Malandza Ya Xikwembu—Vanhu Lava Hlelekeke Ni Lava Tsakeke
“Ku katekile [vanhu lava] Yehova a nga Šikwembu ša [vona]!”—PISALEMA 144:15.
1, 2. (a) Ha yini Yehovha a ri ni mfanelo yo veka mimpimanyeto ya malandza yakwe? (b) Hi tihi timfanelo timbirhi ta Yehovha leti hi faneleke hi tiyimisela swinene ku ti tekelela?
YEHOVHA i Hosi ya Vuako Hinkwabyo, Xikwembu xa Matimba Hinkwawo, Muvumbi. (Genesa 1:1; Pisalema 100:3) Hikwalaho, u ni mfanelo ya ku veka mimpimanyeto ya mahanyelo ya malandza yakwe, hikuva u tiva leswi swi va lulameleke. (Pisalema 143:8) Naswona i Xikombiso xa vona Lexikulu lexi va faneleke ku tekelela timfanelo ta xona. Muapostola un’wana u tsale a ku: “Leswi mi nga vana va Xikwembu lava rhandzekaka, ringetani ku fana na xona.”—Vaefesa 5:1.
2 Mfanelo ya Xikwembu leyi hi faneleke ku yi tekelela yi fambisana ni nhleleko. “A hi Xikwembu xa mpfilumpfilu.” (1 Vakorinto 14:33) Loko hi swi xiyisisa hi vukheta leswi Xikwembu xi swi endleke, hi susumeteleka ku endla xiboho xa leswaku i Munhu la tlakukeke, la hlelekeke swinene evuakweni hinkwabyo. Hambi swi ri tano, mfanelo yin’wana ya Xikwembu leyi xi lavaka leswaku malandza ya xona ma yi tekelela i ntsako wa xona, hikuva xona i ‘Xikwembu lexi tsakeke.’ (1 Timotiya 1:11) Xisweswo, vuswikoti bya xona byo hlela byi fambisana ni ntsako. A ku tlakusiwi mfanelo yin’wana ivi ku yisiwa yin’wanyana ehansi.
3. Xana matilo lama teleke tinyeleti ma byi kombisa njhani vuswikoti bya Xikwembu bya ku hlela?
3 Hinkwaswo leswi Yehovha a swi endleke, ku sukela eka leswikulu ku ya eka leswitsongo swi kombisa leswaku i Xikwembu xa nhleleko. Hi xikombiso, anakanya hi xibakabaka lexi vonakaka. Xi ni magidi ya timiliyoni ta tinyeleti. Kambe a ti hangalakanga. Mutivi wa tinyeleti ni sayense ya ntumbuluko, George Greenstein u xiye leswaku ku ni “ntila wa nhleleko wa tinyeleti.” Ti hleriwe hi mintlawa ya swirimele, swin’wana swi ni magidi ya timiliyoni ya tinyeleti. Naswona ku ringanyetiwa leswaku ku ni magidi ya timiliyoni ta swirimele! Swirimele na swona swi hleriwile, swin’wana swa swona (swi nga ri swingani swa swona ku ya eka magidi yo hlayanyana) swi hlanganisiwe swin’we swi va ntlawa wa swirimele. Naswona mintlawa ya tinyeleti ku anakanyiwa leswaku yi hleriwe hi swiyenge leswikulu swinene leswi vitaniwaka mintlawa leyikulu ya tinyeleti.—Pisalema 19:1; Esaya 40:25, 26.
4, 5. Nyika swikombiso swa ku hleleka exikarhi ka swilo leswi hanyaka emisaveni.
4 Nhleleko lowunene ngopfu wa swivumbiwa swa Xikwembu wu vonaka hinkwako, ku nga ri ematilweni lama vonakaka ntsena kambe ni le misaveni, hi vunyingi bya swilo swa yona leswi hanyaka. Malunghana ni hinkwaswo leswi, Paul Davies, profesa wa sayense ya swilo swa ntumbuluko, u tsale leswaku vakambisisi va “hlamarisiwa” hi “vukulu ni nhleleko lowu rharhanganeke wa misava hi yoxe.”—Pisalema 104:24.
