Vabyarhi Va Ku Vonakala—Hi Xikongomelo Xihi?
“Ndzi ku vekile ku va ku vonakala eka vamatiko.”—MINTIRHO 13:47.
1. Xana muapostola Pawulo u susumeteriwe njhani hi nawu lowu ku vulavuriwaka ha wona eka Mintirho 13:47?
“HOSI yi hi lerisile leswi, yi te: ‘Ndzi ku vekile ku va ku vonakala eka vamatiko, ni ku va ndlela ya ku ponisiwa ematlhelweni hinkwawo ya misava,’” ku vule muapostola Pawulo. (Mintirho 13:47) A nga lo vula sweswo ntsena kambe u tlhele a xiya nkoka wa swona. Endzhaku ka loko a hundzuke Mukreste, Pawulo u nyiketele vutomi bya yena leswaku a hetisisa xileriso lexi. (Mintirho 26:14-20) Xana na hina hi byarhisiwe xileriso xolexo? Loko swi ri tano, ha yini xi ri xa nkoka esikwini ra hina?
Loko ‘Timboni Ti Timekela Vanhu’
2. (a) Loko misava yi ri karhi yi nghena enkarhini wa yona wa makumu, i yini leswi nga humelela leswi khumbeke langutelo ra yona ra moya ni ra mahanyelo? (b) Xana murhangeri wa le Britain u angule njhani eka leswi a nga swi vona swi humelela hi August 1914?
2 Misava leyi yi nghene enkarhini wa makumu vo tala va vanhu lava hanyaka namuntlha va nga si velekiwa. Swilo leswikulu swi endlekile hi ku landzelelana ka xihatla. Sathana Diyavulosi, mukuceteri lonkulu wa munyama wa moya ni wa mahanyelo, u hoxeriwe ehansi emisaveni. (Vaefesa 6:12; Nhlavutelo 12:7-12) Vanhu ana va tshame va tipeta enyimpini yo sungula ya misava. Eku sunguleni ka August 1914, loko nyimpi yi ri erivaleni, Nkulukumba Edward Grey, matsalana wa tiko ra Britain wa timhaka ta matiko-mambe, u yime hi fasitere ra hofisi ya yena le London, a ku: “Timboni ta timeka eYuropa hinkwaro; a hi nge he ti voni ti lumekile evuton’wini bya hina.”
3. Xana varhangeri va misava va humelele hi ndlela yihi loko va ringeta ku vangamisa langutelo ra vanhu?
3 Eku ringeteni ka ku lumeka timboni teto nakambe, ku simekiwe Ntwanano wa Matiko hi 1920. Kambe timboni a ti nga swi koti ngopfu ku voninga. Eku heleni ka nyimpi ya vumbirhi ya misava, varhangeri va misava va ringetile nakambe, sweswi va tirhisa Nhlangano wa Matiko. Nakambe, timboni a ti nga voningi swinene. Hambi swi ri tano, varhangeri va misava hi ku vona swiendlakalo swo tala swa sweswinyana, va ye emahlweni va vulavula hi “fambiselo lerintshwa ra misava.” Kambe a hi nge vuli leswaku “misava leyintshwa” yihi na yihi leyi va nga yi endla yi tise ku rhula ni nsirhelelo wa ntiyiso. Ku ri na sweswo, minkwetlembetano ya lava hlomeke, mpfilumpfilu ya vanhu va rixaka rin’we, vugevenga, ku pfumaleka ka mintirho, vusiwana, nthyakiso wa mbangu, ni ku vabya hinkwaswo swi hambeta swi herisa ntsako wa vanhu wo tsakela vutomi.
4, 5. (a) Xana munyama wu va funengete rini vanhu, naswona hi ndlela yihi? (b) I yini lexi lavekaka leswaku va ponisiwa?
