“Dyondzo Ya Bibele Yi Pfuna Lava Feke Tindleve”
XIHLOKO lexi nga ni nhloko-mhaka leyi a xi kandziyisiwe eka magazini wa vanhu lava feke tindleve eCzech Republic. Zdeněk Straka, mutsari wa xihloko lexi, u bumabumele Timbhoni ta Yehovha leti dyondzeke ririmi ra mavoko leswaku ti ta pfuna lava feke tindleve.
I yini leswi susumeteleke Nkul. Straka ku tsala xihloko xo tano? Hi ximumu xa 2006, u ye entsombanweni wa Timbhoni ta Yehovha ePrague, laha nongonoko wa kona a wu tolokiwa hi ririmi ra mavoko leswaku vanhu va kwalomu ka 70 lava feke tindleve lava a va ri kwalaho va vuyeriwa. Lembe ni lembe, Timbhoni ta Yehovha ti hlela mintsombano emisaveni hinkwayo leswaku ti dyondzisa vanhu Bibele ni ku tsakela xinakulobye lexi akaka. Vanhu lava feke tindleve na vona va katsiwa. Elembeni rin’wana ra sweswinyana, 96 wa mintsombano yoleyo yi khomiwe hi ririmi ra mavoko ntsena emisaveni hinkwayo naswona etindhawini tin’wana ta 95, nongonoko wa kona wu tolokeriwe vanhu lava feke tindleve.
Hi nkarhi wa ntsombano ePrague, swirho swa vandlha ra ririmi ra mavoko ra le dorobeni rero a swi fambisa tidyondzo ta Bibele ni vanhu lava feke tindleve va kwalomu ka 30. Lava dyondzaka Bibele va vuyeriwa eka leswi va swi dyondzaka hilaha ntokoto lowu landzelaka wu swi kombisaka hakona.
Markéta u famba tikhilomitara leti tlulaka 100 vhiki na vhiki leswaku a ya fambisa dyondzo ya Bibele ni wansati la feke tindleve la humaka etikweni ra Mongolia. Ririmi ra mavoko ra le Czech Republic ni ra le Mongolia ri hambane swinene, kutani Markéta u fanele a tirhisa vutlhari leswaku a pfuna xichudeni xakwe leswaku xi twisisa rungula leri hlayiwaka. Kambe matshalatshala ya Markéta ma tswale mihandzu. Xichudeni xakwe lexi a xi tike n’wana wa vumbirhi, a xi lava ku susa khwiri kambe xi cince miehleketo. Markéta u ri, “Loko ndzi xi vutise leswaku ha yini xi cince miehleketo ya xona, xi hlamule hi ririmi ra mavoko xi ku, ‘Yehovha a nga swi tsakeli ku susiwa ka makhwiri.’ Ndzi tsake ngopfu hileswi ndzi xiyeke leswaku xi yi twisisile ndlela leyi Xikwembu xi byi langutaka ha yona vutomi!”a
Emisaveni hinkwayo, vanhu vo tala lava feke tindleve va kuma vutivi lebyi kongomeke bya Xikwembu hi ku dyondza Rito ra xona. Loko va ri karhi va va ni vuxaka lebyikulu ni Xikwembu xa vona ni ku kuma ntsako lowukulu, vutomi bya vona bya cinca byi va lebyinene.—Esaya 48:17, 18.
[Nhlamuselo ya le hansi]
a Loko u lava rungula leri engetelekeke malunghana ni langutelo ra Bibele hi ku susa khwiri, hlaya Xalamuka! ya June 2009, matluka 3-9.
[Bokisi leri nga eka tluka 26, 27]
XANA A WU SWI TIVA?
● Timbhoni ta Yehovha ti kandziyisa minongonoko leyi nga eka ti-DVD hi tindzimi ta mavoko ta 43. Ku nga tlhela ku kopiwa rungula eka Internet ra vanhu lava feke tindleve eka Website leyi nge www.jw.org.
● Timbhoni ta Yehovha ti hlele mintlawa ya vahundzuluxeri va tindzimi ta mavoko ta 59 emisaveni hinkwayo leswaku ku endliwa minkandziyiso leyi engetelekeke ya lava feke tindleve.
● Ku ni mavandlha yo tlula 1 200 ya ririmi ra mavoko ya Timbhoni ta Yehovha emisaveni hinkwayo.
[Dayagramu leyi nga eka tluka 26]
(Leswaku u vona rungula leri hleriweke hi ku helela, vona nkandziyiso wa kona)
www.jw.org