5 Languta swikombiso swi nga ri swingani swa “nhleleko lowu rharhanganeke” lowu kumekaka eswilweni leswi hanyaka. Muhandzuri wa fambiselo ra misiha Joseph Evans u vule leswi hi byongo bya munhu ni longo: “Ntiyiso wa nhleleko lowukulu lowu nga kona a swi olovi ku wu twisisa.” Malunghana ni sele leyitsongo ngopfu leyi hanyaka, mutivi wa swiborisi H. J. Shaughnessy u te: “Ku rharhangana ni nhleleko wo saseka wa ntivo-vutomi wa swilo leswitsongo ngopfu swa vutomi swi yime hi ndlela leyi hlamarisaka lerova ku tikomba ku ri xiphemu xa fambiselo leri simekiweke hi Xikwembu.” Naswona mutivi wa timolekhuli Michael Denton u vule leswi landzelaka hi mfungho wa xitekela (DNA) wa le ndzeni ka sele: “Wu ni vuswikoti lerova rungula hinkwaro . . . leri lavekaka ku kombisa xivumbeko xa tinxaka ta swivumbiwa leswi tshameke swi hanya eka pulanete leyi . . . ri nga nghenisiwa exilepulanini kambe ku tlhela ku sala ndhawu ya rungula leri nga ebukwini yin’wana ni yin’wana leyi tshameke yi tsariwa.”—Vona Pisalema 139:16.
6, 7. Hi wihi nhleleko lowu vonakaka exikarhi ka swivumbiwa swa moya, naswona swi kombisa ku tlangela Muendli wa swona hi ndlela yihi?
6 Yehovha a nga hleli swivumbiwa swakwe leswi vonakaka ntsena kambe u tlhela a hlela swivumbiwa swakwe swa moya etilweni. Daniyele 7:10 yi hi byela leswaku tintsumi leti fikaka eka nhlayo ya ‘makume ya madzana ya makume ya madzana a ti yime emahlweni ka Yehovha.’ Dzana ra timiliyoni ta swivumbiwa swa moya leswi nga ni matimba swi ri kwalaho, xin’wana ni xin’wana xi averiwe ntirho wa xona lowu faneleke! Swa hlamarisa ku anakanya hi vutshila lebyi lavekaka bya ku hlela tinhlayo to tarisa xisweswo. Hi laha ku faneleke, Bibele yi ri: “Nkhensani Yehova, ṅwina tinṭumi ta yena, le’ti tiyeke matimba, le’ti endlaka ŝileriso ŝa yena hi ku yingisa mpfumawulo wa rito ra yena. Nkhensani Yehova, ṅwina [mavuthu ya tintsumi] ta yena hikwato, le’ti ṅwi tirelaka hi ku endla leŝi a ŝi ranḍaka.”—Pisalema 103:20, 21; Nhlavutelo 5:11.
7 Vona ku hleleka ni ku humelela konghasi ka mintirho ya Muvumbi! A swi hlamarisi leswi swivumbiwa swa moya swa matimba, leswi nga etilweni swi huwelelaka hi ndlela yo kombisa xichavo ni ku titsongahata swi ku: “We [Yehovha], Xikwembu xa hina, u lulameriwile hi ku amukela ku twala, ni ku dzunisiwa, ni matimba, hikuva hi wena Muendli wa swilo hinkwaswo, kutani hi ku rhandza ka wena swi tumbulukile, swi kuma ku hanya.”—Nhlavutelo 4:11.
8. Hi swihi swikombiso leswi kombisaka leswaku Yehovha u hlela malandza yakwe emisaveni?
8 Yehovha nakambe u hlela malandza yakwe emisaveni. Loko a tisa Ndhambhi esikwini ra Nowa hi 2370 B.C.E., Nowa ni van’wana va nkombo va pone Ndhambhi tanihi ndyangu lowu hlelekeke. Eka Riendzo leri tekiweke hi 1513 B.C.E., Yehovha u humese vanhu vakwe va timiliyoni evuhlongeni bya Egipta kutani a va nyika nxaxamelo wa milawu yo hlela timhaka ta vona ta siku na siku ni ta vugandzeri. Naswona endzhakunyana, eTikweni leri Tshembisiweke, makume ya magidi ya vona a ma hleleriwe ntirho wo hlawuleka etempeleni. (1 Tikronika 23:4, 5) Eka lembe-xidzana ro sungula, mavandlha ya Vukreste a ma hleriwe hi nkongomiso wa Xikwembu: “Hi yena ‘loyi a nyikeke vanhu tinyiko’, van’wana ku va vaapostola, van’wana vaprofeta, van’wana ku va vavuri va Evhangeli, van’wana ku va [varisi, NW] ni vadyondzisi. Ntirho wa vona i ku pfuna vahlawuriwa va Xikwembu leswaku va ta kota ku tirhela van’wana.”—Vaefesa 4:11, 12.
