Varisi Ni Tinyimpfu Ehansi Ka Vulawuri Bya Xikwembu
“Yehova i muav̌anyisi wa hina; Yehova i mulawuri wa hina; Yehova i hosi ya hina; o ta hi hlayisa!”—ESAYA 33:22.
1. Ha yini ku nga vuriwaka leswaku Vakreste va lembe xidzana ro sungula ni Vakreste va namuntlha va lawuriwa hi Xikwembu?
VULAWURI bya Xikwembu, i ku fuma ka xona. Swi katsa ku amukela vuhosi bya Yehovha ni ku landzela vukongomisi ni vuleteri byakwe eka swiboho leswikulu ni leswitsongo leswi hi swi endlaka evuton’wini. Vandlha ra lembe xidzana ro sungula a ri lawuriwa hi Xikwembu hi ku helela. Vakreste va nkarhi wolowo a va ta swi kota ku vula hi timbilu ta vona hinkwato va ku: “Yehova i muav̌anyisi wa hina; Yehova i mulawuri wa hina; Yehova i hosi ya hina.” (Esaya 33:22) Nhlengeletano ya Yehovha Xikwembu, leyi tiyisiwaka hi masalela lama totiweke, namuntlha na yona yi lawuriwa hi Xikwembu hi xiviri.
Xana Namuntlha Hi Lawuriwa Hi Xikwembu Hi Tindlela Tihi?
2. Hi yihi ndlela yin’wana leyi Timbhoni ta Yehovha ti titsongahatelaka vulawuri bya Yehovha ha yona?
2 Ha yini hi nga vulaka leswaku nhlengeletano ya Yehovha ya le misaveni i vulawuri bya Xikwembu? Hikuva lava va nga swirho swa yona va titsongahata eka vulawuri bya Yehovha hakunene. Naswona va landzela vurhangeri bya Yesu Kreste, loyi Yehovha a n’wi vekeke exiluvelweni tanihi Hosi. Hi xikombiso, enkarhini lowu wa makumu, Yesu u nyikiwa xileriso lexi xi kongomeke lexi humaka eka Mulawuri Lonkulu: “Nghenisa rihwevo ra wena u tshovela, hikuva nkarhi wa ku tshovela wu fikile, naswona misava yi vupfile swinene yi vupfele ku tshoveriwa.” (Nhlavutelo 14:15) Yesu u endla leswi a byeriwaka swona, naswona u tshovela misava. Vakreste va seketela Hosi ya vona entirhweni lowu lowukulu hi ku chumayela mahungu lamanene hi ku chivirika, ni ku endla vadyondzisiwa. (Matewu 28:19; Marka 13:10; Mintirho 1:8) Hi ku endla tano, nakambe i vatirhi-kulobye va Yehovha, Mulawuri Lonkulu.—1 Vakorinto 3:9.
3. Vakreste va titsongahata njhani eka vulawuri bya Xikwembu malunghana ni timhaka ta mahanyelo?
3 Vakreste va titsongahatela vulawuri bya Xikwembu na hi mahanyelo. Yesu u te: “Loyi a hanyaka entiyisweni, wa ta eku vonakaleni, leswaku mintirho ya yena yi ta vonaka yi ri leyi endliweke hi ku yingisa Xikwembu.” (Yohane 3:21) Namuntlha, ku ni ku kanetana loku nga riki na makumu malunghana ni mimpimanyeto ya mahanyelo, kambe ku kanetana loku a ku laveki exikarhi ka Vakreste. Leswi Yehovha a nge a swi fanelanga, na vona va swi languta tanihi leswi nga fanelangiki, naswona va swi papalata ku fana ni vuvabyi lebyi tlulelaka! Nakambe va khathalela mindyangu ya vona, va yingisa vatswari va vona, ni ku titsongahata eka vafumi lava tlakukeke. (Vaefesa 5:3-5, 22-33; 6:1-4; 1 Timotiya 5:8; Tito 3:1) Xisweswo, va lawuriwa hi Xikwembu, va pfumelelana na xona.
4. Hi wahi malangutelo lama hoxeke lama kombisiweke hi Adamu na Evha na Sawulo, naswona Vakreste va ri kombisa njhani langutelo leri hambaneke?
