Mi Hlawulekile eMahlweni Ka Xikwembu!
“Nḍa ku ranḍa hi riranḍu le’ri nga heriki; hikwalaho nḍi ta ku hlayisela tintŝalo ta mina!”—YEREMIYA 31:3.
1. Xana langutelo ra Yesu eka vanhu lava tolovelekeke esikwini rakwe a ri hambane njhani ni ra Vafarisi?
AVA kota ku swi vona emahlweni ya yena. Wanuna loyi, Yesu, a nga fani nikatsongo ni varhangeri va vona va vukhongeri; a a khathalela. U ve ni ntwela-vusiwana eka vanhu lava hikuva a “va karhele, va tshamile ehansi, va fana ni tinyimpfu leti nga riki na murisi.” (Matewu 9:36) Varhangeri va vona va vukhongeri a va fanele ku va varisi lava nga ni rirhandzu lava yimelaka Xikwembu xa rirhandzu, xa tintswalo. Ematshan’weni ya sweswo, a va va tekela ehansi vanhu lava tolovelekeke va va teka tanihi lava nga pfuniki nchumu—lava rhukaniweke!a (Yohane 7:47-49; ringanisa Ezekiyele 34:4.) Kunene, langutelo ro tano leri hoxeke, leri nga fambisaniki ni Matsalwa a ri hambane ngopfu ni langutelo ra Yehovha eka vanhu vakwe. U byele tiko rakwe ra Israyele a ku: “Nḍa ku ranḍa hi riranḍu le’ri nga heriki.”—Yeremiya 31:3.
2. Xana vanghana vanharhu va Yobo va ringetise ku yini ku n’wi khorwisa leswaku a a nga pfuni nchumu emahlweni ka Xikwembu?
2 Kambe, Vafarisi a ku nga ri vona vo sungula ku ringeta ku khorwisa tinyimpfu ta Yehovha leti rhandzekaka leswaku a ti nga pfuni nchumu. Anakanya hi mhaka ya Yobo. Eka Yehovha a a lulamile, a ri hava xisolo, kambe “vachaveleri” vanharhu va vule leswaku Yobo a ri mugwinehi wo homboloka, wo biha loyi a ta fa a nga ha tsundzukiwi. Va vule leswaku Xikwembu a xi nga ta vona vululami eka Yobo, hikuva a swi tsandza ni tintsumi ta xona, Xikwembu a xi nga ti tshembi naswona a xi languta tilo ri nga basanga!—Yobo 1:8; 4:18; 15:15, 16; 18:17-19; 22:3.
3. Xana Sathana u tirhisa ndlela yihi namuntlha leswaku a ringeta ku khorwisa vanhu leswaku a va pfuni nchumu naswona a va rhandzeki?
3 Namuntlha, Sathana wa ha tirhisa ‘xiendlo lexi xa vukanganyisi’ xa ku ringeta ku khorwisa vanhu leswaku a va rhandziwi naswona a va pfuni nchumu. (Vaefesa 6:11, nhlamuselo ya le hansi, NW) I ntiyiso leswaku hakanyingi u yenga vanhu hi ku vulavula hi vuhava ni vutikukumuxi bya vona. (2 Vakorinto 11:3) Kambe u tlhela a tsakela ku susa xindzhuti xa lava tsaneke. Leswi swi tano ngopfu-ngopfu “emasikwini [lawa] ya makumu” yo nonon’hwa. Vo tala namuntlha va kulela emindyangwini leyi nga ‘riki na rirhandzu ra ntumbuluko’; vo tala siku na siku va langutana ni vanhu va nsele, va vutianakanyi ni lava omeke tinhloko. (2 Timotiya 3:1-5) Malembe yo tala ya ku karhatiwa, xihlawuhlawu, rivengo kumbe ku khomiwa hi ndlela yo biha ma nga ha va ma endle va kholwa leswaku a va pfuni nchumu ni leswaku a va rhandzeki. Munhu un’wana u tsale a ku: “A ndzi rhandzi munhu naswona a ndzi rhandziwi hi munhu. Swa ndzi tikela swinene ku pfumela leswaku Xikwembu xa ndzi khathalela.”
