Xana U Nga Swi Antswisa Njhani Swikhongelo Swa Wena?

XIKHONGELO xi hlawulekile exikarhi ka malunghiselelo ya rirhandzu ya Yehovha Xikwembu. Vakaneti va nga ha ku tekela Bibele ya wena kumbe va ku sivela ku hlanganyela ni vagandzeri-kuloni, kambe ku hava la nga ku tekelaka xikhongelo. Xikhongelo i xa nkoka swinene. Kutani, i swa nkoka swonghasi eka un’wana ni un’wana wa hina ku tlangela ni ku ri tirhisa hi laha ku teleke lunghelo leri. Xana i yini xi nga ku pfunaka ku antswisa swikhongelo swa wena ke?

Bibele a hi buku ya swikhongelo. Kambe yi nga ha hlamuseriwa tanihi buku-mpfuno leyikulu ya vanhu hi xikhongelo. Matsalwa ya Xiheveru ma ri woxe ma ni swikhongelo leswi tlulaka 150. Swin’wana swi komile; swin’wana swi lehile. Swi vuriwe erivaleni kumbe exihundleni, hi tihosi kumbe mahlonga, eku hluleni kumbe enhlomulweni. Tanihi laha Davhida a yimbeleleke ha kona eka Pisalema 65:2, “v̌anhu hikwav̌o” va hundzukela eka Yehovha, “l’a yingisaka mikhongelo!” Ha yini Xikwembu xi huhutele vatsari va Bibele ku rhekhoda swikhongelo swo tano swo tala leswi hlawulekeke ke?

Ku hlamula xivutiso xolexo, xiya 2 Timotiya 3:16. Yi ri: “Matsalwa lawa hinkwawo ma huhutiwile hi Xikwembu, ma pfuna.” Xisweswo, swikhongelo swa le Bibeleni swi rhekhoderiwe leswaku swi hi kongomisa, ku fana ni vuprofeta bya Matsalwa, misinya ya milawu ni matimu. Xana swikhongelo leswi swi nga hi pfuna njhani?

Hi ku kambisisa swikhongelo swa Matsalwa, hi nga kota ku vona leswi vuriweke eswiyin’weni leswi fanaka ni swa hina. Hi nga ha dyondza ndlela leyi swikhongelo swi hambanaka ha yona hi swikongomelo ni mahlelelo ya swona. Tlhandla-kambirhi, hi ta tshubula marito lamantshwa yo dzunisa ni ku nkhensa, naswona hi ta kuma marito yo sungula swikombelo ni swikhongelo swa hina. Hi ku komisa, swikhongelo swa le Bibeleni swi nga hi pfuna ku antswisa swikhongelo swa hina.

Mariya, loyi a veke mana wa Yesu, a a ri munhu loyi handle ko kanakana a pfunekeke eka marito lama tirhisiweke eswikhongelweni leswi rhekhodiweke eBibeleni. U endzele xaka ra yena Elizabeta, endzhaku ka loko un’wana ni un’wana wa vona a tikile n’wana wa mufana hi mpfuno wa Xikwembu. Mariya u dzunise ni ku nkhensa Xikwembu, naswona man’wana ya marito ya yena ma fana swinene ni lama nga eswikhongelweni leswi nga eMatsalweni ya Xiheveru. Swi tikomba onge Mariya a a tolovelane ni xikhongelo lexi vuriweke hi Hana, mana wa muprofeta Samuwele. Hana na yena u tike n’wana wa mufana hikwalaho ka mpfuno wa Xikwembu, malembe lama tlulaka 1 000 emahlweninyana. Xana Mariya a nga va a anakanyisise hi xikhongelo lexi hikwalaho ka leswi xi fambisanaka ni mintlhaveko ya yena ke?—1 Samuwele 2:1-10; Luka 1:46-55.

Ku vuriwa yini hi wena ke? Xana u nga tsundzuka xikhongelo xa le Bibeleni lexi vuriweke ehansi ka swiyimo leswi fanaka ni swa wena ke? Ku lavisisa, ku hlaya ni ku anakanyisisa hi swikhongelo swo tano swi ta ku pfuna ku antswisa mbulavurisano wa wena ni Xikwembu. Exihlokweni lexi landzelaka, ha ku rhamba leswaku u kambisisa swikhongelo swinharhu leswi humaka eMatsalweni layo Kwetsima. Swi endliwe ehansi ka swiyimo swo hambana-hambana leswi kumbexana swi fanaka ni swa wena.