4 Adamu na Evha va hlongoriwile eParadeyisini hikwalaho ka leswi a va lava ku endla swiboho swa vona vini eka leswi lulameke ni leswi hoxeke. Yesu u lave ku endla leswi hambanaka na sweswo hi ku helela. U te: “A ndzi lavi ku endla ku rhandza ka mina, kambe ku rhandza ka Loyi a ndzi rhumeke.” Vakreste va lava leswi fanaka ni sweswo. (Yohane 5:30; Luka 22:42; Varhoma 12:2; Vaheveru 10:7) Sawulo, hosi yo sungula ya Israyele, u n’wi yingisile Yehovha—kambe hayi evuton’wini byakwe hinkwabyo. Kutani u fularheriwile hikwalaho ka swona. Samuwele u n’wi byerile a ku: “Ku yingisa ku tlula maganḍelo; ku hlayisa rito ra yena, ku tlula mafura ya tinyimpfu.” (1 Samuwele 15:22) Xana ku endla ku rhandza ka Yehovha ku fikela eka mpimo wo karhi ntsena, tanihi ku hlanganyela nkarhi na nkarhi entirhweni wo chumayela kumbe ku va kona eminhlanganweni, kambe u bakanya timhaka ta mahanyelo kumbe tin’wana, swi vula ku titsongahatela vulawuri bya Xikwembu ke? Nikatsongo! Hi lwela ku ‘endla ku rhandza ka Xikwembu hi mimoya-xiviri ya hina hinkwayo.’ (Vaefesa 6:6; 1 Petro 4:1, 2) Ku hambana na Sawulo, hi titsongahata hi ku helela ehansi ka vulawuri bya Xikwembu.
Vulawuri Bya Xikwembu Bya Manguva Lawa
5, 6. Yehovha u va lawula njhani vanhu namuntlha, naswona ku fambisana ni lunghiselelo leri swi va ni vuyelo byihi?
5 Khale Yehovha a a lawula ni ku paluxa mintiyiso hi ku tirhisa vanhu vo karhi, tanihi vaprofeta, tihosi ni vaapostola. Namuntlha a swa ha ri tano; a va ha ri kona vaprofeta kumbe vaapostola lava huhuteriweke. Ku ri na sweswo, Yesu u vule leswaku hi nkarhi wa vukona byakwe evuhosini, a a ta paluxa ntlawa lowu tshembekaka wa valandzeri vakwe, ku nga “nandza la tshembekaka, wo tlhariha,” naswona a a ta n’wi veka ku va mulanguteri wa swilo swakwe hinkwaswo. (Matewu 24:45-47; Esaya 43:10) Hi 1919 nandza yoloye u kombisiwe a ri masalela ya Vakreste lava totiweke. Ku sukela kwalaho, hi yena loyi a a tirhisiwa ku lawula emisaveni, a yimeriwe hi Huvo leyi Fumaka ya Timbhoni ta Yehovha. Emisaveni hinkwayo, Huvo leyi Fumaka yi yimeriwa hi Tikomiti ta Marhavi, valanguteri lava famba-fambaka ni vakulu va mavandlha.
6 Ku khomisana ni nhlengeletano leyi lawuriwaka hi Xikwembu i xiphemu xa nkoka xa ku tiveka ehansi ka vulawuri bya xona. Ku khomisana ko tano ku tisa vun’we ni nhleleko ‘exikarhi ka vamakwerhu’ emisaveni hinkwayo. (1 Petro 2:17) Nakambe, leswi swi tsakisa Yehovha, loyi a ‘nga riki Xikwembu xa mpfilumpfilu, kambe xa ku rhula.’—1 Vakorinto 14:33.
