Tshemba Yehovha!

“Ṭhemba Yehova hi mbilu ya wena hikwayo.”—SWIVURISO 3:5.

1. Swivuriso 3:5 yi ri khumbe njhani jaha rin’wana, naswona ku ve ni vuyelo byihi bya nkarhi wo leha?

MURHUMIWA loyi ku nga khale a ri entirhweni wakwe wa tsala: “‘TSHEMBA HOSI HI MBILU YA WENA HINKWAYO; U NGA TSHEMBI KU TLHARIHA KA WENA.’ Marito wolawo lama humaka eBibeleni lawa a ma furemisiwile, ma hayekiwe ekhumbini, emutini lowu a ndzi endzile eka wona, ma koke mianakanyo ya mina. Siku rero hinkwaro ndzi anakanyisise ha wona. Ndzi tivutisile leswaku xana ndzi nga swi kota ku tshemba Xikwembu hi mbilu ya mina hinkwayo?” Munhu loyi a a ri ni malembe ya 21 enkarhini wolowo. Kutani loko a ri ni malembe ya 90 hi vukhale, naswona a ha tirha hi ku tshembeka tanihi nkulu ePerth, le Australia, u anakanyisisa hi vutomi lebyi fuwisiweke hi mihandzu ya ku tshemba Yehovha hi mbilu hinkwayo, ku katsa ni malembe ya 26 ya ntirho lowu ntlhotlhaka wa ku phayona emasin’wini lamantshwa ya vurhumiwa le Ceylon (laha sweswi ku nga Sri Lanka), Burma (laha sweswi ku nga Myanmar), Malaya, Thailand, India ni le Pakistan.a

2. Swivuriso 3:5 yi fanele yi aka ku tiyiseka kwihi eka hina?

² “Ṭhemba Yehova hi mbilu ya wena hikwayo”—marito lawa ya humaka eka Swivuriso 3:5, eka Bibele ya Xitsonga, ma fanele ma hi susumeta hinkwerhu leswaku hi ya emahlweni hi nyiketela vutomi bya hina eka Yehovha hi ku helela, hi tiyiseka leswaku a nga ri tiyisa ripfumelo ra hina, ku fikela laha hi hlulaka hambi ku ri swihinga leswi fanaka ni tintshava. (Matewu 17:20) Sweswi a hi kambisiseni mongo wa Swivuriso 3:5.

Vuleteri Bya Vutatana

3. (a) Hi xihi xikhutazo lexi kumekaka eka tindzima to sungula ta kaye ta Swivuriso? (b) Ha yini hi fanele hi yi kambisisa swinene Swivuriso 3:1, 2?

³ Tindzima to sungula ta kaye ta buku ya Bibele ya Swivuriso ti tele hi vuleteri bya vutatana, ku nga ndzayo ya vutlharhi leyi Yehovha a yi nyikaka hinkwavo lava languteleke ku va vana vakwe etilweni kumbe “ku ntshunxeka loko kwetsima loku nga ka vana va Xikwembu” emisaveni ya paradeyisi. (Varhoma 8:18-21, 23) Leyi i ndzayo ya vutlharhi leyi nga tirhisiwaka hi vatswari eku kuriseni ka vana va vona va xinuna ni va xisati. Ndzayo ya Swivuriso ndzima 3 yi hlawulekile, tanihi leswi yi sungulaka hi xitsundzuxo lexi nge: “Ṅwana nga, u nga riv̌ali nawu wa mina, mbilu ya wena a yi hlayise ku lerisa ka mina.” Tanihi leswi masiku ya makumu ya misava yo homboloka ya Sathana ma nga kusuhi ni ku hela, onge hi nga swi yingisa swinene switsundzuxo swa Yehovha. Ndlela leyi hi yi fambeke yi nga tikomba yi lehile, kambe hinkwavo lava tiyiselaka va tshembisiwa ‘ku engeteriwa masiku ni malembe evuton’wini bya vona, va ri eku rhuleni’—ku nga vutomi lebyi nga heriki emafambiselweni lamantshwa ya Yehovha.—Swivuriso 3:1, 2.

