Ku Risa Ntlhambi Wa Xikwembu Hi Rirhandzu

“Risani ntlhambi wa Xikwembu lowu nge hansi ka n’wina.”—1 PETRO 5:2.

1, 2. Hi yihi mfanelo leyikulu ya Yehovha, naswona yi tikombisa njhani?

EMATSALWENI yo Kwetsima hinkwawo, swi kombisiwa kahle leswaku rirhandzu i mfanelo leyikulu ya Xikwembu. Yohane wo Sungula 4:8 yi ri: “Xikwembu i rirhandzu.” Tanihi leswi rirhandzu ra xona ri kombisiwaka hi mintirho, 1 Petro 5:7 yi vula leswaku Xikwembu “xi tikarhatela n’wina.” EBibeleni ndlela leyi Yehovha a khathalelaka vanhu vakwe ha yona yi fanisiwa ni ndlela leyi murisi la nga ni rirhandzu a khathalelaka tinyimpfu takwe ha yona: “V̌onani, Hosi, Yehova . . . o ta risa ntlhambi wa yena; o ta rola ŝinyimpfana hi mav̌oko, o ta ŝi v̌ukara e rumbini ra yena, o ta fambisa khwaṭi le’ti aṅwisaka.” (Esaya 40:10, 11) Kunene Davhida u fanele a chavelelekile leswi a koteke ku vula a ku: “Yehova i murisi wa mina: nḍi nga ka nḍi nga pfumari ntšhumu”!—Pisalema 23:1.

² Swi fanerile leswi vanhu lava Xikwembu xi va tsakelaka va fanisiwaka ni tinyimpfu eBibeleni, hikuva tinyimpfu ti rhurile, ta titsongahata, ti yingisa murisi wa tona la khathalelaka. Tanihi Murisi wa rirhandzu, Yehovha u va khathalela swinene vanhu vakwe lava kotisaka tinyimpfu. U swi kombisa hi ku va hlayisa hi swilo leswi vonakaka ni ku va kongomisa “emasikwini ya makumu” lama nonon’hwaka ya misava leyi yo biha, ku ya emisaveni yakwe leyintshwa leyi taka.—2 Timotiya 3:1-5, 13; Matewu 6:31-34; 10:28-31; 2 Petro 3:13.

3. Xana mupisalema u yi hlamusele njhani ndlela leyi Yehovha a khathalelaka tinyimpfu takwe ha yona?

³ Xiya nkhathalelo wa Yehovha wa rirhandzu eka tinyimpfu takwe: “Mahlo ya Yehova ma languta la’v̌a lulameke, ni tindlev̌e ta yena ti pfulekela ku huwelela ka v̌ona. . . . V̌a huwelela, kutani Yehova o v̌a yingisa, o v̌a wisisa e mapfalweni hikwawo ya v̌ona. Yehova o kusuhi ni la’v̌a nga ni timbilu le’ti ṭhov̌ekeke, wa ponisa v̌a mimoya le’yi khinyekeke. Makhombo ya l’a lulameke ma tele ngopfu, kambe Yehova o ṅwi humesa ka wona hikwawo.” (Pisalema 34:15-19) Mawaku nchavelelo lowukulu lowu Murisi wa Vuako Hinkwabyo a wu nyikaka vanhu vakwe vo fana ni tinyimpfu!

