Xalamukela Ku Kuma Vanhu Lava Feke Tindleve eNsin’wini Ya Ka N’wina
1 Yehovha u tisa xirhambo lexi nge: “‘Tana!’ . . . Mani na mani la swi navelaka a a nwe mati ya vutomi mahala.” (Nhlav. 22:17) Van’wana lava amukelaka xirhambo lexi i nhlayo leyi andzaka ya vanhu lava feke tindleve. Hikwalaho ka sweswo, emalembeni ma nga ri mangani lama hundzeke, ku simekiwe mintlawa ya tsevu leyi tirhisaka ririmi ra mavoko ensin’wini leyi welaka erhavini ra la Afrika Dzonga.
2 Hambileswi mintlawa leyi tirhisaka ririmi ra mavoko yi endlaka matshalatshala hinkwawo ya ku chumayela vanhu lava feke tindleve ni lava va nga twiki hi ku olova emasin’wini ya wona, va ha tele vanhu vo tano lava ha faneleke va kumiwa ivi va chumayeriwa etikweni leri.
3 U Nga Va Pfuna Hi Ndlela Yihi? Loko u ri etindhawini ta mani na mani, xana u vone vanhu lava vulavulaka hi mavoko? Xana ku ni loyi u n’wi tivaka laha u tirhaka kona kumbe exikolweni loyi ekaya ka vona ku nga ni munhu la feke tindleve? Xalamukela ku kuma vanhu lava feke tindleve loko u ri karhi u endla mintirho ya wena ya siku ni siku. Kambe u nga tiyisekisa ku yini leswaku na vona va chumayeriwa hi Mfumo?
4 Ku Va Chumayela: Tivisa ntlawa lowu tirhisaka ririmi ra mavoko lowu nga ekusuhi hi ta lomu munhu la feke tindleve a tshamaka kona. Sweswi, ku ni mintlawa leyi tirhisaka ririmi ra mavoko emavandlheni lama landzelaka: Assagay, Brixton, Constantia, Eersterus, Katutura South (eWindhoek) na le Norkem Park. Vanhu vo tala lava feke tindleve va dyondza ntiyiso hi xihatla loko va kota ku va kona eminhlanganweni ya vandlha ra Timbhoni ra vanhu lava feke tindleve, leyi fambisiwaka hi ririmi ra mavoko. Hikwalaho, loko ku ri ni ntlawa wa vanhu lava feke tindleve endhawini ya ka n’wina, matsalana wa vandlha ra ka n’wina u fanele ku wu rhumelela rungula malunghana ni vanhu lava feke tindleve lava nga ensin’wini ya ka n’wina. Vakulu va nga ha anakanya tindlela leti va nga pfunaka munhu la feke tindleve leswaku a va kona eminhlanganweni ya ntlawa lowu tirhisaka ririmi ra mavoko wa le kusuhi.
5 Ku vuriwa yini hi loko ku nga ri na munhu ekusuhi, la nga va pfunaka emoyeni vanhu lava feke tindleve, lava nga endhawini ya ka n’wina? Xana u nga va pfuna hi ndlela yihi? Ha yini u nga endli riendzo ro vuyela kutani u vulavula ni xirho xin’wana ni xin’wana lexi nga fangiki tindleve endyangwini wolowo? Kombela ku va kombisa vhidiyo ya ririmi ra mavoko leswaku yi ta pfuxa ku tsakela ka munhu la feke tindleve. Vahuweleri van’wana va kale va dyondza ni ririmi ra mavoko leswaku va kota ku va fikelela kahle vanhu lava feke tindleve. (Mint. 16:9, 10) Broxara leyi nge Leswi Xi Swi Languteleke ni buku leyi nge Vutivi swa kumeka hi vhidiyo ya Ririmi ra Mavoko ra le Amerika nakambe broxara leyi nge Leswi Xi Swi Languteleke ya kumeka hi Ririmi ra Mavoko ra le Britain. Ana se ku ve ni vuyelo byo tala lebyinene hi ku fambisa tidyondzo ta Bibele hi ku tirhisa switirho leswi.
6 Hi ku xalamukela ku kuma vanhu lava feke tindleve endhawini ya ka n’wina, u nga va nyika lunghelo ra ku nwa mati ya vutomi mahala.—Mat. 10:11.