Dyondzo Ya Xikwembu Yi Lwisana Ni Tidyondzo Ta Mademona
“Van’wana va ta hambana ni [ripfumelo], hi mhaka ya ku landza mimoya leyi kanganyisaka ni tidyondzo ta mademona.”—1 TIMOTIYA 4:1.
1. I nyimpi yihi leyi Vakreste va nga exikarhi ka yona?
ANAKANYA u hanya vutomi bya wena hinkwabyo endhawini leyi nga ni nyimpi. Xana a wu ta titwa njhani loko u ya etlela hi huwa ya swibamu u pfuka hi huwa ya tiganunu? Lexi khomisaka gome, vanhu va hanyisa sweswo etindhawini tin’wana emisaveni. Kambe Vakreste hinkwavo va hanyisa sweswo hi tlhelo ra moya. Va le xikarhi ka nyimpi leyikulu leyi yi nga ni malembe ya kwalomu ka 6 000 yi ri karhi yi lwiwa, naswona yi tinyike matimba emasikwini ya hina. Xana nyimpi leyi yi lwiweke ku sukela khale i yini? I ku lwisana ka ntiyiso ni mavunwa, ku lwisana ka dyondzo ya Xikwembu ni tidyondzo ya mademona. Hi ta va hi nga swi hundzeleti loko hi vula leswaku nyimpi leyi—loko hi vulavula hi swiendlo swa valwi lavan’wana lava yimaka swin’we—i nyimpi ya tihanyi swinene ni leyi dlayeke vanhu vo tala swinene ematin’wini ya vanhu.
2. (a) Hi ku ya hi Pawulo, hi wahi matlhelo mambirhi lama lwaka? (b) Pawulo a a vula yini loko a ku ‘ripfumelo’?
2 Muapostola Pawulo u boxe matlhelo mambirhi lama lwaka enyimpini leyi loko a tsalela Timotiya a ku: “Moya wu vula wu tiyisile leswaku emasikwini lama taka, van’wana va ta hambana ni [ripfumelo], hi mhaka ya ku landza mimoya leyi kanganyisaka ni tidyondzo ta mademona.” (1 Timotiya 4:1) Xiya leswaku tidyondzo ta mademona a ti ta va ni nhlonhlotelo lowukulu ‘emasikwini yo hetelela.’ Loko hi languta mhaka leyi hi ku ya hi siku ra Pawulo, hi kuma leswaku hi hanya enkarhini wolowo. Nakambe xiya leswaku ‘ripfumelo’ hi rona ri lwisanaka ni tidyondzo ta mademona. Laha ‘ripfumelo’ ri yimela dyondzo ya Xikwembu, leyi sekeriweke emaritweni lama huhuteriweke hi Xikwembu, lama nga eBibeleni. Ripfumelo ro tano ri nyika vutomi. Ri dyondzisa Mukreste ku endla ku rhandza ka Xikwembu. I ntiyiso lowu yisaka evuton’wini lebyi nga heriki.—Yohane 3:16; 6:40.
3. (a) Ku humelela yini hi vahlaseriwa va nyimpi leyi nga exikarhi ka ntiyiso na mavunwa? (b) I mani murhangeri wa tidyondzo ta mademona?
3 Hinkwavo lava fularhelaka ripfumelo a va nge byi kumi vutomi lebyi nga heriki. Va ta hlaseriwa enyimpini. Vona vuyelo byo tano lebyi nga ni khombo swinene bya ku pfumela ku hambukisiwa hi tidyondzo ta mademona! (Matewu 24:24) Xana hina ha un’we-un’we hi nga swi papalatisa ku yini ku va vahlaseriwa? Hi ku ti bakanya hi ku helela tidyondzo leti ta mavunwa, leti hetisisaka swikongomelo swa “hosi ya mademona,” Sathana Diyavulosi. (Matewu 12:24) Swi le rivaleni leswaku tidyondzo ta Sathana i mavunwa, tanihi leswi Sathana a nga “tata wa mavunwa.” (Yohane 8:44) Xiya ndlela leyi a nga tirhisa mavunwa hi mano ha yona leswaku a hambukisa vatswari va hina vo sungula.
Ku Paluxiwa Ka Tidyondzo Ta Mademona
4, 5. Sathana u byele Evha vunwa byihi, naswona ha yini sweswo a swi hombolokile swonghasi?