Xikombiso Xa Murisi Lonene

4. Hi xihi xiphemu xa Yesu eku khathaleleni ka ntlhambi wa Xikwembu?

⁴ Yesu, N’wana wa Xikwembu, u dyondze kahle eka Tata wakwe, hikuva Bibele yi ri Yesu i “Murisi lonene.” (Yohane 10:11-16) Ntirho wakwe wa nkoka entlhambini wa Xikwembu wu vonaka eka Nhlavutelo ndzima 7. Eka ndzimana 9, malandza ya Xikwembu ya siku ra hina ma vitaniwa “ntshungu lowukulu wa vanhu . . . [lowu humaka] ematikweni hinkwawo, ni le tinxakeni hinkwato, [wu] ri [wa] swivongo hinkwaswo ni [wa] tindzimi hinkwato.” Kutani ndzimana 17 yi ri: “Xinyimpfana [Yesu] . . . xi ta va murisi wa vona; xi ta va yisa eswihlobyeni swa mati ya vutomi, kutani Xikwembu xi ta sula mihloti hinkwayo emahlweni ya vona.” Yesu u yisa ntlhambi wa Xikwembu ematini ya ntiyiso lama yisaka evuton’wini lebyi nga heriki. (Yohane 17:3) Xiya leswaku Yesu u vitaniwa “Xinyimpfana,” leswi kombisaka timfanelo takwe leti fanaka ni ta nyimpfu, ni ku va xikombiso lexikulu xa ku titsongahata ni ku yingisa Xikwembu.

5. Yesu u titwise ku yini hi vanhu?

⁵ Emisaveni Yesu a a tshama ni vanhu, a vona ni xiyimo xa vona lexi twisaka vusiwana. Xana u endle yini loko a vona maxangu ya vona? “A va twela vusiwana, hikuva a va karhele, va tshamile ehansi, va fana ni tinyimpfu leti nga riki na murisi.” (Matewu 9:36) Tinyimpfu leti nga riki na murisi ta karhateka swinene loko ti hlaseriwa, ku fana ni tinyimpfu leti nga ni varisi lava nga ti hlayisiki. Kambe Yesu a a khathalela swinene hikuva u te: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’win[a] yi ta kuma ku wisa; hikuva joko ra mina ra olova, ni ndzhwalo wa mina wa vevuka.”—Matewu 11:28-30.

6. Yesu u kombise nkhathalelo wihi eka lava karhatekeke?

⁶ Vuprofeta bya Bibele byi vhumbhe leswaku Yesu a a ta khoma vanhu hi rirhandzu: “[Yehovha] o nḍi totile . . . ku horisa la’v̌a nga ni timbilu le’ti v̌av̌isekaka, . . . ku tšhav̌elela hikwav̌o la’v̌a v̌av̌isekaka.” (Esaya 61:1, 2; Luka 4:17-21) Yesu a nga kalanga a honisa swisiwana ni vapfumari. Ematshan’wini ya sweswo, u hetisise Esaya 42:3: “A nga ka a nga ṭhov̌i rihlanga le’ri khinyekeke, a nga ka a nga timi riv̌oninyana le’ri nge ketiketi.” (Ringanisa Matewu 12:17-21.) Lava vavisekeke timbilu a va fana ni tinhlanga leti khinyekeke, va fana ni rivoni leri ngo ketiketi, hi ku pfumala mafurha. Hi ku vona xiyimo xa vona lexi twisaka ku vava, Yesu u va twele vusiwana ivi a va nyika matimba ni ntshembo, a va hanyisa emoyeni ni le mirini.—Matewu 4:23.

7. Xana Yesu u va kongomise kwihi vanhu lava n’wi amukeleke?

⁷ Vanhu lava fanaka ni tinyimpfu va amukele Yesu va ri hi mintshungu. Dyondzo yakwe a yi tsakisa swinene lerova vatirhela-mfumo lava rhumiweke ku ya n’wi khoma va vike leswaku: “A ku si va na munhu ni siku ni rin’we la vulavulaka ku fana ni munhu loyi.” (Yohane 7:46) Ina, varhangeri va vukhongeri va vukanganyisi va vilerile va ku: “Misava hinkwayo yi landza yena”! (Yohane 12:19) Kambe Yesu a nga lavanga ku tikumela xichavo ni ku dzuneka. U kongomise vanhu eka Tata wakwe. U va dyondzise ku tirhela Yehovha hi ku rhandza timfanelo ta Yena leti tsakisaka: “Rhandza [Yehovha] Xikwembu xa wena hi mbilu ya wena hinkwayo, ni moya wa wena hinkwawo, ni matimba ya wena hinkwawo, ni ku anakanya ka wena hinkwako.”—Luka 10:27, 28.