4 Kahle-kahle, timboni ta vanhu ti timeke khale emahlweni ka 1914. Sweswo swi humelele eka malembe ya 6 000 lama hundzeke le Edeni, loko vatswari va hina vo sungula va hlawule ku tiendlela swiboho swa vona vini handle ko xiya ku rhandza ka Xikwembu loku xi ku vuleke. Mintokoto leyi vavisaka leyi vanhu va yi tokoteke ku sukela enkarhini wolowo i swiendlakalo leswi Bibele yi swi hlamuselaka tanihi ‘matimba ya munyama.’ (Vakolosa 1:13) Munhu wo sungula Adamu, u nghenise misava hinkwayo exidyohweni hikwalaho ka nkucetelo wa Sathana Diyavulosi; naswona xidyoho ni rifu swi hangalake eka vanhu hinkwavo hikwalaho ka Adamu. (Genesa 3:1-6; Varhoma 5:12) Xisweswo Yehovha, yena Xihlovo xa ku vonakala ka vutomi, a nga ha va amukelanga vanhu.—Pisalema 36:9.
5 Ndlela leyi vanhu hinkwavo a va ta tlhela va kuma ku vonakala ha yona, a yi ta va kona ntsena loko a va amukeriwa hi Yehovha Xikwembu, Mutumbuluxi wa vanhu. Kutani, “turu le’yi sireleke matiko hikwawo,” ku rhukaniwa hikwalaho ka xidyoho, a yi ta susiwa. Xana leswi a swi ta humelela njhani?—Esaya 25:7.
Loyi A Nyikiweke “Ku Va Rivoningo Ra Matiko”
6. Xana Yehovha u endle leswaku hi va ni ku langutela kwihi lokunene ha Yesu Kreste?
6 Hambi loko Adamu na Evha va nga si hlongoriwa le Paradeyisini, Yehovha u vhumbhe hi ta “mbewu” leyi a yi ta va mukutsuri wa lava rhandzaka ku lulama. (Genesa 3:15, NW) Endzhaku ka ku velekiwa ka Mbewu yoleyo tanihi munhu, Yehovha u vangele Simiyoni etempeleni ya le Yerusalema, leswaku a kombetela eka yona tanihi “ku vonakala loku nga ta voninga matiko.” (Luka 2:29-32) Hi ripfumelo eka gandzelo ra Yesu ra vutomi bya munhu la hetisekeke, vanhu a va ta ntshunxiwa eka ku rhukaniwa loku tisiweke hi xidyoho xa ndzhaka. (Yohane 3:36) Hi ku pfumelelana ni ku rhandza ka Yehovha, sweswi a va ta langutela vutomi lebyi nga heriki va hetisekile tanihi xiphemu xa Mfumo wa matilo kumbe tanihi vafumiwa emisaveni ya paradeyisi. Mawaku ndlela leyi rolero ku nga lunghiselelo lerinene ha yona!
7. Ha yini switshembiso hinkwaswo leswi nga eka Esaya 42:1-4 ni ku hetiseka ka swona eka lembe xidzana ro sungula swi hi nyika ntshembo?
7 Yesu Kreste hi yexe hi yena xitiyisekiso xa ku hetiseka ka ku langutela loku lokukulu. Mayelana ni leswi Yesu a hanyiseke vanhu lava vabyaka, muapostola Matewu u tirhise leswi nga tsariwa eka Esaya 42:1-4 eka yena. Tsalwa rolero hi ku komisa ri ri: “Hi loyi nanḍa wa mina, loyi nḍi nga ta ṅwi yimela, Muhlawuriwa wa nga, loyi moya wa mina wu ṅwi ṭakelaka. Nḍi v̌ekile moya wa mina e henhla ka yena, o ta dyonḍisa v̌amatiko le’ŝo lulama.” Naswona xana leswi a hi swona leswi vanhu va matiko hinkwawo va swi lavaka? Vuprofeta byi ya emahlweni: “A nga ka a nga huweleri, a nga ka a nga tlakusi rito, a nga ka a nga ri twakarisi miṭenḍeleni. A nga ka a nga ṭhov̌i rihlanga le’ri khinyekeke, a nga ka a nga timi riv̌oninyana le’ri nge ketiketi.” Ku twanana ni leswi, vanhu lava a va vabya Yesu a nga va khomanga hi tihanyi. U va twele vusiwana, a va dyondzisa hi ta swikongomelo swa Yehovha ivi a va hanyisa.—Matewu 12:15-21.
