Rhulani Ku Vilela Ka N’wina Hinkwako Eka Yehovha
“Titsongahateni ehansi ka voko ra matimba ra Xikwembu, leswaku hi nkarhi wa kona xi ta mi tlakusa. Rhulani ku karhateka hinkwako ka n’wina eka xona, hikuva xi tikarhatela n’wina.”—1 PETRO 5:6, 7.
1. Xana ku vilela ku nga hi khumba njhani, naswona leswi swi nga kombisiwa hi ndlela yihi?
KU VILELA ku nga khumba vutomi bya hina swinene. Ku nga fanisiwa ni pongonyana leri minkarhi yin’wana ri nga kavanyetaka miloti yo saseka leyi twiwaka eka xiya-ni-moya. Loko magandlanti ya xiya-ni-moya ma nga kavanyetiwi, u nga tiphina hi miloti yo tsakisa naswona swi nga ku rhulisa moya. Hambi swi ri tano, pongonyana leri tlhavaka ri nga kavanyeta hambi miloti leyo nandziha swinene, ri hi hlundzukisa ni ku hi nyangatsa. Ku vilela na kona ku nga hi vangela swilo swo tano eku rhuleni ka moya wa hina. Ku nga hi tikela lerova hi nga koti ku endla swilo leswi nga swa nkoka. I ntiyiso, “ku [vilela, NW] loko ku le mbilwini ya munhu, ka ṅwi tov̌a.”—Swivuriso 12:25.
2. Yesu Kreste u te yini mayelana ni “ku vilela hi swa vutomi”?
2 Yesu Kreste u vulavule hi khombo ra ku khunguvanyisiwa hi ku vilela lokukulu. Evuprofeteni byakwe mayelana ni masiku ya makumu, u khutazile: “Tivoneleni leswaku timbilu ta n’wina ti nga tikeriwi hi makolo ni ku pyopyiwa, ni ku vilela hi swa vutomi lebyi, na swona tivoneleni leswaku siku rero ri nga mi tshuketi. Hikuva kukotisa xirimbani, ri ta wela hinkwavo lava akeke emisaveni hinkwayo. Hitekani ke, mi khongela minkarhi hinkwayo, leswaku mi kuma matimba ya ku pona eka swilo hinkwaswo leswi swi nga ta humelela, ni ku yima mi tiyile emahlweni ka N’wana-wa-Munhu.” (Luka 21:34-36) Tanihi leswi ku dya ku tlula mpimo ni ku nwa ku tlurisa swi nga tsanisaka mianakanyo, swi tano ni ku tikeriwa hi “ku vilela hi swa vutomi,” swi nga hi endla hi lahlekeriwa hi langutelo ra xiviri ra mianakanyo, ivi ku va ni vuyelo byo biha.
Leswi Ku Vilela Ku Nga Swona
3. Xana “ku vilela” ku hlamuseriwe hi ndlela yini, naswona swivangelo swa kona swin’wana hi swihi?
3 “Ku vilela” ku hlamuseriwa tanihi “ku vaviseka kumbe ku karhateka emianakanyweni, leswi [hakanyingi] swi vangiwaka hi khombo leri tshinelaka kumbe leri u ehleketaka leswaku ri ta humelela.” I “ku khumbeka kumbe ku khathalela nchumu hi ndlela leyi ku chavisaka” xikan’we ni “ku karhateka loku hundzaka mpimo kumbe loku hundzeletekeke ni ku chava loku hakanyingi ku vonakaka hi swikombiso swa miri (tanihi ku dzuka nyuku, ntshikilelo, ni ku tlakuka ka mabelo ya mbilu), leswi vangiwaka hi ku kanakana muxaka wa khombo ra kona ni loko ri ri ra xiviri, ni hi ku kanakana vuswikoti bya wena n’wini byo kota ku langutana na rona.” (Webster’s Ninth New Collegiate Dictionary) Kutani ku vilela ku nga va xiphiqo lexi rharhanganeke. Swivangelo swa kona leswo tala swi katsa vuvabyi, ku dyuhala ku chava vugevenga, ku heleriwa hi ntirho, ni ku khumbeka hi vuhlayiseki bya ndyangu wa wena.