4 Swiendlakalo swa kona swi tsariwe eBibeleni eka Genesa 3:1-5. Sathana u tshinelele wansati Evha hi ku tirhisa nyoka, a n’wi vutisa a ku: “Kunene Šikwembu ši te: Mi nga ṭhuki mi dya muri ni wuṅwe wa ntanga?” Xivutiso lexi xi vonaka xi nga ri na nchumu xo biha, kambe xi kambisise kahle. ‘Kunene swi tano?’ Sathana u twala onge u hlamarile, onge hi loko a ku, ‘Ha yini Xikwembu xi vula swilo swo tano?’
5 Handle ko tivona nandzu, Evha u kombise leswaku a swi ri tano. A a yi tiva dyondzo ya Xikwembu emhakeni leyi, leswaku Xikwembu xi byele Adamu leswaku a va ta fa loko va dya mihandzu ya murhi wo tivisa leswinene ni leswo biha. (Genesa 2:16, 17) Handle ko kanakana, xivutiso xa Sathana xi endle leswaku wansati a lava ku twa leswi engetelekeke, kutani u yingiserile loko nala a fikelela yinhla ya mhaka yakwe: “Kutani nyoka yi ku ka wansati: Loko ku ri ku fa, mi nga ka mi nga fi.” U vule marito yo biha swonghasi! Sathana u hehle Yehovha, Xikwembu xa ntiyiso, Xikwembu xa rirhandzu, Muvumbi, a ku u hembela vana va Yena va le misaveni!—Pisalema 31:5; 1 Yohane 4:16; Nhlavutelo 4:11.
6. Sathana u lwisane njhani ni vunene ni vuhosi bya Yehovha?
6 Kambe Sathana u vule ni swin’wana. U ye emahlweni a ku: “Kambe Šikwembu ši ṭiv̌a leŝaku siku mi nga ta dya, mahlo ya ṅwina ma ta pfuleka, mi ta kotisa Šikwembu, mi tiv̌a ŝo saseka ni ŝo biha.” Hi ku ya hi Sathana, Yehovha Xikwembu—loyi a endleleke vatswari va hina vo sungula swilo swo tala—a a lava ku va tsona nchumu wun’wana wo hlawuleka. A a lava ku va sivela leswaku va nga fani na swikwembu. Xisweswo Sathana u lwisane ni vunene bya Xikwembu. Nakambe u seketele ku titsakisa ni ku honisa milawu ya Xikwembu hi vomu, a vula leswaku ku endla hi ndlela leyi a swi ta va ni vuyelo lebyinene. Kahle-kahle, Sathana u lwisane ni vulawuri bya Xikwembu ehenhla ka ntumbuluko wa xona, a vula leswaku Xikwembu a xi na yona mfanelo yo veka swipimelo ehenhleni ka leswi munhu a a swi endla.
7. Tidyondzo ta mademona ti twiwe rini ro sungula, naswona ti fana njhani ni ta namuntlha?
7 Tidyondzo ta mademona ti sungule ku twiwa hi marito wolawo ya Sathana. Tidyondzo leti to homboloka ta ha seketela mavonelo lama fanaka yo biha. Hi laha a endleke ha kona entangeni wa Edeni, Sathana, loyi sweswi a joyiniweke hi mimoya yin’wana leyi xandzukeke, wa ha lwisana ni mfanelo ya Xikwembu yo veka mimpimanyeto ya maendlelo ya swilo. Wa ha lwisana na byona vulawuri bya Yehovha, naswona u ringeta ku hlohlotela vanhu leswaku va nga n’wi yingisi Tata wa vona wa le tilweni.—1 Yohane 3:8, 10.
8. Adamu na Evha va lahlekeriwe hi yini le Edeni, kambe Yehovha u kumeke a tiyisile hi ndlela yihi?
8 Eka nyimpi yoleyo yo sungula exikarhi ka dyondzo ya Xikwembu ni tidyondzo ta mademona, Adamu na Evha va endle xiboho lexi hoxeke, kutani va lahlekeriwa hi ntshembo wa vona wa vutomi lebyi nga heriki. (Genesa 3:19) Loko ku hundza malembe, ni loko mimiri ya vona yi sungule ku tsana, va swi vone kahle leswaku i mani loyi a vuleke mavunwa, ni leswaku i mani loyi a vuleke ntiyiso le Edeni. Hambi swi ri tano, emahlweni ka madzana ya malembe va nga si fa hi xiviri, va ve vahlaseriwa vo sungula enyimpini ya ntiyiso ni mavunwa loko va avanyisiwa hi Muvumbi wa vona, Xihlovo xa vutomi, tanihi lava nga faneriwangiki hi vutomi. Sweswo swi endleke loko va file hi tlhelo ra moya.—Pisalema 36:9; ringanisa Vaefesa 2:1.