8. Xana ndlela leyi vanhu va Xikwembu va xi yingisaka ha yona yi hambane njhani ni leswi van’wana va endlisaka xiswona eka vafumi va misava?

⁸ Yehovha wa dzunisiwa hikuva vuhosi bya yena bya vuako hinkwabyo byi seketeriwa hi vanhu va yena lava fanaka ni tinyimpfu, hikwalaho ka leswi va n’wi rhandzaka. Va tihlawulela ku n’wi tirhela hikwalaho ka ku tiva timfanelo ta yena leti rhandzekaka. Vona ndlela leyi a hambaneke ha yona ni varhangeri va misava lava vanhu va vona va va yingisaka hi ku va chava, kumbe va ri karhi va gungula, kumbe hi ku susumetiwa hi swilo leswi nga ta pfuna vona! Eka Yehovha kumbe Yesu, a ku nge tshuki ku vuriwe leswi swi vuriweke eka mupapa wa Kereke ya Rhoma Khatoliki: “A a xiximiwa hi vo tala, a chaviwa hi hinkwavo, a nga rhandziwi hi munhu.”—Vicars of Christ—The Dark Side of the Papacy, hi Peter De Rosa.

Varisi Va Tihanyi eIsrayele

9, 10. Hlamusela varhangeri va eIsrayele wa khale ni va lembe-xidzana ro sungula.

⁹ Ku hambana na Yesu, varhangeri va vukhongeri eIsrayele enkarhini wakwe a va nga ti rhandzi tinyimpfu. A va fana ni vafumi va vona vo sungula eIsrayele lava Yehovha a vuleke leswi ha vona: “Khombo e ka v̌arisi v̌a Israel la’v̌a tiphamelaka; a nḍi ku v̌arisi v̌a fanele ku phamela mitlhambi šana? . . . Tinyimpfu le’ti ṭaneke, a mi ti tiyisangi, a mi hanyisanga le’yi v̌abyaka, a mi bohelelangi le’ya mbanga, a mi lanḍangi le’yi tlheleke, ni loko ku ri ku lav̌a le’yi lahlekeke; kambe mi ti fume hi matimba ni ku šanisa.”—Ezekiyele 34:2-4.

¹⁰ Ku fana ni varisi volavo va politiki, varhangeri va vukhongeri va Vayuda va lembe-xidzana ro sungula a va sihalarile. (Luka 11:47-52) Hi xikombiso, Yesu u vulavule hi Muyuda loyi a a tekeriwe swilo swa yena, a biwa, a siyiwa a ri kusuhi ni ku fa endleleni. Muprista wa Muisrayele a ta, kambe loko a vona Muyuda, a papalata a famba hi ndlela yin’wana. Mulevhi a endla sweswo na yena. Kutani loyi a nga riki Muisrayele, Musamariya la solekaka, a ta kutani a n’wi twela vusiwana. A boha timbanga ta yena, a n’wi gadisa xifuwo a n’wi yisa endlwini ya vaendzi, kutani a n’wi tshungula. A hakela n’wini wa yindlu ya vaendzi kutani a tshembisa ku vuya a ta hakela mali leyi engetelekeke loko yi ta laveka.—Luka 10:30-37.

11, 12. (a) Vubihi bya varhangeri va vukhongeri byi nyanyise ku yini enkarhini wa Yesu? (b) Xana Varhoma va hetelele va endle yini eka varhangeri va vukhongeri?