4. (a) I yini lexi hi faneleke ku xi tsundzuka hi vanhu ni ku vilela ka vona? (b) Loko hi vilela hi nga endla yini?
4 Entiyisweni, ku ni mimpimo ya ku vilela, ku kotisa leswi ku nga ni swiyimo kumbe swilo swo hambana-hambana leswi nga ku vangaka. Vanhu a va khumbiwi hi swilo hi ndlela yo fana. Hikwalaho, hi fanele hi xiya leswaku hambi loko nchumu wo karhi wu nga hi karhati, wu nga ha va vilerisa ku tlurisa van’wana vagandzeri-kulorhi va Yehovha. Xana hi nga endla yini loko ku vilela ku fike eyinhleni leyi hi nga ha kotiki ku yisa nyingiso kahle eka mintiyiso leyo nandziha ni leyi tsakisaka ya Rito ra Xikwembu? Ku vuriwa yini hi loko ku vilela ku hi xanisa lerova hi nga ha koti ku langutana ni timhaka leti khumbaka vuhosi bya Yehovha ni vutshembeki bya Vukreste? Swi nga ha endlaka hi nga swi koti ku hundzula swiyimo swa hina. Ematshan’wini ya sweswo, hi fanele hi languta tinhla ta Matsalwa leti nga ta hi pfuna ku langutana ni ku vilela loku nga fanelangiki loku vangiwaka hi swiphiqo swa vutomi leswi tlhavaka.
Mpfuno Wu Kona
5. Hi nga endla leswi vuriwaka hi Pisalema 55:22 hi ndlela yihi?
5 Loko Vakreste va lava mpfuno wa moya naswona va tikeriwa hi mivilelo, va nga chaveleriwa hi Rito ra Xikwembu. Ri nyikela nkongomiso lowu tshembekaka naswona ri hi nyika switiyisekiso swo tala swa leswaku a hi lahliwanga tanihi malandza lama tshembekaka ya Yehovha. Hi xikombiso, mupisalema Davhida u yimbelerile: “Nyiketa Yehova e timhaka ta wena, o ta ku seketela; a nga ka a nga pfumeli ni siku riṅwe l’a lulameke a ṭekaṭekisiwa.” (Pisalema 55:22) Xana hi nga fambisana njhani ni marito lawa? Hi ku rhulela mivilelo, ku karhateka, minchavo ni tingana ta hina hinkwato eka Tata wa hina la hi rhandzaka wa le tilweni. Leswi swi ta hi pfuna ku titwa hi sirhelelekile naswona hi rhurile embilwini.
6. Hi ku ya hi Vafilipiya 4:6, 7, xikhongelo xi nga hi endlela yini?
6 Xikhongelo lexi humaka embilwini xa nkarhi na nkarhi i xa nkoka leswaku hi rhulela Yehovha mindzhwalo ya hina, ku katsa ni ku vilela ka hina hinkwako. Leswi swi ta hi endla hi va ni ku rhula ka le ndzeni, hikuva muapostola Pawulo u tsarile: “Mi nga vileli ha nchumu; kambe etimhakeni hinkwato, khongelani, mi tivisa Xikwembu leswi mi swi pfumalaka, mi kombela mi ri karhi mi nkhensa; kutani ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.” (Vafilipiya 4:6, 7) “Ku rhula ka Xikwembu” loku nga ringanisiwiki i ku tshamiseka ka mianakanyo loku nga tolovelekangiki loku malandza ya Yehovha lama tinyiketeleke ma tiphinaka ha kona hambi loko ma langutane ni swiyimo swo tika swinene. Ku tisiwa hi vuxaka bya le kusuhi bya munhu hi yexe ni Xikwembu. Loko hi khongelela moya lowo kwetsima ivi hi wu pfumelela wu hi fambisa, a hi rhuliwi swiphiqo swa hina hinkwaswo swa vutomi, kambe hi kuma ni mbhandzu wa moya wa ku rhula. (Luka 11:13; Vagalatiya 5:22, 23) A hi vileli ngopfu, hikuva ha swi tiva leswaku Yehovha u endla leswaku vanhu vakwe hinkwavo lavo tshembeka ‘va tshama va hlayisekile’ naswona a nge hi tshiki hi humelela hi nchumu lowu nga ta hi vavisa vutomi hinkwabyo.—Pisalema 4:8.
