Xana Xilalelo Lexi Xi Nga Vula Swo Karhi Eka Wena?

N’WETI wu voninga tiko hi rivoningonyana ritsongo. Ekamareni ra le henhla ra muako wa Yerusalema wa khale, ku na vavanuna va 12 lava hlengeletaneke va rhendzele tafula. Khume-n’we wa vona va rhiye ndleve loko Mudyondzisi wa vona a ri karhi a sungula nkhuvo lowu nga wa nkoka swinene naswona a vula marito lama nga ya nkoka swinene. Mhaka yin’wana yi ri:

“Yesu a teka xinkwa, kutani loko a nkhensile, a xi phema, a nyika vadyondzisiwa, a ku: ‘Tekani mi dya, leswi [swi vula, NW] miri wa mina.’ Kutani a teka xinwelo, a nkhensa, a va nyika xona a ku: “Nwelani ka xona hinkwenu; hikuva leswi [swi vula] ngati ya mina, ngati ya ntwanano leyi halateriwaka lavo tala leswaku va riveleriwa swidyoho. Kambe ndzi ri ka n’wina: Ku sukela sweswi, a ndzi nga ha nwi kambe swa mihandzu ya vhinya, ku ko ku fika siku leri ndzi nga ta swi nwa na n’wina swi ri leswintshwa, eMfun’weni wa Tata wa mina.” Kuteloko va yimbelerile risimu, va ya eNtshaveni ya Mitlhwari.”—Matewu 26:26-30.

Leswi swi endleke endzhaku ka ku pela ka dyambu hi siku ra vu-14 ra n’hweti ya Xiyuda ya Nisan hi lembe ra 33 ra Nguva ya hina leyi Tolovelekeke. Yesu ni vaapostola va yena va ha ku heta ku tlangela Paseka va tsundzuka ku tshunxiwa ka Vaisrayele evuhlongeni le Egipta hi lembe xidzana ra vu-16 B.C.E. Kreste wa ha ku hlongola Yudasi Iskariyota, loyi a a ri kusuhi ni ku n’wi xenga. Hikwalaho ko va na Yesu ni vaapostola va yena lava tshembekaka va 11 ntsena.

Xilalelo lexi a ku nga ri ku yisa Paseka ya Xiyuda emahlweni. A ku ri nchumu lowuntshwa lowu nga sungula ku vitaniwa Xilalelo xa Hosi. Mayelana ni ku tlangela loku, Yesu u lerise valandzeri va yena: “Endlani sweswo hi ku ndzi anakanya.” (Luka 22:19, 20; 1 Vakorinto 11: 24-26) Hikwalaho ka yini a vule leswi? Naswona xana xiendlakalo lexi xa malembe xidzana yo tala lama hundzeke xi nga vula swo karhi eka wena?