Ku Titsongahatela Vuhosi Hi Ntsako
“Mi yingisile hi mbilu hinkwayo.”—VARHOMA 6:17.
1, 2. (a) Hi wihi moya lowu vonakaka emisaveni namuntlha, naswona xihlovo ni vuyelo bya wona hi swihi? (b) Malandza ya Yehovha lama tinyiketeleke ma swi kombisa njhani leswaku ma ni moya lowu hambaneke?
“MOYA lowu tirhaka [sweswi] exikarhi ka vanhu lava nga yingisiki” namuntlha wu tikomba hi ndlela leyi tsemaka nhlana. I moya wa ku lava ku tilawula hi ku helela, lowu humaka eka Sathana, “ndhuna leyi fumaka mimoya ya le henhla empfhukeni.” “Moya” lowu, kumbe langutelo leri susumetiwaka hi vutianakanyi ni ku nga yingisi, wa ‘tirha’ kumbe wu ni matimba ehenhla ka vanhu vo tala. Hi xin’wana xa leswi endlaka leswaku misava yi va ni hasahasa eka vulawuri.—Vaefesa 2:2.
2 Lexi tsakisaka, malandza lama tinyiketeleke ya Yehovha namuntlha a ma wu hefemuli “moya” lowu wu thyakeke kumbe wa vuxandzuki. Va swi tiva leswaku “vukari bya Xikwembu byi [ta] wela vanhu lava nga yingisiki.” Muapostola Pawulo wa engetela a ku: “Hikokwalaho mi nga tshuki mi tolovelana ni vanhu lavo tano.” (Vaefesa 5:6, 7) Ku ri na sweswo, Vakreste va ntiyiso va tinyiketela ku ‘tala hi moya wa Yehovha,’ naswona va nwa “vutlhari byo ta hi le henhla,” lebyi nga ni “ku rhula, ni ku olova, ni ku yingisela.”—Vaefesa 5:17, 18; Yakobo 3:17.
Ku Titsongahatela Vuhosi Bya Yehovha Loku Humaka eMbilwini
3. Hi xihi xilotlelo xa ku titsongahata loku humaka embilwini, naswona matimu ma hi dyondzisa dyondzo yihi leyikulu?
3 Xilotlelo xa ku titsongahata loku humaka embilwini i ku xixima vulawuri lebyi faneleke. Matimu ya vanhu ma komba leswaku ku fularhela vuhosi bya Yehovha a swi tisi ntsako. Adamu na Evha, kun’we ni loyi a va vangeleke ku xandzuka, Sathana Diyavulosi, a va kumanga ntsako hi ku fularhela vuhosi byebyo. (Genesa 3:16-19) Tanihi leswi a nga exiyin’weni xa manyala, Sathana u “karihile ngopfu,” hikuva wa swi tiva leswaku nkarhi wa yena wu komile. (Nhlavutelo 12:12) Leswaku ku va ni ku rhula ni ntsako eka vanhu ni le vuakweni hinkwabyo, swi titshege hi ku xixima vuhosi lebyi lulameke bya Yehovha evuakweni hinkwabyo.—Pisalema 103:19-22.
4. (a) I ku titsongahata ni ku yingisa ka muxaka muni loku Yehovha a lavaka leswaku malandza ya yena ma ku kombisa? (b) Hi fanele hi tiyiseka ha yini, naswona mupisalema u swi kombisa njhani leswi?