7. Vakulu va Vakreste va nga endla yini ku hi pfuna ku langutana ni ku vilela?
7 Kambe ku vuriwa yini hi loko mivilelo ya hina yi nga heli, hambi loko hi anakanyisisa hi Matsalwa naswona hi hambeta hi khongela? (Varhoma 12:12) Vakulu lava hlawuriweke evandlheni na vona i lunghiselelo ra Yehovha ra ku hi pfuna hi tlhelo ra moya. Va nga hi chavelela ni ku hi pfuna hi ku tirhisa Rito ra Xikwembu ni hi ku khongela swin’we na hina ni ku hi khongelela. (Yakobo 5:13-16) Muapostola Petro u khutaze vakulu-kulobye leswaku va risa ntlhambi wa Xikwembu hi ku swi rhandza, hi ku hiseka, ni hi ku veka xikombiso. (1 Petro 5:1-4) Vavanuna lava va tsakela vuhlayiseki bya hina swinene, naswona va lava ku hi pfuna. Entiyisweni, leswaku hi ta vuyeriwa swinene hi mpfuno wa vakulu ni leswaku hi va ni rihanyo lerinene hi tlhelo ra moya evandlheni, hinkwerhu hi fanele ku tirhisa xitsundzuxo xa Petro lexi nge: “N’wina lavantshwa: Titsongahateni eka lavakulu. Hinkwenu ambalani ku titsongahata, mi tiveka ehansi, van’wana eka van’wana, hikuva va khale va te: ‘Xikwembu xi alela lava tikurisaka, kambe xi tsetselela lava titsongahataka.’”—1 Petro 5:5.
8, 9. I nchavelelo wihi lowu hi nga wu kumaka eka 1 Petro 5:6-11?
8 Petro u engeterile: “Hikokwalaho, titsongahateni ehansi ka voko ra matimba ra Xikwembu, leswaku hi nkarhi wa kona xi ta mi tlakusa. Rhulani ku karhateka hinkwako ka n’wina eka xona, hikuva xi tikarhatela n’wina. Tikhomeni mi hiteka. Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka. N’wi aleleni, mi tiya eku pfumeleni ka n’wina, hi ku tiva leswaku vamakwenu emisaveni hinkwayo va hlangana ni maxangu yo fana ni lawa mi nga na wona. Kutani endzhaku ka loko mi twisiwile ku vava nkarhinyana, Xikwembu xa tintswalo hinkwato lexi xi mi vitaneke ku nghena eku kwetsimeni ka xona loku nga heriki, eka Kriste, xona hi xiviri xa xona xi ta mi pfuxa, xi mi aka ni ku mi tiyisa, mi nga tsekatseki. Matimba a ma ve eka xona hi masiku ni masiku. Amen.”—1 Petro 5:6-11.
9 Mawaku ndlela leyi swi chavelelaka ha yona loko hi xiya leswaku hi nga ‘rhulela ku vilela ka hina hinkwako eka Xikwembu hikuva xa hi khathalela’! Naswona loko ku vilela ka hina kun’wana ku vangiwa hi loko Diyavulosi a ringeta ku herisa vuxaka bya hina na Yehovha hi ku hi tisela nxaniso ni ku karhateka kun’wana, xana a swi tsakisi ku tiva leswaku swilo swi ta hetelela swi va lulamerile vahlayisi va vutshembeki? Ina, loko se hi xanisekilenyana, Xikwembu xa tintswalo hinkwato leti nga hi fanelangiki xi ta hi pfuxa, kutani xi hi endla hi tiya naswona hi va ni matimba.
