Ririmi Leri U Ri Yingiselaka Hi Mahlo

XANA hi xihi xilotlelo xa ku vulavurisana hi ndlela leyi humelelaka ni munhu la Feke Tindleve? I ku langutana hi mahlo loku faneleke. Leswi swa boha eka vanhu lava Feke Tindleve loko va ri eku vulavuleni. Entiyisweni, loko vanhu vambirhi va vulavula hi ririmi ra mavoko, swi tekiwa ku nga ri ku kombisa xichavo loko un’wana a languta etlhelo a nga ha fambisani ni ku langutana hi mahlo. Kutani u nga swi kotisa ku yini ku endla leswaku munhu la Feke Tindleve a ku nyika nyingiso? Ematshan’weni ya ku vitana munhu wa kona hi vito, i swinene ku n’wi phakatanyana ekatleni kumbe evokweni, u n’wi yimisela voko leswaku a ku vona kumbe loko a ri ekule u yimisela munhu un’wana voko leswaku a ta ku khwenutela munhu loyi u lavaka yena. Loko swiyimo swi pfumela, u nga ba efilorweni kumbe u tsayitela timboni hi ku ti lumeka u tlhela u ti tima. Endlelo leri ni tindlela tin’wana leti faneleke ta ku kuma nyingiso ti engetela ntokoto eka vanhu lava Feke Tindleve naswona i xiyenge xa vutomi bya vanhu lava Feke Tindleve.

Lexi Tiyisaka Vun’we Bya Ririmi

Loko va hlangana ni munhu la Feke Tindleve, hi xihoxo van’wana va anakanye leswaku ku languta milomu loko a ri karhi a vulavula swa olova. Hambiswiritano, vanhu vo tala lava Feke Tindleve va vone ku ri ndlela leyi nga oloviki ya ku vulavurisana. Ina, minkarhi yin’wana swa koteka tanihi leswi vanhu van’wana va nga ni vuswikoti byo vona leswi milomu yi vulaka swona, kambe hi ntolovelo i swinene ku va u nga anakanyi leswaku munhu un’wana swi nga n’wi olovela ku twisisa leswi milomu ya wena yi vulaka swona. Kumbexana hi ku tirhisa toloki kumbe hi ku tsala ephepheni leswi u lavaka ku swi vula swi ta endla leswaku mi kuma ndlela yin’wana ya ku vulavurisana.

Hambiswiritano, loko nkarhi na nkarhi u hlangana ni vanhu lava Feke Tindleve, xana a swi nga ta va swinene loko a wo dyondza ririmi ra mavoko? Mayana vun’we bya risima lebyi nga ta va kona, ngopfu-ngopfu eka lava nga ni ripfumelo leri fanaka ni ra wena! Swi fana ni ku dyondza marito ya xisekelo ya ririmi rin’wana endhawini leyi ku vulavuriwaka tindzimi timbirhi. Timbhoni ta Yehovha i khale ti navela leswaku rungula leri khumbaka Yehovha Xikwembu ri kumiwa hi vanhu hinkwavo. Loko hi swi xiya leswaku vanhu lava Feke Tindleve a va nge dyondzi ku twa hi ndlela leyi tolovelekeke, i swinene swonghasi loko hi tihlanganisa na vona hi ku tirhisa ririmi ra mavoko!—1 Vakorinto 9:20-22.

Antonino u vula leswaku loko a sungule ku va kona eminhlanganweni ya Vukreste le Italy, eku sunguleni “a yi nga ri kona ndlela ya ku khutazana hi mabulo ni vamakwerhu lava kotaka ku twa. Hikwalaho ka leswi a hi nga twisisani, a ndzi khomiwa hi xivundza.” Swirho swo tala swa vandlha swi angule hi ku dyondza Ririmi ra Mavoko ra Mantariyana (LIS [Italian Sign Language]). Vanhu lava tsakelaka lava Feke Tindleve va sungule ku dyondza Bibele, naswona minhlangano a yi fambisiwa hi LIS. Antonino a tsake ngopfu naswona sweswi u ri ndzi navela “ku vulavula ni vanghana va mina hinkwavo lava Feke Tindleve malunghana ni minhlangano ya hina ni rirhandzu ra xiviri leri nga kona exikarhi ka vanhu va Yehovha.”

Emisaveni hinkwayo Timbhoni ta Yehovha ti simeka mavandlha ya ririmi ra mavoko, laha vanhu lava Feke Tindleve va swi kotaka ku tiphina hi xinakulobye lexikulu xa rirhandzu ni vanhu van’wana. Le Spain, mintlawa ya ririmi ra mavoko ya vanhu lava Feke Tindleve yi ve kona ku tlula malembe ya 20. EUnited States, sweswi ku ni mavandlha ya 19 lama hisekaka swin’we ni mintlawa leyitsongo yo ringana 47 ya vanhu lava Feke Tindleve.

Vanhu lava Feke Tindleve va swi kota ku tirha tanihi vatirheli va nkarhi hinkwawo (maphayona), malandza ya vutirheli ni ku va vakulu hambi ku ri ku nyikela tinkulumo emintsombanweni, va dyondzisa eXikolweni xa Ntirho xa Maphayona ni ku rhangela hi tindlela to tala. Eka xiyimo lexi a ku na swihinga, ko va ni malunghelo ya ku dzunisa Yehovha hi vuswikoti lebyi munhu a nga na byona.

Xilaveko xa hina lexi hi velekiweke na xona xa ku lava xinakulobye ni ku vulavurisana ni van’wana xa tikomba eka vanhu va mindhavuko ni tindzimi to tala emisaveni hinkwayo. Ematshan’weni ya ku teka vanhu lava Feke Tindleve onge hi loko va nga hanyanga kahle emiehleketweni, i swa risima swonghasi loko hi languta ku humelela ka vona, vuswikoti bya vona ni timfanelo leti endlaka hinkwerhu hi va vanhu! Hi ku xixima vanhu van’wana ni ku tiyimisela ka hina ku titwananisa ni swiyimo, hinkwerhu hi hoxa xandla eka ndyangu wa vanhu vo hambana-hambana lowu nga ni vun’we.

[Xifaniso lexi nga eka tluka 16]

Loko mi vulavula hi ririmi ra mavoko, languta munhu loyi u vulavulaka na yena

[Xifaniso lexi nga eka tluka 16]

Vanhu lava Feke Tindleve i vatirheli va nkarhi hinkwawo lava tsakeke

[Xifaniso lexi nga eka tluka 17]

Ku yimbelela tinsimu ta Mfumo hi mavoko hi Xipaniya

[Xifaniso lexi nga eka tluka 17]

Ku nyikela nkulumo entsombanweni hi Ririmi ra Mavoko ra le Korea

[Xifaniso lexi nga eka tluka 17]

Tibuku leti sekeriweke eBibeleni ti kombisiwa eka vhidiyo hi ririmi ra mavoko