Malandza Ya Manguva Lawa Na Wona Ma Hleriwile
9, 10. Xana Yehovha u va hlela njhani vanhu vakwe enkarhini wa hina?
9 Hi laha ku fanaka, Yehovha u hlele malandza yakwe ya manguva lawa leswaku ma endla ntirho wakwe wa siku ra hina hi laha ku humelelaka—ku nga ku chumayela mahungu lamanene ya Mfumo wakwe a nga si herisa mafambiselo lawa ya swilo lama nga riki na mhaka ni Xikwembu. (Matewu 24:14) Xiya leswi katsekaka entirhweni lowu wa misava hinkwayo ni ndlela leyi nhleleko lowunene wu nga wa nkoka ha yona. Timiliyoni ta vavanuna, vavasati ni vana ti leteriwa ku dyondzisa van’wana ntiyiso wa Bibele. Leswaku vuleteri lebyi byi yisiwa emahlweni, ku kandziyisiwa Tibibele to tala ni tibuku leti sekeriweke eBibeleni. Ina, nkandziyiso wun’wana ni un’wana wa Xihondzo xo Rindza sweswi wu kandziyisiwa hi nhlayo yo tlula 16 wa timiliyoni hi tindzimi ta 118, kasi Xalamuka! yi kandziyisiwa hi nhlayo ya kwalomu ka 13 wa timiliyoni hi tindzimi ta 73. Minkandziyiso yo tala yi kandziyisiwa nkarhi wun’we leswaku malandza ya Yehovha ma kuma rungula leri fanaka hi nkarhi wun’we.
10 Ku engetela kwalaho, mavandlha lama tlulaka 73 000 ya Timbhoni ta Yehovha emisaveni hinkwayo ma hleriwile leswaku ma hlangana kun’we nkarhi hinkwawo ma ta dyondza Bibele. (Vaheveru 10:24, 25) Nakambe ku ni magidi ya minhlangano leyikulu—tinhlengeletano ta swifundzha ni mintsombano ya miganga—lembe na lembe. Ku ni ntirho lowukulu wo aka emisaveni hinkwayo wa Tiholo ta Mfumo letintshwa kumbe leti antswisiwaka, Tiholo ta Tinhlengeletano, makaya ya Bethele ni miako yo kandziyisela tibuku ta Bibele. Ku ni swikolo swa vuleteri lebyi engetelekeke bya vadyondzisi va Bibele, tanihi Xikolo xa Bibele xa Gilead xa Watchtower xa varhumiwa ni Xikolo xa Ntirho wa Vuphayona, leswi fambisiwaka ematikweni hinkwawo.
11. Hi byihi vuyelo bya nkarhi lowu taka lebyi nga ta tisiwa hi ku dyondza ku hleleka lokunene sweswi?
11 Mawaku ndlela yo saseka leyi Yehovha a hleleke vanhu vakwe ha yona emisaveni leswaku va ‘hetisisa vutirheli bya vona hi ku helela,’ va ri karhi va pfuniwa hi tintsumi takwe leti tirhaka! (2 Timotiya 4:5; Vaheveru 1:13, 14; Nhlavutelo 14:6) Hi ku letela malandza ya xona hi tindlela ta ku hleleka lokunene sweswi, Xikwembu xi hetisisa swin’wana. Malandza ya xona ma lunghiseleriwa kahle leswaku loko ma pona makumu ya mafambiselo ya sweswi, ma ta va se ma hleleriwe ku sungula vutomi emisaveni leyintshwa. Kutani, hi ndlela leyi hlelekeke ehansi ka nkongomiso wa Yehovha, ma ta sungula ku endla Paradeyisi ya misava hinkwayo. Nakambe ma ta va ma lungheke kahle ku dyondzisa hi swilaveko hinkwaswo swa Xikwembu swa vutomi eka magidi ya timiliyoni ta vanhu lama nga ta pfuxiwa eku feni.—Esaya 11:9; 54:13; Mintirho 24:15; Nhlavutelo 20:12, 13.
Va Hlelekile Naswona Va Ni Ntsako
12, 13. Ha yini hi nga vulaka leswaku Yehovha u lava vanhu vakwe va tsaka?