10. Petro wo Sungula 5:6, 7 yi vulavula hi timfanelo tihi tinharhu leti nga pfunaka ku hunguta ku vilela?
10 Petro wo Sungula 5:6, 7 yi vulavula hi timfanelo tinharhu leti nga hi pfunaka ku langutana ni ku vilela. Yin’wana i ku titsongahata, kumbe ‘ku tiveka ehansi.’ Ndzimana 6 yi hela hi xiga lexi nge “hi nkarhi wa kona,” leswi kombaka xilaveko xa ku lehisa mbilu. Ndzimana 7 yi kombisa leswaku hi ku tshembeka hi nga rhulela mivilelo ya hina hinkwayo eka Xikwembu ‘hikuva xa hi khathalela,’ naswona marito lawaya ma hi khutaza ku tshembela hi laha ku heleleke eka Yehovha. Kutani ke a hi voneni ndlela leyi ku titsongahata, ku lehisa mbilu, ni ku tshembela eka Xikwembu hi laha ku heleleke swi nga hi pfunaka ha kona ku hunguta mivilelo.
Ndlela Leyi Ku Titsongahata Ku Nga Pfunaka Ha Yona
11. Ku titsongahata ku nga hi pfuna hi langutana ni ku vilela hi ndlela yihi?
11 Loko hi titsongahata, hi ta pfumela leswaku mianakanyo ya Xikwembu yi tlakuke ngopfu eka ya hina. (Esaya 55:8, 9) Ku titsongahata ku hi pfuna ku xiya mpimo lowu vuswikoti bya hina bya ku anakanya byi nga byitsongo ha yona loko byi ringanisiwa ni langutelo ra Yehovha ra mianakanyo leri nga tsandziwiki hi nchumu. U vona swilo leswi hina hi nga swi xiyiki, hi laha swi kombisiweke ha kona emhakeni ya Yobo, wanuna wo lulama. (Yobo 1:7-12; 2:1-6) Loko hi titsongahata “ehansi ka voko ra matimba ra Xikwembu,” hi kombisa ku pfumela xiyimo xa hina xa le hansi loko xi pimanisiwa ni Mufumi la Tlakukeke. Endzhaku, leswi swi hi pfuna ku langutana ni swiyimo leswi a swi pfumelelaka. Timbilu ta hina ti nga ha navela ku ntshunxiwa hi nkarhi wolowo, kambe tanihi leswi timfanelo ta Yehovha ti hetisekeke, u wu tiva kahle nkarhi lowu a faneleke ku hi endlela xo karhi ha wona ni maendlelo ya kona. Kutani, tanihi vana lavatsongo, hi ku titsongahata a hi khomeleleni voko ra Yehovha ra matimba, hi ri karhi hi tshemba leswaku u ta hi pfuna ku langutana ni mivilelo ya hina.—Esaya 41:8-13.
12. Loko hi ku titsongahata hi tirhisa marito ya Vaheveru 13:5, xana ku vilerisiwa hi nsirhelelo wa swilo leswi vonakaka ku ta va njhani?