8. Yehovha u nyikele hi Yesu tanihi “šinakulobye ni tiko” ni “ku v̌onakala ka matiko” hi ndlela yihi?
8 Munyiki wa vuprofeta lebyi u tihlamusela eka Nandza wakwe, eka Yesu a ku: “Mina Yehova, nḍi ku v̌itanele v̌utomi, nḍi ta ku khoma hi v̌oko, nḍi ku hlayisa, nḍi ku v̌eka leŝaku u endla šinakulobye ni tiko, hi leŝaku u ta v̌a ku v̌onakala ka matiko, e ku pfula mahlo ya la’v̌o-fe-mahlo, ni ku humesa khoṭweni la’va khomiweke, ne tronkweni la’va ṭhamaka e munyameni.” (Esaya 42:6, 7) Ina, Yehovha u nyikele Yesu Kreste tanihi ntwanano, tanihi xihlambanyo xa ku tiyisisa ku tiboha. Mawaku ndlela leyi leswi swi khutazaka ha yona! Yesu loko a ha ri emisaveni u kombise nkhathalelo wa xiviri eka vanhu; a kala a nyikela vutomi bya yena hikwalaho ka vanhu. Hi yena loyi Yehovha a nga n’wi nyika ku fuma matiko hinkwawo. A swi hlamarisi leswi Yehovha a nga vulavula hi yena tanihi rivoningo ra matiko. Yesu hi yexe u te: “Hi mina ku vonakala ka misava.”—Yohane 8:12.
9. Ha yihi Yesu a nga tinyiketelanga eku antswiseni ka mafambiselo ya swilo lawa a ma ri kona hi nkarhi wa yena?
9 Yesu u tirhe tanihi ku vonakala ka misava hi ndlela yihi? Swi le rivaleni leswaku a nga swi endlanga hikwalaho ka xikongomelo xa misava kumbe ku rhandza swilo leswi vonakaka. U arile ku ringeta ku ololoxa fambiselo ra tipolitiki leri a ri ri kona hi nkarhi wolowo naswona a nga byi amukelanga vuhosi lebyi humaka eka Sathana, mufumi wa misava, kumbe lebyi humaka eka vanhu. (Luka 4:5-8; Yohane 6:15; 14:30) Yesu u va twele vusiwana lava a va xaniseka naswona u va phyuphyise hi tindlela leti van’wana a va nga ta ti kota. Kambe a a swi tiva leswaku ku phyuphya loku nga heriki a ku nga ta kumeka eka vandla ra vanhu leri a ri rhukaniwe hi Xikwembu hikwalaho ka xidyoho xa ndzhaka ni leri a ri lawuriwa hi matimba lama nga vonakiki yo biha. Hi ku tirhisa vutlharhi bya Xikwembu, Yesu u veke vutomi bya yena hinkwabyo eku endleni ka ku rhandza ka Xikwembu.—Vaheveru 10:7.
10. Yesu u tirhe tanihi ku vonakala ka misava hi tindlela tihi, naswona hikwalaho ka xikongomelo xihi?
10 Xana Yesu u tirhe tanihi ku vonakala ka misava hi ndlela yihi, naswona hi xikongomelo xihi? U tinyiketele eku chumayeleni ka mahungu lamanene ya Mfumo wa Xikwembu. (Luka 4:43; Yohane 18:37) Hi ku nyikela vumbhoni hi ntiyiso wa xikongomelo xa Yehovha, nakambe Yesu u kwetsimise vito ra Tata wa yena wa le tilweni. (Yohane 17:4, 6) Ku engetela kwalaho, tanihi ku vonakala ka misava, nakambe Yesu u paluxe mavunwa ya vukhongeri ivi xisweswo a nyikela ntshunxeko wa moya eka lava a va ri evuhlongeni bya vukhongeri. U paluxe Sathana tanihi mulawuri la nga vonakiki eka lava va pfumelaka ku tirhisiwa hi yena. Nakambe Yesu u tlhele a humesela mintirho leyi nga ya munyama erivaleni. (Matewu 15:3-9; Yohane 3:19-21; 8:44) U tikombe a ri ku vonakala ka misava hi ndlela leyi nga erivaleni, hi ku nyikela vutomi bya yena lebyi hetisekeke tanihi nkutsulo, xisweswo a pfulela lava va pfumelaka eka lunghiselelo leri leswaku va rivaleriwa swidyoho, va va ni vuxaka lebyinene ni Xikwembu, ni ku langutela ka vutomi lebyi nga heriki tanihi xiphemu xa ndyangu wa Yehovha wa vuako hinkwabyo. (Matewu 20:28; Yohane 3:16) Kutani eku heteleleni, hi ku tinyiketela loku heleleke eka Xikwembu evuton’wini bya yena hinkwabyo, Yesu u tlakuse vuhosi bya Yehovha naswona u kombise Diyavulosi a ri muhembi, xisweswo a endla leswaku swi koteka ku kuma mimpfuno leyi nga heriki eka lava rhandzaka ku lulama. Kambe xana Yesu a a fanele ku va mubyarhi wa ku vonakala a ri yexe?