4, 5. (a) Ha yini mhaka ya ku nga pfuni nchumu ka munhu yi nga fambisani ni Matsalwa? (b) Hi byihi vuyelo byin’wana lebyi nga ni khombo bya ku pfumela leswaku matshalatshala yerhu hinkwawo a hi ya nkoka?
4 Mhaka ya ku va munhu a titwa a nga pfuni nchumu yi ba mongo wa ntiyiso wa Rito ra Xikwembu, dyondzo ya nkutsulo. (Yohane 3:16) Loko Xikwembu xi hakele ntsengo lowukulu swonghasi—vutomi bya risima bya N’wana wa xona—leswaku xi hi nyika lunghelo ra ku hanya hi laha ku nga heriki, kunene xa hi rhandza; hi fanele hi ri va nkoka swinene emahlweni ka xona!
5 Ku tlula kwalaho, a swi ta hi heta matimba swinene ku tiva leswaku a hi xi tsakisi Xikwembu, ni leswaku matshalatshala ya hina hinkwawo i ya hava! (Ringanisa Swivuriso 24:10.) Hi ku ya hi langutelo leri leri hoxeke, hambi ku ri xikhutazo lexinene, lexi endleriweke ku hi pfuna hi ya emahlweni ni ntirho wa hina eka Xikwembu laha swi kotekaka kona, eka van’wana xi nga ha twala tanihi xisolo. Xi nga ha tikomba xi kandziyisa ndlela leyi hi titwaka ha yona ya leswaku hinkwaswo leswi hi swi endlaka a swi enelanga.
6. Hi wihi nchumu lowukulu lowu nga hi pfunaka ku papalata ku va ni mianakanyo leyi hoxeke?
6 Loko u titwa hi ndlela yo tano leyi hoxeke, u nga heli mbilu. Vo tala va hina hi swi xopaxopa ngopfu swihoxo swa hina nkarhi na nkarhi. Naswona tsundzuka, Rito ra Xikwembu ri endleriwe “ku ololoxa” ni ku “hirimuxa makhokholo.” (2 Timotiya 3:16; 2 Vakorinto 10:4) Muapostola Yohane u tsarile: “Kutani, ndlela ya ku hi khorwisa leswaku hi vanhu va ntiyiso, ni ya ku tiyisa ripfalo ra hina emahlweni ka Xikwembu hi leyi: Loko ripfalo ra hina ri hi avanyisa, hi tiva leswaku Xikwembu xi tlula ripfalo leri ra hina hi vukulu, naswona xi tiva hinkwaswo.” (1 Yohane 3:19, 20) Kutani, a hi kambisiseni tindlela tinharhu leti Bibele yi hi dyondzisaka ha tona leswaku hi va va risima eka Yehovha.
Yehovha U Ku Languta U Ri Wa Nkoka
7. Xana Yesu u va dyondzise njhani Vakreste hinkwavo malunghana ni nkoka wa vona emahlweni ka Xikwembu?
7 Xo sungula, Bibele yi hi dyondzisa hi ku kongoma leswaku un’wana ni un’wana wa hina i wa nkoka emahlweni ka Xikwembu. Yesu u te: “Xana swi[n]dzingiri swa ntlhanu a swi xaviwi hi tisente timbirhi xana? Kasi a ku na xin’we xa swona lexi rivariweke emahlweni ka Xikwembu. Hambi yi ri misisi ya tinhloko ta n’wina yi hlayiwile hinkwayo. Mi nga chaveni; mi tlula swindzingiri leswo tala hi nkoka.” (Luka 12:6, 7) Emasikwini wolawo, swindzingiri a swi ri tinyanyana ta nxavo wa le hansi swinene leti a ti xavisiwa tanihi swakudya, kambe ku hava ni yin’we ya yona leyi nga xiyiwangiki hi Muvumbi wa yona. Kutani ti endla xisekelo xa ku ringanisiwa loku hlamarisaka: Malunghana ni vanhu—lava nga va nkoka swinene—Xikwembu xi tiva vuxokoxoko hinkwabyo. Onge hi loko misisi hinkwayo ya tinhloko ta hina yi hlayiwa ha un’we-un’we!
