Vantshwa—Xana Mi Yingisa Tidyondzo Ta Mani?
“Van’wana va ta hambana ni vupfumeri, hi mhaka ya ku landza . . . tidyondzo ta mademona.”—1 TIMOTIYA 4:1.
1. (a) Hi wihi nhlawulo lowu vantshwa va langutaneke na wona? (b) Xana Yehovha u dyondzisa hi ndlela yihi?
XIVUTISO lexi vutisiwaka vantshwa laha hi lexi, Xana mi yingisa tidyondzo ta mani? Leswi swi kombisa leswaku n’wina vantshwa mi langutane ni nhlawulo. Nhlawulo lowu wu le xikarhi ko amukela dyondzo ya Xikwembu ni ku landza tidyondzo ta mademona. Yehovha u dyondzisa hi Rito ra yena, Bibele, kun’we ni hi vutirheli bya lava a va tirhisaka tanihi vayimeri vakwe emisaveni. (Esaya 54:13; Mintirho 8:26-39; Matewu 24:45-47) Kambe xana wa hlamala hi ku twa leswaku mademona na wona ma dyondzisa?
2. Ha yini swi ri swa nkoka ku tivonela etidyondzweni ta mademona ngopfu-ngopfu enkarhini wa sweswi?
2 Muapostola Pawulo u tsarile: “Emasikwini lama taka, van’wana va ta hambana ni vupfumeri, hi mhaka ya ku landza mimoya leyi kanganyisaka ni tidyondzo ta mademona.” (1 Timotiya 4:1) Leswi hi hanyaka “emasikwini ya makumu” laha Sathana ni mademona yakwe va gingiritekaka ngopfu, xana wa swi vona leswaku ha yini hi vutisa xivutiso lexi nge, Xana u yingisa tidyondzo ta mani? (2 Timotiya 3:1-5; Nhlavutelo 12:7-12) Hi mhaka ya leswi Sathana ni mademona yakwe va nga ni mano yonghasi, va tirhisa tindlela leti kanganyisaka, i swa nkoka leswaku u anakanyisisa khwatsi hi xivutiso lexi.—2 Vakorinto 11:14, 15.
Mademona Ni Tidyondzo Ta Wona
3. Mademona i vamani, xikongomelo xa wona hi xihi, naswona ma lava ku xi hetisisa hi ndlela yihi?
3 Enkarhini lowu hundzeke mademona a ma ri tintsumi ta Yehovha, kambe ti xandzukele Muvumbi wa tona, xisweswo ti va vaseketeri va Sathana. (Matewu 12:24) Xikongomelo xa wona i ku onha vanhu ni ku va tshikisa ku tirhela Xikwembu. Mademona ma endla leswi hi ku tirhisa vadyondzisi lava nga vanhu leswaku va hlohlotela ndlela ya vutomi ya vutianakanyi, leyi thyakeke, leyi Yehovha a nga yi rhandziki. (Ringanisa 2 Petro 2:1, 12-15.) Ku kambisisa mukhuva lowu tintsumi leti khale a ti tshembekile ti veke mademona ha wona swi ta ku pfuna ku vona tidyondzo ta tona ni vutomi lebyi seketeriwaka hi tidyondzo leti.
4. (a) Ha yini tintsumi leti nga yingisiki ti te emisaveni hi nkarhi wa Nowa? (b) Ku endleke yini hi tintsumi to biha ni vana va tona enkarhini wa Ndhambhi?
4 Emasikwini ya Nowa, tintsumi tin’wana ti navele vanhwana vo saseka va vanhu, lerova swivumbiwa leswi swa moya swi kala swi suka exivandleni xa swona etilweni swi ta emisaveni. Ku hlangana ka tona ka rimbewu ni vavasati ku tise vana va mpfangano lava vitaniwaka Tinefelimi. Tanihi leswi swi nga riki swa ntumbuluko ku hlangana ka rimbewu exikarhi ka swivumbiwa swa moya ni vanhu, leswi endliweke hi tintsumi to homboloka ni vavasati volavo a swi bihe ku fana ni vusodoma lebyi endzhaku ka nkarhi byi endliweke hi vavanuna ni majaha ya le Sodoma. (Genesa 6:1-4; 19:4-11; Yuda 6, 7) Hambi leswi vasati va tintsumi leti va loveke ematini ya ndhambhi ni vana va vona, tintsumi leto biha ti siye mimiri ya tona ya nyama leyi a ti yi ambarile ivi ti vuyela etilweni laha ti veke vanghana va Sathana Diyavulosi va mademona.—2 Petro 2:4.