4 Kambe hikwalaho ka timfanelo takwe leti ringaniseriwaka hi ndlela yo hlamarisa, Yehovha a nga eneriseki hi ku yingisa ko tisusa nandzu ntsena. I ntiyiso leswaku u ni matimba! Kambe a nga na tihanyi. I Xikwembu xa rirhandzu, naswona u lava leswaku swivumbiwa swakwe leswi tlhariheke swi n’wi yingisa swi suka embilwini, swi susumetiwa hi rirhandzu ra swona. Xi lava leswaku swi titsongahatela vuhosi bya xona hikwalaho ka leswi swi tihlawulelaka hi swoxe ku tiveka ehansi ka vulawuri bya xona lebyo lulama ni lebyi faneleke, hi ku tshemba leswaku ku hava lexi antswaka eka swona ku tlula ku yingisa xona hi laha ku nga heriki. Munhu loyi a laviwaka hi Yehovha evuakweni byakwe u ni mintlhaveko leyi fanaka ni ya mupisalema loyi a nga tsala a ku: “Nawu wa Yehova wu hetisekile, wu wisisa moya; v̌umboni bya Yehova bya ṭhembeka, byi tlharihisa šihunguki. Ku letela ka Yehova ku lulamile, ku ṭakisa mbilu; ku lerisa ka Yehova ku basile, ku hanyanyisa mahlo; šitšhav̌o ša Yehova ši tengile, ši kona hi masiku; ku av̌anyisa ka Yehova ku nene, ku lulamile hikwako.” (Pisalema 19:7-9) Ku tshemba vululami bya vuhosi bya Yehovha hi ku helela—ku fanele ku va langutelo ra hina loko hi lava ku hanya emisaveni leyintshwa ya Yehovha.
Ku Titsongahatela Hosi Ya Hina Hi Ntsako
5. Yesu u hakerisiwe ku yini hi ku yingisa kakwe, naswona i yini leswi hi swi amukelaka hi mbilu hinkwayo?
5 Kreste Yesu hi byakwe i xikombiso lexi xiyekaka xa ku titsongahata eka Tata wakwe wa le tilweni. Hi hlaya leswaku “ú titsongahatile, a va loyi a yingisaka ku fikela eku feni, a fa hi rifu ra [mhandzi ya nxaniso, NW].” Pawulo wa engetela: “Hikokwalaho Xikwembu xi n’wi tlakusile swinene, kutani xi n’wi nyikile vito leri nge henhla ka mavito man’wana hinkwawo, leswaku, evitweni ra Yesu, matsolo hinkwawo ma nkhinsama ematilweni, ni la misaveni, ni le hansi ka misava, ni tindzimi hinkwato ti vula leswaku Yesu Kriste i Hosi, eku dzuniseni ka Xikwembu Tatana.” (Vafilipiya 2:8-11) Ina, hi nkhinsama hi ntsako emahlweni ka Murhangeri ni Hosi ya hina leyi fumaka, Kreste Yesu.—Matewu 23:10.
6. Yesu u tikombisa njhani leswaku i mbhoni ni murhangeri wa tinxaka ta matiko, naswona “v̌uhosi” bya yena byi ta ya emahlweni hi ndlela yihi endzhaku ka nhlomulo lowukulu?
6 Malunghana na Kreste tanihi Murhangeri wa hina, Yehovha u profetile a ku: “Waŝiv̌o, nḍi ṅwi v̌ekile mboni e šikari ka matiko, hosi, ni mufambisi wa matiko.” (Esaya 55:4) Hi vutirheli byakwe bya le tilweni ni ku kongomisa kakwe ntirho wo chumayela a ri tilweni endzhaku ka rifu ni ku pfuxiwa kakwe, Yesu u tikombise a ri “mbhoni leyi tshembekeke ya ntiyiso” ya Tata wakwe eka vanhu va matiko hinkwawo. (Nhlavutelo 3:14; Matewu 28:18-20) Tinxaka teto ta matiko sweswi ti yimeriwa hi tinhlayo leti engetelekaka ta “ntshungu lowukulu,” lowu nga ta pona ‘ku xaniseka lokukulu’ ehansi ka vurhangeri bya Kreste. (Nhlavutelo 7:9, 14) Kambe vurhangeri bya Yesu a byi heleli kwalaho. “V̌uhosi” byakwe byi ta heta gidi ra malembe. Eka vanhu lava yingisaka, u ta endla hi ku fambisana ni vito rakwe ra ‘Mutsundzuxi la Hlamarisaka, Xikwembu xa Matimba, Tatana la nga riki na ku Hela, Hosana ya ku Rhula.’—Esaya 9:6, 7; Nhlavutelo 20:6.