4, 5. (a) Hi byihi vuxaka lebyi tsakisaka lebyi hlamuseriwaka eka Yohane 5:19, 20? (b) Ndzayo leyi nga eka Deteronoma 11:18-21 yi tirha njhani ku ta fika esikwini ra hina?

⁴ Vuxaka lebyi tsakisaka exikarhi ka tatana na n’wana byi nga va bya risima swinene. Yehovha Xikwembu, Muvumbi wa hina u lunghiselele leswaku byi va hi ndlela yoleyo. Kreste Yesu u vule leswi landzelaka hi vuxaka bya yena lebyikulu lebyi a nga na byona na Yehovha: “N’wana a nga ka a nga tisunguleli a endla xilo hi yexe; ú endla ntsena lexi a xi voneke xi endliwa hi Tata wa yena; hinkwaswo leswi Tatana a swi endlaka, na yena N’wana wa swi endla. Hikuva Tatana ú rhandza N’wana; wa n’wi komba hinkwaswo leswi a swi endlaka.” (Yohane 5:19, 20) Xikongomelo xa Yehovha hi leswaku ku va ni vuxaka lebyi fanaka exikarhi ka yena ni ndyangu wakwe hinkwawo wa le misaveni, ni le xikarhi ka vatatana va laha misaveni ni vana va vona.

⁵ Vuxaka lebyinene bya ndyangu a byi khutaziwa eIsrayele wa khale. Yehovha u laye vatatana kwalaho a ku: “Nghenisani marito lawa nḍi mi byelaka wona, e timbilwini ta ṅwina ne mimoyeni ya ṅwina; mi yi boha e mav̌okweni ya ṅwina ši v̌a šiṭunḍušo ša ṅwina, ni šikombiso e šikari ka mahlo ya ṅwina; u ta ma dyonḍisa v̌ana v̌a wena, u v̌ulav̌ula ha wona hambi loko u ri ndlwini, ne ku fambeni ka wena, ni loko u ya ku etleleni, ni loko u pfuka; u ta yi ṭala e tinyangweni ta wena ne timhanḍeni ta yindlu ya wena, leŝaku masiku ya ṅwina ni masiku ya v̌ana v̌a ṅwina ma tarisiwa e tikweni leri Yehova a hlambanyeleke v̌atata wa ṅwina ku v̌a nyika rona, ma fana ni masiku ya matilo la’ma nga henhla ka misav̌a.” (Deteronoma 11:18-21) Rito leri huhuteriweke ra Mudyondzisi wa hina Lonkulu, Yehovha Xikwembu, hakunene ri nga pfuna ku n’wi hlanganisa swinene ni vatswari ni vana va vona, kun’we ni lavan’wana hinkwavo lava n’wi tirhelaka evandlheni ra Vukreste.—Esaya 30:20, 21.

6. Hi nga swi kota njhani ku tsakeriwa hi Xikwembu na hi vanhu?

⁶ Xitsundzuxo xa vutlharhi xa vutatana lexi yaka eka vanhu va Xikwembu, lavakulu ni lavantshwa, xi ya emahlweni eka Swivuriso ndzima 3, tindzimana 3 na 4: “V̌unene ni ntiyiso ŝi nga ṭhuki ŝi av̌ana na wena; tiṭimbe ŝona e nhaṅwini ya wena, u ŝi ṭala e mbilwini ya wena: U ta kuma tintŝalo ni šitšhav̌o, e mahlweni ka Šikwembu ni ka v̌anhu.” Yehovha Xikwembu hi byakwe u kombisa vunene ni ntiyiso hi ndlela leyi xiyekaka. Hi laha Pisalema 25:10 yi vulaka ha kona, “tindlela hikwato ta Yehova i tintŝalo ni ku ṭhembeka.” Hi fanele hi hlakulela timfanelo leti ni matimba ya tona lama sirhelelaka hi ku tekelela Yehovha, hi ti hlayisa ku fana ni vuhlalu bya le nhan’wini lebyo durha swinene, ni ku ti dzikisa swinene etimbilwini ta hina. Kutani hi nga khongela hi matimba hi ku: “Wena Yehova . . . musa wa wena ni ku lulama ka wena, ŝi ta nḍi hlayisa hi masiku.”—Pisalema 40:11.