Vakulu eHansi Ka Vulawuri Bya Xikwembu
7. Ha yini ku nga vuriwaka leswaku vakulu va Vakreste va vekiwa hi Xikwembu?
7 Vakulukumba hinkwavo lava vekiweke, ku nga khathariseki xiyimo lexi va nga na xona xa vulawuri, va fikelela timfanelo leti andlaleriweke mulanguteri kumbe nkulukumba eBibeleni. (1 Timotiya 3:1-7; Tito 1:5-9) Ku ya emahlweni, marito lama landzelaka lawa Pawulo a ma byeleke vakulu va le Efesa ma tirha eka vakulu hinkwavo namuntlha: “Tilanguteleni ke, mi langutela ni ntlhambi hinkwawo lowu Moya lowo Kwetsima wu nga mi veka ku va varhangeri va wona; risani [vandlha ra] Xikwembu.” (Mintirho 20:28) Ina, vakulu va vekiwe hi moya lowo kwetsima, lowu humaka eka Yehovha Xikwembu. (Yohane 14:26) Va vekiwe hi Xikwembu. Ku tlula kwalaho, va risa ntlhambi wa Xikwembu. Ntlhambi i wa Yehovha, ku nga ri vakulu. I nhlengeletano leyi yi lawuriwaka hi Xikwembu.
8. Hi byihi vutihlamuleri bya xisekelo bya vakulu namuntlha?
8 Eka papila rakwe leri a ri tsaleleke Vaefesa, muapostola Pawulo u andlale vutihlamuleri bya xisekelo bya vakulu, a ku: “[U veke] van’wana ku va vaapostola, van’wana vaprofeta, van’wana ku va vavuri va Evhangeli, van’wana ku va [varisi] ni vadyondzisi. Ntirho wa vona i ku pfuna vahlawuriwa va Xikwembu leswaku va ta kota ku tirhela van’wana, va aka miri wa Kriste.” (Vaefesa 4:11, 12) Vaapostola ni vaprofeta a va nga ha ri kona loko ku sungula “miri wa Kriste.” (Ringanisa 1 Vakorinto 13:8.) Kambe vakulu va ha khomekile swinene hi ku vula evhangeli, va endla ntirho wa vurisi ni wa ku dyondzisa.—2 Timotiya 4:2; Tito 1:9.
9. Vakulu va fanele va tilunghiselela njhani ku yimela ku rhandza ka Xikwembu evandlheni?
9 Tanihi leswi vulawuri bya Xikwembu ku nga ku fuma ka xona, vakulu lava humelelaka va swi tiva kahle leswi Xikwembu xi rhandzaka swona. Yoxuwa u lerisiwe ku hlaya Nawu siku na siku. Vakulu na vona va fanele ku dyondza ni ku kambisisa Matsalwa nkarhi na nkarhi ni ku ti tiva kahle tibuku ta Bibele leti humesiweke hi nandza wo tshembeka ni wa vutlharhi. (2 Timotiya 3:14, 15) Tibuku leti ti katsa timagazini ta Xihondzo xo Rindza na Xalamuka! kun’we ni tibuku tin’wana leti kombisaka ndlela leyi misinya ya milawu ya Bibele yi tirhaka ha yona eka swiyimo swo karhi.a Kambe hambi leswi swi nga swa nkoka leswaku nkulu a tiva ni ku landzelela vukongomisi lebyi humesiwaka etibukwini ta Sosayiti ya Watch Tower, nakambe u fanele ku yi tiva kahle misinya ya milawu ya Matsalwa leyi vukongomisi byebyo byi sekeriweke eka yona. Kutani u ta swi kota kahle ku tirhisa vukongomisi bya Matsalwa hi ku twisisa ni musa.—Ringanisa Mikiya 6:8.
Ku Tirha Hi Moya Wa Vukreste
10. Vakulu va fanele ku tivonela eka langutelo rihi ro biha, naswona hi ndlela yihi?
10 Kwalomu ka lembe ra 55 C.E., muapostola Pawulo u tsale papila ra yena ro sungula leri yaka evandlheni ra le Korinto. Xin’wana xa swiphiqo leswi a a fanele ku swi lulamisa a swi khumba vavanuna van’wana lava a va lava ku va lava tlakukeke evandlheni. Pawulo u tsarile: “A ndzi ri, mi ri mi ni hinkwaswo leswi lavekaka! A ndzi ri, mi ri mi hundzukile swifumi! Mi nga ku, mi hundzukile tihosi hi n’wexe mi nga ri na hina! Mawaku loko onge mi hundzukile tihosi hakunene, na hina hi ta va tihosi swin’we na n’wina.” (1 Vakorinto 4:8) Eka lembe xidzana ro sungula C.E., Vakreste hinkwavo a va langutele ku fuma na Yesu ematilweni tanihi tihosi ni vaprista. (Nhlavutelo 20:4, 6) Kambe swi tikomba onge van’wana eKorinto a va rivele leswaku laha misaveni ku hava tihosi eka Vukreste lebyi nga ehansi ka vulawuri bya Xikwembu. Ematshan’wini yo fana ni tihosi ta misava leyi, varisi va Vakreste va hlakulela moya wa ku titsongahata, ku nga mfanelo leyi tsakisaka Yehovha.—Pisalema 138:6; Luka 22:25-27.