8. Ha yini swi twisiseka ku anakanya leswaku Yehovha a nga hlaya misisi ya tinhloko ta hina?
8 Yini, misisi yi hlayiwa? Loko u vona onge xiphemu lexi xa xifaniso xa Yesu a hi xa xiviri, anakanya: Xikwembu xi tsundzuka malandza ya xona yo tshembeka hi ku helela lerova xi kota ku ma pfuxa—xi tlhela xi ma vumba hi ku helela, ku katsa ni matimba lama rharhanganeke ya xitekela ni malembe ya wona hinkwawo ya swilo leswi ya swi tsundzukaka ni mintokoto ya wona. Ku hlaya misisi ya hina (leyi eka nhloko yin’wana ni yin’wana hi xiringaniso yi fikaka kwalomu ka 100 000) swi nga va xintirhwana xo olova loko ku ringanisiwa!—Luka 20:37, 38.
Xana Yehovha U Vona Nkoka Wihi Eka Hina?
9. (a) Hi tihi timfanelo tin’wana leti Yehovha a ti tekaka ti ri ta nkoka? (b) Ha yini u ehleketa leswaku timfanelo to tano i ta risima eka yena?
9 Xa vumbirhi, Bibele yi hi dyondzisa nkoka lowu Yehovha a wu vonaka eka hina. Hi ku olova, u tsakela timfanelo ta hina letinene ni matshalatshala ya hina. Hosi Davhida u byele n’wana wakwe Solomoni a ku: “Yehova a kamba timbilu hikwato, kutani a tiv̌isisa makungu hikwawo ya ku anakanya.” (1 Tikronika 28:9) Loko Xikwembu xi kambela timbilu ta vanhu va magidi ya timiliyoni emisaveni leyi taleke madzolonga ni rivengo, xi fanele xi tsaka swinene loko xi kuma mbilu leyi rhandzaka ku rhula, ntiyiso ni ku lulama! (Ringanisa Yohane 1:47; 1 Petro 3:4.) Xana ku humelela yini loko Xikwembu xi kuma mbilu leyi teleke rirhandzu ra xona, leyi lavaka ku dyondza ha xona ni ku avela van’wana vutivi byebyo? Eka Malakiya 3:16, Yehovha u hi byela leswaku u yingisa lava vulavulaka ni van’wana ha yena naswona u ni “buku ya šiṭunḍušo” ya hinkwavo “la’v̌a tšhav̌aka Yehova ni la’v̌a ṭunḍukaka v̌ito ra yena.” Timfanelo to tano i ta risima eka yena!
10, 11. (a) Xana van’wana va nga byi honisa njhani vumbhoni bya leswaku Yehovha u teka timfanelo ta vona letinene ti ri ta nkoka? (b) Xana xikombiso xa Abiya xi swi kombisisa ku yini leswaku Yehovha u ti teka ti ri ta nkoka timfanelo hinkwato letinene?
10 Hambi swi ri tano, mbilu leyi tisolaka yi nga ha ala vumbhoni byo tano bya nkoka lowu hi nga na wona emahlweni ka Xikwembu. Endzeni ka yona yi nga ha tshamela ku vula yi ku, ‘Kambe ku na van’wana vo tala lava vekaka xikombiso lexinene xa timfanelo leti ku tlula mina. Yehovha u fanele a hela matimba hakunene loko a ndzi ringanisa na vona!’ Yehovha a nga ringanisi munhu, naswona a nga tiyi ku tlula mpimo, naswona a nga na mimpimanyeto leyi nga hundzukiki. (Vagalatiya 6:4) U kambela timbilu hi vuxiyaxiya lebyikulu, naswona u pima timfanelo letinene hi tindlela hinkwato.