7. Loko hi rhandza leswaku Kreste Yesu a hi yisa “eswihlobyeni swa mati ya vutomi,” hi fanele hi hatlisa hi endla yini, naswona i yini lexi nga ta endla leswaku hi rhandziwa hi Yesu na Yehovha?
7 Loko hi swi tsakela ku kuma mpfuno “eswihlobyeni swa mati ya vutomi” leswi Xinyimpfana, Kreste Yesu, a kongomisaka vanhu va timbilu letinene eka swona, hi fanele hi hatlisa hi swi kombisa hi swiendlo swa hina leswaku hi titsongahata hi ntsako eka matimba ya yena tanihi Hosi. (Nhlavutelo 7:17; 22:1, 2; ringanisa Pisalema 2:12.) Yesu u te: “Loko mi ndzi rhandza, mi ta hlayisa milawu ya mina. Loyi a amukeleke milawu ya mina, kutani a yi hlayisa, hi yena loyi a ndzi rhandzaka; kutani loyi a ndzi rhandzaka, ú ta rhandziwa hi Tata wa mina; na mina ndzi ta n’wi rhandza.” (Yohane 14:15, 21) Xana wa swi lava ku rhandziwa hi Yesu ni hi Tata wakwe? Kutani titsongahatele vuhosi bya vona.
Valanguteri Va Yingisa Hi Ntsako
8, 9. (a) Kreste u lunghiselele yini leswaku a aka vandlha, naswona vavanuna lava va fanele va vekela ntlhambi swikombiso leswinene emhakeni yihi? (b) Ku titsongahata ka valanguteri va Vakreste ku fanekiseriwa njhani hi buku ya Nhlavutelo, naswona va fanele va yi lava njhani ‘mbilu leyi yingisaka’ loko va tamela timhaka ta vuavanyisi?
8 ‘Vandlha ri le hansi ka Kreste.’ Tanihi Mulanguteri wa vandlha, u lunghiselele ‘tinyiko leti nga vavanuna’ leswaku va “aka” vandlha. (Vaefesa 4:8, 11, 12; 5:24) Vavanuna lava va kuleke hi tlhelo ra moya va byeriwa ku ‘risa ntlhambi wa Xikwembu lowu nga ehansi ka vona,’ va nga “tshuki [va] fuma lava [va] nga nyikiwa vona ku va risa, kambe [va] boxela ntlhambi entila lowunene.” (1 Petro 5:1-3) Ntlhambi i wa Yehovha, naswona Kreste i “murisi lonene” wa wona. (Yohane 10:14) Tanihi leswi valanguteri hi mfanelo va langutelaka leswaku tinyimpfu leti Yehovha na Kreste va ti vekeke ehansi ka vona ti tirhisana na vona hi mbilu hinkwayo, na vona va fanele ku va swikombiso leswinene swa ku titsongahata.—Mintirho 20:28.
9 Eka lembe xidzana ro sungula, valanguteri lava totiweke a va tekiwa tanihi lava va “khomiweke” kumbe va ri “evokweni” ra xinene ra Kreste, leswi vulaka ku titsongahata eka yena tanihi Nhloko ya vandlha. (Nhlavutelo 1:16, 20; 2:1, NW) Ni namuntlha valanguteri lava nga emavandlheni ya Timbhoni ta Yehovha va fanele ku titsongahatela vukongomisi bya Kreste ni ‘ku titsongahata ehansi ka voko ra matimba ra Xikwembu.’ (1 Petro 5:6) Loko va fanele ku tamela timhaka ta vuavanyisi, va fanele ku khongela eka Yehovha, hi laha Solomoni a endleke ha kona emalembeni yakwe ya vutshembeki, loko a ku: “Nyika nanḍa wa wena e mbilu ya ku tiv̌a e ku av̌anyisa tiko ra wena, ni ku hlawula le’ŝo saseka e ka le’ŝo biha!” (1 Tihosi 3:9) Mbilu leyi titsongahataka yi ta susumetela nkulu ku lava ku vona swilo hi laha Yehovha na Kreste Yesu va swi vonaka ha kona, leswaku xiboho lexi va xi endlaka emisaveni xi fana swinene ni lexi xi endliweke etilweni.—Matewu 18:18-20.