“N’wina Mi Ku Vonakala Ka Misava”
11. Leswaku vadyondzisiwa va Yesu va va vabyarhi va ku vonakala, a va fanele ku endla yini?
11 Eka Matewu 5:14, Yesu u byele vadyondzisiwa va yena a ku: “N’wina mi ku vonakala ka misava.” A va fanele ku landzela mikondzo ya yena. Hi mahanyelo ni ku chumayela ka vona, a va fanele ku kongomisa van’wana eka Yehovha tanihi Xihlovo xa rivoni ra ntiyiso. Loko va tekelela Yesu, a va fanele va twarisa vito ra Yehovha ni ku tlakusa vuhosi bya Yena. Hi laha Yesu a endleke ha kona, a va fanele ku huwelela Mfumo wa Xikwembu tanihi ntshembo wu ri woxe wa vanhu. Nakambe a va fanele ku paluxa mavunwa ya vukhongeri, mintirho leyi nga ya munyama, ni lowo biha loyi a kongomisaka swilo leswi. Valandzeri va Kreste a va fanele ku byela vanhu kwihi na kwihi hi ta lunghiselelo ra rirhandzu ra Yehovha ra ku ponisa ha Yesu Kreste. Vakreste vo sungula va amukele xiavelo lexi hi ku hiseka lokukulu, va sungula eYerusalema ni le Yudiya ivi va ya le Samariya, hi laha Yesu a leriseke ha kona!—Mintirho 1:8.
12. (a) Xana ku vonakala ka moya a ku ta andza ku fikela kwihi? (b) Xana moya wa Yehovha wu pfumelele Pawulo ku xiya yini hi Esaya 42:6, naswona xana vuprofeta byebyo byi fanele byi khumba vutomi bya hina hi ndlela yihi?
12 Hambi swi ri tano, ku chumayela mahungu lamanene a ku nga fanelanga ku helela ensin’wini yoleyo. Yesu u lerise valandzeri vakwe a ku “vamatiko hinkwavo, mi va endla vadyondzisiwa.” (Matewu 28:19) Hi nkarhi wa ku hundzuriwa ka Sawulo wa le Tarso, hi ku kongoma Hosi yi kombise leswaku Sawulo (loyi a hundzukeke muapostola Pawulo) a nga fanelanga ku chumayela eka Vayuda ntsena kambe ni le ka Vamatiko. (Mintirho 9:15) Hi mpfuno wa moya wo kwetsima, Pawulo u lemuke leswi a swi katseka emhakeni yoleyo. Xisweswo, u swi xiyile leswaku vuprofeta bya Esaya 42:6, lebyi hetisekaka eka Yesu Kreste, byi tirha ni le ka hinkwavo lava pfumelaka eka Kreste. Kutani eka Mintirho 13:47, loko a tshahe leswi nga eka Esaya, Pawulo u te: “Hikuva Hosi yi lerisile leswi, yi te: ‘Ndzi ku vekile ku va ku vonakala eka vamatiko, ni ku va ndlela ya ku ponisiwa ematlhelweni hinkwawo ya misava.’” Wena ke? Xana u wu amukele hi mbilu hinkwayo ndzhwalo wolowo wa ku va mubyarhi wa ku vonakala? Xana u veka vutomi bya wena eku endleni ka ku rhandza ka Xikwembu, ku fana na Yesu na Pawulo?
