisalema 86:11) Malembe ya gidi endzhaku, Pilato, loko a vulavula na Yesu N’wana Davhida u vutisile a ku: “Ntiyiso i ncini?” Kambe Yesu u hlamule xivutiso xexo, hi ku byela Pilato a ku: “Mfumo wa mina a hi wa misava leyi,” a engetela a ku: “Ku vula wena leswaku ndzi hosi. Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso.” (Yohane 18:33-38) Xisweswo Yesu u tivise leswaku ntiyiso wu kombetela eka Mfumo wa Vumesiya. Kunene, nhloko-mhaka hinkwayo ya Bibele i ku kwetsimisiwa ka vito ra Yehovha hi ku tirhisa Mfumo wolowo.—Ezekiyele 38:23; Matewu 6:9, 10; Nhlavutelo 11:15.

6. Loko hi famba entiyisweni, hi fanele hi tivonela eka yini?

⁶ Ku famba entiyisweni swi vula yini? Swi vula ku yisa nyingiso lowukulu eka ntshembo wa Mfumo evuton’wini bya hina. Hi fanele ku namarhela ntiyiso wa Mfumo. Hi fanele hi nga vi ni timbilu timbirhi eku rhangiseni ka swilaveko swa Mfumo, hi chivirika loko hi kuma minkarhi leyi hi pfulekeleke yo nyikela vumbhoni malunghana ni ntiyiso wa Mfumo, hi landzela xikombiso xa Yesu. (Matewu 6:33; Yohane 18:37) A hi fanelanga hi fambanyana entiyisweni, hi nyikela ntirho wo tisusa nandzu ntsena, hi tlhela hi titsakisa hi tindlela ta ku tihungasa loku hundzeletiweke kumbe ku nghenela ntirho-vutomi lowu dyaka nkarhi wo tala kumbe ku “tirhela . . . rifuwo ra misava.” (Matewu 6:24) Yin’wana ya tindlela leti yi nga ha hi hambukisa, hi nga ha swi koti ku kuma ndlela yo tlhelela ‘endleleni leyo khuma leyi yisaka evuton’wini.’ Hi nga tshuki hi hambuka egondzweni rolero! (Matewu 7:13, 14) Mudyondzisi wa hina Lonkulu, loyi a nga Yehovha, u voninga gondzo leri hi ku tirhisa Rito ni nhlengeletano ya yena, a ku: “Ndlela hi leyi, fambani ha yona, mi nga yi hi ra šinene, kumbe hi ra šimaṭi!”—Esaya 30:21.

Ku Chava Loku Faneleke

7. Hi nga ti endlisa ku yini timbilu ta hina leswaku ti va ‘leti heleleke’?

⁷ Xikhongelo xa Davhida xi ya emahlweni eka ndzimana 11 (NW): “Endla mbilu ya mina yi va yin’we leswaku yi chava vito ra wena.” Tanihi Davhida, hi fanele hi lava leswaku mbilu ya hina yi nga avani, yi va leyi heleleke eku endleni ka ku rhandza ka Xikwembu. Leswi swi pfumelelana ni xitsundzuxo xa Muxe lexi nge: “Kutani ŝeŝi, Israel, Yehova Šikwembu ša wena, a lav̌a yini ka wena-ke? A hi leŝaku u tšhav̌a Yehova, Šikwembu ša wena, u famba e tindleleni hikwato ta yena, u ṅwi ranḍa, u tirela Yehova, Šikwembu ša wena, hi mblu hikwayo ya wena, ni [moya-xiviri] hikwawo wa wena; u ri kari u hlayisa milawu ya Yehova ni ku lerisa ka yena, leŝi nḍi ku leriseke namuntlha leŝaku u ṭaka?” (Deteronoma 10:12, 13) Kunene swi pfuna hina loko hi tinyiketela ku tirhela Yehovha hi mbilu ni moya-xiviri hinkwawo. Xisweswo hi kombisa xichavo lexi faneleke eka vito ra yena leri tlakukeke. Vito ra Yehovha hi ku kongoma ri vula leswaku “U Endla Swi Humelela,” ngopfu-ngopfu malunghana ni ku hetisisa swikongomelo swa yena. Nakambe ri yimela vuhosi bya yena lebyi tlakukeke ehenhla ka vuako hinkwabyo. Loko hi tirhela Xikwembu hi ku chava vukulukumba bya xona, hi nge hambukisiwi hi ku chava munhu loyi a faka. Timbilu ta hina ti ta va leti nga avanangiki. Ku ri na sweswo, hi ta chava ku endla hambi ku ri yini lexi nga ta hlundzukisa Yehovha, Muavanyisi la Tlakukeke ni Hosi Leyikulu, loyi a tameleke vutomi bya hina evokweni ra yena.—Esaya 12:2; 33:22.