10. Valanguteri hinkwavo va fanele va tikarhatela njhani ku tekelela ndlela leyi Yesu a khomeke tinyimpfu ha yona?
10 Hi ku fanana valanguteri lava famba-fambaka ni vakulu va mavandlha va ta tikarhatela ku tekelela Kreste hi ndlela leyi a khomeke tinyimpfu ha yona. Ku hambana ni Vafarisi, Yesu a a nga veki milawu leyi a swi tika ku yi landzela. (Matewu 23:2-11) U byele vanhu lava fanaka ni tinyimpfu a ku: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’wi[na] yi ta kuma ku wisa; hikuva joko ra mina ra olova, ni ndzhwalo wa mina wa vevuka.” (Matewu 11:28-30) Hambi leswi Mukreste un’wana ni un’wana a faneleke ku “rhwala mpingu wa yena,” valanguteri va fanele ku tsundzuka xikombiso xa Yesu, va pfuna vamakwavo ku swi vona leswaku mpingu wa vona wa vutihlamuleri bya Vukreste wa “olova,” wa “vevuka” naswona swa tsakisa ku wu rhwala.—Vagalatiya 6:5.
Ku Titsongahatela Vulawuri Bya Xikwembu
11. (a) Munhu a nga byi xixima njhani vunhloko, kambe a kumeka a nga titsongahateli vulawuri bya Xikwembu? Kombisa. (b) Ku va la titsongahatelaka vulawuri bya Xikwembu hakunene swi vula yini?
11 Vulawuri bya Xikwembu i ku fuma ka xona. Byi katsa nsinya wa nawu wa vunhloko lowu kombisiwaka eka 1 Vakorinto 11:3. Kambe nhlamuselo ya kona a yi heleli kwalaho. Munhu a nga ha vonaka a kombisa xichavo eka vunhloko, kambe a nga titsongahateli vulawuri bya Xikwembu hi ku helela. Xana leswi swi nga endlekisa ku yini? Hi xikombiso, xidemokrati i vulawuri lebyi nge mavokweni ya vanhu, naswona mudemokrati u hlamuseriwe tanihi “munhu loyi a kholwaka mafumelo ya xidemokrati.” Munhu a nga ha vula leswaku u seketela xidemokrati, a hlanganyela eka minhlawulo, a tlhela a va n’watipolitiki la hisekaka. Kambe loko mahanyelo ya yena ma kombisa leswaku u sandza moya wa xidemokrati ni misinya ya milawu hinkwayo leyi katsekaka eka xona, xana ku nga vuriwa leswaku u seketela xidemokrati hakunene? Hi ku fanana, leswaku munhu a va ehansi ka vulawuri bya Xikwembu hakunene, a nga fanelanga a vula hi nomo ntsena leswaku u titsongahatela vunhloko bya xona. U fanele a tekelela tindlela ni timfanelo ta Yehovha. U fanele a lawuriwa swinene hi Yehovha emhakeni yin’wana ni yin’wana. Naswona tanihi leswi Yehovha a nyikeke N’wana wakwe vulawuri lebyi heleleke, ku lawuriwa hi Xikwembu nakambe swi vula ku tekelela Yesu.
12, 13. (a) Ku titsongahatela vulawuri bya Xikwembu ngopfu-ngopfu swi katsa yini? (b) Xana ku titsongahatela vulawuri bya Xikwembu swi katsa ku yingisa swinawana swo tala? Kombisa.