¹¹ Varhangeri va vukhongeri enkarhini wa Yesu a va bihe lerova loko Yesu a pfuxa Lazaro eku feni, vaprista lavakulu ni Vafarisi va hlengelete Sanedri ivi va ku: “Hi ta endla yini xana, leswi munhu loyi [Yesu] a endlaka mahlori layo tala? Loko hi n’wi tshikisa sweswo, hinkwavo va ta pfumela ka yena, kutani Varhoma va ta ta va ta lovisa ndhawu leyi ya hina, ni ku hi heta hi rixaka.” (Yohane 11:47, 48) A va nga ri na mhaka ni swilo leswinene leswi Yesu a swi endleke hi munhu loyi a a file. A va lwela swikhundlha swa vona. “Kutani ku sukela siku rero, [va] boha makungu ya ku dlaya Yesu.”—Yohane 11:53.

¹² Ku tlhandlekela eka vubihi bya vona, kava loko vaprista lavakulu “va boha makungu ya ku dlaya na yena Lazaro; hikuva, hikwalaho ka yena, Vayuda lavo tala a va fularhela vaprista, va pfumela eka Yesu.” (Yohane 12:10, 11) Matshalatshala ya vona ya vutianakanyi ya ku sirhelela swikhundlha swa vona a ma pfunanga nchumu, hikuva Yesu u va byerile a ku: “Muti wa n’wina wu ta sala wu nga ri na munhu.” (Matewu 23:38) Eku hetisekeni ka marito wolawo, erixakeni rolero, Varhoma va fike va teka ‘ndhawu ya vona ni tiko ra vona,’ ivi va va dlaya.

Varisi Lava Nga Ni Rirhandzu eVandlheni Ra Vukreste

13. I mani loyi Yehovha a tshembiseke ku n’wi rhuma leswaku a ta risa ntlhambi wa yena?

¹³ Ematshan’wini ya varisi va tihanyi, va vutianakanyi, Yehovha a a ta tisa Murisi Lonene, Yesu, a ta khathalela ntlhambi wa Yena. Naswona u tshembise ku tisa varisi-ntsongo lava nga ni rirhandzu lava a va ta khathalela tinyimpfu takwe: “Nḍi ta v̌a nyika v̌arisi la’v̌a v̌a risaka; a v̌a nga ha tšhav̌i.” (Yeremiya 23:4) Xisweswo, tanihi le mavandlheni ya Vukreste ya lembe-xidzana ro sungula, ni namuntlha ‘ku vekiwa ka vakulukumba emutini wun’wana ni wun’wana’ ka endliwa. (Tito 1:5) Vakulukumba lava va moya lava fikelelaka timfanelo leti tsariweke eMatsalweni va fanele ku ‘risa ntlhambi wa Xikwembu.’—1 Petro 5:2; 1 Timotiya 3:1-7; Tito 1:7-9.

14, 15. (a) Hi rihi langutelo leri vadyondzisiwa va kumeke swi va tikela ku ri hlakulela? (b) Yesu u endle yini ku va kombisa leswaku vakulu va fanele va va malandza lama titsongahataka?

¹⁴ Loko va khathalela ntlhambi, ‘ku tlula swilo hinkwaswo’ vakulu va fanele va wu ‘rhandza swinene.’ (1 Petro 4:8) Kambe vadyondzisiwa va Yesu, hikwalaho ka leswi a va anakanya ngopfu hi xiyimo ni xikhundlha, va boheke ku dyondza mhaka leyi. Loko manana wa vadyondzisiwa vambirhi a ku ka Yesu: “Tshembisa leswaku vana lavambirhi va mina va ta tshama eMfun’weni wa wena un’wana evokweni ra wena ra xinene, un’wana eka lera ximatsi,” vadyondzisiwa van’wana va hlundzukile. Yesu a ku ka vona: “Tihosi ta matiko ti ma fuma hi ntamu, na vona vakulukumba va ma fuma hi matimba; swi nga tshuki swi va tano exikarhi ka n’wina, kambe un’wana ni un’wana la navelaka ku va lonkulu exikarhi ka n’wina, a a ve tanihi mutirheli wa n’wina; naswona un’wana ni un’wana la navelaka ku va wa le mahlweni exikarhi ka n’wina, a a ve nandza wa n’wina.”—Matewu 20:20-28.