Ku Tshemba Loku Phikelelaka

7. Yehovha u kombise ku tshembeka ka yena hi tindlela tihi?

⁷ Hi ku ya hi Webster’s Ninth New Collegiate Dictionary, ku tshemba i “ku titshega swinene hi nawu, vuswikoti, matimba, kumbe ntiyiso wa munhu kumbe xilo xo karhi.” Nawu wa Yehovha wu titshege swinene hi vunene byakwe. Naswona hi nga byi tshemba hi ku helela vuswikoti byakwe byo endla leswi a swi tshembiseke, hikuva vito rakwe, Yehovha, ri n’wi kombisa tanihi Mukunguhati lonkulu. (Eksoda 3:14; 6:2-8) Tanihi Muvumbi, i Xihlovo xa matimba ni ntamu lowukulu. (Esaya 40:26, 29) U ni ntiyiso, hikuva ‘Xikwembu a xi hembi.’ (Vaheveru 6:18) Hikwalaho hi khutaziwa ku n’wi tshemba hi ku helela Yehovha, Xikwembu xa hina, Xihlovo lexikulu xa ntiyiso hinkwawo, lexi nga ni matimba hinkwawo yo sirhelela vanhu lava xi tshembaka ni ku hetisisa swikongomelo swa xona hinkwaswo leswinene hi ndlela leyi hlamarisaka.—Pisalema 91:1, 2; Esaya 55:8-11.

8, 9. Ha yini ku tshembana ku nga ri kona emisaveni hi ndlela leyi khomisaka gome, naswona vanhu va Yehovha va swi kombisa njhani leswaku va hambanile?

⁸ Lexi khomisaka gome, ku tshembana a ku kona emisaveni leyi yi onhakeke. Ematshan’wini ya sweswo, ku tele makwanga ni vuhomboloki. Xifunengeto xa nkandziyiso wa May 1993 wa magazini lowu nge World Press Review a xi ri ni rungula leri nge: “VUKANGANYISI—Ku Kuma Mali Hi Ndlela Yo Biha eMafambiselweni Ya Misava Leyintshwa. Vakanganyisi va kona hinkwako, ku suka le Brazil ku ya eJarimani, ku suka le United States ku ya le Argentina, ku suka le Spain ku ya ePeru, ku suka le Italy ku ya eMexico, ku suka le Vatican ku ya eRussia.” Leswi nchumu lowu vuriwaka mafambiselo ya misava leyintshwa wu sekeriweke ehenhla ka rivengo, makwanga ni ku nga tshembani, lexi wu xi tisaka i maxangu lama tlhandlekelanaka ehenhla ka vanhu.

⁹ Ku hambana ni matiko ya politiki, Timbhoni ta Yehovha ta tsaka leswi ti nga “tiko leri Yehova a nga Šikwembu ša rona.” Hi vona ntsena lava nga vulaka hi ku tiyisa va ku, “Hi tshemba Xikwembu.” Un’wana ni un’wana wa vona a nga huwelela hi ntsako a ku: “E ka Šikwembu, nḍi ta twarisa rito ra šona. . . . Nḍi ṭhemba Šikwembu, a nḍi tšhav̌i ntšhumu.”—Pisalema 33:12; 56:4, 11.