12 Tsundzuka leswaku Yehovha u lava vutitsongahati lebyi humaka embilwini lebyi susumetiwaka hi rirhandzu. Yoleyo i ndlela leyi a lawulaka vuako ha yona. Yena hi byakwe i rirhandzu. (1 Yohane 4:8) Kreste Yesu hi yena loyi “ku kwetsima ka Xikwembu ku tikombaka eka yena, kutani ú tekelele leswi Xikwembu xi nga swona hi xiviri xa xona.” (Vaheveru 1:3) U lava leswaku vadyondzisiwa vakwe va ntiyiso va rhandzana. (Yohane 15:17) Kutani ku titsongahatela vulawuri bya Xikwembu a swi katsi ku tiveka ehansi ka vulawuri ntsena, kambe ni ku va ni rirhandzu. Mhaka leyi yi nga katsakanyiwa hi ndlela leyi landzelaka: Vulawuri bya Xikwembu i ku fuma ka xona; Xikwembu i rirhandzu; hikwalaho vulawuri bya Xikwembu i ku fuma hi rirhandzu.
13 Nkulu a nga ha anakanya leswaku vamakwerhu va fanele ku yingisa swinawana hinkwaswo leswaku va lawuriwa hi Xikwembu. Vakulu van’wana va hundzule swiringanyeto leswi nyikeriwaka nkarhi na nkarhi hi “nandza la tshembekaka, wo tlhariha” va swi endla milawu. (Matewu 24:45) Hi xikombiso, ku tshama ku ringanyetiwa leswaku i swinene leswaku hi nga tshami exitulwini xin’we minkarhi hinkwayo eHolweni ya Mfumo, leswaku swi ta hi olovela ku tivana ni vamakwerhu evandlheni. Lexi a ku ri xiringanyeto ntsena, hayi nawu lowu bohaka. Kambe vakulu van’wana va nga swi hundzula nawu, kutani va vona onge lava va nga swi landzeleriki a va titsongahateli vulawuri bya Xikwembu. Kambe ku nga ha va ni swivangelo leswi twalaka leswi endlaka makwerhu a lava ku tshama endhawini yo karhi. Loko nkulu a nga xiyi timhaka to tano hi rirhandzu, xana yena u titsongahatela vulawuri bya Xikwembu hakunene? Leswaku mi lawuriwa hi Xikwembu, “hinkwaswo leswi mi swi endlaka, a swi endliwe hi rirhandzu.”—1 Vakorinto 16:14.
Ku Tirha Hi Ntsako
14, 15. (a) Nkulu a nga va sivela njhani vamakwerhu van’wana ku kuma ntsako eku tirheleni ka Yehovha, naswona ha yini leswi ku nga ri ku titsongahatela vulawuri bya Xikwembu? (b) Yesu u swi kombise njhani leswaku u tlangela rirhandzu leri kombisiwaka hi ntirho wa hina, ematshan’wini ya mpimo wa wona? (c) Vakulu va fanele ku xiya yini?
14 Ku titsongahatela vulawuri bya Xikwembu nakambe swi vula ku tirhela Yehovha hi ntsako. Yehovha i “Xikwembu lexi tsakeke.” (1 Timotiya 1:11, NW) U lava leswaku vagandzeri vakwe va n’wi gandzela hi ntsako. Lava va rhandzaka ku veka swileriso va fanele ku tsundzuka leswaku exikarhi ka swinawana leswi Israyele a a fanele ku ‘swi endla hi vukheta’ a ku ri ni leswi landzelaka: “U ta tiṭakela e mahlweni ka Yehova, Šikwembu ša wena, e mitirweni hikwayo ya mav̌oko ya wena.” (Deteronoma 12:1, 18) Xin’wana ni xin’wana lexi hi xi endlaka entirhweni wa Yehovha xi fanele xi hi tisela ntsako, hayi ndzhwalo. Valanguteri va nga pfuna swinene leswaku va endla vamakwerhu va titwa va tsakile hi ku endla leswi va nga swi kotaka leswaku va tirhela Yehovha. Handle ka swona, loko vakulu va nga tivoneli, va nga sivela vamakwerhu van’wana ku kuma ntsako. Hi xikombiso, loko va endla mindzinganyeto, va bumabumela lava va fikeleleke kumbe ku hundza xiringaniso xa vandlha hi tiawara leti hetiweke eku nyikeleni ka vumbhoni ni ku kombisa ku sola lava hlulekeke, xana lava kumbexana va nga ni xivangelo lexi twalaka xo vika nkarhi lowutsongo swinene va ta titwa njhani? Xana sweswo a swi nge va endli va tivona nandzu lowukulu, ivi swi va tekela ntsako wa vona?