Tidyondzo Ta Mademona Namuntlha
9. Tidyondzo ta mademona ti humelele ku fikela kwihi hi malembe xidzana yo tala?
9 Hi laha swi vikiweke ha kona eka buku ya Nhlavutelo, muapostola Yohane u yisiwe hi moya eka “siku ra Hosi,” leri sunguleke hi 1914. (Nhlavutelo 1:10) Enkarhini wolowo Sathana ni mademona yakwe va cukumeteriwe emisaveni va suka etilweni—leswi veke ku hluriwa lokukulu ka mukaneti loyi wa Muvumbi wa hina Lonkulu. Rito rakwe leri a ri tshamela ku hehla malandza ya Yehovha a ra ha tlhelanga ri twiwa nakambe etilweni. (Nhlavutelo 12:10) Kambe xana tidyondzo ta mademona ti hangalake ku fikela kwihi emisaveni, hi mpfhuka ti sungula le Edeni? Matsalwa ma ri: “Hiloko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo.” (Nhlavutelo 12:9) Misava hinkwayo yi amukele mavunwa ya Sathana! A swi hlamarisi leswi Sathana a vuriwaka “mufumi wa misava leyi”!—Yohane 12:31; 16:11.
10, 11. Sathana ni mademona yakwe va gingiriteka hi tindlela tihi namuntlha?
10 Xana Sathana u pfumerile leswaku u hluriwile loko a hlongoriwa etilweni? Nikatsongo! U tiyimisele ku ya emahlweni a lwisana na dyondzo ya Xikwembu ni lava va yi namarhelaka. Endzhaku ka ku hlongoriwa kakwe etilweni, Sathana u ye emahlweni ni nyimpi yakwe: “Dragona [Sathana] yi kariha swinene hikwalaho ka wansati . . . , yi suka yi ya lwa ni va rixaka ra yena lava saleke, lava hlayisaka milawu ya Xikwembu ni ku humesa vumbhoni bya Yesu.”—Nhlavutelo 12:17.
11 Ku tlhandlekela eku lwisaneni kakwe ni malandza ya Xikwembu, Sathana u funengeta misava hi mavunwa yakwe, a ringeta ku lawula vanhu hi ku helela. Eka xin’wana xa swivono swakwe swa Nhlavutelo swa siku ra Hosi, muapostola Yohane u vone swivandzana swinharhu leswi a swi fanekisela Sathana, nhlengeletano yakwe ya laha misaveni ya tipolitiki, ni mfumo lowukulu wa misava wa le nkarhini wa hina. A ku huma machela emilon’weni ya swivandzana leswi swinharhu. Xana a ma yimela yini ke? Yohane wa tsala: “Leyi i mimoya ya mademona leyi endlaka masingita, leyi rhendzelekaka hi tihosi ta misava hinkwayo, yi ti rhamba nyimpi, ku ya lwa ni Xikwembu xa matimba hinkwawo hi siku lerikulu ra kona.” (Nhlavutelo 16:14) Swa vonaka leswaku tidyondzo ta mademona ti tirha swinene emisaveni. Sathana ni mademona yakwe va ha lwa ni dyondzo ya Xikwembu, naswona va ta ya emahlweni va endla tano ku fikela laha Yesu Kreste, Hosi ya Vumesiya, a nga ta va tshikisa hi nkani.—Nhlavutelo 20:2.
Ndlela Yo Tiva Tidyondzo Ta Mademona
12. (a) Ha yini swi koteka ku lwisana ni tidyondzo ta mademona? (b) Sathana u ringetisa ku yini ku fikelela xikongomelo xakwe hi malandza ya Xikwembu?