8, 9. (a) Swi vula yini ku ka ‘u nga ri wa misava’? (b) Hi wahi magoza lawa hi faneleke ku ma teka hikwalaho ka leswi hi nga “[hundzuka] xihlamariso”?

⁸ Hambi loko hi rhukaniwa ni ku xanisiwa, hi ta landzela xikombiso xa Yesu xa vurhena hi ku ka hi nga vi xiphemu xa misava leyo homboloka leyi hi nga exikarhi ka yona. (Yohane 15:17-21) Leswi a swi vuli swona leswaku vadyondzisiwa va Yesu va fanele va hanya tanihi vamatshama-voxe kumbe ku tumbela etindlwini ta tinghwendzha. Loko a khongela eka Tata wakwe, Yesu u te: “A ndzi kombeli leswaku u va susa emisaveni, kambe hi leswaku u va lwela eka Lowo biha. A hi va misava, tanihi leswi na mina ndzi nga riki wa misava. Va hlawulekise entiyisweni; rito ra wena i ntiyiso. Tanihi leswi u ndzi rhumeke emisaveni, na mina ndzi va rhumile emisaveni.” (Yohane 17:15-18) Ku fana na Yesu, hi rhumiwile leswaku hi twarisa ntiyiso wa Mfumo. Yesu a a tshineleleka. Vanhu a va phyuphyisiwa hi ndlela leyi a a dyondzisa ha yona. (Ringanisa Matewu 7:28, 29; 11:28, 29; Yohane 7:46.) Na hina hi fanele hi endla leswi fanaka.

⁹ Xinghana xa hina lexikulu, ku tilunghisa ni ku languteka loku faneleke, bulo ra musa ni leri baseke, swi fanele swi endla leswaku hi amukeleka kun’we ni rungula ra hina eka vanhu va timbilu leti lulameke. Hi fanele hi papalata vusopfa, maambalelo lama nga langutekiki, vanghana lava nga endlaka leswaku hi katseka eka swilo swa misava, ni mahanyelo layo biha, lama nga amukelekiki lawa hi ma vonaka emisaveni leyi hi rhendzeleke. Tanihi leswi hi nga “[hundzuka] xihlamariso emisaveni hinkwayo, emahlweni ka tintsumi ne mahlweni ka vanhu,” hi khomekile hi tiawara ta 24 siku na siku hi ku tirha ni ku hanya tanihi Vakreste lava vekaka xikombiso lexinene. (1 Vakorinto 4:9; Vaefesa 5:1-4; Vafilipiya 4:8, 9; Vakolosa 4:5, 6) Timbilu ta hina ti fanele ti va leti heleleke emhakeni leyi.

10. Yehovha u va tsundzukisa ku yini lava va endlaka ntirho wo hlawuleka hi timbilu ta vona hinkwato?

¹⁰ Hina lava hi endlaka leswaku timbilu ta hina ti va leti heleleke eku chaveni ka vito ra Yehovha, hi anakanyisisa hi swikongomelo swa yena leswinene, ni ku tata vutomi bya hina hi ntirho wo hlawuleka, Yehovha u ta hi tsundzuka. “Mahlo ya Yehova ma famba-famba e misav̌eni hikwayo e ku tiyisa la’v̌a nga v̌a yena hi timbilu hikwato.” (2 Tikronika 16:9) Loko yi profeta hi siku ra hina, Malakiya 3:16 yi ri: “Kwalaho la’v̌a tšhav̌aka Yehova v̌a v̌ulav̌ula kuṅwe, uṅwana ni makwav̌o, kutani Yehova a riya ndlev̌e, a yingisela; buku ya šitunḍušo yi ṭariwa e mahlweni ka yena, yi ṭaleriwa la’v̌a tšhav̌aka Yehova ni la’v̌a ṭunḍukaka v̌ito ra yena.” Onge timbilu ta hina ti nga va leti heleleke eku kombiseni ka xichavo xo tano lexinene eka Yehovha!