15 Tiawara ti nga ri tingani leti van’wana va nga ti nyikelaka entirhweni wo veka vumbhoni erivaleni ti nga va ti kombisa matshalatshala lamakulu ku tlula tiawara to tala leti hetiwaka hi van’wana eku chumayeleni, hi leswi va ha riki vantshwa, hi leswi va nga ni rihanyo lerinene ni swiyimo swin’wana. Emhakeni leyi, vakulu a va fanelanga ku va avanyisa. Entiyisweni, Tatana u nyike Yesu “matimba ya ku avanyisa.” (Yohane 5:27) Xana Yesu u sole noni ya xisiwana hikwalaho ka leswi munyikelo wa yona a wu ri ehansi swinene? E-e, a a khathala ngopfu hi leswi ku nyikela swimalana sweswo swimbirhi swi vuleke swona eka yena. A ku ri “hinkwaswo leswi a a ri na swona . . . , swi nga hinkwaswo leswi a a ta tihanyisa ha swona.” A swi kombisa rirhandzu lerikulu eka Yehovha! (Marka 12:41-44) Xana vakulu va fanele va nga khathali ngopfu hi matshalatshala ya rirhandzu ya lava endlaka hinkwaswo leswi va nga swi kotaka kambe swi ri ehansi “hi xiringaniso”? Hi ku ya hi rirhandzu ra Yehovha, matshalatshala yo tano ma nga va ma tlula swinene ya xiringaniso!
16. (a) Loko valanguteri va tirhisa tinhlayo to ringanisa etinkulumeni ta vona, ha yini va fanele va tirhisa ku twisisa ni ku ringanisela lokunene? (b) Hi yihi ndlela leyinene yo pfuna vamakwerhu ku antswisa vutirheli bya vona?
16 Xana marito lawa se ma fanele ku hundzuriwa “nawu” lowuntshwa wa leswaku tinhlayo—hambi ku ri swiringaniso—a swi fanelanga swi boxiwa? Nikatsongo! Yinhla ya kona hi leswaku valanguteri va fanele ku ringanisela loko va khutaza vamakwerhu ku antswisa vutirheli bya vona ni ku va pfuna ku endla leswi va nga swi kotaka hi ntsako. (Vagalatiya 6:4) Eka xifaniso xa Yesu xa titalenta, n’wini u nyike malandza ya yena xuma xakwe, “un’wana ni un’wana a nyikiwa hi ku ringana matimba ya yena.” (Matewu 25:14, 15) Hi ku fanana vakulu va fanele ku xiya vuswikoti bya muhuweleri un’wana ni un’wana wa Mfumo. Leswi swi lava ku twisisa. Swi nga endleka leswaku van’wana hakunene va lava xikhutazo xo endla leswi engetelekeke. Va nga wu tlangela mpfuno wo hlela vutirheli bya vona hi ndlela yo antswa. Hambi swi ri tano, loko va pfuniwa ku endla leswi va nga swi kotaka hi ntsako, kumbexana ntsako wolowo wu ta va tiyisa leswaku va antswisa vutirheli bya vona bya Vukreste loko swi koteka.—Nehemiya 8:10; Pisalema 59:16; Yeremiya 20:9.
Ku Rhula Loku Tisiwaka Hi Ku Titsongahata Hi Ntsako
17, 18. (a) Ku titsongahata hi ntsako swi nga hi tisela ku rhula ni vululami hi ndlela yihi? (b) Hi nga kuma yini loko hi yingisela swinene milawu ya Xikwembu?