12 Hambi leswi Yehovha a nga mutirhi la xiyekaka ni muhleri la hlamarisaka, a nga pfumali ku anakanyela, a nga nonon’hwi kumbe ku ka a nga va ehleketeleli van’wana. Ematshan’wini ya sweswo, i Munhu la tlakukeke wa rirhandzu, ni la tsakeke, loyi a lavaka leswaku hi tsaka. Petro wo Sungula 5:7 yi ri: “[U] tikarhatela n’wina.” Nkhathalelo wa yena ni ku navela ka yena leswaku malandza yakwe ma tsaka hi swi vona eka leswi a swi endleleke vanhu. Hi xikombiso, loko Xikwembu xi vumba wanuna ni wansati lava hetisekeke, xi va veke eparadeyisini ya ntsako. (Genesa 1:26-31; 2:8, 9) Xi va nyike xin’wana ni xin’wana lexi a va xi pfumala leswaku va va ni ntsako lowukulu. Kambe sweswo hinkwaswo swi va lahlekerile hikwalaho ko xandzuka. Hikwalaho ka xidyoho xa vona, hi kume ku nga hetiseki ni rifu.—Varhoma 3:23; 5:12.
13 Hambi leswi hi nga hetisekangiki sweswi, hina vanhu hi nga ha wu kuma ntsako eka leswi Xikwembu xi swi endleke. Ku ni swilo swo tala leswi hi nyikaka ntsako—tintshava letikulu; minkova yo xonga, milambu, malwandle lamakulu ni ribuwa ra lwandle; swiluva swa mivalavala ni nun’hwelo lowunene ni swimilana hi mihlovohlovo ya swona; swakudya swo tala swo xawula; ku pela ka dyambu ko saseka loku hi nga kolwiki ku ku hlalela; matilo lama teleke tinyeleti lawa hi tsakelaka ku ma languta ni vusiku; swiharhi hi ku hambana ka swona ni vana va swona lava rhandzekaka ni matlangelo ya vona; vuyimbeleri byo nandziha; ntirho wo tsakisa ni lowu vuyerisaka; vanghana lavanene. Swi le rivaleni leswaku Loyi a hleleke swilo swo tano i munhu la tsakeke loyi a rhandzaka ku tsakisa van’wana.
14. Xana hi kwihi ku ringanisela loku Yehovha a ku lavaka eka hina loko hi ta n’wi tekelela?
14 Xisweswo, ku humelela loku hlelekeke a hi swona ntsena leswi Yehovha a swi lavaka. U lava ni leswaku malandza yakwe ma tsaka, tanihi leswi na yena a tsakeke. A nga lavi leswaku va hlela swilo hi ku hiseka kambe va onha ntsako wa vona. Malandza ya Xikwembu ma fanele ma ringanisela vuswikoti bya ku hlela hi ntsako, hi laha xi endlaka ha kona, hikuva laha moya wa xona wo kwetsima wu nga kona, ku ni ntsako. Hakunene, Vagalatiya 5:22 yi kombisa leswaku mbhandzu wa vumbirhi wa moya lowo kwetsima wa Xikwembu lowu nga evanhwini vakwe i “ku tsaka.”
Rirhandzu Ri Tisa Ntsako
15. Ha yini rirhandzu ri ri ra nkoka swonghasi leswaku hi tsaka?
15 Swa tsakisa swinene ku xiya leswaku Bibele yi ri: “Xikwembu i rirhandzu.” (1 Yohane 4:8, 16) A yi vuli leswaku: “Xikwembu i nhleleko.” Rirhandzu i mfanelo leyikulu ya Xikwembu, naswona ri fanele ri tekeleriwa hi malandza ya xona. Hi yona mhaka leyi mbhandzu wo rhanga wa moya wa Xikwembu eka leyi tsariweke eka Vagalatiya 5:22 ku nga “rirhandzu,” ivi ku landzela “ku tsaka.” Rirhandzu ri tisa ntsako. Loko hi tekelela rirhandzu ra Yehovha loko hi tirhisana ni van’wana, hi kuma ntsako, hikuva vanhu lava nga ni rirhandzu i vanhu lava tsakeke.