5. Mademona i swivumbiwa swa njhani, naswona swi ringetisa ku yini ku hundzula milawu ya Xikwembu?
5 Hi ku ya hi xisekelo lexi xa matimu, xana wa swi vona leswaku mademona i swivumbiwa swa njhani hakunene? I vahlohloteri va rimbewu leri nga riki enawini, ku nga vafumi lava nga vonakiki va misava leyi hlanyisiwaka hi rimbewu. Hambi leswi ma siveriweke ku tlhela ma tihundzula vanhu, ma tsakisiwa hi vuhomboloki bya rimbewu bya lava ma va onhaka emisaveni. (Vaefesa 6:11, 12) Mademona ma ringeta ku dlaya milawu ya Yehovha ya mahanyelo yo tenga ni lama baseke hi ku yi endla yi vonaka onge a yi vuli nchumu. Tintsumi leti to biha ti hlohlotela vunghwavava tanihi ndlela ya vutomi leyi faneleke, leyi tsakisaka.
Ku Hlohlotela Tidyondzo Ta Mademona
6. Ha yini hi nga fanelanga hi hlamala leswi mademona ma ringetaka ku hlohlotela tidyondzo ta wona hi vukanganyisi?
6 A swi fanelanga swi hi hlamarisa leswi mademona ma hlohlotelaka tidyondzo ta wona hi vukanganyisi, hikuva leyi i ndlela leyi murhangeri wa wona, Sathana Diyavulosi, a yi tirhiseke eka Evha. Tsundzuka leswaku u vulavule na yena onge u lava ku n’wi pfuna. Sathana u vutise a ku: “[Xana] kunene Šikwembu ši te: Mi nga ṭhuki mi dya muri ni wuṅwe wa ntanga?” Kutani u tirhise mano a ringeta ku bakanya dyondzo ya Xikwembu hi ku byela Evha leswaku u ta vuyeriwa loko a dya murhi lowu yirisiweke. Diyavulosi u tshembise leswi: “Siku mi nga ta dya, mahlo ya ṅwina ma ta pfuleka, mi ta kotisa Šikwembu, mi tiv̌a ŝo saseka ni ŝo biha.” (Genesa 3:1-5) Xisweswo Evha u yengiwile, ina u kanganyisiwile, a nga xi yingisi Xikwembu.—2 Vakorinto 11:3; 1 Timotiya 2:13, 14.
7. Nkucetelo wa tidyondzo ta vukanganyisi ta mademona wu ve wihi, naswona leswi swi hi tsundzuxa yini?
7 Eminkarhini ya sweswinyana na kona, vo tala va kanganyisiwile. Mademona ma hlohlotela vunghwavava hi mano lerova se byi endliwa hi vanhu vo tala lava khale a va byi nyenya. Hi xikombiso, mutsundzuxi la nga mutsari wa phepha-hungu la dumeke eUnited States, loko a hlamula papila rin’wana emhakeni ya ku hlangana ka rimbewu exikarhi ka vanhu lava nga tekanangiki, u tsale a ku: “A ndzi nga si swi anakanya leswaku ndzi ta kala ndzi hundzuka emhakeni leyi, kambe sweswi ndzi vona onge mimpatswa leyi tiyimiseleke ku tekana yi fanele ku teka maendzo yo hlayanyana hi mahelo-vhiki, yi vona loko yi fanelana.” Kutani a engetela a ku: “A ndzi kholwi leswaku hi mina ndzi tsaleke sweswo!” Hambi loko a nga swi pfumeli leswaku u khutaze vuoswi, u byi khutazile hakunene! Entiyisweni, hi fanele hi tivonela leswaku tidyondzo ta mademona ti nga khumbi mavonelo ya hina hi swiendlo leswi Xikwembu xi swi nyenyaka.—Varhoma 1:26, 27; Vaefesa 5:5, 10-12.
8. (a) Rito leri nge “misava” ri tirhisiwa njhani eBibeleni? (b) I mani loyi a fumaka misava, naswona valandzeri va Yesu va fanele va languta misava hi ndlela yihi?