17 Ku titsongahatela vuhosi lebyi faneleke bya Yehovha hi ntsako swi hi tisela ku rhula lokukulu. Mupisalema loko a khongela Yehovha u te: “La’v̌a ranḍaka nawu wa wena v̌a ni ku rula lo’kukulu, a ku na ku khunguv̌anyisa e ka v̌ona.” (Pisalema 119:165) Ha pfuneka hi ku yingisa nawu wa Xikwembu. Yehovha u byele Vaisrayele a ku: “Ku v̌ula ŝeŝo Yehova Mukuṭuri wa wena, Muhlawuriwa wa Israel a ku: Hi mina Yehova, Šikwembu ša wena l’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona. Mawako! loko ngi u yingisa milawu ya mina! Ku rula ka wena ku ta v̌a tani hi nambu, ku lulama ka wena ku ta fana ni magandlati ya lwandle.”—Esaya 48:17, 18.
18 Gandzelo ra nkutsulo ra Kreste ri endla leswaku hi va ni ku rhula ni Xikwembu. (2 Vakorinto 5:18, 19) Loko hi ri ni ripfumelo engatini ya Kreste leyi kutsulaka, hi tikarhatela swinene ku lwisana ni ku tsana ka hina, hi endla ku rhandza ka Xikwembu, mintlhaveko ya ku tivona nandzu yi ta hi sukela. (1 Yohane 3:19-23) Ripfumelo ro tano, leri seketeriwaka hi mintirho, ri endla leswaku hi va ni xiyimo lexi lulameke emahlweni ka Yehovha, ni ntshembo lowu hlamarisaka wa ku pona ku ‘xaniseka lokukulu’ ni ku hanya hi laha ku nga heriki emisaveni leyintshwa ya Yehovha. (Nhlavutelo 7:14-17; Yohane 3:36; Yakobo 2:22, 23) Leswi hinkwaswo swi nga va swa hina ‘ntsena loko hi yingisa swinene milawu ya Xikwembu.’
19. Ntsako wa hina sweswi ni ntshembo wa hina wa vutomi lebyi nga heriki wu titshege ha yini, naswona Davhida u ri phofule njhani langutelo ra hina leri humaka embilwini?
19 Ina, ntsako wa hina sweswi, ni ntshembo wa hina wa vutomi lebyi nga heriki emisaveni ya paradeyisi swi titshege hi ku titsongahatela ka hina vulawuri bya Yehovha hi ntsako, tanihi Hosi Leyikulu ya vuako. Onge hi nga titwa hi laha Davhida a titweke ha kona, loko a ku: “E ka wena Yehova ku v̌e v̌ukulu, ni matimba, ni ku twala, ni ku kwetsima, ni v̌uhosi, hikuv̌a hikwaŝo le’ŝi nge tilweni ne misaveni, ŝi na wena; e ka wena Yehova, ku v̌e ku fuma, wena l’a titlakuseke ku v̌a hosi henhla ka ŝilo hikwaŝo. Oho! Šikwembu ša hina! Ŝeŝi ha ku v̌onga, hi ḍunisa v̌ito ra wena le’ri kwetsimaka.”—1 Tikronika 29:11, 13.
Tinhla To Ti Tsundzuka
◻ I ku titsongahata ni ku yingisa ka muxaka muni loku Yehovha a lavaka leswaku malandza ya yena ma ku kombisa?
◻ Yesu u hakerisiwe ku yini hi ku yingisa kakwe, naswona hi fanele hi kombisa yini hi swiendlo swa hina?
◻ Valanguteri hinkwavo va fanele va yi tekelela njhani ndlela leyi Yesu a khomeke tinyimpfu ha yona?
◻ Ku titsongahatela vulawuri bya Xikwembu swi katsa yini?
◻ Ku titsongahata hi ntsako swi hi tisela mikateko yihi?
[Xifaniso lexi nga eka tluka 24]
Vakulu va khutaza ntlhambi leswaku wu endla xin’wana ni xin’wana lexi wu nga xi kotaka hi ntsako
[Xifaniso lexi nga eka tluka 26]
Yehovha u tsakela lava va n’wi yingisaka swi suka embilwini