Vana Ni Xivindzi!

‘Vanani ni xivindzi kutani mi ku: “Yehovha i mupfuni wa mina.”’—VAHEVERU 13:6.

1. Hi xihi xivindzi lexi kombisiweke hi lava va dyondzeke ntiyiso wa Xikwembu eka lembe xidzana ro sungula C.E.?

A KU ri lembe xidzana ro sungula ra Nguva ya hina leyi Tolovelekeke. Mesiya loyi a ku ri khale a rindzeriwile se a a fikile. U dyondzise vadyondzisiwa vakwe kahle naswona u simeke ntirho wa nkoka wo chumayela. Se a ku ri nkarhi wo va vanhu va twa mahungu lamanene ya Mfumo wa Xikwembu. Hikwalaho, vavanuna ni vavasati lava dyondzeke ntiyiso va twarise rungula rero ro hlamarisa hi xivindzi.—Matewu 28:19, 20.

2. Ha yini Timbhoni ta Yehovha ti fanele ti va ni xivindzi namuntlha?

² Mfumo a wu nga si tlhomiwa emasikwini wolawo. Kambe loyi a Hlawuriweke ku va Hosi, Yesu Kreste, u vhumbhe hi ta vukona byakwe bya nkarhi lowu a wu ta landzela a ri ematimbeni ya Mfumo. A byi ta voniwa hi swilo swo tanihi tinyimpi, ndlala, mintungu, ku tsekatseka ka misava ni ku chumayeriwa ka mahungu lamanene emisaveni hinkwayo hi mpimo lowu nga ringanisiwiki. (Matewu 24:3-14; Luka 21:10, 11) Tanihi Timbhoni ta Yehovha, hi fanele ku va ni xivindzi leswaku hi hlangavetana ni swiyimo leswi, ni maxangu lawa hi kombiwaka wona. Kutani swi ta hi pfuna ku xiya timhaka ta Bibele malunghana ni vahuweleri va Mfumo va lembe xidzana ro sungula C.E. lava a va ri ni xivindzi.

Ku Va Ni Xivindzi Xo Tekelela Kreste

3. I mani loyi a nyikelaka xikombiso lexinene eka hinkwaswo xa ku va ni xivindzi, naswona ku vuriwe yini ha yena eka Vaheveru 12:1-3?

³ Yesu Kreste u nyikela xikombiso lexi tlulaka hinkwaswo xa ku va ni xivindzi. Endzhaku ko tshaha ‘papa lerikulu’ ra timbhoni ta Yehovha ta le mahlweni ka Vukreste leti a ti ri ni xivindzi, muapostola Pawulo u vulavule hi Yesu, a ku: “Hikokwalaho, leswi hi rhendzeriweke hi vunyingi lebyikulu lebyi bya timbhoni, na hina a hi tshikeni hinkwaswo leswi swi hi sivelaka ku ya emahlweni, ni vudyoho lebyi hatlaka ku hi namarhela, hi tsutsuma hi ri ni ku tiyisela eku tsutsumeni ka mpfhuka lowu hi vekeriweke wona. A hi languteni eka Yesu, musunguri ni muhetisisi wa ku pfumela ka hina, loyi a nga chavangiki ku byarha [mhandzi ya nxaniso, NW], a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi ú tshamile evokweni ra xinene exiluvelweni xa Xikwembu. Anakanyani yena loyi a nga tiyisela hi ndlela leyo tano, loko vadyohi va lwa na yena, leswaku mi nga karhali kumbe ku hela mbilu.”—Vaheveru 12:1-3.