12 Xana vanhu lava chavaka Xikwembu va nga lwisana na tona tidyondzo ta mademona? Va nga endla tano hi swivangelo swimbirhi. Xo sungula, hikwalaho ka leswi dyondzo ya Xikwembu yi nga ni matimba swinene; xa vumbirhi, hikwalaho ka leswi Yehovha a paluxeke marhengu ya Sathana leswaku hi ta kota ku lwisana na wona. Hi laha muapostola Pawulo a vuleke ha kona, “hi tiva makungu ya yena.” (2 Vakorinto 2:11) Ha swi tiva leswaku Sathana u tirhisa nxaniso tanihi ndlela yin’wana yo fikelela xikongomelo xakwe. (2 Timotiya 3:12) Kambe u ringeta ku hlohlotela mianakanyo ni timbilu ta lava va tirhelaka Xikwembu hi ndlela leyi tumbeleke swinene. U kanganyise Evha, a nghenisa ku navela ko biha embilwini yakwe. U ringeta ku endla nchumu lowu fanaka ni namuntlha. Pawulo u tsalele Vakorinto a ku: “Kukota leswi nyoka yi kanganyiseke Evha hi mano ya yona, ndza chava leswaku hi tindlela tin’wana mianakanyo ya n’wina yi nga onhiwa, kutani mi nga ha swi koti ku landzela Kriste hi ku tinyiketa ni ku tenga.” (2 Vakorinto 11:3) Xiya ndlela leyi a onheke mianakanyo ya vanhu vo tala ha yona.
13. I mavunwa wahi lawa Sathana a ma byeleke vanhu ku sukela le Edeni?
13 Sathana u hehle Yehovha eka Evha, a vula leswaku wa hemba, ni leswaku vanhu va nga fana ni swikwembu loko va honisa Muvumbi wa vona. Xiyimo xa vanhu xa vudyoho namuntlha xi kombisa leswaku Sathana hi yena a a ri muhembi, a ku nga ri Yehovha. Vanhu namuntlha a hi swikwembu! Hambi swi ri tano, Sathana u seketele vunwa byebyo byo sungula hi mavunwa man’wana. U sungule mianakanyo ya leswaku moya-xiviri wa munhu a wu fi. Xisweswo u vekele vanhu xirimbana xo anakanya leswaku va nga fana ni swikwembu hi ndlela yo karhi. Kutani hi ku tirhisa dyondzo yoleyo ya mavunwa, u seketele tidyondzo ta ndzilo wa tihele, pagatori, vungoma ni ku gandzela vakokwana lava feke. Vanhu va madzana ya timiliyoni va ha ri mahlonga ya mavunwa lawa.—Deteronoma 18:9-13.
14, 15. Ntiyiso hi wihi malunghana ni rifu ni ntshembo wa vanhu hi vumundzuku?
14 Kavula, leswi Yehovha a swi byeleke Adamu a ku ri ntiyiso. Adamu u file loko a dyohele Xikwembu. (Genesa 5:5) Loko Adamu ni vana vakwe va file, va ve mimoya-xiviri leyi feke, va nga ha twi nchumu, va nga ha endli nchumu. (Genesa 2:7; Eklesiasta 9:5, 10; Ezekiyele 18:4) Vanhu hinkwavo va fa hi leswi va kumeke xidyoho eka Adamu loko va tswariwa. (Varhoma 5:12) Hambi swi ri tano, le Edeni Yehovha u tshembise leswaku a ku ta humelela mbewu leyi a yi ta lwisana ni mintirho ya Diyavulosi. (Genesa 3:15) Mbewu yoleyo a ku ri Yesu Kreste, N’wana wa Xikwembu la tswariweke a ri swakwe. Yesu u fe a nga ri na xidyoho, naswona vutomi byakwe lebyi a byi nyikeleke tanihi gandzelo byi ve nkutsulo wa vanhu eka xiyimo xa vona xa rifu. Lava va kombisaka ripfumelo eka Yesu hi ku n’wi yingisa va ni lunghelo ro kuma vutomi lebyi nga heriki lebyi lahliweke hi Adamu.—Yohane 3:36; Varhoma 6:23; 1 Timotiya 2:5, 6.
15 Nkutsulo hi wona lowu nga ntshembo wa xiviri wa vanhu, a hi mianakanyo leyi nga twaliki ya leswaku moya-xiviri a wu fi. Leyi i dyondzo ya Xikwembu. I ntiyiso. Nakambe i xikombiso lexi hlamarisaka xa rirhandzu ni vutlharhi bya Yehovha. (Yohane 3:16) Swi fanele swi hi tsakisa swinene leswi hi dyondzeke ntiyiso lowu, ni leswi hi ntshunxiweke eka tidyondzo ta mademona etimhakeni leti!—Yohane 8:32.