8 Hi nga tshuki hi rivala leswaku Sathana i “mufumi wa misava leyi.” Kahle-kahle, muapostola Yohane u te “misava hinkwayo yi le hansi ka matimba ya Lowo biha.” (Yohane 12:31; 1 Yohane 5:19) I ntiyiso leswaku nkarhi wun’wana Yesu a a tirhisa rito leri nge “misava” a vula vanhu hinkwavo. (Matewu 26:13; Yohane 3:16; 12:46) Hambi swi ri tano, hakanyingi a a tirhisa rito leri nge “misava” a vula vanhu hinkwavo lava nga kona ehandle ka vandlha ra Vukreste. Hi xikombiso, Yesu u vule leswaku valandzeri vakwe va nga ‘vi va misava’ (vandla ra vanhu lava nga lulamangiki) naswona leswi va nga riki va misava, misava a yi ta va venga. (Yohane 15:19; 17:14-16) Bibele yi ye emahlweni yi tsundzuxa leswaku hi fanele hi papalata ku va vanghana va misava leyi fumiwaka hi Sathana.—Yakobo 4:4.
9, 10. (a) Hi swihi swilo swa misava leswi pfuxaka ku navela loko biha ka rimbewu? (b) Xana swi koteka njhani ku vona loyi a vangaka leswi dyondzisiwaka hi vuhungasi bya misava?
9 Muapostola Yohane u khutazile: “Mi nga rhandzeni misava, kumbe swilo leswi nge misaveni.” U tlhele a ku: “Hinkwaswo leswi nge misaveni, ku navela ka miri, ni ku navela ka mahlo, ni ku tikurisa hi swa vutomi lebyi, a hi leswi Tatana a swi tsakelaka.” (1 Yohane 2:15, 16) Anakanya hi leswi. Xana hi swihi swilo swa misava leswi pfuxaka ku navela, kumbexana ka rimbewu leri thyakeke? (1 Vatesalonika 4:3-5) Ku vuriwa yini hi vuyimbeleri byo tala bya misava? Phorisa leri kambisisaka mahanyelo ya vanhu eCalifornia ri te: “Loko hi ta vula ntiyiso, vuyimbeleri byi dyondzisa leswaku u nga va yingisi vatswari, ni leswaku u fanele ku hanya hi ku tirhandzela.” Xana wa xi vona xihlovo xa dyondzo ya vuyimbeleri byo tano?
10 Tsundzuka leswaku Sathana, kahle-kahle, a a byela Evha a ku: ‘Wa kayeriwa. Hanya hi ku tirhandzela ka wena. Tianakanyele leswaku hi swihi leswinene ni swo biha. U nga xi yingisi Xikwembu.’ (Genesa 3:1-5) Xana a hi rona rungula leri kumekaka eka vuyimbeleri byo tala bya misava namuntlha? Kambe mademona a ma dyondzisi hi vuyimbeleri ntsena. Ma tlhela ma dyondzisa hi minongonoko leyi tolovelekeke ya thelevhixini, tibayiskopo ni tivhidiyo. Njhani? Phela, tindlela to vulavurisana ta misava ti nyika vuhungasi lebyi endlaka tidyondzo ta Xikwembu ti tikomba onge ta tshikilela. Ti ndhundhuzela vuoswi hi ku byi bumabumela ni ku byi endla byi naveleka.
11. Hi tlhelo ra mahanyelo, xana thelevhixini yi dyondzisa yini?
11 Magazini lowu nge U.S.News & World Report wu te: “Hi 1991, tikhampani tinharhu ta vuhaxi [ta le United States] ti kombise swiendlakalo swa rimbewu swo tlula 10 000 hi nkarhi lowu vo tala va hlalelaka thelevhixini ha wona; eka nkombiso wun’wana ni wun’wana lowu kombisaka vuxaka bya rimbewu exikarhi ka vanghana lava tekaneke, vuhaxi lebyi byi kombise minkombiso ya 14 ya rimbewu leri endliwaka hi vanhu lava nga tekanangiki.” Leswi ku kombisiwaka swiendlakalo swa rimbewu leri thyakeke swo tlula 9 000 hi nkarhi lowu vo tala va hlalelaka thelevhixini ha wona hi lembe rin’we, xana u nga ku thelevhixini yi dyondzisa yini? Barry S. Sapolsky, loyi a hlanganyeleke eku tsaleni ka xiviko lexi nge “Rimbewu Hi Nkarhi Lowu Vo Tala Va Hlalelaka Thelevhixini Ha Wona: 1979 Yi Pimanisiwa Na 1989,” u ri: “Loko vana va hlalela TV malembe yo tala laha vanhu va tlangaka kona hi rirhandzu kumbe va tikhoma hi ndlela yo biha, swifaniso leswi swa magidigidi swi ta va dyondzisa leswaku rimbewu ra tsakisa—ni leswaku a ku na nchumu xo biha eka swona.” A yi kanakanisi mhaka ya leswaku: Vuhungasi bya misava byi dyondzisa vantshwa leswaku ku hava milawu, ni leswaku vuoswi bya amukeleka, ni leswaku a ku na vuyelo byo biha loko munhu a hanya hi ndlela leyi Xikwembu xi yi nyenyaka.—1 Vakorinto 6:18; Vaefesa 5:3-5.