4. Yesu u xi kombise njhani xivindzi loko a ringiwa hi Sathana?

⁴ Endzhaku ka ku khuvuriwa kakwe ni loko a hete masiku ya 40 a ri karhi a anakanyisisa, a khongela ni ku titsona swakudya emananga, Yesu u kanete Sathana hi xivindzi. Loko a ringiwa hi Diyavulosi leswaku a hundzula maribye ma va vuswa, Yesu u arile, hikuva a swi hoxile ku endla singita leswaku a enerisa ku navela ka yena n’wini. Yesu u te: “Ku tsariwile leswi: ‘Munhu a nga ka a nga hanyi hi vuswa ntsena, kambe u ta hanya hi marito hinkwawo lama humaka enon’weni wa Xikwembu.’” Loko Sathana a n’wi byele leswaku a tlulela ehansi a suka exihlungwanini xa tempele, Yesu u arile, hikwalaho ka leswi a ku ta va xidyoho ku ringa Xikwembu leswaku xi n’wi ponisa loko a ringeta ku tidlaya. Kreste u te: “Nakambe ku tsariwile leswi: ‘U nga tshuki u ringa Hosi, Xikwembu xa wena.’” Sathana u vule leswaku u ta n’wi nyika mimfumo hinkwayo ya misava loko a ‘n’wi gandzela,’ kambe Yesu a nga gwinehanga, a seketela ntlhontlho wa Diyavulosi wa leswaku vanhu va nge swi koti ku tshama va tshembekile eka Xikwembu loko va ringiwa. Kutani Yesu u te: “Suka Sathana, hikuva ku tsariwile leswi: ‘U ta gandzela Hosi, Xikwembu xa wena, u tirhela xona ntsena.’” Endzhaku ka sweswo, Muringi ‘u n’wi tshikile, a yimela ku kuma nkarhi wun’wana lowunene.’—Matewu 4:1-11; Luka 4:13.

5. I yini lexi nga hi pfunaka ku lwisana ni ndzingo?

⁵ Yesu a a titsongahata eka Yehovha, naswona a a kaneta Sathana. Loko na hina hi ‘titsongahata hi ndlela leyi fanaka eka Xikwembu, hi kaneta Diyavulosi, u ta hi siya.’ (Yakobo 4:7) Ku fana na Yesu, hi nga lwisana ni ndzingo hi xivindzi loko hi tirhisa Matsalwa, kumbexana hi tlhela hi ma tshaha, loko hi ringiwa leswaku hi endla nchumu wo karhi, lowu ku wu endla xi nga xidyoho. Xana swi nga endleka leswaku hi hluriwa hi ndzingo wo yiva loko hi nkarhi wolowo hi titsundzuxa nawu wa Xikwembu lowu nge: “U nga ṭhuki u yiv̌a”? Xana swi nga endleka leswaku Vakreste vambirhi va endla vuoswi hambi loko un’wana wa vona a va ni xivindzi a tshaha marito lama nge: “U nga ṭhuki u oŝa”?—Varhoma 13:8-10; Eksoda 20:14, 15.

6. Yesu u ve muhluri wa misava loyi a nga ni xivindzi hi ndlela yihi?

⁶ Tanihi Vakreste lava vengiwaka hi misava leyi, hi nga papalata moya wa yona ni mahanyelo ya yona layo biha. Yesu u byele valandzeri va yena a ku: “La misaveni, mi ta va ni mahlomulo, kambe tiyani timbilu, ndzi hlurile misava.” (Yohane 16:33) U hlule misava hi ku ka a nga fani na yona. Xikombiso xa yena tanihi muhluri ni vuyelo bya ku hlayisa ka yena vutshembeki swi nga hi nyika xivindzi xo n’wi tekelela hi ku tshama hi tihambanisile ni misava leyi, naswona hi nga pfumeli leswaku yi hi thyakisa.—Yohane 17:16.

Ku Va Ni Xivindzi Xo Hambeta Hi Chumayela

7, 8. I yini lexi nga ta hi pfuna ku ya emahlweni hi chumayela hambi loko hi xanisiwa?

