Xiviko Xa Vahuweleri Va Mfumo

Ku Xixima Ku Kwetsima Ka Vutomi

BIBELE yi komba leswaku ngati i ya risima emahlweni ka Xikwembu ni leswaku xi lwisana ni ku tirhisiwa ka yona hi ndlela yo biha. (Levhitika 17:14; Mintirho 15:19, 20, 28, 29) Hikwalaho ka swikongomiso leswi swa Bibele, Timbhoni ta Yehovha a ti wu amukeli mpompelo wa ngati.

Ku pfuna madokodela ni vatirhi va le xibedlhele leswaku va twisisa xiyimo xa vukhongeri xa Timbhoni ta Yehovha emhakeni leyi ni ku twisisa leswaku Timbhoni ta byi amukela vutshunguri bya swikhomela-ndhawu, Sosayiti ya Watch Tower yi hlele Hospital Liaison Committees (HLC; Tikomiti to Vulavurisana ni Swibedlhele) ematikweni yo hambana-hambana. Swirho swa tikomiti leti swi endzela swibedlhele swi ya vulavula ni vatirhi va swa vutshunguri. Sweswinyana, eka madoroba ya 12 le Poland, ku khomiwe minhlangano yo tlula 200, leyi katsaka madokodela yo tlula 500, ngopfu-ngopfu tinhloko ta titliliniki to hlawuleka kumbe ta swiyenge swo hambana-hambana swa swibedlhele. Ntokoto lowu landzelaka wu humelele eka rin’wana ra maendzo yo tano:

“Nhlangano wa le Tliliniki ya Vuvabyi bya Mbilu le Zabrze wu ve lowu humelelaka swinene. Ku sukela hi 1986 vatshunguri va tliliniki leyi yo hlawuleka a va endla vuhandzuri eka vamakwerhu handle ko tirhisa ngati. Sweswi se ku endliwe vuhandzuri byo tano bya 40. Tliliniki leyi yi lunghekele ku amukela vavabyi lava humaka ePoland hinkwaro ni va le ka matiko man’wana. Endzhaku ka bulo ra timinete ta 50, xandla xa mulanguteri wa wadi xi tivise swirho swa HLC eka ntlawa wa vavabyi, xi ku: ‘Vanhu lava i Timbhoni ta Yehovha. Va tirhisana ni tliliniki ya hina, naswona va hi pfuna. Mpfuno wa vona a wu vuyerisi vapfumeri-kulobye ntsena kambe ni vavabyi lavan’wana hinkwavo va pfuneka. Hikwalaho ka Timbhoni ta Yehovha, hi tivonerile hi ya hina leswaku vuhandzuri lebyikulu bya mbilu byi nga endliwa handle ko tirhisa ngati.

“‘Hi xikombiso, hi endle vuhandzuri eka wansati loyi [a komba un’wana wa vavabyi va yena] handle ko tirhisa ngati, naswona hi Musumbunuku u ya ekaya. Ndzi lava ku boxa leswaku sweswi ngati a ha ha yi tirhisi ngopfu hikuva yi ni khombo. Yi fambisana ni HIV, vuvabyi bya xivindzi ni ku hlwela ku hola.

“‘Mina ndzi Mukhatoliki, kambe ekaya ka hina nkarhi hinkwawo ha ma yingisa mavonelo ya van’wana. Siku rin’wana a ndzi hundza eXitediyamu xa Slaski ndzi ri ni vana va mina. Eku sunguleni, xitediyamu lexi a xi nga ha tirhisiwi, kambe sweswi hi xi vone xi cince hi ku helela. Ndzi vutise un’wana wa vatirhi leswaku swi tise ku yini leswaku xi cinca. U vule leswaku vafambisi a va heleriwe hi ntshembo wo lunghisa xitediyamu lexi, kambe xi lombiwe Timbhoni ta Yehovha, kutani ti xi pfuxa.

“‘Kutani lava i vanhu lava hinkwerhu hi nga dyondzaka swo tala eka vona. Ndzi ehleketa leswaku eka wadi leyi hi fanele hi yingisa mavonelo ya van’wana.’ Kutani loko a kombetela eka Mbhoni leyi a yi ta endliwa vuhandzuri eka masikunyana lama a ma ta landzela, u te: ‘Wansati loyi i wun’wana wa Timbhoni ta Yehovha, naswona u ta endliwa vuhandzuri handle ko tirhisa ngati.’”

Hambi leswi Timbhoni ta Yehovha ti nga ringetiki ku sindzisa van’wana hi ripfumelo ra vona, tona hi toxe ti landzela xikombiso xa vaapostola, hi ku “yingisa Xikwembu ku tlula vanhu.” (Mintirho 5:29) Leswi swi katsa ku xixima ngati. Va swi tsakela loko van’wana va xixima ripfumelo ra vona ra vukhongeri emhakeni leyi.