Tintswalo Ta Rirhandzu Ta Yehovha

11. Tintswalo ta Yehovha ta rirhandzu ti ta kombisiwa njhani eka vanhu lava tshembekaka?

¹¹ Vona ndlela leyi xikhongelo xa Davhida xi enteke ha yona! U ya emahlweni a ku: ‘Oho Yehovha Xikwembu xa mina, ndzi ku dzunisa hi mbilu ya mina hinkwayo, naswona ndzi ta twarisa vito ra wena hi laha ku nga heriki, hikuva tintswalo ta wena ta rirhandzu eka mina i tikulu, naswona u ponisile moya-xiviri wa mina etshakwini ra Sheol.’ (Pisalema 86:12, 13) Ra vumbirhi eka pisalema leyi, Davhida u dzunisa Yehovha hikwalaho ka tintswalo ta Yena ta rirhandzu—rirhandzu Rakwe ra xiviri. Rirhandzu leri i rikulu swinene lerova ri nga ponisa munhu eka swiyimo leswi vonakaka swi nga koteki ku pona eka swona. Loko Sawulo a n’wi hlongorisa le mananga, Davhida a nga ha va a titwe a ri kusuhi ni ku fa. A swi fana ni ku langutana ni tshaku ra Sheol—laha sirha ri helelaka kona. Kambe Yehovha u n’wi ponisile! Hi ndlela leyi fanaka, Yehovha hakanyingi u ponise malandza yakwe ya manguva lawa hi tindlela leti hlamarisaka, naswona u tlhele a tiyisa vahlayisi va vutshembeki lava tiyiseleke hi ku tshembeka hambi ku ri ku fikela eku feni. Vanhu hinkwavo lava tshembekaka va ta kuma hakelo ya vona, hambi ku ri ya ku pfuxiwa loko swi laveka.—Ringanisa Yobo 1:6-12; 2:1-6, 9, 10; 27:5; 42:10; Swivuriso 27:11; Matewu 24:9, 13; Nhlavutelo 2:10.b

12. Vafundhisi va ve ni manyunyu ni ku va ni tihanyi hi ndlela yihi, naswona hakelo ya vona yi ta va yihi?

¹² Malunghana ni vaxanisi, Davhida wa huwelela a ku: “Oho Šikwembu, v̌akanganyisi v̌a nḍi pfukele, v̌andla ra v̌anhu la’v̌a hlunḍukaka v̌a lav̌a v̌utomi bya mina; meehleketo ya v̌ona a yi kongomi ka wena.” (Pisalema 86:14) Namuntlha, vaxanisi va katsa vafundhisi va Vujagana. Vanhu lava va vula leswaku va gandzela Xikwembu, kambe va siva vito ra xona lero kwetsima hi xithopo lexi nge “Hosi” ni ku n’wi hlamusela tanihi Vunharhu-un’we bya xihundla lebyi nga hlamuseriwiki nikatsongo eBibeleni. Vona manyunyu yonghasi! Tlhandla-kambirhi, va ringeta ku hlohlotela mimfumo ya politiki leswaku yi yirisa ni ku pfalela Timbhoni ta Yehovha ekhotsweni, leswi swa ha endliwaka ematikweni yo tala swinene emisaveni. Vafundhisi lava va rhukanaka vito ra Xikwembu va ta kuma hakelo ya vona, kun’we ni mintlawa hinkwayo ya Babilona Lonkulu leyi fanaka ni muoswi.—Nhlavutelo 17:1, 2, 15-18; 19:1-3.

13. I timfanelo tihi leti Yehovha a ti kombisaka leswaku a paluxa vunene bya yena?

¹³ Hi ndlela leyi hambaneke leyi tsakisaka, xikhongelo xa Davhida xi ya emahlweni xi ku: “Kambe wena, Yehova, u Šikwembu le’ši twelaka v̌usiwana, le’ša tintŝalo, l’a hlwelaka ku kariha, l’a teleke tintŝalo [ta rirhandzu] ni v̌unene.” (Pisalema 86:15) Timfanelo to tano ta Xikwembu xa hina ti tlakukile hakunene. Marito lawa ma yisa mianakanyo ya hina le ndzhaku eNtshaveni ya Sinayi loko Muxe a kombela ku vona ku kwetsima ka Yehovha. Yehovha u hlamule a ku: “Nḍi ta hunḍisa v̌unene hikwabyo bya mina e mahlweni ka wena; nḍi v̌ula v̌ito ra Yehova e mahlweni ka wena.” Kambe u tsundzuxe Muxe a ku: “U nga ka u nga v̌oni mombo wa mina; hikuv̌a a ku na munhu l’a nga nḍi v̌onaka a v̌a a hanya.” Endzhaku ka sweswo Yehovha u xikile hi papa, a ku: “Yehova, Yehova, Šikwembu ša tintŝalo ni v̌unene, le’ši hlwelaka ku kariha, le’ši teleke tintŝalo [ta rirhandzu ni ntiyiso, NW].” (Eksoda 33:18-20; 34:5, 6) Davhida u tshahe marito lawa exikhongelweni xa yena. Timfanelo to tano ta Yehovha ti vula leswikulu swinene eka hina ku tlula xivumbeko xihi ni xihi lexi nga voniwaka hi mahlo ya nyama! Hi ku ya hi leswi hina hi hexe hi swi tokoteke, xana a hi byi tlangeli vunene bya Yehovha lebyi kombisiweke eka timfanelo leti tinene?