⁷ Yesu ni vadyondzisiwa vakwe a va tshembe Xikwembu leswaku xi va nyika xivindzi xo ya emahlweni va chumayela hambi loko va xanisiwa. Kreste u hetisise vutirheli byakwe hi xivindzi, hambi loko a xanisiwa, naswona endzhaku ka Pentekosta ya 33 C.E., valandzeri vakwe lava a va xanisiwa va ye emahlweni va twarisa mahungu lamanene hambi loko varhangeri va vukhongeri bya Xiyuda va ringete ku va tshikisa. (Mintirho 4:18-20; 5:29) Vadyondzisiwa va khongerile va ku: “Hosi, languta ku tshukisa ka vona, u nyika malandza ya wena ku vula rito ra wena va tiyile va nga chavi nchumu.” Kutani ku humelele yini ke? Rungula ri ri: “Kuteloko va hetile ku khongela, xivandla lexi va hlengeletaneke ka xona xi tsekatseka, hinkwavo va tala hi Moya lowo Kwetsima, kutani va vula rito ra Xikwembu va tiyile.”—Mintirho 4:24-31.

⁸ Tanihi leswi vanhu vo tala namuntlha va nga ma amukeriki mahungu lamanene, hakanyingi ku laveka xivindzi xo hambeta va chumayeriwa. Malandza ya Yehovha ma lava ku tiyisiwa hi Xikwembu ngopfu-ngopfu loko ma xanisiwa, leswaku ma kota ku nyikela vumbhoni hi rixaladza. (Mintirho 2:40; 20:24) Kutani Pawulo, muhuweleri wa Mfumo loyi a a ri ni xivindzi, u byele mutirhi-kulobye loyi a a ha ri muntshwa ni loyi a a ri ni ntokoto lowuntsongo, a ku: “Xikwembu a xi hi nyikanga moya wa vutoya, kambe xi hi nyikile moya wa matimba, ni wa rirhandzu, ni wa ku tikhoma. Hikokwalaho, u nga vi na tingana ku veka vumbhoni hi tlhelo ra Hosi ya hina, hambileswi mina ndzi nga mubohiwa hikwalaho ka yona. Na wena, nkhensa ku xanisekela Evhangeli hi ku pfuniwa hi matimba ya Xikwembu.” (2 Timotiya 1:7, 8) Loko hi khongelela ku va ni xivindzi, hi ta swi kota ku ya emahlweni hi chumayela, naswona ntsako wa hina tanihi vahuweleri va Mfumo a wu nge heli hambi loko hi xanisiwa.—Matewu 5:10-12.

Ku Va Ni Xivindzi Xo Yima Na Yehovha

9, 10. (a) Xana Vayuda ni Vamatiko va lembe xidzana ro sungula va endle yini leswaku va va valandzeri lava khuvuriweke va Kreste? (b) Ha yini ku va Mukreste swi lave xivindzi?

⁹ Vayuda ni Vamatiko vo tala va lembe xidzana ro sungula va tshike mikhuva ya vona leyi nga pfumelelaniki ni matsalwa hi xivindzi, va va valandzeri lava khuvuriweke va Kreste. Endzhakunyana ka Pentekosta ya 33 C.E., “nhlayo ya vadyondzisiwa yi [ye] yi andza ngopfu eYerusalema, naswona vaprista lavo tala va tinyiketa eku pfumeleni.” (Mintirho 6:7) Vayuda volavo va ve ni xivindzi hi ku tshika vukhongeri bya mavunwa, va amukela Yesu tanihi Mesiya.

¹⁰ Ku sukela hi 36 C.E., Vamatiko vo tala va ve vapfumeri. Loko Korneliyo, ni swirho swa ndyangu wakwe ni Vamatiko van’wana va twe mahungu lamanene, va ma amukerile handle ko tipfinyinga, va amukela moya lowo kwetsima, naswona ‘va khuvuriwile hi vito ra Yesu Kreste.’ (Mintirho 10:1-48) Le Filipiya, mulanguteri wa khotso la nga wa Matiko ni ndyangu wakwe u hatlise a amukela Vukreste, kutani “kan’we-kan’we a khuvuriwa, yena ni vanhu va yena hinkwavo.” (Mintirho 16:25-34) Munhu a a fanele a va ni xivindzi loko a teka magoza yo tano, hikuva Vakreste a va ri ntlawanyana lowu xanisiwaka, lowu nga tolovelekangiki. Na sweswi va ha ri tano. Kambe loko u nga si tinyiketela eka Xikwembu ni ku khuvuriwa tanihi un’wana wa Timbhoni ta Yehovha, xana a hi nkarhi wa leswaku u teka magoza lawa ya lavaka xivindzi?