11 Hi xikombiso, loko Yehovha a lerise leswaku muti hinkwawo wa vugwinehi wa Hosi Yerobuwamu lowu gwineheke wu lovisiwa, wu susiwa ku fana ni “tšhyaka,” U lerise leswaku un’we ntsena wa vana va hosi, ku nga Abiya, a lahliwa hi ndlela leyinene. Hikwalaho ka yini? “Ka yena . . . ku kumiwile le’ŝinene e mahlweni ka Yehova, Šikwembu ša Israel.” (1 Tihosi 14:10, 13) Xana leswi a swi vula leswaku Abiya a ri mugandzeri wo tshembeka wa Yehovha? Kahle-kahle a swi vuli sweswo, hikuva u file, ku fana ni ndyangu wakwe wo biha. (Deteronoma 24:16) Kambe, ‘swilo leswinene’ leswi Yehovha a swi voneke embilwini ya Abiya u swi teke swi ri swa nkoka naswona u angule hi ndlela leyi faneleke. Matthew Henry’s Commentary on the Whole Bible yi ri: “Laha ku nga ni nchumu wo karhi lowunene, wu ta kumiwa: Xikwembu lexi xi wu lavaka, xa wu vona, hambi wu ri wutsongo swinene, naswona xa tsaka ha wona.” Naswona u nga rivali leswaku loko Xikwembu xi kuma hambi ku ri mpimo lowutsongo wa mfanelo leyinene eka wena, xi nga yi kurisa loko u tikarhatela ku xi tirhela hi ku tshembeka.
12, 13. (a) Xana Pisalema 139:3 yi swi kombisa njhani leswaku Yehovha u teka matshalatshala ya hina ma ri ya nkoka? (b) Xana ku nga vuriwa leswaku Yehovha u hlunguhla mintirho ya hina hi ndlela yihi?
12 Yehovha u ma teka ma ri ya nkoka hi ndlela yoleyo matshalatshala ya hina. Eka Pisalema 139:1-3, hi hlaya leswi: “Yehova! u nḍi kambile, wa nḍi tiv̌a; u tiv̌a loko nḍi ṭhama, ni loko nḍi pfuka; u tiv̌a meehleketo ya mina u ri kule; wa nḍi kamba loko nḍi famba, ni loko nḍi etlela, kutani u tiv̌a tindlela ta mina hikwato.” Hikwalaho Yehovha u xiya swiendlo swa hina hinkwaswo. Kambe a nga gimeti hi ku swi xiya ntsena. Hi Xiheveru marito lama nge “u tiv̌a tindlela ta mina hikwato” ma nga ha tlhela ma vula leswaku “u teka tindlela ta mina hinkwato ti ri ta nkoka” kumbe “u tlangela tindlela ta mina hinkwato.” (Ringanisa Matewu 6:19, 20.) Kambe, xana Yehovha a nga ti tlangela njhani tindlela ta hina tanihi leswi hi nga hetisekangiki naswona hi nga ni vudyoho?
13 Lexi tsakisaka, hi ku ya hi swidyondzi swin’wana, loko Davhida a tsala leswaku Yehovha u ‘kambe’ ku famba kakwe ni ku wisa kakwe, hi Xiheveru hi laha ku kongomeke a swi vula ku “hlunguhla” kumbe “ku peperha.” Buku yin’wana ya tinhlamuselo yi te: “Swi vula . . . ku peperha mungu hinkwawo, ku sala mavele hinkwawo—ku hlayisa hinkwaswo leswi nga swa nkoka. Kutani laha swi vula leswaku Xikwembu, hi ndlela yo fanekisela, xi n’wi hlunguhlile. . . . Xi hangalase hinkwaswo leswi a swi ri mungu, kumbe hinkwaswo leswi a swi nga pfuni nchumu, kutani xi vona leswi a swi sele swi ri swa xiviri ni swa ntiyiso.” Mbilu leyi tisolaka yi nga ha hlunguhla swiendlo swa hina hi ndlela leyinene, yi hi tshinya hikwalaho ka swihoxo leswi hundzeke ni ku kombisa mintirho ya hina yi ri ya hava. Kambe Yehovha u hi rivalela swidyoho swa hina loko hi tikarhatela ku hundzuka ni ku lwela ku ka hi nga engeti swihoxo swa hina. (Pisalema 103:10-14; Mintirho 3:19) Wa hlunguhla naswona u tsundzuka mintirho ya hina leyinene. Entiyisweni, u yi tsundzuka hi laha ku nga heriki loko hi tshama hi tshembekile eka yena. A nga swi teka tanihi mona ku rivala leswi, naswona a nga na mona nikatsongo!—Vaheveru 6:10.
