Swivutiso Swa Vahlayi
Xana va ta pfuxiwa vanhu lava va nga byi amukeriki Vukreste bya ntiyiso sweswi, ivi va fa ku nga si sungula nhlomulo lowukulu?
I swinene eka hina hinkwerhu leswaku hi papalata mboyamelo wa ku tiendla vaavanyisi, hi ku xiya leswaku kahle-kahle ku avanyisa ka Yehovha hi ku tirhisa Yesu Kreste hi kona ku nga ka nkoka swinene. (Yohane 5:22; Mintirho 10:42; 2 Timotiya 4:1) Kambe Matsalwa ya nyikela vuxokoxoko byin’wana lebyi pfunaka ku hlamula xivutiso lexi nga laha henhla.
Ku chumayeriwa ka mahungu lamanene ya Mfumo wa Xikwembu emisaveni hinkwayo i xivumbeko xa nkoka xa ‘xikombiso xa vukona bya Yesu.’ Xikombiso lexi xi ve erivaleni ku sukela eku sunguleni ka lembe xidzana leri. Ntirho wo chumayela wu hlawula vanhu va matiko hinkwawo ku hetisisa xifaniso xa Yesu xa “tinyimpfu” ni “timbuti.” Leswi ntirho lowu wa ku chumayela ni wa ku hlawula wu yaka emakumu, “nhlomulo lowukulu” wu ta herisa mafambiselo lawa yo biha ya swilo.—Matewu 24:3, 21, 22; 25:31-46.
I Yehovha, xikan’we ni N’wana wa yena, lava nga ta avanyisa leswaku i vamani eka lava aleke rungula ra Mfumo, ivi va fa emahlweni ka ku sungula ka nhlomulo lowukulu, va nga tekiwaka tanihi timbuti. Yesu u te timbuti ti “ta ya eku biweni loku nga heriki.” Xisweswo, hi nga heta hi leswaku lava Xikwembu xi va langutaka tanihi timbuti a va nge pfuxiwi. Va ta avanyisiwa ku fana ni lava va nga ta “yisiwa eku onhakeni loku nga heriki” hi nkarhi wa nhlomulo lowukulu.—2 Vatesalonika 1:9.
Kambe ku vuriwa yini hi lava va nga ha vonakaka va nga ri twanga hi laha ku ringaneleke rungula ra Mfumo, lerova va nga kota ku ri amukela, ivi va fa “emasikwini [lawa] ya makumu,” va nga si kota ku amukela kumbe ku ala ntiyiso?—2 Timotiya 3:1.
Swi le rivaleni leswaku lava nga ta fa loko ntirho wa ku chumayela wa ha endliwa, emahlweni ka nhlomulo lowukulu, va ta pfuxiwa. Leswi swi kombisiwa hi leswi hi swi hlayaka eka Nhlavutelo 6:7, 8 mayelana ni ku famba ka vagadi va tihanci vo fanekisela. Vanhu vo tala va dlayiwe hi tinyimpi, ku pfumaleka ka swakudya, ni mavabyi lama chavisaka. Tanihi leswi ku nga “Hades” leyi dyaka lava hlaseriweke hi “Rifu,” va ta pfuxiwa hi nkarhi wa ku Fuma ka Kreste ka gidi ra Malembe, loko Hades yi humesa lava feke lava nga eka yona. (Nhlavutelo 20:13) Nhlayo ya lava pfuxeriwaka evuton’wini, va nga ha va va ri twile rungula ra Mfumo va nga si fa.
Mawaku ntsako lowu hi faneleke hi va na wona, leswi Yesu a nga nyikangiki vanhu leswaku va hlawula leswaku i vamani va fanaka ni tinyimpfu ni leswaku i vamani va fanaka ni timbuti! Vanhu lava nga hetisekangiki a va nge pimi hi ndlela leyi faneleke leswaku munhu u ve ni nkarhi wo tanihi kwihi, wo twa ni ku amukela mahungu lamanene. Xana hi nga swi tiva leswaku xiyimo xa mbilu ya yena a xi ri njhani kumbe leswaku a a ku rhandza ku lulama hakunene? Xana hi nga swi kota ku vona leswaku n’wangulo wakwe a wu khumbiwa ku fikela kwihi hi ndyangu wa yena, vukhongeri bya yena bya khale kumbe minkucetelo yin’wana? Nikantsongo. Kambe hi nga tiyiseka leswaku Yehovha Xikwembu na Yesu Kreste va nga xiya timhaka to tano ivi va endla vuavanyisi lebyi hetisekeke, lebyinene ni lebyi lulameke.—Deteronoma 32:4; Esaya 11:1-5.
Hikwalaho a swi fanelanga ku anakanyela leswaku i vamani lava nga ta pfuxiwa kumbe lava nga taka va nga pfuxiwi eka lava va ha ku faka sweswi. Lowu a hi nchumu lowu hi nga nyikiwa matimba yo wu endla. (Ringanisa Luka 12:13, 14.) I vutlhari swinene ku rindzela swiboho swa Vaavanyisi vo lulama, Yehovha Xikwembu na Yesu Kreste. Leswi swi ta hi wisisa emianakanyweni, tanihi malandza ya Yehovha. Nakambe swi ta hi pfuna ku yisa nyingiso lowu engetelekeke eka leswi hi rhumiweke ku swi endla—‘yanani mi ya endla vanhu va matiko hinkwawo vadyondzisiwa, mi va dyondzisa ku hlayisa swilo hinkwaswo leswi Yesu a swi leriseke.’—Matewu 28:19, 20.
[Laha Xifaniso Xi Humaka Kona eka tluka 31]
Leicester sheep, Meyers