16. Xana Yesu u wu kombisise ku yini nkoka wa rirhandzu?
16 Nkoka wo tekelela rirhandzu ra Xikwembu wu kombisiwa kahle etidyondzweni ta Yesu. U te: “Ndzi vula swilo leswi hilaha Tatana a ndzi dyondziseke hakona.” (Yohane 8:28) I yini leswi, ngopfu-ngopfu, Yesu a dyondzisiweke swona, leswi na yena a swi dyondziseke van’wana? I mhaka ya leswaku milawu yimbirhi leyikulu i ku rhandza Xikwembu ni ku rhandza muakelani. (Matewu 22:36-39) Yesu u kombise rirhandzu ro tano. U te: “Ndzi rhandza Tatana,” a ri kombisa hi ku endla ku rhandza ka Xikwembu ku fikela eku feni. Naswona u kombise ku rhandza vanhu hi ku va fela. Muapostola Pawulo u byele Vakreste aEfesa a ku: ‘Kreste u mi rhandzile kutani a tinyiketela hikwalaho ka n’wina.’ (Yohane 14:31; Vaefesa 5:2) Xisweswo, Yesu u byele valandzeri vakwe a ku: “Nawu wa mina hi lowu: Hileswaku mi rhandzana, kukotisa leswi na mina ndzi mi rhandzeke.”—Yohane 15:12, 13.
17. Xana Pawulo u swi kombise njhani leswaku ku komba van’wana rirhandzu i swa nkoka?
17 Pawulo u kombise ndlela leyi rirhandzu leri ra Xikwembu ri nga ra nkoka ha yona hi ku vula a ku: “Hambi ndzi nga vulavula tindzimi ta vanhu ni ta tintsumi, kambe ndzi nga ri na rirhandzu, ndzi fana ni xingelengele lexi rilaka, kumbe swiphambati swa nsimbhi loko swi bananisiwa. Ni loko kumbe ndzi ri ni matimba yo vula Rito, ndzi ri ni ku twisisa swihundla hinkwaswo ni vutivi hinkwabyo, ni loko ndzi ri ni ku pfumela hinkwako, ndzi ko ndzi susa tintshava, kambe ndzi nga ri na rirhandzu, a ndzi nchumu. Hambi ndzi nga teka swilo swa mina hinkwaswo ndzi nyika vanhu, ni loko ndzi nga nyiketa miri wa mina leswaku wu hisiwa, kambe ndzi ri hava rirhandzu, a swi ndzi pfuni nchumu. . . . Ku tiyile swilo swinharhu leswi: Ku pfumela, ni ku langutela, ni rirhandzu; kambe lexikulu ngopfu eka swona i rirhandzu.”—1 Vakorinto 13:1-3, 13.
18. I yini leswi hi nga swi langutelaka eka Yehovha leswi hi nyikaka ntsako?
18 Loko hi tekelela rirhandzu ra Yehovha, hi nga tshemba rirhandzu leri a nga na rona eka hina, hambi loko hi endla swihoxo, hikuva yena i “Šikwembu ša tintŝalo ni v̌unene, le’ši hlwelaka ku kariha, le’ši teleke tintŝalo ni ku ṭhembeka.” (Eksoda 34:6) Loko hi hundzuka hi ku helela loko hi endla swihoxo, Xikwembu a xi swi hlayisi leswi kambe xi hi rivalela hi rirhandzu. (Pisalema 103:1-3) Ina, ‘Yehovha u tele musa wa rirhandzu ni tintswalo.’ (Yakobo 5:11) Ku tiva leswi swi engetela ntsako wa hina.
Ntsako Lowu Pimiweke Sweswi
19, 20. (a) Ha yini ntsako lowu heleleke wu nga kumeki sweswi? (b) Xana Bibele yi swi kombisisa ku yini leswaku hi nga wu kuma ntsako lowu pimiweke enkarhini wa sweswi?
19 Hambi swi ri tano, xana swi nga koteka ku kuma ntsako namuntlha, tanihi leswi hi hanyaka emasikwini ya makumu ya misava leyi teleke vugevenga, madzolonga ni manyala, leyi nga ehansi ka Sathana, laha hi langutaneke ni vuvabyi ni rifu? Ina, a hi nge swi languteli ku kuma ntsako lowu fanaka ni lowu nga ta va kona emisaveni leyintshwa ya Xikwembu, hi laha Rito ra xona ri vhumbhaka ha kona: “Maŝiv̌o, nḍi v̌umba matilo la’mantŝha, ni misav̌a le’yintŝha; timhaka ta khale a ti nga ha ṭunḍukiwi, ti nga ka ti nga ha tlheleri meehleketweni. Kambe hikwalaho ka leŝi nḍi nga ta ŝi v̌umba, ṭakani, mi ṭakisisa hi masiku.”—Esaya 65:17, 18.