10. Vantshwa vo tala va Vakreste va tiyisiwe hi yini leswaku va hlayisa vutshembeki?

¹⁰ Etikweni rin’wana ra le Asia, laha vantshwa va magidi va Timbhoni va biweke swinene ni ku khotsiwa, ku tshemba Yehovha swi pfune vo tala swinene exikarhi ka vona leswaku va tiyisela. Siku rin’wana ni vusiku, muntshwa un’wana wa Mbhoni loyi a khotsiweke ni ku xanisiwa hi ndlela leyi chavisaka u fike laha a vonaka onge a nge he swi koti ku tiyisela. Kambe muntshwa un’wana u ye eka yena a tifihlile emunyameni. U hleveterile a ku: “U nga heli matimba; mina ndzi landzurile kambe a ndzi vanga ni ku rhula emianakanyweni ya mina ku sukela loko ndzi landzurile.” Muntshwa lowo sungula u tlhele a kuma matimba yo tshama a tiyile. Hi nga tshemba Yehovha hi ku helela leswaku u ta hi pfuna ku hlula marhengu wahi ni wahi ya Sathana yo herisa ku tshembeka ka hina.—Yeremiya 7:3-7; 17:1-8; 38:6-13, 15-17.

11. Hi yihi ndlela leyi hi khutaziwaka ha yona leswaku hi tshemba Yehovha?

¹¹ Hi ku komisa, nawu wo sungula wu ri: “Rhandza Hosi Xikwembu xa wena hi mbilu ya wena hinkwayo.” (Marka 12:30) Loko hi anakanyisisa hi Rito ra Xikwembu, mintiyiso leyinene leyi hi yi dyondzaka ya dzika swinene etimbilwini ta hina lerova hi susumeteriwa ku tinyiketela hi ku helela entirhweni wa Xikwembu xa hina lexi hlamarisaka, ku nga Yehovha, Hosi leyi Tlakukeke. Lexi hi susumetelaka ku tshemba ku ponisa ka yena hi ku helela i timbilu ta hina leti teleke hi ku n’wi tlangela, hikwalaho ka hinkwaswo leswi a hi dyondziseke ni ku hi endlela swona, ni leswi a nga ta hi endlela swona enkarhini lowu taka.—Esaya 12:2.

12. Hi malembe layo tala, Vakreste vo tala va swi kombise njhani leswaku va tshemba Yehovha?

¹² Ku tshemba loku ku nga hlakuleriwa hi malembe layo tala. Mbhoni ya Yehovha leyi titsongahataka leyi tirheke hi ku tshembeka hi malembe lama tlulaka 50 le yindlu-nkulu ya le Brooklyn ya Sosayiti ya Watch Tower, ku sukela hi April 1927, yi tsarile yi ku: “Loko n’hweti yi hela, ndzi kume mali-ndziho leyi ringanaka [R16,00] yi ri evhilopeni leyi nga ni khadi ro xonga leri nga ni tsalwa ra Bibele ra Swivuriso 3:5, 6 . . . A swi fanerile leswaku ndzi tshemba Yehovha, hikuva endzhakunyana ndzi sungule ku tiva leswaku Yehovha u na ‘nandza la tshembekaka, wo tlhariha’ eyindlu-nkulu, loyi a tshembekaka eku khathaleleni ka swilaveko hinkwaswo swa Mfumo laha misaveni.—Matewu 24:45-47.”b Mbilu ya Mukreste loyi a yi nga rhandzi mali, kambe a a tinyiketele ku kuma ‘rifuwo leri nga heriki ematilweni.’ Ni namuntlha, vatirhi va magidi lava nga emakaya ya Bethele ya Sosayiti ya Watch Tower emisaveni hinkwayo va endla tano hi ku landza xiboho xa nawu xo tinyiketela vusweti. Va tshemba Yehovha leswaku a lunghiselela swilaveko swa vona swa siku na siku.—Luka 12:29-31, 33, 34.

Tshemba Yehovha

13, 14. (a) Hi kwihi ntsena laha ku nga kumiwaka xitsundzuxo lexinene? (b) I yini lexi hi faneleke ku xi papalata leswaku hi pona ku xanisiwa?