11. (a) Hi swihi swikombiso swin’wana leswi xiyekaka swa ku titsongahata? (b) Vakulu ni Vakreste lavan’wana hinkwavo va fanele va tilanguta njhani?
11 Xana ku titsongahata swi kombisa ku tsana? Nikatsongo! Yehovha hi byakwe u hlamuseriwa tanihi loyi a titsongahataka. (Pisalema 18:35) Tihosi ta Israyele a ti rhangela mavuthu loko ma ya enyimpini ni ku fuma tiko leri kongomisiwaka hi Yehovha. Kambe hosi yin’wana ni yin’wana a yi fanele ku tivonela ‘leswaku mbilu ya yona yi nga tikurisi eka vamakwavo.’ (Deteronoma 17:20) Yesu la pfuxiweke i Hosi ya le tilweni. Kambe loko a ha ri emisaveni u hlambise vadyondzisiwa vakwe milenge. Mawaku ku titsongahata ko tano! Naswona ku komba leswaku a a lava leswaku vaapostola vakwe va titsongahata hi ndlela leyi fanaka, u te: “Loko mina, Hosi ya n’wina ni Mudyondzisi wa n’wina, ndzi mi hlambisile milenge, na n’wina mi ta fanela ku hlambisana milenge.” (Yohane 13:14; Vafilipiya 2:5-8) Loyi a faneleke ku dzunisiwa ni ku kwetsimisiwa i Yehovha, hayi munhu wihi kumbe wihi un’wana. (Nhlavutelo 4:11) Hambi i vakulu kumbe e-e, Vakreste hinkwavo va fanele ku va ni langutelo leri Yesu a ri boxeke, loko a ku: “Hi malandza lama nga faneriki hi ku nkhensiwa, hi endlile ntsena leswi a hi fanela ku swi endla.” (Luka 17:10) Langutelo rihi na rihi handle ka leri, a ri fambisani ni ku rhandza ka Xikwembu.
12. Ha yini rirhandzu ku ri mfanelo ya nkoka leyi vakulu va Vakreste va faneleke ku yi hlakulela?
12 Xin’wana lexi fambisanaka ni ku titsongahata lexi vakulu va Vakreste va faneleke ku xi hlakulela i rirhandzu. Muapostola Yohane u kombise nkoka wa rirhandzu loko a ku: “Loyi a nga riki na rirhandzu, a nga tivi Xikwembu, hikuva Xikwembu i rirhandzu.” (1 Yohane 4:8) Vanhu lava nga riki na rirhandzu a va lawuriwi hi Xikwembu. A va n’wi tivi Yehovha. Malunghana ni N’wana wa Xikwembu, Bibele yi ri: “[Yesu] a a rhandza vanhu va yena laha misaveni, kutani ú va rhandzile ngopfu ku yisa eku heteleleni.” (Yohane 13:1) Loko a vulavula ni vavanuna va 11 lava a va ta va swirho swa huvo leyi fumaka evandlheni ra Vukreste, Yesu u te: “Nawu wa mina hi lowu: Hileswaku mi rhandzana, kukotisa leswi na mina ndzi mi rhandzeke.” (Yohane 15:12) Rirhandzu i xikombiso xa Vukreste bya ntiyiso. Ri chavelela vanhu lava tshovekeke timbilu, ni lava rilaka, ni mahlonga emoyeni, lama lavaka ntshunxeko. (Esaya 61:1, 2; Yohane 13:35) Vakulu va fanele ku va swikombiso leswinene eku ri kombiseni.