Rivoningo Ni Ntiyiso Leswi Humaka Eka Xikwembu Leswi Nga Ta Hi Kongomisa
13. Hi ku twanana na Pisalema 43:3, xikhongelo xa hina lexikulu hi xihi, naswona xana xona xi hi sirhelela eka yini?
13 Loko ho ringeta ku ‘lumeka mavoningo nakambe,’ hi matshalatshala ya hina vini leswaku hi ta voninga vumundzuku bya vanhu, kahle-kahle hi ta va hi lahlekeriwe hi xikongomelo xa Rito ra Xikwembu leri huhuteriweke. Hambi swi ri tano, ku nga khathariseki leswaku misava yi endla yini hi ntolovelo, Vakreste va ntiyiso va languta eka Yehovha tanihi Xihlovo xa rivoningo ra xiviri. Xikhongelo xa vona xi fana ni lexi rhekhodiweke eka Pisalema 43:3, lexi nge: “Ruma ku v̌onakala ka wena ni v̌unene bya wena, ŝi nḍi fambisa, ŝi nḍi yisa e nṭhav̌eni ya ku kwetsima ka wena ne tindlwini ta wena.”
14, 15. (a) Xana Yehovha u rhumela ku vonakala ni ntiyiso wa yena hi ndlela yihi? (b) Xana hi nga swi komba njhani leswaku ku vonakala ka Xikwembu ni ntiyiso wa xona swa hi kongomisa?
14 Yehovha u ya emahlweni a hlamula xikhongelo xolexo xa malandza ya yena lama tshembekaka. U rhumela ku vonakala hi ku twarisa xikongomelo xa yena, hi ku pfumelela malandza ya yena leswaku ya xi twisisa, naswona a tlhela a hetisisa leswi a swi twariseke. Loko hi khongela eka Xikwembu a ko va ku hetisa nawu ntsena, kumbe ku tikombisa u kwetsimile. Nchumu lowu hi wu navelaka swinene hi leswaku ku vonakala loku humaka eka Yehovha ku hi kongomisa, hi laha mupisalema a vulaka ha kona. Ha byi amukela vutihlamuleri lebyi fambisanaka ni ku vonakala loku Xikwembu xi ku nyikelaka. Tanihi muapostola Pawulo, ha swi xiya leswaku ku hetiseka ka Rito ra Yehovha ku fambisana ni xileriso lexi yaka eka hinkwavo lava pfumelaka eka xona. Hi titwa tanihi vanhu lava nga ni xikweleti eka vanhu van’wana ku kondza hi va nyika mahungu lamanene lama Xikwembu xi hi nyikeke wona leswaku hi ma tirhisela sweswo.—Varhoma 1:14, 15.
15 Ku vonakala ni ntiyiso lowu Yehovha a wu rhumeleke esikwini ra hina swi swi veka erivaleni leswaku Yesu Kreste wa fuma exiluvelweni xa yena xa le tilweni hi laha ku heleleke. (Pisalema 2:6-8; Nhlavutelo 11:15) Yesu u vhumbhe leswaku hi nkarhi wa vukona bya yena emfun’weni, mahungu lawa lamanene ya Mfumo ma ta chumayeriwa emisaveni hinkwayo leyi akiweke leswaku ya va vumbhoni. (Matewu 24:3, 14) Ntirho wolowo wa karhi wa endliwa sweswi, naswona wu endliwa swinene emisaveni hinkwayo. Loko hi endla ntirho wolowo wu va nchumu wa nkoka swinene evuton’wini bya hina, kutani ku vonakala ni ntiyiso wa Xikwembu swa hi kongomisa, hi laha mupisalema a vuleke ha kona.
Ku Kwetsima Ka Yehovha Hi Koxe Ku Vangamile
16, 17. Yehovha u ku vangamise hi ndlela yihi ku kwetsima ka yena ehenhla ka nhlengeletano ya yena leyi fanaka ni wansati hi 1914, naswona xana u yi nyike xileriso xihi?