“Šikombiso Ša V̌unene”

14, 15. Yehovha u endlela malandza ya yena “šikombiso ša v̌unene” hi ndlela yihi?

¹⁴ Davhida u tlhela a kombela nkateko wa Yehovha, a ku: “Nḍi langute, u nḍi twela v̌usiwana; nyika matimba e ka nanḍa wa wena. U ponisa ṅwana wa nanḍa wa wena wa wansati! U nḍi endlela šikombiso ša v̌unene bya wena! Leŝaku la’v̌a nḍi v̌engaka v̌a ŝi v̌ona, v̌a khomiwa hi tingana. Hikuv̌a u nḍi pfunile, Yehova, u v̌a u nḍi tšhav̌elela.” (Pisalema 86:16, 17) Davhida u xiya leswaku tanihi ‘n’wana wa nandza wa Yehovha wa wansati,’ na yena u fanele a ri wa Yehovha. Swi tano eka hina hinkwerhu namuntlha lava hi nyikeleke vutomi bya hina eka Yehovha ni lava tirhaka ntirho wa yena. Hi lava matimba ya Yehovha lama ponisaka hi ku tirhisa moya wa yena lowo kwetsima. Hikwalaho, hi kombela Xikwembu xa hina leswaku xi hi endlela “šikombiso ša v̌unene.” Vunene bya Yehovha byi katsa timfanelo letinene leti ha ha ku bulaka ha tona. Emhakeni leyi, i xikombiso xihi lexi hi nga langutelaka leswaku Yehovha a hi nyika xona?

¹⁵ Yehovha i Munyiki wa “nyiko yin’wana ni yin’wana leyo saseka ni minkateko hinkwayo” naswona wa hanana, hi laha Yesu a hi tiyisekisaka ha kona, hi ku nyika “Moya lowo Kwetsima eka lava kombelaka ka yena.” (Yakobo 1:17; Luka 11:13) Moya lowo kwetsima—i nyiko ya risima swonghasi leyi humaka eka Yehovha! Hi ku tirhisa moya lowo kwetsima, Yehovha u endla mbilu yi tsaka, hambi hi nkarhi wa ku xanisiwa. Xisweswo, loko vutomi bya vaapostola va Yesu byi ri ekhombyeni, va twarise hi ntsako leswaku Xikwembu xi nyika moya lowo kwetsima eka lava va xi yingisaka tanihi mufumi. (Mintirho 5:27-32) Ntsako lowu tisiwaka hi moya lowo kwetsima wu hambete wu va endlela “šikombiso ša v̌unene.”—Varhoma 14:17, 18.

16, 17. (a) Hi xihi xikombiso xa vunene bya yena lexi Yehovha a xi nyikeke Pawulo na Barnaba? (b) I xikombiso xihi lexi nyikiweke Vatesalonika lava a va xanisiwa?

¹⁶ Loko va ri eriendzweni ra vona ra vurhumiwa le Asia Minor, Pawulo na Barnaba va hlangane ni swiphiqo, hambi ku ri ku xanisiwa lokukulu. Loko va chumayela eAntiyoka wa Pisidiya, Vayuda va ale rungula ra vona. Hikwalaho, va ye eka vanhu va matiko. Vuyelo byi ve byihi ke? “Loko vamatiko va twa sweswo, va tsaka, va dzunisa Rito ra Hosi; kutani hinkwavo lava hlawuleriweke vutomi lebyi nga heriki, va pfumela.” Kambe Vayuda va pfuxe mpfilumpfilu, lerova varhumiwa volavo va hlongoriwa etikweni. Xana vona ni vapfumeri lavantshwa va hele matimba hikwalaho ka leswi? Nikatsongo! Ku ri na sweswo, “loko va ri vadyondzisiwa, va tala hi ku tsaka ni Moya lowo Kwetsima.” (Mintirho 13:48, 52) Yehovha u va nyike xikombiso xexo xa vunene bya yena.