¹⁵ Siku rin’wana, endzhaku ka loko vadyondzisiwa “va kanetan[e] hi ta vukulukumba,” Yesu u vule leswi eka vona: “Loko un’wana a rhandza ku va lowo rhanga, a a ve lowo hetelela eka hinkwavo, a va nandza wa hinkwavo.” (Marka 9:34, 35) Ku titsongahata ni ku tiyimisela ku tirha a swi fanele swi va xiphemu xa vumunhu bya vona. Kambe vadyondzisiwa va hambete va tikeriwa hi mianakanyo yoleyo, hikuva evusikwini bya le mahlweni ka ku fa ka Yesu, exilalelweni xakwe xo hetelela, “ku kanetana” ku humelela exikarhi ka vona mayelana ni leswaku hi wihi lonkulu exikarhi ka vona! Sweswo swi endlekile hambi leswi Yesu a rhangeke a va kombisa ndlela leyi nkulu a faneleke a tirhela ntlhambi ha yona; a a titsongahatile, a va hlambisa milenge. U te: “Loko mina, Hosi ya n’wina ni Mudyondzisi wa n’wina, ndzi mi hlambisile milenge, na n’wina mi ta fanela ku hlambisana milenge, hikuva ndzi mi vekele ntila, leswaku na n’wina mi endlisa leswi ndzi nga endlisa swona eka n’wina.”—Luka 22:24; Yohane 13:14, 15.

16. Hi 1899, hi tihi tinhlamuselo leti Watch Tower yi ti nyikeleke, malunghana ni mfanelo ya nkoka swinene ya vakulu?

¹⁶ Timbhoni ta Yehovha nkarhi hinkwawo ti dyondzisa leswaku vakulu va fanele va endla hi ndlela leyi. Emalembeni lama hundzeke ya kwalomu ka dzana, Watch Tower ya April 1, 1899, yi kombisa marito ya Pawulo eka 1 Vakorinto 13:1-8 ivi yi ku: “Muapostola u kombise kahle leswaku vutivi ni vuswikoti byo vulavula a hi swona swa nkoka, kambe rirhandzu leri nghenaka embilwini ri tlhela ri vonaka endleleni hinkwayo ya vutomi, ni ku kongomisa ni ku fambisa mimiri ya hina, hi rona ra nkoka—ku nga xikombiso xa xiviri xa ku va ni vuxaka ni Xikwembu. . . . Mfungho lowukulu lowu faneleke ku langutiwa eka loyi a amukelekaka tanihi nandza wa kereke, loyi a tirhaka hi swilo swo kwetsima, ku fanele ku va moya wa rirhandzu.” Yi kombise leswaku vanhu lava nga tirhiki hi ku titsongahata ka rirhandzu “i vadyondzisi lava nga ni khombo, naswona hakanyingi va onha ematshan’wini yo lulamisa.”—1 Vakorinto 8:1.

17. Xana Bibele yi ti kandziyisa njhani timfanelo leti vakulu va faneleke va va na tona?

¹⁷ Xisweswo, vakulukumba a va fanelanga va ‘fuma ehenhla ka’ tinyimpfu. (1 Petro 5:3) Ematshan’wini ya sweswo, va fanele ku rhangela hi ku ‘kombisana musa, ni ku twelana vusiwana.’ (Vaefesa 4:32) Pawulo u kandziyise leswi: “Ambalani moya wa tintswalo, ni vunene, ni ku titsongahata, ni ku rhula, ni ku leha mbilu. . . . Kutani ehenhla ka leswi hinkwaswo, ku laveka rirhandzu, ri nga rona leri ri bohaka swilo hinkwaswo swi twanana hi ku hetiseka.”—Vakolosa 3:12-14.

