Xiviko Xa Vahuweleri Va Mfumo

Ku Chumayela Hi Nguva Yo Nonon’hwa

MUAPOSTOLA Pawulo u vhumbhe leswaku “emasikwini ya makumu, ku ta fika minkarhi yo nonon’hwa.” (2 Timotiya 3:1) Mawaku ndlela leyi marito wolawo ma vonakeke ma ri lama kongomeke ha yona! I khale vanhu va le El Salvador eAmerika Xikarhi va ri karhi va langutane ni maxangu lamakulu. Ku tlula malembe-khume lama hundzeke, tiko rero a ri ri ni nyimpi ya xin’wana-manana leyi tiseke ku xaniseka ni rifu ra magidi yo tala. Nyimpi yi herile sweswi, kambe ku xaniseka ku sele. Vugevenga byi andze ku tlurisa endzhaku ka nyimpi. Muhlamuseri un’wana wa mahungu eka thelevhixini wa ndhawu yoleyo sweswinyana u te: “Madzolonga ni vukhamba sweswi i swiendlakalo swa siku na siku.”

Timbhoni ta Yehovha na tona ti twisiwe ku vaviseka hi gandlati leri ra vugevenga. Makhamba ma tshove Tiholo ta Mfumo ma nghena ni ku yiva switirho swa mpfumawulo. Minkarhi yin’wana ntlawa wa vantshwa lava hlomeke wu nghene eTiholweni ta Mfumo loko tidyondzo ta Vukreste ti ri karhi ti ya emahlweni, va va tekela mali, tiwachi ni swin’wana swa nkoka eka lava a va ri kona. Loko va ha khomekile hi mintirho ya vona ya siku na siku, Timbhoni to hlaya ti dlayiwile hi makhamba.

Ku nga khathariseki xihinga lexi, Timbhoni ta Yehovha aEl Salvador ti ya emahlweni ti tirha hi matimba eku chumayeleni ka mahungu lamanene. Va endla leswi hi ku titsongahatela xileriso xa Matsalwa: “Evhangeli yi fanele ku rhanga yi twarisiwa ematikweni hinkwawo.” (Marka 13:10) Ka ha ri na vo tala endhawini leyi lava navelaka ntshembo wa Mfumo lowu Bibele yi wu tameleke, naswona Timbhoni ti tikarhatela ku fikelela un’wana ni un’wana wa vona. Ku nyikela vumbhoni hi xitshuketa ku vonaka ku ri ndlela leyi humelelaka ngopfu eku chumayeleni.

Loko Mbhoni yin’wana yi ri karhi yi tshunguriwa exibedlhele, yi tirhise nkarhi wun’wana ni wun’wana leswaku yi vulavula ni vavabyi van’wana malunghana ni switshembhiso swa Xikwembu hi vumundzuku, hi laha swi kumekaka ha kona eBibeleni. Un’wana wa swigulana loyi a vabya ngopfu hi gome u te: “Ndzi ta fa ku nga ri khale!” Kambe ku tsana loku xigulana a xi languteka xi ri na kona a ku endlanga leswaku Mbhoni yi hela matimba yo twarisa mahungu lamanene ya Mfumo wa Xikwembu. Ematshan’weni ya sweswo, yi hlayele wanuna luya buku leyi nge U Nga Hanya Hi Masiku aParadeyisini eMisaveni, leyi kandziyisiweke hi Timbhoni ta Yehovha. Endzhaku ka masikunyana, Mbhoni yi suke exibedlhele yi ri ni gome hi ku anakanya leswaku wanuna a a ri ekusuhi ni ku fa.

Endzhaku ka malembe ya mune Mbhoni leyi yi ye eka xibedlhele xin’wana yi ya tshunguriwa. Loko ya ha ri kwalaho, xigulana xi yi tshinelerile kutani xi ku: “Wa ha ndzi tsundzuka xana?” A ku ri wanuna loyi a hlanganeke na yena malembe ya mune lama hundzeke, wanuna loyi a ri kusuhi ni ku fa! Mawaku xihlamariso lexi tsakisaka loko wanuna a n’wi vukarha kutani a ku: “Sweswi na mina ndzi un’wana wa Timbhoni ta Yehovha!” Wanuna u amukele ntshembo wa Bibele malunghana ni vumundzuku, a dyondza Bibele ni Timbhoni ta Yehovha kutani a nyikela vutomi bya yena eka Yehovha. A nga ri Mbhoni ntsena kambe a a nghenele ni vutirheli bya nkarhi hinkwawo tanihi phayona ra nkarhi hinkwawo ku ringana malembe mambirhi.

Emhakeni leyi, mbewu ya ntiyiso leyi byariweke hi xitshuketa yi fikelele mbilu leyi tsakelaka. Lunghelo leri ro pfuna vanhu leswaku va tiva ntiyiso ri susumetela Vakreste va ntiyiso leswaku va ya emahlweni ni ntirho wo chumayela ku nga khathariseki “minkarhi [leyi] yo nonon’hwa.”