16. Hi byihi vuyelo lebyi hambetaka byi va kona loko vanhu va landzela vutlharhi bya vona vini?
16 Hi mavunwa yakwe le ntangeni wa Edeni, Sathana u khutaze Adamu na Evha leswaku va navela ku ntshunxeka eka vulawuri bya Xikwembu ni ku tshemba vutlharhi bya vona vini. Namuntlha, hi vona vuyelo bya sweswo lebyi yaka emahlweni hi vugevenga, swiphiqo swa ikhonomi, tinyimpi ni ku nga ringani ka swiyimo swa vanhu loku nga kona emisaveni namuntlha. A swi hlamarisi leswi Bibele yi nge: “Vutlhari bya misava leyi i vuhunguki emahlweni ka Xikwembu”! (1 Vakorinto 3:19) Hambi swi ri tano, vanhu vo tala va hlawula ku xaniseka hi vuhunguki, ematshan’wini yo yingisa tidyondzo ta Yehovha. (Pisalema 14:1-3; 107:17) Vakreste lava amukeleke dyondzo ya Xikwembu, va papalata ku phasiwa hi xirimbana xexo.
17. I yini leswi ‘vuriwaka vutivi hi ku hoxisa’ leswi Sathana a swi seketeleke, naswona hi yihi mihandzu ya kona?
17 Pawulo u tsalele Timotiya a ku: “We Timotiya, hlayisa leswi vekiweke emandleni ya wena. Fambela kule ni ku vulavula swa hava leswi nga riki na vukhongeri, ni ku kanetana hi leswi vuriwaka ‘vutivi’, kasi a hi byona. Van’wana hi ku swi landzelela, va lahlekeriwile hi [ripfumelo].” (1 Timotiya 6:20, 21) “Vutivi” byebyo na byona byi yimela tidyondzo ta mademona. Enkarhini wa Pawulo, kumbexana a byi ri mianakanyo ya vugwinehi leyi van’wana a va yi seketela evandlheni. (2 Timotiya 2:16-18) Endzhaku, leswi vuriwaka vutivi hi ku hoxisa, tanihi Vu-gnostic ni filosofi ya Magriki swi thyakise vandlha. Emisaveni namuntlha, ku ala vukona bya Xikwembu, ku kanakana vukona bya xona, tidyondzo ta hundzuluko ni ku xopaxopiwa lokukulu ka Bibele i swikombiso swa leswi vuriwaka vutivi hi ku hoxisa, ku fana ni mianakanyo leyi nga fambisaniki ni matsalwa, leyi seketeriwaka hi vagwinehi va manguva lawa. Mihandzu ya vutivi lebyi hinkwabyo bya mavunwa yi voniwa hi xiyimo xa mahanyelo lexi nyanyaka ku biha, ku nga xiximi vuhosi loku hangalakeke emisaveni hinkwayo, ku nga tshembeki, ni vutianakanyi lebyi funghaka mafambiselo ya swilo ya Sathana.
Ku Namarhela Dyondzo Ya Xikwembu
18. I vamani lava lavisisaka dyondzo ya Xikwembu namuntlha?
18 Hambi leswi Sathana a a ri karhi a funengeta misava hi tidyondzo ta mademona ku sukela enkarhini wa Edeni, minkarhi hinkwayo a ku ri ni van’wana lava a va lavisisa dyondzo ya Xikwembu. Vanhu vo tano namuntlha va hlayiwa hi timiliyoni. Va katsa masalela ya Vakreste lava totiweke lava nga ni ntshembo lowu tiyeke wa ku fuma na Yesu eMfun’weni wakwe wa le tilweni, kun’we ni ntshungu lowu kulaka swinene wa “tinyimpfu tin’wana” leti ntshembo wa tona ku nga ku dya ndzhaka ya misava leyi nga ta fumiwa hi Mfumo wolowo. (Matewu 25:34; Yohane 10:16; Nhlavutelo 7:3, 9) Namuntlha va hlengeletiwe va vumba nhlengeletano yin’we ya misava hinkwayo leyi marito lama landzelaka ya Esaya ma tirhaka eka yona: “V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova, ku rula ka v̌ona ku ta v̌a lo’kukulu.”—Esaya 54:13.