12 Ku titsongahata ku katsa ku pfumela ku tirhisa xitsundzuxo lexi humaka eRitweni ra Xikwembu, lexi hakanyingi xi nga hungutaka ku vilela. Hi xikombiso, loko ku vilela ka hina ku vangiwe hi ku katseka swinene eku laveni ka swilo leswi vonakaka, swi nga ha va swinene eka hina loko hi tsundzuka xitsundzuxo xa Pawulo lexi nge: “Mi nga fumiwi hi mali eku hanyeni ka n’wina, kutani mi kolwa hi leswi mi nga na swona, hikuva Xikwembu xi te: ‘Ndzi nga ka ndzi nga ku tshiki, kumbe ku ku cukumeta, ni siku ni rin’we.’” (Vaheveru 13:5) Hi ku landzela xitsundzuxo xo tano hi ku titsongahata, vo tala va tintshunxile eku vileleni lokukulu mayelana ni nsirhelelo wa swilo leswi vonakaka. Hambi leswi xiyimo xa vona xa timali xi nga ha vaka xi nga antswanga, a swa ha lawuli mianakanyo ya vona lerova va vaviseka hi tlhelo ra moya.
Mpfuno Wa Ku Lehisa Mbilu
13, 14. (a) Loko hi vulavula hi ku tiyisela hi ku lehisa mbilu, xana wanuna la vuriwaka Yobo u hi vekele xikombiso xihi? (b) Ku rindzela Yehovha hi ku lehisa mbilu swi nga hi endlela yini?
13 Xiga lexi nge “hi nkarhi wa kona” eka 1 Petro 5:6 xi kombisa xilaveko xo tiyisela hi ku lehisa mbilu. Minkarhi yin’wana xiphiqo xi nga koka nkarhi wo leha, kutani sweswo swi nga engetela ku vilela ka hina. Hi fanele hi veka timhaka emavokweni ya Yehovha, ngopfu-ngopfu eka xiyimo xo tano. Mudyondzisiwa Yakobo u tsarile: “Lava hi vulaka leswaku va katekile, hi lava va tiyiseleke. Mi twile ta ku tiyisela ka Yobo, nakona mi vonile leswi Hosi a yi kongomile swona, ni hilaha Hosi yi taleke musa ni tintswalo hakona.” (Yakobo 5:11) Yobo u weriwe hi khombo hi tlhelo ra ikhonomi, a feriwa hi khume ra vana, a xanisiwa hi vuvabyi lebyi nyenyetsaka, naswona vachaveleri va mavunwa va n’wi sorile hi xihoxo. Exiyin’weni xo tano a swo boha leswaku a vilelanyana.
14 Hi ndlela yo karhi, Yobo u ve xikombiso xa ku tiyisela hi ku lehisa mbilu. Loko hi ringiwa swinene eripfumelweni, hi nga ha boheka ku rindzela ku ntshunxiwa, hi laha a endleke ha kona. Kambe Xikwembu xi n’wi pfunile Yobo, eku heteleleni xi n’wi ntshunxe eku xanisekeni ka yena ivi xi n’wi hakela swinene. (Yobo 42:10-17) Ku yimela Yehovha hi ku lehisa mbilu swi kurisa ku tiyisela ka hina naswona swi kombisa ku enta ka ku tinyiketela ka hina eka yena.—Yakobo 1:2-4.
Tshemba Yehovha
15. Ha yini hi fanele hi tshembela hi ku helela eka Yehovha?
15 Petro u khutaze vapfumeri-kulobye ku ‘rhulela ku vilela ka vona hinkwako eka Xikwembu hikuva xa va khathalela.’ (1 Petro 5:7) Kutani hi nga swi kota naswona hi fanele hi tshembela hi laha ku heleleke eka Yehovha. Swivuriso 3:5, 6 yi ri: “Ṭhemba Yehova hi mbilu ya wena hikwayo, u nga tiṭhembi ku tlhariha ka wena. U ṅwi nghenisa e makungwini ya wena hikwawo, o ta lulamisa tindlela ta wena.” Hikwalaho ka swilo leswi humeleleke enkarhini lowu hundzeke, van’wana lava nga ni mivilelo yo tala swa va nonon’hwela ku tshemba vanhu van’wana. Kambe handle ko kanakana hi nga tshemba Muvumbi wa hina, xona Xihlovo ni Muhlayisi wa vutomi. Hambi loko hi nga titshembi emhakeni yo karhi, minkarhi hinkwayo hi nga tshembela eka Yehovha leswaku a hi humesa emiringweni.—Pisalema 34:18, 19; 36:9; 56:3, 4.