12. Ha yini vuhungasi bya misava byi ri nxungeto ngopfu-ngopfu eka vantshwa va Vakreste?
12 Vuyimbeleri, tibayiskopo, tivhidiyo ni tithelevhixini ta misava swi kunguhateriwe ku koka vantshwa. Swi hlanganyeta tidyondzo leti thyakeke ta mademona! Kambe xana leswi swi fanele swi hi hlamarisa? Anakanya hi leswi. Loko vukhongeri bya mavunwa ni tipolitiki swi ri xiphemu xa misava ya Sathana—hi laha swi nga ha kona hakunene—xana swa twala ku vula leswaku vuhungasi lebyi khutaziwaka hi misava a byi na wona nkucetelo wa mademona? Ngopfu-ngopfu n’wina vantshwa, mi fanele ku tivonela leswaku mi nga “pfumeleli misava yi mi endla mi fana na yona.”—Varhoma 12:2, The New Testament in Modern English, hi J. B. Phillips.
Tikambisise
13. Hi kwihi ku tikambisisa loku faneleke ku endliwa?
13 Mhaka ya leswaku u yingisa tidyondzo ta mani a yi kombisiwi hi ririmi ra wena ntsena kambe ni hi swiendlo swa wena. (Varhoma 6:16) Kutani tivutise, ‘Xana langutelo ra mina ni mahanyelo ya mina swi onhiwa hi leswi ndzi swi dyondzaka eka tindlela ta misava to vulavurisana leti hambukisaka? Xana tidyondzo ta mademona ti ya ti nghenelela evuton’wini bya mina?’ Leswaku u kota ku hlamula swivutiso swo tano, ha yini u nga ringanisi nkarhi ni matshalatshala lawa u ma endlaka u ri karhi u dyondza Bibele, u ya eminhlanganweni ya Vukreste ni ku vulavula ni van’wana hi Mfumo wa Xikwembu, ni lowu u wu hetaka u hlalele TV, u yingisela vuyimbeleri, u ri entlangwini lowu u wu rhandzaka kumbe u endla swin’wana swo tano? Leswi wu nga tarisa xisweswo—hakunene vutomi bya wena—byi le khombyeni, kutani tikambisise khwatsi.—2 Vakorinto 13:5.
14. I yini leswi nga khumbaka rihanyo ra hina ra moya, naswona hi wihi ntiyiso wo vava lowu hi faneleke hi wu tsundzuka?
14 U swi tiva kahle leswaku swakudya leswi u swi dyaka swi ta khumba rihanyo ra wena ra miri. Hi laha ku fanaka, rihanyo ra wena ra moya ri khumbiwa hi leswi u swi nghenisaka emianakanyweni ni le mbilwini ya wena. (1 Petro 2:1, 2) Hambi loko wena u tikanganyisa hi swilo leswi u swi tsakelaka hakunene, Muavanyisi wa hina, Yesu Kreste u nge n’wi kanganyisi. (Yohane 5:30) Kutani tivutise, ‘Loko Yesu a a ri emisaveni, xana a ndzi ta khomiwa hi tingana ku n’wi nghenisa endlwini, a twa vuyimbeleri bya mina kumbe a vona leswi ndzi swi hlalelaka?’ Ntiyiso lowu nga erivaleni hi leswaku Yesu u swi langutile naswona u tiva mintirho ya hina.—Nhlavutelo 3:15.