20 Leswi malandza ya Xikwembu ma nga swi kumaka sweswi i ntsako lowu pimiweke hikuva ma tiva ku rhandza ka xona naswona ma ni vutivi lebyi kongomeke bya mikateko leyinene leyi nga ta ta ku nga ri khale emisaveni ya xona leyintshwa ya paradeyisi. (Yohane 17:3; Nhlavutelo 21:4) Hi yona mhaka leyi Bibele yi nge: “Oho Yehova wa tinyimpi, ku katekile l’a ku ṭhembaka,” “ku katekile mani na mani l’a tšhav̌aka Yehova, l’a fambaka tindleleni ta yena,” “ku katekile lavo rhula, hikuva va ta dya ndzhaka ya misava.” (Pisalema 84:12; 128:1; Matewu 5:5) Xisweswo, ku nga khathariseki swiyimo leswi nga kona swo nonon’hwa leswi hi faneleke hi langutana na swona, hi nga wu kuma ntsako lowu ringaniseriweke. Hambi loko hi humeleriwa hi swilo swo biha, a hi khomiwi hi gome ku fana ni lava nga n’wi tiviki Yehovha ni lava nga riki na ntshembo wa vutomi lebyi nga heriki.—1 Vatesalonika 4:13.
21. Xana ku tinyiketela ka malandza ya Yehovha ku engetela ntsako wa wona hi ndlela yihi?
21 Malandza ya Yehovha nakambe ma kuma ntsako hikuva ma tirhisa nkarhi, matimba ni rifuwo ra wona ku dyondzisa van’wana ntiyiso wa Bibele, ngopfu-ngopfu vanhu lava ‘kololaka ni ku rila hikwalaho ka manyala hinkwawo’ lama endliwaka emisaveni ya Sathana. (Ezekiyele 9:4) Bibele yi ri: “Ku katekile loyi a anakanyaka šisiwana, hi siku ra khombo, Yehova o ta ṅwi lwela. Yehova o ta ṅwi hlayisa, a v̌a a ṅwi hanyisa; o ta katekisiwa e misav̌eni.” (Pisalema 41:1, 2) Hi laha Yesu a vuleke ha kona, “ku nyika i nkateko lowu tlulaka ku nyikiwa.”—Mintirho 20:35.
22. (a) Malunghana ni ntsako, kombisa ku hambana exikarhi ka malandza ya Xikwembu ni lava nga xi tirheliki. (b) Hi xihi xivangelo xo hlawuleka lexi nga endlaka leswaku hi langutela ku kuma ntsako?
22 Hambi loko malandza ya Xikwembu ma nga ta ka ma nga rindzeli ntsako lowukulu enkarhini wa sweswi, ma nga kuma ntsako lowu lava va nga xi tirheliki Xikwembu va nga wu kumiki. Yehovha u ri: “Maŝiv̌o, malanḍa ya mina ma ta yimbelela hi ku ṭaka ka timbilu ta wona, kambe ṅwina mi ta kolola e ku v̌av̌isekeni ka timbilu ta ṅwina, mi ta huwelela hi ku hela ka timbilu.” (Esaya 65:14) Nakambe, lava tirhelaka Xikwembu va ni xivangelo xo hlawuleka xa ku tsaka sweswi—va ni moya wa xona wo kwetsima lowu “Xikwembu xi wu nyikeke lava va xi yingisaka.” (Mintirho 5:32) Naswona tsundzuka, laha moya wa Xikwembu wu nga kona, ku ni ntsako.—Vagalatiya 5:22.
23. Xana hi ta bula ha yini edyondzweni yerhu leyi landzelaka?
23 Enhlengeletanweni ya malandza ya Xikwembu namuntlha, xiphemu xa nkoka xi endliwa hi “vakulukumba,” vakulu, lava rhangelaka emavandlheni, va hoxa xandla eka ntsako wa vanhu va Yehovha. (Tito 1:5) Xana va fanele va byi languta njhani vutihlamuleri bya vona ni vuxaka bya vona ni vamakwavo va xinuna ni va xisati? Xihloko xerhu lexi landzelaka xi ta bula hi leswi.
A Wu Ta Hlamurisa Ku Yini?
◻ Xana ntumbuluko wu ku tiyisekisa njhani ku hleleka ka Yehovha?
◻ Xana Yehovha u ma hlerise ku yini malandza yakwe enkarhini lowu hundzeke ni wa sweswi?
◻ Hi kwihi ku ringanisela loku Yehovha a ku lavaka eka hina?
◻ Xana rirhandzu i ra nkoka hi ndlela yihi leswaku hi tsaka?
◻ Xana hi nga langutela ntsako wa njhani enkarhini wa hina?
[Laha Xifaniso Xi Humaka Kona eka tluka 10]
Top: Courtesy of ROE/Anglo-Australian Observatory, photograph by David Malin