13. Hambi leswi swiphiqo swa namuntlha swi nga ha nonon’hwaka, nkulu a nga va ni nhlohlotelo lowunene etimhakeni hinkwato hi ndlela yihi?
13 Namuntlha, hakanyingi vakulu va komberiwa ku tamela swiphiqo swo nonon’hwa swinene. Swiphiqo evukatini swi nga nyanya ku nonon’hwa ni ku phikelela. Vantshwa va ni swiphiqo leswi vanhu lavakulu swi nga va nonon’hwelaka ku swi xiya. Swiphiqo swa minsusumeto hakanyingi swa nonon’hwa ku swi twisisa. Nkulu la langutaneke ni swilo swo tano swi nga endleka a nga tiyiseki leswaku u fanele ku endla yini. Kambe a nga tiyiseka leswaku loko a tshemba vutlharhi bya Yehovha hi xikhongelo, loko a endla ndzavisiso eBibeleni ni le ka rungula leri humesiweke hi nandza wo tshembeka ni wa vutlharhi, ni loko a tirhisana ni tinyimpfu hi ku titsongahata ni hi rirhandzu, u ta va ni nhlohlotelo lowunene hambi loko ku ri ni xiphiqo xo nonon’hwa swinene.
14, 15. Hi tihi tinhlamuselo tin’wana leti kombisaka leswaku Yehovha u katekise vanhu vakwe hi vakulu vo tala lavanene?
14 Yehovha u yi katekisile swinene nhlengeletano yakwe hi ‘tinyiko leti nga vavanuna.’ (Vaefesa 4:8) Hakanyingi Sosayiti ya Watch Tower yi amukela mapapila lama khumbaka mbilu lama nyikaka vumbhoni bya rirhandzu leri kombisiwaka hi vakulu lava titsongahataka lava va risaka tinyimpfu ta Xikwembu hi musa. Hi xikombiso, nkulu wa vandlha wa tsala: “A ndzi tsundzuki rin’wana riendzo ra mulanguteri wa xifundzha leri ndzi khumbeke swinene, kumbe leri ni sweswi ka ha vulavuriwaka ha rona evandlheni ku fana ni leri. Mulanguteri wa xifundzha u ndzi pfunile ku vona nkoka wa ku va ni langutelo lerinene loko u tirhisana ni makwenu, a kandziyisa ngopfu ku bumabumela.”
15 Makwerhu loyi a yeke exibedlhele xa le kule a ya tshunguleriwa kona wa tsala: “Swi ndzi nyike matimba swinene loko ndzi hlangana ni nkulu hi vusiku byo sungula exibedlhele lexi nga ekule swinene ni le kaya naswona ndzi karhatekile! Yena ni vamakwerhu van’wana va hete nkarhi wo leha na mina. Hambi ku ri vanhu va misava lava a va byi tiva kahle vuvabyi lebyi a byi ndzi khomile va vule leswaku ingi ndzi nga ponanga loko a ku nga ri nchavelelo, nkhathalelo ni swikhongelo swa vamakwerhu volavo va rirhandzu ni lava tinyiketeleke.” Makwerhu un’wana wa xisati wa tsala: “Namuntlha ndzi kota ku pfula nomu hi leswi huvo ya vakulu yi lehiseke mbilu hi ku ndzi nyika switsundzuxo swo lwisana ni ntshikilelo lowukulu wa mianakanyo. . . . Makwerhu un’wana ni nsati wakwe a va nga swi tivi ni leswi va nga ndzi byelaka swona. . . . Kambe leswi ndzi khumbeke ngopfu hi leswaku hambi leswi a va nga ku twisisi swinene ku karhateka ka mina, va ndzi khathalerile hi rirhandzu.”
16. Petro u nyika vakulu xikhutazo xihi?
16 Ina, vakulu vo tala va tirhisa xikhutazo xa muapostola Petro lexi nge: “Risani ntlhambi wa Xikwembu lowu nge hansi ka n’wina, mi wu hlayisa ku nga ri hi ku sindzisiwa, kambe ku ri hi ku swi rhandza, . . . naswona ku nga ri hi ku langutela bindzu leri khomisaka tingana, kambe hi ku hiseka. Mi nga tshuki mi fuma lava mi nga nyikiwa vona ku va risa, kambe mi boxela ntlhambi entila lowunene.” (1 Petro 5:1-3) Vakulu vo tano lava lawuriwaka hi Xikwembu i nkateko lowukulu swonghasi!