14. I yini lexi kombisaka leswaku Yehovha u yi teka yi ri ya nkoka mintirho ya hina evutirhelini bya Vukreste?
14 Hi yihi mintirho yin’wana leyinene leyi Xikwembu xi yi tekaka yi ri ya nkoka? Xin’wana ni xin’wana lexi hi xi endlaka hi ku tekelela N’wana wa xona, Yesu Kreste. (1 Petro 2:21) Kutani, entiyisweni ntirho wun’wana wa nkoka swinene i ku hangalasiwa ka mahungu lamanene ya Mfumo wa Xikwembu. Eka Varhoma 10:15 (BX), ha hlaya: “Yi sasekile ŝonghasi; milenge ya la’v̌a v̌ulaka timhaka le’to saseka!” Hambi loko milenge yerhu leyi nga nyawuriki hi vona onge a yi ‘sasekanga,’ rito leri Pawulo a ri tirhiseke laha ra fana ni leri tirhisiweke eka vuhundzuluxeri bya Septuagint ya Xigriki ku hlamusela Rhaveka, Rahele na Yosefa—lava hi vunharhu bya vona a va tiviwa hi vuxongi bya vona. (Genesa 26:7; 29:17; 39:6) Kutani ku endla ka hina ntirho wa Yehovha, Xikwembu xa hina, swi sasekile swinene naswona i swa risima emahlweni ka yena.—Matewu 24:14; 28:19, 20.
15, 16. Ha yini Yehovha a teka ku tiyisela ka hina ku ri ka nkoka, naswona marito ya Hosi Davhida eka Pisalema 56:8 ma yi kandziyisa njhani mhaka leyi?
15 Mfanelo yin’wana leyi Xikwembu xi yi tekaka yi ri ya nkoka i ku tiyisela. (Matewu 24:13) Tsundzuka, Sathana u lava leswaku u fularhela Yehovha. Siku rin’wana ni rin’wana leri u tshamaka u tshembekile eka Yehovha ha rona u va u hoxe xandla eku nyikeleni ka nhlamulo ya swihehlo swa Sathana. (Swivuriso 27:11) Minkarhi yin’wana ku tiyisela a swi olovi. Swiphiqo swa rihanyo, swiphiqo swa timali, gome ra mintlhaveko, ni swihinga swin’wana swi nga endla leswaku siku rin’wana ni rin’wana ri nonon’hwa. Ku tiyisela emiringweni yo tano i swa risima swinene eka Yehovha. Hi yona mhaka leyi Hosi Davhida a kombeleke Yehovha leswaku a hlengeleta mihloti yakwe “e khuwaneni” ro fanekisela, a vutisa hi xivindzi a ku, “A yi ṭariwanga e bukwini ya wena šana?” (Pisalema 56:8) Ina, Yehovha u hlayisa ni ku tsundzuka mihloti hinkwayo ni ku xaniseka loku hi langutanaka na kona hi ku hlayisa vutshembeki eka yena. Na swona swi hlawulekile emahlweni ka yena.
16 Hi ku ya hi timfanelo ta hina letinene ni matshalatshala ya hina, swi le rivaleni swinene leswaku Yehovha u kuma swo tala leswi nga swa nkoka eka un’wana ni un’wana wa hina! Ku nga khathariseki leswaku misava ya Sathana yi hi khomise ku yini, Yehovha u hi languta hi ri va risima ni xiphemu xa swilo “le’ŝi ranḍekaka ŝa matiko hikwawo.”—Hagayi 2:7.
