Timbhoni Ta Yehovha eMisaveni Hinkwayo—Puerto Rico

EXIKARHI ka Lwandle ra Kharibiya ni Lwandle-nkulu ra Atlantiki ku ni xihlala lexi andlalekeke lexi hisaka, xa Puerto Rico. Christopher Columbus u vule leswaku xi wela eSpain hi 1493, ivi a xi thya leswaku i San Juan Bautista hi ku tsundzuka Yohane Mukhuvuri. Doroba-nkulu ra xona a a ri vitaniwa Puerto Rico hi nkarhi wo leha kumbe “Hlaluko Leri Fuweke.” Hi ku famba ka nkarhi, vito leri ri hundzuke vito ra xihlala lexi hinkwaxo, ivi doroba-nkulu ri vitaniwa San Juan.

Puerto Rico ri tikombe ri ri hlaluko leri fuweke hi tindlela to tala. Nsuku wo tala a wu rhumeriwa wu suka laha emalembeni yo sungula ya ku fuma ka Spain. Xihlala lexi sweswi xi xavisela matiko mambe mova, kofi, miroho ni mihandzu-xilamula, hambi leswi vumaki ni mintirho yin’wana ku nga swona ngopfu-ngopfu swi khomeke ikhonomi namuntlha. Hambi swi ri tano, Puerto Rico ri tikombe ri ri hlaluko leri fuweke hi ndlela yin’wana ya nkoka swinene.

Mahungu lamanene ya Mfumo wa Xikwembu ma sungule ku chumayeriwa laha hi va-1930. Namuntlha, ku ni vahuweleri va mahungu lamanene vo tlula 25 000 ePuerto Rico. Hi 1993 ntlawa wa rhavi ra Sosayiti ya Watch Tower wu engeteleke wu suka eka 23 wu hundza eka 100. Ku engeteleka loku a ku laveka leswaku rhavi leri ri ta swi kota ku langutela vuhundzuluxeri bya tibuku ta Bibele ti ya eka Xipaniya, ku endlela leswaku tibuku toleto ti kumiwa hi vanhu lava vulavulaka Xipaniya, lava emisaveni hinkwayo va nga kwalomu ka 350 000 000.

Nsimu Leyintshwa

Nakambe hofisi ya rhavi ya vika: “Ku pfuleke nsimu leyintshwa le Puerto Rico hikuva a hi endla matshalatshala yo fikisa marungula ya Mfumo eka lavo fa tindleve. Makwerhu un’wana wa xisati u hlamusela ntokoto lowu landzelaka: ‘A ndzi tirha nsimu ya vanhu vo fe tindleve, hi loko ndzi endzela wansati un’wana la nga ni vana vambirhi lavatsongo. Loko a swi xiyile leswaku a ndzi ri Mbhoni, u ndzi ale ta ha suka hikuva nuna wa yena, loyi na yena a feke tindleve a nga ti lavi Timbhoni ta Yehovha.

“‘Endzhaku ka tin’hweti to hlayanyana, wansati loyi u endzele munghana wa yena loyi a a dyondza Bibele ni Timbhoni. U hlanganyerile ivi a yi tsakela ngopfu dyondzo. Ndzi endzele wansati luya nakambe, ivi a tlhela a vula leswaku nuna wa yena a nga ti lavi Timbhoni. Hambi swi ri tano, a a lava ku twisisa Bibele, naswona a a karhele hi kereke ya yena hikuva a yi nga va dyondzisi nchumu. Hi sungule ku dyondza hi ku tirhisa xiphephana. Siku rin’wana u ndzi byele ku tlhela ndzi vuya hi Mugqivela hikuva nuna wa yena a ta va a ri kona. Ndzi vutisile: “Kambe a nga hi tsakeli, a swi tano ke?” U hlamurile a ku: “U lava ku tiva hi ku kongoma leswi mi swi dyondzisaka.”

“‘Siku leri landzelaka va tile va ta gongondza enyangweni ya mina havambirhi! Leswi nuna loyi a ri ni swivutiso swo tala, ndzi va rhambele emihlanganweni ya hina ya lavo fe tindleve. U hatle a fika mina ndzi nga si fika, naswona ku sukela kwalaho a nga hupanga nhlangano ni wun’we. Sweswi u chumayela vanhu van’wana vo fe tindleve, naswona a a ri kona enhlengeletanweni, kutani u langutele ku khuvuriwa hi mahlo ngati.’”

Xiviko xa rhavi xi ya emahlweni xi ku: “Entsombanweni wa hina wa muganga lembe leri, xiyimiso a xi fambisiwa hi ririmi ra mavoko, kutani vanhu vo tala vo fe tindleve a va ri kona ni mindyangu ya vona. Nkulumo yo hetelela yi ve leyi nyanyulaka loko xivulavuri xi boxe ntirho lowu endliwaka exikarhi ka vanhu vo fe tindleve, ivi xi vula leswaku lava nga kona va kwalomu ka 70. Ku biwe mavoko swinene, kambe xivulavuri xi xiye leswaku lavo fe tindleve a va nga swi twi. Kutani xi kombele vanhu vo fe tindleve leswaku va languta vayingiseri, ivi xivulavuri xi phindha xivutiso, ‘Xana ma tsaka ku va ni vamakwenu va n’wina lavo fe tindleve laha ke?’ ivi xi kombela vayingiseri ku tlangela hi ku yimisela mavoko ya vona ehenhla. A swi tsakisa ku vona vamakwerhu va xinuna ni va xisati va 11 000 va kombisa ku tlangela ka vona hi ku yimisela mavoko ya vona ehenhla. Vamakwerhu va hina va xinuna ni va xisati vo fe tindleve a va tsake ngopfu lerova va tivona va ri xiphemu xa vumakwerhu lebyikulu. Vo tala va humese mihloti ya ntsako.”

Tanihi leswi Timbhoni ta Yehovha ti yaka emahlweni ti hlanganyela entirhweni wo tshovela ePuerto Rico, handle ko kanakana hlaluko leri ri ta hambeta ri ri leri fuweke. “Tinyimpfu” ta Xikwembu leti xi ti vitanaka “le’ŝi ranḍekaka ŝa matiko hikwawo” ti ta hambeta ti ta leswaku yindlu ya Yehovha yi tala hi ku dzuneka.—Yohane 10:16; Hagayi 2:7.

[Bokisi leri nga eka tluka 9]

XIVIKO XA TIKO

Lembe Ra Ntirho Ra 1994

NHLAYO YA LAVA NYIKELEKE VUMBHONI: 25 428

NTSENGO: Mbhoni yin’we eka vanhu va 139

LAVA VEKE KONA EXITSUNDZUXWENI: 60 252

XIRINGANISO XA VAHUWELERI VA MAPHAYONA: 2 329

XIRINGANISO XA TIDYONDZO TA BIBELE: 19 012

NHLAYO YA LAVA KHUVURIWEKE: 919

NHLAYO YA MAVANDLHA: 312

HOFISI YA RHAVI: GUAYNABO