Tinyimpfu Leti Lawuriwaka Hi Xikwembu
17. Boxa timfanelo tin’wana leti swirho hinkwaswo swa vandlha swi faneleke ku ti hlakulela.
17 Kambe vulawuri bya Xikwembu a byi vumbiwi hi vakulu ntsena. Loko varisi va fanele va lawuriwa hi Xikwembu, ni tinyimpfu ti fanele tilawuriwa hi xona. Hi tindlela tihi ke? Misinya ya milawu leyi kongomisaka varisi yi fanele ku tlhela yi kongomisa tinyimpfu. Ku nga ri vakulu ntsena, kambe Vakreste hinkwavo, va fanele ku titsongahata loko va ta katekisiwa hi Yehovha. (Yakobo 4:6) Hinkwerhu hi fanele ku hlakulela rirhandzu hikuva handle ka rona, magandzelo lawa hi ma endlelaka Yehovha a ma n’wi tsakisi. (1 Vakorinto 13:1-3) Naswona hinkwerhu ka hina, hayi vakulu ntsena, hi fanele ‘ku tala hi vutivi lebyi kongomeke bya ku rhandza ka Yehovha evutlharhini hinkwabyo ni le ku twisiseni ka swilo swa moya.’—Vakolosa 1:9.
18. (a) Ha yini vutivi lebyi nga entangiki bya ntiyiso byi nga enelanga? (b) Hinkwerhu ka hina hi nga tatiwa hi vutivi lebyi kongomeke hi ndlela yihi?
18 Vantshwa ni vanhu lavakulu nkarhi na nkarhi va langutana ni swiboho swo tika tanihi leswi va ringetaka ku tshama va tshembekile emisaveni ya Sathana leyi va hanyaka eka yona. Mimboyamelo ya misava eka maambalelo, vuyimbeleri, tibayiskopo ni tibuku swi ringa vumoya bya van’wana. Vutivi lebyi nga entangiki bya ntiyiso a byi ringananga leswaku byi hi pfuna ku tshama hi tiyile. Leswaku hi tiyiseka leswaku hi ta tshama hi tshembekile, hi fanele ku tala hi vutivi lebyi kongomeke. Hi fanele ku va ni ku twisisa ni vutlharhi lebyi hi nga byi kumaka eRitweni ra Xikwembu ntsena. (Swivuriso 2:1-5) Leswi swi vula ku hlakulela mikhuva leyinene ya ku dyondza, hi anakanyisisa hi leswi hi swi dyondzaka, kutani hi swi tirhisa. (Pisalema 1:1-3; Nhlavutelo 1:3) Pawulo a a tsalela Vakreste hinkwavo, hayi vakulu ntsena, loko a ku: “Swakudya leswi tiyeke i swa lava kuleke, i swa lava miehleketo ya vona yi vupfeke, lava toloveleke ku hlawula leswinene eka leswo biha.”—Vaheveru 5:14.
Varisi Ni Tinyimpfu Va Khomisana
19, 20. I swikhutazo swihi leswi nyikiwaka hinkwavo leswaku va tirhisana ni vakulu, naswona ha yini?
19 Hi nga gimeta hi ku vula leswaku lava va tirhisanaka ni vakulu va kombisa moya wa ku titsongahatela vulawuri bya Xikwembu hakunene. Pawulo u tsalele Timotiya a ku: “Endla leswaku vakulukumba lava tirhaka swinene ntirho wa vurisi va kombisiwa xichavo lexikulu, ngopfu-ngopfu lava tikarhataka ku twarisa Rito ni ku dyondzisa.” (1 Timotiya 5:17; 1 Petro 5:5, 6) Ku va nkulu i lunghelo lerikulu, kambe vakulu vo tala i vavanuna va mindyangu lava yaka entirhweni wo tihanyisa siku na siku ni lava nga ni vasati ni vana lava va faneleke ku va hlayisa. Hambi leswi va endlaka ntirho wa vona hi ntsako, ntirho wa vona wa olova ni ku pfuna swinene loko vandlha ri va seketela, hayi ku xopaxopa ni ku karhata ngopfu.—Vaheveru 13:17.