Leswi Yehovha A Swi Endleke Leswaku A Kombisa Rirhandzu Rakwe
17. Ha yini gandzelo ra nkutsulo ra Kreste ri fanele ku hi khorwisa leswaku Yehovha na Yesu va rhandza un’wana ni un’wana wa hina?
17 Xa vunharhu, Yehovha u endle swo tala leswaku a kombisa rirhandzu rakwe eka hina. Hakunene, gandzelo ra nkutsulo ra Kreste i nhlamulo ya matimba swinene eka mavunwa ya Sathana ya leswaku a hi vuli nchumu kumbe a hi rhandzeki. Hi nga tshuki hi rivala leswaku rifu ra Yesu leri twisaka ku vava emhandzini ya nxaniso ni nhlomulo lowukulu, lowu Yehovha a veke na wona hi ku vona N’wana wakwe la rhandzekaka a fa a swi kombisa ku hi rhandza ka vona. Tlhandla-kambirhi, rirhandzu rolero ri tirha eka hina hi hexe. Muapostola Pawulo u swi langute hi ndlela yoleyo, hikuva u tsarile a ku: “N’wana wa Xikwembu [u] ndzi [rhandzile], a va a tinyiketa hikwalaho ka mina.”—Vagalatiya 2:20.
18. Xana Yehovha u hi kokela eka Kreste hi ndlela yihi?
18 Yehovha u kombise ku hi rhandza ka yena hi ku hi pfuna leswaku hi vuyeriwa eka mimpfuno ya gandzelo ra Kreste. Yesu u vule leswi eka Yohane 6:44: “A ku na munhu la nga taka ka mina loko a nga kokeriwi ka mina hi Tatana la ndzi rhumeke.” Hikwalaho ka ntirho wo chumayela, lowu fikaka eka hina, ni hi ku tirhisa moya wa yena lowo kwetsima, lowu Yehovha a wu tirhiselaka ku hi pfuna leswaku hi twisisa ni ku tirhisa ntiyiso wa moya ku nga khathariseki ku tsana ni ku nga hetiseki ka hina, Yehovha hi byakwe u hi kokela eka N’wana wakwe ni ntshembo wa vutomi lebyi nga heriki. Hikwalaho Yehovha a nga vula eka hina hi laha a vuleke ha kona eka Israyele: “Nḍa ku ranḍa hi riranḍu le’ri nga heriki; hikwalaho nḍi ta ku hlayisela tintŝalo ta mina!”—Yeremiya 31:3.
19. Ha yini lunghelo ra xikhongelo ri fanele ku hi khorwisa leswaku Yehovha wa hi rhandza?
19 Kambe, swi nga ha endleka leswaku hi kuma rirhandzu ra Yehovha hi ndlela leyikulu, hi ku tirhisa lunghelo ra xikhongelo. U hi rhamba leswaku hi “nga tshiki ku khongela” eka yena. (1 Vatesalonika 5:17) Wa yingisela! Nakambe u vuriwa “l’a yingisaka mikhongelo.” (Pisalema 65:2) Lunghelo leri a nga ri nyikanga munhu un’wana, hambi ku ri N’wana wakwe. Anakanya: Muvumbi wa vuako hinkwabyo u hi khutaza leswaku hi n’wi tshinelela hi xikhongelo, hi vulavula hi ntshunxekile. Swikombelo swa wena swi nga ha tlhela swi susumetela Yehovha leswaku a endla leswi kumbexana a a nga ta swi endla.—Vaheveru 4:16; Yakobo 5:16; vona Esaya 38:1-16.