Ku Va Ni Xivindzi eMindyangwini Leyi Avaneke

11. Yunika na Timotiya va nyikele swikombiso swihi leswinene swa xivindzi?

¹¹ Yunika ni n’wana wakwe Timotiya va veke swikombiso leswinene swa ripfumelo leri lavaka xivindzi endyangwini lowu avaneke hi tlhelo ra vukhongeri. Hambi leswi Yunika a a ri ni nuna la nga riki mupfumeri, u dyondzise n’wana wakwe “Matsalwa layo Hlawuleka” ku sukela evuhlangini. (2 Timotiya 3:14-17) Loko a ve Mukreste, u kombise ‘ripfumelo leri nga riki na vukanganyisi.’ (2 Timotiya 1:5) Nakambe u ve ni xivindzi a dyondzisa Timotiya dyondzo ya Vukreste, hi tlhelo a kombisa xichavo eka vunhloko bya nuna wakwe la nga riki mupfumeri. Kunene, ripfumelo ni xivindzi xakwe swi hakeriwile loko n’wana wakwe la dyondzisiweke kahle a hlawuriwile leswaku a famba na Pawulo eka maendzo ya vurhumiwa. Leswi swi nga va xikhutazo lexikulu swonghasi eka vatswari lava nga Vakreste lava tikumaka va ri eswiyin’weni leswi fanaka!

12. Timotiya u ve munhu wa muxaka muni, naswona i vamani namuntlha lava tikombisaka va fana na yena?

¹² Hambi leswi Timotiya a a tshama endyangwini lowu avaneke hi tlhelo ra vukhongeri, u amukele Vukreste hi xivindzi, a va munhu wa moya loyi ha yena Pawulo a nga te: “Ndzi ni ku tshemba eka Hosi Yesu leswaku ku nga ri khale ndzi ta rhuma Timotiya a ta le ka n’wina [Vafilipiya], leswaku na mina ndzi tiyisiwa hi ku kuma mahungu yo huma eka n’wina. Ndzi hava un’wana loyi a fanaka na yena, loyi a hisekelaka ku mi pfuna hi mbilu hinkwayo ya yena. . . . Kambe ku tshembeka ka Timotiya ma ku tiva, ni hilaha a nga tirhisana na mina hakona entirhweni wa Evhangeli, a fana ni n’wana la tirhaka swin’we ni tata wa yena.” (Vafilipiya 2:19-22) Namuntlha vafana ni vanhwanyana vo tala lava nga emindyangwini leyi avaneke hi tlhelo ra vukhongeri va amukela Vukreste bya ntiyiso hi xivindzi. Ku fana na Timotiya, va tikombisa leswi va nga swona, naswona ha tsaka swinene leswi va nga swirho swa nhlengeletano ya Yehovha!

Ku Va Ni Xivindzi Xo ‘Tinghenisa eKhombyeni’

13. Akwila na Prisila va kombise xivindzi hi ndlela yihi?

¹³ Akwila na nsati wakwe Prisila (Priska) va veke xikombiso hi ku ‘tinghenisa ekhombyeni’ hi xivindzi leswaku va pfuna mupfumeri-kulobye. Va amukele Pawulo ekaya ra vona, va tirha na yena ku endla matende, ni ku n’wi pfuna ku simeka vandlha lerintshwa eKorinto. (Mintirho 18:1-4) Hi nkarhi wa xinakulobye xa vona xa malembe ya 15, va tlhele va nghenisa vutomi bya vona ekhombyeni hikwalaho ka yena, hi ndlela leyi nga boxiwangiki. A va tshama eRhoma loko a byela Vakreste va kwalaho a ku: “Ndzi runguleleni Prisila na Akwila, vatirhi kulorhi entirhweni wa Kriste Yesu, lava nyiketeke vutomi bya vona ku ndzi ponisa; a hi mina ntsena loyi a va nkhensaka, kambe na [wona mavandlha hinkwawo ya, NW] vamatiko [ya] va nkhensa.”—Varhoma 16:3, 4.