16 Hi ririmi leri nyanyulaka, Matsalwa ma hlamusela ndlela leyi ku vonakala ka Xikwembu ku hangalasiwaka ha yona eka vanhu hinkwako-nkwako. Esaya 60:1-3, leyi kongomisiwaka eka “wansati” wa Yehovha, kumbe nhlengeletano yakwe ya le tilweni ya malandza lama tshembekaka, yi ri: “[Wansati] suka u yima, u v̌a u kwetsima, hikuv̌a ku v̌onakala ka wena ku šile, kutani ku twala ka Yehova ku humelele ka wena! Hikuv̌a, waŝiv̌o, munyama wu ta funengeta misav̌a, ni papa le’ra ntima ri ta v̌a henhla ka matiko; kambe Yehova o ta ku humelela, kutani ku twala ka yena ku ta v̌oninga henhla ka wena. Matiko ma ta famba e ku v̌onakaleni ka wena, ni tihosi ti ta e ku kwetsimeni ka tiṅhwembeti ta wena.”
17 Ku kwetsima ka Yehovha ku vangame eka nhlengeletano ya yena ya le tilweni leyi fanaka ni wansati hi lembe ra 1914 loko, endzhaku ka nkarhi wo leha a rindzile, a tswala Mfumo wa Vumesiya, lowu Hosi ya wona a nga Yesu Kreste. (Nhlavutelo 12:1-5) Ku vonakala ka Yehovha lokukulu ku vangama swinene ehenhla ka hulumendhe yoleyo tanihi yona ntsena leyi fanelekaka emisaveni hinkwayo.
18. (a) Ha yihi munyama wu funengeta misava, hi laha swi vhumbhiweke ha kona eka Esaya 60:2? (b) Xana vanhu va nga humesiwa njhani emunyameni wa misava?
18 Ku hambana ni sweswo, munyama wu funengete misava naswona wu sive mintlawa ya tinxaka hi xinyama lexikulu. Ha yini? Hikuva matiko ma tshike hulumendhe ya N’wana la rhandzekaka wa Xikwembu ivi ma landza ku fuma ka vanhu. Va anakanya leswaku loko va susa hulumendhe yin’wana ya vanhu ivi va simeka yin’wana, va ta tlhantlha swiphiqo swa vona. Kambe leswi a swi va tiseli ku wisa loku va ku navelaka. Va tsandzeka ku vona loyi a susumetelaka swiendlakalo leswi, loyi a lawulaka matiko a ri exivandleni xa moya. (2 Vakorinto 4:4) Va ala Xihlovo xa rivoni ra ntiyiso kutani xisweswo va le munyameni. (Vaefesa 6:12) Hambi swi ri tano, ku nga khathariseki leswaku matiko ma endla yini, vanhu va nga humesiwa emunyameni wolowo. Njhani? Hi ku pfumela eka Mfumo wa Xikwembu naswona va titsongahatela wona.
19, 20. (a) Xana ku kwetsima ka Yehovha ku vangame eka valandzeri va Yesu lava totiweke hi ndlela yihi, naswona hikwalaho ka yihi? (b) Ha yihi Yehovha a endle lava va totiweke leswaku va va vabyarhi va ku vonakala? (c) Hi laha swi vhumbhiweke ha kona, xana “tihosi” ni “matiko” va kokeriwe njhani eka ku vonakala loku humaka eka Xikwembu?
19 Vujagana a byi na ripfumelo eka Mfumo wa Xikwembu naswona a byi titsongahatanga eka wona. Kambe valandzeri va Yesu Kreste lava totiweke hi moya va swi endlile sweswo. Hikwalaho ka leswi, ku vonakala ka Yehovha ka ku amukeriwa hi yena ku vangame ehenhla ka vayimeri lava va vonakaka va wansati wa yena wa le tilweni, naswona ku kwetsima ka yena ku vonakile eka vona. (Esaya 60:19-21) Va tiphina hi ku vonakala loku ka moya loku nga riki na ku hundzuka ka xiyimo xa politiki kumbe xa ikhonomi loku nga ku susaka. Yehovha u va kutsule eBabilona Lonkulu. (Nhlavutelo 18:4) Va swi tsakela ku amukeriwa hi yena hi mavoko mambirhi hikwalaho ka leswi va amukeleke ku tshinyiwa hi yena ni leswi va tlakuseke vuhosi bya yena hi ku tshembeka. Va ni ku langutela loku vangamaka ka vumundzuku, naswona va wu tsakela ntshembo lowu a va vekeleke wona.