¹³ Tata wa hina wa le tilweni wa hi tsundzuxa: “U nga tiṭhembi ku tlhariha ka wena.” (Swivuriso 3:5) Vutlharhi ni ku twisisa ka vatsundzuxi ni vativi va mianakanyo va misava, a hi nchumu loko swi ringanisiwa ni vutlharhi ni ku twisisa loku Yehovha a ku kombisaka. “V̌utlhari bya [yena] a byi na ku pimiwa.” (Pisalema 147:5) Ematshan’wini yo tshemba vutlharhi bya vanhu lava dumeke va misava kumbe minsusumeto ya hina leyi nga emunyameni, a hi tshembeni Yehovha, Rito ra yena, ni vakulu va vandlha ra Vukreste leswaku hi kuma xitsundzuxo lexinene.—Pisalema 55:22; 1 Vakorinto 2:5.

¹⁴ Vutlharhi bya munhu kumbe ndhuma a swi nge hi pfuni nchumu esikwini ra nhlomulo lowukulu leri tshinelaka hi ku hatlisa. (Esaya 29:14; 1 Vakorinto 2:14) Hi nkarhi wa Nyimpi ya Vumbirhi ya Misava le Japani, murisi wa vanhu va Xikwembu wa vutshila kambe la tinyungubyisaka u tihlawulele ku tshemba ku twisisa ka yena. Hikwalaho ka ntshikilelo u ve mugwinehi, naswona tinyimpfu to tala na tona ti landzurile loko ti xanisiwa. Makwerhu wa xisati la tshembekaka wa le Japani, loyi a tiyiseleke swinene ku xanisiwa hi tihanyi eswitokisini swo thyaka swa khotso u te: “Lava va tshameke va tshembekile a va nga ri na vuswikoti byo hlawuleka naswona a va tekiwa va ri vanhu ntsena. Kunene, hinkwerhu ka hina hi fanele hi tshemba Yehovha hi timbilu ta hina hinkwato, minkarhi hinkwayo.”c

15. Hi yihi mfanelo ya Xikwembu leyi hi faneleke ku yi hlakulela loko hi ta tsakisa Yehovha?

¹⁵ Ku tshemba Yehovha, ematshan’wini yo tshemba ku twisisa ka hina, swi lava ku titsongahata. Mfanelo leyi i ya nkoka swonghasi eka hinkwavo lava lavaka ku tsakisa Yehovha! Phela hambi xi ri Xikwembu xa hina xa titsongahata eku tirhisaneni ni swivumbiwa swa xona swo tlhariha, hambi leswi xi nga Hosi leyi Tlakukeke ya vuako hinkwabyo. Hi fanele hi swi tlangela sweswo. “[Hi] l’a koramelaka hansi, a hlometela e matilweni ne misav̌eni, a pfuša e nṭhurini l’a nge khombyeni.” (Pisalema 113:6, 7) Hikwalaho ka tintswalo takwe letikulu, u hi rivalela ku dyoha ka hina hi ku tirhisa nyiko leyikulu eka hinkwato leti a ti nyikeke vanhu, ku nga gandzelo ra risima ra nkutsulo ra N’wana wakwe la rhandzekaka, Kreste Yesu. Hi fanele hi wu tlangela swinene musa lowu wu nga fanelangiki!

16. Vamakwerhu va nga tikarhatela njhani ku fanelekela malunghelo yo karhi evandlheni?

¹⁶ Yesu hi byakwe wa hi tsundzuxa: “Un’wana ni un’wana loyi a tikurisaka, ú ta tsongahatiwa; kutani un’wana ni un’wana la titsongahataka, ú ta kurisiwa.” (Matewu 23:12) Hi ku titsongahata, vamakwerhu va xinuna lava khuvuriweke va fanele va tikarhatela ku fanelekela ku byarha vutihlamuleri evandlheni ra Vukreste. Kambe loko va vekiwa ku va valanguteri a va fanelanga va anakanya leswaku va kume xikhundlha xa le henhla, kambe va fanele ku endla ntirho lowu hi ku titsongahata, hi ku tlangela ni hi ku chivirika, hi laha Yesu a endleke ha kona, tanihi leswi a nga te: “Ku fikela sweswi, Tata wa mina a nga si tshika ku tirha, kutani na mina, tanihi yena, ndza tirha.”—Yohane 5:17; 1 Petro 5:2, 3.