Papalata Tidyondzo Ta Mademona
15. Ha yini Vakreste va fanele va lwa hi matimba ku papalata tidyondzo ta mademona?
15 Ntshikilelo wa mademona wa leswaku vantshwa va yingisa tidyondzo ta wona i wukulu. Mimoya yo biha yi tikomba yi nyika vutomi bya ku eneriseka hi xihatla—bya ku tiphina ni ku tikhorisa. Leswaku a tsakisa Xikwembu, Muxe wa khale u ale “ku titsakisa nkarhinyana hi ku hanya eku dyoheni” a va xirho lexi tlakukeke xa ndyangu wa Faro. (Vaheveru 11:24-27) A swi olovi ku papalata leswi mademona ma swi nyikelaka, kutani u fanele ku lwa hi matimba leswaku u endla leswi lulameke. Leswi swi vangiwa ngopfu hi mhaka ya leswi hi velekiweke ni xidyoho ni leswi timbilu ta hina ti lavaka ku endla leswo biha. (Genesa 8:21; Varhoma 5:12) Hikwalaho ka mimboyamelo yo biha, hambi ku ri muapostola Pawulo swi kale swi lava leswaku a tikhoma, a nga pfumeli ku fumiwa hi ku navela kakwe ka nyama.—1 Vakorinto 9:27; Varhoma 7:21-23.
16. Vantshwa va nga wu papalatisa ku yini ntshikilelo wa ku tikhoma loko biha?
16 Hambi loko u ringiwa leswaku u “lanḍela la’v̌o tala e ku endla ŝo biha,” Xikwembu xi nga ku pfuna ku papalata ntshikilelo wa tintangha leti lavaka leswaku u teka ndlela ya tona yo biha. (Eksoda 23:2; 1 Vakorinto 10:13) Kambe u fanele ku yingisa nkongomiso wa Xikwembu, u nghenisa marito ya xona embilwini ya wena. (Pisalema 119:9, 11) U fanele ku tiva leswaku loko vantshwa va ri voxe, ku navela ka rimbewu ku nga pfuka ivi ku vanga leswaku va tlula nawu wa Xikwembu. Nhwanyana un’wana u pfumerile a ku: “Loko hi ri swerhu ni munghana wanga wa mufana, miri wa mina wu lava ku endla lexi kambe byongo bya mina byi ndzi byela ku endla xin’wana.” Kutani xiya ku tsana ka wena ni leswaku mbilu ya wena yi ni mano. (Yeremiya 17:9) Mi nga vi ekule ni vanhu van’wana. (Swivuriso 18:1) Pimani ndlela leyi mi kombanaka rirhandzu ha yona. Naswona xa nkoka ngopfu, tshamani ekusuhi swinene ni lava rhandzaka Yehovha ni lava xiximaka milawu ya yena.—Pisalema 119:63; Swivuriso 13:20; 1 Vakorinto 15:33.
17. I yini lexi nga pfunaka vantshwa va Vakreste leswaku va kuma matimba ya ku papalata tidyondzo ta mademona?
17 Ku dyondza tibuku ta Vukreste leti endleriweke ku ku tiyisa emoyeni swi ta ku pfuna. Hi xikombiso, anakanya hi buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka ni ndzima leyi nge “Ku Lwela Ku Endla Leswo Lulama” ebukwini leyi nge U Nga Hanya Hi Masiku aParadeyisini eMisaveni. Endla leswaku ndzetelo wa Matsalwa lowu u wu kumaka wu dzika emianakanyweni ni le mbilwini ya wena, kutani wu ta ku tiyisa. Mhaka leyi u nga fanelangiki u yi rivala hi leswaku emisaveni leyi leyi fumiwaka hi mademona, a swi olovi ku endla leswi lulameke. Kutani lwana hi matimba. (Luka 13:24) Tiyisa matimba ya wena ya moya. U nga fani ni vanhu lava tsaneke, lava chavaka, lava landzelelaka misava.
Vuyeriwa eDyondzweni Ya Xikwembu
18. Hi byihi vuyelo byin’wana bya ku yingisa dyondzo ya Xikwembu?
18 Nakambe, tsundzuka leswaku a wu nge kayeriwi hi nchumu xa nkoka loko u yingisa dyondzo ya Yehovha. Wa ku rhandza hakunene, naswona hi yona mhaka leyi a ku ‘dyondzisaka leswaku u vuyeriwa.’ (Esaya 48:17) Kutani yingisa dyondzo ya Yehovha, u papalata ku karhatiwa hi ripfalo leri onhakeke, ku lahlekeriwa hi xindzhuti, ku kuma khwiri leri nga lavekiki, vuvabyi lebyi tluletiwaka hi rimbewu kumbe maxangu man’wana yo kota lawa. Yehovha wa tsaka loko malandza ya yena ma n’wi nyika nhlamulo ya ntlhontlho wa Sathana wa leswaku vanhu a va nge swi koti ku tshembela eka Xikwembu loko va ringiwa. (Yobo 1:6-12) Loko u tsakisa mbilu ya Yehovha hi ku tshembeka eka yena, u ta pona loko a avanyisa misava leyi, kambe hinkwavo lava hlekulaka milawu yakwe va ta lova.—Swivuriso 27:11; 1 Vakorinto 6:9, 10; 1 Yohane 2:17.