19. Ku dyondzisiwa hi Yehovha swi katsa na yini?
19 Ku dyondzisiwa hi Yehovha a swi vuli ku tiva dyondzo ya ntiyiso ntsena—hambi leswi sweswo swi nga swa nkoka. Yehovha u hi letela ndlela yo hanya ha yona, ni ndlela yo tirhisa dyondzo ya yena evuton’wini bya hina vini. Hi xikombiso, hi lwisana ni vutianakanyi, ku tikhoma ko biha, ni moya wa ku tilawula, lowu hangalakeke swinene exikarhi ka vanhu lava hi hanyaka na vona. Ha swi xiya leswaku ku hlongorisa rifuwo hi matimba emisaveni leyi swi yisa kun’wana—eku feni. (Yakobo 5:1-3) A hi yi rivali dyondzo ya Xikwembu leyi kombisiweke hi marito ya muapostola Yohane lama nge: “Mi nga rhandzeni misava, kumbe swilo leswi nge misaveni. Loko munhu a rhandza misava, rirhandzu ro rhandza Tatana a ri kona eka yena.”—1 Yohane 2:15.
20, 21. (a) Sathana u tirhisa yini eka matshalatshala yakwe yo pfala mianakanyo ya vanhu? (b) I mikateko yihi leyi kumiwaka hi lava va namarhelaka dyondzo ya Xikwembu?
20 Vuyelo bya tidyondzo ta mademona eka lava ti va lawulaka byi kombisiwa hi marito ya Pawulo lawa a ma tsaleleke Vakorinto a ku: “[Sathana u] pfarile miehleketo ya vanhu lava va nga pfumeriki; [u] va sive mahlo leswaku va nga voni ku vangama ka Mahungu Lamanene lama twarisaka ku kwetsima ka Kriste, yena loyi a nga xifaniso xa Xikwembu.” (2 Vakorinto 4:4) Sathana u tiyimisele ku pfala ni mianakanyo ya Vakreste va ntiyiso hi ndlela leyi. Le Edeni, u tirhise nyoka leswaku yi kanganyisa un’wana wa malandza ya Xikwembu. Namuntlha, u tirhisa tibayiskopo leti kombisaka madzolonga kumbe ku tikhoma loko biha, kun’we ni minongonoko ya thelevhixini. U tirhisa xiya-ni-moya, tibuku ni vuyimbeleri. Tlhari ra matimba leri a ri tirhisaka i vanghana vo biha. (Swivuriso 4:14; 28:7; 29:3) U nga tshuki u rivala leswaku swilo swo tano i yini—i marhengu ni tidyondzo ta mademona.
21 Tsundzuka leswaku marito ya Sathana le Edeni a ma ri mavunwa; marito ya Yehovha ma kumeke ma ri ntiyiso. Ku sukela eminkarhini yoleyo yo sungula, mhaka leyi a yi si hundzuka ni sweswi. Minkarhi hinkwayo Sathana u kumeke a ri muhembi, naswona dyondzo ya Xikwembu yi ve ntiyiso hi ndlela leyi nga tsekatsekiki. (Varhoma 3:4) Loko hi namarhela Rito ra Xikwembu, minkarhi hinkwayo hi ta va etlhelweni leri hlulaka enyimpini leyi nga exikarhi ka ntiyiso ni mavunwa. (2 Vakorinto 10:4, 5) Kutani a hi tiyimiseleni ku lwisana ni tidyondzo ta mademona. Hi ndlela yoleyo, hi ta tiyisela ku fikela loko nyimpi leyi nga exikarhi ka ntiyiso ni mavunwa yi herile. Ntiyiso wu ta va wu hlurile. Sathana u ta va a nga ha ri kona, naswona ku ta twala dyondzo ya Xikwembu ntsena emisaveni.—Esaya 11:9.
U Nga Hlamusela Ke?
◻ Tidyondzo ta mademona ti twiwe rini ro sungula?
◻ Hi byihi vunwa byin’wana lebyi seketeriwaka hi Sathana ni mademona yakwe?
◻ Sathana namuntlha u chivirika hi matimba hi tindlela tihi?
◻ Sathana u tirhisa yini leswaku a seketela tidyondzo ta mademona?
◻ I mikateko yihi leyi kumiwaka hi lava va namarhelaka dyondzo ya Xikwembu?
[Xifaniso lexi nga eka tluka 9]
Dyondzo ya mademona yi twiwe ro sungula entangeni wa Edeni
[Xifaniso lexi nga eka tluka 10]
Dyondzo ya Xikwembu malunghana ni nkutsulo kun’we ni Mfumo hi yona yi nyikelaka ntshembo lowu nga woxe wa vanhu