20. Ha yini hi nga fanelanga hi tilanguta hi ri va nkoka kumbe hi tikukumuxa hikwalaho ka rirhandzu ra Xikwembu?
20 Ku hava Mukreste la ringaniselaka loyi a nga langutaka ku kombisiwa ko tano ka rirhandzu ra Xikwembu ni xichavo tanihi xivangelo xa ku titeka a ri wa nkoka swinene ku tlula leswi a nga swona hakunene. Pawulo u tsarile: “Hikwalaho ka tintswalo leti ndzi nga nyikiwa tona, ndzi byela un’wana ni un’wana wa n’wina, ndzi ku: Mi nga tshuki mi ehleketa leswaku mi tlula van’wana hi vukulu; kambe mi fanele ku titsongahata, mi ya hi mpimo wa ku pfumela lowu Xikwembu xi aveleke un’wana ni un’wana wa n’wina.” (Varhoma 12:3) Kutani loko hi ri karhi hi kufumetiwa hi rirhandzu ra Tata werhu wa le tilweni, a hi veni ni mianakanyo leyi hlutekeke naswona hi tsundzuka leswaku musa wa Xikwembu wa rirhandzu a wu hi lulamelanga.—Ringanisa Luka 17:10.
21. Hi wahi mavunwa ya Sathana lawa hi faneleke hi hambeta hi ma papalata, naswona hi fanele hi tshama hi anakanyisisa hi ntiyiso wihi wa Xikwembu?
21 Un’wana ni un’wana wa hina a endle matshalatshala yo papalata mianakanyo hinkwayo leyi Sathana a yi hlohlotelaka emisaveni leyi ya khale leyi faka. Sweswo swi katsa ku ala mianakanyo ya leswaku hi vanhu lava nga pfuniki nchumu kumbe lava nga rhandzekiki. Loko vutomi bya mafambiselo lawa byi ku dyondzise ku tilanguta onge u xihinga lexikulu lexi hambi ku ri rirhandzu lerikulu ra Xikwembu ri nga taka ri nga xi hluli, kumbe u vona onge mintirho ya wena leyinene a yi nyawuli kutani mahlo ya xona lama vonaka hinkwaswo a ma nge yi xiyi, kumbe u vona onge swidyoho swa wena swi tele ngopfu lerova hambi ku ri rifu ra N’wana wakwe a ri nge swi funengeti, u dyondzisiwe mavunwa. Ala mavunwa yo tano hi laha ku heleleke! A hi tshameni hi ri karhi hi tsundzuka marito lama huhuteriweke ya muapostola Pawulo eka Varhoma 8:38, 39: “Ndzi kholwa swinene ngopfu leswaku, hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba leyi nge henhla mpfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.”
[Nhlamuselo ya le hansi]
a Entiyisweni, a va vitana swisiwana hi rito ro tsongahata leri nge “ʽam-ha·ʼaʹrets,” kumbe “vanhu va tiko.” Hi ku ya hi xidyondzi xin’wana, Vafarisi a va dyondzisa leswaku munhu a nga fanelanga a rindzela swilo swa nkoka eka vona, kumbe a tshemba vumbhoni bya vona, kumbe ku va rhamba va va vaendzi va yena, kumbe a va endzela, kumbe hambi ku ri ku xava eka vona. Varhangeri va vukhongeri va vule leswaku loko nhwana wa munhu wo karhi a tekiwa hi un’wana wa vanhu lava swi nga fana ni ku n’wi hoxa eswiharhini.
I Yini Leswi U Swi Anakanyaka?
◻ Ha yini Sathana a ringeta ku hi khorwisa leswaku a hi pfuni nchumu naswona a hi rhandzeki?
◻ Xana Yesu u dyondzise njhani leswaku Yehovha u teka un’wana ni un’wana wa hina a ri wa nkoka?
◻ Hi swi tivisa ku yini leswaku Yehovha u teka timfanelo ta hina letinene ti ri ta nkoka?
◻ Hi nga tiyiseka njhani leswaku Yehovha u teka matshalatshala ya hina ma ri ya nkoka?
◻ Xana Yehovha u ri kombise njhani rirhandzu rakwe eka hina vanhu?
[Xifaniso lexi nga eka tluka 13]
Yehovha u xiya a tlhela a tsundzuka hinkwavo lava anakanyaka hi vito ra yena