16. Xana Yesu Kreste u te yini mayelana ni ku vilerisiwa hi swilo leswi vonakaka?
16 Ku tshemba Xikwembu swi katsa ku yingisa N’wana wa xona, Yesu Kreste, loyi a dyondziseke leswi a swi dyondzeke eka Tata wa yena. (Yohane 7:16) Yesu u khutaze vadyondzisiwa vakwe ku ‘hlengeleta rifuwo etilweni’ hi ku tirhela Yehovha. Kambe ku vuriwa yini hi swilaveko swa nyama ku katsa swakudya, swiambalo ni vutumbelo? Yesu u tsundzuxile, “Mi nga tshuki mi vilela.” U kombise leswaku Xikwembu xi phamela tinyanyana. Xi ambexa swiluva swi saseka. Xana malandza ya Xikwembu lama nga vanhu a ma antswi swinene ku tlula leswi? Entiyisweni ma antswa. Hikwalaho, Yesu u khutazile: “Rhangani mi tilavela Mfumo wa yena ni ku lulama ka yena, kutani sweswo hinkwaswo mi ta engeteleriwa swona.” Yesu u ye emahlweni: “Hikwalaho ke mi nga tshuki mi vilela hi swa mundzuku, hikuva mundzuku wu ta tikarhatela swa wona.” (Matewu 6:20, 25-34) Ina, ha swi lava swakudya, swakunwa, swiambalo ni vutshamo, kambe loko hi tshemba Yehovha, a hi nge vilerisiwi hi swilo leswi hi ndlela leyi nga fanelangiki.
17. Ku rhangisa Mfumo ku sungula hi nga swi hlamuserisa ku yini?
17 Leswaku hi lava Mfumo ku sungula, hi fanele hi tshemba Xikwembu naswona leswi hi swi rhangisaka hi swi veka endhawini ya swona. Munyuperi a nga ha nyupela ematini a nga ri na muchini wo hefemula a lava hanti leri nga ni perla endzeni. Leyi hi yona ntsena ndlela yo wundla va ndyangu wakwe. Kunene hi wona nchumu lowu rhangaka emahlweni! Kambe i yini lexi nga xa nkoka ku tlula sweswo? I Moya! U fanele a tshamela ku humela ehandle leswaku a ta hefemula. Moya i nchumu lowu rhangaka emahlweni ku tlurisa. Hi ku fanana, hi nga ha boheka ku katseka efambiselweni leri ra swilo leswaku hi ta kota ku kuma swilo leswi lavekaka evuton’wini. Hambi swi ri tano, swilo swa moya swi fanele swi va swo rhanga hikuva vutomi bya va ndyangu wa hina byi titshege hi swona swilo leswi. Leswaku hi papalata mivilelo leyi nga lavekiki hi swilaveko swa swilo leswi vonakaka, hi fanele hi tshembela eka Xikwembu hi laha ku heleleke. Ku tlula kwalaho, ‘ku tirha swinene entirhweni wa Hosi’ swi nga hi pfuna ku hunguta ku vilela tanihi leswi “ku ṭaka ka Yehova” ku nga ta va khokholo ra hina ro tiya.—1 Vakorinto 15:58; Nehemiya 8:10.
Tshamani Mi Ri Karhi Mi Rhulela Yehovha Ku Vilela Ka N’wina
18. I vumbhoni byihi lebyi nga kona bya leswaku ku rhulela ku vilela ka hina hinkwako eka Yehovha hakunene swi nga hi pfuna?