14. Hi ku nghenisa vutomi bya vona ekhombyeni leswaku va pfuna Pawulo, Akwila na Priska a va endla hi ku landza nawu wihi?

¹⁴ Hi ku tinghenisa ekhombyeni leswaku va pfuna Pawulo, Akwila na Priska va endle hi ku landza marito ya Yesu lama nge: “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina.” (Yohane 13:34) Nawu lowu a wu ri “lowuntshwa” hi mhaka ya leswi a wu tlula xilaveko xa Nawu wa Muxe xa leswaku munhu a rhandza munhu-kulobye hi laha a tirhandzaka ha kona. (Levhitika 19:18) A wu lava rirhandzu ro tinyikela leri a ri ta susumetela munhu ku nyikela vutomi byakwe eka van’wana, hi laha Yesu a endleke ha kona. Tertullian, mutsari wa lembe xidzana ra vumbirhi ni ra vunharhu C.E. u tshahe marito ya vanhu va misava malunghana ni Vakreste, loko a tsala a ku: “‘Vona,’ ku vula vona, ‘ndlela leyi va rhandzanaka ha yona . . . ni ndlela leyi va tiyimiseleke ku felana ha yona.’” (Apology, tluka XXXIX, 7) Hi nga boheka ku kombisa rirhandzu ra vumakwerhu hi ku nghenisa vutomi bya hina ekhombyeni hi xivindzi ngopfu-ngopfu loko hi xanisiwa, leswaku hi nga tshuki hi endla leswaku vapfumeri-kulorhi va xanisiwa kumbe ku dlayiwa hi valala.—1 Yohane 3:16.

Ku Va Ni Xivindzi Swi Tisa Ntsako

15, 16. Hi laha swi kombisiweke ha kona eka Mintirho ndzima 16, xivindzi ni ntsako swi nga hlanganisiwa njhani?

¹⁵ Pawulo na Silasi va nyikela vumbhoni bya leswaku ku kombisa xivindzi loko u ringiwa swi nga tisa ntsako. Hi xileriso xa tindhuna ta muti wa Filipiya, va biwile hi minkhavi exikarhi ka vanhu, kutani va pfaleriwa ekhotsweni. Kambe a va helanga matimba hi ku chava. Ku nga khathariseki swiyimo leswi ringaka leswi a va langutane na swona, a va ha ri na xona xivindzi lexi humaka eka Xikwembu kun’we ni ntsako lowu swi wu nyikaka Vakreste lava tshembekaka.

¹⁶ Hi nkarhi wa kwalomu ka le xikarhi ka vusiku, Pawulo na Silasi a va ri karhi va khongela ni ku dzunisa Xikwembu hi risimu. Xikan’we-kan’we ku tsekatseka ka misava ku ninginise khotso, ku ntshunxa tinketana leti va bohiweke ha tona, kutani tinyangwa ti pfuleka. Mulanguteri wa khotso la tshukeke kun’we ni ndyangu wakwe va nyikiwe vumbhoni hi xivindzi, leswi endleke leswaku va khuvuriwa tanihi malandza ya Yehovha. Yena hi byakwe u “[tsakile] swin’we ni va ndyangu wa yena hinkwawo, hileswi a a pfumerile ka Xikwembu.” (Mintirho 16:16-34) Leswi swi fanele swi tise ntsako lowukulu swonghasi eka Pawulo na Silasi! Loko hi xiyisisa xikombiso lexi ni swin’wana swa Matsalwa swa ku va ni xivindzi, hina hi nga endla yini leswaku hi tshama hi ri ni xivindzi tanihi malandza ya Yehovha?