20 Kambe ha yini Yehovha a tirhisane na vona hi ndlela leyi? Hi laha yena hi yexe a vuleke ha kona eka Esaya 60:21, u endle swoleswo leswaku a ta “twarisiwa,” leswaku vito ra yena ri ta xiximiwa ni leswaku van’wana va ta kokeriwa eka yena tanihi Xikwembu xin’we xa ntiyiso—ni leswaku va ta pfuneka hi laha ku nga heriki. Hi ku twanana ni leswi, vagandzeri lava va Xikwembu xa ntiyiso va amukele vito leri nge Timbhoni ta Yehovha hi 1931. Hikwalaho ka ku vula ka vona vumbhoni, xana “tihosi” ti kokeleke eka ku vonakala loku a va ri na kona, hi laha Esaya a vhumbheke ha kona? Ina! A ku nga ri tihosi ta le misaveni ta tipolitiki, kambe i nhlayo ya lava va ha saleke lava va nga ta fuma tanihi tihosi na Kreste eMfun’weni wa le tilweni. (Nhlavutelo 1:5, 6; 21:24) Kutani ku vuriwa yini hi “matiko”? Xana va kokeleke eka ku vonakala loku? Swi ve tano hakunene! A ku vanga na tiko ra tipolitiki leri hi roxe ri nga kokeleka, kambe vanhu va ntshungu lowukulu lava humaka eka matiko hinkwawo va yime etlhelweni ra Mfumo wa Xikwembu, naswona hi ku hiseka va langutele ku ponisiwa va nghena emisaveni leyintshwa ya Xikwembu. Hakunene ku ta va misava leyintshwa laha ku nga ta tala ku lulama.—2 Petro 3:13; Nhlavutelo 7:9, 10.
21. Xana hi nga swi kombisa hi ndlela yihi leswaku a hi lahlekeriwanga hi xikongomelo xa Yehovha xa musa lowu nga fanelangiki wa ku hi endla hi twisisa ku rhandza ka yena?
21 Xana u wun’wana wa ntshungu lowu wu yaka emahlweni wu kula wa vabyarhi va ku vonakala? Yehovha u hi endle hi twisisa ku rhandza ka yena leswaku, hina ku fana na Yesu, hi ta va vabyarhi va ku vonakala. Loko hi ri karhi hi hiseka entirhweni lowu Yehovha a wu nyikeke malandza ya yena namuntlha, onge hinkwerhu ka hina hi nga swi kombisa leswaku a hi lahlekeriwanga hi xikongomelo xa musa lowu nga hi fanelangiki lowu hi kombisiweke wona hi Xikwembu. (2 Vakorinto 6:1, 2) Namuntlha ku hava ntirho lowu nga wa nkoka ku tlula lowu. Naswona ku hava lunghelo leri nga rikulu leri hi nga ri kumaka ku tlula ku kwetsimisa Yehovha hi ku komba van’wana ku vonakala loku humaka eka yena.
Xana A Wu Ta Hlamula Njhani?
◻ Hi swihi swivangelo-nkulu swa swiphiqo swa vanhu leswi chavisaka?
◻ Yesu ni valandzeri vakwe i “ku vonakala ka misava” hi ndlela yihi?
◻ Xana ku vonakala ni ntiyiso wa Yehovha swi hi kongomisa hi ndlela yihi?
◻ Yehovha u vangele ku kwetsima ka yena leswaku ku vangama ehenhla ka nhlengeletano ya yena hi ndlela yihi?
◻ Yehovha u endle vanhu vakwe leswaku va va vabyarhi va ku vonakala hi xivangelo xihi?
[Swifaniso leswi nga eka tluka 9]
Mhaka ya le Edeni yi hi pfuna leswaku hi twisisa swiphiqo swa vanhu leswi vavisaka namuntlha
[Swihlovo Swa Kona]
Tom Haley/Sipa
Paringaux/Sipa