20 Muapostola Pawulo u te: “Anakanyani vafambisi va n’wina, lava nga mi dyondzisa rito ra Xikwembu; ehleketani vutomi bya vona ni mahetelelo ya byona, mi landza ntila wa ku pfumela ka vona.” (Vaheveru 13:7) E-e, Pawulo a a nga khutazi vamakwerhu leswaku va va valandzeri va vakulu. (1 Vakorinto 1:12) Ku landzela munhu a swi kombisi ku titsongahatela vulawuri bya Xikwembu. Kambe i vutlharhi hakunene ku tekelela ripfumelo leri xiyekaka ra nkulu la titsongahatelaka vulawuri bya Xikwembu, loyi a chivirikaka entirhweni wo vula evhangeli, loyi a vaka kona nkarhi na nkarhi eminhlanganweni, ni loyi a hanyisanaka ni vandlha hi ku titsongahata na hi rirhandzu.
Vumbhoni Bya Ripfumelo
21. Vakreste va ri kombisa njhani ripfumelo leri tiyeke ku fana ni leriya ra Muxe?
21 Kunene, vukona bya nhlengeletano leyi lawuriwaka hi Xikwembu enkarhini lowu wo biha swinene ematin’wini ya vanhu i vumbhoni bya matimba ya Mulawuri Lonkulu. (Esaya 2:2-5) Nakambe i vumbhoni bya ripfumelo ra vavanuna, vavasati ni vana va Vakreste va kwalomu ka ntlhanu wa timiliyoni, lava langutanaka ni swiphiqo swa vutomi bya siku na siku kambe va nga rivali ni kan’we leswaku Yehovha i Mufumi wa vona. Ku fana na Muxe wo tshembeka la ‘yimeke a tiya onge hi loko a vona Loyi a nga vonakiki,’ Vakreste namuntlha va ni ripfumelo leri tiyeke ku fana na yena. (Vaheveru 11:27) Va ni nkateko wo hanya ehansi ka vulawuri bya Xikwembu, naswona siku na siku va nkhensa Yehovha hikwalaho ka sweswo. (Pisalema 100:4, 5) Tanihi leswi va xiyaka matimba ya Yehovha lama ponisaka, va tsaka ku twarisa va ku: “Yehova i muav̌anyisi wa hina; Yehova i mulawuri wa hina; Yehova i hosi ya hina; o ta hi hlayisa!”—Esaya 33:22.
[Nhlamuselo ya le hansi]
a Yin’wana ya tibuku to tano hi leyi nge “Nyikelani Nyingiso Eka N’wina Vini Ni Le Ka Ntlhambi Hinkwawo,” leyi nga ni vukongomisi bya Matsalwa, leyi lunghiseleriweke valanguteri kumbe vakulu lava vekiweke emavandlheni.
Xana Bibele Yi Kombisa Yini?
◻ Vakreste va titsongahata hi ndlela yihi eka vulawuri bya Xikwembu?
◻ Vulawuri bya Xikwembu byi hleriwe njhani namuntlha?
◻ Vakulu va fanele ku tilunghiselela hi tindlela tihi leswaku va hetisisa vutihlamuleri bya vona?
◻ Hi tihi timfanelo ta Vukreste ta nkoka leti vakulu va faneleke ku ti hlakulela ni ku ti kombisa?
◻ Eka vulawuri bya Xikwembu, i vuxaka byihi lebyi faneleke ku va kona exikarhi ka tinyimpfu ni varisi?
[Xifaniso lexi nga eka tluka 16]
Adamu na Evha va hlongoriwile eParadeyisini hikwalaho ka leswi a va lava ku endla swiboho swa vona vini eka leswi lulameke ni leswi hoxeke
[Xifaniso lexi nga eka tluka 18]
Loko nkulu a tirhisana ni tinyimpfu hi ku titsongahata ni hi rirhandzu, minkarhi hinkwayo u ta va ni nhlohlotelo lowunene