Yana eMahlweni U Va Ni Xivindzi

17. Hi laha swi kombisiweke ha kona eka Pisalema 27, ku tshemba Yehovha swi fambelana njhani ni ku va ni xivindzi?

¹⁷ Ku tshemba Yehovha swi ta hi pfuna leswaku hi tshama hi ri ni xivindzi. Davhida u yimbelerile a ku: “Langutela Yehova, u ṭhama u [va ni xivindzi]; mbilu ya wena a yi tiye! U tiṭhembela Yehova!” (Pisalema 27:14) Pisalema 27 yi kombisa leswaku Davhida a a tshemba Yehovha tanihi “khokholo” ra vutomi byakwe. (Ndzimana 1) Davhida u kume xivindzi hi ku vona ndlela leyi Xikwembu xi tameleke valala vakwe ha yona enkarhini lowu hundzeke. (Tindzimana 2, 3) Ku tlangela xivandla xa vugandzeri bya Yehovha a ku ri xivangelo xin’wana xo kuma xivindzi. (Ndzimana 4) Ku tshemba mpfuno wa Yehovha, nsirhelelo wakwe ni ku kutsula kakwe na swona swi pfune Davhida leswaku a va ni xivindzi. (Tindzimana 5-10) Xin’wana lexi n’wi pfuneke a ku ri vuleteri bya nkarhi na nkarhi bya misinya ya milawu ya ndlela ya Yehovha leyi lulameke. (Ndzimana 11) Xikhongelo xa matimba xa ku kutsuriwa eka valala vakwe, kun’we ni ripfumelo ni ntshembo, swi pfune Davhida leswaku a va ni xivindzi. (Tindzimana 12-14) Hi nga kuma xivindzi hi tindlela leti fanaka, xisweswo hi kombisa leswaku hi “tiṭhembela Yehova” hakunene.

18. (a) I yini lexi kombisaka leswaku ku tihlanganisa nkarhi na nkarhi ni vagandzeri-kulorhi va Yehovha swi nga hi pfuna ku tshama hi ri ni xivindzi? (b) Minhlangano ya Vukreste yi pfuna njhani eku nyikeni ka xivindzi?

¹⁸ Ku tihlanganisa nkarhi na nkarhi ni vagandzeri-kulorhi va Yehovha swi nga hi pfuna ku tshama hi ri ni xivindzi. Loko Pawulo a endla xikombelo eka Khezari ni loko a ya eRhoma, vapfumeri-kulobye va n’wi hlanganisile eNtsendzeleni wa Apiyo ni le Tihodela-Tinharhu. Rungula ri ri: “Kuteloko Pawulo a va vona, a nkhensa Xikwembu, a tiyisa mbilu.” (Mintirho 28:15) Loko hi va kona nkarhi na nkarhi eminhlanganweni ya Vukreste, hi yingisa xitsundzuxo xa Pawulo lexi nge: “A hi laveni tindlela to pfuxana, hi kombana rirhandzu ni mintirho leyinene. Hi nga tshiki ku hlengeletana, kukota leswi van’wana va toloveleke ku endla swona, kambe hi khongotelana, ngopfu-ngopfu leswi mi vonaka leswaku siku ra Hosi ri ya ri tshinela.” (Vaheveru 10:24, 25) Ku khongotelana swi vula yini? Ku khongotela swi vula “ku nyika xivindzi, matimba kumbe ntshembo.” (Webster’s Ninth New Collegiate Dictionary) Hi nga pfuna swinene hi ku nyika Vakreste van’wana xivindzi, naswona ku khongotela ka vona ku nga endla leswaku na hina hi va ni xivindzi.