17. Hinkwerhu ka hina hi fanele ku tlangela yini, leswi yisaka eka ntirho wihi?

¹⁷ Onge minkarhi hinkwayo hi nga titsundzuxa hi ku titsongahata ni hi xikhongelo leswaku Yehovha u hi languta hi ri ntshuri. Kutani hi nga tsaka swonghasi leswi “nsov̌o wa Yehova [wu nga] wa mikari hikwayo e ka la’v̌a ṅwi tšhav̌aka, ni ku lulama ka yena e henhla ka v̌ana v̌a v̌ana v̌a v̌ona”! (Pisalema 103:14, 17) Kutani hinkwerhu ka hina hi fanele hi va swichudeni leswi chivirikaka swa Rito ra Xikwembu. Tiawara ta nkoka swinene leti hi ti hetaka vhiki na vhiki ti fanele ti katsa ni nkarhi lowu hi wu tirhisaka eka dyondzo ya munhu hi xiyexe ni le ka dyondzo ya ndyangu, kun’we ni le ka minhlangano ya vandlha. Hi ndlela leyi hi kuma ‘vutivi bya Loyi a Tlakukeke Swinene.’ Sweswo i “ku twisisa.”—Swivuriso 9:10.

“E Makungwini Ya Wena Hikwawo . . .”

18, 19. Hi nga yi tirhisa njhani Swivuriso 3:6 evuton’wini bya hina, ivi ku va ni vuyelo byihi?

¹⁸ Loko yi yisa nyingiso wa hina eka Yehovha, Xihlovo xa ku twisisa xa le henhla, Swivuriso 3:6, yi ya emahlweni yi ku: “U ṅwi nghenisa e makungwini ya wena hikwawo, o ta lulamisa tindlela ta wena.” Ku anakanya hi Yehovha swi katsa ku ya eka yena nkarhi na nkarhi hi xikhongelo. Kwihi na kwihi laha hi nga kona, ku nga khathariseki xiphiqo lexi nga kona, hi ni ndlela yo hatlisa hi vulavula na yena hi xikhongelo. Loko hi endla mintirho ya hina ya siku na siku, loko hi lunghiselela ntirho wa nsimu, loko hi famba hi yindlu na yindlu hi twarisa Mfumo wa yena, lexi hi nga tshamelaka ku khongelela xona hi leswaku a katekisa ntirho wa hina. Xisweswo hi nga va ni lunghelo ni ntsako lowu nga ringanisiwiki na nchumu wo ‘famba na Xikwembu,’ hi ku tiyiseka leswaku xi ta ‘lulamisa tindlela ta hina,’ hi laha xi endleke ha kona eka vavanuna lava a va xi chava, tanihi Enoko na Nowa, kun’we ni Vaisrayele lava a va tshembekile, vo tanihi Yoxuwa na Daniyele.—Genesa 5:22; 6:9; Deteronoma 8:6; Yoxuwa 22:5; Daniyele 6:23; nakambe vona Yakobo 4:8, 10.