18 Leswaku hi tshama hi langute swilo swa moya, hi fanele hi tshama hi ri karhi hi rhulela Yehovha mivilelo ya hina hinkwayo. Minkarhi hinkwayo tsundzuka leswaku kunene wa ma khathalela malandza ya yena. Hi xikombiso: Hikwalaho ka leswi nuna wa yena a a nga tshembekangi eka yena, wansati un’wana wa Mukreste u karhateke swinene lerova a nga ha swi koti ni ku etlela. (Ringanisa Pisalema 119:28.) Hambi swi ri tano, loko se a etlela, a a rhulela mivilelo yakwe hinkwayo eka Yehovha. A a chululela Xikwembu leswi nge xifuveni xakwe, a xi byela hi ta maxangu lawa yena ni vana vakwe vambirhi va vanhwanyana a va ma vona. Loko a hete ku rila ivi a khongelela mpfuno swi huma embilwini, a a kota ku etlela, hikuva a a tshemba leswaku Yehovha u ta n’wi hlayisa yena ni vana va yena. Wansati loyi a dlayeke vukati hi ku landza Matsalwa sweswi wa tiphina u tekiwe hi nkulu.
19, 20. (a) Hi nga langutana ni ku vilela hi tindlela tihi tin’wana? (b) Xana i yini lexi hi faneleke hi hambeta hi xi endla hi ku vilela ka hina hinkwako?
19 Tanihi vanhu va Yehovha, hi ni tindlela to tala to langutana ni ku vilela. Ku tirhisa Rito ra Xikwembu swi pfuna ngopfu. Hi ni swakudya leswi fuweke swa moya leswi nyikeriwaka hi Xikwembu hi ku tirhisa “nandza la tshembekaka, wo tlhariha,” ku katsa ni swihloko leswi pfunaka ni leswi phyuphyisaka leswi kandziyisiweke eka Xihondzo xo Rindza ni Xalamuka! (Matewu 24:45-47) Hi pfuniwa hi moya lowo kwetsima wa Xikwembu. Xikhongelo xa nkarhi na nkarhi ni lexi humaka embilwini xa hi pfuna swinene. Vakulu va Vakreste lava vekiweke va tshama va lunghekile naswona va swi lava ku pfuna ni ku chavelela hi tlhelo ra moya.
20 Ku titsongahata ka hina ni ku lehisa mbilu swi vuyerisa swinene loko hi langutana ni ku vilela loku nga hi welaka. Ngopfu-ngopfu ku tshembela hi laha ku heleleke eka Yehovha i swa nkoka swinene, hikuva ripfumelo ra hina ra akeka loko hi pfuniwa hi nkongomiso wa yena. Hi ndlela yoleyo, ripfumelo eka Xikwembu ri nga hi sivela ku karhateka swi nga fanelanga. (Yohane 14:1) Ripfumelo ri hi susumetela ku lava Mfumo ku sungula ivi hi tshama hi khomekile entirhweni lowu tsakisaka wa Hosi, leswi nga ta hi pfuna ku langutana ni ku vilela. Ntirho wolowo wu hi endla hi titwa hi sirhelelekile exikarhi ka lava va nga ta yimbelelela Xikwembu swidzuniso hi laha ku nga heriki. (Pisalema 104:33) Hikwalaho a hi hambeteni hi rhulela ku vilela ka hina hinkwako eka Yehovha.
A Wu Ta Hlamurisa Ku Yini?
◻ Ku vilela ku nga hlamuseriwa hi ndlela yihi?
◻ Xana hi nga langutana ni ku vilela hi tindlela tihi?
◻ Xana ku titsongahata ni ku lehisa mbilu swi nga pfuna ku hunguta ku vilela hi ndlela yihi?
◻ Leswaku hi langutana ni ku vilela, ha yini swi ri swa nkoka ku tshembela hi laha ku heleleke eka Yehovha?
◻ Ha yini hi fanele ku hambeta hi rhulela Yehovha ku vilela ka hina hinkwako?
[Xifaniso lexi nga eka tluka 24]
Xana wa swi tiva leswaku ha yini Yesu a te, “Mi nga tshuki mi vilela”?