18. (a) Pawulo u veke xikombiso xihi lexinene hi ku tirhisana ni tinyimpfu? (b) Ha yini vakulu va nga fanelanga va honisa swilaveko swa tinyimpfu?

¹⁸ Pawulo u dyondze ku endla leswi, loko a ku: “Hi hanyisene na n’wina hi moya wa musa, kukotisa manana la hlayisaka swinene vana va yena. Hikokwalaho, hi ku navela ngopfu ku mi komba rirhandzu, hi tilunghiserile ku avelana na n’wina ku nga ri ntsena Evhangeli ya Xikwembu, kambe na byona vutomi bya hina, hikuva mi hundzukile varhandziwa va hina lavakulu.” (1 Vatesalonika 2:7, 8) Hi ku pfumelelana ni sweswo, u te: “Mi tiyisa lava helaka ntamu; pfunani lava tsaneke, mi lehisela hinkwavo timbilu.” (1 Vatesalonika 5:14) Ku nga khathariseki leswaku tinyimpfu ti va tisela xiphiqo xa muxaka muni, vakulu va fanele va tsundzuka Swivuriso 21:13: “L’a tisiv̌aka tindlev̌e leŝaku a nga twi mikosi ya šisiwana, o ta rila na yena, kambe a nga ka a nga ṭunḍukiwi hi munhu.”

19. Ha yini vakulu lava nga ni rirhandzu va ri nkateko, naswona tinyimpfu ti angurisa ku yini eka rirhandzu ro tano?

¹⁹ Vakulukumba lava risaka ntlhambi hi rirhandzu i nkateko eka tinyimpfu. Esaya 32:2 yi vhumbhe leswi: “Uṅwana ni uṅwana wa v̌ona o ta kotisa šisirelelo loko moya wu hunga, kukota šitšhav̌elo loko šidzedze ši fika, kukota šinambyana ša mati e tikweni ra dyanḍa, ni nḍuti wa ribye le’ri tlakukeke tikweni le’ri omeke.” Ha tsaka ku tiva leswaku vakulu va hina vo tala namuntlha va fambisana ni nhlamuselo yoleyo leyi phyuphyisaka. Va dyondze ku tirhisa nsinya wa nawu lowu landzelaka: “Mi rhandzana tanihi vamakwavo, mi tlula van’wana hi ku kombana xichavo.” (Varhoma 12:10) Loko vakulu va kombisa rirhandzu ra muxaka lowu ni ku titsongahata, tinyimpfu ti angula hi ku va “xixima swinene hi rirhandzu, hikwalaho ka ntirho wa vona.”—1 Vatesalonika 5:12, 13.

Xixima Matirhiselo Ya Matimba Ya Ku Tihlawulela

20. Ha yini vakulu va fanele va xixima matimba ya ku tihlawulela?

²⁰ Yehovha u vumbe vanhu va ri ni matimba ya ku tihlawulela leswaku va endla swiboho swa vona. Hambi leswi vakulu va faneleke ku laya ni ku tshinya, kambe a va fanelanga va lawula vutomi kumbe ripfumelo ra van’wana. Pawulo u te: “A hi leswaku hina hi fuma ku pfumela ka n’wina, kambe hi tirhisana na n’wina leswaku mi ta kuma ku tsaka, hikuva mi tiyile eku pfumeleni.” (2 Vakorinto 1:24) Ina, “un’wana ni un’wana ú ta rhwala mpingu wa yena.” (Vagalatiya 6:5) Yehovha u hi nyike ntshunxeko lowukulu ehansi ka milawu ni misinya ya milawu ya yena. Xisweswo vakulu va fanele va papalata ku veka milawu etimhakeni leti misinya ya milawu ya Matsalwa yi nga tluriwiki. Naswona va fanele va papalata mboyamelo wihi na wihi wa ku nyika mavonelo ya vona tanihi nawu kumbe va tshika ku rhandza ka vona ku va xihinga loko un’wana a ri ni mavonelo man’wana.—2 Vakorinto 3:17; 1 Petro 2:16.