19. Hi wihi nkoka wa ku hlanganyela ni lava tlangelaka mimpfuno ya dyondzo ya Yehovha?
19 Loko u tshama ekusuhi ni lava tlangelaka leswi Yehovha a va endleleke swona, u nga dyondza eka ntokoto wa vona. Munhu un’wana loyi eku sunguleni a ngheniwe hi swidzidzirisi engatini naswona a tikhoma hi ndlela yo biha u te: “Loko a ndzi nga n’wi yingisanga Yehovha, ingi ndzi file. Munhu loyi a ndzi ta tekana na yena u dlayiwe hi AIDS. Vanghana vanga lavakulu hinkwavo va misava va file hikwalaho ka AIDS, kasi van’wana ti dya ti ya esirheni. Hakanyingi ndzi va vona eswitarateni, naswona ndzi nkhensa Yehovha siku rin’wana ni rin’wana hikwalaho ka milawu ya yena leyi kongomisaka vanhu vakwe ni leyi nga ta hi hlayisa hi ri lava kwetsimaka loko hi yi tirhisa. A ndzi si tshama ndzi tsaka, ndzi eneriseka ni ku sirheleleka hi ndlela leyi evuton’wini bya mina.” Hakunene, ku yingisa dyondzo ya Yehovha swa hi pfuna nkarhi hinkwawo!
Endla Nhlawulo Lowunene
20, 21. (a) Vantshwa va langutana ni minhlawulo yihi mimbirhi? (b) Hi byihi vuyelo lebyi nga heriki lebyi tisiwaka hi ku yingisa dyondzo ya Xikwembu?
20 N’wina vantshwa ha mi khongotela: Endlani nhlawulo lowunene hi ku tirhela Yehovha. Kutani mi namarhela xiboho xexo hi laha ku tiyeke. (Yoxuwa 24:15) Entiyisweni, u nga endla nhlawulo wun’we eka minhlawulo mimbirhi. Yesu u te ku ni ndlela yo anama leyi pfulekeke—leyi olovaka, leyi ku endliwaka hi ku tirhandzela. Ndlela yoleyo yi yisa eriweni, endzovisweni. Ndlela leyin’wana yi khumile. I ndlela leyi nga fambekiki kahle emisaveni leyi ya mahanyelo yo biha, leyi lawuriwaka hi mademona. Kambe lava fambaka eka yona, eku heteleleni yi ta va yisa emisaveni leyintshwa ya Xikwembu leyi tsakisaka. (Matewu 7:13, 14) Xana hi yihi ndlela leyi u nga ta yi teka? Xana u ta yingisa tidyondzo ta mani?
21 Yehovha u swi siyela wena leswaku u tihlawulela. A nga lavi ku ku susumeta leswaku u n’wi tirhela. Muxe, muprofeta wa Xikwembu u te: “Nḍi v̌ekile mahlweni ka wena e v̌utomi ni rifu,” a khutaza a ku: “Hlawula v̌utomi.” Nhlawulo lowu wu endliwa hi ku “ranḍa Yehova, Šikwembu ša wena, u yingisa rito ra yena ni ku namarela yena.” (Deteronoma 29:2; 30:19, 20) Onge u nga va ni vutlharhi bya ku hlawula ku yingisa dyondzo ya Xikwembu kutani u tiphina hi vutomi lebyi nga heriki emisaveni leyintshwa ya Xikwembu yo saseka.
U Nga Hlamurisa Ku Yini?
◻ Mademona i vamani, naswona ma dyondzisa yini?
◻ Mademona ma ti hlohlotela njhani tidyondzo ta wona namuntlha?
◻ Hi nga swi kotisa ku yini ku papalata tidyondzo ta mademona?
◻ Hi byihi vuyelo bya ku yingisa tidyondzo ta Yehovha?
[Xifaniso lexi nga eka tluka 16]
Emahlweni ka Ndhambhi, tintsumi leti nga yingisiki ni vana va tona, ti hlohlotele madzolonga ni vutondolo
[Xifaniso lexi nga eka tluka 18]
Xana a wu ta khomiwa hi tingana loko Yesu o twa vuyimbeleri bya wena lebyi u byi rhandzaka?