Ku Xaniseka Ka Vanhu—Xana Ku Ta Hela Ke?

SWIVONO leswi chavisaka endzhaku ko buluka ka bomo endhawini ya mabindzu leyi talaka vanhu le Sarajevo; ku dlayeteriwa ka vanhu le Rwanda, van’wana va siyiwa va ri hava swirho swin’wana swa miri; vana lava sikaka va lwetana hi swakudya le Somalia; mindyangu leyi hlanganeke tinhloko yi kambisisa leswaku yi lahlekeriwe ku fikela kwihi endzhaku ka ku tsekatseka ka misava le Los Angeles; vanhu lava hlaseriweke hi ndhambhi va siyiwa va ri hava vutumbelo le Bangladesh. Siku na siku hi vona swivono swo tano swa ku xaniseka ka vanhu eka TV kumbe timagazini ni maphepha-hungu.

Vuyelo lebyi vavisaka bya ku xaniseka ka vanhu hi leswi ku vangelaka van’wana ku heleriwa hi ripfumelo eka Xikwembu. Hi ku ya hi nhlamuselo leyi kandziyisiweke hi ntlawa wa vukhongeri bya Vayuda le United States, “vukona bya vuhomboloki minkarhi hinkwayo byi ve xihinga lexikulu xa ripfumelo.” Vatsari va hlamusela hi ta ku fa ka vanhu etikampeni ta nxaniso ta Manazi to tanihi Auschwitz, na ku dlayiwa hi tibomo to tanihi leyi bulukeleke ehenhla ka Hiroshima. Vatsari va ri: “Mhaka ya leswaku Xikwembu xo lulama ni xa matimba xi nga swi pfumelerisa ku yini ku koxiwa ka vutomi bya vanhu vo tala swonghasi lava nga riki na nandzu, yi karhata ripfalo ra munhu wa vukhongeri, naswona a yi twisiseki nikatsongo.”

Lexi khomisaka gome, swiviko swa nkarhi na nkarhi swa timhaka leti tshovaka timbilu swi nga tlanyata minsusumeto ya vanhu. Vo tala a va na mhaka ni ku xaniseka ka vanhu van’wana, ntsendze loko swi nga khumbi vanghana ni maxaka ya vona.

Hambi swi ri tano, leswi hi kotaka ku twela van’wana vusiwana, hambi ku ri varhandziwa va hina ntsena, swi fanele swi vula swo karhi hi Muvumbi wa hina. Bibele yi vula leswaku munhu u vumbiwe ‘hi xifaniso xa Xikwembu,’ naswona ‘u fana na xona.’ (Genesa 1:26, 27) Leswi a swi vuli leswaku vanhu va languteka ku fana ni Xikwembu. A swi tano, hikuva Yesu Kreste u hlamusele leswaku “Xikwembu i moya,” naswona ‘moya a wu na nyama ni marhambu.’ (Yohane 4:24; Luka 24:39) Ku endliwa ka hina hi fana ni Xikwembu swi vula vuswikoti bya hina byo kombisa timfanelo leti fanaka ni ta Xikwembu. Hikwalaho, tanihi leswi vanhu lava hanyeke kahle va twelaka lava xanisekaka vusiwana, hi fanele hi gimeta hi leswaku Muvumbi wa munhu, Yehovha Xikwembu, u ni ntwela-vusiwana, kutani wa va twela swinene vanhu vakwe lava a va vumbeke loko va xaniseka.—Ringanisa Luka 11:13.

Ndlela yin’wana leyi Xikwembu xi kombiseke ntwela-vusiwana wa xona ha yona i ku lunghiselela vanhu nhlamuselo leyi tsariweke leyi kombisaka xivangelo xa ku xaniseka ka vanhu. Leswi xi swi endle hi ku tirhisa Rito ra xona, Bibele. Bibele yi swi kombisa kahle leswaku Xikwembu xi vumbe munhu leswaku a tsakela vutomi, hayi leswaku a xaniseka. (Genesa 2:7-9) Nakambe yi kombisa leswaku vanhu vo sungula hi vona va tivangeleke ku xaniseka hi ku fularhela nawu wo lulama wa Xikwembu.—Deteronoma 32:4, 5; Varhoma 5:12.

Hambi swi ri tano, Xikwembu xa ha va twela vusiwana vanhu lava xanisekaka. Leswi swi kombisiwa kahle hi xitshembiso xa xona xo herisa ku xaniseka ka vanhu. “Vonani, vuako bya Xikwembu byi le vanhwini. Xi ta aka na vona, kutani va ta va vanhu va xona; Xikwembu hi xoxe xi ta va na vona, xi va Xikwembu xa vona. Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:3, 4; nakambe vona Esaya 25:8; 65:17-25; Varhoma 8:19-21.

Switshembiso leswi swo hlamarisa swi kombisa leswaku Xikwembu xa khumbeka hi ku xaniseka ka vanhu, naswona xi tiyimisele ku ku herisa. Kambe kahle-kahle ku xaniseka ka vanhu ku vangiwe hi yini, naswona ha yini Xikwembu xi ku tshike ku ya emahlweni ku ta fikela esikwini ra hina?

[Laha Xifaniso Xi Humaka Kona eka tluka 2]

Cover and page 32: Alexandra Boulat/Sipa Press

[Laha Xifaniso Xi Humaka Kona eka tluka 3]

Kevin Frayer/Sipa Press