21. Xana ku nga dyondziwa yini hi langutelo ra Pawulo eka Filemoni?

²¹ Xiya ndlela leyi Pawulo, loko a ha ri ekhotsweni eRhoma, a hanyisaneke ha yona na Filemoni, Mukreste loyi a ri ni nandza eKolosa le Asia Minor. Nandza wa Filemoni ku nga Onesima u balekele eRhoma, a hundzuka Mukreste, naswona a a pfuna Pawulo. Pawulo u tsalele Filemoni a ku: “A ndzi ta va ndzi tsakile ku n’wi khoma a tshama na mina kwala, leswaku a ta ndzi tirhela, a siva wena enkarhini wa ku bohiwa ka mina ekhotsweni hikwalaho ka Evhangeli. Kambe a ndzi lavanga ku endla nchumu ehandle ka mpfumelelo wa wena, leswaku tintswalo ta wena ti nga kombiwi hi ku sindzisiwa, kambe ku ri hi ku titwa ka wena.” (Filemoni 13, 14) Pawulo u tlherise Onesima, a kombela Filemoni leswaku a hanyisana na yena tanihi makwavo wa Mukreste. Pawulo a a swi tiva leswaku ntlhambi a wu nga ri wa yena; a wu ri wa Xikwembu. A a nga ri n’wini wa wona kambe a a ri nandza wa wona. Pawulo a nga n’wi sindzisanga Filemoni; u xixime matimba yakwe ya ku tihlawulela.

22. (a) Xana vakulu va fanele va xi langutisisa ku yini xikhundlha xa vona? (b) Xana Yehovha u vumba nhlengeletano ya muxaka muni?

²² Tanihi leswi nhlengeletano ya Xikwembu yi kulaka, vakulu vo tala va vekiwa. Vona, swin’we ni vakulu lava nga ni ntokoto swinene, va fanele va twisisa leswaku xiyimo xa vona xi lava ku tirha hi ku titsongahata. Hi ndlela leyi, tanihi leswi Xikwembu xi yisaka nhlengeletano ya xona emisaveni leyintshwa, yi ta hambeta yi kula hi laha xi lavaka ha kona—yi ta hleleka kahle kambe a yi nge rivali rirhandzu ni ntwela-vusiwana, leswaku yi humelela. Xisweswo, nhlengeletano ya xona yi ta ya yi tsakeriwa swinene hi lava fanaka ni tinyimpfu, lava va nga ta vona endzeni ka yona leswaku “etimhakeni hinkwato, Xikwembu xi le ntirhweni wa ku tisa leswinene eka lava va xi rhandzaka.” Sweswo swi fanele ku languteriwa enhlengeletanweni leyi sekeriweke erirhandzwini, hikuva “rirhandzu a ri heli.”—Varhoma 8:28; 1 Vakorinto 13:8.

A Wu Ta Hlamurisa Ku Yini?

◻ Xana Bibele yi wu hlamusela njhani nkhathalelo wa Yehovha evanhwini vakwe?

◻ Hi xihi xiphemu lexi endliwaka hi Yesu eku khathaleleni ka ntlhambi wa Xikwembu?

◻ Hi yihi mfanelo leyikulu leyi vakulu va faneleke va va na yona?

◻ Ha yini vakulu va fanele va xiya matimba ya ku tihlawulela ya tinyimpfu?

[Xifaniso lexi nga eka tluka 16]

Yesu, “murisi lonene,” u kombise ntwela-vusiwana

[Swifaniso leswi nga eka tluka 17]

Varhangeri vo biha va vukhongeri va endle makungu ya ku dlaya Yesu