¹⁷ Endzhaku, vandlha lerintshwa ra le Tesalonika ri xanisiwile. Leswi swi endle leswaku muapostola Pawulo a tsala papila ro chavelela, a bumabumela ku tiyisela ka vona ehansi ka nhlomulo. Va “amukerile Rito ra Xikwembu hi ku tsaka loku nyikiwaka hi Moya lowo Kwetsima.” (1 Vatesalonika 1:6) “Ku tsaka loku nyikiwaka hi Moya lowo Kwetsima” ku hambete ku va tiyisa tanihi xikombiso lexi nga erivaleni lexi humaka eka Xikwembu lexi nga ni tintswalo ni vunene, lexi hlwelaka ku kariha ni lexi teleke tintswalo ta rirhandzu ni ntiyiso.

18. Vamakwerhu va le Yuropa Vuxa va kombise leswaku va tlangela vunene bya Yehovha hi ndlela yihi?

¹⁸ Sweswinyana, Yehovha u kombise vunene bya yena eka vamakwerhu lava tshembekaka eYuropa Vuxa, a khomisa lava a va va venga tingana—khale ka vaxanisi va vona. Hambi leswi va ha ku ntshunxiwaka eka ntshikilelo lowu va veke na wona hi makume ya malembe, vamakwerhu volavo lava va rhandzekaka va ha boheka ku ya emahlweni va tiyisela, hikuva vo tala va langutane ni swiphiqo leswikulu swa ikhonomi. Hambi swi ri tano, “ku tsaka [ka vona] loku nyikiwaka hi Moya lowo Kwetsima” ka va chavelela. Xana a va ta kuma ntsako lowukulu hi ndlela yihi loko ku nga ri hi ku tirhisa mintshunxeko ya vona leyi va ha ku yi kumaka leswaku va ndlandlamuxa ku nyikela ka vona vumbhoni? Vanhu vo tala va va yingisa, hi laha swiviko swa mintsombano ni swa minkhuvulo swi kombisaka ha kona.—Ringanisa Mintirho 9:31.

19. Hi nga endla leswaku marito ya Pisalema 86:11 ma va ya hina hi ndlela yihi?

¹⁹ Hinkwaswo leswi hlamuseriweke exihlokweni lexi ni lexi hundzeke swi phindha xikhongelo lexi enteke xa Davhida eka Yehovha: “Oho Yehovha, ndzi dyondzise . . . Endla mbilu ya mina yi va yin’we leswaku yi chava vito ra wena.” (Pisalema 86:11) A hi endleni marito walawo ya ndzimana ya lembe ra 1993 ma va ya hina vini, loko hi ri karhi hi tirha hi mbilu hinkwayo, hi seketela swilaveko swa Mfumo ni ku tlangela vunene lebyi nga heriki bya Yehovha Xikwembu xa hina, Hosi Leyikulu.

[Tinhlamuselo ta le hansi]

A Wu Ta Hlamurisa Ku Yini Ke?

◻ I yini lexi hi xi kombisaka loko hi khongela hi ku, “Oho Yehovha, ndzi dyondzise”?

◻ Swi vula yini ku va mbilu ya hina yi endliwa yi va yin’we leswaku yi chava vito ra Yehovha?

◻ Yehovha u ta kombisa tintswalo ta yena ta rirhandzu eka hinkwavo lava tshembekaka hi ndlela yihi?

◻ Yehovha u hi endlela njhani “šikombiso ša v̌unene”?

[Bokisi leri nga eka tluka 16]

Ndzimana ya lembe ra 1993: “Oho Yehovha, ndzi dyondzise . . . Endla mbilu ya mina yi va yin’we leswaku yi chava vito ra wena.”—Pisalema 86:11.

[Xifaniso lexi nga eka tluka 15]

Yehovha i ribye ni khokholo ra lava va fambaka entiyisweni va nga hambuki

[Xifaniso lexi nga eka tluka 18]

Eka Ntsombano wa Matiko Hinkwawo wa Timbhoni ta Yehovha wa “Vabyarhi Va Ku Vonakala” le St. Petersburg, eRussia, hi June, a ku ri ni vanhu va 46 214, naswona ku khuvuriwe vanhu va 3 256. Mawaku ndlela leyi vanhu lava va amukelaka vunene bya Yehovha ha yona, hi “ku tsaka loku nyikiwaka hi Moya lowo Kwetsima”!