19. Matsalwa ni tibuku ta Vukreste swi fambelana njhani ni ku tshama ka hina hi ri ni xivindzi?

¹⁹ Leswaku hi tshama hi ri ni xivindzi, hi fanele ku dyondza Rito ra Xikwembu nkarhi na nkarhi, ni ku tirhisa xitsundzuxo xa rona evuton’wini bya hina. (Deteronoma 31:9-12; Yoxuwa 1:8) Dyondzo ya hina ya nkarhi na nkarhi yi fanele yi katsa ni tibuku ta Vukreste leti sekeriweke eMatsalweni, hikuva xitsundzuxo lexinene lexi nyikeriwaka hi ndlela yoleyo xi ta hi pfuna ku hlangavetana ni miringo ya ripfumelo hi ku tirhisa xivindzi lexi humaka eka Xikwembu. Hi swi vonile hi ku ya hi timhaka ta Bibele leswaku malandza ya Yehovha a ma ri ni xivindzi ku fikela kwihi eswiyin’weni swo hambana-hambana. Kumbexana sweswi a hi swi tivi leswaku rungula rero ri nga hi pfunisa ku yini, kambe Rito ra Xikwembu ri ni matimba, naswona leswi hi swi dyondzaka eka rona swi nga hi pfuna minkarhi hinkwayo. (Vaheveru 4:12) Hi xikombiso, loko ku chava vanhu swi sungula ku khumba vutirheli bya hina, hi nga tsundzuka ndlela leyi Enoko a veke ni xivindzi ha yona a twarisa rungula ra Xikwembu eka vanhu lava nga xi chaviki.—Yuda 14, 15.

20. Ha yini ku nga vuriwaka leswaku xikhongelo i xa nkoka loko hi ta tshama hi ri malandza ya Yehovha lama nga ni xivindzi?

²⁰ Leswaku hi tshama hi ri ni xivindzi tanihi malandza ya Yehovha, hi fanele ku phikelela eku khongeleni. (Varhoma 12:12) Yesu u tiyisele miringo yakwe hi xivindzi hikuva u “khongerile ni ku kombela hi ku titsongahata, a huwelela hi matimba ni ku rila hi mihloti, eka Xikwembu lexi a xi ri ni matimba ya ku n’wi ponisa eku feni, kutani ú yingisiwile hikwalaho ka xichavo xa yena.” (Vaheveru 5:7) Hi ku titshineta ekusuhi na Xikwembu hi xikhongelo, hi nge fani ni matoya ya misava lawa makumu ya wona ma nga ta va “rifu ra vumbirhi” leri eka rona ku nga ha riki na ku pfuxiwa. (Nhlavutelo 21:8) Nsirhelelo ni vutomi emisaveni ya Xikwembu leyintshwa swi ta kumiwa hi malandza ya xona lama nga ni xivindzi.

21. Ha yini Timbhoni ta Yehovha leti tshembekaka ti nga vaka ni xivindzi?

²¹ Tanihi Timbhoni ta Yehovha leti tshembekaka, a hi fanelanga ku chava valala lava nga mademona ni vanhu va nyama, hikuva Xikwembu xa hi sirhelela, naswona hi ni xikombiso xa Yesu xa ku va ni xivindzi tanihi muhluri wa misava. Ku va ni xinghana lexi akaka emoyeni ni vanhu va Yehovha na swona swi hi pfuna ku va ni xivindzi. Nakambe xivindzi hi xi kuma hi vuleteri ni xitsundzuxo xa Matsalwa ni tibuku ta Vukreste. Naswona rungula ra Bibele malunghana ni malandza ya Xikwembu ya nkarhi lowu hundzeke ri hi pfuna ku famba etindleleni ta xona hi xivindzi. Hikwalaho, emasikwini lawa yo hetelela lama nonon’hwaka, a hi yeni emahlweni hi endla ntirho wo hlawuleka hi xivindzi. Ina, vanhu hinkwavo va Yehovha a va ve ni xivindzi!

A Wu Ta Hlamurisa Ku Yini Ke?

◻ Xikombiso xa Yesu xi nga hi nyika xivindzi hi ndlela yihi?

◻ I yini lexi nyikeke Yesu na vadyondzisiwa vakwe xivindzi xo ya emahlweni va chumayela?

◻ Ha yini Vayuda ni Vamatiko a va fanele ku va ni xivindzi leswaku va yima na Yehovha?

◻ Hi swihi swikombiso swa xivindzi leswi nyikeriweke hi Yunika na Timotiya?

◻ Hi byihi vumbhoni lebyi nga kona bya leswaku ku va ni xivindzi swi tisa ntsako hambi loko u xanisiwa?

[Xifaniso lexi nga eka tluka 18]

Ku fana na Yesu, hi nga lwisana ni ndzingo loko hi tirhisa Matsalwa ni ku ma tshaha