¹⁹ Loko hi tivisa Yehovha swikombelo swa hina, hi nga tiyiseka leswaku ‘ku rhula ka Xikwembu loku tlulaka ku twisisa hinkwako, ku ta hlayisa timbilu ta hina ni mianakanyo ya hina ha Kreste Yesu.’ (Vafilipiya 4:7) Ku rhula loku ka Xikwembu, loku kombisiwaka hi nghohe leyi tsakeke, ku nga susumetela vini va miti lava hi hlanganaka na vona entirhweni wa hina wo chumayela ku amukela rungula ra hina. (Vakolosa 4:5, 6) Nakambe ri nga chavelela lava va nga ha vaka va karhatekile hi mintshikilelo kumbe vuhomboloki lebyi tolovelekeke swinene emisaveni ya namuntlha, hi laha mhaka leyi landzelaka yi kombisaka ha kona.d

20, 21. (a) Ku tshembeka ka Timbhoni ta Yehovha ku va khutaze njhani van’wana hi nkarhi wa nxaniso wa Manazi? (b) Rito ra Yehovha ri fanele ri hi susumetela ku endla xiboho xihi?

²⁰ Max Liebster, Muyuda wa xiviri loyi hi ndlela leyi vonakaka yi ri singita a poneke ku Dlayiwa ka Vayuda hi Manazi, u hlamusele riendzo rakwe ro ya ekampeni ya Manazi yo dlayela ka yona vanhu hi marito lawa: “A hi lotleriwe ematorokisini ya xitimela lama a ma hundzuriwile ma endliwa switokisi swo tala leswitsongo swa vanhu vambirhi. Loko ndzi rahiwa ndzi nghena eka rin’wana ra wona, ndzi hlangane ni mukhotsiwa loyi mahlo yakwe a ma n’wi kombisa a rhurile. A a pfaleriwe kwalaho hi leswi a a xixima nawu wa Xikwembu, a hlawula ku khotsiwa ni rifu, ematshan’wini yo halata ngati ya van’wana. A a ri un’wana wa Timbhoni ta Yehovha. Vana vakwe a va tekiwile, naswona nsati wakwe a a dlayiwile. Na yena a a langutele ku dlayiwa. Riendzo ra masiku ya 14 ri ndzi hlamule swivutiso swa mina, hikuva ndzi ve ni ntshembo wa vutomi lebyi nga heriki eka riendzo leri ro ya eku dlayiweni.”

²¹ Loko a sukile laha a ku vulaka “khele ra tinghala” le Auschwitz, naswona se a khuvuriwile, makwerhu loyi u tekane ni un’wana wa Timbhoni ta Yehovha loyi na yena a a khotsiwile, loyi tata wakwe a xanisiweke ekampeni ya nxaniso le Dachau. Loko tata wakwe a ha ri kwalaho, u twe leswaku nsati wakwe ni n’wana wakwe wa xisati lontsongo na vona va khomiwile. U hlamusele ndlela leyi a titweke ha yona: “A ndzi karhatekile swinene. Kutani siku rin’wana loko ndzi ri enxaxamelweni wa vanhu lava yaka eku hlambeni, ndzi twe rito ri tshaha Swivuriso 3:5, 6 . . . A ri twala onge i rito leri humaka ematilweni. Hi leswi a ndzi lava swona leswaku ndzi tlhela ndzi kuma matimba.” Kahle-kahle, rito leri a ku ri ra mukhotsiwa un’wana loyi a a tshaha ndzimana leyi, kambe xiendlakalo lexi xi kombisa leswaku Rito ra Xikwembu ri nga hi nyika matimba lamakulu. (Vaheveru 4:12) Onge rito ra Yehovha ri nga vulavula na hina hi matimba namuntlha, hi ku tirhisa marito ya ndzimana ya hina ya lembe ra 1994 leyi nge: “Ṭhemba Yehova hi mbilu ya wena hikwayo”!

[Tinhlamuselo ta le hansi]

Hi Ku Komisa

◻ Swivuriso yi nyikela ndzayo ya muxaka muni?

◻ Ku tshemba Yehovha swi hi pfuna njhani?

◻ Ku tshemba Yehovha swi katsa na yini?

◻ Ha yini hi fanele hi nghenisa Yehovha emakungwini ya hina hinkwawo?

◻ Yehovha u ti lulamisa njhani tindlela ta hina?

[Swifaniso leswi nga eka tluka 15]

Rungula ra Mfumo leri tsakisaka ri koka vanhu va timbilu letinene