Xiviko Xa Vahuweleri Va Mfumo
Yehovha U Ni Matimba Yo Tlula Valala Va Yena
DIYAVULOSI ni mademona yakwe i khale va ri karhi va ringeta ku sivela ku chumayeriwa ka mahungu lamanene hi ku tirhisa vukhongeri bya mavunwa ni vungoma. Bibele yi vulavula hi xikongomelo xo biha xa Sathana eka 2 Vakorinto 4:4 laha yi vulaka leswaku “xikwembu xa misava leyi xi pfarile miehleketo ya vanhu lava va nga pfumeriki; xi va sive mahlo leswaku va nga voni ku vangama ka Mahungu Lamanene lama twarisaka ku kwetsima ka Kriste, yena loyi a nga xifaniso xa Xikwembu.”
Kambe Yehovha Xikwembu u ni matimba ku tlula Sathana. Ku hava lexi valala va Yehovha va nga xi endlaka ku sivela ku hetisisiwa ka ku rhandza ka yena, ku nga leswaku “vanhu hinkwavo va ponisiwa, va fika laha va kotaka ku tiva leswi swi nga ntiyiso.” (1 Timotiya 2:4) Swiviko leswi landzelaka leswi humaka eka vahuweleri va Mfumo le Australia swi kandziyisa mhaka leyi.
◻ Endzhaku ka malembe ya 20 a tshike vukhongeri, wansati un’wana u tlhele a sungula ku dyondza Bibele. Ku tsakela loku ka Bibele ku n’wi endle leswaku a va ni swivutiso swo tala, kutani u kombele Xikwembu leswaku xi n’wi pfuna leswaku a kuma tinhlamulo. A a lava ku lavisisa ntiyiso, kambe u swi tivile leswaku ku tlhelela evukhongerini byakwe bya khale a swi nga ta xi ololoxa xiphiqo xakwe. Ematshan’weni ya sweswo, u sungule ku lavisisa kakwe hi ku endzela xitolo lexi hlayisaka tibuku ta khale kutani a vutisa loko va ri na tona tibuku ta vukhongeri.
N’wini wa xitolo u tsundzuke leswaku u na yona buku ya vukhongeri, ku nga ri exitolo, kambe ekaya. Vito ra buku a ri ku, U Nga Hanya Hi Masiku aParadeyisini eMisaveni, leyi humesiweke hi Timbhoni ta Yehovha. Wansati loyi u hlaye buku hi mahika kutani a kuma tinhlamulo ta swivutiso swo tala swa yena swa Bibele. Endzhaku ka ku lavisisa Timbhoni ta Yehovha ebukwini ya tiqingho, u kale a vulavula na tona kutani a sungula dyondzo ya nkarhi na nkarhi ya Bibele.
◻ Nhwana un’wana u hirhe vatirhi va maphepha-hungu va ndhawu ya ka vona leswaku va endla xinavetisi xo xavisa mhamba. Xinavetisi a xi yi hlamusela tanihi ‘mhamba ya malembe ya le xikarhi leyi nga ni matimba swinene.’ Un’wana wa Timbhoni ta Yehovha u vone xinavetisi lexi. U kunguhate ku ba riqingho ra nomboro leyi kombisiweke kutani a vulavula ni wansati malunghana ni xihlovo lexi ku vuriwaka leswaku matimba ya timhamba leti ma huma eka xona. Bulo ra langutelo ra Bibele hi mintirho ya mademona ri sungurile. Nhwana loyi u vule leswaku hi tolo xa kona, u kombele Xikwembu leswaku xi n’wi pfuna eka swiphiqo swakwe swa mademona. Mbhoni yi endle malunghiselelo ya bulo rin’wana hi riqingho.
Loko a ba riqingho, nhwana loyi a nga ri kona ekaya. Mana wa yena u hlamule riqingho kutani a ku: “A ndzi swi tivi leswaku n’wana wa mina u n’wi byele yini, kambe leswi humeleleke i masingita!” U hlamusele leswaku endzhaku ka loko a be riqingho ro sungula, n’wana wa yena u cukumete swifaniso ni tibuku hinkwato ta vugandzeri bya Sathana kutani a sungula ku hlaya Bibele.
Endzhakunyana ka sweswo, ku endliwe malunghiselelo yo endzela nhwana loyi hi xiviri. Hi ku hatlisa u amukele dyondzo ya nkarhi na nkarhi ya Bibele ni Timbhoni ta Yehovha. Nakambe u sungule ku hlangana ni Timbhoni hi ku va kona eminhlanganweni ya Vukreste. Nakambe, Yehovha u hlule mademona hi ku endla leswaku vutivi lebyi kongomeke bya ntiyiso wa Bibele byi vangama.